1-3. Mâ ǃaroma di ǃgaon ǀoasa ǁaeba aoǁnâ sîsen-e ra dī ǃgâsana ǁîn ǁgaumâide a ǀkharaǀkhara ǁkhā?

“21 KURIGAM aimâba-ao sîsen-e dī hâ hînan ge sim hoam di ǁgûna kaise ge ǀaesen” tira ge Roberti tsî Mary Jo hāra ra mî. “Kaisem ge ge ǂkhî i ǁîna kōǃgâsa. Xawe i ge kaise noxoba ge tsûtsûsa i sim ge ǀnam ǃkhaiba xu bēsa.”

² “Sada di ǀaeb mâsigu ga mā-am da tama io sada di ǁgaumâidi ǀkha aiǃgûsa o da ge ra ā” ti ra ge Williami tsî Terries tsîra ra mî. “Sim di ǁhawos Jehovaba ǀnî hâ ǃhūb ǃnâ sī ǃoabas dis ge ge ǀam”.

³ “ǂAn da ge ge î sida mâǃoa-aon ǁnâub berosa ra ǂganam ǂgaosa” tib ge Alekseyba ra mî. “Xawes ge ǁnâub berosa ǂganam-e o, o da ge kaise ge tsûaǂgao hâ i.”

4. Mâ dîde da nē ǁkhāǁkhāǃâs ǃnâ nî ǃhoaǃgao?

⁴ ǂGuin hîna ǀoasa ǁaeba aoǁnâ sîsen-e ra dīn tsî ǁnān hîna ǁnâub berodi tawa ra sîsen an tsîn ge ǀasa ǁgaumâide ge hō. * Kaise i ge nē ǃgâsana a ǃgomba ǁkhā ǁîn a ǀnam ǁgaumâide ǀam kaisa. Tae-e a hui nî ǁkhā nē ǀkharaǀkharana ūǃoasa? Mati da ǁîna a hui ǁkhā? Nē dîdi ǃereamdi ge hoada nî hui ǀkharaǀkharana da ga sada ûib ǃnâ hōǃâ o.

5. Sada ǁgaumâide ǀkharaǀkharahesa mâ ǀgaub ǃnâ a tsâǀkhā da ǁkhā?

⁵ Nēsi da ga Betels tamas ka io aimâba-aose sîsen tama i xawe da ge khoen tsî sida ra sîsen ǃkhaiga nî ǀnam. ǀNî hâ ǁgaumâide da ga mā-e o, o da ge tsūse ra tsâ. ǃGâsan hîna ra hâ ǃgauna da ge ra ǁkhore. Tsî da ge ǁîn xa ra ǂâi, ǁgâiǀāgu xa ǃaromahe hâse da ga ī o. (Mat. 10:23; 2Kor. 11:28, 29) ǀAsa ǁgaumâi-e ū tsî omsa ǃoa oas ge nî ǃgomba da. “Sim ge kaikhâi ǀgaub tsî sim gowab ǃnâ aoǁnâs tsînab ge ge ǀuru,” di ra ge Roberti tsî Mary Jo hāra ra mî. “ǃHaokhoen khamim ge gere tsâ.” ǀNîn hîna ǀkhara ǁgaumâide ra mā-en ge mari ǃgomsina a hōǃâ tsoatsoa ǁkhā. Tsî ǂkhabuǂâi tsî ǁgaise ra tsâ. Tae-e nē ǃgâsana a hui ǁkhā?

6. Mati da Jehovab ǀgūse a hâ ǁkhā?

⁶ Jehovab ǀgūse hâ re. (Jak. 4:8) Nēsa da mati a dī ǁkhā? ‘ǀGorede ra ǁnâub’ ǁîb ai da ge nî ǂgomaiǂnûi. (Psa. 65:2) ‘ǁHōǂui re sadu di ǂgaoga’ dis ge Psalmdi 62:8 sa ra mî. Jehovab ge ‘sada ra ǂgan tsî ǁnâuǃān hoana ǃnāǂamsase a dī ǁkhā.’ (Efe. 3:20) Jehovab ge ǂgan bi da ra xūn ǀguina mā da tama hâ. ǁÎb ge ǂâi tama da hâ ǀgaugu ǃnâ sida ǃgomsina a ǀamǀam ǁkhā.

7. (a) Tae-e nî huida Jehovab ǀgūse hâsa? (b) Hebreǁîn 6:10-12 ǃoagu da mâ ǀkhaega hōǃâ ǁkhā, Jehovaba da ga ra ǃoaba ǀgara o?

⁷ Jehovab ǀgūse du ga ra hâ ǂgao o, o Elobmîsa tsēs hoasa khomai tsî khomai du ra xūna ǂâiǃgâ re. ǀGui sîsabeb ge ge mî: “Hoaǁae omaris ǃoabasa ūhâ tsî ǀhaodi amsi aiǂhomisen, sadu ǁgaumâis ǃnâ du gere ǀnai dī khami.” Aiǃgû re, sadu ǀasa ǀhaohâb ǀkha aoǁnâ sîsenni ǃnâ sîsensa. Jehovab ge ǁnān hîna ǁîba ra ǂgomǂgomsase ǃoaban sîsenga ǀuru tama hâ. ǂGuron gere dī khamin ga dī tama i xawes tsîna.—Khomai re Hebreǁîn 6:10-12.

8. 1 Johaneb 2:15-17 ǃnâ hâ mîde mati a huida ǁkhā i da sida ǂâide ǂhâǂhâsa xūn ai mâi?

⁸ Sadu ûiga supuse ūhâ re. Tā ǁGâuab ǃhūbaib ǃgomsina mā-am re în “ǀhūǀhū”  du Jehovaba ǃoaba ǀûs ǃnâ. (Mat. 13:22) Tā Jehovaba ǃoaba tama khoena ǃgâ re, tamas ka io sadu ǀhōsan tsî ǀaokhoen hîna ra mîna, ǂgui mari-e du ge nî sîsenba ǃgâi ûiba ūhâs ǃaroma. (Khomai re 1 Johaneb 2:15-17.) Jehovab ai ǂgomaiǂnûi re, hîna ra sada di gagasi, emosioneel tsî sorosi ǂhâsiga “ǂhanu ǁaeb ǃnâ” mā ba.—Heb. 4:16; 13:5, 6.

9. ǂKhoamîdi 22:3, 7 ǃoagu da tae-i ǃaroma surudega xu nî ǂgōsen tsî tae-e nî huida ǃgâi mîǁguiga dīs ǃnâ?

⁹ ǂHâbasa tama surudega xu ǂgōsen re. (Khomai re ǂKhoamîdi 22:3, 7.) ǀNî hâ ǃāsa ǃoa da ga doe o, o da ge ǂgui mari-e a sîsen-ū ǁkhā tsîs ge nēsa a ǃaroma ǁkhā i da surudegu ǃnâ ǂgāsen. Surudega xū da ga ǂgōsen ǂgao o, o da ge tā mari-e ǂgan tsî ǂhâbasa tama hâ xūna nî ǁama. Kaise i ge a ǃgom ǁkhā ǂanǂuisa matikō mari-e da nî sîsen-ūsa ǀaesen hâ ǀaokhoe-e da ga kōǃgâ o. Nēti i mâsigu ǃnâ du ga hâ o, o ‘ǀgore tsî ǀkhoma’ re îb Jehovaba gā-aisiba mā du ǃgâi mîmâiga dīs ǃaroma. Sadu di ǀgorede ǃereams ǃnâb ge Jehovaba “sadu ǂgaogu tsî ǂâidi tsîna” nî sâu tsî nî hui du ǃgâi mîǁguiga dīs ǃnâ.—Fil. 4:6, 7; 1Pet. 5:7.

10. Mati da ǀasa ǀhōsana a kuru ǁkhā?

¹⁰ ǃGâi ǀhōsaguside ūhâ re. Sa ǀhōsan ǀkha sa tsâsigu tsî ǃgomsin xa ǃhoa re ǃgōsase ǁnān hîna ǁkhā mâsigu ǃnâ ge hâ în ǀkha. Nēsa da ga dī o, o da ge ǃgâise a tsâ ǁkhā. (Aoǁn. 4:9, 10) Sadu ǂguro ǁgaumâidi ǃnâ du ge dī ǀhōsan ge hoaǁae nî sadu ǀhōsa i. Xawe du ge sadu di ǀasa ǁgaumâis ǃnâs tsîna ǀhōsana nî kuru. ǂÂis ǃnâ ūhâ re, ǀhōsana du ga ǂhâba o, o du ge sado nî ǃgâi ǀhōsa i. Mati da ǀasa ǀhōsana nî kuru? ǁÎna sadu ge Jehovab di ǃoabas ǃnâ ūhâ i ǃgâi ǁaegu tsî dī du ge xūn xa mîba re în sadu di ǂkhîb, nē xūna dīsa xu du ra hōba mû. ǀNî ǀhaohâb ǁanin ge ǁnâuǃā tide tae-i ǃaroma du ǀoasa ǁaeba aoǁnâ sîsenni ǃnâ ǁguiǂgāsens xa a ǃgâibahesa xawen ge ǀnîna ǃnāsase nî ǂan ǂgao tsî nî sadu ǀhō kai. Xawe tā ǁnātikōse sadu ge Jehovab ǃoabas ǃnâ a dī xūn xa ǀgui ǃhoa re tamas ka io ǁgai tsâsigu hîna du ūhâ gu xa.

11. Mati du ǂkhî ǃgameba a ūhâ ǁkhā?

¹¹ Sadu di ǃgame khoe-i di ǀaeb mâsib amsi du ga sadu ǁgaumâisa ǀam kai o, o tā ǁî-e ǀhapimā re. Xawes ga nēsa sadu ǀaeb mâsib xa a ǃaromahe o, o tā ǂâi re sadu ǃgao ro go ǁnā ǁgaumâisa a ǀûsa. ǂÂis ǃnâ ūhâ re ‘ǀgui ǁganro’ a sa tsîro  ge Jehovab aiǃâ a mîmâisa hoa ǃgomsin ǃnâ ro nî hâbagusa. (Mat. 19:5, 6) ǃÂubasen tama ro hâ hînas ga kaikhoesa a ǀgamǀkhā o, o saro ǀgôa-e ǂanǂan re ǁî-i kaise a ǂhâǂhâsasa saro ǁgaumâis xa. Saro ǀgôa-e mîba re ‘ǀumixū-i’ a ǃkhaisa Eloba xu. (Psa. 127:3-5) ǃGâi ǁaeb hîna ro ge saro ǁgaumâis ǃnâ ūhâ îb xas tsîna mîba î re. Nēs ge saro ǀgôa-e nî hui i i ǁî-i tsîna Jehovaba ǀoasa ǁaeba saro ge dī khami ǃoaba.

12. (a) Mati da ǀoasa ǁaeb aoǁnâ sîsenni ǃnâ ra ǁhao ǃgâsana a hui ǁkhā în nēs ǀkha aiǃgû? (b) Mati da a hui nî ǁkhā în ǁîn di ǀasa ǁgaumâis ǃnâ hâ ǀgara?

¹² ǂGui ǀhaohâgu tsî ǃgâsan ge ǁnān hîna ǀoasa ǁaeb aoǁnâ sîsenni ǃnâ ra ǁhaona ra hui în ǁîn ǁgaumâidi ǃnâ hâ ǀgara. ǁÎn ge nēsa ǁîna ǁîn di ǂhâsigu ǀkha huis tamas ka io ǁîn ǀaokhoe-i hîna ǀaesen hâ-e kōǃgâba nîs ǃnâ-ūs tsîna a dī ǁkhā. (Gal. 6:2) ǀOasa ǁaeb aoǁnâ-aon ga sadu ǀhaohâga ǃoa sîhe o, o tā ǂâi re ǁîn, ǁîn sîsenna ǃgâise ǁnān hâba dī tama tamas ka io tsū xū-e dī hâ di. * ǁÎna hui re is nēsa ǃhaese dī-e ǁkhā. ǁKhoreǁhare nî re tsî dīn ge sîsenni amsi koa nî re, ǀaeb mâsib xan ga nēsi ǃnāsase dī tama i xawe. ǁÎn ǀkha ǀhōsagusisa kuru re. ǁÎn di gā-aisib, ǁkhāǁkhāsen an ge xūn tsî ǂans tsîn xa ǃnāsase ǁkhāǁkhāsen re.

13. Tae-i huiba da ǀasa ǁgaumâide ra mā-e ǃgâsana a mā ǁkhā?

¹³ ǁNān hîna ǀasa ǁgaumâide ūhân ge  omde ôa huihe, ǃnarimân nî ǀgausa ǁgau-e tsî ǀnî hâ xūn hînan ǂhâ hân ǀkhas tsîna nî hui-e. ǁÎn ge ǁnā ǂharis ǃnân xūna ra dī-e ǀgaus xa nî mîbahe tsî ǂhanub tae-e ǁîna xu ra ǃâubasens tsîna. Xawe i ge kaise nî ǃgâi ǁîn di mâsiba da ga ǁnâuǃā o. ǁÎn tamas ka io, o i ge ǁîn ǀaokhoe-e ǀaeb mâsiba ūhâ hîna ǃgomsiba ra ǃaroma-e. Tamas ka ion ge ǀaokhoe-i di ǁōb amsi ra ǃoa. * Tsî nēs xan ga ǃhoa tama i xawen ge ǁîn di ǀhōsana ra ǁkhore. ǁÎn ge ǁaeba ǂhâ hâ nē tsâsiga sîsenǂams ǃaroma.

14. ǀHaohâb ǁanina mati ǀgui ǃgâsasa ge hui îs ǁîs ǀasa ǁgaumâis ǀkha aiǃgû?

¹⁴ ǁÎn ǀkha da ga ǀguiba aoǁnâ tsî ǂkhâǃnâ nî o, o da ge sada di ǃgâi aiǁgaus ǀkha a hui nî ǁkhā ǁîn di ǁgaumâidi ǃnâ mâ ǀgarasa. ǀGui ǃgâsas hîna ǀnî hâ ǃhūb ǃnâ gere ǃoabas ge ra mî ‘tsēs hoasas khoena Elobmîsa gere ǁkhāǁkhā’ di. “Xawe ta ge ti ǀasa ǁgaumâis ǃnâ khoe-e Elobmîs tsîna ge khomaiba tamas ka io vidio-e ǁgau ǁoa i. Xawen ge ǀhaohâb ǁanina gere ǁkhau te tsî ta ge aoǁnâ sîsenni ǃnâ ǁîn ǀkha gere sîsen. Nē ǁkhoaǂgao ǃgâsan hîna khoena Elobmîsa ra ǁkhāǁkhāna mûs ge ti mûǂuiba ti ǀasa ǁgaumâis ǃoa-ai ra ǀkharaǀkhara. Khoen ǀkha ta ti ǀasa ǂharis ǃnâ nî ǃhoa ǀgauba ta ge ge ǁkhāǁkhāsen. Nēs ge ge hui te ǂkhîba ūhâsa.”

15. Mati du sadu di ǀasa ǁgaumâidi ǃnâ ǃgâise a dī ǁkhā?

¹⁵ Sadu ǁgaumâidi ǃnâ du ge ǃgâise a dī ǁkhā. Tā ǂâi re sadu di ǂguro ǁgaumâis ǃnâ du ge ǃgâi tamase dī di tamas ka io du nēsi ǁnātikōse ǂhâhe tama hâ di. Jehovab ra hui du ǂgui ǀgaugu xa ǂâi tsî sadu di aoǁnâ sîsenni ǀkha aiǃgû re. ǂGuroǁaeb Xristeǁîn di ǃgâi aiǁgaude ǁgae re. Sīn gere ǃkhai-i hoa-i ain ge  mîsa gere “ǂhôa.” (ǃNǃkh. 8:1, 4) Sadu aoǁnâ sîsenni ǀkha du ga aiǃgû o, o du ge ǃgâiba nî ǀama. Aiǁgause ra ge ǀnî hâ aimâba-aora ǃhūba xu ge ǂoa kaihe, o ra ge ǂhâsiba ge ūhâ i ǃhūba ǃoa ge doe. ǀOro ǁkhâgu ǃnân ge ǂgui khoena aimâba-aora gere ǃhoa gowab ǃnâ ǀhaode ge ǁhao tsoatsoa.

16. Mati du ǂkhîba sadu ǀasa ǁgaumâidi ǃnâ a ūhâ ǁkhā?

¹⁶ “ǃGâiaǂgaob ǃKhūb ǃnâ du ūhâb ge a sadu di ǀgai xuige.” (Neh. 8:10) Sada ǀnammi ge Jehovab ǀkha da ūhâ ǀhōsagusisa xu nî ǀkhī, sada ǁgaumâidi ose, kaise da ga sada ǁgaumâide ǀnam xawe. ǁNā-amaga Jehovab ǀkha sîsenǀhao tsî ǁîb gā-aisib, daoǁgaus tsî ǂkhâǃnâsa ǂgan re. Sadu di ǂguro ǁgaumâisa du ge ge ǀnam i khoena du gere hui amaga. Sadu di ǀasa ǁgaumâide ǀnam re, ob ge Jehovaba nî hui du.—Aoǁn. 7:10.

17. Tae-e da sada ǀasa ǁgaumâidi xa ǂâis ǃnâ nî ūhâ?

¹⁷ ǂÂis ǃnâ da ge nî ūhâ sada ǃoabas Jehovab ǃoa-ai da ūhâs ge ǀam-e ūhâ tama xawe sada di ǁgaumâidi ge ǀamsa ūhâ. ǂÂis ǃnâ da ge nî ūhâ sada ge Jehovaba ǀamosib kōse nî ǃoaba tsî sada di ǁgaumâidi ge ǀasa ǃhūbaib ǃnâ a dawa-e ǁkhā. Alekseyb hîna da ǀgapise goro ǃhoaǃgaob ge ra mî, ǁîb di ǀasa ǁgaumâis ge ǁîba ǀasa ǃhūbaib amsi ra aiǂhomi di. “Jehovab tsî ǀasa ǃhūbaib tsîn a amasa ta ge gere ǂgom xawes ge nēsa gaxuse gere ū hāsa” tib ge Alekseyba ra mî. “Xawe ta ge Jehovaba ti ǀgūse ra mû tsî ǀasa ǃhūbaiba kaise ǀgūse.” (ǃNǃkh. 2:25) Jehovab ge tātsē ǁnāxū da tide xawe ǂkhîba nî mā da ǁîba ǃoabas ǃnâ mâpa ǀgui da ga hâ xawe.—Jes. 41:13.