PAULUB ǁaeb ǃnâ î ge khoen xa a sîsen-ūhe ǁkhā ǂgauga ge ǀkhai i. ǂGaub ǀkha i gere ǃnari ǂgao o, o î ge khoe-e ǁnamaxūhe ra xūna ūhâ ǂgaub ǃnâ ra sîsen khoe-e gere ǂgan ǁî-i ǁnā ǂgaub ǀkha a ī ǁkhāsa. (ǃNǃkh. 21:2, 3) ǂGaub ge ǁî-i ra ī ǀkhāba ǃoa ī tama hâ i xawe î ge khoe-e ǀnî hâba ǁnôa tsî ǁî-i ra ī ǃkhaisa ǃoa ra ī ǂgaub ai gere ǂoa.​—ǃNǃkh. 27:1-6.

ǂGaub ge hoaǁae ge sîsen-ūhe tama hâ i tsî māsa ǁaeb tsîna ge ūhâ tama hâ i. ǃGâi tama ǂoab mâsib ǂam-ai gu ge ǂgau ǃnari-aoga, ǁgai tsâsiga gu gere ūhâ o, o ge ǃnari tama hâ i, nēs ge ǀnîsi gu ga khôa hâ ǂgauba mû os tsîna. ǂGau ǃnari-aogu ge ǃgâi ǂoab mâsiga gere sîsen-ū tsî mâsib ge ǃgâi io, o gere ǃnari. Khoe-i ge ǁî-e nî ī-ū ǂgauba gere hō o, o i ge ǁî-i ǁgarudi ǀkha sī gere ǃâu ǂgaub ge ra ī di i nî mî-es kōse.

“Romes ge supu ǀgauba ge ūhâ i khoen ǂgauba nî hōsa, ǁîn ge aitsama ge ôa tama hâ i” dib ge Lionel Cassoniba ra mî. “ǂGaugu ge Tiber ǃāb tawa ge hâ i. Ostia di hâ ǃās hîna ge ǀgūse hâ is ge kai ǁamaxū ǃkhaiba ge ūhâ i hîna ge ǂgui berode ūhâ iba. Nē berode xu i ge ǂguide ge nē ǂgaugu ǃnari-aogu di i: Narbonne ǂgau ǃnari-aogu, Carthage ǂgau ǃnari-aogu tsî ǀnî hâ ǂgau ǃnari-aogu tsîn ge ge hâ i. Khoe-i hîna ge ǂgaub ǀkha gere ī ǂgao i ge ǁî-i ra ī ǃās ǂgaub berosa ôa tsî ǁnāpa gere ī.”

ǂGaub ǀkha ǃnaris ge ǂgui ǁaeba gere sâu xawe ǁkhōǁkhōsasiba ge ūhâ i. ǂGui ǃnāde i ge Paulub ge hâǃnâ hâ i ǂgauba ge khôa.​—2Kor. 11:25.