၂၀၂၄ ခုနှစ်၊ ဩဂုတ်နဲ့ စက်တင်ဘာလအတွင်း ကနေဒါနိုင်ငံတစ်ဝန်းမှာ အထူးကင်ပိန်းတွေ လုပ်ဆောင်ခဲ့တယ်။ ကင်ပိန်းအတွင်း တွေ့ကြုံမှုကောင်းများစွာ ရခဲ့ပါတယ်။

ကနေဒါနိုင်ငံ မြောက်ဖျားပိုင်းဒေသ အထူးဟောပြောခြင်း ကင်ပိန်းမှာ ယေဟောဝါသက်သေ ၈၀၀ ကျော်ပါဝင်ခဲ့တယ်။ ညီအစ်ကို၊ ညီအစ်မတွေဟာ နုနဗွတ်ပြည်နယ်၊ အီခါလဝစ်မြို့၊ အနောက်မြောက်ဒေသ၊ ရဲလိုးနိုက်ဖ်မြို့၊ ယူကွန်ဒေသ၊ ဝိုက်ဟော့စ်မြို့ကို သွားကြတယ်။ အဲဒီကို ရောက်တာနဲ့ အုပ်စုလေးတွေအဖြစ် ခွဲလိုက်ပြီး လမ်းမပေါက်တဲ့၊ ဝေးလံခေါင်သီတဲ့ မြို့ငယ်၊ ရွာငယ် ၃၉ ခုဆီကို လေယာဉ်နဲ့ ခရီးဆက်ကြတယ်။ ကနေဒါနဲ့ အမေရိကန်က လေယာဉ်ရှိတဲ့ ယေဟောဝါသက်သေ လေယာဉ်မှူးတွေက ညီအစ်ကို၊ ညီအစ်မတွေကို ကြိုပို့ပေးကြတယ်။ ကင်ပိန်းအတွင်း လူပေါင်း ၂၇၅ ယောက်က ကျမ်းစာသင်အံမှုကို လက်ခံတယ်။ သူတို့ကို တယ်လီဖုန်းနဲ့ ဒါမှမဟုတ် ဗီဒီယို ချိတ်ဆက်ပြီး ကျမ်းစာသင်အံမှုဆက်လုပ်ဖို့ စီစဉ်ထားပါတယ်။

ရဲလိုးနိုက်ဖ်မြို့မှာ ညီအစ်မတစ်ယောက်က သူတို့အုပ်စုတည်းခိုတဲ့ ဟိုတယ်က အလုပ်သမားတစ်ယောက်ကို ဖော်ဖော်ရွေရွေ စကားစလိုက်တယ်။ အဲဒီအမျိုးသမီးက ကမ္ဘာ့အခြေအနေတွေကြောင့် စိတ်မကောင်းဖြစ်နေတဲ့အကြောင်း ပြောတော့ ညီအစ်မက ပျော်စရာဘဝ ထာဝရ စံစားကြ စာစောင်ပြပြီး အနာဂတ်နဲ့ပတ်သက်တဲ့ ကျမ်းစာပါမျှော်လင့်ချက်အကြောင်း ရှင်းပြတယ်။ အမျိုးသမီးက အဲဒီကတိတွေအကြောင်း ပိုသိချင်တဲ့အတွက် ဗီဒီယို ချိတ်ဆက်ပြီး ဆက်ဆွေးနွေးဖို့ စီစဉ်လိုက်တယ်။

ညီအစ်ကို၊ ညီအစ်မ ၆၀၀ နီးပါးဟာ ကနေဒါနိုင်ငံက မြို့ကြီးသုံးမြို့မှာ လုပ်ဆောင်တဲ့ ဟောပြောခြင်းကင်ပိန်း လေးခုမှာ ပါဝင်ကြတယ်။ မွန်ထရီအောမြို့မှာ အာရဗီ ဘာသာစကား၊ ဗန်ကူးဗားမြို့မှာ တရုတ်မန်ဒရင်းဘာသာစကားနဲ့ ပါးရှန်းဘာသာစကား၊ ဘရမ်တန်မြို့နဲ့ တိုရွန်တိုမြို့နားမှာ ပန်ချာဘီ ဘာသာစကားနဲ့ ကင်ပိန်းတွေ လုပ်ခဲ့ပါတယ်။ ကင်ပိန်းအတွင်း လူ ၁၀၀ ကျော် ကျမ်းစာသင်အံမှုကို လက်ခံတယ်။

မွန်ထရီအောမြို့မှာ ညီအစ်မနှစ်ယောက် တစ်အိမ်မှတစ်အိမ် အမှုဆောင်နေရင်း အိမ်တစ်အိမ်ကို တံခါးခေါက်လိုက်တော့ အာရပ်အမျိုးသမီးငယ်တစ်ယောက် တံခါးလာဖွင့်တယ်။ အခက်အခဲတွေ ဘာကြောင့်ဒီလောက်များနေသလဲဆိုတာ နားလည်အောင် ကူညီပေးပါလို့ ဘုရားဆီ သူဆုတောင်းနေတာ။ ပျော်စရာဘဝ ထာဝရ စံစားကြ စာစောင်ကို ဝမ်းသာအားရ လက်ခံပြီး ကျမ်းစာ စလေ့လာတယ်။

ဗန်ကူးဗားမြို့မှာ ညီအစ်မနှစ်ယောက် ဘတ်စကားစီးသွားနေတုန်း အီရန်က အမျိုးသမီးတစ်ယောက်နဲ့ ဆုံတယ်။ ညီအစ်မတွေက ပါးရှန်းဘာသာစကားနဲ့ နှုတ်ဆက်လိုက်တော့ သူဝမ်းသာသွားတယ်။ လွန်ခဲ့တဲ့ ၁၅ နှစ်လောက်ကတည်းက ကျမ်းစာကို စဖတ်ခဲ့တာဖြစ်ကြောင်း၊ ဒါပေမဲ့ နားလည်ဖို့ ခက်ကြောင်း သူပြောပြတယ်။ ညီအစ်မတွေက ကျမ်းစာလေ့လာမှု အစီအစဉ်ကနေ ဘုရားသခင့် တရားစကားတော်ကို ပိုနားလည်သဘောပေါက်နိုင်ကြောင်း ရှင်းပြတယ်။ အမျိုးသမီးက နောက်နေ့မှာ ပြန်ဆုံဖို့ သဘောတူလိုက်တယ်။ အခုတော့ ကျမ်းစာ လေ့လာနေပါပြီ။

ရလဒ်ကောင်းတွေ ရတဲ့အကြောင်း ကြားရလို့ ကျွန်တော်တို့ ဝမ်းသာပါတယ်။ ဒီကင်ပိန်းမှာ ပါဝင်ခဲ့ကြတဲ့ ညီအစ်ကို၊ ညီအစ်မတွေရဲ့ ကိုယ်ကျိုးစွန့် ကြိုးစားအားထုတ်မှုကို ယေဟောဝါ တန်ဖိုးထားလေးမြတ်မယ်ဆိုတာကို ကျွန်တော်တို့ ယုံကြည်စိတ်ချပါတယ်။—ဆာလံ ၁၁၀:၃။