ခွင့်ယူထားတဲ့ မီးသတ်သမားက အသက်ကယ်
၂၀၁၄၊ ဇန်နဝါရီ ၅၊ တနင်္ဂနွေနေ့မှာ ဆာ့ဂျ် ဂျရာဒန်ဟာ ပြင်သစ်နိုင်ငံ၊ ပါရီမြို့နားမှာ ကျင်းပတဲ့ ယေဟောဝါသက်သေများရဲ့ စည်းဝေးပွဲကို ဘတ်စကားနဲ့ သွားနေတုန်း ပြင်းထန်တဲ့ မတော်တဆ ကားတိုက်မှုကို တွေ့လိုက်ရတယ်။ “ကားတစ်စီးဟာ တံတားကို ကာထားတဲ့ ကွန်ကရစ် နံရံကို တိုက်ပြီး လေထဲ မြှောက်တက်သွားတယ်။ တံတားနဲ့ တိုက်မိပြီး မီးထလောင်တယ်။ မြေပေါ် ပြောင်းပြန်ကျလာတယ်” လို့ ပြန်ပြောပြတယ်။
ဆာ့ဂျ်က မီးသတ်သမား လုပ်တာ အနှစ် ၄၀ ကျော်ပြီ။ မီးသတ်တပ်ဖွဲ့ ခေါင်းဆောင်တစ်ယောက် ဖြစ်တဲ့အတွက် ချက်ချင်း တုံ့ပြန်တယ်။ သူဒီလို ပြန်ပြောပြတယ်– “ကျွန်တော်တို့က ဆန့်ကျင်ဘက်အရပ်ကို သွားနေတာ ဖြစ်ပေမဲ့ ကားဆရာကို ကားရပ်ခိုင်းပြီး မီးလောင်နေတဲ့ ကားဆီ ပြေးသွားတယ်။” “ကယ်ပါဦး” ဆိုတဲ့ အော်သံ ဆာ့ဂျ် ကြားလိုက်တယ်။ “ကျွန်တော်က ကုတ်အင်္ကျီ၊ လည်စည်းနဲ့။ မီးသတ်ပစ္စည်း တစ်ခုမှ မရှိဘူး။ အော်သံကြားတော့ ကယ်နိုင်သေးတယ်ဆိုတဲ့ အသိဝင်လာတယ်” လို့ ပြောပြတယ်။
ကားကို ပတ်ကြည့်ပြီး ထိတ်လန့် တွေဝေနေတဲ့ လူကို ကယ်ထုတ်လိုက်တယ်။ “ကားထဲမှာ နှစ်ယောက် ရှိသေးတယ်တဲ့။ အဲဒီအချိန်မှာ ကားအတော်များများလည်း ရပ်နေပြီ။ ဒါပေမဲ့ မီးအရှိန်ကြောင့် ဘယ်သူမှ မကပ်ရဲဘူး။”
ထရပ်ကားသမားတွေ မီးသတ်ဆေးဗူးတွေနဲ့ ရောက်လာတယ်။ ဆာ့ဂျ် ညွှန်ကြားတဲ့အတိုင်း ကားကို မီးသတ်ပေးကြတယ်။ ခဏတော့ မီးညွှန့်ကျိုးသွားတယ်။ ကားသမား ကားအောက်မှာ ပိတ်မိနေတယ်။ ဆာ့ဂျ်နဲ့ နောက်တစ်ယောက်က ကားကို မပြီး ကားသမားကို ကယ်ထုတ်လိုက်တယ်။
“အဲဒီအချိန်မှာ ရုတ်တရက် မီးထတောက်လာတယ်။” ကားထဲမှာ ခရီးသည်တစ်ယောက် ကျန်နေသေးတယ်။ ထိုင်ခုံခါးပတ်နဲ့ ဇောက်ထိုး ဖြစ်နေတယ်။ ခွင့်ယူထားတဲ့ မီးသတ်သမားတစ်ယောက် ထပ်ရောက်လာတယ်။ ဆိုင်ကယ် သားရေအင်္ကျီ ဝတ်ထားတယ်။ “ကားက ပေါက်ကွဲတော့မယ့်ပုံပဲ။ ဒါကြောင့် ကားထဲကလူရဲ့ လက်မောင်းကို ကိုင်ပြီး ဆွဲထုတ်ဖို့ ဆုံးဖြတ်လိုက်တယ်။” ဆွဲထုတ်ပြီး တစ်မိနစ်တောင် မပြည့်သေးဘူး။ ကား ပေါက်ကွဲသွားတယ်။
မီးသတ်တပ်ဖွဲ့တွေ၊ ဆေးတပ်သားတွေ ရောက်လာတဲ့အခါ ဒဏ်ရာရသူတွေကို ကြည့်ရှုပေးကြတယ်၊ မီးသတ်ပေးကြတယ်။ ဆာ့ဂျ်ရဲ့ လက်မှာလည်း ထိခိုက်ရှနာ၊ မီးလောင်ဒဏ်ရာ ရသွားလို့ ရှေးဦးသူနာပြုစုမှု ခံယူခဲ့ရတယ်။ စည်းဝေးပွဲကို ပြန်သွားဖို့ ကားပေါ် တက်တဲ့အခါ လူအတော်များများ ပြေးလာပြီး သူ့ကို ကျေးဇူးတင်စကား ဆိုကြတယ်။
ဒီနေရာမှာ ကူညီပေးလိုက်ရလို့ ဆာ့ဂျ် ပီတိဖြစ်မိတယ်။ “ကျွန်တော့်ဘုရား ယေဟောဝါရှေ့မှာ အဲဒီအသက်တွေကို ကယ်ဖို့ တာဝန် ရှိတယ်လို့ ခံစားရတယ်။ သူတို့အသက်ကို ကယ်နိုင်ခဲ့လို့ ကျေနပ်ပီတိ ဖြစ်ရပါတယ်။”