မက္ကဆီကို​နိုင်ငံ၊ တ​ဘက်​စ်​ကို ပြည်နယ်မှာ ကိုယ့်ကိုယ်ကိုယ် သတ်သေမှု​နှုန်း မြင့်​လာတယ်။ ဒါကြောင့် ၂၀၁၇ ခုနှစ်မှာ ယေဟောဝါသက်သေတွေ​က နှစ်လ ကြာ​တဲ့ အထူးကင်ပိန်း​တစ်ခုကို စီစဉ်​ပြီး “အသက်ဆက်ရှင်​သင့်တဲ့ အကြောင်းရင်း သုံးချက်” ခေါင်းစဉ်​နဲ့ ၂၀၁၄၊ ဧပြီလ​ထုတ် နိုးလော့! မဂ္ဂဇင်း​ကို ပြန်​ဝေငှကြ​တယ်။ ဒီ​ကင်ပိန်း​ကို တကယ်​ကျေးဇူးတင် လေးမြတ်​ကြတယ်။

ဖော်​စ​တီ​နို​လို့ ခေါ်တဲ့ ယေဟောဝါ​သက်သေ ညီအစ်ကို​ဟာ အမျိုးသမီး​တစ်ဦး​နဲ့ စကားပြော​ဖြစ်တယ်။ အသက် ၂၂ နှစ်အရွယ် သား​အတွက် ပူပန်​သောကရောက်​နေသူပါ။ စိတ်ကျ​ဝေဒနာ ခံစား​နေရ​ပြီး သေကြောင်းကြံ​ဖူး​တဲ့ သားကို ဘယ်လို အကူအညီ ပေး​ရ​မှန်း မသိ ဖြစ်နေတာ။ ဖော်​စ​တီ​နို​က မဂ္ဂဇင်း ပေးလိုက်တဲ့​အခါ သူက “ငါ့​သားလေး လို​နေတာ ဒါ​ပဲ” လို့ ပြောတယ်။ နောက်​တစ်ရက် အဲဒီ​အမျိုးသမီးရဲ့ သား​ဆီ ဖော်​စ​တီ​နို သွားလည်​ပြီး မဂ္ဂဇင်း​မှာ ပါတဲ့ ကျမ်းစာ​အကြံပြုချက်တွေကို အတူ​ဆွေးနွေး​ကြတယ်။ သုံး​လေး​ခေါက် သွား​လည်ပတ်​ပြီးနောက် အခြေအနေ တိုးတက်​လာတာ သတိထား​မိတယ်။ “စိတ်​ပေါ့ပါး​လာပြီး ပို​ပျော်​လာပုံ​ရတယ်” လို့ ဖော်​စ​တီ​နို ပြောပြတယ်။ သိလာတာတွေကို သူ့လို​ပဲ စိတ်ကျ​ဝေဒနာ ခံစား​နေတဲ့ ညီလေး​ကို ပြန်​ဝေမျှပေး​နေပြီ။

ဝီ​မ​န်ဂီ​ယို​မြို့က ညီအစ်မ ကာ​လာ​ဟာ အဲဒီ​မဂ္ဂဇင်း သုံးပြီး အတန်းဖော်​ကို ကူညီ​ပေးခဲ့တယ်။ “၁၄ နှစ်အရွယ် အတန်းဖော်​တစ်ယောက် ဝမ်းနည်း​နေတာ သတိထား​မိတယ်။ စကား​သွား​ပြော​ကြည့်​တော့ သူ့​မိသားစု​အကြောင်း ပြောပြတယ်။ စကားပြော​နေရင်း သူ့​ဘယ်​လက်​မှာ အမာရွတ်​တွေ ရှိတာ သတိထား​မိတယ်” လို့ ကာ​လာ ပြောပြတယ်။ ကလေး​မ​က သူ့​လက်ကောက်ဝတ်​နဲ့ ခြေကျင်းဝတ်​ကို လှီးဖြတ်​တတ်​သူ ဖြစ်နေတာကိုး။ ဘဝက အဓိပ္ပာယ် မရှိ၊ အကျည်းတန်​တယ်လို့ ခံစား​နေ​သူ ဖြစ်တယ်။ ကာ​လာ​က နိုးလော့! မဂ္ဂဇင်း ပေး​ဖတ်​လိုက်တယ်။ ဖတ်​ကြည့်ပြီးနောက် သူ့​အတွက် ရေးထား​သလိုပဲ။ အခုတော့ အသက်ရှင်​ရ​ကျိုး နပ်​လာပြီ​လို့ ပြုံး​ရင်း ပြောတယ်။

ဗီ​လာ​ဟာ​မိုလ်​ဆာ​မြို့က လူတစ်ယောက် ဆောက်တည်ရာမရ ဖြစ်နေတယ်။ အလုပ်ပြုတ်​ပြီးနောက် မိန်းမ​က​လည်း ကလေးတွေနဲ့ သူ့ကို ထားရစ်ခဲ့​တယ်။ အကူအညီ​ရဖို့ ဘုရားဆီ ဆုတောင်း​ပေမဲ့ မျှော်လင့်ချက် မဲ့​နေတုန်းပဲ။ ကိုယ့်ကိုယ်ကိုယ် သတ်​သေ​ဖို့ ကြံ​နေတုန်း မာတင်နဲ့ မီ​ဂ​ယ်​ဆိုတဲ့ ယေဟောဝါ​သက်သေ နှစ်ယောက် အိမ်တံခါး လာ​ခေါက်​တယ်။ တံခါးဖွင့်​ပေးတဲ့​အခါ နိုးလော့! မဂ္ဂဇင်း ပေး​ဖတ်​ကြတယ်။ ခေါင်းစဉ်​လည်း တွေ့ရော သူ့​ဆုတောင်းချက်ကို ဘုရား အဖြေပေး​မှန်း သိလိုက်တယ်။ မာတင်နဲ့ မီ​ဂ​ယ်​လည်း ကျမ်းစာ သုံးပြီး နှစ်သိမ့်​ပေး​ကြတယ်။ နှစ်​ရက်​သုံးရက်ကြာ​တော့ သူ့​ဆီ ပြန်လည်ပတ်​တဲ့အခါ စိတ်တည်ငြိမ်​လာတာ တွေ့ရတယ်။ အခု အဲဒီ​လူက တစ်ပတ်​နှစ်ကြိမ် ကျမ်းစာ​လေ့လာ​နေပြီ။

ကင်ပိန်း​အတွင်း ယေဟောဝါ​သက်သေတွေဟာ တ​ဘက်​စ်​ကို ပြည်နယ်​က အကျဉ်းထောင်​တချို့​ဆီ သွားပြီး ဘဝ​ရည်ရွယ်ချက် ရှိစေတဲ့ ကျမ်းစာ​အကြံပြုချက်တွေကို ဝေမျှ​ကြတယ်။ ကျမ်းစာ​ဟောပြောချက်​တစ်ခု ဟော​ပြီး ဗီဒီယိုတွေ ပြတယ်၊ မဂ္ဂဇင်း​မှာ ပါတဲ့ အသက်ဆက်ရှင်​သင့်တဲ့ အကြောင်းရင်း​တွေကို အကျဉ်းသားတွေ​နဲ့ ဆွေးနွေး​ကြတယ်။ ဒီ​လည်ပတ်မှု​အတွက် ထောင်​အမှုထမ်းတွေ​ကော ထောင်သားတွေ​ပါ ကျေးဇူးတင်​ကြတယ်။ ထောင်သား​တစ်ယောက်က “ကျွန်တော် သေကြောင်းကြံ​တာ သုံးခါ​ရှိပြီ။ ကျွန်တော့်ကို ဘုရား ဂရုစိုက်ပါ​တယ်လို့ ပြောသူ​တချို့ ရှိပေမဲ့ သူတို့ ပြောတာ မှန်​ကြောင်း ကျမ်းစာ သုံးပြီး မ​ထောက်ပြ​ဖူး​ဘူး။ ခင်ဗျားတို့ ပြောပြတာ​တွေ​ကြောင့် ကျွန်တော် တကယ် အားရှိသွား​ပြီ” လို့ ပြောတယ်။

ဒီ​ကင်ပိန်း​ကို လူတွေ သတိ​မထားမိဘဲ မနေဘူး။ လူထု​အကျိုးပြုတဲ့ ယေဟောဝါသက်သေတွေရဲ့ ကြိုးပမ်းမှု​အတွက် ဂုဏ်ယူ​ဝမ်းမြောက်​ကြောင်း ပြည်နယ် ကျန်းမာရေး​မှူး ပြောကြား​ခဲ့တယ်။ ဒေသခံ​သတင်းစာ​က​လည်း “သေကြောင်းကြံ​မှု​ကို သူတို့ တိုက်ထုတ်​ကြ” ဆိုတဲ့ ခေါင်းစဉ်​နဲ့ ကင်ပိန်း​အကြောင်း သတင်း​ဆောင်းပါး​တစ်ပုဒ် ဖော်ပြခဲ့တယ်။