၁ ဘုရင်များ ၁၅:၁-၃၄
၁၅ နေဗတ်ရဲ့သား ယေရောဗောင်မင်း+နန်းစံ ၁၈ နှစ်မှာ အဘိယံက ယုဒပြည်မှာ နန်းတက်လာတယ်။+
၂ အဘိယံက ဂျေရုဆလင်မြို့မှာ သုံးနှစ်စိုးစံတယ်။ မယ်တော်က အဗရှလုံ* ရဲ့မြေးမ မာခါလို့ခေါ်တယ်။+
၃ အဘိယံက ခမည်းတော် ကျူးလွန်ခဲ့တဲ့ အပြစ်တွေကို ဆက်ပြီးကျူးလွန်တယ်။ ယေဟောဝါဘုရားကို ဘိုးဘေးဒါဝိဒ်လို စိတ်နှလုံးအကြွင်းမဲ့ ဝတ်မပြုဘူး။
၄ ဒါပေမဲ့ ယေဟောဝါဘုရားက ဒါဝိဒ်ကိုထောက်ပြီး+ သူ့သားကို နန်းတက်စေတဲ့အပြင် ဂျေရုဆလင်မြို့ကိုလည်း ဆက်တည်ရှိစေခဲ့တယ်။ ဒီနည်းနဲ့ ဂျေရုဆလင်မြို့မှာ ဒါဝိဒ်ရဲ့မီးခွက်ကို ထွန်းလင်းစေတယ်။+
၅ ဒါဝိဒ်က ဟိတ္တိလူ ဥရိယရဲ့ ကိစ္စကလွဲရင်+ ယေဟောဝါရှေ့မှာ မှန်ရာကိုလုပ်ပြီး ကိုယ်တော် မိန့်မှာသမျှကနေ တစ်သက်လုံး မလွဲသွားခဲ့လို့ပဲ။
၆ ရောဗောင်က သူ့နန်းသက် တစ်လျှောက်လုံးမှာ ယေရောဗောင်နဲ့ စစ်ဆင်နွှဲခဲ့တယ်။+
၇ အဘိယံရဲ့ ကျန်တဲ့ သမိုင်းကြောင်းတွေ၊ လုပ်ဆောင်ခဲ့တာတွေကို ယုဒဘုရင်တွေရဲ့ ရာဇဝင်မှတ်တမ်းမှာ ရေးထားတယ်။+ အဘိယံနဲ့ ယေရောဗောင်တို့လည်း စစ်ဆင်နွှဲခဲ့ကြတယ်။+
၈ နောက်ပိုင်းမှာ အဘိယံမင်း ကွယ်လွန်သွားတဲ့အတွက် သူ့ကို ဒါဝိဒ်မြို့မှာ သင်္ဂြိုဟ်လိုက်ကြတယ်။ သားတော်အာသက+ ထီးနန်းဆက်ခံတယ်။+
၉ အစ္စရေးဘုရင် ယေရောဗောင် နန်းစံ အနှစ် ၂၀ မြောက်မှာ အာသက ယုဒပြည်မှာ နန်းတက်လာတယ်။
၁၀ သူက ဂျေရုဆလင်မြို့မှာ ၄၁ နှစ် စိုးစံတယ်။ သူ့အဘွားက အဗရှလုံရဲ့မြေးမ မာခါဖြစ်တယ်။+
၁၁ အာသက ဘိုးဘေးဒါဝိဒ်လိုပဲ ယေဟောဝါရှေ့မှာ မှန်ရာကို လုပ်တယ်။+
၁၂ ဗိမာန်တွေမှာရှိတဲ့ ယောက်ျားပြည့်တန်ဆာတွေကို တိုင်းပြည်ကနေ နှင်ထုတ်တယ်။+ ဘိုးဘေးတွေလုပ်ခဲ့တဲ့ ရွံမုန်းဖွယ်ရုပ်တုတွေကို* အကုန်လုံး ဖယ်ရှားပစ်တယ်။+
၁၃ အာသမင်းက သူ့အဘွား မာခါကိုတောင်+ မယ်တော်ကြီးရာထူးကနေ ဖယ်ရှားပစ်တယ်။ မာခါက ညစ်ညမ်းတဲ့ရုပ်တုတစ်ခု လုပ်ပြီး ကိုးကွယ်ရာသစ်တိုင်ကို* ကိုးကွယ်လို့ပဲ။ အဲဒီညစ်ညမ်းတဲ့ ရုပ်တုကိုလည်း ဖြိုဖျက်ပြီး+ ကိဒြုန်ချိုင့်ဝှမ်းမှာ မီးရှို့လိုက်တယ်။+
၁၄ အထွတ်အမြတ်နေရာတွေကတော့ ရှိနေတုန်းပဲ။+ အာသက ယေဟောဝါကို တစ်သက်လုံး စိတ်နှလုံးအကြွင်းမဲ့ ဝတ်ပြုခဲ့တယ်။
၁၅ သူနဲ့ သူ့ခမည်းတော် ဆက်ကပ်ထားတဲ့* ရွှေထည်ငွေထည်နဲ့ အသုံးအဆောင်အမျိုးမျိုးကို ယေဟောဝါရဲ့အိမ်တော်ထဲမှာ သွင်းထားတယ်။+
၁၆ ဘုရင်အာသနဲ့ အစ္စရေးဘုရင် ဗာရှာတို့+ အမြဲစစ်ဆင်နွှဲခဲ့ကြတယ်။
၁၇ အစ္စရေးဘုရင် ဗာရှာက ယုဒပြည်ကို စစ်ချီလာတယ်။ ယုဒဘုရင် အာသရဲ့နယ်မြေထဲ ဘယ်သူမှ မဝင်မထွက်နိုင်အောင် ရာမမြို့ကို+ အခိုင်အမာ တည်ဆောက်တယ်။+
၁၈ အဲဒီအခါ အာသက ယေဟောဝါရဲ့ အိမ်တော်ဘဏ္ဍာနဲ့ နန်းတော်ဘဏ္ဍာထဲက ကျန်တဲ့ရွှေငွေအားလုံးကို ယူပြီး မှူးမတ်တွေလက်ထဲ အပ်လိုက်တယ်။ ပြီးတော့ ဟေဇယုန်ရဲ့မြေး၊ တာဗရိမုန်ရဲ့သား ဒမတ်စကတ်မြို့မှာ နန်းထိုင်တဲ့ ဆီးရီးယားဘုရင်+ ဗင်ဟာဒဒ်ဆီ ပို့လိုက်တယ်။
၁၉ “ကျွန်တော်တို့ရဲ့ ခမည်းတော် အချင်းချင်း ကတိသစ္စာပြုခဲ့သလို မင်းကြီးနဲ့ ကျွန်တော်လည်း ကတိသစ္စာပြုရအောင်။ အခု မင်းကြီးအတွက် ရွှေငွေတွေကို လက်ဆောင်ပေးလိုက်ပါတယ်။ ဒါကြောင့် မင်းကြီးက အစ္စရေးဘုရင် ဗာရှာနဲ့ ကတိသစ္စာပြုထားတာကို လာပြီးဖျက်လိုက်ပါ။ ဒါမှ ကျွန်တော့်ဆီကနေ သူဆုတ်ခွာသွားပါလိမ့်မယ်” လို့သတင်းပါးလိုက်တယ်။
၂၀ ဗင်ဟာဒဒ်လည်း အာသရဲ့စကားကို နားထောင်ပြီး အစ္စရေးမြို့တွေကို တိုက်ခိုက်ဖို့ သူ့ရဲ့ဗိုလ်ချုပ်တွေကို လွှတ်လိုက်တယ်။ သူတို့က အိယုန်မြို့၊+ ဒန်မြို့၊+ အာဗေလဗက်မာခါမြို့၊ ခိနေရက်တစ်နယ်လုံး၊ နဿလိနယ်မြေတစ်ခုလုံးကို တိုက်ခိုက်ကြတယ်။
၂၁ ဒီအကြောင်းကို ဗာရှာကြားတဲ့အခါ ရာမမြို့ကို ဆက်မဆောက်တော့ဘဲ တိရဇာမြို့ဆီ+ ချက်ချင်းပြန်သွားပြီး အဲဒီမှာပဲ ဆက်နေတယ်။
၂၂ အာသမင်းက ယုဒတစ်မျိုးလုံးကို တစ်ယောက်မကျန် ဆင့်ခေါ်လိုက်တယ်။ သူတို့က ဗာရှာမင်း တည်ဆောက်နေတဲ့ ရာမမြို့က ကျောက်တွေ၊ သစ်သားတွေကို သယ်သွားကြတယ်။ အာသမင်းက အဲဒါတွေကိုသုံးပြီး မိဇပါမြို့၊+ ဗင်ယာမိန်နယ်မြေမှာရှိတဲ့ ဂေဘမြို့ကို+ အခိုင်အမာ တည်ဆောက်တယ်။
၂၃ အာသမင်းရဲ့ ကျန်တဲ့သမိုင်းကြောင်းတွေ၊ စွမ်းဆောင်ချက်တွေ၊ လုပ်ဆောင်ခဲ့တာတွေ၊ တည်ဆောက်ခဲ့တဲ့မြို့တွေအကြောင်းကို ယုဒဘုရင်တွေရဲ့ ရာဇဝင်မှတ်တမ်းမှာ ရေးထားတယ်။ အာသမင်း အသက်ကြီးလာတော့ ခြေထောက်မှာ ရောဂါရလာတယ်။+
၂၄ နောက်ပိုင်းမှာ အာသမင်း ကွယ်လွန်သွားတဲ့အတွက် သူ့ကို ဒါဝိဒ်မြို့မှာ ဘိုးဘေးတွေနဲ့အတူ သင်္ဂြိုဟ်လိုက်ကြတယ်။ သားတော်ယောရှဖတ်က+ ထီးနန်းဆက်ခံတယ်။
၂၅ ယုဒဘုရင်အာသ နန်းစံ ၂ နှစ်မြောက်မှာ ယေရောဗောင်ရဲ့သား နာဒပ်က+ အစ္စရေးပြည်မှာ နန်းတက်လာပြီး ၂ နှစ် စိုးစံတယ်။
၂၆ သူက ယေဟောဝါရှေ့မှာ မကောင်းတာတွေ လုပ်တယ်။ ခမည်းတော်ရဲ့ လမ်းစဉ်အတိုင်း ဆက်လိုက်တယ်။+ အစ္စရေး တွေကို ကျူးလွန်စေတဲ့ ခမည်းတော်ရဲ့ အပြစ်ကို ဆက်လုပ်တယ်။+
၂၇ အိသခါအမျိုး၊ အဟိယရဲ့သား ဗာရှာက သူ့ကိုလုပ်ကြံဖို့ လျှို့ဝှက်ကြံစည်တယ်။ ဖိလိတိလူတွေပိုင်တဲ့ ဂိဗသုန်မြို့ကို+ နာဒပ်နဲ့ အစ္စရေးတွေ ဝိုင်းထားချိန်မှာ ဗာရှာက နာဒပ်ကို ဂိဗသုန်မြို့မှာ ကွပ်မျက်လိုက်တယ်။
၂၈ ဒီလိုနဲ့ ယုဒဘုရင်အာသ နန်းစံသုံးနှစ်မြောက်မှာ ဗာရှာက နာဒပ်ကို လုပ်ကြံပြီး နန်းတက်တယ်။
၂၉ ဗာရှာက ဘုရင်ဖြစ်လာတာနဲ့ ယေရောဗောင်အမျိုး အားလုံးကို ကွပ်မျက်တယ်။ ယေရောဗောင်နဲ့ပတ်သက်သူ တစ်ယောက်ကိုမှ အရှင်မထားဘဲ သုတ်သင်ပစ်တယ်။ ဘုရားရဲ့ကျွန် ရှိလောမြို့သား အဟိယကတစ်ဆင့် ယေဟောဝါ ပြောခဲ့တဲ့အတိုင်း ဖြစ်လာတယ်။+
၃၀ ယေရောဗောင်က ကိုယ်တိုင် အပြစ်ကျူးလွန်ရုံမက အစ္စရေးတွေကိုလည်း အပြစ်ကျူးလွန်စေတဲ့အတွက်၊ အစ္စရေးတို့ရဲ့ဘုရား ယေဟောဝါကို အကြီးအကျယ် အမျက်ထွက်စေတဲ့အတွက် အဲဒီလိုဖြစ်ရတာပဲ။
၃၁ နာဒပ်ရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေကို အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။
၃၂ အာသနဲ့ အစ္စရေးဘုရင် ဗာရှာတို့ အမြဲစစ်ဆင်နွှဲခဲ့ကြတယ်။+
၃၃ ယုဒဘုရင်အာသ နန်းစံ သုံးနှစ်မြောက်မှာ အဟိယရဲ့သား ဗာရှာက တိရဇာမြို့မှာ နန်းတက်ပြီး အစ္စရေးတစ်ပြည်လုံးကို ၂၄ နှစ် စိုးစံတယ်။+
၃၄ သူက ယေဟောဝါရှေ့မှာ မကောင်းတာတွေလုပ်ပြီး+ ယေရောဗောင်ရဲ့ လမ်းစဉ်အတိုင်း ဆက်လိုက်တယ်။ အစ္စရေးတွေကို ကျူးလွန်စေတဲ့ ယေရောဗောင်ရဲ့ အပြစ်ကို ဆက်လုပ်တယ်။+
အောက်ခြေမှတ်ချက်များ
^ မူရင်း၊ “အဗိရှလုံ။”
^ မူရင်းဟီဘရူးမှာ “နောက်ချေး” ဆိုတဲ့စကားလုံးနဲ့ ဆက်စပ်။
^ မူရင်း၊ “သန့်ရှင်းမြင့်မြတ်စေတဲ့။”
