“အစောပိုင်းခရစ်ယာန်များသည် ဝတ်ပြုရေးတွင် ပုံများကို အသုံးမပြုခဲ့ကြချေ။ . . . ခရစ်ယာန်ဘာသာနှင့်သက်ဆိုင်သော အသိပညာကို ဘာသာရေးဟောပြောချက်များနှင့် စာအုပ်များထက် ပုံများမှတစ်ဆင့် လူပြိန်းများ ပိုသိရှိလာနိုင်မည်ဟူသော ယူဆချက်ကို လက်ခံကာ ၄ ရာစုနှင့် ၅ ရာစုမှစ၍ ချာ့ခ်ျတွင် ပုံများကို စတင် အသုံးပြုလာကြသည်။”—မက်ကလင်းတော့နှင့် စထရောင်းတို့၏ Cyclopedia of Biblical, Theological, and Ecclesiastical Literature စာအုပ်၊ အတွဲ ၄၊ စာမျက်နှာ ၅၀၃ နှင့် ၅၀၄။

‘အထက် မိုးကောင်းကင်၌လည်းကောင်း၊ အောက်အရပ် မြေကြီးပေါ်၌လည်းကောင်း၊ မြေကြီးအောက် ရေထဲ၌လည်းကောင်း ရှိသောအရာနှင့် ပုံသဏ္ဌာန်တူအောင် . . . ပုံကို ကိုယ်အဖို့ မလုပ်နှင့်။ ဦးမချ ဝတ်မပြုနှင့်။’ (ထွက်မြောက်ရာ ၂၀:၄၊ ၅) ‘ချစ်သားတို့၊ . . . ပုံများကို ကြဉ်ရှောင်ကြလော့’ ဟု ပထမရာစု ခရစ်ယာန်များထံ တမန်တော်ယောဟန် စာရေးခဲ့သည်။—၁ယောဟန် ၅:၂၁၊ သမ္မာကျမ်း။

ချာ့ခ်ျများဆိုသည့်အတိုင်း ပုံများသည် ၎င်းတို့ကိုယ်စားပြုသောအရှင်ထံ နီးကပ်စေပြီး ကြည်ညိုလေးမြတ်စေသည့် ကြားခံပစ္စည်းမျှသာ ဖြစ်သလော။ “အစပိုင်းတွင် ပညာပေးသင်ကြားရန်နှင့် အလှဆင်ရန်ဟူသော ရည်ရွယ်ချက်ဖြင့် ပုံများကို အသုံးပြုခဲ့သည်။ စင်စစ်၊ ယင်းသည် ၎င်းတို့၏လုပ်ရပ်အတွက် ဆင်ခြေဆင်လက် ပေးခြင်းသာ ဖြစ်သည်။ သို့သော် ထိုပုံများကို ဝတ်ပြုရေးအတွက် အသုံးပြုခဲ့ကြောင်း မကြာမီ သူတို့ ဝန်ခံရတော့သည်။ ယင်းသည် အရှေ့ပိုင်းသြသဒေါက်စ်၏ ထင်ရှားသောအင်္ဂါရပ် ဖြစ်လာသည့် အိုင်ကောန်များ (သူတော်စင်များ၏ပုံ၊ ပန်းချီကားနှင့် ရုပ်လုံးစသည်တို့) နှင့်ပတ်သက်လျှင် အထူးသဖြင့် မှန်ကန်သည်” ဟု ဘာသာရေးဆိုင်ရာ စွယ်စုံကျမ်းက ဖော်ပြ၏။ ထို့ကြောင့် ပရောဖက်ဟေရှာယ ဤသို့မေးခဲ့သည်မှာ သင့်လျော်လှသည်– “ဘုရားသခင်ကို အဘယ်သို့ပုံပြရအံ့နည်း။ ဘုရားသခင်နှင့် အဘယ်မည်သော ပုံသဏ္ဌာန် တူသည်ဟု ဆိုရအံ့နည်း။”—ဟေရှာယ ၄၀:၁၈။

ဤကျမ်းချက်များကို နှိုင်းယှဉ်ကြည့်ပါ– ဟေရှာယ ၄၄:၁၃-၁၉။ တမန်တော် ၁၀:၂၅၊ ၂၆။ ၁၇:၂၉၊ သမ္မာကျမ်း။ ၂ ကောရိန္သု ၅:၇၊ သမ္မာကျမ်း