စာရှုသူများထံမှ မေးခွန်းလွှာ

ယေဇကျေလ ၁၈:၂၀ တွင် “သားသည် အဘ၏အပြစ်ကို မခံရ’’ ဟုဖော်ပြထားရာ ထွက်မြောက်ရာ ၂၀:၅ ပါ “အဘတို့၏အပြစ်ကို သားတို့၌ ဆပ်ပေးစီရင်’’ မည်ဟူသောအချက်နှင့် ဆန့်ကျင်နေပါသလော။

ဆန့်ကျင်ခြင်းမရှိပါ။ ဖော်ပြချက်တစ်ခုသည် တစ်ဦးချင်းစီ စာရင်းရှင်းရမည်ကို အဓိကထားဖော်ပြပြီး နောက်ဖော်ပြချက်တစ်ခုမှာ လူတစ်ဦးအမှားပြုသည့်အကျိုးဆက်သည် သူ၏သားစဉ်မြေးဆက်အပေါ် အကျိုးသက်ရောက်သည်ကို ပြောခြင်းဖြစ်သည်။

ယေဇကျေလ အခန်းကြီး ၁၈ ၏ရှေ့နောက်စကားတွင် လူတစ်ဦးစီ စာရင်းရှင်းရမည်ကို အလေးပေးဖော်ပြထားသည်။ အခန်းငယ် ၄ တွင် “ပြစ်မှားသောဝိညာဉ်သည် [“သူကိုယ်တိုင်၊” ကဘ] အသက်သေရမည်” ဟု ဖော်ပြထားသည်။ လူတစ်ဦးသည် “သဘောဖြောင့်၍ တရားသောအမှု၊ ဟုတ်မှန်သောအမှုကိုပြု” လျှင်ကော အသို့နည်း။ “အကယ်စင်စစ် အသက်ရှင်ရလိမ့်မည်။” (ယေဇ. ၁၈:၅၊ ၉) ထို့ကြောင့် မိမိကိုယ်ကို တာဝန်ယူနိုင်သည့် အသက်အရွယ်ရောက်သူတိုင်းသည် “အသီးသီးကျင့်ကြသည်” အတိုင်း တရားစီရင်ခံရမည်ဖြစ်သည်။—ယေဇ. ၁၈:၃၀။

ဤမူသည် ကောရအမည်ရှိ လေဝိသားတစ်ဦး၏ကိစ္စတွင် ပေါ်လွင်သည်။ အစ္စရေးလူမျိုး တောကန္တာရတွင် ခရီးနှင်နေစဉ် ကောရသည် မိမိရရှိထားသည့် အထူးတာဝန်များနှင့် မရောင့်ရဲနိုင်ဖြစ်လာသည်။ ယဇ်ပုရောဟိတ်တာဝန်များကို ရရှိရန်အတွက် ကောရနှင့် အခြားသူအချို့သည် ယေဟောဝါ၏ကိုယ်စားလှယ်များဖြစ်သော မောရှေနှင့် အာရုန်ကို ဆန့်ကျင်ပုန်ကန်ခဲ့ကြသည်။ သူတို့မရထိုက်သည့်အခွင့်အရေးကို ရရှိအောင် ရောင့်တက်စွာ ကြိုးစားခြင်းကြောင့် ကောရနှင့် ပုန်ကန်သူများအား ယေဟောဝါ အဆုံးစီရင်ခဲ့သည်။ (တော. ၁၆:၈-၁၁၊ ၃၁-၃၃)  သို့သော် ကောရ၏သားများသည် ပုန်ကန်မှုတွင် မပါဝင်ခဲ့ကြချေ။ သူတို့ဖခင်၏အပြစ်ကြောင့် သူတို့ကိုပါ ဘုရားသခင် အပြစ်မပေးခဲ့ပါ။ ယေဟောဝါအပေါ် သစ္စာတည်ကြည်ခဲ့သောကြောင့် အသက်ချမ်းသာရခဲ့သည်။—တော. ၂၆:၁၀၊ ၁၁၊

သို့သော် ပညတ်တော်ဆယ်ပါးတွင်ပါဝင်သော ထွက်မြောက်ရာ ၂၀:၅ မှ သတိပေးချက်ကော အသို့နည်း။ တစ်ဖန် ရှေ့နောက်စကားကို သုံးသပ်ကြည့်ပါ။ ယေဟောဝါသည် အစ္စရေးလူမျိုးအား ပညတ်ပဋိညာဉ် ပေးအပ်ခဲ့သည်။ ပဋိညာဉ်ပါစည်းကမ်းချက်များကို နားထောင်ပြီးနောက်တွင် အစ္စရေးလူတို့သည် ‘ယေဟောဝါမိန့်တော်မူသမျှတို့ကို အကျွန်ုပ်တို့သည် ပြုပါမည်’ ဟု လူသိရှင်ကြား ကြွေးကြော်ခဲ့ကြသည်။ (ထွ. ၁၉:၅-၈) ဤနည်းဖြင့် လူမျိုးတစ်မျိုးလုံးအနေနှင့် သူတို့သည် ယေဟောဝါနှင့် အထူးဆက်ဆံရေး တည်ဆောက်ခဲ့ကြသည်။ ထို့ကြောင့် ထွက်မြောက်ရာ ၂၀:၅ ပါစကားများသည် အစ္စရေးလူမျိုးတစ်မျိုးလုံးကို တိုက်ရိုက်ရည်ညွှန်းနေခြင်းဖြစ်သည်။

အစ္စရေးလူတို့သည် ယေဟောဝါအား ဆက်သစ္စာရှိမည်ဆိုလျှင် အကျိုးရလဒ်နှင့် ကောင်းချီးများစွာ ခံစားရမည်ဖြစ်သည်။ (ဝတ်. ၂၆:၃-၈) မတည်ကြည်ခဲ့လျှင် ကောင်းချီးခံစားရမည်မဟုတ်ပေ။ အစ္စရေးလူမျိုးသည် ယေဟောဝါအား ငြင်းပယ်ကာ အယူမှားဝတ်ပြုရေးနောက်လိုက်သွားသောအခါ ကိုယ်တော်သည် ကောင်းချီးနှင့် ကာကွယ်မှုကို ရုပ်သိမ်းတော်မူလိုက်ရာ အစ္စရေးလူမျိုး ဘေးဆိုးများနှင့် ကြုံတွေ့ခဲ့ကြရ၏။ (သူကြီး. ၂:၁၁-၁၈) သို့သော် ၎င်းတို့အထဲမှ အချို့သည် ဆက်တည်ကြည်ခဲ့ကြပြီး အစ္စရေးလူတို့၏အရုပ်ကိုးကွယ်မှုလမ်းစဉ်ကြားမှ ဘုရားသခင်၏ ပညတ်များကို ဆက်လိုက်နာခဲ့ကြသည်မှာ မှန်ပါသည်။ (၃ ရာ. ၁၉:၁၄၊ ၁၈) ထိုသစ္စာရှိသူများသည် လူမျိုးတော်၏အပြစ်ကြောင့် ဆင်းရဲဒုက္ခအချို့ ခံစားခဲ့ရဖွယ်ရှိသည်၊ သို့သော် ယေဟောဝါသည် သူတို့အပေါ် ချစ်ခင်ကြင်နာမှု တင်ပြတော်မူခဲ့၏။

အစ္စရေးလူမျိုးသည် ယေဟောဝါ၏စည်းမျဉ်းမူများကို ပြောင်ပြောင်တင်းတင်း ချိုးဖောက်လာကြပြီး ကိုယ်တော့်နာမတော်ကို ရှုတ်ချစရာ ဖြစ်စေသောအခါ မိမိလူမျိုးကို ဗာဗုလုန်သုံ့ပန်းဖြစ်စေရန် ဆုံးဖြတ်လိုက်ခြင်းဖြင့် သူတို့ကို ကိုယ်တော်အပြစ်ပေးခဲ့သည်။ ယင်းတွင် လူမျိုးတော်ကို တစ်ဦးချင်းစီနှင့် အုပ်စုလိုက် အပြစ်ပေးခြင်း အမှန်ပင်ပါဝင်သည်။ (ယေ. ၅၂:၃-၁၁၊ ၂၇) မှန်ပါသည်၊ အစ္စရေးလူမျိုး၏အပြစ်သည် အလွန်ကြီးလေးသောကြောင့် ထွက်မြောက်ရာ ၂၀:၅ တွင် ဖော်ပြသကဲ့သို့ သူတို့၏ဘိုးဘေးတို့ပြုကျင့်သော အကျင့်ဆိုးများကြောင့် တတိယအဆက်၊ စတုတ္ထအဆက် သို့မဟုတ် ထို့ထက်မကသော လူမျိုးဆက်တိုင်အောင် ထိခိုက်ခံစားရကြောင်း သမ္မာကျမ်းစာကဆိုသည်။

သမ္မာကျမ်းစာတွင် မိဘ၏ လွဲမှားသောအမူအကျင့်ကြောင့် ဆိုးကျိုးခံစားရသည့် မိသားစုများအကြောင်းလည်း ပါဝင်သည်။ ယဇ်ပုရောဟိတ်မင်းကြီး ဧလိသည် “အဓမ္မလူ” ဖြစ်သော မိမိ၏သားများကို ယဇ်ပုရောဟိတ်များအဖြစ် ဆက်အမှုဆောင်ခွင့်ပြုခြင်းဖြင့် ယေဟောဝါကို ပြစ်မှားခဲ့သည်။ (၁ ရာ. ၂:၁၂-၁၆၊ ၂၂-၂၅) ဧလိသည် မိမိ၏သားများကို ယေဟောဝါထက် ပို၍ချီးမြှောက်ခဲ့သောကြောင့် ဧလိ၏မိသားစုသည် ယဇ်ပုရောဟိတ်မင်းရာထူးမှ ဖယ်ရှားခံရမည်ဖြစ်ကြောင်း ယေဟောဝါ စီရင်ချက်ချခဲ့သည်။ ယင်းသည် ဧလိ၏ တီဖြစ်သူ အဗျာသာလက်ထက်တွင် ယင်းအကျိုးဆက်ကို စတင်ခံစားခဲ့ရသည်။ (၁ ရာ. ၂:၂၉-၃၆; ၃ ရာ. ၂:၂၇) ဂေဟာဇိ၏ပုံနမူနာကလည်း ထွက်မြောက်ရာ ၂၀:၅ ပါ မူကို ရှင်းလင်းဖော်ပြသည်။ သူသည် ရောဂါပျောက်သွားသော ရှုရိဗိုလ်ချုပ်နေမန်ထံမှ ပစ္စည်းများကိုရယူရန် ဧလိရှဲ၏လက်ထောက်ဟူသော မိမိ၏ရာထူးကို တလွဲအသုံးချခဲ့သည်။ ယေဟောဝါသည် ဧလိရှဲမှတစ်ဆင့် တရားစီရင်ချက်ကို ဤသို့ကြေညာခဲ့သည်– “နေမန်၏နူနာသည် သင်၌လည်းကောင်း၊ သင်၏သားမြေး၌လည်းကောင်း အစဉ်အမြဲစွဲစေ။” (၄ ရာ. ၅:၂၀-၂၇) ထို့ကြောင့် ဂေဟာဇိ၏သားစဉ်မြေးဆက်သည် သူလုပ်ခဲ့သောအပြစ်၏အကျိုးဆက်ကို ခံစားကြရသည်။

မည်သည့်ပြစ်ဒဏ်သည် တရားမျှတ၍ သင့်တော်ကြောင်းကို ဆုံးဖြတ်ရန် ဖန်ဆင်းရှင်၊ အသက်ပေးရှင်အနေနှင့် ယေဟောဝါ၌ အခွင့်အာဏာအပြည့်အ၀ရှိသည်။ ကလေးများ သို့မဟုတ် သားမြေးများသည် သူတို့ဘိုးဘေးများ၏အပြစ်ကြောင့် ဆိုးကျိုးခံစားရနိုင်ကြောင်း အထက်ပါသာဓကများက ဖော်ပြသည်။ သို့သော် ယေဟောဝါသည် “ညှဉ်းဆဲခံရသောသူ၏ ငိုကြွေးသံကိုကြားတော်မူ’’ ပြီး စိတ်အားထက်သန်စွာဖြင့် ကိုယ်တော့်ထံ ပြန်လှည့်လာသူများသည် ကိုယ်တော့်မျက်နှာသာကို ခံစားရနိုင်ကာ အတိုင်းအတာတစ်ခုအထိ သက်သာရာပင်ရနိုင်သည်။—ယောဘ ၃၄:၂၈။

[စာမျက်နှာ ၂၉ ပါပုံစာ]

ကောရနဲ့ ပုန်ကန်သူအပေါင်းပါတွေက သူတို့ရဲ့လုပ်ရပ်အတွက် စာရင်းရှင်းခဲ့ရ