အစ္စရေး​လူမျိုး​အကြောင်း သမ္မာကျမ်းစာ​ပြင်ပ​ကိုးကားချက်

အီဂျစ်​နိုင်ငံ၊  ကိုင်​ရို​ပြတိုက်​ရှိ လိပ်​သည်း​ကျောက်စာ​တစ်ခုပေါ်​တွင် ဖာရော​ဘုရင် မာ​နဲ​ပ်​တာ​၏​အောင်ပွဲ​များ​ကို မှတ်တမ်း​တင်ထား​သည်။ ပညာရှင်​များ​၏​ခန့်မှန်းချက်​အရ ဒုတိယ​မြောက် ရမ်း​စစ်​၏ ဤ ၁၃ ယောက်​မြောက်​သား​သည် ရှေး​အစ္စရေး​နိုင်ငံ​တွင် တရားသူကြီး​များ​အုပ်စိုး​ခဲ့​သည့်​ကာလ နှောင်းပိုင်း ဘီစီ ၁၂၁၂ မှ ၁၂၀၂ အထိ အုပ်ချုပ်​ခဲ့​သည်။ မာ​နဲ​ပ်​တာ ကျောက်စာ​ပါ နောက်ဆုံး​စာ​ကြောင်း​နှစ်​ကြောင်း​တွင် ဤသို့​ဖတ်​ရသည်– “ခါ​နာ​န်​ကို တိုက်ခိုက်​ဖျက်ဆီး​လိုက်ပြီ။ အာရှကေလုန်​သည် သိမ်းယူ​ခံရ​ပြီ။ ဂီ​ဇာ​လည်း သိမ်းပိုက်​ခံရ​ပြီ။ ရာ​နို​အမ်​မှာ လုံးဝ​ပြာကျ​သွားပြီ။ အစ္စရေး​သည် စိတ်​ညှိုးငယ်​ပြီ။ ၎င်း​၏​လူမျိုး ပျောက်ကွယ်​သွားပြီ။”

ဤ​စကားစပ်​ပါ “အစ္စရေး” ဟူ​သည့်​စကားလုံး​က အဘယ်​အဓိပ္ပာယ်​ရှိ​သနည်း။ အရုပ်​စာ​တွင် စကားလုံး​များ​၏​အဓိပ္ပာယ်​ကို ခွဲခြား​သိနိုင်​ရန် အသံထွက်​မရှိသည့် သင်္ကေတ​အချို့​ကို ပေါင်း​ထည့်​ရေး​ကြသည်။ ရှေးခေတ်​အစ္စရေး​ပေါ်ထွန်းခြင်း (The Rise of Ancient Israel) စာအုပ်​တွင် ဤသို့ ရှင်းပြသည်– “ဤ​အသုံးအနှုန်း​လေးခု​ထဲ​မှ သုံးခု—အာရှကေလုန်၊ ဂီ​ဇာ​နှင့် ရာ​နို​အမ်—နှင့်​တွဲ​ထားသော အသံထွက်​မရှိသည့် သင်္ကေတ​က ယင်း​တို့သည် မြို့များ​ဖြစ်​ကြောင်း ဖော်ပြ​သည်။ . . . သို့သော် အစ္စရေး​နှင့်​တွဲ​သော အသံထွက်​မရှိသည့်​သင်္ကေတ​က လူမျိုးတစ်မျိုး​ကို ရည်ညွှန်း​သည်။”—ကျွန်ုပ်​တို့​စာလုံးစောင်း​ထား​သည်။

ဤ​စာသား​၏​အဓိပ္ပာယ်​ကား အဘယ်နည်း။ အယ်ဒီတာ​နှင့် စာရေး​ဆရာ​ဖြစ်သူ ဟာ​ရှဲ​လ် ရှ​န့်ခ်​က ဤသို့​ဖြေဆို​သည်– “ဘီစီ ၁၂၁၂ ခုနှစ်​တွင် အစ္စရေး​အမည်​ရှိသော​လူမျိုးတစ်မျိုး ရှိနေပြီ​ဖြစ်​ကြောင်း၊ အီဂျစ်​ဘုရင်​ဖာရော​က သူတို့​အကြောင်း ကြားသိ​ရုံ​မ​က တိုက်ပွဲ​တွင် အနိုင်​ရခဲ့​၍ ဝါကြွား​စ​ရာ​အဖြစ် ယူမှတ်​ကြောင်း မာ​နဲ​ပ်​တာ​ကျောက်စာ​က ဖော်ပြ​သည်။” မြေထဲပင်လယ်​အရှေ့​ဒေသ ရှေးဟောင်း​သုတေသန ပါမောက္ခ ဝီလျံ ဂျီ. ဒဲဗာ​က ဤသို့​မှတ်ချက်ချ​သည်– “မာ​နဲ​ပ်​တာ​ကျောက်စာ​က ကျွန်ုပ်​တို့အား အတိအလင်း​ဖော်ပြ​သည်​မှာ ခါ​နာ​န်​ပြည်​တွင် သူတို့ကို​သူတို့ ‘အစ္စရေး’ ဟု ခေါ်​သော လူမျိုးတစ်မျိုး အမှန်ပင်​ရှိခဲ့​ပြီး သမ္မာကျမ်းစာ​ကို​မယုံကြည်​သော အီဂျစ်လူ​တို့​က ထို​သူတို့ကို ‘အစ္စရေး’ ဟူ၍ ခေါ်​ခဲ့​ကြ​ရခြင်း​ဖြစ်သည်။ သူတို့၏​နိုင်ငံ​ကျော်ကြား​ဖို့ ရည်ရွယ်​၍ ‘အစ္စရေး’ အမည်​ကို​တီထွင်​ပြီး လူမျိုးတစ်မျိုး​ကို တိတိကျကျ ခေါ်ဆို​နိုင်​ကြလိမ့်မည်​မဟုတ်​ချေ။”

သမ္မာကျမ်းစာ​တွင် အစ္စရေး သို့​မဟုတ် ဣသရေလ ဟူသော​စကားလုံး​ကို ဘိုးဘေး​ယာကုပ်​အား ပေး​သည့်​အမည်​အဖြစ် ဦးဆုံး​အကြိမ်​ဖော်ပြ​ထား​သည်။ ယာကုပ်​၏​သား ၁၂ ယောက်​မှ ဆင်းသက်လာ​သော သားစဉ်မြေးဆက်​များ​ကို “ဣသရေလ​လူမျိုး” ဟူ၍ အမည်တွင်​လေ​သည်။ (ကမ္ဘာဦး ၃၂:၂၂-၂၈၊ ၃၂; ၃၅:၉၊ ၁၀) အတန်ကြာ​လေ​သော် ပရောဖက်​မောရှေ​နှင့် အီဂျစ်​ဘုရင်​ဖာရော နှစ်ဦးစလုံး​က ယာကုပ်​၏ သားစဉ်မြေးဆက်​များ​ကို ရည်ညွှန်း​ပြောဆို​သောအခါ “ဣသရေလ” ဟူသော စကားလုံး​ကို အသုံးပြု​ခဲ့​ကြသည်။ (ထွက်မြောက်ရာ ၅:၁၊ ၂) မာ​နဲ​ပ်​တာ​ကျောက်စာ​သည် အစ္စရေး​လူမျိုး​အကြောင်း ရှေးအကျဆုံး သမ္မာကျမ်းစာ​ပြင်ပ ကိုးကားချက်​ဖြစ်သည်။

[စာမျက်နှာ ၂၄ ပါ ရုပ်ပုံ]

မာ​နဲ​ပ်​တာ​ကျောက်စာ

နောက်ဆုံး​သင်္ကေတ​သုံးခု—(ညာ​မှ​ဘယ်​သို့) ပစ်ပေါက်​ရသည့်​တုတ်​ချောင်း၊ ထိုင်​နေသည့်​အမျိုးသား​နှင့် အမျိုးသမီး—တို့ကို ပူးတွဲ​ဖော်ပြခြင်း​က အစ္စရေး​သည် နိုင်ငံ​ခြား​လူမျိုး​ဖြစ်​ကြောင်း ဖော်ပြ

[Credit Line]

Egyptian National Museum, Cairo, Egypt/​Giraudon/​The Bridgeman Art Library