ဘုရားတရားမဲ့လောကတွင် ဘုရားသခင်နှင့်အတူ ဧနောက်သွားလာခဲ့
ဘုရားတရားမဲ့လောကတွင် ဘုရားသခင်နှင့်အတူ ဧနောက်သွားလာခဲ့
လူသားအားလုံးကို ဘုရားသခင်ထံမှ လှည့်ထွက်သွားစေနိုင်သည်ဟု စာတန်အခိုင်အမာပြောဆိုပြီး တစ်ခါတစ်ရံ သူအောင်မြင်ပုံရှိသည်။ အာဗေလသေဆုံးပြီးနောက် ငါးရာစုနီးပါးတိုင် ယေဟောဝါ၏သစ္စာရှိကျေးကျွန်အဖြစ် ထင်ရှားလာသူ မည်သူမျှမရှိခဲ့ချေ။ ယင်းအစား၊ မကောင်းမှုနှင့် ဘုရားတရားမဲ့အကျင့်တို့သည် သမားရိုးကျဖြစ်လာ၏။
ဤသို့ဝိညာဉ်ရေးယိုယွင်းချိန်အတွင်း ဧနောက်အသက်ရှင်ခဲ့သည်။ ကျမ်းစာသက္ကရာဇ်စဉ်က ဘီ.စီ.အီး. ၃၄၀၄ တွင်သူမွေးဖွားကြောင်း ဖော်ပြ၏။ ဧနောက်သည် သူ၏တစ်ခေတ်တည်းသားများနှင့်မတူဘဲ ဘုရားသခင်နှစ်သက်လက်ခံသူဖြစ်သည်။ တမန်တော်ပေါလုက ခရစ်ယာန်များအတွက် ပုံနမူနာအဖြစ် သူ၏ယုံကြည်ခြင်းကို ယေဟောဝါ၏ကျေးကျွန်များစာရင်းတွင် ထည့်သွင်းခဲ့သည်။ ဧနောက်ကား မည်သူနည်း။ မည်သည့်အခက်အခဲများကို သူရင်ဆိုင်ခဲ့ရသနည်း။ သူသည် ယင်းတို့ကို မည်သို့ကျော်လွှားအောင်မြင်ခဲ့သနည်း။ သူ၏တည်ကြည်မှုသည် ကျွန်ုပ်တို့နှင့် မည်သို့သက်ဆိုင်သနည်း။
ဧနောက်ခေတ်မတိုင်မီ လေးရာစုနီးပါးက ဧနုတ်ခေတ်၌ “ယေဟောဝါ၏နာမကို ခေါ်စပြုကြ၏။” (ကမ္ဘာဦး ၄:၂၆၊ ကဘ) လူ့သမိုင်းစတင်ကတည်းက ဘုရားသခင့်နာမတော်ကို အသုံးပြုခဲ့ကြသည်။ ထို့ကြောင့် ဧနုတ်အသက်ရှင်ခဲ့ချိန် စတင်ခဲ့ရာသည် စင်ကြယ်သောဝတ်ပြုရေးတွင် ယုံကြည်ခြင်းနှင့် ယေဟောဝါအား ခေါ်ခဲ့ခြင်းမဟုတ်ချေ။ ဟေဗြဲကျမ်းပညာရှင်အချို့က ကမ္ဘာဦး ၄:၂၆ သည် “စတင်၍မထီမဲ့မြင်ပြုကြသည်” သို့မဟုတ် “ထိုအခါ မထီမဲ့မြင်ပြုခြင်းစတင်လာသည်” ဟူ၍ ဖြစ်သင့်သည်ဟုယူမှတ်ကြသည်။ လူတို့သည် မိမိတို့ကိုယ်နှိုက်ကို သို့မဟုတ် ကြားခံဖြင့် ဘုရားသခင်ကိုချဉ်းကပ်ဝတ်ပြုဟန်ဆောင်ရန် အခြားသူများကို ယေဟောဝါ၏နာမတော်ဖြင့် ခေါ်ခဲ့ကြပေမည်။ သို့မဟုတ် ရုပ်ပုံများကို ကိုယ်တော်၏နာမတော်ဖြင့် ခေါ်ခဲ့ကြပေမည်။
‘စစ်မှန်သောဘုရားသခင်နှင့်အတူ ဧနောက်သွားလာခဲ့’
ဧနောက်သည် ဘုရားတရားမဲ့ဝန်းကျင်၌ အသက်ရှင်ခဲ့သော်လည်း သူသည် စစ်မှန်သော ယေဟောဝါ “ဘုရားသခင်နှင့်အတူသွားလာ၏။” သူ၏ဘိုးဘေးများဖြစ်ကြသော ရှေသ၊ ဧနုတ်၊ ကာဣနန်၊ မဟာလေလနှင့် ယာရက်တို့သည် ဘုရားသခင်နှင့်အတူ သွားလာခဲ့ကြသည်ဟု မဆိုထားချေ။ အနည်းဆုံးတော့ သူတို့သည် ဧနောက်သွားလာသကဲ့သို့ မသွားလာခဲ့ကြချေ၊ ဧနောက်၏ဘဝလမ်းစဉ်သည် သူတို့နှင့် လုံးလုံးလျားလျားခြားနားခဲ့သည်။—ကမ္ဘာဦး ၅:၃-၂၇။
ယေဟောဝါနှင့်အတူသွားလာခြင်းသည် ဘုရားသခင်နှင့်ရင်းနှီးမှုရှိခြင်း ဟူသည့်သဘောတင်ပြသည်ဖြစ်ရာ ဧနောက်သည် ဘုရားသခင့်အလိုတော်နှင့်အညီ အသက်ရှင်ခဲ့သောကြောင့်သာ ထိုသို့ပြုနိုင်ခြင်းဖြစ်သည်။ ယေဟောဝါသည် ဧနောက်၏ဆည်းကပ်ဝတ်ပြုမှုကို လက်ခံခဲ့၏။ ‘ဧနောက်သည် ဘုရားသခင်၏အလိုတော်နှင့်တွေ့ခဲ့သည်’ ဟုဂရိစက်ပ်တွားဂျင့်ကဆိုသောအချက်ကို တမန်တော်ပေါလုကလည်း ဖော်ပြခဲ့သည်။—ကမ္ဘာဦး ၅:၂၂; ဟေဗြဲ ၁၁:၅။
ဧနောက်သည် ယေဟောဝါနှင့်ဆက်ဆံရေးကောင်းရခြင်းမှာ အဓိကအားဖြင့် သူ၏ယုံကြည်ခြင်းကြောင့်ဖြစ်၏။ ကတိထားရာ ဘုရားသခင့် “မိန်းမ၏အမျိုးအနွယ်” ကိုယုံကြည်ကြောင်း သူတင်ပြခဲ့ပေမည်။ ဧနောက်သည် အာဒံနှင့်ရင်းနှီးမှုရှိခဲ့လျှင် ဧဒင်ဥယျာဉ်တွင် ပထမလူသားမောင်နှံစုံနှင့် ဘုရားသခင်ဆက်ဆံခဲ့သည့် အချက်အလက်အချို့ကို သူသိရှိပေမည်။ ဘုရားသခင်အကြောင်း ဧနောက်သိရှိထားသည့်အချက်အလက်တို့က သူ့အား “ကိုယ်တော်ကိုရှာသော” လူစားမျိုးဖြစ်စေခဲ့၏။—ကမ္ဘာဦး ၃:၁၅; ဟေဗြဲ ၁၁:၆၊ ၁၃။
ဧနောက်နှင့် ကျွန်ုပ်တို့၏အဖြစ်အပျက်တွင် ယေဟောဝါနှင့်ဆက်ဆံရေးကောင်းရှိရန် ဘုရားသခင်နှင့်သိကျွမ်းရုံမျှမကလိုအပ်သည်။ လူတစ်ဦးနှင့်ရင်းနှီးမှုကို ကျွန်ုပ်တို့အလွန်တန်ဖိုးထားမည်ဆိုလျှင် ထိုသူ၏ယူဆချက်များသည် ကျွန်ုပ်တို့၏အတွေးအခေါ်နှင့် အပြုအမူများကို လွှမ်းမိုးမည်မဟုတ်ပေလော။ ထိုရင်းနှီးမှုကို ပျက်စီးစေမည့် စကားနှင့် အပြုအမူများကို ကျွန်ုပ်တို့ရှောင်ရှားကြမည်ဖြစ်သည်။ ကျွန်ုပ်တို့၏အခြေအနေကို ပြောင်းလဲမှုအချို့ပြုလုပ်ရန် စဉ်းစားလျှင်ပင် ယင်းက ထိုဆက်ဆံရေးကို မည်သို့ထိခိုက်နိုင်မည်ကိုလည်း ဆင်ခြင်သုံးသပ်မည် မဟုတ်ပေလော။
ထိုနည်းတူစွာ ဘုရားသခင်နှင့်ရင်းနှီးသောဆက်ဆံရေးကို ထိန်းသိမ်းထားလိုခြင်းသည် ကျွန်ုပ်တို့ပြုလုပ်ရာအပေါ် မူတည်သည်။ ကိုယ်တော်နှစ်သက်သည့်အရာ၊ မနှစ်သက်သည့်အရာတို့ကို တိကျမှန်ကန်စွာသိရှိထားရန်လိုသည်။ ထို့နောက် ကျွန်ုပ်တို့၏အတွေးအခေါ်နှင့် အပြုအမူ၌ပင် ကိုယ်တော်၏စိတ်တော်နှင့်တွေ့စေရန် ကြိုးစားအားထုတ်၍ ထိုအသိပညာ၏လမ်းညွှန်မှုကို ခံယူဖို့လိုသည်။
မှန်သည်၊ ဘုရားသခင်နှင့်အတူသွားလာရန် ကိုယ်တော်၏စိတ်တော်နှင့်တွေ့စေရမည်။ ဧနောက်သည် နှစ်ပေါင်းရာနှင့်ချီ၍ ထိုသို့ပြုမူခဲ့၏။ အမှန်ဆိုရလျှင် ဘုရားသခင်နှင့်အတူ ဧနောက် “သွားလာ” ခဲ့သည်ဟူ၍ဖော်ပြသော ဟေဗြဲကြိယာပုံစံသည် ထပ်ခါတလဲ၊ ဆက်၍လုပ်ဆောင်သည့် အဓိပ္ပာယ်ရသည်။ “ဘုရားသခင်နှင့်အတူသွားလာ” ခဲ့သော တည်ကြည်သူနောက်တစ်ဦးမှာ နောဧဖြစ်သည်။—ကမ္ဘာဦး ၆:၉။
ဧနောက်သည် ဇနီးသည်နှင့် “သားသမီးများ” ရှိသော အိမ်ထောင်သည်တစ်ဦးဖြစ်သည်။ သူ၏သားတစ်ဦးမှာ မသုရှလဖြစ်၏။ (ကမ္ဘာဦး ၅:၂၁၊ ၂၂) ဧနောက်သည် သူ၏အိမ်ထောင်ကို ကောင်းစွာအုပ်ထိန်းရန် အတတ်နိုင်ဆုံးပြုလုပ်ခဲ့ပေမည်။ သို့သော် သူ့ပတ်လည်တွင် ဘုရားတရားမဲ့သူများ ဝိုင်းရံနေသောကြောင့် ဘုရားသခင်၏အမှုတော်ဆောင်ရန် သူ့အတွက် မလွယ်ကူခဲ့ချေ။ သူ၏ခေတ်တွင် နောဧ၏ဖခင်လာမက်သာ ယေဟောဝါကိုယုံကြည်ကြောင်း တင်ပြသူဖြစ်ပေမည်။ (ကမ္ဘာဦး ၅:၂၈၊ ၂၉) သို့တိုင် စစ်မှန်သောဝတ်ပြုရေးကို ဧနောက် သတ္တိရှိရှိကျင့်သုံးခဲ့၏။
ဘုရားသခင်ကို ဆက်လက်တည်ကြည်ရန် ဧနောက်ကို အဘယ်အရာက ကူညီပေးခဲ့သနည်း။ ယေဟောဝါ၏နာမတော်ကို မထီမဲ့မြင်ပြုသူများ သို့မဟုတ် ဘုရားသခင်ကိုဝတ်ပြုသူတစ်ဦးအတွက် မအပ်စပ်သည့်အပေါင်းအဖော်များနှင့် သူမပေါင်းသင်းခဲ့သည်မှာ သေချာပါသည်။ ယေဟောဝါ၏အကူအညီကို ဆုတောင်း၍ တောင်းဆိုခြင်းကလည်း မိမိ၏ဖန်ဆင်းရှင်မနှစ်သက်သည့် တစ်စုံတစ်ရာကိုရှောင်ရန် ဧနောက်၏သန္နိဋ္ဌာန်ကို ခိုင်မြဲစေနိုင်ခဲ့သည်။
ဘုရားတရားမဲ့သူတို့အပေါ် ပရောဖက်ပြုချက်
ဘုရားတရားမဲ့သူများ ကျွန်ုပ်တို့ကိုဝိုင်းရံချိန်တွင် မြင့်မားသောစံနှုန်းများကို ထိန်းသိမ်းရန် အတော့်ကိုခက်ခဲသည်။ သို့သော် ဧနောက်သည် မတရားသောသူတို့အပေါ် မလိုက်လျောသော တရားစီရင်ချက်သတင်းကိုလည်း ဟောခဲ့သည်။ ဘုရားသခင့်ဝိညာဉ်တော်၏ လမ်းညွှန်မှုဖြင့် ဧနောက်သည် ဤသို့ပရောဖက်ပြုကြေညာခဲ့သည်– “ထာဝရဘုရားသည် ခပ်သိမ်းသောသူတို့ကို တရားစီရင်တော်မူ၍ မတရားသောသူတို့သည် မတရားသဖြင့်ပြုသော အဓမ္မအမှုရှိသမျှတို့၏အပြစ်ကိုလည်းကောင်း၊ မတရားသောလူဆိုးတို့သည် ဘုရားသခင်ကိုပြစ်မှား၍ပြောသော ကြမ်းတမ်းသောစကားရှိသမျှတို့၏အပြစ်ကိုလည်းကောင်း ဖော်ပြခြင်းငှာ အတိုင်းမသိများစွာသော မိမိသန့်ရှင်းသူတို့နှင့်တကွ ကြွလာတော်မူလိမ့်မည်။”—ယုဒ ၁၄၊ ၁၅။
ထိုသတင်းတရားသည် မယုံကြည်သူများအပေါ် မည်သည့်အကျိုးသက်ရောက်နိုင်မည်နည်း။ အဆိုပါနာကြည်းစေသောစကားများသည် ဧနောက်ကို ပြောင်လှောင်ကဲ့ရဲ့ခြိမ်းခြောက်သည့်အထိပင် မနှစ်လိုဖွယ်ဖြစ်စေသည်ဟု ယူမှတ်နိုင်စရာအကြောင်းရှိသည်။ အချို့က သူ့ကို သတ်ပစ်လိုခဲ့ကြမည်။ သို့သော် ဧနောက်မကြောက်ခဲ့ချေ။ ဖြောင့်မတ်သောအာဗေလ၏အဖြစ်အပျက်ကို ဧနောက်သိရှိခဲ့ရာ မည်သို့ပင်ဖြစ်လာပါစေ သူကဲ့သို့ပင် ဘုရားသခင်၏အမှုတော်ကို ထမ်းဆောင်ရန် သန္နိဋ္ဌာန်ချခဲ့သည်။
‘သူ့ကို ဘုရားသခင်သိမ်းယူခဲ့’
ဧနောက်ကို “ဘုရားသခင်သိမ်းယူ” သောအခါ သူသည် အသက်အန္တရာယ်နှင့် ကြုံခဲ့ရဖွယ်ရှိသည်။ (ကမ္ဘာဦး ၅:၂၄) ခက်ထန်နေသောရန်သူများလက်ထဲတွင် မိမိ၏သစ္စာရှိပရောဖက်အား ဆင်းရဲခံစေရန် ယေဟောဝါခွင့်မပြုခဲ့ချေ။ တမန်တော်ပေါလု၏အဆိုအရ “ဧနောက်သည် . . . သေခြင်းနှင့်လွတ်၍ ဘဝပြောင်းရ၏။” (ဟေဗြဲ ၁၁:၅) ဧနောက်သည် မသေဘဲ အသက်ဆက်ရှင်ရန် ကောင်းကင်သို့ သူ့ကို ဘုရားသခင်သိမ်းယူခဲ့သည်ဟု လူအများကဆိုကြသည်။ သို့သော် ယေရှုက “ကောင်းကင်ဘုံကဆင်းသက်၍ ကောင်းကင်ဘုံ၌ရှိနေသောလူသားမှတစ်ပါး အဘယ်သူမျှကောင်းကင်ဘုံသို့မတက်ပြီ” ဟုရှင်းလင်းစွာ မိန့်ဆိုခဲ့သည်။ ယေရှုသည် ကောင်းကင်သို့တက်သောသူရှိသမျှတွင် “ရှေ့ဆောင်၍ဝင်သောသူ” ဖြစ်သည်။—ယောဟန် ၃:၁၃; ဟေဗြဲ ၆:၁၉၊ ၂၀။
သို့ဖြစ်လျှင် ဧနောက်အဘယ်သို့ဖြစ်ခဲ့သနည်း။ “သေခြင်းနှင့်ကင်းလွတ်၍ ဘဝပြောင်းရ” သည့်သူ၏အဖြစ်မှာ သူ့အား ပရောဖက်ပြုချက်ဆိုင်ရာအတွေးနယ်ထဲ ဘုရားသခင်ခေါ်ဆောင်သွားပြီး ထိုအခြေအနေမျိုး၌ရှိနေစဉ်ပင် သူအသက်သေဆုံးသွားရခြင်းကိုဆိုလိုပေမည်။ ထိုသို့သောအခြေအနေမျိုးတွင် ဧနောက်သည် သေခြင်းဝေဒနာကို ခံစားခဲ့ရလိမ့်မည်မဟုတ်။ ထို့နောက် မောရှေ၏ကိုယ်ခန္ဓာကို ယေဟောဝါဖျောက်လိုက်သကဲ့သို့ပင် သူ၏ကိုယ်ခန္ဓာကိုလည်း ဖျောက်လိုက်ရာ “နောက်တစ်ဖန်မပေါ်မရှိ” ရခြင်းပင်ဖြစ်သည်။—တရားဟောရာ ၃၄:၅၊ ၆။
ဧနောက်သည် ၃၆၅ နှစ်သာအသက်ရှင်ခဲ့သည်—သူ၏တစ်ခေတ်တည်းသားအများစုကဲ့သို့ အသက်မရှည်ခဲ့ချေ။ သို့ရာတွင် ယေဟောဝါကိုချစ်မြတ်နိုးသူများအတွက် အရေးကြီးဆုံးမှာ သေသည်တိုင် ကိုယ်တော်၏အမှုတော်ကို သစ္စာရှိစွာထမ်းဆောင်ခြင်းဖြစ်သည်။ ထိုသို့ဧနောက်ပြုခဲ့ကြောင်း ကျွန်ုပ်တို့သိရှိကြသည်၊ အကြောင်းမှာ “သူသည် ဘဝမပြောင်းမီ ဘုရားသခင်၏စိတ်တော်နှင့်တွေ့သောသူဖြစ်သည်ဟု သက်သေခံခြင်းကိုရလေ၏။” ယင်းကို ဧနောက်အား ယေဟောဝါမည်သို့ပြောပြကြောင်း ကျမ်းစာကမဖော်ပြချေ။ မည်သို့ပင်ဖြစ်ပါစေ၊ ဧနောက်မသေမီ ဘုရားသခင်၏မျက်နှာသာတော်ရရှိကြောင်း သူ့ကို စိတ်ချစေခဲ့ပြီး ရှင်ပြန်ထမြောက်ခြင်းတွင် သူ့ကို ယေဟောဝါသတိရမည်မှာ သေချာသည်။
ဧနောက်၏ယုံကြည်ခြင်းကို တုပလော့
ဘုရားသခင့်လူတို့၏ယုံကြည်ခြင်းကို ကျွန်ုပ်တို့ သင့်လျော်စွာတုပနိုင်သည်။ (ဟေဗြဲ ၁၃:၇) ဧနောက်သည် ယုံကြည်ခြင်းအားဖြင့် ဘုရားသခင်၏ပထမဆုံး သစ္စာရှိပရောဖက်အဖြစ် အမှုထမ်းဆောင်ခဲ့၏။ ဧနောက်ခေတ်ရှိလောကသည် ကျွန်ုပ်တို့ခေတ်ရှိလောကကဲ့သို့ပင် အကြမ်းဖက်မှု၊ ညစ်ညမ်းမှုနှင့် ဘုရားတရားမဲ့မှုတို့ရှိသည်။ သို့သော် ဧနောက်သည် သူတို့နှင့်မတူခဲ့ချေ။ သူ့တွင် စစ်မှန်သောယုံကြည်ခြင်းရှိပြီး ဘုရားသခင်ကိုဆည်းကပ်ဝတ်ပြုခြင်း၌ သူသည် စံနမူနာဖြစ်ခဲ့၏။ အရေးကြီးသောစီရင်ခြင်းသတင်းကို သူ့အား ယေဟောဝါကြေညာခိုင်းသော်လည်း ခွန်အားလည်းပေးခဲ့သည်။ ဧနောက်သည် မိမိတာဝန်ကို သတ္တိရှိရှိလုပ်ဆောင်ခဲ့ပြီး ရန်သူတို့၏အတိုက်အခံကို သူကြုံရသောအခါ သူ့ကို ဘုရားသခင်ကြည့်ရှုစောင့်ရှောက်ပေးခဲ့သည်။
ဧနောက်ကဲ့သို့ ကျွန်ုပ်တို့ယုံကြည်ခြင်းကိုတင်ပြမည်ဆိုလျှင် ဤနောက်ဆုံးနေ့ရက်များ၌ ယေဟောဝါ၏သတင်းတရားကို ကြေညာရန် ကျွန်ုပ်တို့ကို ကိုယ်တော်ခွန်အားပေးပါလိမ့်မည်။ အတိုက်အခံကို သတ္တိရှိရှိရင်ဆိုင်ရန် ကျွန်ုပ်တို့ကို ကိုယ်တော်ကူညီပေးပြီး ကျွန်ုပ်တို့၏ဘုရားသခင်ကို ဆည်းကပ်ဝတ်ပြုခြင်းက ဘုရားတရားမဲ့သူများနှင့် အလွန်ခြားနားစေမည်ဖြစ်သည်။ ယုံကြည်ခြင်းက ဘုရားသခင်နှင့်အတူ ကျွန်ုပ်တို့ကိုသွားလာစေပြီး ကိုယ်တော်၏စိတ်ကို ရွှင်လန်းစေသည့်လမ်းစဉ်အတိုင်း ပြုမူစေမည်။ (သု. ၂၇:၁၁) ဖြောင့်မတ်သောဧနောက်သည် ယုံကြည်ခြင်းအားဖြင့် ဘုရားတရားမဲ့လောကတွင် ယေဟောဝါနှင့်အတူသွားလာခြင်း၌ အောင်မြင်ခဲ့ပြီး ကျွန်ုပ်တို့လည်း ထိုသို့သွားလာနိုင်ကြပါသည်။
[စာမျက်နှာ ၃၀ ပါ လေးထောင့်ကွက်]
ဧနောက်ဝတ္ထုမှ သမ္မာကျမ်းစာကိုးကားသလော
ဧနောက်ဝတ္ထုသည် ကျမ်းပိုဖြစ်ပြီး ကျောက်စာအတုဖြစ်၏။ ယင်းကို ဧနောက်ရေးသားခဲ့သည်ဟု မှားယွင်းစွာယူဆကြသည်။ ဘီ.စီ.အီး. ဒုတိယရာစုနှင့် ပထမရာစုအတွင်း တစ်ချိန်ချိန်တွင်ရေးနိုင်ဖွယ်ရှိသော ဧနောက်ဝတ္ထုသည် ယုတ္တိမရှိ၊ သမိုင်းတွင်မရှိသည့် ဂျူးဒဏ္ဍာရီများကို စုဆောင်းထားခြင်းဖြစ်ကာ ကမ္ဘာဦးကျမ်းတွင် ဧနောက်အကြောင်း အကျဉ်းချုပ်ဖော်ပြထားခြင်းအပေါ် အကျယ်ချဲ့ဖွင့်ဆိုရေးသားထားသည်မှာ ထင်ရှားပါသည်။ ဤအချက်တစ်ခုတည်းကပင် ဘုရားသခင့်မှုတ်သွင်းခံစကားတော်ကို မြတ်နိုးသူများအတွက် ၎င်းကိုထုတ်ဖယ်ပစ်ရန် လုံလောက်ပေသည်။
သမ္မာကျမ်းစာတွင် ယုဒကျမ်းတစ်ခုတည်း၌သာ ဧနောက်၏ဤပရောဖက်ပြုချက်ပါရှိသည်— “ထာဝရဘုရားသည် ခပ်သိမ်းသောသူတို့ကို တရားစီရင်တော်မူ၍ မတရားသောသူတို့သည် မတရားသဖြင့်ပြုသော အဓမ္မအမှုရှိသမျှတို့၏အပြစ်ကိုလည်းကောင်း၊ မတရားသောလူဆိုးတို့သည် ဘုရားသခင်ကိုပြစ်မှား၍ပြောသော ကြမ်းတမ်းသောစကားရှိသမျှတို့၏ အပြစ်ကိုလည်းကောင်း ဖော်ပြခြင်းငှာ အတိုင်းမသိများစွာသော မိမိသန့်ရှင်းသူတို့နှင့်တကွ ကြွလာတော်မူလိမ့်မည်။” (ယုဒ ၁၄၊ ၁၅) ဘုရားတရားမဲ့တစ်ခေတ်တည်းသားများနှင့်ပတ်သက်သည့် ဧနောက်၏ပရောဖက်ပြုချက်ကို ဧနောက်ဝတ္ထုမှတိုက်ရိုက်ကိုးကားသည်ဟု ကျမ်းပညာရှင်များစွာက အခိုင်အမာပြောဆိုကြသည်။ ယုဒသည် မိမိ၏ကိုးကားချက်အဖြစ် စိတ်ချ၍မရနိုင်သောကျမ်းပိုကို အသုံးပြုရေးသားမည်လော။
ဧနောက်၏ပရောဖက်ပြုချက်ကို ယုဒမည်သို့သိရှိခဲ့ကြောင်း ကျမ်းစာတွင် မဖော်ပြထားပါ။ ရှေးကတည်းက လက်ဆင့်ကမ်းလာခဲ့သော အများသိအကြောင်းအရာတစ်ခု၊ ယုံကြည်စိတ်ချရသောစကားများကို သူကိုးကားနေခြင်းသာဖြစ်သည်။ မောရှေကိုအတိုက်အခံပြုသည့် အမည်မပေါ်သော ဖာရောနန်းတွင်းသား မှော်ဆရာများအား ယန္နေနှင့်ယံဗြေအဖြစ် အမည်တပ်၍ ပေါလုခေါ်ခဲ့စဉ်ကလည်း အလားတူကိုးကားခဲ့ခြင်းဖြစ်သည်မှာ ထင်ရှားပါသည်။ အကယ်၍ ဧနောက်ဝတ္ထုရေးသူသည် ရှေးအဖြစ်အပျက်ကို ဤနည်းဖြင့်သိရှိခဲ့လျှင် ယုဒသည်လည်း ထိုကဲ့သို့သိရှိခဲ့မည်ကို အဘယ်ကြောင့်ငြင်းဆိုသင့်သနည်း။ *—ထွက်မြောက်ရာ ၇:၁၁၊ ၂၂; ၂ တိမောသေ ၃:၈။
ဘုရားတရားမဲ့သူများနှင့်စပ်လျဉ်း၍ ဧနောက်၏သတင်းတရားကို ယုဒမည်သို့ရရှိခဲ့ခြင်းသည် အရေးမကြီးသောအသေးအမွှားကိစ္စဖြစ်၏။ ယုဒသည် ဘုရားသခင့်မှုတ်သွင်းခြင်းအားဖြင့် ရေးသားခဲ့သည့်အချက်က ၎င်းကို ယုံကြည်စိတ်ချစေပါသည်။ (၂ တိမောသေ ၃:၁၆) ဘုရားသခင့်သန့်ရှင်းသောဝိညာဉ်တော်က မဟုတ်မမှန်သည့်အကြောင်းအရာတစ်စုံတစ်ခုကိုမျှ မဖော်ပြရန် သူ့ကိုကာကွယ်ပေးခဲ့သည်။
[အောက်ခြေမှတ်ချက်]
^ အပိုဒ်၊ 28 ကျမ်းစာ၏မည်သည့်နေရာ၌မျှ မတွေ့ ရှိရသောအကြောင်းအရာတစ်ခုကို တပည့်တော်သတေဖန်လည်း ဖော်ပြခဲ့သည်။ အီဂျစ်အတတ်ပညာကို မောရှေသင်ခဲ့ကြောင်း၊ အီဂျစ်မှ သူထွက်ပြေးစဉ်က အသက် ၄၀ ရှိကြောင်း၊ မိဒျန်ပြည်တွင်အနှစ် ၄၀ နေထိုင်ကြောင်းနှင့်၊ မောရှေပညတ္တိကျမ်းပေးရာ၌ ကောင်းကင်တမန်၏ကဏ္ဍအကြောင်းတို့ဖြစ်သည်။—တမန်တော် ၇:၂၂၊ ၂၃၊ ၃၀၊ ၃၈။
[စာမျက်နှာ ၃၁ ပါ ရုပ်ပုံ]
ဧနောက်သည် ယေဟောဝါ၏သတင်းတရားကို သတ္တိရှိရှိဟောပြောခဲ့