အမှုဆောင်ရန် လှုံ့ဆော်ခံရ
အမှုဆောင်ရန် လှုံ့ဆော်ခံရ
တိုင်းတစ်ပါးတွင် ခရစ်ယာန်သာသနာပြုလုပ်ငန်း ထမ်းဆောင်ရန် မိမိတို့၏မိသားစုများ၊ မိတ်ဆွေများနှင့် အကျွမ်းဝင်သောဝန်းကျင်ကို စွန့်ခွာသွားဖို့ မောင်နှံစုံ ၂၄ တွဲအား ဘာကလှုံ့ဆော်ပေးခြင်းဖြစ်မည်နည်း။ သူတို့သည် ပါပူဝါနယူးဂီနီနှင့်ထိုင်ဝမ်သာမက အာဖရိကနှင့်လက်တင်အမေရိကနိုင်ငံကဲ့သို့သော ဒေသများသို့သွားရောက်ရသည်ကို အဘယ်ကြောင့်နှစ်သက်ပျော်မွေ့ကြခြင်းဖြစ်မည်နည်း။ စွန့်စားလိုစိတ်ကြောင့်ဖြစ်နိုင်သလော။ မဖြစ်နိုင်ပါ၊ ယင်းအစား သူတို့သည် ဘုရားသခင်နှင့်အိမ်နီးချင်းကိုချစ်သည့် မေတ္တာစစ်၏လှုံ့ဆော်မှုကို ခံရသောကြောင့်ဖြစ်သည်။—မဿဲ ၂၂:၃၇-၃၉။
ဤသူများကား မည်သူတို့နည်း။ သူတို့ကား ကင်းမျှော်စင်သမ္မာကျမ်းစာဂိလဒ်ကျောင်း၏ ၁၀၉ ကြိမ်မြောက်သင်တန်းမှ ကျောင်းဆင်းများဖြစ်ကြသည်။ အောင်မြင်သောခရစ်ယာန်သာသနာပြုများဖြစ်ဖို့ ကျောင်းဆင်းများကို ထောက်ကူပေးနိုင်သော မေတ္တာပါဆုံးမစကားကို နားထောင်ရန် ၂၀၀၀၊ စက်တင်ဘာ ၉၊ စနေနေ့၌ နယူးယောက်မြို့၊ ပက်တာစင်ရှိ ကင်းမျှော်စင်ပညာပေးဌာနနှင့် ဂြိုဟ်တုဆက်သွယ်ထားသည့်နေရာများတွင် ၅,၁၉၈ ဦးတို့ စုရုံးရောက်ရှိခဲ့ကြသည်။
အစီအစဉ်သဘာပတိမှာ ယေဟောဝါသက်သေများ၏အုပ်ချုပ်ရေးအဖွဲ့ သွန်သင်ခြင်းကော်မတီဝင်တစ်ဦးဖြစ်သူ စတီဗင်လက်တ်ဖြစ်သည်။ သူသည် မဿဲ ၅:၁၃ ပါ “သင်တို့သည် ဤလောက၏ဆားဖြစ်ကြ၏” ဟူသော အဖွင့်စကားဖြင့် စတင်ခဲ့၏။ ယေရှု၏စကားများက သင်တန်းဆင်းကျောင်းသားများနှင့် အမှန်ပင်သက်ဆိုင်ကြောင်း ညီအစ်ကိုလက်တ်က ရှင်းပြခဲ့သည်။ ဥပမာ၊ ဆားတွင် အရသာရှိစေသည့် ဂုဏ်သတ္တိရှိ၏။ ထို့အတူပင် ခရစ်ယာန်သာသနာပြုများသည် မိမိတို့၏ထိရောက်သောဟောပြောခြင်းလုပ်ငန်းဖြင့် ပုံဆောင်သဘောအရ ဆားနှင့်တူကြသည်။
နှုတ်ခွန်းဆက်အားပေးခြင်း
ထိုနောက် ညီအစ်ကိုလက်တ်သည် သက်တမ်းကြာယေဟောဝါကျေးကျွန်အချို့နှင့် မိတ်ဆက်ပေးခဲ့ပြီး သူတို့သည် တိုတုတ်သော်လည်း အားပါသောကျမ်းစာအခြေပြုဟောပြောချက်များပေးခဲ့ကြသည်။ ဦးဆုံးမှာ စာပေပြုစုရေးဌာနတွင် အမှုဆောင်လျက်ရှိသော ဂျွန် ဝီချခ်ဖြစ်သည်။ “အတိုဆုံးဆာလံကျမ်းသည် ခရစ်ယာန်သာသနာပြုစိတ်ဓာတ်ကို လှုံ့ဆော်ပေးသည်” ဟူသော သူ့ဟောပြောချက်ခေါင်းစဉ်သည် ဆာလံ ၁၁၇ ကိုအခြေပြုထားသည်။ ယနေ့ ယေဟောဝါနှင့်ကိုယ်တော်၏နိုင်ငံတော်အကြောင်းကို “လူမျိုး” များနှင့် “လူအနွယ်” များအား သက်သေခံရန် ကမ္ဘာအနှံ့တွင်လိုအပ်လျက်ရှိသည်။ “ထာဝရဘုရားကိုချီးမွမ်း” ရန်အခြားသူများအား တိုက်တွန်းခြင်းဖြင့် ဆာလံ ၁၁၇ ပြည့်စုံဖို့ ကျောင်းသားများကို အားပေးခဲ့သည်။
ထို့နောက် သဘာပတိသည် အုပ်ချုပ်ရေးအဖွဲ့ဝင် ဂိုင် ပီယပ်စ်နှင့် မိတ်ဆက်ပေးခဲ့၏။ သူက “ပြောင်းသာလွှဲသာရှိပါ၊ သို့သော်ခိုင်မာပါ” အကြောင်းကိုဟောခဲ့သည်။ ဘုရားသခင့်နှုတ်မြွက်စကားတော်သည် ခိုင်ခံ့၏။ တရားဟောရာ ၃၂:၄၊ [သမ္မာ] တွင်ယေဟောဝါဘုရားသခင်ကို ကျောက်ဟုခေါ်ဆိုထားသော်လည်း ကိုယ်တော်၏နှုတ်မြွက်စကားတော်ကို ဘာသာစကားအမျိုးမျိုးပြောသောအုပ်စုများနှင့် ယဉ်ကျေးမှုများ—အမှန်ဆိုရလျှင် လူခပ်သိမ်း—အတွက် ရေးထားရာ၌ ပြောင်းသာလွှဲသာရှိသည်။ ဘုရားသခင့်နှုတ်မြွက်စကားတော်အကြောင်းကို လူတို့၏နှလုံးနှင့် ကိုယ်ကိုကိုယ်သိသောစိတ်ကိုထိမိစေရန် ဟောပြောဖို့ ကျောင်းသားများအား သတိပေးခဲ့သည်။ (၂ ကောရိန္သု ၄:၂) “ဖြောင့်မှန်တဲ့မူတွေအတွက် ခိုင်မာပါ၊ ဒါပေမဲ့ ပြောင်းသာလွှဲသာရှိပါ။ သင်တာဝန်ကျတဲ့နေရာကလူတွေနဲ့ ယဉ်ကျေးမှုမတူတာကြောင့် သူတို့ကိုအထင်မသေးပါနဲ့” ဟူ၍ ညီအစ်ကိုပီယပ်စ်က သတိပေးတိုက်တွန်းခဲ့သည်။
ကမ္ဘာ့ဌာနချုပ်တွင် ၅၃ နှစ်နီးပါး အမှုဆောင်ခဲ့သော ဂိလဒ်သင်တန်းပို့ချသူ ကားလ်အယ်ဒမ်စ်သည် စဉ်းစားတွေးခေါ်မှုကိုနှိုးဆွပေးသည့် “ဤနေရာမှ မည်သည့်နေရာသို့ သင်သွားမည်နည်း” အကြောင်းကို ဟောပြောခဲ့သည်။ စင်စစ်အားဖြင့် မောင်နှံစုံ ၂၄ တွဲသည် ကမ္ဘာတစ်ဝန်းရှိ နိုင်ငံပေါင်း ၂၀ တွင်သာသနာပြုတာဝန်များရရှိခဲ့ကြသည်၊ သို့သော် ထိုတွင်သင်ရောက်ရှိပြီး ရပ်ကွက်ကိုတွေ့လိုက်ရသည်နှင့် ဘာလုပ်မည်နည်းဟူသော မေးခွန်းပေါ်ပေါက်လာခဲ့သည်။ ဂနာမငြိမ်သည့်လောကတွင် ကျွန်ုပ်တို့နေထိုင်လျက်ရှိကြသည်။ လူတို့သည် မိမိကိုယ်ကိုကျေနပ်နှစ်သိမ့်စေဖို့ ကြိုးစားအားထုတ်ရာ၌ နေရာအသစ်များသို့သွားကာ အသစ်အဆန်းများကို လုပ်ဆောင်လိုကြသည်။ အခြားတစ်ဖက်တွင်မူ၊ ကျောင်းသားများသည် ယေဟောဝါ၏ “သိုး” ကိုကိုယ်ကျိုးမငဲ့ ကြည့်ရှုစောင့်ရှောက်ရန် ကိုယ်တော်အလိုတော်ရှိသည့်နေရာသို့သွားရန် ကိုယ်တော်ထံမှတာဝန်ရရှိခဲ့ကြ၏။ သူတို့သည် လူခပ်သိမ်းကိုကောင်းချီးပေးရန် ယေဟောဝါ၏အသုံးတော်ခံအခွင့်အရေးကို ကိုယ်ကျိုးကြောင့် လက်လွှတ်ဆုံးရှုံးခဲ့ရသည့် ရှေးဣသရေလလူတို့နှင့် မတူသင့်ချေ။ ယင်းအစား၊ သူတို့သည် ခမည်းတော်၏အလိုတော်ကို ကိုယ်ကျိုးမငဲ့ အစဉ်လုပ်ဆောင်ခဲ့သော၊ ကြုံတွေ့ရသည့်အခြေအနေအရပ်ရပ်တိုင်းတွင် နာခံမှုရှိခဲ့သော ယေရှုခရစ်ကိုတုပသင့်သည်။—ယောဟန် ၈:၂၉; ၁၀:၁၆။
ဂိလဒ်ကျောင်းမော်ကွန်းထိန်း ဝေါလေ့စ် လစ်ဗရန့်စ်၏အဓိကအချက်မှာ “ဘုရားသခင်၏နက်နဲရာများကို တန်ဖိုးထားပါ” ဖြစ်သည်။ သမ္မာကျမ်းစာက ဘုရားသခင့်နှုတ်မြွက်စကားတော်ကို အလွန်အဖိုးကြီးပြီး ကြိုးစားရှာဖွေရသော ပစ္စည်းဥစ္စာများ၊ အဖိုးတန်ကျောက်မျက်များ၊ တန်ဖိုးကြီးသတ္တုပစ္စည်းများနှင့် ခိုင်းနှိုင်း၍ အကြိမ်ကြိမ်ပြောဆိုသည်။ ‘ဘုရားသခင်ကိုသိကျွမ်းခြင်းအသိပညာ’ ကိုရှာတွေ့ရန် ကျွန်ုပ်တို့သည် “ဝှက်ထားသောဘဏ္ဍာ” ကဲ့သို့ စူးစမ်းရှာဖွေရမည်ဟု နယပုံပြင် ၂:၁-၅ တွင်ဖော်ပြထားသည်။ ဟောပြောသူက ကျောင်းသားများအား မိမိတို့၏တာဝန်အသစ်ကိုထမ်းဆောင်သောအခါ ဘုရားသခင်၏နက်နဲရာများကို ဆက်၍တူးနေကြရန် အားပေးခဲ့သည်။ ညီအစ်ကိုလစ်ဗရန့်စ်သည် ဤသို့ဆင်ခြင်သုံးသပ်ပြ၏– “အဲဒီလိုတူးနေတာဟာ ယေဟောဝါ၌ ယုံကြည်စိတ်ချစေပြီး တာဝန်ကိုစွဲမြဲစွာလုပ်ကိုင်ဖို့ သင့်သန္နိဋ္ဌာန်ကိုခိုင်ခံ့စေမယ့်အတွက် လက်တွေ့ကျပါတယ်။ သူတစ်ပါးကို ဘုရားသခင်ရဲ့ရည်ရွယ်ချက်အကြောင်းရှင်းပြတဲ့အခါ ယုံကြည်စိတ်ချမှုအပြည့်နဲ့ပြောစေဖို့၊ ပိုပြီးထိရောက်တဲ့ဆရာသမားဖြစ်ဖို့ အဲဒါကကူညီပေးပါလိမ့်မယ်။”
စာသင်ခန်းကိုအခြေပြု၍ ဂိလဒ်ကျောင်းသင်တန်းပို့ချသူနောက်တစ်ဦးသည် ပြီးခဲ့သောငါးလကျော်က ကျောင်းသားများ၏လယ်ကွင်းလုပ်ငန်းကို ယေဟောဝါကောင်းချီးပေးခဲ့ပုံ ပြန်လည်သုံးသပ်ခဲ့သည်။ လောရဲန့်စ် ဘိုဝင်န်က ဧဖက်မြို့တွင် တမန်တော်ပေါလု၏လူထုရှေ့အမှုဆောင်ခြင်းနှင့်စပ်လျဉ်း၍ တမန်တော် ၂၀:၂၀ မှပေါလု၏စကားများကို ထောက်ပြခဲ့ကာ သက်သေခံရန်အခွင့်အရေးအားလုံး ပေါလုအသုံးချခဲ့သည်ကိုပေါ်လွင်စေခဲ့သည်။ တမန်တော်ပေါလုနည်းတူ ကျွန်ုပ်တို့အချိန်တွင် ဘုရားသခင်နှင့်အိမ်နီးချင်းကိုချစ်သည့်မေတ္တာ၏ လှုံ့ဆော်ပေးမှုကိုခံရသူများသည် အမှန်တရားကို အခြားသူများအားပြောရန် ဘယ်တော့မျှချုပ်တည်းမထားဘဲ ဘုရားသခင့်နှုတ်မြွက်စကားတော်တန်ခိုးသက်ရောက်စေခွင့်ပြုကြကြောင်း ကျောင်းသားများ၏တွေ့ကြုံမှုများက ဖော်ပြခဲ့သည်။ ယင်းက ယေဟောဝါ၏ကြွယ်ဝသောကောင်းချီးကို ရရှိခံစားစေသည်။
အတွေ့အကြုံရှိသူတို့၏စကားသံများ
သင်တန်းကာလအတွင်း ဤဂိလဒ်သင်တန်းမှကျောင်းသားများသည် အထူးလေ့ကျင့်မှုအတွက် ပက်တာစင်ပညာပေးဌာနသို့ ရောက်ရှိနေကြသော ၂၃ နိုင်ငံမှ ဌာနခွဲကော်မတီဝင်များနှင့် ပေါင်းသင်းနိုင်ခဲ့ခြင်းဖြင့် အထူးပင်အကျိုးဖြစ်ထွန်းခဲ့သည်။ လုပ်ငန်းတော်ဌာနမှ လီယွန်ဝီဗာနှင့် မာရ်တန်ကဲမ်ဘီလ်တို့သည် ဌာနခွဲကော်မတီဝင်အသီးသီးနှင့် လူတွေ့မေးမြန်းခန်းများကို ကြီးမှူးဆောင်ရွက်ပေးခဲ့သည်၊ သူတို့ထဲမှ အချို့သူများကိုယ်တိုင် ဂိလဒ်ကျောင်းဆင်းများဖြစ်ခဲ့ကြသည်။ အဆိုပါအတွေ့အကြုံရှိခရစ်ယာန်သာသနာပြုများထံမှကြားရသော ကျောင်းသားများ၊ သူတို့၏မိသားစုများနှင့် မိတ်ဆွေများအဖို့ အားတက်စရာဖြစ်ခဲ့သည်။
တိုင်းတစ်ပါးတာဝန်များတွင် သူတို့အား နေသားတကျဖြစ်စေရန် ကျောင်းဆင်းသင်တန်းသားတို့အတွက် အကြံပြုချက်များတွင် “အပြုသဘောရှိပါ။ သင့်အတွက်အသစ်အဆန်းဖြစ်နေတဲ့အရာ ဒါမှမဟုတ် သင်နားမလည်နိုင်တဲ့အရာကို ကြုံရမယ်ဆိုရင် လက်မလျော့လိုက်ပါနဲ့။ ယေဟောဝါကိုမှီခိုအားထားပါ”; “ရှိတာလေးနဲ့နေတတ်ဖို့သင်ယူပြီး ဘဝလိုအပ်ချက်တွေကို ယေဟောဝါထောက်ပံ့ပေးမယ်ဆိုတာ ယုံကြည်ပါ” စသည်တို့ပါဝင်ခဲ့သည်။ အခြားမှတ်ချက်များက မိမိတို့၏တာဝန်၌ ရွှင်လန်းမှုကိုဆက်ထိန်းထားရန် ကျောင်းသားများကိုကူညီပေးခြင်းအပေါ် အာရုံစိုက်ခဲ့သည်။ တွေ့ကြုံမှုအချို့မှာ– “သင်ထွက်လာခဲ့တဲ့ဒေသနဲ့ သင်တာဝန်ကျတဲ့ဒေသကို မနှိုင်းယှဉ်ပါနဲ့”; “သူတို့နဲ့ပြောဆိုဆက်သွယ်နိုင်အောင် ဒေသခံဘာသာစကားကိုသင်ယူပြီး လျောက်ပတ်စွာပြောဆိုပါ”; “လူတွေရဲ့ဓလေ့ထုံးစံနဲ့ယဉ်ကျေးမှုကို သင်ယူပါ၊ အဲဒါက သင့်တာဝန်ကိုစွဲစွဲမြဲမြဲလုပ်ကိုင်ဖို့ ထောက်ကူပေးမှာဖြစ်တဲ့အတွက်ကြောင့်ပါပဲ။” အဆိုပါမှတ်ချက်များသည် ခရစ်ယာန်သာသနာပြုများအတွက် တကယ့်ကိုအားပေးမှုကြီးဖြစ်ခဲ့၏။
လူတွေ့မေးမြန်းခန်းများပြီးနောက် ယခု ယေဟောဝါသက်သေများ၏အုပ်ချုပ်ရေးအဖွဲ့ဝင်အဖြစ် အမှုဆောင်လျက်ရှိသော ယခင်ခရစ်ယာန်သာသနာပြုဖြစ်ပြီး ၄၂ ကြိမ်မြောက်ဂိလဒ်သင်တန်းဆင်း ဒေးဗစ် စပလန်က “ကျောင်းသားလော၊ ကျောင်းဆင်းလော” ဟူသော စိတ်ဝင်စားမှုကိုနှိုးဆွပေးသည့် အဓိကဟောပြောချက်ပေးခဲ့သည်။ သူက ကျောင်းဆင်းသင်တန်းသားများအား “သင်တို့ရဲ့သာသနာပြုတာဝန်ကျတဲ့နေရာကိုသွားတဲ့အခါ ကိုယ့်ကိုယ်ကို ဘယ်လိုရှုမြင်ကြမလဲ။ သာသနာပြုလုပ်ငန်းနဲ့ပတ်သက်ပြီး အစစအရာရာသိရှိထားတဲ့ ကျောင်းဆင်းအဖြစ်လား ဒါမှမဟုတ် များစွာသင်ယူနေရဆဲကျောင်းသားအဖြစ်လား” ဟူ၍မေးခဲ့သည်။ ပညာရှိသောသင်တန်းဆင်းသည် မိမိကိုယ်ကို ကျောင်းသားအဖြစ်ရှုမြင်ကြောင်း ညီအစ်ကိုစပလန်က ထောက်ပြခဲ့၏။ ခရစ်ယာန်သာသနာပြုများက မိမိတို့သာသနာပြုတာဝန်ကျသောနေရာတွင် တွေ့ဆုံရသောသူတိုင်းသည် မိမိတို့ကိုတစ်စုံတစ်ရာသင်ပေးနိုင်စွမ်းရှိသူများအဖြစ် ယူမှတ်သင့်သည်။ (ဖိလိပ္ပိ ၂:၃) မိမိတို့၏ခရစ်ယာန်သာသနာပြုချင်းများ၊ ဌာနခွဲ၊ ဒေသခံအသင်းတော်တို့နှင့် အနီးကပ်ပူးပေါင်းဆောင်ရွက်ရန် ကျောင်းသားများ အားပေးခံရကြသည်။ “သင်တို့ဟာ နောက်ဆုံးစာမေးပွဲ အောင်မြင်သွားပေမဲ့ ကျောင်းသားတွေအဖြစ်ကနေ ရပ်မသွားသေးပါဘူး။ အဲဒီမှာ သင်ဟာ သင်ယူဖို့ရောက်လာခြင်းဖြစ်တယ်ဆိုတာ လူတိုင်းကိုရှင်းရှင်းလင်းလင်းပြောပြပါ” ဟူ၍ ညီအစ်ကိုစပလန်က တိုက်တွန်းခဲ့သည်။
အဆိုပါဟောပြောချက်ပြီးနောက် ကျောင်းသားများသည် အောင်လက်မှတ်များကို လက်ခံယူကြပြီး ပရိသတ်အား မိမိတို့၏တာဝန်ကျသည့်နေရာများကို ကြေညာပေးခဲ့သည်။ အတန်းကိုယ်စားလှယ်တစ်ဦးက မြင့်မြတ်သောလုပ်ငန်းတော်၌ ပို၍ကြီးကြီးမားမားလုပ်ဆောင်ရန် သူတို့ကိုလှုံ့ဆော်ပေးသည့် ဘုရားသခင့်နှုတ်မြွက်စကားတော်မှ သိရှိခဲ့ရာများနှင့်အညီ ကျောင်းဆင်းများ၏ဆုံးဖြတ်ချက်များကို ဖော်ပြထားသည့်အဓိဋ္ဌာန်ပြုချက်တစ်ခုကို ဖတ်ပြသောအခါ သင်တန်းဆင်းကျောင်းသားများအတွက် စိတ်လှုပ်ရှားဖွယ်ရာအချိန်ဖြစ်ခဲ့သည်။
ရရှိခဲ့သောဆုံးမစကားသည် ဘုရားသခင်နှင့်အိမ်နီးချင်းကိုချစ်သည့်မေတ္တာပြသရန် ကျောင်းဆင်းများ၏အဓိဋ္ဌာန်ကို ခိုင်ခံ့စေခဲ့သည်ကို တက်ရောက်သူအားလုံးက သဘောတူကြမည်မှာမလွဲပေ။ ထို့ပြင် မိမိတို့တာဝန်ကျသည့်နေရမှလူတို့ကို ဝိညာဉ်ရေးအရကူညီပေးရန် ယခင်ကထက် ပို၍ခိုင်မာစွာသန္နိဋ္ဌာန်ချစေခဲ့သည်။
[စာမျက်နှာ ၂၅ ပါ လေးထောင့်ကွက်]
သင်တန်းဆိုင်ရာအချက်အလက်များ
ကိုယ်စားပြု နိုင်ငံအရေအတွက်– ၁၀
တာဝန်ပေးအပ်ခံရသည့် နိုင်ငံအရေအတွက်– ၂၀
ကျောင်းသား/သူအရေအတွက်– ၄၈
ပျမ်းမျှအသက်– ၃၃.၇
ပျမ်းမျှအမှန်တရားသက်တမ်း– ၁၆.၂
ပျမ်းမျှအချိန်ပြည့် အမှုဆောင်သက်တမ်း– ၁၂.၅
[စာမျက်နှာ ၂၆ ပါ ရုပ်ပုံ]
ဂိလဒ်ကင်းမျှော်စင်ကျမ်းစာကျောင်း၏ ၁၀၉ ကြိမ်မြောက် ဂိလဒ်သင်တန်း
အောက်ပါစာရင်းတွင် အတန်းများကိုရှေ့တန်းမှ နောက်တန်းသို့ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။
(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, Á.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.