ခရစ်ဝင်​ကျမ်း​များ—သမိုင်းဝင်​လော၊ ဒဏ္ဍာရီ​လော

ကမ္ဘာ​တစ်ဝန်း​တွင် နာဇရက်​မြို့သား​ယေရှု—လူ့​ရာဇဝင်​သမိုင်း​ကို ပြောင်းလဲ​စေ​ခဲ့​သော လူငယ်​တစ်ဦး—၏​ဇာတ်ကြောင်း​သည် လူ့​အဖွဲ့အစည်း​၏​ပင်ကို​အစိတ်အပိုင်း​ဖြစ်လာ​သည်။ ယင်းသည် လူတို့၏ စနစ်တကျ​နှင့် အလွတ်သဘော​ပညာရေး​အဝင်​ဖြစ်သည်။ လူအများသည် ခရစ်ဝင်​ကျမ်း​များ​ပါ “သင်၏​စကား​မှာ ဟုတ်​သည်ကို​အ​ဟုတ်၊ မဟုတ်​သည်ကို​မဟုတ် ဖြစ်စေ​လော့” တို့​ကဲ့သို့​သော​စကား​များ​ကို အချိန်​အကန့်အသတ်​မရှိ အမှန်တရား​များနှင့် စကားပုံ​များ​၏ ဇာစ်​မြစ်​ဖြစ်သည်ဟု ယူမှတ်​ထား​ကြသည်။ (မဿဲ ၅:၃၇) အမှန်​မှာ သင့်​မိဘများသည် ခရစ်ယာန်​ဟုတ်​သည်​ဖြစ်စေ၊ မဟုတ်​သည်​ဖြစ်စေ သင့်ကို​သွန်သင်​ပေး​ခဲ့​သည့် သင်ခန်းစာများ​ကား ခရစ်ဝင်​ကျမ်း​မှတ်တမ်းများ​အပေါ် အခြေခံ​ပေမည်။

ခရစ်ဝင်​ကျမ်း​များသည် သန်းနှင့်ချီ​သည့် စိတ်​ရိုး​မှန်သော ခရစ်တော်​၏​နောက်လိုက်​များ​ဆင်းရဲခံ​အသေခံပေး​ရန် အသင့်ရှိ​သော လူတစ်ဦး​အကြောင်း ရေးသား​ဖော်ပြ​ထား​၏။ ခရစ်ဝင်​ကျမ်း​များသည် သတ္တိ၊ ခံနိုင်ရည်၊ ယုံကြည်ခြင်း​နှင့် မျှော်လင့်ခြင်း​တို့အတွက် အခြေခံ​နှင့် အားပေး​လှုံ့ဆော်မှု​တို့ကို​လည်း​ပေး​သည်။ သို့​ဖြစ်၍ ဤ​မှတ်တမ်းများ​ကို ဒဏ္ဍာရီ​ပုံပြင်​မျှ​အဖြစ်​ယူဆ​ခြင်း​ကို​ဖယ်ရှား​ရန် မငြင်း​နိုင်​ဖွယ် သာဓက​လို​မည်​ဟု သင်​သဘောတူ​မည်​မဟုတ်လော။ လူ့​အတွေးအခေါ်​နှင့် အပြု​အမူ​အပေါ် ခရစ်ဝင်​ကျမ်း​မှတ်တမ်းများ​၏ ကြီးမား​သည့်​သြဇာ​သက်ရောက်မှု​ကို သုံးသပ်ကြည့်​သည့်​အခါ တစ်စုံ​တစ်ဦး​က ကျမ်းစစ်​ကျမ်း​မှန်​ဖြစ်မှု​နှင့်​ပတ်သက်​၍ သံသယ​ရှိ​လို​ပါ​က ယုံကြည်​လောက်​သည့်​သက်သေ​အထောက်အထား​ကို သင်​တောင်းဆို​မည်​မဟုတ်ပေ​လော။

ခရစ်ဝင်​ကျမ်း​များနှင့်​စပ်လျဉ်း၍ စဉ်းစား​မှု​ကို​လှုံ့ဆော်ပေး​သော မေးခွန်း​အချို့​ကို​သုံးသပ်ကြည့်​ဖို့ သင့်ကို ကျွန်ုပ်​တို့​ဖိတ်ခေါ်ပါ​သည်။ ခရစ်ယာန်​မဟုတ်​သူ​အချို့​ပင်​ဖြစ်​လင့်​ကစား ဤ​ခရစ်ဝင်​ကျမ်း​များ​ကို လေ့လာသူ​အချို့​သည် အဆိုပါ​အကြောင်း​များ​ကို မည်သို့​သဘောထားကြောင်း အသင်​ကိုယ်တိုင် လေ့လာ​ကြည့်​ပါ။ ထို့နောက် အသင်​ကိုယ်တိုင် အသိ​ကြွယ်​စွာ ကောက်ချက်​များ​ချ​နိုင်​ပါ​သည်။

သုံးသပ်​စ​ရာ​မေးခွန်းများ

◆ ခရစ်ဝင်​ကျမ်း​များသည် ပိုင်နိုင်​စွာ လုပ်ကြံ​ရေးသားခြင်း​ဖြစ်​နိုင်​သလော။

ယေရှု​အကြောင်း နှီးနှော​ဖလှယ်​ပွဲ​ကို စီစဉ်​ဖွဲ့စည်း​သူ ရောဘတ်​ဖန့်ခ်​က ဤသို့​ဆို​သည်– “မဿဲ၊ မာကု၊ လုကာ​နှင့် ယောဟန်တို့သည် ယေရှု​သေဆုံး​ပြီး​နောက် အဆင့်ဆင့်​ဖြစ်ပေါ်​လာသော ခရစ်ယာန်​အယူဝါဒ​နှင့် ကိုယ်တော်​ကို လိုက်လျောညီထွေ​စေရန် ‘မေရှိယကို​တင်ဆက်​ခဲ့​ကြသည်။’” သို့ရာတွင် ခရစ်ဝင်​ကျမ်း​များ​ကို​ရေးသား​နေစဉ် ယေရှု၏​မိန့်ဆိုချက်​များ​ကို​ကြား​ခဲ့​ဖူး​သူ၊ ကိုယ်တော့်​လုပ်ရပ်များ​ကို တွေ့မြင်​ခဲ့​ဖူး​သူ၊ ကိုယ်တော်ရှင်​ပြန်ထ​မြောက်ပြီး​နောက် ကိုယ်တော်​အား တွေ့ရှိ​ခဲ့​ကြ​သူများစွာ​တို့သည် အသက်ရှင်​ကြ​ဆဲ​ဖြစ်သည်။ ထို​သူတို့သည် ခရစ်ဝင်​ကျမ်း​ရေးသူ​များ​ကို လိမ်လည်​လှည့်ဖြား​သည်​ဟု မစွပ်စွဲ​ခဲ့​ကြ​ချေ။

ခရစ်တော်​၏​သေခြင်းနှင့် ရှင်ပြန်ထမြောက်ခြင်း​ကို သုံးသပ်ကြည့်​ပါ။ ခရစ်ဝင်​ကျမ်း​များ​တွင်​သာ ယေရှု၏​သေခြင်းနှင့် ရှင်ပြန်ထမြောက်ခြင်း​အကြောင်း စိတ်ချ​နိုင်​သည့်​မှတ်တမ်းများ ပါရှိ​သည်မဟုတ်​ဘဲ ရှေး​ကောရိန္သု​ခရစ်ယာန်​များ​ထံ တမန်​တော်​ပေါလု​ရေးသားခဲ့​သော ပထမ​စာစောင်​တွင်​လည်း ပါရှိ​သည်။ သူက​ဤသို့​ရေးသားခဲ့​သည်– “ငါသည် ကိုယ်တိုင်​ခံယူ​သည်​အတိုင်း၊ သင်တို့အား​ရှေ့​ဦးစွာ​ပေးအပ်​သော အကြောင်းအရာ​ဟူ​မူ​ကား၊ ခရစ်တော်​သည် ကျမ်းစာ​လာ​သည်​အတိုင်း ငါ​တို့​အပြစ်​ကြောင့်​အသေခံ​တော်​မူ​၏။ သင်္ဂြိုဟ်​ပြီး​မှ၊ ကျမ်းစာ​လာ​သည်​အတိုင်း သုံးရက်​မြောက်​သော​နေ့၌ ထမြောက်​တော်​မူ​၏။ ကေဖ​သည် ကိုယ်တော်​ကို​မြင်ပြီး​မှ၊ တစ်ကျိပ်​နှစ်ပါး​သော​သူတို့သည်​မြင်ရ​ကြ​၏။ ထို​နောက် ညီအစ်ကို​ငါး​ရာ​မ​က၊ တစ်ပြိုင်နက်​မြင်ရ​ကြ​၏။ ထို​သူတို့တွင် အများ​သော​သူတို့သည် ယခု​တိုင်အောင်​အသက်ရှင်​ကြ​သေး​၏။ အချို့​တို့သည် အိပ်ပျော်​ကြပြီ။ ထို​နောက် ယာကုပ်​မြင်ရ​၏။ ထို​နောက် တမန်​တော်​အပေါင်းတို့သည် မြင်ရ​ကြ​၏။ နောက်ဆုံး​၌ အချိန်​မတော်မတန်​ဖွား​သော​သူ​ကဲ့သို့​ဖြစ်သော ငါ​ပင် မြင်ရ​၏။” (၁ ကောရိန္သု ၁၅:၃-၈) ထိုသို့​သော မျက်မြင်​သက်သေ​များသည် ယေရှု​ဘဝ​နှင့်​ပတ်သက်သော သမိုင်းဝင်​ဖြစ်ရပ်မှန်များ​ကို ထိန်းသိမ်း​စောင့်ရှောက်​ခဲ့​သူများ​ဖြစ်​ကြသည်။

မျက်မှောက်ခေတ် အပြစ်တင်​ဝေဖန်သူ​များ​စွပ်စွဲ​သည့် လုပ်ကြံ​ရေးသား​မှု​ကို ခရစ်ယာန်​ဂရိ​ကျမ်းစောင်​များ​တွင် မ​တွေ့ရ​ချေ။ ယင်းအစား စီ.အီး. ဒုတိယ​ရာစု​မှ​စာပေ​များ​တွင် တွေ့ရှိ​ရသည်။ ထို့​ကြောင့် တမန်​တော်​များ​၏​အသင်းတော်​နှင့် ကင်းကွာ​နေသော​လူစု​များ​အလယ်တွင် စစ်မှန်သော​ခရစ်ယာန်​ဘာသာ​မှ အယူဖောက်ပြန်မှု​ပေါ်ပေါက်​လာ သောအခါ ခရစ်တော်​နှင့်​ပတ်သက်​၍ ကျမ်းစာ​နှင့်​မညီ​သည့် ပြောပြချက်​များ​ပေါ်လာ​လေ​သည်။—တမန်​တော် ၂၀:၂၈-၃၀။

◆ ခရစ်ဝင်​ကျမ်း​များသည် ဒဏ္ဍာရီ​ပုံပြင်​များ​ဖြစ်​နိုင်​သလော။

စာရေး​ဆရာ​နှင့် ဝေဖန်ရေး​ဆရာ စီ. အက်စ်. လူးဝိစ်​သည် ခရစ်ဝင်​ကျမ်း​များ​ကို ဒဏ္ဍာရီ​ပုံပြင်​များ​အဖြစ်​မျှ​ရှုမြင်​ရန် ခက်ခဲ​ခဲ့​သည်။ “စာပေ​သမိုင်း​ပညာရှင်​တစ်ဦး​အနေ​နှင့် ခရစ်ဝင်​ကျမ်း​များသည် အဘယ်အရာ​ပင်​ဖြစ်ပါစေ ဒဏ္ဍာရီ​ပုံပြင်​တော့​မဟုတ်​သည်​မှာ ကျွန်တော် ရာနှုန်းပြည့်​ယုံကြည်​သည်” ဟု​ရေးသားခဲ့​သည်။ “ယင်း​တို့သည် ဒဏ္ဍာရီ​ပုံပြင်​များ​ဖြစ်​လောက်​အောင် စိတ်ကူး​ဉာဏ်​မ​ပြောင်မြောက်​ချေ။ . . . ယေရှု၏​အသက်တာ​အများစုကို ကျွန်ုပ်​တို့​မသိ​ရှိကြ​ချေ၊ ဒဏ္ဍာရီ​ပုံပြင်​တစ်ခု​ကို တီထွင်သူ​တို့သည် ထိုသို့​ဖြစ်စေ​မည်​မဟုတ်ပါ။” နာမည်​ကျော် သမိုင်း​ဆရာ အိပ်ခ်ျ. ဂျီ. ဝဲ​လ်စ်​သည် ခရစ်ယာန်​တစ်ဦး​ဖြစ်သည်ဟု မဆို​ခဲ့​သော်လည်း သူက​ဤသို့​ဝန်ခံခဲ့​ခြင်း​သည် စိတ်ဝင်စားစရာ​ဖြစ်၏– “[ခရစ်ဝင်​ကျမ်း​ရေးသူ] လေးဦး​စ​လုံး​သည် ကျွန်ုပ်​တို့အား အလွန်​တိကျသော​ဥပဓိရုပ်​တစ်ခု​ကို ပုံဖော်​ပေး​သည်။ ယင်း​တို့​က အဖြစ်မှန်​၏​သာဓက​ဖြစ်သည်။”

တပည့်တော်​များ​ထံ ရှင်ပြန်ထမြောက်​ပြီး​သော​ယေရှု ထင်ရှား​ခဲ့​သည့်​အဖြစ်အပျက်​တစ်ခု​ကို သုံးသပ်ကြည့်​ပါ။ ဒဏ္ဍာရီ​ပုံပြင်​တီထွင်​တော်​သူ​တစ်ဦး​သည် ယေရှုကို ခမ်းနား​ထည်ဝါ ထွန်းလင်း​တောက်ပ​မှု​ဖြင့် ထူးခြား​စွာ ပြန်​ကြွရောက်​လာ​စေ​ကာ အလွန်​အရေးပါသော​ဟောပြောချက်​တစ်ခု​ကို​ပေး​စေနိုင်​ဖွယ်​ရှိသည်။ ယင်းအစား ခရစ်ဝင်​ကျမ်း​ရေးသူ​များသည် ကိုယ်တော်​အား မိမိ၏​တပည့်တော်​များ​ရှေ့တွင် မတ်တတ်ရပ်​နေသည်​ဟူ၍​သာ ဖော်ပြ​ကြသည်။ မိမိ​အား​ကိုင်တွယ်​ခွင့်ပြု​ကာ ကိုယ်တော်​က “ချစ်​သားတို့၊ စားစရာ​တစ်စုံတစ်ခု​ရှိသလော” ဟု​မေးခဲ့သည်။ (ယောဟန် ၂၁:၅) ပညာရှင် ဂ​ရဲ​ဂ်​အီစတာဘရုတ်​က ဤသို့​ကောက်ချက်​ချ​သည်– “၎င်းတို့သည် ဒဏ္ဍာရီ​ထွင်လုံး​မဟုတ်ဘဲ စစ်မှန်သော​မှတ်တမ်း​ဖြစ်​ကြောင်း​တင်ပြ​သည့် အသေးစိတ်​အချက်အလက်​များ​ဖြစ်သည်။”

ခရစ်ဝင်​ကျမ်း​များ​ရေးသား​စဉ်​အတွင်း ရေပန်းစား​သော စည်းကမ်း​တင်းကျပ်​သည့် ရဗ္ဗိ​သွန်သင်နည်း​က​လည်း ခရစ်ဝင်​ကျမ်း​များသည် ဒဏ္ဍာရီ​ပုံပြင်​များ​ဖြစ်၏​ဟူသော​စွဲချက်​ကို ယုံဖို့​ခက်​စေ​သည်။ ထို​နည်း​ပညာ​သည် အာဂုံဆောင်​ခြင်း​ဖြစ်သော—အလွတ်ကျက်​မှတ်​ခြင်း သို့​မဟုတ် အထပ်ထပ်​ရွတ်ဆို​ခြင်း—ဖြင့် အတတ်နိုင်ဆုံး​သင်ယူ​သည်။ ယင်းက ပုံကြီးချဲ့​ရေးသားခြင်း​အား ဆန့်ကျင်​သောကြောင့် ယေရှု၏​မိန့်ဆိုချက်​များနှင့် လုပ်ငန်းများ​ကို တိတိကျကျ​နှင့် ဂရုတစိုက်​တင်ပြမှု​ကို​ဖြစ်စေ​သည်။

◆ ခရစ်ဝင်​ကျမ်း​များသည် ဒဏ္ဍာရီ​ပုံပြင်​များ​ဖြစ်ပါ​က ယေရှု​သေဆုံး​ပြီး​နောက် ဤမျှ​အလျင်အမြန်​စုဆောင်းရေး​သား​ပြီး​နိုင်​မည်​လော။

ရရှိ​ထားသော သာဓက​များ​အရ ခရစ်ဝင်​ကျမ်း​များ​ကို စီ.အီး. ၄၁ နှင့် ၉၈ ခုနှစ်​များ​စပ်ကြား ရေးသား​သည်​ဟု​သိရ​၏။ ယေရှုသည် စီ.အီး. ၃၃ တွင် သေဆုံး​ခဲ့​သည်။ ဆိုလိုသည်မှာ ကိုယ်တော်​၏​ဘဝ​မှတ်တမ်း​ကို ကိုယ်တော့်​အမှုဆောင်ခြင်း​ကာလ အဆုံးတိုင်​ပြီး အတော်​တိုတောင်း​သည့်​အချိန်အတွင်း ပြုစု​ခဲ့​ခြင်း​ဖြစ်သည်။ ယင်းက ခရစ်ဝင်​ကျမ်း​ပါ​တင်ပြချက်​များသည် ဒဏ္ဍာရီ​ပုံပြင်​မျှ​ဖြစ်​ကြောင်း ပြောဆို​ရန်​အတွက် အကြီးအကျယ်​အတားအဆီး​ဖြစ်သည်။ ဒဏ္ဍာရီ​ပုံပြင်​များ​ဖြစ်ပေါ်​လာရန်​အတွက် အချိန်​လို​သည်။ ရှေး​ဂရိ​ကဗျာ​ဆရာ ဟိုး​မား​ရေးသားခဲ့​သည့် အီလျတ်​နှင့် အို​ဒက်​စီ တို့ကို​ဥပမာ​အဖြစ်​သုံးသပ်ကြည့်​ပါ။ အချို့​က ထို​မော်ကွန်း​ကဗျာ​နှစ်​ပုဒ်​၏​စာသား​သည် နှစ်ပေါင်း​ရာ​နှင့်​ချီ​၍ တဖြည်းဖြည်း​ဖြစ်ပေါ်​လာ​ကာ အတည်တကျ​ဖြစ်လာ​ခဲ့​သည်​ဟု ဆို​ကြသည်။ ခရစ်ဝင်​ကျမ်း​များ​ကော မည်သို့​နည်း။

သမိုင်း​ဆရာ ဝီလ်​ဒူး​ရဲ​န့်​က သူ​ရေးသား​သည့် ကဲသာ​နှင့်​ခရစ်တော်​စာအုပ်​တွင် ဤသို့​ဆို​သည်– “ထို​သာမန်​လူ​အနည်းငယ်​သည် ဤမျှ​သြဇာ​ကြီးမား​ပြီး ဆွဲဆောင်မှု​ရှိသော​ဥပဓိရုပ်​တစ်ခု၊ ဤမျှ​မြင့်မားသော​ကျင့်ဝတ်​စံချိန်​တစ်ခု၊ ဤမျှ​လှုံ့ဆော်မှု​ဖြစ်စေ​သည့် လူ့​ညီအစ်ကို​အသင်းအပင်း​ကို ဖန်တီး​ပေး​နိုင်​ခဲ့​ခြင်း​တို့သည် ခရစ်ဝင်​ကျမ်း​ပါ အံ့ဖွယ်အမှု​များ​ထက် ပိုမို​၍​မယုံနိုင်​စ​ရာ အံ့ဖွယ်ရာ​တစ်ခု​ဖြစ်​လိမ့်​မည်။ ရာစုနှစ်​ခု​ကြာ အပြင်းအထန်​ပြစ်တင်​ဝေဖန်ခံ​ရပြီး​နောက် ခရစ်တော်​၏​ဘဝ​အသက်တာ၊ အကျင့်​စရိုက်​နှင့် သွန်သင်ချက်​အကျဉ်းချုပ်​သည် အတော်အသင့်​ရှင်းလင်း​ပြီး အနောက်​တိုင်း​သား​၏​သမိုင်း​တွင် စိတ်ဝင်စားစရာ​အကောင်းဆုံး​ထူးခြားချက်​ဖြစ်သည်။”

◆ ကနဦး​ခရစ်ယာန်​အသိုင်းအဝိုင်း​၏ လိုအပ်ရာ​များနှင့်​အညီ​ဖြစ်စေ​ရန် ခရစ်ဝင်​ကျမ်း​များ​ကို နောက်ပိုင်း​တွင် တည်းဖြတ်​ခဲ့​ပါသလော။

အပြစ်တင်​ဝေဖန်သူ​အချို့​က ကနဦး​ခရစ်ယာန်​အသိုင်းအဝိုင်း​၏ ခံယူ​ချက်​များ​က ခရစ်ဝင်​ကျမ်း​ရေးသူ​များ​အား ယေရှု၏​ဘဝ​အတ္ထုပ္ပတ္တိ​ကို တည်းဖြတ်၊ သို့​မဟုတ် ထပ်​ဖြည့်စွက်​စေ​ခဲ့​သည်​ဟု ငြင်းခုံ​ကြ​၏။ သို့ရာတွင် ခရစ်ဝင်​ကျမ်း​များ​ကို အနီးကပ်​လေ့လာခြင်း​က ထိုသို့​သော ခြေရာလက်ရာ​ပျက်​စေခြင်း မပြု​လုပ်ခဲ့ကြ​ကြောင်း ပြ​ဆို​သည်။ ယေရှု​နှင့်​ပတ်သက်​သည့် ခရစ်ဝင်​ကျမ်း​မှတ်တမ်းများ​သည် ပထမ​ရာစု​ခရစ်ယာန်​တို့၏ လိမ်လည်​လှည့်ဖြားမှု​ကြောင့် ပြောင်းလဲ​သွား​ရိုး​မှန်​လျှင် ဂျူး​နှင့် တစ်ပါး​အမျိုးသား​နှစ်​ဖွဲ့​စ​လုံး​နှင့်​ပတ်သက်​သည့် အပျက်သဘော​ပါ​မှတ်ချက်များ ကျမ်း​မူ​တွင် အဘယ်ကြောင့်​ရှိ​ဆဲ​ဖြစ်သနည်း။

အချက်​တစ်ချက်​ကို မဿဲ ၆:၅-၇ တွင်​တွေ့ရ​သည်၊ ထို​တွင် ယေရှု​က “သင်သည် ဆုတောင်း . . . သောအခါ လျှို့ဝှက်​သော​သူတို့​နည်းတူ မပြု​နှင့်။ ထို​သူတို့သည် လူများ​တို့​ရှေ့မှာ ထင်ရှားစေ​ခြင်း​ငှာ၊ ပွဲသဘင် လမ်းဆုံ လမ်းဝ​တို့​၌​ရပ်​လျက် ဆုတောင်းခြင်း​ငှာ အလိုရှိ​ကြ​၏။ ငါ​အမှန်​ဆိုသည်ကား၊ ထို​သူတို့သည် မိမိတို့​အကျိုးကို ခံရ​ကြ​၏” ဟု​ဆို​ခဲ့​ကြောင်း ကိုးကား​ဖော်ပြ​ထား​သည်။ ရှင်း​နေသည်​ကား ယင်းသည် ဂျူး​ဘာသာရေး​ခေါင်းဆောင်​များ​ကို ပြစ်တင်​ရှုတ်ချခြင်း​ဖြစ်သည်။ ယေရှု​က ဤသို့​ဆက်​မိန့်ဆို​သည်– “သင်တို့သည် ဆုတောင်း​သောအခါ သာသနာ​ပ​လူ နည်းတူ အချည်းနှီး​သော​စကား​ဖြင့် အထပ်ထပ်​မ​မြွက်​ကြ​နှင့်။ ထို​သူတို့သည် များစွာသော​စကား​ဖြင့် မိမိတို့​အလို​ပြည့်စုံ​မည်​ဟု ထင်မှတ်​ကြ​၏။” ခရစ်ဝင်​ကျမ်း​ရေးသူ​များသည် ယေရှု၏​စကား​ကို ဤ​နည်း​အတိုင်း​ကိုးကား​ဖော်ပြခြင်း​ဖြင့် ဘာသာဝင်​များ​ရ​ရန် ကြိုးစား​နေကြ​ခြင်း​မဟုတ်။ သူတို့သည် ယေရှု​ခရစ် အမှန်တကယ်​ထုတ်ဖော်​ပြောဆို​ခဲ့​သော​စကား​များ​ကို မှတ်တမ်းတင်​ရုံ​သာ​ဖြစ်သည်။

ယေရှု၏​သင်္ချိုင်းဂူ​သို့​ရောက်လာ​ကာ ၎င်း​သည်​ဟာလာဟင်းလင်း​ဖြစ်နေ​သည်ကို​တွေ့ရှိ​ခဲ့​သည့် အမျိုးသမီးများနှင့်​ပတ်သက်သော ခရစ်ဝင်​ကျမ်း​မှတ်တမ်းများ​ကိုလည်း သုံးသပ်ကြည့်​ပါ။ (မာကု ၁၆:၁-၈) ဂ​ရဲ​ဂ်​အီစတာဘရုတ်​၏​အဆို​အရ “ရှေး​အရှေ့အလယ်ပိုင်း​လူမှုရေး​အရ အမျိုးသမီးများ​၏​သက်သေ​ထွက်ဆိုချက်​သည် ယုံကြည်​စိတ်ချ​၍​မရ​ဖြစ်သည်– သာဓက​အနေ​ဖြင့် အမျိုးသမီး​တစ်ဦး သူ့​သား​အိမ်ရာ​ပြစ်မှားမှု​ကို ယောက်ျား​နှစ်ဦး​၏​သက်သေ​ဖြင့် စီရင်​နိုင်​သော်လည်း အမျိုးသား​တစ်ဦး​ကို​မူ အဘယ်​အမျိုးသမီး​၏​သက်သေ​ထွက်ဆိုချက်​မျှ​ဖြင့် အပြစ်​မစီရင်​နိုင်​ပါ။” အမှန်​မှာ၊ ယေရှု​ကိုယ်တော်တိုင်​၏ တပည့်တော်​များ​ပင်​လျှင် ထို​အမျိုးသမီးများ​ကို မယုံကြည်​ခဲ့​ကြ​ချေ! (လုကာ ၂၄:၁၁) သို့​ဖြစ်၍ ထို​အကြောင်းကို သက်​သက်​လုပ်ကြံ​ရေးသားခြင်း လုံးဝ​ဖြစ်​နိုင်​ဖွယ်​မရှိ​ချေ။

တမန်​တော်​များ​ရေး​သည့်​စာစောင်​များနှင့် တမန်တော်ဝတ္ထု​တို့​တွင် ပုံ​ဥပမာ​များ​ပါ​မလာ​ခြင်း​က ခရစ်ဝင်​ကျမ်း​များ​ပါ​ပုံ​ဥပမာ​များ​ကို ကနဦး​ခရစ်ယာန်​များ​ထည့်သွင်း​ရေးခဲ့​ခြင်း​မဟုတ်၊ ယေရှု​ကိုယ်တော်တိုင်​၏ မိန့်မြွက်​တော်​မူ​ချက်​များ​ဖြစ်​ကြောင်း ခိုင်မာ​စွာ​သက်သေထူ​သည်။ ထို့​ပြင် ခရစ်ဝင်​ကျမ်း​များနှင့် တမန်​တော်​များ​ရေး​သည့်​စာစောင်​များ​ကို ဂရုတစိုက်​နှိုင်းယှဉ်​ကြည့်​ခြင်း​ဖြင့် ပေါလု​၏​စကား​များ​ကို​သော်လည်း​ကောင်း၊ ဂရိ​ကျမ်း​စာစောင်​များ​ကို​ရေးသားသော အခြားသူများ​၏​စကား​ကို​သော်လည်း​ကောင်း ယေရှု၏​စကား​အဖြစ် ပရိယာယ်​သုံး​၍ ပြန်​ရေးသား​ကာ ဖော်ပြ​ထားခြင်း​မရှိကြောင်း တွေ့ရှိ​ရသည်။ ကနဦး​ခရစ်ယာန်​အသင်းအဖွဲ့​သည် ထိုသို့​သာ​ပြုလုပ်​ခဲ့​ကြ​မည်​ဆိုပါ​က ခရစ်ဝင်​ကျမ်း​မှတ်တမ်းများတွင် တမန်​တော်​များ​၏​စာစောင်​များ​မှ အနည်းဆုံး အကြောင်းအရာ​တချို့​ကို ကျွန်ုပ်​တို့​တွေ့ရှိ​သင့်​သည်။ ထိုသို့​မ​တွေ့ရ​ကြသော​ကြောင့် ခရစ်ဝင်​ကျမ်း​ပါ​အကြောင်းအရာ​သည် မူရင်း​အတိုင်း​ဖြစ်​ကာ ကျမ်းစစ်​ကျမ်း​မှန်​ဖြစ်​ကြောင်း ကျွန်ုပ်​တို့ သေချာပေါက်​ကောက်ချက်​ချ​နိုင်​ပါ​သည်။

◆ ခရစ်ဝင်​ကျမ်း​များ​ပါ ရှေ့နောက်​ညီညွတ်​ဟန်​မရှိသည့်​အရာများ​ကော မည်သို့​နည်း။

အပြစ်တင်​ဝေဖန်သူ​များ​က ခရစ်ဝင်​ကျမ်း​များ​တွင် ရှေ့နောက်​မညီညွတ်​မှုများ​စွာ​ရှိ၏​ဟု​ဆို​ခဲ့​သည်​မှာ ကြာမြင့်​ပေ​ပြီ။ သမိုင်း​ဆရာ ဒူး​ရဲ​န့်​သည် ခရစ်ဝင်​ကျမ်း​မှတ်တမ်းများ​ကို သမိုင်းကြောင်း​အချက်အလက်​များ​အဖြစ် ယ​ထာဘူ​တ​ကျ​ကျ​သာ ဆန်းစစ်​ကြည့်​ရန် ကြိုးပမ်း​ခဲ့​သည်။ ထို​ကျမ်း​များ​တွင် ရှေ့နောက်​ညီညွတ်​ပုံ​မရှိ​ရာ​များ​ပါ​သည်​ဟု သူ​ပြောဆို​သော်လည်း သူက​ဤသို့​ကောက်ချက်​ချ​သည်– “ထို​ရှေ့နောက်​မညီညွတ်​မှုများ​မှာ သေးငယ်သော​ကိစ္စ​များ [အသေးအဖွဲ​အချက်အလက်​များ] ဖြစ်​ကြသည်; အရင်းခံ​အကြောင်းအရာ​မဟုတ်; အဓိက​အချက်များ​တွင်​မူ ခရစ်ဝင်​ကျမ်း​များသည် ထူးခြား​စွာ​သဘော​ညီညွတ်​ကြ​ကာ ခရစ်တော်​၏​သရုပ်သကန်​ကို ရှေ့နောက်​ညီညွတ်​စွာ​ဖော်ပြ​သည်။”

ခရစ်ဝင်​ကျမ်း​မှတ်တမ်းများ​ပါ ရှေ့နောက်​ညီညွတ်​ဟန်​မရှိသည့်​အရာများ​ကို များသောအားဖြင့် ဖြေရှင်း​ရလွယ်​ကူ​ပါ​သည်။ သာဓက​အနေ​ဖြင့်– မဿဲ ၈:၅ က မိမိ၏​ငယ်သား​ကို​ကုသ​ပေး​ရန် “တပ်မှူး​တစ်ယောက်​သည် [ယေရှု] အထံတော်​သို့​လာ” သည်​ဟု​ဆို​၏။ လုကာ ၇:၃ တွင်​မူ ထို​တပ်မှူး​က “ယုဒ​အမျိုး​အကြီးအကဲ​တို့ကို [ယေရှု] အထံတော်​သို့​စေလွှတ်​သဖြင့်၊ ကိုယ်တော်​သည်​ကြွ​၍ ထို​ကျွန်​ကို​ချမ်းသာပေး​တော်​မူ​မည်​အကြောင်း တောင်းပန်​လေ​၏” ဟူ၍​ဖတ်​ရသည်။ ထို​အရာရှိ​သည် မိမိ၏​ကိုယ်စားလှယ်​များ​အဖြစ် အကြီးအကဲ​တို့ကို စေလွှတ်ခဲ့​သည်။ ထို​တပ်မှူး သည် ပြောရေးဆိုခွင့်​ရှိသူ​အဖြစ် အသုံးပြု​ခဲ့​သော အကြီးအကဲ​များ​မှ​တစ်ဆင့် တောင်းခံ​ခဲ့​သောကြောင့် သူကိုယ်တိုင် ယေရှုကို လာရောက်​တောင်းပန်​သည်​ဟု မဿဲ​က​ဆို​ခဲ့​ခြင်း​ဖြစ်သည်။ ၎င်း​သည် ခရစ်ဝင်​ကျမ်း​များ​ပါ ကွဲလွဲ​သည်​ဟု​ဆို​သော​အချက်များ​ကို ဖြေရှင်း​နိုင်​ကြောင်း ဖော်ပြ​သည့်​နမူနာ​တစ်ခု​မျှ​ဖြစ်သည်။

ခရစ်ဝင်​ကျမ်း​များသည် သမိုင်း​မှန်​ဖြစ်​ကြောင်း မှတ်​ကျောက်​တင်၍​မရ​ဟု တန်း​မြင့်​အပြစ်ရှာ​ဝေဖန်သူ​များ​၏​အဆို​ကော မည်သို့​နည်း။ ဒူး​ရဲ​န့်​က ဤသို့​ဆက်ဆို​၏– “ဓမ္မသစ်​ကျမ်း​၏​စစ်မှန်​မှု​ကို စမ်းသပ်​ရာ​တွင် စိတ်အား​ထက်သန်​လှ​သော တန်း​မြင့်​ဝေဖန်သူ​များ​၏ ရှာဖွေ​လေ့လာမှု​များသည် ပြင်းထန်​လွန်း​လှ​ရ​ကား ထိုသို့​သာ​ဆန်းစစ်​လျှင် ဟာ​မူ​ရာ​ဘီ၊ ဒေးဗစ်၊ ဆို​က​ရေး​တီး​အစ​ရှိသော ရှေးခေတ်​မှ​နာမည်​ကျော်​ပုဂ္ဂိုလ်​တစ်​ရာ​သည် ဒဏ္ဍာရီ​ပုံပြင်​သာ​ဖြစ်သွား​ကြ​ပေမည်။ ဧဝံဂေလိ​ဟော​သူတို့၏ စိတ်​စွန်းကွက်​မှုများ​နှင့် ကျမ်း​ပညာ​ဆိုင်ရာ တင်ကြို​ယူဆချက်များ​ရှိသည့်​ကြား​မှ သူတို့သည် လုပ်ကြံ​ရေးသားသူ​များ ဖုံးကွယ်​ထား​ကြ​မည့် အဖြစ်အပျက်​များ​ဖြစ်သည့် ဘုရားသခင့်​နိုင်ငံတော်​တွင် အဆင့်မြင့်​ရာထူး​ရ​ရန် တမန်​တော်​များ​၏​ပြိုင်ဆိုင်မှု၊ ယေရှု​အဖမ်း​ခံရ​ပြီး​နောက် သူတို့​ထွက်ပြေး​ခဲ့​ကြ​ခြင်း၊ ပေတရု​၏​ငြင်းပယ်မှု . . . အစ​ရှိသည်​တို့ကို မှတ်တမ်းတင်​ခဲ့​ကြသည်။ ထို​အဖြစ်အပျက်​များ​ကို​ဖတ်ရှု​သူ မည်သူ​တစ်ဦး​တစ်ယောက်​က​မျှ ၎င်းတို့၏​နောက်ကွယ်​ရှိ ဇာတ်ကောင်​၏​အဖြစ်မှန်​ကို သံသယဝင်​ကြ​မည်​မဟုတ်ပါ။”

◆ မျက်မှောက်ခေတ် ခရစ်ယာန်​အယူဝါဒ​သည် ခရစ်ဝင်​ကျမ်း​များ​ပါ​ယေရှုကို ကိုယ်စား​ပြု​ပါသလော။

ယေရှု​အကြောင်း နှီးနှော​ဖ​လှဲ​ပွဲ​က ခရစ်ဝင်​ကျမ်း​များ​အပေါ် ၎င်း​၏​သုတေသန​ပြု​မှု​သည် “ချာ့ခ်ျ​ကောင်စီ​များ​၏​ကြိုးကိုင်မှု​အောက်​မရှိ” ဟု​ကြေညာ​ခဲ့​သည်။ သို့သော် သမိုင်း​ဆရာ ဝဲ​လ်စ်​က ခရစ်ဝင်​ကျမ်း​များ​တွင်​ဖော်ပြ​ထား​သည့် ယေရှု၏​သွန်သင်ချက်​များနှင့် ခရစ်ယာန်ဘောင်​၏​သွန်သင်ချက်​များ​စပ်ကြား ကြီးမား​သည့်​ကွာဟမှု​ရှိကြောင်း အသိအမှတ်ပြု​သည်။ သူက​ဤသို့​ရေးခဲ့​သည်– “ယေရှု၏​တမန်​တော်​များသည် သုံးပါး​ပေါင်း​တစ်ဆူ​အယူ​ကို—မည်သို့​ဆို​စေ ကိုယ်တော်​ထံ​မှ—ကြားဖူး​ခဲ့​ကြသည်​ဟူသော အထောက်အထား​မရှိ​ချေ။ . . . [ယေရှု] သည် ကောင်းကင်​မိ​ဘုရား အိုင်း​စစ်​ပုံစံ​အတိုင်း ကိုယ်တော်​၏​မိခင်​မာရိ​ကိုကိုး​ကွယ်​ခြင်း​အကြောင်း တစ်ခွန်း​မျှ​မပြော​ဆို​ခဲ့​ချေ။ ဝတ်ပြု​ကိုးကွယ်​မှု​နှင့် သုံးနှုန်း​ပြောဆို​ကြ​သည့် ခရစ်ယာန်​သွန်သင်ချက်​အားလုံးနီးပါး​ကို ကိုယ်တော်​ဥပေက္ခာပြု​သည်။” ထို့​ကြောင့် ခရစ်ယာန်ဘောင်​၏​သွန်သင်ချက်​များ​အပေါ် အခြေခံ​ကာ ခရစ်ဝင်​ကျမ်း​များ​၏​တန်ဖိုး​ကို စီရင်​ဆုံးဖြတ်​နိုင်​မည်​မဟုတ်ပါ။

 သင့်​ကောက်ချက်​ကား အဘယ်နည်း

အထက်ပါ​အချက်များ​ကို သုံးသပ်​ပြီး​သည့်​အခါ သင်​မည်သို့​ထင်​သနည်း။ ခရစ်ဝင်​ကျမ်း​များသည် ဒဏ္ဍာရီ​ပုံပြင်​မျှ​သာ​ဖြစ်သည်ဟု ယုံ​လောက်​သော သက်သေ​သာဓက​ရှိပါ​သလော။ ခရစ်ဝင်​ကျမ်း​များ​၏ ကျမ်းစစ်​ကျမ်း​မှန်​ဖြစ်မှု​နှင့်​ပတ်သက်​၍ ပေါ်ပေါက်​သော​မေးခွန်းများ​နှင့် သံသယ​ဖြစ်မှု​များသည် ယုံကြည်​စိတ်ချ​နိုင်​စ​ရာ​မဟုတ်​ကြောင်း တွေ့ရှိ​ခဲ့​ကြသည်။ ကိုယ်​ကိုယ်တိုင်​ဆုံးဖြတ်ချက်​ချဖို့​ရန် ခရစ်ဝင်​ကျမ်း​များ​ကို အမြင်​ကျယ်ကျယ်​ဖြင့် ဖတ်ရှု​ရန်လို​သည်။ (တမန်​တော် ၁၇:၁၁) ခရစ်တော်​၏​ဥပဓိရုပ်​ကို ရှေ့နောက်​ညီညွတ်​စွာ၊ ရိုးသား​စွာ​နှင့် တိကျ​မှန်ကန်​စွာ ခရစ်ဝင်​ကျမ်း​များ​က​ဖော်ပြ​ထား​ပုံ​ကို သင်​သုံးသပ်​သည့်​အခါ ဤ​မှတ်တမ်းများ​သည် စုစည်း​ထားသော​ဒဏ္ဍာရီ​ပုံပြင်​များ လုံးလုံး​မဟုတ်​ကြောင်း သင်​သဘောပေါက်​ပါ​လိမ့်​မည်။ *

သင်သည် သမ္မာကျမ်းစာ​ကို ဂရုတစိုက်​ဆန်းစစ်​ကာ ၎င်း​၏​သွန်သင်ချက်​ကို လက်တွေ့​ကျင့်သုံး​လျှင် သင့်​အသက်တာကို သာ၍​ကောင်းစွာ​ပြောင်းလဲ​ပေး​နိုင်​ကြောင်း သင်​တွေ့ရ​ပါ​လိမ့်​မည်။ (ယောဟန် ၆:၆၈) အထူးသဖြင့် ခရစ်ဝင်​ကျမ်း​များ​တွင်​မှတ်တမ်း​တင်ထား​သည့် ယေရှု၏​မိန့်တော်မူချက်​များသည် ထိုသို့​ဖြစ်သည်။ ထို​ထက်မက နာခံမှု​ရှိသော​လူသားတို့​အတွက် အလွန်​ထူးမြတ်​သော​အနာဂတ်​သိုထား​ကြောင်း ၎င်း​မှ​သင်​သိရှိ​လာနိုင်​ပါ​သည်။—ယောဟန် ၃:၁၆; ၁၇:၃၊ ၁၇။

[အောက်ခြေ​မှတ်ချက်များ]

[စာမျက်နှာ ၇ ပါ လေးထောင့်ကွက်]

မှန်ကန်​စွာ မှတ်တမ်းတင်​ခြင်း သာဓက

လွန်​ခဲ့​သည့်​နှစ်​အနည်းငယ်​ခန့်​က ကျမ်းစာ​ဝေဖန်ရေး​သ​မား​ဖြစ်​ခဲ့​ဖူး​သော ဩစတြေးလျ​မှ ဇာတ်ညွှန်း​ရေးသားသူ​တစ်ဦး ဤသို့​ဝန်ခံခဲ့​သည်– “သတင်းထောက်​တစ်ဦး​ပုံမှန်​လုပ်ကိုင်​ရတဲ့ ပထမ​အဆင့်​ကို ကျွန်တော့်​ဘဝမှာ ပထမ​ဆုံး​အကြိမ်​ပြုလုပ်​ခဲ့တယ်။ အဲ့​ဒါက​တော့ ကျွန်တော်​ရထားတဲ့​အချက်အလက်​တွေ​ကို ပြန်​စစ်ဆေး​ကြည့်​ခြင်း​ဖြစ်တယ်။ . . . အရမ်း​ကို​ထိတ်လန့်​သွားတယ်။ ဘာဖြစ်​လို့လဲ​ဆိုတော့ ကျွန်တော်​ဖတ်​နေတာ​တွေ​ဟာ (ခရစ်ဝင်​ကျမ်း​မှတ်တမ်းများတွင်) ဒဏ္ဍာရီ​ပုံပြင်​မဟုတ်သလို သဘာဝ​လေ့လာမှု​ပညာရှင်​တွေ​ရဲ့ လုပ်ကြံ​ဖန်တီးမှု​လည်း​မဟုတ်ဘူး။ သတင်းပေး​ပို့​နေခြင်း​ဖြစ်တယ်။ ထူးခြားတဲ့​ဖြစ်ရပ်​တွေ​ကို ကိုယ်တိုင်​ကိုယ်​ကျ​နဲ့ တစ်ဆင့်​ကြား​ပြီး သတင်းပို့​တဲ့​အချက်​တွေ​ဖြစ်တယ်။ . . . သတင်းပို့​ခြင်း​မှာ ထူးခြားတဲ့​လက္ခဏာတွေ​ရှိတယ်၊ အဲဒီ​ထူးခြားတဲ့​လက္ခဏာကို ခရစ်ဝင်​ကျမ်း​တွေ​မှာ​တွေ့ရ​တယ်။”

အလားတူ​စွာ အော်​က​လ​န်​တက္ကသိုလ် ဂ​န္ထ​ဝင်​စာပေ​ပါမောက္ခ အီး. အမ်. ဗ​လိုက်​က​လော့​ခ်​က ဤသို့​အကျိုးအကြောင်း​ဖော်ပြ​ပြောဆို​ခဲ့​သည်– “ကျွန်တော်​ဟာ သမိုင်း​ဆရာ​တစ်ဦး​လို့​ဆို​ရမှာ​ပါ။ ကျွန်တော်​လိုက်စား​တဲ့​ဂ​န္ထ​ဝင်​စာပေ​အပိုင်း​ဟာ သမိုင်းကြောင်း​ဆိုင်ရာ​ဖြစ်ပါ​တယ်။ ခရစ်တော်​ရဲ့​ဘဝ​အသက်တာ၊ သေဆုံး​ခြင်း၊ ရှင်ပြန်ထမြောက်ခြင်း​တို့​နဲ့​ဆိုင်​တဲ့​သာဓက​ဟာ ရှေး​သမိုင်းဝင်​အဖြစ်အပျက်​မှန်​များစွာ​တို့​ထက် ပို​ပြီး​တိကျ​မှန်ကန်ကြောင်း ထင်ရှား​စေတယ်​ဆိုတာ​ကို ကျွန်တော်​အာမခံ​နိုင်​ပါ​တယ်။”

[စာမျက်နှာ ၈၊ ၉ ပါ မြေပုံ/ ရုပ်ပုံ]

(ကား​ချက်​အပြည့်အစုံကို စာစောင်​တွင်​ကြည့်​ပါ)

ဖိုနီးရှား

ဂါလိလဲ

ယော​ဒန်​မြစ်

ယုဒပြည်

[ရုပ်ပုံ]

“ခရစ်တော်​ရဲ့​ဘဝ​အသက်တာ၊ သေဆုံး​ခြင်း၊ ရှင်ပြန် ထမြောက်ခြင်း​တို့​နဲ့​ဆိုင်​တဲ့​သာဓက​ဟာ ရှေး​သမိုင်းဝင် အဖြစ်အပျက်​များစွာ​တို့​ထက် ပို​ပြီး​တိကျ မှန်ကန်ကြောင်း​ထင်ရှား​တယ်။”​—ပါမောက္ခ အီး. အမ်. ဗ​လိုက်​က​လော့​ခ်

[Credit Line]

နောက်ခံ​မြေပုံများ– Pictorial Archive (Near Eastern History) Est. and Survey of Israel ၏​မူပိုင်​မြေပုံ​ကို​အခြေခံ​ထား​သည်။