လမ်းညွှန်​အကြံပေး​နိုင်တဲ့ လူကြီးတွေကို သားသမီးတွေ လိုအပ်​ကြတယ်။ မိဘတွေ​အနေနဲ့ အကြံပေး​လမ်းညွှန်​နိုင်တဲ့ အကောင်းဆုံး အနေအထား​မှာ ရှိကြ​သလို အကြံပေး​လမ်းညွှန်​ရမယ့်​တာဝန်လည်း ရှိတယ်။ ဒါပေမဲ့ တခြား​လူကြီးတွေ​လည်း သင့်​ကလေးတွေကို ကူညီ​လမ်းညွှန်​ပေးနိုင်​ကြပါတယ်။

နိုင်ငံ​ဒေသ​များစွာမှာ လူငယ်တွေဟာ လူကြီးတွေ​နဲ့ ထိတွေ့မှု မရှိသလောက် ဖြစ်လာတယ်။ စဉ်းစား​ကြည့်ပါ။

• ကလေးတွေဟာ ကျောင်းမှာ​ပဲ အချိန်ကုန်​တာ များတယ်။ ဆရာ/မ​တွေ၊ တခြား​လူကြီးတွေ​ထက် ကျောင်းသူ/သားတွေ ပို​များနေ​တယ်။

• ကျောင်းဆင်းတော့ အိမ်မှာ လူ​မရှိဘူး။ မိဘတွေက အလုပ်မှာ။

• အမေရိကန်မှာ ၈ နှစ်​နဲ့ ၁၂ နှစ်​ကြား ကလေးတွေဟာ ဖျော်ဖြေရေး​မီဒီယာ​မှာ တစ်နေ့ ခြောက်​နာရီ အချိန်ကုန်​နေကြ​တယ်။ *

“လူငယ်တွေဟာ လမ်းပြ​ညွှန်ကြားမှု၊ ပုံသွင်းမှု​တို့ကို မိဘတွေ၊ ဆရာ/မ​တွေ၊ တခြား​လူကြီးတွေ​ဆီက မရဘဲ . . . ရွယ်တူချင်း​တွေ​ဆီကနေ ရယူ​နေကြ​တယ်” လို့ Hold On to Your K​i​d​s စာအုပ်မှာ ဖော်ပြ​ထားတယ်။

သားသမီးတွေကို အချိန်​ပေးပါ။

ကျမ်းစာ အခြေခံ​မူ။ “ကလေးကို သူ​သွား​သင့်တဲ့​လမ်းအတိုင်း လေ့ကျင့်ပေးပါ။ အသက်ကြီး​လာ​ရင်တောင် အဲဒီ​လမ်းကို သူ​စွန့်ခွာမှာ မဟုတ်ဘူး။”—ပညာအလိမ္မာ ၂၂:၆။

ကလေးတွေဟာ ပင်ကိုသဘော​အရ မိဘတွေရဲ့ လမ်းညွှန်မှုကို လိုချင်ကြတယ်။ ဆယ်ကျော်သက်​အရွယ် ရောက်လာ​ရင်တောင် ရွယ်တူတွေ​ထက် မိဘတွေရဲ့ အကြံဉာဏ်​ကို ပို​တန်ဖိုးထား​ကြတယ်။ “မြီး​ကောင်​ပေါက်​အရွယ်၊ လူငယ်​အရွယ် သားသမီးရဲ့ သဘောထား၊ အမူအကျင့်ကို မိဘတွေ ဩဇာ​လွှမ်းမိုး​နေတုန်းပဲ။ မြီး​ကောင်​ပေါက်​အရွယ်တွေအနေနဲ့ သင်​ပြောဆို​သမျှကို လက်မခံ​ဘူးဆိုရင်​တောင် မိဘ စဉ်းစား​တာ​ကို သိချင်​ကြတယ်၊ မိဘ ပြောတာကို နားထောင်ချင်​ကြတယ်” ဆိုပြီး You and Your A​do​les​c​en​t စာအုပ်မှာ ဒေါက်တာ လောရင့် စတိန်းဘာ့ဂ် ရေးထားတယ်။

သင့်ကို မျှော်လင့်​အားကိုး​တဲ့ ကလေးရဲ့ ပင်ကို​ဉာဉ်​ကို အခွင့်အရေး​ယူပါ။ ကလေးတွေကို အချိန်​ပေးပါ။ သင့်​ရှုမြင်ပုံ၊ စံနှုန်းတွေ၊ အတွေ့အကြုံ​တွေကို ပြောပြပါ။

 လမ်းညွှန်​ပေးမယ့်​သူ စီစဉ်​ပေးပါ။

ကျမ်းစာ အခြေခံ​မူ။ “ဉာဏ်ပညာ​ရှိသူနဲ့ ပေါင်းဖော်​ရင် ဉာဏ်ပညာ​ ရှိလာမယ်။”—ပညာအလိမ္မာ ၁၃:၂၀။

သင့်​ကလေးတွေ​အတွက် စံနမူနာကောင်း​မယ့်​သူကို စဉ်းစား​ကြည့်​နိုင်မလား။ သူနဲ့ သင့်​ကလေး အချိန်ပေး​ပေါင်းသင်း​စေဖို့ စီစဉ်​ကြည့်ပါ။ သင့်​မိဘ​အခွင့်အာဏာကို​တော့ မစွန့်လွှတ်​သင့်​တာ မှန်ပါတယ်။ ဒါပေမဲ့ သင့်​ကလေးကို ဒုက္ခ​ပေးမှာ မဟုတ်တဲ့ ယုံကြည်​စိတ်ချ​ရ​သူ အသိ​ လူကြီး​တစ်ယောက်ရဲ့ အားပေးမှု​တွေ​က သင့်​လေ့ကျင့်​ပေးမှုကို အားဖြည့်​ပေး​နိုင်ပါတယ်။ ကျမ်းစာ​ခေတ်​တုန်း​က အရွယ်ရောက်​နေပြီ​ဖြစ်တဲ့ တိမောသေ​တောင် တမန်တော် ပေါလုနဲ့ ပေါင်းသင်းခဲ့လို့ အကျိုး​များစွာ ရရှိခဲ့​သလို ပေါလုလည်း တိမောသေ​နဲ့ ခင်မင်​ရင်းနှီးမှု​ကြောင့် အကျိုး​ခံစားခဲ့တယ်။ —ဖိလိပ္ပိ ၂:၂၀၊ ၂၂။

ကုန်လွန်​သွားတဲ့​ရာစုနှစ်​အတွင်း မိသားစု​များစွာဟာ အတိုင်းအတာ​တစ်ခု​အထိ တစ်ပိုင်း​တစ်စစီ ပြိုကွဲ​လာခဲ့ပြီမို့ ဘိုးဘွား​တွေ၊ ဦးလေး​တွေ၊ အဒေါ်​တွေ၊ ဆွေမျိုးသားချင်း​တွေ​နဲ့ ကမ္ဘာ​ခြား နေထိုင်​လာကြတယ်။ အဲဒီလို​ဆိုရင် သင့်​ကလေးတွေမှာ တွေ့မြင်​ချင်တဲ့ အကျင့်​စရိုက်တွေ ပိုင်ဆိုင်တဲ့​လူကြီး​တွေ​ဆီကနေ သင်ယူဖို့ အခွင့်​အလမ်း​တွေ ဖန်တီး​ပေးပါ။