ဘုရားသခင့်နာမည်က ဘာလဲ။ “ငါဟာ ယေဟောဝါပဲ။ ဒါဟာ ငါ့နာမည်ပဲ” လို့ ဘုရားကိုယ်တိုင် ပြောခဲ့တယ်။ (ဟေရှာယ ၄၂:၈) ကျမ်းစာထဲမှာ ဘုရားရဲ့နာမည် အကြိမ် ၇,၀၀၀ ခန့် ပါတယ်။ ဒါပေမဲ့ ဘာသာပြန်ကျမ်းများစွာမှာ ဒီနာမည်ကို “သခင်” ဆိုတဲ့ ဂုဏ်ပုဒ်နဲ့ အစားထိုးထားတယ်။ ဘုရားသခင်က သင်နဲ့ မိတ်ဆွေဖြစ်ချင်တယ်။ ဒါကြောင့် “နာမတော်ကို ခေါ်” ဖို့ အားပေးထားတယ်။—ဆာလံ ၁၀၅:၁။

ယေဟောဝါရဲ့ ဂုဏ်ပုဒ်များ။ ကျမ်းစာမှာ ယေဟောဝါကို “ဘုရားသခင်၊” “အနန္တတန်ခိုးရှင်၊” “ဖန်ဆင်းရှင်၊” “အဖ၊” “သခင်၊” “အချုပ်အခြာအာဏာပိုင်ရှင်” စတဲ့ ဂုဏ်ပုဒ်တွေနဲ့ ရည်ညွှန်း ခေါ်ဆိုတယ်။ ကျမ်းစာမှာပါတဲ့ ဆုတောင်းချက်များစွာမှာ ယေဟောဝါကို ရိုသေလေးစားတဲ့ ဂုဏ်ပုဒ်နဲ့ရော ယေဟောဝါဆိုတဲ့ နာမည်နဲ့ပါ ခေါ်ဆိုထားတယ်။—ဒံယေလ ၉:၄။

 ဘုရားသခင်ရဲ့ ပုံသဏ္ဌာန်တော်။ ဘုရားသခင်ဟာ ဝိညာဉ်ပုဂ္ဂိုလ် ဖြစ်တယ်။ (ယောဟန် ၄:၂၄) “ဘုရားသခင်ကို ဘယ်သူမှ မမြင်ဖူးဘူး” လို့ ကျမ်းစာမှာ ပြောထားတယ်။ (ယောဟန် ၁:၁၈) ဘုရားရဲ့ ခံစားချက်တွေကို ကျမ်းစာမှာ ဖော်ပြထားတယ်။ လူတွေဟာ ဘုရားကို ဝမ်းနည်းအောင် လုပ်နိုင်တယ်၊ “နှစ်သက်” အောင်လည်း လုပ်နိုင်တယ်။—ပညာအလိမ္မာ ၁၁:၂၀။ ဆာလံ ၇၈:၄၀၊ ၄၁။

ဘုရားရဲ့ အံ့ဖွယ် ဂုဏ်ရည်တော်များ။ ဘုရားသခင်ဟာ လူမျိုး၊ နောက်ခံအားလုံးက လူတွေကို မျက်နှာမလိုက်ဘဲ ဆက်ဆံတယ်။ (တမန်တော် ၁၀:၃၄၊ ၃၅) ကိုယ်တော်ဟာ ‘ကရုဏာရှိပြီး သနားစာနာတတ်တဲ့ဘုရား၊ အမျက်ထွက်နှေးပြီး ခိုင်မြဲတဲ့မေတ္တာနဲ့ သစ္စာတရား ကြီးမားတဲ့ဘုရား’ လည်း ဖြစ်တယ်။ (ထွက်မြောက်ရာ ၃၄:၆၊ ၇) ဒါပေမဲ့ ဘုရားရဲ့ ဂုဏ်ရည်တော် ၄ ခုကတော့ အထူး နှစ်သက်စရာပါပဲ။

တန်ခိုး။ ဘုရားက “အနန္တတန်ခိုးရှင်” ဖြစ်လို့ ပေးထားသမျှ ကတိတွေကို ပြည့်စုံအောင်လုပ်နိုင်တဲ့ အကန့်အသတ်မဲ့ တန်ခိုးရှိတယ်။—ကမ္ဘာဦး ၁၇:၁။

ဉာဏ်ပညာ။ ဘုရားရဲ့ ဉာဏ်ပညာက ဘယ်သူ့ထက်မဆို သာလွန်တယ်။ “ဘုရားသခင်တစ်ဆူတည်းပဲ ဉာဏ်ပညာနဲ့ ပြည့်စုံတယ်” လို့ ကျမ်းစာမှာ ဖော်ပြထားတယ်။—ရောမ ၁၆:၂၇။

တရားမျှတခြင်း။ ဘုရားက မှန်ရာကိုပဲ အမြဲ လုပ်တယ်။ ကိုယ်တော် လုပ်သမျှက “ပြီးပြည့်စုံတယ်၊” “မတရားမှုကင်း” တယ်။—တရားဟောရာ ၃၂:၄။

ချစ်ခြင်းမေတ္တာ။ “ဘုရားသခင်ဟာ ချစ်ခြင်းမေတ္တာဖြစ်” တယ်လို့ ကျမ်းစာက ဆိုတယ်။ (၁ ယောဟန် ၄:၈) ဘုရားက မေတ္တာအရည်အသွေး ပြရုံသာမကဘူး၊ ဘုရားကိုယ်တိုင်က ချစ်ခြင်းမေတ္တာဖြစ်တယ်။ ကိုယ်တော်လုပ်သမျှကို အဲဒီ အမြင့်မြတ်ဆုံးမေတ္တာက လွှမ်းမိုးထားတယ်။ အဲဒါက ကျွန်တော်တို့ကို နည်းလမ်းများစွာနဲ့ အကျိုးခံစားရစေတယ်။

ဘုရားနဲ့ လူတွေရဲ့ ရင်းနှီးမှု။ ဘုရားက ကျွန်တော်တို့ရဲ့ မေတ္တာရှင် ကောင်းကင်ဘုံစံ ဖခင် ဖြစ်တယ်။ (မဿဲ ၆:၉) ကိုယ်တော့်ကို ယုံကြည်တယ်ဆိုရင် ကိုယ်တော်နဲ့ မိတ်ဆွေဖြစ်နိုင်တယ်။ (ဆာလံ ၂၅:၁၄) တကယ်တော့ မိမိထံ ဆုတောင်း ချဉ်းကပ်ဖို့၊ “စိုးရိမ်ပူပန်စရာ ရှိသမျှကို” မိမိထံ “ပုံအပ်ထား” ဖို့ သင့်ကို ကိုယ်တော် ဖိတ်ခေါ်ထားတယ်။—၁ ပေတရု ၅:၇။ ယာကုပ် ၄:၈။

ယေရှုက ဘုရား မဟုတ်ဘူး။ ယေရှုဟာ ဘုရားသခင် တိုက်ရိုက်ဖန်ဆင်းခဲ့တဲ့ တစ်ဦးတည်းသော ပုဂ္ဂိုလ်ဖြစ်လို့ ထူးခြားတယ်။ အဲဒါကြောင့် ကျမ်းစာမှာ သူ့ကို ဘုရားရဲ့သားလို့ ခေါ်ထားတယ်။ (ယောဟန် ၁:၁၄) ယေရှုကို ဖန်ဆင်းပြီးနောက်မှာ ယေဟောဝါဟာ တခြားအရာတွေနဲ့ တခြားသူတွေကို ဖန်ဆင်းဖို့ မိမိရဲ့သားဦးကို “ကျွမ်းကျင်လုပ်သား” အဖြစ် အသုံးပြုခဲ့တယ်။—ပညာအလိမ္မာ ၈:၃၀၊ ၃၁။ ကောလောသဲ ၁:၁၅၊ ၁၆။

 ယေရှုခရစ်က သူ့ကိုယ်သူ ဘုရားလို့ ဘယ်တုန်းကမှ မပြောခဲ့ဘူး။ အဲဒီအစား “ကျွန်တော်ဟာ အဲဒီအရှင် [ဘုရား] ရဲ့ ကိုယ်စားလှယ်ပဲ။ ကျွန်တော့်ကို သူစေလွှတ်လိုက်တာ” လို့ ရှင်းပြခဲ့တယ်။ (ယောဟန် ၇:၂၉) တပည့်တစ်ယောက်နဲ့ စကားပြောတဲ့အခါ ယေရှုက ယေဟောဝါကို “ကျွန်တော့်အဖဖြစ်တဲ့ ခင်ဗျားတို့ရဲ့အဖ၊ ကျွန်တော့်ဘုရားသခင်ဖြစ်တဲ့ ခင်ဗျားတို့ရဲ့ ဘုရားသခင်” လို့ ခေါ်ခဲ့တယ်။ (ယောဟန် ၂၀:၁၇) ယေရှု သေဆုံးပြီးနောက် ယေဟောဝါ သူ့ကို ကောင်းကင်မှာ အသက်ပြန်ရှင်စေပြီး မိမိရဲ့ လက်ယာဘက်မှာ ကြီးမြတ်တဲ့အခွင့်အာဏာ ပေးအပ်ခဲ့တယ်။—မဿဲ ၂၈:၁၈။ တမန်တော် ၂:၃၂၊ ၃၃။

ဘုရားသခင်နဲ့ ရင်းနှီးဖို့ သင့်ကို ယေရှုခရစ် ကူညီပေးနိုင်

ယေရှုဟာ ကမ္ဘာကို လာပြီး ကျွန်တော်တို့ကို သူ့ဖခင်အကြောင်း သင်ပေးတယ်။ ယေဟောဝါကိုယ်တိုင်က ယေရှုနဲ့ပတ်သက်ပြီး “သူဟာ ငါ့ရဲ့ချစ်သားပဲ။ သူ့စကားကို နားထောင်ကြ” လို့ ပြောခဲ့တယ်။ (မာကု ၉:၇) ယေရှုဟာ တခြား ဘယ်သူ့ထက်မဆို ဘုရားအကြောင်း ပိုသိတယ်။ ‘အဖဘုရားအကြောင်း သားဖြစ်သူ ကျွန်တော်နဲ့ ကျွန်တော် ဖော်ပြချင်သူတွေကလွဲလို့ ဘယ်သူမှ မသိဘူး’ လို့ ယေရှု ပြောခဲ့တယ်။—လုကာ ၁၀:၂၂။

ဘုရားရဲ့ အရည်အသွေးတွေကို ယေရှု အပြည့်အဝ ပြသတယ်။ ယေရှုဟာ ဖခင်ရဲ့ အရည်အသွေးတွေကို အတိအကျ တုပခဲ့လို့ “ကျွန်တော့်ကိုမြင်တာဟာ အဖဘုရားကို မြင်တာပဲ” ဆိုပြီး ပြောနိုင်ခဲ့တယ်။ (ယောဟန် ၁၄:၉) ယေရှုဟာ ဖခင်ရဲ့ မေတ္တာကို အပြောရော အလုပ်နဲ့ပါ အတုယူခြင်းအားဖြင့် လူတွေကို ဘုရားဆီ ဆွဲဆောင်တယ်။ “ကျွန်တော်ဟာ လမ်းခရီး ဖြစ်တယ်။ အမှန်တရားလည်း ဖြစ်တယ်။ အသက်လည်း ဖြစ်တယ်။ ကျွန်တော့်ကို မဖြတ်သန်းဘဲ ဘယ်သူမှ အဖဘုရားဆီ မရောက်နိုင်ဘူး” လို့ ပြောခဲ့တယ်။ (ယောဟန် ၁၄:၆) “အဖဘုရားကို နည်းမှန်လမ်းကျ ဝတ်ပြုသူတွေဟာ စွမ်းအားတော် လမ်းပြမှုနဲ့အညီ၊ အမှန်တရားနဲ့အညီ ကိုးကွယ်” ရမယ်။ “အဲဒီလို ကိုးကွယ်မယ့်သူတွေကို အဖဘုရား ရှာနေတယ်” လို့လည်း ပြောခဲ့တယ်။ (ယောဟန် ၄:၂၃) စဉ်းစားကြည့်ပါ။ ယေဟောဝါဟာ မိမိအကြောင်း အမှန်တရား သိချင်နေတဲ့ သင်တို့လို လူတွေကို ရှာနေပါတယ်။