ကျွန်တော့်​ဇာတိမြေ​က​တော့ ဂျာမန်​ဒီမိုကရက်တစ် ပြည်​သူ့​သမ္မတနိုင်ငံ၊ ဆက်​စွန်​နီ​ဒေသ​ရဲ့ ရွာ​လေး​တစ်ရွာ​ပါ။ ကျွန်တော်တို့​မိသားစု​ဟာ ချစ်ချစ်ခင်ခင် ရှိ​ကြ​တယ်။ မိဘတွေက အကျင့်​စာရိတ္တ​ကောင်း​အောင် သင်ပေးတယ်။ အဲဒီတုန်းက ဂျာမန်​ဒီမိုကရက်တစ် ပြည်​သူ့​သမ္မတနိုင်ငံ​ဟာ ကွန်မြူနစ်​နိုင်ငံ​ပေါ့။ ဒါကြောင့် ဆက်​စွန်​နီ​ဒေသက လူအများ​စု​အတွက် ဘာသာတရား​ဆိုတာ အရေးမပါ​ဘူး။ ကျွန်တော့်​အတွက်​လည်း ဘုရား​ဆိုတာ မရှိဘူး။ ဘုရားမဲ့ဝါဒ​နဲ့ ကွန်မြူနစ်ဝါဒ​က ကျွန်တော့်ကို အသက် ၁၈ နှစ်အထိ သြဇာလွှမ်းမိုး​ထားတယ်။

ကွန်မြူနစ်ဝါဒ​ကို ကျွန်တော် ဘာကြောင့် သဘောကျ​ခဲ့တာ​လဲ။ လူအားလုံး တန်းတူ​ပဲ​ဆိုတဲ့ အယူအဆကို ကြိုက်​လို့​ပါ။ လူတိုင်း တန်းတူ​ညီမျှ ပိုင်ဆိုင်​သင့်တယ်၊ ဒါမှ ဆင်းရဲ​ချမ်းသာ ကွာဟ​လွန်း​တာမျိုး မရှိ​မှာ​လို့ ကျွန်တော် ယူဆတယ်။ ဒါကြောင့် ကွန်မြူနစ်​လူငယ်​အဖွဲ့​ထဲ ဝင်​လိုက်တယ်။ အသက် ၁၄ နှစ်မှာ စွန့်ပစ်​စက္ကူ​တွေကို ပြန်လည်​အသုံးချ​တဲ့ ပတ်ဝန်းကျင်​ထိန်းသိမ်းရေး စီမံချက်​မှာ အကြာကြီး အလုပ်လုပ်​ခဲ့တယ်။ အောင်း​ဝါ​မြို့​အာဏာပိုင်​တွေ​က ကျွန်တော့်​ရဲ့ ကြိုးစားမှု​ကို ကျေးဇူးတင်​လွန်း​လို့ ဆု​ချီးမြှင့်​တ​ယ်။ လူငယ်​ဖြစ်ပေမဲ့ ထိတ်​ထိတ်​ကြဲ နိုင်ငံရေးသမား​တချို့​နဲ့​တောင် ရင်းနှီး​တ​ယ်။ ကျွန်တော့်​ရဲ့ ဘဝပန်းတိုင် မှန်တယ်၊ အနာဂတ်​မျှော်လင့်ချက် တောက်ပ​နေတယ်​လို့ ခံစားရ​တ​ယ်။

နောက်ပိုင်းမှာ ကျွန်တော့်​ရဲ့ စိတ်ကူး​ကမ္ဘာ​လေး ရုတ်တရက် ပြိုပျက်​သွားတယ်။ ၁၉၈​၉ မှာ ဘာလင်​တံတိုင်း​နဲ့အတူ အရှေ့​ဥရောပ​ရဲ့ ကွန်မြူနစ်​အုပ်စု ပြိုလဲ​သွားတယ်။ ထိတ်လန့်စရာ တစ်ခု​ပြီး​တစ်ခု ကြုံရတယ်။ ဂျာမန်​ဒီမိုကရက်တစ် ပြည်​သူ့​သမ္မတနိုင်ငံ​မှာ မမျှတမှု​တွေ နေရာအနှံ့​ရှိနေ​မှန်း သိလိုက်​ရတယ်။ ဥပမာ၊ ကွန်မြူနစ်ဝါဒ မထောက်ခံသူ​တွေကို နိုင်ငံသား​ကောင်း မပီသ​သူတွေ​လို့ ယူမှတ်​ကြ​တ​ယ်။ ဒါ ဘယ်လို​ဖြစ်နိုင်​မှာ​လဲ။ ကွန်မြူနစ်​တွေဟာ လူတိုင်း တန်းတူ​ပဲလို့ ယူမှတ်​ကြ​တ​ယ် မဟုတ်လား။ ကွန်မြူနစ်ဝါဒ​ဟာ လှည့်စားမှု​တစ်ခု​ပဲ​လား။ ကျွန်တော့်​မှာ သောက​ပင်လယ်​ဝေ​နေ​ပြီ။

ဒါနဲ့ ဦးစားထားရာ ပြောင်း​သွားပြီး ဂီတ​အနုပညာ​ကို အာရုံစိုက်​လာတယ်။ ဂီတ​ကျောင်း တက်ခွင့်​ရတော့ အဲဒီ​ကတစ်ဆင့် တက္ကသိုလ်​တက်​မယ်၊ ပြီးရင် တေးဂီတ​နဲ့ ပန်းချီ​ပညာနဲ့​ပဲ အသက်မွေး​မယ်လို့ စိတ်ကူး​တ​ယ်။ ဒါ့အပြင် ကလေးဘဝ​က သင်​ခဲ့ရတဲ့ ကိုယ်ကျင့်တရား​စံနှုန်းတွေကို​လည်း မ​လိုက်​တော့ဘူး။ အခု ကျွန်တော် စိတ်ဝင်စား​တာက​တော့ ပျော်ပျော်​နေဖို့၊ မိန်းကလေး​တွေနဲ့ ချိန်းတွေ့​ဖို့​ပဲ။ ဒါပေမဲ့ ဂီတ၊ ပန်းချီ​နဲ့ လွတ်လပ်တဲ့​ဘဝပုံစံ​က ကျွန်တော့်​ရဲ့ စိုးရိမ်​သောက​တွေကို မ​လျော့ပါး​စေ​ဘူး။ ကျွန်တော်​ဆွဲ​တဲ့ ပန်းချီ​တွေကို ကြည့်​လိုက်ရင်​တောင် ထိတ်လန့်​ချောက်ချား​စရာ​ တွေပဲ။ အနာဂတ် ဘယ်လို​ရှိ​မလဲ။ ဘဝရည်ရွယ်ချက်​ဟာ ဘာများ​လဲ။

ကျွန်တော်​သိချင်​တဲ့​အဖြေကို သိလိုက်​ရလို့ အံ့သြမိ​တ​ယ်။ ဂီတ​ကျောင်းတက်​တဲ့ တစ်ည​နေ​မှာ အနာဂတ်​အကြောင်း ဆွေးနွေး​နေတဲ့ ကျောင်းသား​တွေရဲ့ စကားဝိုင်း​ထဲ ကျွန်တော် ဝင်​ထိုင်​တ​ယ်။ ယေဟောဝါသက်သေ​ဖြစ်တဲ့ မ​န်​ဒီ *ဆိုတဲ့ ကျောင်းသူ​က “အန်​ဒ​ရီး​ယာ့​စ်၊ ဘဝနဲ့ အနာဂတ်​အကြောင်း န​င် သိချင်​တဲ့​အဖြေတွေကို ကျမ်းစာမှာ အသေအချာ ရှာ​ကြည့်​လိုက်ပါ” လို့ အကြံဉာဏ်ကောင်း ပေးတယ်။

ကျွန်တော် သိပ်​မယုံ​ပေ​မဲ့ ကျမ်းစာမှာ အဖြေရှာ​ကြည့်ဖို့ ဆုံးဖြတ်​လိုက်တယ်။ မ​န်​ဒီ​က ဒံယေလကျမ်း အခန်းကြီး ၂ ကို ဖတ်​ခိုင်း​တ​ယ်။ ကျွန်တော်​ဖတ်​ပြီး အံ့သြ​သွားတယ်။ အခုခေတ်​အထိ သက်ဆိုင်တဲ့ ကမ္ဘာ့အာဏာစက်​တွေ၊ အစိုးရ​တွေအကြောင်း ကြိုဟော​ထားပါ​လား။ မ​န်​ဒီ​က အနာဂတ်​နဲ့​ဆိုင်တဲ့ ကျမ်းစာ​ကြိုဟောချက်​တွေကိုလည်း ပြ​တ​ယ်။ နောက်ဆုံး​တော့ ကျွန်တော်​သိချင်​တဲ့​အဖြေ​တွေ ရှာတွေ့​သွား​ပါ​ပြီ။ ဒါနဲ့ ဒီ​ကြိုဟောချက်​တွေကို ဘယ်သူ​ရေး​တာလဲ။ ဘယ်သူက​များ အနာဂတ်​အကြောင်း ဒီလောက် အတိအကျ ကြိုဟော​နိုင်တာ​လဲ။ ဘုရား​ရှိတယ်​ဆိုတာ ဟုတ်​များ​ဟုတ်​နေ​မလား။

မ​န်​ဒီ​က ဟော့​စ်​နဲ့ အင်​ဂျ​လီ​ကာ​ဆိုတဲ့ သက်သေခံ​မောင်နှံ​နဲ့ ကျွန်တော့်ကို မိတ်ဆက်​ပေးတယ်။ ကျမ်းစာ​အကြောင်း နားလည်​လာအောင် သူတို့ ကူညီပေးတယ်။ ယေဟောဝါ​သက်သေတွေ​ဟာ ဘုရားရဲ့​နာမည် ​ယေဟောဝါကို အလေးထား​ပြီး အမြဲ​သုံး​တဲ့ တစ်ခုတည်း​သော ဘာသာ​ပဲ​ဆိုတာ ချက်ချင်း သဘောပေါက်လာတယ်။ (ဆာလံ ၈၃:၁၈။ မဿဲ ၆:၉) ယေဟောဝါဘုရား​ဟာ လူသား​တွေကို သာယာလှပ​တဲ့ ကမ္ဘာမြေ​ပေါ် ထာဝစဉ်​အသက်​ရှင်ဖို့ အခွင့်အရေး​ပေးထား​မှန်း သိလာ​တယ်။ ‘ယေဟောဝါကို မျှော်လင့်​နေ​သူတွေက​တော့ ကမ္ဘာမြေ​ကို ပိုင်ဆိုင်ရမယ်’ ဆိုပြီး ဆာလံကျမ်း ၃၇:၉ မှာပြော​တ​ယ်။ ကျမ်းစာမှာ​ပါတဲ့ ဘုရားရဲ့​စံနှုန်းတွေကို လိုက်နာသူ​တိုင်း အဲဒီ​အခွင့်အရေး ရရှိနိုင်​တ​ယ် ဆိုတဲ့အချက်​ကို ကျွန်တော်​ကြိုက်​တ​ယ်။

ဒါပေမဲ့ ကျမ်းစာ​စံနှုန်းတွေ​နဲ့အညီ နေထိုင်​ဖို့ ကျွန်တော် အတော်လေး ကြိုးစား​ခဲ့ရတယ်။ အောင်မြင်​တဲ့ ဂီတသမား၊ ပန်းချီ​ဆရာ​ဖြစ်လို့ သိပ်​ဂုဏ်ယူဝင့်ကြွား​နေတာ။ ဒါကြောင့် နှိမ့်ချစိတ်​ရှိအောင် ဦးဆုံး ကြိုးစား​တ​ယ်။ အကျင့်ပျက်​တဲ့​ဘဝ​ပုံစံကို စွန့်ဖို့ အတော့်​ကို အခက်တွေ့​ခဲ့တယ်။ ကျမ်းစာ​ပြောတဲ့​အတိုင်း အတတ်နိုင်ဆုံး ကြိုးစား​အသက်ရှင်​သူတွေကို စိတ်ရှည်​တဲ့​အတွက်၊ ကရုဏာ​ပြပြီး နားလည်​ပေးတဲ့​အတွက် ယေဟောဝါကို ကျေးဇူးတင်​လိုက်တာ။

ကွန်မြူနစ်ဝါဒ​နဲ့ ဘုရားမဲ့ဝါဒ​က ကျွန်တော့်ကို အသက် ၁၈ နှစ်အထိ သြဇာလွှမ်းမိုး​ခဲ့တယ်။ အဲဒီနောက် ကျမ်းစာက ကျွန်တော့်​ဘဝကို ပြောင်းလဲ​ပေး​လိုက်တယ်။ သိရှိ​လာ​တာ​တွေကြောင့် ဘဝ​မျှော်လင့်ချက် ရှိလာ​တ​ယ်၊ ရှေ့ရေး​ကိုပဲ တွေးပူ​မနေ​တော့ဘူး။ ၁၉၉​၃ ခုနှစ်မှာ ယေဟောဝါသက်သေ​အဖြစ် နှစ်ခြင်းခံ​ပြီး ၂၀၀​၀ ပြည့်နှစ်​မှာ တ​ဗိ​သ​လို့ခေါ်တဲ့ ခရစ်ယာန်​ညီအစ်မ​နဲ့ လက်ထပ်​ခဲ့တယ်။ ကျမ်းစာ​အကြောင်း လူတွေ​သိ​လာအောင် အချိန်​ရ​သ​ရွေ့ ကျွန်တော်တို့ ကူညီ​ပေးကြတယ်။ ကျွန်တော့်​လိုပဲ ကွန်မြူနစ်ဝါဒ​နဲ့ ဘုရားမဲ့ဝါဒ​ရဲ့ သြဇာလွှမ်းမှု​ခံရသူ အတော်များများ​နဲ့ ဆုံ​ရ​လေ့ရှိတယ်။ ယေဟောဝါကို ကျွန်တော် ဘယ်လို​သိလာတဲ့​အကြောင်း သူတို့ကို ပြောပြ​ခွင့်​ရလို့ ဝမ်းသာပီတိ​ဖြစ်မိ​တ​ယ်။

ကျွန်တော် ယေဟောဝါ​သက်သေတွေ​နဲ့ ပေါင်း​ခါ​စ​တုန်းက မိဘတွေ ခပ်လန့်လန့်​ပဲ။ ဒါပေမဲ့ သက်သေခံ​တွေနဲ့​ပေါင်း​လို့ ကျွန်တော် လူကောင်း​ဖြစ်လာ​မှန်း သူတို့ သတိထား​မိတယ်။ ခု​ဆိုရင် မိဘနှစ်ပါး​စလုံး ကျမ်းစာဖတ်​နေ​ပြီ။ ယေဟောဝါ​သက်သေတွေရဲ့ အစည်းအဝေးတွေကို တက်​နေ​ပြီ။

အိမ်ထောင်သည်​တွေနဲ့​ပတ်သက်တဲ့ ကျမ်းစာအကြံပြုချက်​တွေကို အတတ်နိုင်ဆုံး လိုက်နာ​တဲ့​အတွက် ကျွန်တော်တို့​အိမ်ထောင်ရေး သာယာချမ်းမြေ့​ပါတယ်။ ဥပမာ၊ အချင်းချင်း​သစ္စာရှိ​ပါ​ဆိုတဲ့ အကြံပြုချက်​ကို လိုက်နာ​လို့ အိမ်ထောင်​ခိုင်မြဲ​တ​ယ်။—ဟီဘရူး ၁၃:၄။

ဒါ့အပြင် ကြောက်​ကြောက်​နဲ့ အသက်ရှင်နေ​ရတာ၊ အနာဂတ်​ကို တွေးပူ​နေတာ​မျိုး မ​ရှိ​တော့ဘူး။ တကယ့်ကို ငြိမ်သက်​စည်းလုံး​တဲ့ ကမ္ဘာချီမိသားစု​ကြီး​ထဲက မိသားစုဝင်​တစ်ယောက်​လို ခံစားရ​တ​ယ်။ ဒီ​မိသားစုကြီး​မှာ အချင်းချင်း တန်းတူ​ညီမျှ ဆက်ဆံ​တ​ယ်။ ကျွန်တော် ယုံကြည်​မျှော်လင့်​ခဲ့တာ ဒီ​ဘဝမျိုး​ပဲ။