ဘုရားသခင်​က မျက်နှာ​မလိုက်ဘူး။ လူသား​အားလုံး​ကို ကောင်းချီး​ပေး​ချင်​တယ်။

“ကမ္ဘာ​ပေါ်​က လူမျိုး​အားလုံး မင်း​ကြောင့် ကောင်းချီး​ခံစား​ရမယ်” လို့ ပရောဖက်​ အာဗြဟံ​ကို ဘုရားသခင် ကတိပေး​ခဲ့​တယ်။—ကမ္ဘာဦး ၁၂:၃။

ဘာ​သိရသလဲ။ ဘုရားသခင်​က ကျွန်တော်​တို့ကို အလွန်​ချစ်တယ်။ ဘုရား​စကား နားထောင်တဲ့ မိသားစု​အားလုံး​ကို ကောင်းချီး​ပေး​ချင်​တယ်။

ဘုရားသခင်​ဟာ မိမိ​အကြောင်း သိဖို့ ကြိုးစား​အားထုတ်​သူတွေကို ကရုဏာ​ပြ​တယ်၊ ကောင်းချီး​ပေး​တယ်။

အနန္တ​တန်ခိုးရှင် ဘုရားသခင်​က ပရောဖက်​ မောရှေ​ကို အံ့ဩ​စရာ​တွေ လုပ်ပြ​နိုင်​ဖို့ တန်ခိုး​ပေး​ခဲ့​တယ်။ ဒါပေမဲ့ မောရှေ​က “ကျွန်တော်​ဟာ စိတ်တော်​နဲ့​တွေ့​တဲ့​သူ​ဆိုရင် ကိုယ်တော့်​ကို​ သိ​ပြီး မျက်နှာသာ​ ဆက်​ရနိုင်ဖို့ ကိုယ်တော့်​လမ်းစဉ်​တွေ​အကြောင်း သင်ပေးပါ” လို့ ပြော​ခဲ့​တယ်။ (ထွက်မြောက်ရာ ၃၃:၁၃) မောရှေ တောင်းဆို​တာ​ကို ဘုရားသခင် သဘောကျ​တယ်။ ဒါ​ကြောင့် ဘုရား​က မိမိရဲ့​ လုပ်ဆောင်ပုံ​နည်းလမ်း​နဲ့ အရည်အသွေးတွေ​အကြောင်း မောရှေ​ကို ပို​သိ​နားလည်စေ​ခဲ့​တယ်။ ဥပမာ၊ ဖန်ဆင်း​ရှင်​ ဘုရားသခင်​ဟာ “ကရုဏာ​ရှိပြီး သနား​စာနာ​တတ်​တဲ့ ဘုရား” ဆိုတာ မောရှေ သိခဲ့ရတယ်။—ထွက်မြောက်ရာ ၃၄:၆၊ ၇။

ဘာ​သိရသလဲ။ ဘုရားသခင်​အကြောင်း ပို​သိဖို့ ကြိုးစား​တဲ့ ယောက်ျား၊ မိန်းမ၊ ကလေး​တွေ​ကို ဘုရား ကောင်းချီး​ပေး​ချင်​တယ်။ ဘုရားသခင်​ကို ဘယ်လို ဝတ်ပြု​ကိုးကွယ်​ရမယ့်​အကြောင်း၊ ကျွန်တော်​တို့ကို ဘုရားသခင် မျက်နှာသာ​ပေး​ပြီး ကောင်းချီး​ပေး​ချင်​တဲ့​အကြောင်း ကျမ်းစာ​မှာ ဖော်ပြ​ထား​တယ်။

ယေရှု​အကြောင်း၊ ယေရှု လုပ်ဆောင်ခဲ့​ရာတွေ၊ သွန်သင်​ခဲ့​ရာတွေ​အကြောင်း သင်ယူမယ်​ဆိုရင် ဘုရားသခင့်​ကောင်းချီး​တွေ​ကို ထာဝစဉ် ခံစားရမယ်။

သမ္မာကျမ်းစာ​ထဲမှာ ယေရှုရဲ့​ ဘဝ​အကြောင်း၊ ယေရှု​ သင်ပေး​ခဲ့​တာ​တွေ​အကြောင်း အများကြီး​ ပါ​တယ်။ မျက်မမြင်တွေကို ပြန်မြင်​အောင်၊ နား​မကြား​သူတွေ ပြန်ကြား​အောင်၊ ခြေမသန်​သူတွေ လမ်းလျှောက်​နိုင်အောင် စတဲ့ အံ့ဩစရာ​တွေ လုပ်ပြဖို့ ယေရှုကို ဘုရား တန်ခိုး​ပေး​ခဲ့​တယ်။ သေသွား​တဲ့​သူတွေကို​တောင် ပြန်​အသက်ရှင်​လာအောင် ယေရှု လုပ်​နိုင်တယ်။ အနာဂတ်​မှာ လူသား​အားလုံး​ကို ဘုရား အဲဒီလို လုပ်ပေးမယ်​ဆိုတာ ယေရှု ပြသ​ခဲ့​တာ​ ဖြစ်တယ်။ အဲဒီ​ကောင်းချီး​တွေ​ကို ခံစား​ရဖို့ ဘာလုပ်​ရမယ်ဆိုတာ​ကိုလည်း ဒီလို ပြောပြ​ခဲ့​တယ်– “ထာဝရ​အသက် ရနိုင်ဖို့​ဆိုရင် တစ်ဆူတည်း​သော စစ်မှန်​တဲ့​ ဘုရားသခင် အဖ​ကို​ရော အဖ စေလွှတ်​လိုက်တဲ့ ယေရှုခရစ်ကိုပါ သိကျွမ်း​ကြရမယ်။”—ယောဟန် ၁၇:၃။

ယေရှုဟာ ထောက်ထား​စာနာ၊ သနား​ကြင်နာ​တတ်တယ်။ “ကျွန်တော့်​ဆီကနေ သင်ယူ​ကြ​ပါ။ ကျွန်တော်​ဟာ နူးညံ့​သိမ်မွေ့​ပြီး စိတ်​နှိမ့်ချတယ်။ ခင်ဗျား​တို့ လန်းဆန်း​ရလိမ့်မယ်” ဆိုတဲ့ ယေရှုရဲ့ လှိုက်လှဲ​တဲ့ ဖိတ်ခေါ်ချက်​ကို လက်ခံ​တဲ့ ယောက်ျား၊ မိန်းမ၊ ကလေး၊ လူကြီး​အားလုံး ယေရှု​ဆီ စုရုံး​ခဲ့​ကြတယ်။ (မဿဲ ၁၁:၂၉) ယေရှုဟာ အမျိုး​သမီးတွေကို မတော်မတရား ဆက်ဆံ​တဲ့ အဲဒီ​အချိန်​က တခြား​သူတွေနဲ့ မတူဘဲ အမျိုးသမီးတွေကို ကြင်နာ​တယ်။ ဂုဏ်​သိက္ခာ​ရှိရှိ၊ လေးလေးစားစား ဆက်ဆံ​တယ်။

ဘာ​သိရသလဲ။ ယေရှု​က လူတွေကို သိပ်​ချစ်တယ်​ဆိုတာ ဖော်ပြ​ခဲ့​တယ်။ လူ​လူ​ချင်း ဘယ်လို ဆက်ဆံ​ရမယ်ဆိုတာ အလွန်​ကောင်း​တဲ့ စံနမူနာ​ ပြ​ခဲ့​တယ်။

“ကျွန်တော်​တို့အတွက်​က​တော့ အဖ ဘုရားသခင် တစ်ဆူတည်း​ပဲ ရှိတယ်” လို့ ကျမ်းစာ​မှာ ရေးထားတယ်။ ယေရှုခရစ်ဟာ ဘုရားသခင်​ရဲ့ စေတမန် ဖြစ်တယ်။ (၁ ကောရိန္သု ၈:၆) ဘုရားသခင်​က မိမိ​ထက် ပို​ကြီးမြတ်​တယ်၊ ဘုရားသခင်​က မိမိကို မြေကြီးပေါ် စေလွှတ်ခဲ့​တယ်လို့ ယေရှု ရှင်းရှင်းလင်းလင်း ပြော​ခဲ့​တယ်။—ယောဟန် ၁၁:၄၁၊ ၄၂။ ၁၄:၂၈။ *