၁၊ ၂။ (က) ဘုရားသခင်​ကို ဝတ်ပြု​ဖို့ ကြိုးစား​မှုကို ဧလိ​ဖတ်​နဲ့ ဗိလဒဒ် ဘယ်လို ပြောခဲ့​သလဲ။ (ခ) မိမိ​ရဲ့​သဘောထားကို ယေဟောဝါ ဘယ်လို ဖော်ပြ​ခဲ့​သလဲ။

“လူက ဘုရားသခင်အတွက် အသုံးဝင်​လို့​လား။ ထိုးထွင်းဉာဏ်​ရှိသူ​က​ရော ဘုရားကို အကျိုးပြု​လို့​လား။ ခင်ဗျား​ဖြောင့်မတ်​တာကို အနန္တတန်ခိုး​ရှင် အရေးစိုက်​ပါ့​မလား။ သမာဓိ​လမ်းစဉ်​အတိုင်း ခင်ဗျား​လိုက်လျှောက်​လို့​ကော ဘုရားက ဘာ​အကျိုးရ​လို့လဲ။” (ယောဘ ၂၂:၁-၃၊ ကဘ) အဲ​ဒီမေးခွန်း​တွေကို စဉ်းစား​ဖူးသလား။ ယောဘ​ကို တေမန်​အမျိုးသား ဧလိ​ဖတ် အဲဒီလို မေးခဲ့တယ်။ အဖြေ​က​တော့ အသုံးမဝင်​ဘူး၊ အကျိုးမပြု​ဘူး၊ အရေး​မ​စိုက်​ဘူး၊ အကျိုး​မရဘူး​လို့ ဧလိ​ဖတ် ယုံကြည်​ခဲ့တယ်။ ဘုရားသခင်​ရှေ့မှာ လူသားတွေ မဖြောင့်မတ်​နိုင်​ဘူးလို့​တောင် ရှု​အာ​အမျိုးသား ဗိလဒဒ် ပြောခဲ့တယ်။—ယောဘ ၂၅:၄ ကိုဖတ်ပါ။

^၂ သစ္စာရှိရှိ ဝတ်ပြု​ဖို့ ကြိုးစား​နေ​လို့လည်း ယေဟောဝါ​အတွက် အကျိုးမရှိ​ဘူး၊ ကျွန်တော်​တို့ကို ပိုးရွ၊ တီကောင်​လောက်​ပဲ သဘောထား​တယ်လို့ အဲ​ဒီ​မိတ်ဆွေ​အတုအယောင်​တွေ ပြော​ကြ​တ​ယ်။ (ယောဘ ၄:၁၉။ ၂၅:၆) အပေါ်ယံ ကြည့်​လိုက်​ရင် ဧလိဖတ်​နဲ့ ဗိလဒဒ်​တို့ အတော်​နှိမ့်ချ​တယ်လို့ ထင်​စရာ​ပါပဲ။ (ယောဘ ၂၂:၂၉) တောင်ထိပ်၊ လေယာဉ်​ပြတင်းပေါက်​က​နေ ကြည့်ရင် လူတို့​ရဲ့ လှုပ်ရှား​မှုကို မှုန်​ဝါး​ဝါး​ပဲ မြင်​ရတယ်။ မြင့်မား​လှတဲ့ ကောင်းကင်​က​နေ ကမ္ဘာ​ကို ငုံ့ကြည့်​လိုက်​တဲ့အခါ နိုင်ငံ​တော်​ လုပ်ငန်း​အတွက် ကျွန်တော်တို့ရဲ့ ပါဝင်​ကြိုးစား​မှုကို ယေဟောဝါ အဲဒီလိုပဲ မြင်​သလား။ မမြင်​ပါဘူး။ မဟုတ်မမှန် ပြောဆို​တဲ့အတွက် ဧလိ​ဖတ်၊ ဗိလ​ဒဒ်၊ ဇော​ဖာ​တို့ကို ယေဟောဝါ ဆုံးမ​ချိန်မှာ မိမိရဲ့ သဘောထားကို ဖော်ပြ​ခဲ့တယ်။ ယောဘ​ကိုတော့ နှစ်သက်​ပြီး “ငါ့​ကျွန်” လို့ ခေါ်​ခဲ့တယ်။ (ယောဘ ၄၂:၇၊ ၈) လူ​ဟာ “ဘုရားသခင်အတွက်” အမှန်တကယ် “အသုံးဝင်” နိုင်ပါတယ်။

၃။ ယေဟောဝါကို ဝတ်ပြု​ဖို့ ကျွန်တော်တို့ရဲ့ ကြိုးစားအားထုတ်မှု​နဲ့ပတ်သက်ပြီး ဧလိဟု ဘာ​ပြောခဲ့​သလဲ။ ဘာ​ဆိုလို​သလဲ။

^၃ ‘ခင်ဗျား ဖြောင့်မတ်​နေလို့​ကော ဘုရားကို ဘာ​အကျိုးပြု​လို့လဲ။ ခင်ဗျား​ဆီကနေ ဘုရား ဘာများ​ရလို့​လဲ’ ဆိုပြီး မေး​ခဲ့တဲ့ ဧလိဟု​ကိုတော့ ယေဟောဝါ မဆုံးမ​ခဲ့ဘူး။ (ယောဘ ၃၅:၇၊ ကဘ) ဘုရားသခင်​ကို ဝတ်ပြု​ဖို့ ကြိုးစား​နေတာ အကျိုးမရှိ​ဘူးလို့ ဧလိဟု ဆိုလို​နေတာ​လား။ မဟုတ်ပါဘူး။ ကျွန်တော်တို့ရဲ့ ဝတ်ပြု​မှုကို ယေဟောဝါ မှီခို​နေတာ မဟုတ်​ကြောင်း ဧလိဟု ပြော​နေတာ​ပါ။ ယေဟောဝါဟာ ပြည့်ဝစုံလင်​တ​ယ်။ ကျွန်တော်တို့​အနေနဲ့ ယေဟောဝါ ပို​ချမ်းသာ​အော​င်၊ ပို​ခွန်အားကြီး​အော​င် မလုပ်နိုင်ဘူး။ တကယ်တော့ ကျွန်တော်တို့ ပိုင်ဆိုင်​ထားတဲ့ ကောင်းမြတ်မှု၊ အစွမ်းအစ၊ ခွန်အား​တွေဟာ ဘုရားသခင်​ဆီက​ပဲ။ အဲဒါတွေကို ဘယ်လို အသုံးပြု​နေတယ်​ဆိုတာ ဘုရားသခင် သတိပြု​ကြည့်​နေတယ်။

၄။ တခြားသူတွေ​အပေါ် ကြင်နာမှု​ပြ​တာကို ယေဟောဝါ ဘာ​နဲ့ နှိုင်း​ထား​သလဲ။

^၄ မိမိ​ကျေးကျွန်​တွေ​အပေါ် မေတ္တာပြ​တာကို မိမိ​အပေါ် ပြ​တယ်လို့ ယေဟောဝါ ယူဆတယ်။ “ဆင်းရဲသား​ကို သနား​သောသူ​သည် ထာဝရဘုရား​အား ချေးငှား​သောသူ​ဖြစ်​၍ သူ​ပြု​သော အမှု​၏​အကျိုးကို ဆပ်ပေး​တော်မူ​လိမ့်မည်” လို့ သုတ္တံ ၁၉:၁၇ မှာ ပြောထားတယ်။ ဆင်းရဲ​သားတွေ​အပေါ်​ပြ​တဲ့ ကြင်နာမှု​တိုင်း​ကို ယေဟော​ဝါ သတိပြု​ကြည့်​နေတယ်​လို့ အဲ​ဒီ​ကျမ်းချက် ဆိုလို​နေတာ မဟုတ်လား။ လူသားတွေ​အပေါ် အကြွေးတင်​နေတယ်၊ မျက်နှာသာ​ကောင်းချီး ပေးပြီး ပြန်ပေး​ဆပ်​ရမယ်လို့ စကြဝဠာ ဖန်ဆင်းရှင် ယူဆ​သလား။ အဲဒီလို ယူဆ​ကြောင်း ဘုရားသခင့် သားတော်​ကိုယ်တိုင် အတည်ပြု​ခဲ့တယ်။—လုကာ ၁၄:၁၃၊ ၁၄ ကိုဖတ်ပါ။

၅။ ဘယ်မေးခွန်းတွေကို သုံးသပ်​ကြ​မလဲ။

^၅ မိမိ​ကိုယ်စား ပြောဆို​ဖို့၊ မိမိ​ရည်ရွယ်ချက် အကောင်အထည် ဖော်​ရာမှာ သစ္စာရှိ​လူသား​တွေကို ပါဝင်​စေ​လို​ကြောင်း ဖော်​ပြဖို့ ပရောဖက် ဟေရှာယ​ကို ယေဟောဝါ ဖိတ်ခေါ်​ခဲ့တယ်။ (ဟေ​ရှာ. ၆:၈-၁၀) အဲ​ဒီ​ဖိတ်ခေါ်​ချက်ကို ဟေရှာယ လိုလိုလားလား လက်ခံခဲ့​တ​ယ်။ ဒီနေ့ လူ​ထောင်ပေါင်း​များစွာ​လည်း “အကျွန်ုပ် ရှိပါ၏။ အကျွန်ုပ်​ကို စေလွှတ်​တော်မူ​ပါ” ဆိုတဲ့ သဘောထားမျိုး တင်ပြ​နေကြ​လေ​ရဲ့။ ယေဟောဝါရဲ့ အမှုတော်​မှာ ခက်ခဲ​တဲ့​တာဝန်​တွေကို ထမ်းဆောင်​နေကြတယ်။ ဒါတောင်မှ ‘တစ်ဦးချင်း​ရဲ့ လုပ်ဆောင်မှု​က တကယ်ပဲ အရေးပါ​လို့​လား။ ငါ့ကို စေတနာ့ဝန်ထမ်း​ခွင့်၊ ပါဝင်ခွင့် ပေးထား​ပေ​မဲ့ ငါ​ကြိုးစား​သည်​ဖြစ်စေ၊ မကြိုးစား​သည်​ဖြစ်စေ မိမိ​စကား​ပြည့်စုံ​အော​င် ယေဟောဝါ ဘာ​မဆို လုပ်ဆောင်​နိုင်တယ် မဟုတ်လား’ လို့ မေး​မိ​နိုင်တယ်။ အဲ​ဒီမေးခွန်း​တွေကို ဒေဗော​ရ​နဲ့ ဗာရက်​ခေတ် ဖြစ်ရပ်​က ဘယ်လို ဖြေ​ပေးတယ်​ဆိုတာ သုံးသပ်ကြည့်ပါ။

၆။ အစ္စရေး​ရွာသား​တွေနဲ့ ယာဘိန်​ရဲ့ စစ်တပ် ဘယ်လို ကွာခြား​သလဲ။

^၆ ခါနာန်ဘုရင် ယာဘိန်​က အစ္စရေး​တွေကို အနှစ် ၂၀ လုံးလုံး “အလွန်​ညှဉ်းဆဲ” ခဲ့တယ်။ အစ္စရေး ရွာ​သားတွေ အိမ်ပြင်ထွက်​ဖို့တောင် ကြောက်နေ​ကြရတယ်။ သူတို့​မှာ စစ်လက်နက်၊ စစ်​ဝတ်စုံ​တွေ မရှိကြ​ဘူး။ ရန်​သူတွေ​မှာတော့ သံ​ဓားကောက် တပ်​ထားတဲ့ စစ်မြင်းရထား ၉၀၀ ရှိတယ်။—သူကြီး. ၄:၁-၃၊ ၁၃။ ၅:၆-၈။ *

၇၊ ၈။ (က) ဗာရက်​ကို ယေဟောဝါ ဦးဆုံး ဘယ်လို ညွှန်ကြားခဲ့​သလဲ။ (ခ) ယာဘိန်​ရဲ့ စစ်တပ်​ကို အစ္စရေးတွေ ဘယ်လို အနိုင်ရ​ခဲ့​သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)

^၇ ယေဟောဝါက ပရောဖက်​မ ဒေဗောရ​ကတစ်ဆင့်  ဗာရက်​ကို ရှင်းရှင်းလင်းလင်း မိန့်မှာ​တ​ယ်– “သင်သည် နဿလိ​အမျိုး၊ ဇာ​ဗု​လု​န်​အမျိုး​ထဲက လူ​တစ်​သော​င်းကို သွေးဆောင်​၍ တာဗော်​တောင်​သို့ သွားလော့။ ငါ​သည်လည်း ယာဘိန်​မင်း​၏ ဗိုလ်ချုပ်​သိသရ​နှင့် ရထား​ဗိုလ်​ပါ​များကို သင်​ရှိ​ရာ ကိ​ရှု​န်​မြစ်​သို့ သွေးဆောင်​၍ သင့်​လက်၌ အပ်​မည်။”—သူကြီး. ၄:၄-၇။

^၈ ချက်ချင်း သတင်း​ပျံ့​သွားတယ်။ တာဗော်​တောင်မှာ စေတနာ့ဝန်ထမ်း​တွေ စုဝေး​ကြ​တ​ယ်။ ယေဟောဝါရဲ့ ညွှန်ကြားချက်ကို ဗာရက် ချက်ချင်း လိုက်နာ​ခဲ့တယ်။ (တရားသူကြီး ၄:၁၄-၁၆ ကိုဖတ်ပါ။) တာနက်​မြို့ တိုက်ပွဲ​အတွင်း ရုတ်တရက် မိုး သည်း​သည်းမဲမဲ ရွာ​ပြီး ရွှံ့​ဗွက်အိုင် ဖြစ်​သွားတယ်။ ၁၅ မိုင် (၂၄ ကီလိုမီတာ) ဝေး​တဲ့ ဟာ​ရော​ရှက်​မြို့​အထိ သိသရ​ရဲ့ စစ်တပ်​နောက် ဗာရက် လိုက်​သွားတယ်။ ကြောက်မက်ဖွယ် ကောင်း​ခဲ့​သ​လောက် အသုံးမဝင်​တော့တဲ့ မြင်းရထား​ကို လမ်း​တစ်နေရာ​ရာမှာ သိသရ စွန့်ပစ်​ခဲ့​ပြီး ကေ​ဒေ​ရှ​မြို့​အနား၊ ဇာနိမ်​အရပ်​ဆီ ပြေး​တော့​တယ်။ တဲ​ထဲ ဝင်​နား​တဲ့ သိသရ​ကို ကေ​နိ​အမျိုးသား ဟေဗာ​ရဲ့ မိန်းမ ယေလ​ ကြိုဆို​ခဲ့တယ်။ ပင်ပန်း​လွန်း​လို့ သိသရ အိပ်ပျော်​သွားတယ်။ ယေ​လ ရဲ​ဝံ့​ပြတ်သား​စွာ အသေ​သတ်​တာကို သိသရ အလွယ်တကူ ခံ​လိုက်ရတယ်။ (သူကြီး. ၄:၁၇-၂၁) အစ္စရေးလူမျိုး​ရဲ့ ရန်သူ ကျဆုံး​သွား​ပါ​ပြီ။ *

၉။ သိသရ​နဲ့ တိုက်ပွဲ​အကြောင်း တရားသူကြီး ၅:၂၀၊ ၂၁ မှာ ဘယ်​အသေးစိတ်​အချက်​တွေ ဖော်ပြထား​သလဲ။

^၉ တရားသူကြီး အခန်းကြီး ၄ နဲ့ ၅ ကို တွဲ​လေ့လာသင့်တယ်။ တစ်ခန်း​မှာ မပါတဲ့ အသေးစိတ်​အချက်အလက်​တွေကို နောက်​တစ်ခန်း​မှာ တွေ့ရမယ်။ ဥပမာ၊ တရားသူကြီး ၅:၂၀၊ ၂၁ မှာ “ကောင်းကင်မှ စစ်ကူ​ကြ၏။ ကြယ်​တို့သည် လှည့်ပတ်​စဉ်​အ​ခါ သိသရ​ကို စစ်တိုက်​ကြ၏။ . . . ကိ​ရှု​န်​မြစ်​သည် ရန်သူ​တို့ကို ပယ်​သွား၏” လို့​ဖော်ပြထားတယ်။ ဒါက ကောင်းကင်​တမန်တွေ ကူညီ​တာ၊​ ဥက္ကာ​ခဲ​တစ်မျိုးမျိုး ရွာ​ကျ​တာကို ဆိုလို​သလား။ မှတ်တမ်း​မှာ အသေးစိတ် မဖော်ပြ​ထားဘူး။ ဒါပေမဲ့ စစ်မြင်းရထား ၉၀၀ ကို နစ်မြုပ်​စေဖို့ နေရာ​အတိအကျ၊ အချိန်​အတိအကျ မိုး​သည်း​သည်း​မဲမဲ ရွာ​တာဟာ ယေဟောဝါရဲ့ ကြားဝင်ဆောင်ရွက်​မှုက​လွဲ​လို့ ဘာများ​ဖြစ်​နိုင်မှာလဲ။ ယေဟောဝါ​ကြောင့် အောင်ပွဲရ​တယ်လို့ တရားသူကြီး ၄:၁၄၊ ၁၅ မှာ သုံးကြိမ် ဖော်ပြထားတယ်။ အစ္စရေး စေတနာ့​ဝန်ထမ်း ၁၀,၀၀၀ ထဲက တစ်ယောက်​မှ ဒီ​လွတ်မြောက်မှု​အတွက် နာမည်ကောင်း​ယူ​လို့ မရဘူး။

၁၀၊ ၁၁။ မေ​ရော​ဇ​မြို့ ဘာကြောင့် အကျိန်​ခံ​ခဲ့ရ​သလဲ။

^၁၀ “‘မေ​ရော​ဇ​မြို့သား​တို့သည် ထာဝရဘုရား​ဘက် စစ်သူရဲ​တို့နှင့် ဝိုင်း​၍ ထာဝရဘုရား​ဘက်​သို့ မ​ကူ​ကြ​သောကြောင့် မေ​ရော​ဇ​မြို့​ကို ကျိန်​ကြလော့။ မြို့သား​တို့ကို ပြင်းစွာ ကျိန်​ကြလော့’ ဟု ထာဝရဘုရား​၏ ကောင်းကင်တမန်​သည် မှာ​ထား​၏” ဆိုပြီး ဒေဗောရ​နဲ့ ဗာရက်​တို့ သီဆို​တဲ့​အောင်ပွဲခံ ချီးမွမ်းသီချင်း​မှာ ဖော်ပြထားတာ ထူးခြား​လှပါတယ်။—သူကြီး. ၅:၂၃။

^၁၁ ကျိန်ဆိုချက် ထိရောက်​လွန်း​လို့ မေ​ရော​ဇ​ရဲ့ သဲလွန်​စ​မှန်သမျှ ပျောက်ပျက်​ကုန်​တ​ယ်။ အစပိုင်း စေတနာ့ဝန်ထမ်း​တွေ စုဆောင်း​တဲ့အချိန်မှာ မြို့​သားတွေ မသွား​ခဲ့တာ​များ​လား။ သိသရ ထွက်ပြေး​တဲ့လမ်း​ပေါ်မှာ တည်​ရှိတဲ့​မြို့ ဖြစ်တယ်​ဆိုရင် ဖမ်း​ဖို့ အခွင့်အရေး​ရ​လျက်​နဲ့ လွှတ်​ပေး​လိုက်တာ​များ​လား။ စေတနာ့ဝန်ထမ်း​ဖို့ ယေဟော​ဝါရဲ့ ဖိတ်ခေါ်​ချက်ကို မကြား​ဘဲ နေ​ပါ့​မလား။ လူ​တစ်သောင်း​တောင်​ စုဝေး​ခဲ့ကြ​တာပဲ။ စစ်သူရဲကြီး လမ်းပေါ် တစ်ယောက်​တည်း သွေးရူးသွေးတန်း ပြေး​နေတာကို မေ​ရော​ဇ​မြို့​သားတွေ ကြည့်​နေတာ မြင်ယောင်ကြည့်​ပါ။ ယေဟောဝါရဲ့ ရည်ရွယ်ချက် ဖြစ်မြောက်ရေး​မှာ ပါဝင်ဖို့၊ ကောင်းချီးခံစား​ရဖို့ အခွင့်ထူး​ကြီး​ပါပဲ။ ယေဟော​ဝါ​အတွက် တစ်ခုခု လုပ်ဆောင်ဖို့ အခွင့်အရေး ရ​ချိန်မှာ ဘာမှ မလုပ်​ခဲ့ကြ​ဘူး။ နောက်​အခန်းငယ်​တွေမှာ ဖော်ပြထားတဲ့ ယေ​လ​ရဲ့ သတ္တိ​နဲ့​တော့ တခြား​စီ​ပါပဲ။—သူကြီး. ၅:၂၄-၂၇။

၁၂။ တရားသူကြီး ၅:၉၊ ၁၀ (ကဘ) မှာ လူတွေရဲ့ သဘောထား ကွာခြား​ချက်ကို ဘယ်လို ဖော်ပြထား​သလဲ။ ကျွန်တော်တို့​အပေါ် ဘယ်လို အကျိုးသက်ရောက်​သင့်သလဲ။

^၁၂ ဗာရက်​နဲ့အတူ ချီတက်သူ​တွေရဲ့ သဘောထား​နဲ့ မချီ​ တက်​သူတွေ​ရဲ့ သဘောထား နောက်ထပ်​ကွာခြား​ချက်ကို တရားသူကြီး ၅:၉၊ ၁၀ (ကဘ) မှာ တွေ့ရတယ်။ ‘လူတွေနဲ့​အတူ စေတနာအလျောက် တိုက်ပွဲဝင်​ကြတဲ့ အစ္စရေး​တပ်မှူး​တွေ’ ကို ဒေဗောရ​နဲ့ ဗာရက် ချီးမွမ်းခဲ့တယ်။ မာန​တစ်ခွဲ​သားနဲ့ ‘အုန်းခွံ​ရောင်​မြည်း စီး​သူ’ တွေ၊ ဇိမ်ကျ​ကျနေ​ချင်တဲ့၊ ‘နူးညံ့​တဲ့ ကော်ဇော​ပေါ် ထိုင်​သူတွေ’ နဲ့ ကွာခြား​လှပါတယ်။ ဗာရက်​နဲ့အတူ တိုက်ပွဲဝင်​သူ​တွေကတော့ ‘လမ်းမ​ပေါ် လျှောက်​သူတွေ၊’ သက်သောင့်သက်သာ​ပဲ နေချင်​သူတွေနဲ့ မတူဘဲ တာဗော်​တောင်​ရဲ့ ကျောက်တောင်​စောင်း​တွေ၊ ကိ​ရှု​န်​ချိုင့်ဝှမ်း ရွှံ့နွံ​တွေ​ထဲ တိုက်ပွဲဝင်​လို​ကြ​တ​ယ်။ ‘စဉ်းစား​ကြည့်’ ဖို့ အပျော်အပါး​မက်​သူတွေကို တိုက်တွန်း​ထားတယ်။ မှန်ပါတယ်၊ ယေဟော​ဝါရဲ့ အရေးကိစ္စ​မှာ ကူညီ​ပေး​ခွင့် ဆုံးၡုံး​သွားတာကို သူတို့​တစ်​တွေ စဉ်းစား​တွေးတော​ရမယ်။ ဒီနေ့လည်း ဘုရား​အမှု​တော်ကို အပြည့်အဝ မထမ်း​ဆောင်​ဘဲ တွန့်ဆုတ်​မနေ​သင့်​ဘူး။

၁၃။ ရုဗင်၊ ဒန်၊ အာရှာအမျိုး​ရဲ့ သဘောထား​က ဇာ​ဗု​လု​န်၊ နဿလိ​အမျိုး​ရဲ့ သဘောထား​နဲ့ ဘယ်လို ကွာခြား​သလဲ။

^၁၃ စေတနာ့ဝန်ထမ်း​တွေဟာ ယေဟောဝါရဲ့ အချုပ်အခြာအာဏာ ထင်ရှားစေ​တာကို ကိုယ်တွေ့ မြင်​ခဲ့ကြတယ်။ “ထာဝရဘုရား​၏ တရား​သော​အမှု” တို့ကို ပြန်ပြော​နိုင်​ခဲ့ကြတယ်။ (သူကြီး. ၅:၁၁) ရုဗင်၊ ဒန်၊ အာရှာ​အမျိုး​အကြောင်း​ကိုတော့ တရားသူကြီး ၅:၁၅-၁၇ မှာ​ သတ်သတ်မှတ်မှတ် ဖော်ပြထားတယ်။ သူတို့က သိုး၊ သင်္ဘော၊ သင်္ဘောဆိပ်​စတဲ့ ပစ္စည်းဥစ္စာ​တွေကို ယေဟော​ဝါရဲ့ အမှုတော်​ထက် အလေး​ထားကြ​တ​ယ်။ ဇာ​ဗု​လု​န်​နဲ့ နဿလိ​အမျိုး​က​တော့ “အသက်​ကို စွန့်စား​သည်​တိုင်အောင်”​ ဒေဗော​ရ​နဲ့ ဗာရက်​ကို ကူညီထောက်မ​ခဲ့ကြတယ်။ (သူကြီး. ၅:၁၈) စေ​တ​နာ့ ဝန်ထမ်း​ခြင်းနဲ့​ပတ်သက်တဲ့ မ​တူညီတဲ့ သဘောထားတွေ​က​နေ အရေးကြီးတဲ့ သင်ခန်းစာ သင်ယူနိုင်​ပါတယ်။

၁၄။ ဒီနေ့ ယေဟောဝါရဲ့ အချုပ်အခြာ​အာဏာကို ထောက်ခံကြောင်း ဘယ်လို ဖော်ပြ​ကြ​မလဲ။

^၁၄ တကယ့်​စစ်ပွဲ​မှာ ဝင်​တိုက်​ဖို့ ဒီနေ့​အ​ချိန်မှာ ဖိတ်ခေါ်​မခံ​ရ​ပါဘူး။ အဲဒီအစား ဟောပြောခြင်း​လုပ်ငန်းမှာ ထက်ထက်သန်သန်၊ သတ္တိရှိရှိ ပါဝင်ဖို့ အခွင့်အရေး ရရှိ​ထားကြ​တ​ယ်။ ယေဟောဝါရဲ့ အဖွဲ့အစည်း​မှာ အရင်ကထက် စေတနာ့ဝန်ထမ်း​တွေ ပိုလိုအပ်​နေတယ်။ ညီအစ်ကို၊ ညီအစ်မ၊ လူငယ်​သန်းပေါင်းများစွာ​ဟာ ရှေ့ဆောင်၊ ဗေသလ၊ နိုင်ငံတော်ခန်းမ ဆောက်လုပ်ရေး၊ အစည်းအဝေး​ပွဲ၊ ခရိုင်​ အစည်းအဝေးတွေမှာ​ စေတ​နာ့ဝန်ထမ်း​အဖြစ် အချိန်ပြည့်လုပ်ငန်း အမျိုး​မျိုးမှာ ပေးဆက်​နေကြတယ်။ ဆေးရုံ​ဆက်သွယ်ရေး ကော်မတီ​နဲ့ အစည်းအဝေး​ကြီး စီစဉ်ဖွဲ့စည်း​ရေး​မှာ​ တာဝန်​ကြီး​တွေ ထမ်းဆောင်​နေတဲ့ အကြီးအကဲတွေ​ကိုလည်း စဉ်းစားကြည့်ပါ။ သင့်ရဲ့ လိုလိုလားလား စိတ်ဓာတ်​ကို ယေဟော​ဝါ အလွန်​တန်ဖိုး​ထားပြီး ဘယ်တော့မှ မမေ့​ဘူး​ဆိုတာ စိတ်ချ​ပါ။—ဟေဗြဲ ၆:၁၀။

၁၅။ ယေဟောဝါရဲ့ အမှု​တော်ကို လျစ်လျူရှု​တဲ့ သဘောထား ရှိ​မရှိ ဘယ်လို သိနိုင်​သလဲ။

^၁၅ ကိုယ့်ကိုယ်ကိုယ် မေး​ရမယ်– ‘အလုပ်တာဝန်​တွေကို တခြားသူတွေကို​ပဲ ထမ်းဆောင်​စေသလား။ စေတနာ့ဝန်ထမ်း​ဖို့​ထက် ပစ္စည်းဥစ္စာ​တွေကို​ပဲ အလွန်အမင်း အာရုံ​စိုက်​နေ​သလား။ ယေဟောဝါရဲ့ အမှုတော်​မှာ ဗာရက်၊ ဒေဗောရ၊ ယေ​လ၊ စေတနာ့ဝန်ထမ်း ၁၀,၀၀၀ တို့​လို ကျရာ​တာဝန်ကို ထမ်းဆောင်ဖို့ ယုံကြည်ခြင်း​နဲ့ သတ္တိရှိ​သလား။ အလုပ်​ကိစ္စ​ကြောင့် တခြားမြို့၊ တခြား​နိုင်ငံ​ကို ပြောင်းရွှေ့​ဖို့ စဉ်းစား​နေတယ်​ဆိုရင် မိသားစုနဲ့ အသင်းတော်​အပေါ် ဘယ်လို အကျိုးသက်ရောက်​မယ်​ဆိုတာ ဆုတောင်း​သုံးသပ်​သလား။’ *

၁၆။ ယေဟောဝါ မပိုင်​ဆိုင်တဲ့ ဘယ်အရာကို ကျွန်တော်တို့ ပေးဆက်​နိုင်သလဲ။

^၁၆ ယေဟောဝါက မိမိ​အချုပ်အခြာ​အာဏာကို ထောက်ခံ​ခွင့် ပေးထား​ခြင်းအားဖြင့် ကျွန်တော်​တို့ကို ဂုဏ်တင်​တယ်။​ စာတန်​က​တော့ မိမိ​အာဏာကို ထောက်ခံဖို့ လူတွေကို သွေးဆောင်​ထားတဲ့အတွက် ယေဟော​ဝါရဲ့ အချုပ်အခြာအာဏာ​ဘက် သင့်​ရပ်တည်မှု​ဟာ အရေးကြီး​ကိစ္စ ဖြစ်ပါတယ်။ စေတနာ့ဝန်ထမ်း​ဖို့ လှုံ့ဆော်​ပေးတဲ့ သင့်ရဲ့ ယုံကြည်​ခြင်း၊ သစ္စာသမာဓိ​ကို ယေဟောဝါ နှစ်သက်​တယ်။​ (သု. ၂၃:၁၅၊ ၁၆) သင့်ရဲ့​ထောက်ခံမှု​ကြောင့်​ စာတန်​ရဲ့ ကဲ့ရဲ့​မှုကို ယေဟောဝါ ချေပ​နိုင်​ပါလိမ့်မယ်။ (သု. ၂၇:၁၁) ဒါကြောင့် သစ္စာရှိရှိ နာခံခြင်း​အားဖြင့် ယေဟောဝါ တန်ဖိုး​ထားတဲ့​အ​ရာကို ပေးဆက်​ပါ။ ကိုယ်တော် အလွန်​ပျော်ရွှင်​တ​ယ်။

၁၇။ တရားသူကြီး ၅:၃၁ (ကဘ) က အနာဂတ်​အကြောင်း ဘာ​ပြော​ထား​သလဲ။

^၁၇ မကြာခင် ဘယ်​အရာ​ထက်​မဆို ယေဟောဝါရဲ့ အချုပ်အခြာအာဏာ​ကိုပဲ နှစ်သက်သူ​တွေနဲ့ ကမ္ဘာ​ပေါ် ပြည့်နေ​ပါ​တော့မယ်။ အဲဒီအချိန်​ကို အလွန်​တမ်းတ​နေကြ​ပါတယ်။ ‘အို ယေဟောဝါ၊ ရန်သူ​အားလုံး ပျက်စီး​ပါစေ။ ကိုယ်တော့်ကို ချစ်မြတ်နိုးသူ​တွေကတော့ အရှိန်အဝါ​နဲ့ ထွန်းလင်း​လာတဲ့ နေ​မင်း​လို ဖြစ်ပါ​စေ’ လို့ ဒေဗောရ၊​ ဗာရက်​လို ကျွန်တော်တို့ သီဆို​နေကြတယ်။ (သူကြီး. ၅:၃၁၊ ကဘ) စာတန့်​လောက​ကို ယေဟောဝါ အဆုံးတိုင်​စေ​တဲ့အချိန်မှာ အဲ​ဒီ​အသနားခံချက် ပြည့်စုံ​လာပါလိမ့်မယ်။ အာမဂေဒုန်စစ်​ပွဲ စတင်​တဲ့အခါ ရန်သူ​တွေကို တိုက်​ဖို့ စေတနာ့​ဝန်ထမ်း​တွေ လို​မှာ မဟုတ်ဘူး။ ‘ငြိမ်ငြိမ်လေး ရပ်နေ​ပြီး ယေဟောဝါ ဘယ်လို​ကယ်တင်​မယ်​ဆိုတာ စောင့်ကြည့်’ နေ​ရုံ​ပါပဲ။ (၆ ရာ. ၂၀:၁၇) ဒီ​အတောအတွင်း ယေဟော​ဝါရဲ့ အရေးကိစ္စ​ကို ထက်ထက်သန်သန်၊ သတ္တိရှိရှိ ထောက်မ​ဖို့ အခွင့်အရေး​များစွာ ရရှိ​ထားကြ​ပါတယ်။

၁၈။ သင့်​စေတနာ့ဝန်ထမ်း​စိတ်ဓာတ်​က တခြားသူတွေ​အပေါ် ဘယ်လို အကျိုးသက်ရောက်​သလဲ။

^၁၈ ‘စေတနာစိတ်​နှင့် မိမိကိုယ်ကို လှူ​သောကြောင့် ယေဟောဝါ​၏ ကျေးဇူးတော်ကို ချီးမွမ်းကြလော့။’ ဒေဗောရ​နဲ့ ဗာရက်​ဟာ ဖန်ဆင်းရာ​တွေကို မဟုတ်ဘဲ အမြင့်မြတ်ဆုံး​အရှင်​ကို ချီးမွမ်းခြင်း​နဲ့ အောင်ပွဲခံ​သီချင်း​ကို အစပြု​ခဲ့ကြတယ်။ (သူကြီး. ၅:၁၊ ၂) ဒီနေ့လည်း သင့်ရဲ့ စေတနာ့ဝန်ထမ်း စိတ်ဓာတ်​က ‘ယေဟောဝါကို ချီးမွမ်း’​ ဖို့ တခြားသူတွေကို လှုံ့ဆော်ပေး​ပါစေ။