၁။ တပည့်​တွေ​ကို ကာကွယ်​စောင့်ရှောက်​ပေးဖို့ ယေဟောဝါ​ဆီ ယေရှု ဘာကြောင့် ဆုတောင်းပေး​ခဲ့​သလဲ။

မြေကြီး​အသက်တာ နောက်ဆုံး​ည​မှာ ယေရှုဟာ တပည့်​တွေ ရင်ဆိုင်​ရမယ့် စမ်းသပ်မှု​တွေ​အကြောင်း စဉ်းစား​နေတယ်။ တပည့်​တွေ​ကို သိပ်​ချစ်တဲ့​အတွက် “ဆိုးညစ်သူ​ရဲ့ ရန်​ကနေ ကာကွယ်​စောင့်ရှောက်​ပေးဖို့” ဖခင်​ဆီ ဆုတောင်းပေး​ခဲ့တယ်။ (ယော. ၁၇:၁၄၊ ၁၅) မိမိ ကောင်းကင် ပြန်​တက်​သွားပြီး​နောက် နောက်လိုက်​တွေ​ကို စာတန် မာရ်နတ် ဆက်တိုက်​ခိုက်​နေမယ်​ဆိုတာ ယေရှု သိတယ်။

၂။ ကျွန်တော်​တို့​ရဲ့ ဆုတောင်းချက်​တွေ​ကို ယေဟောဝါ ဖြေပေး​မယ်​ဆိုတာ ဘာကြောင့် ယုံကြည်​စိတ်ချ​နိုင်​သလဲ။

^၂ သားတော်ကို သိပ်​ချစ်​လို့ ဆုတောင်းချက်​ကို ယေဟောဝါ ဖြေပေး​တယ်။ ဒါကြောင့် စိတ်တော်​နဲ့ တွေ့​ဖို့ ကျွန်တော်​တို့ အတတ်နိုင်ဆုံး ကြိုးစား​မယ်​ဆိုရင် ယေဟောဝါ ချစ်မယ်။ အကူအညီ​နဲ့ ကာကွယ်​မှု ရဖို့ ဆုတောင်း​တဲ့​အခါ နားထောင်ပေး​မယ်။ ယေဟောဝါ​ဟာ ဂရုစိုက်​တတ်​တဲ့ ဖခင် ဖြစ်​လို့ သားသမီးတွေကို မေတ္တာပါပါ ဆက်​ဂရုစိုက် စောင့်ရှောက်​ပေး​ပါ​လိမ့်မယ်။ ဒါဟာ နာမတော်​နဲ့ ပတ်သက်​နေလို့ပဲ။

၃။ ဒီနေ့ ယေဟောဝါ​ရဲ့ ကာကွယ်​ပေး​မှု​ကို ကျွန်တော်​တို့ ဘာကြောင့် လိုအပ်​သလဲ။

^၃ ယေဟောဝါ​ရဲ့ ကာကွယ်​ပေး​မှု​ကို အရင်ကထက် ပို​လိုအပ်​နေတယ်။ စာတန်​ဟာ ကောင်းကင်​ကနေ ပစ်ချ​ခံ​လိုက်​ရလို့ “ဒေါသတကြီး” ဖြစ်နေ​တယ်။ (ဗျာ. ၁၂:၁၂) ကျွန်တော်​တို့ကို နှိပ်စက်​ညှဉ်းပန်း​တာ​ဟာ “ဘုရား​အတွက် အမှုဆောင်​နေတာ​လို့” လူတွေ ထင်​အောင် စာတန် လုပ်တယ်။ (ယော. ၁၆:၂) ဘုရား​ကို မယုံကြည်တဲ့ တခြားသူ​တွေ​ကျ​တော့ သူတို့နဲ့ မတူ​လို့ ကျွန်တော်​တို့ကို နှိပ်စက်​ညှဉ်းပန်း​ကြတယ်။ ဘယ်လို အကြောင်းရင်း​ကြောင့်​ပဲ နှိပ်စက်​ခံရ​ပါစေ ကျွန်တော်​တို့ မကြောက်​ဘူး။ “သခင်​က​တော့ သစ္စာ​ရှိတယ်။ ခင်ဗျား​တို့ကို ခိုင်ခံ့​မြဲမြံ​စေပြီး ဆိုးညစ်သူ​ရဲ့ ရန်​ကနေ ကာကွယ်​ပေး​လိမ့်မယ်” လို့ ကျမ်းစာ​မှာ ပြော​ထား​လို့​ပဲ။  (၂ သက်. ၃:၃) ကျွန်တော်​တို့ကို ယေဟောဝါ ဘယ်လို ကာကွယ်​ပေး​သလဲ။ နည်း​နှစ်နည်း​ကို ဆွေးနွေး​ကြ​စို့။

၄။ ဧဖက် ၆:၁၃-၁၇ အရ ကျွန်တော်​တို့ကို ကာကွယ်​ဖို့ ယေဟောဝါ ဘာ​ပေး​ထား​သလဲ။

^၄ စာတန်​ရဲ့ တိုက်ခိုက်မှု​တွေ​ကနေ ကာကွယ်​ပေး​နိုင်​တဲ့ ချပ်ဝတ်တန်ဆာ ယေဟောဝါ ပေး​ထား​တယ်။ (ဧဖက် ၆:၁၃-၁၇ ကို​ဖတ်ပါ။) ဘုရား​ပေး ချပ်ဝတ်တန်ဆာ​ဟာ ခိုင်ခံ့​ပြီး သိပ်​အသုံးဝင်တယ်။ ဒါပေမဲ့ ချပ်ဝတ်တန်ဆာ​ရဲ့ အပိုင်း​တိုင်း​ကို ဝတ်ဆင်​ထား​မှ၊ သုံး​နေ​မှ ကာကွယ်​မှု ရမယ်။ ချပ်ဝတ်တန်ဆာ အပိုင်း​တစ်ခုစီ​က ဘာကို ဆိုလို​ကြောင်း ဆွေးနွေး​ကြ​စို့။

၅။ အမှန်တရား​ခါးပန်း​ဆိုတာ ဘာလဲ။ ဘာကြောင့် စည်းထား​ရမလဲ။

^၅ အမှန်တရား​ခါးပန်း ဆိုတာ ဘုရားသခင့် တရား​စကားတော် ကျမ်းစာ​မှာ ပါ​တဲ့ အမှန်တရားကို ဆိုလို​တယ်။ အမှန်တရား​ခါးပန်း​ကို ဘာကြောင့် စည်းထား​ရမလဲ။ စာတန်​ဟာ “မုသားရဲ့ အဖ” ဖြစ်လို့ပဲ။ (ယော. ၈:၄၄) စာတန် မုသား ပြော​လာတာ နှစ်ထောင်​နဲ့​ချီ ရှိနေပြီ။ “လူနေထိုင်ရာ မြေတစ်ပြင်လုံး​ကို” လည်း လှည့်စား​နေတယ်။ (ဗျာ. ၁၂:၉) ဒါပေမဲ့ ကျွန်တော်​တို့ လှည့်စား​မခံ​ရအောင် ကျမ်းစာ​အမှန်တရားက ကာကွယ်​ပေး​တယ်။ အမှန်တရား​ခါးပန်း​ကို ဘယ်လို စည်းထား​မလဲ။ ယေဟောဝါ​နဲ့​ပတ်သက်​တဲ့ အမှန်တရား သင်ယူခြင်း၊ “စွမ်းအားတော် လမ်းပြမှု​နဲ့​အညီ၊ အမှန်တရား​နဲ့​အညီ” ဝတ်ပြု​ကိုးကွယ်​ခြင်း၊ အရာရာမှာ ရိုးရိုးသားသား ကျင့်ကြံ​ပြုမူခြင်း​အားဖြင့်​ပါ​ပဲ။—ယော. ၄:၂၄။ ဧ. ၄:၂၅။ ဟီ. ၁၃:၁၈။

၆။ ဖြောင့်မတ်ခြင်း ရင်အုပ်တန်ဆာ​ဆိုတာ ဘာလဲ။ ဘာကြောင့် ဝတ်ဆင်​ထား​ရမလဲ။

^၆ ဖြောင့်မတ်ခြင်း ရင်အုပ်တန်ဆာ ဆိုတာ ယေဟောဝါ​ရဲ့ ဖြောင့်မတ်​တဲ့ စံနှုန်း​တွေ​ကို ဆိုလို​တယ်။ ရင်အုပ်တန်ဆာ ဘာကြောင့် ဝတ်ဆင်​ထား​ရမလဲ။ စစ်သား​တစ်ယောက်​ရဲ့ နှလုံးကို ရင်အုပ်တန်ဆာ​က ကာကွယ်​ပေး​သလို ဖြောင့်မတ်ခြင်း ရင်အုပ်တန်ဆာ​က လောကရဲ့ ယိုယွင်း​နေတဲ့ ဩဇာ​တွေ​ကနေ ကျွန်တော်​တို့​ရဲ့ ပုံဆောင်​နှလုံးကို ကာကွယ်​ပေး​တယ်။ (ပညာ. ၄:၂၃) မိမိကို စိတ်နှလုံး​အပြည့်​နဲ့ ချစ်​ပြီး ကိုးကွယ်​ဖို့ ယေဟောဝါ မျှော်လင့်တယ်။ (မ. ၂၂:၃၆၊ ၃၇) ဒါပေမဲ့ စာတန်​က​တော့ လောက ကမ်း​လှမ်း​တဲ့​အရာ​တွေ၊ ယေဟောဝါ ရွံမုန်းတဲ့​အရာ​တွေ​ကို ကျွန်တော်​တို့ ချစ်​လာအောင် သွေးဆောင်ခြင်း​အားဖြင့် စိတ်​နှစ်ခွ ဖြစ်အောင် လုပ်တယ်။ (ယာ. ၄:၄။ ၁ ယော. ၂:၁၅၊ ၁၆) ဒီ​နည်းနဲ့ မရ​ရင် အကြမ်း​နည်း သုံးပြီး ယေဟောဝါ​ရဲ့ စံနှုန်း​တွေ ချိုးဖောက်​အောင် လုပ်တယ်။

၇။ ဖြောင့်မတ်ခြင်း ရင်အုပ်တန်ဆာကို ဘယ်လိုနည်းနဲ့ ဝတ်ဆင်​ထား​ရမလဲ။

^၇ အမှား၊ အမှန်​နဲ့​ပတ်သက်​တဲ့ ယေဟောဝါ​ရဲ့ စံနှုန်း​တွေ​ကို လက်ခံခြင်း၊ အဲဒီ​စံနှုန်း​တွေ​အတိုင်း နေထိုင်ခြင်း​အားဖြင့် ဖြောင့်မတ်ခြင်း ရင်အုပ်တန်ဆာကို ကျွန်တော်​တို့ ဝတ်ဆင်​ကြတယ်။ (ဆာ. ၉၇:၁၀) ယေဟောဝါ​ရဲ့ စံနှုန်း​တွေ​ဟာ တင်းကျပ်လွန်း​တယ်လို့ တချို့ ထင်ကြ​တယ်။ ဒါပေမဲ့ ကျမ်းစာ​မူတွေ​အတိုင်း ဆက်​မနေထိုင်​ဘူးဆို​ရင် စစ်​မြေပြင် ရောက်​မှ လေး​တယ်​ဆိုပြီး ရင်အုပ်တန်ဆာ ချွတ်ပစ်​တဲ့ စစ်သား​နဲ့ တူ​သွား​လိမ့်မယ်။ ဒါ သိပ်​မိုက်မဲ​ရာ ကျ​တယ်။ ယေဟောဝါ​ကို ချစ်တဲ့​သူတွေ​အတွက်​တော့ ပညတ်ချက်​တွေ​ဟာ “လိုက်နာ​ဖို့ ခက်ခဲလွန်း​တဲ့​အရာ” မဟုတ်ဘူး။ အသက်ကယ်​ပေး​တဲ့​အရာ ဖြစ်တယ်။—၁ ယော. ၅:၃။

၈။ သတင်းကောင်း ဟော​ဖို့ အသင့်ရှိနေ​ခြင်း​ဆို​တဲ့ ဖိနပ်​ကို စီး​ထား​တယ်​ဆိုတာ ဘာလဲ။

^၈ ငြိမ်သက်ခြင်း သတင်းကောင်း ဟော​ဖို့ အသင့်ရှိနေ​ခြင်း​ဆို​တဲ့ ဖိနပ်​ကို စီး​ထား​ပါ​လို့​လည်း ပေါလု တိုက်တွန်း​တယ်။ ဆိုလို​တာ​က နိုင်ငံတော် သတင်းကောင်း ဟော​ဖို့ အမြဲ အသင့်​ရှိနေရမယ်။ တခြား​သူတွေကို ကျမ်းစာ သတင်းတရား ပြောပြ​တဲ့​အခါ ကိုယ်တိုင်​ရဲ့ ယုံကြည်ခြင်း ခိုင်ခံ့​လာတယ်။ ကမ္ဘာ​တစ်ဝန်း​မှာ ရှိတဲ့ ယေဟောဝါ​ရဲ့ ကျေးကျွန်​တွေ​ဟာ သတင်းကောင်း ဟောပြောဖို့ အခွင့်အရေးတိုင်းကို အသုံးပြု​နေတာ တွေ့ရ​လို့ သိပ်​အားရှိစရာ ကောင်းတယ်။ အလုပ်မှာ၊ ကျောင်း​မှာ၊ စီးပွားရေး ရပ်ကွက်မှာ၊ တစ်အိမ်​တက်​ဆင်း​မှာ၊ ဈေးဝယ်​သွားတဲ့အခါ၊ မယုံကြည်​သူ ဆွေမျိုး​တွေ​ဆီ လည်ပတ်​တဲ့​အခါ၊ အသိ​မိတ်ဆွေတွေနဲ့ စကားစမြည်  ပြော​တဲ့​အခါ၊ အိမ်ထဲ​က အိမ်ပြင် မထွက်​နိုင်​တဲ့​အခါ​တွေ​မှာ​တောင် ဟောပြော​ကြတယ်။ ကြောက်စိတ်​ဝင်ပြီး မဟော​တော့​ဘူးဆို​ရင် စစ်​မြေပြင်မှာ ဖိနပ်​ချွတ်​လိုက်တဲ့ စစ်သား​နဲ့ တူ​သွားမယ်။ ခြေထောက် အလွယ်တကူ ဒဏ်ရာ ရမယ်။ အလွယ်တကူ တိုက်ခိုက်​ခံရ​မယ်။ တပ်မှူး​ရဲ့ အမိန့်​ကို လိုက်နာ​ဖို့​လည်း ခက်​သွားမယ်။

၉။ ယုံကြည်ခြင်း ဒိုင်းလွှား​ကြီး​ကို ဘာကြောင့် ကိုင်ဆောင်​ထား​ရမလဲ။

^၉ ယုံကြည်ခြင်း ဒိုင်းလွှား​ကြီး ဆိုတာ ယေဟောဝါ​အပေါ် ယုံကြည်ခြင်းကို ဆိုလို​တယ်။ ကတိ​အားလုံး​ကို ဘုရား ပြည့်စုံ​စေမယ်​ဆိုတာ ကျွန်တော်​တို့ ယုံကြည်တယ်။ အဲဒီ​ယုံကြည်ခြင်းက “ဆိုးညစ်သူ ပစ်ခတ်​တဲ့ မီးမြားတွေကို ငြိမ်းသတ်​နိုင်” ဖို့ ကူညီပေး​တယ်။ ယုံကြည်ခြင်း ဒိုင်းလွှား​ကြီး​ကို ဘာကြောင့် ကိုင်ဆောင်​ထား​ရမလဲ။ အယူဖောက်ပြန်သူတွေရဲ့ သွန်သင်ချက်​တွေ​ကြောင့် ယိမ်းယိုင်​မသွားဖို့၊ ကိုယ့်​ယုံကြည်ချက်ကို လူတွေ ဝေဖန်​ရှုတ်ချ​တဲ့​အခါ စိတ်ဓာတ်ကျ​မသွားဖို့ ယုံကြည်ခြင်းက ကာကွယ်​ပေး​လို့​ပဲ။ ယုံကြည်ခြင်း မရှိရင် ယေဟောဝါ​ရဲ့ စံနှုန်း​တွေ​ကို ချိုးဖောက်​ဖို့ သွေးဆောင်​ခံရတဲ့​အခါ ခုခံနိုင်​စွမ်း မရှိဘဲ ဖြစ်သွား​မယ်။ အလုပ်မှာ၊ ကျောင်း​မှာ ယုံကြည်ခြင်း​အတွက် ကျွန်တော်​တို့ ခုခံ​ပြောဆို​လိုက်​တိုင်း ဒိုင်းလွှား​ကို ကိုင်ဆောင်​ထား​ရာ ရောက်တယ်။ (၁ ပေ. ၃:၁၅) ဘုရားရေးရာ လုပ်ဆောင်မှုတွေကို ထိခိုက်​စေမယ့် ဝင်ငွေ​ကောင်း​တဲ့ အလုပ်ကို ငြင်းပယ်​လိုက်​တိုင်း ဒိုင်းလွှား​ကို ကိုင်ဆောင်​နေတာပဲ။ (ဟီ. ၁၃:၅၊ ၆) ဆန့်ကျင်မှု​တွေ​ကြား ယေဟောဝါ​ အတွက် အမှုဆောင်တာ​ဟာ​လည်း ဒိုင်းလွှား​ကို ကိုင်ဆောင်​နေတာ ဖြစ်တယ်။—၁ သက်. ၂:၂။

၁၀။ ကယ်တင်ခြင်း သံခမောက်​ဆိုတာ ဘာလဲ။ ဘာကြောင့် ဆောင်း​ထား​ရမလဲ။

^၁၀ ကယ်တင်ခြင်း သံခမောက် ဆိုတာ ဘုရား​ပေး မျှော်လင့်ချက်ကို ဆိုလို​တယ်။ အလိုတော် ဆောင်​သူ အားလုံး​ကို ဘုရား ဆုချ​မယ်၊ ကျွန်တော်​တို့ သေဆုံး​သွား​ရင်တောင် ထမြောက်​ပေး​မယ်​ဆို​တဲ့ မျှော်လင့်ချက်​ပဲ။ (၁ သက်. ၅:၈။ ၁ တိ. ၄:၁၀။ တိ. ၁:၁၊ ၂) သံခမောက်​က စစ်သား​ရဲ့ ခေါင်း​ကို ကာကွယ်​ပေး​သလို ကယ်တင်ခြင်း မျှော်လင့်ချက်​က ကျွန်တော်​တို့​ရဲ့ စဉ်းစား​တွေးခေါ်​နိုင်စွမ်း​ကို ကာကွယ်​ပေး​တယ်။ ဘုရား​ပေး ကတိ​တွေ​ကို အာရုံစိုက်​နေဖို့၊ အခက်အခဲ​တွေ​ကြောင့် ထူပူ​မသွားဖို့ ကူညီပေး​တယ်။ သံခမောက်ကို ဘယ်လို ဆောင်း​ထား​မလဲ။ ကိုယ့်​စဉ်းစား​တွေးခေါ်ပုံ​ကို ဘုရား​ရဲ့ စဉ်းစား​တွေးခေါ်ပုံ​နဲ့ ကိုက်ညီ​စေခြင်း​အားဖြင့်​ပါ​ပဲ။ ဥပမာ၊ မတည်မြဲ​တဲ့ စည်းစိမ်​ကို မဟုတ်ဘဲ ဘုရား​ကို ကျွန်တော်​တို့ မျှော်လင့်​အားကိုးကြတယ်။—ဆာ. ၂၆:၂။ ၁၀၄:၃၄။ ၁ တိ. ၆:၁၇။

၁၁။ စွမ်းအားတော် ဓား​ဆိုတာ ဘာလဲ။ ဘာကြောင့် ကိုင်စွဲ​ထား​ရမလဲ။

^၁၁ စွမ်းအားတော် ဓား ဆိုတာ ဘုရားသခင့် တရား​စကား ကျမ်းစာ​ကို ဆိုလို​တယ်။ အဲဒီ​ဓား​က အလိမ်အညာ အမျိုးမျိုးကို ဖော်ထုတ်​နိုင်စွမ်း၊ မှားယွင်း​တဲ့ သွန်သင်ချက်​တွေ၊ အန္တရာယ်​ရှိတဲ့ အကျင့်အကြံ​တွေ​ရဲ့ ကျွန်​ဘဝက​နေ လူတွေကို လွတ်မြောက်​စေနိုင်​စွမ်း ရှိတယ်။ (၂ ကော. ၁၀:၄၊ ၅။ ၂ တိ. ၃:၁၆၊ ၁၇။ ဟီ. ၄:၁၂) ကိုယ်ပိုင်​လေ့လာမှု၊ ဘုရား​အဖွဲ့အစည်း​ရဲ့ လေ့ကျင့်ပေး​မှု​ကြောင့် ဓားကို ကျွန်တော်​တို့ ပိုင်ပိုင်နိုင်နိုင် သုံး​တတ်လာ​ကြတယ်။ (၂ တိ. ၂:၁၅) ချပ်ဝတ်တန်ဆာ​အပြင် အစွမ်းထက် အကာအကွယ် နောက်တစ်ခု ယေဟောဝါ ပြင်ဆင်​ပေး​ထား​တယ်။ အဲဒါ ဘာလဲ။

၁၂။ ကျွန်တော်​တို့ နောက်ထပ် ဘယ်​အကူအညီ လိုအပ်​သလဲ။ ဘာကြောင့်လဲ။

^၁၂ အတွေ့အကြုံ​ရှိတဲ့ စစ်သား​ဟာ တစ်ယောက်တည်း အား​နဲ့ စစ်တပ်​ကြီး​ကို အောင်မြင်စွာ မတိုက်ခိုက်​နိုင်​မှန်း၊ တခြား​ရဲဘော်ရဲဘက်​တွေ​ရဲ့ အကူအညီ လိုအပ်​မှန်း သိတယ်။ ဒီလိုပဲ၊ စာတန်​နဲ့ စာတန့် နောက်လိုက်​တွေ​ကို ကျွန်တော်​တို့ တစ်ယောက်တည်း အား​နဲ့ အောင်မြင်စွာ မခုခံ​နိုင်ဘူး။ ညီအစ်ကို/မ​တွေ​ရဲ့ ထောက်မမှု လိုအပ်​တယ်။ ဒါ​ကြောင့် ကျွန်တော်​တို့ကို ကူညီပေး​မယ့် ကမ္ဘာချီ “ညီအစ်ကို အသင်းအပင်း” ကို ယေဟောဝါ ပြင်ဆင်​ပေး​ထား​တယ်။—၁ ပေ. ၂:၁၇။

၁၃။ ဟီဘရူး ၁၀:၂၄၊ ၂၅ အရ အစည်းအဝေး တက်ရောက်ခြင်း​ကနေ ဘာ​အကျိုးကျေးဇူးတွေ ရသလဲ။

^၁၃ ထောက်မမှု ရနိုင်တဲ့ နည်း​တစ်နည်း​က​တော့ အစည်းအဝေး တက်ရောက်ခြင်း​ပါ​ပဲ။ (ဟီဘရူး ၁၀:၂၄၊ ၂၅ ကို​ဖတ်ပါ။) ကျွန်တော်​တို့အားလုံး စိတ်ဓာတ်ကျ​တတ်တယ်။ အဲဒီ​အချိန်တွေမှာ အစည်းအဝေးတွေ​က အားတက်လာ​စေတယ်။ ညီအစ်ကို/မ​တွေ​ရဲ့ မှတ်ချက်​တွေ​ကြောင့် အားရှိ​လာတယ်။ ကျမ်းစာ​အခြေပြု ဟောပြောချက်​တွေ၊ သရုပ်ပြ​တွေ​က ယေဟောဝါ​ကို ဆက်​ဝတ်ပြုမယ်​ဆို​တဲ့ ဆုံးဖြတ်ချက်​ကို ခိုင်မာ​စေတယ်။ အစည်းအဝေး မတိုင်ခင်​နဲ့ ပြီး​နောက် ညီအစ်ကို/မ​တွေ​နဲ့ စကားပြော​တဲ့​အခါ အားပေးမှု ရတယ်။ (၁ သက်. ၅:၁၄) ဒါ့အပြင် အစည်းအဝေး​မှာ တခြား​သူတွေကို ကူညီ​ဖို့ အခွင့်အရေး ရလို့ ကျွန်တော်​တို့ ပျော်ရွှင်​တယ်။ (တ. ၂၀:၃၅။ ရော. ၁:၁၁၊ ၁၂) အစည်းအဝေးတွေ​က တခြား​နည်းတွေနဲ့​လည်း အကူအညီ ဖြစ်စေ​တယ်။ ဥပမာ၊ သွန်သင်ခြင်း ကိရိယာ​တွေ​ကို ထိထိရောက်ရောက် သုံး​တတ်လာ​အောင် ကူညီပေး​တဲ့​အတွက် ထိရောက်​တဲ့ ဟောပြော​သွန်သင်​သူတွေ ဖြစ်လာ​တယ်။ ဒါ​ကြောင့် အသင်းတော် အစည်းအဝေးတွေ​အတွက် ကောင်းကောင်း ပြင်ဆင်​ပါ။ အစည်းအဝေး​မှာ အာရုံစိုက် နားထောင်ပါ။ အစည်းအဝေး​ပြီး​နောက် လက်တွေ့​ကျင့်​ပါ။ ဒါဆိုရင် “ခရစ်တော်​ယေရှုရဲ့ စစ်သားကောင်း” ဖြစ်လာ​ပါ​လိမ့်မယ်။—၂ တိ. ၂:၃။

၁၄။ တခြား ဘယ်​အကူအညီ​တွေ ရနိုင်​သေး​သလဲ။

^၁၄ တန်ခိုး​ကြီး ကောင်းကင်တမန် များစွာရဲ့ ထောက်မမှုကို​လည်း ကျွန်တော်​တို့ ရထားတယ်။ ကောင်းကင်တမန် တစ်ပါး​တည်း​ရဲ့ လုပ်ဆောင်​နိုင်စွမ်း​ကိုပဲ စဉ်းစား​ကြည့်​ပါ။ (ဟေရှာ. ၃၇:၃၆) ကောင်းကင်တမန် တစ်တပ်လုံး​ဆိုရင်  ဘယ်လောက်တောင် အင်အား​ရှိ​လိုက်မလဲ။ ယေဟောဝါ​ရဲ့ တန်ခိုး​ကြီး ကောင်းကင်တမန်​တပ်​ကို ဘယ်​လူသား၊ ဘယ်နတ်ဆိုး​မှ မယှဉ်နိုင်​ဘူး။ ယေဟောဝါ​သာ အတူ​ရှိနေရင် ရန်သူ​အင်အား ဘယ်လောက် များပါစေ ကျွန်တော်​တို့ အမြဲ ခွန်အား​ပို​ရှိနေ​ပါ​လိမ့်မယ်။ (သူကြီး. ၆:၁၆) ဒါ​ကြောင့် အလုပ်ဖော်၊ အတန်းဖော်၊ မယုံကြည်​သူ ဆွေမျိုး​တွေ​ရဲ့ အပြော၊ လုပ်ရပ်​ကြောင့် စိတ်ဓာတ်ကျ​တဲ့​အခါ အဲဒီ​အချက်​တွေ​ကို သတိရပါ။ သင် တစ်ယောက်တည်း တိုက်ခိုက်​နေတာ မဟုတ်ဘူး။ သင်ဟာ ယေဟောဝါ​ရဲ့ ညွှန်ကြားမှု​အောက်မှာ ရှိနေတယ်။

၁၅။ ဟေရှာယ ၅၄:၁၅၊ ၁၇ အရ ဟောပြောခြင်း​လုပ်ငန်း​ကို ရပ်တန့်​သွား​အောင် လုပ်လို့ မရတဲ့ အကြောင်းရင်း​က ဘာလဲ။

^၁၅ ကျွန်တော်​တို့ကို စာတန့် ထိန်းချုပ်မှု​အောက်မှာ ရှိတဲ့ လောက မုန်း​ရတဲ့ အကြောင်းရင်း​တွေ ရှိတယ်။ ကျွန်တော်​တို့ နိုင်ငံရေး​မှာ ကြားနေ​တယ်။ လက်နက် မကိုင်​ဘူး။ ဘုရား​နာမည်​ကို ကြေညာ​တယ်။ ဘုရား​နိုင်ငံတော်​က​သာ ငြိမ်းချမ်းရေး ဆောင်ကြဉ်း​ပေး​နိုင်​ကြောင်း ဟောပြောတယ်။ ဘုရား​ရဲ့ ဖြောင့်မတ်​တဲ့ စံနှုန်း​တွေ​ကို လိုက်နာတယ်။ လောက​အုပ်စိုးရှင်​ဟာ မုသား​ပြောသူ၊ လူ့​အသတ် သတ်​တဲ့​သူ ဖြစ်​ကြောင်း ဖော်ထုတ်​တယ်။ (ယော. ၈:၄၄) မကြာခင် စာတန့်​လောက ဖျက်ဆီး​ခံရ​မယ့်​အကြောင်း ကြေညာ​တယ်။ စာတန်​နဲ့ နောက်လိုက်​တွေ​ကြောင့် ကျွန်တော်​တို့​ရဲ့ ဟောပြောခြင်း​လုပ်ငန်း ရပ်တန့်​သွားမှာ မဟုတ်ဘူး။ အဲဒီအစား နည်းလမ်း​မှန်သမျှ သုံးပြီး ယေဟောဝါ​ကို ကျွန်တော်​တို့ ဆက်​ချီးမွမ်း​နေကြ​တယ်။ စာတန် တန်ခိုး​ရှိပေမဲ့ ကမ္ဘာ​တစ်ဝန်း​က လူတွေ​ဆီ နိုင်ငံတော်​သတင်း မရောက်​အောင် မတားဆီး​နိုင်ဘူး။ ဒါတွေ​အားလုံး​ဟာ ယေဟောဝါ​ရဲ့ ကာကွယ်​ပေး​မှု​ကြောင့်​ပါ​ပဲ။—ဟေရှာယ ၅၄:၁၅၊ ၁၇ ကို​ဖတ်ပါ။

၁၆။ ကြီးစွာသောဒုက္ခ​အတွင်း မိမိ​လူမျိုး​ကို ယေဟောဝါ ဘယ်လို ကယ်တင်မလဲ။

^၁၆ ရှေ့မှာ ဘာတွေ ကြုံ​ရမလဲ။ ကြီးစွာသောဒုက္ခ​အတွင်း အံ့ဖွယ်​နည်း​နှစ်နည်း​နဲ့ ကျွန်တော်​တို့ကို ယေဟောဝါ ကယ်တင်​မယ်။ ပထမ၊ မှားယွင်း​တဲ့ ဘာသာရေး အင်ပါယာ မဟာ​ဗာဗုလုန်​ကို ဖျက်ဆီး​ဖို့ မြေကြီး​ဘုရင်​တွေ​ရဲ့ စိတ်ထဲ ယေဟောဝါ အကြံ ထည့်​ပေး​ချိန်မှာ သစ္စာရှိ ကျေးကျွန်​တွေ​ကို​တော့ ကယ်တင်​မှာ ဖြစ်တယ်။ (ဗျာ. ၁၇:၁၆-၁၈။ ၁၈:၂၊ ၄) ဒုတိယ၊ အာမဂေဒုန်​မှာ စာတန့်​လောကရဲ့ ကျန်​အပိုင်း​ကို ဖျက်ဆီး​ချိန်မှာ မိမိ​လူမျိုး​ကို ယေဟောဝါ ကယ်တင်​မယ်။—ဗျာ. ၇:၉၊ ၁၀။ ၁၆:၁၄၊ ၁၆။

၁၇။ ယေဟောဝါ​နဲ့ ရင်းနှီး​နေမယ်​ဆိုရင် ဘာ​အကျိုး​ရမလဲ။

^၁၇ ယေဟောဝါ​နဲ့ ရင်းနှီး​နေမယ်​ဆိုရင် ကျွန်တော်​တို့ကို ထာဝစဉ် ထိခိုက်အောင် စာတန် မလုပ်နိုင်ဘူး။ တကယ်တမ်း အပြီးအပိုင် ချေမှုန်း​ခံရ​မှာ စာတန်​ပဲ။ (ရော. ၁၆:၂၀) ဒါ​ကြောင့် ချပ်ဝတ်တန်ဆာ အပြည့်အစုံ ဝတ်ဆင်ပါ။ အသုံးပြု​နေပါ။ တစ်ယောက်တည်း အား​နဲ့ မတိုက်ခိုက်​ပါ​နဲ့။ ညီအစ်ကို/မ​တွေ​ကို ထောက်မပါ။ ယေဟောဝါ​ရဲ့ ညွှန်ကြားချက်​ကို လိုက်နာပါ။ ဒါဆိုရင် သင့်ကို မေတ္တာရှင် ကောင်းကင်ဖခင် ခိုင်ခံ့​မြဲမြံ​စေပြီး ကာကွယ်​ပေး​မယ်​ဆိုတာ ယုံကြည်​စိတ်ချ​နိုင်​ပါ​တယ်။—ဟေရှာ. ၄၁:၁၀။