၁။ အနာဂတ်​နဲ့ပတ်သက်ပြီး လူငယ်​တစ်ယောက် ဘာ​ဆုံးဖြတ်​ရ​မလဲ။ ဘာကြောင့် အစိုး​ရိမ်​မလွန်​ဖို့ လို​သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)

ခရီး​တစ်ခု မစ​ခင် ခရီး​စဉ်​အတွက် ကြိုတင်​စီစဉ်​ရတယ်​ဆိုတဲ့ အချက်ကို လူငယ်တွေ သဘောတူ​မှာပါ။ ဘဝဟာ ခရီး​တစ်ခုနဲ့ တူ​တယ်။ ဘယ်​ကို သွားမယ်​ဆိုတာ စီစဉ်​ရမယ့်​အချိန်​က ငယ်ရွယ်ချိန်​ပါပဲ။ အစီအစဉ်​တွေ ဆွဲ​ရတာ မလွယ်​ဘူး။ ဟေသာ​ဆိုတဲ့ မိန်းကလေး​က “ထိတ်လန့်စရာ​ပဲ။ ကျန်​တဲ့​ဘဝတစ်လျှောက်လုံး ဘာ​လုပ်​မလဲဆိုတာ ဆုံးဖြတ်​ရမယ်” လို့ပြောတယ်။ ဒါပေမဲ့ သတ္တိရှိ​ပါ။ ယေဟောဝါက “မစိုးရိမ်​နဲ့။ ငါ​ဟာ မင်း​ရဲ့​ဘုရားသခင်​ပါ။ မင်း​ကို ခိုင်ခံ့​စေမယ်၊ ကူညီပေးမယ်” လို့ပြောတယ်။—ဟေရှာ. ၄၁:၁၀။

၂။ ပျော်ရွှင်​တဲ့ အနာဂတ်အတွက် ယေဟောဝါ စီစဉ်​စေချင်​မှန်း ဘယ်လို သိရ​သလဲ။

^၂ အနာဂတ်အတွက် ပညာရှိရှိ စီစဉ်​ပါ​လို့ ယေဟောဝါ တိုက်တွန်း​တယ်။ (ဒေ. ၁၂:၁။ မ. ၆:၂၀) သင့်ကို ပျော်ရွှင်​စေချင်တယ်။ ဖန်ဆင်းရာ​တွေမှာ တွေ့ရတဲ့ ကြည်နူးစရာ မြင်ကွင်း၊ အသံ၊ အရသာ​တွေ​က ပျော်ရွှင်​စေချင်​မှန်း ပြောပြ​နေတယ်။ ကျွန်တော်​တို့ကို ဂရုစိုက်ပုံ၊ အကောင်းဆုံး​ဘဝ ရရှိအောင် သင်ပေး​နေ​ပုံကို​လည်း သုံးသပ်ကြည့်ပါ။ ဘုရားရဲ့ အကြံပြုချက် ငြင်းပယ်​တဲ့​သူတွေကို ယေဟောဝါ ဒီလိုပြောတယ်– “ငါ​မကြိုက်​တာတွေကို [မင်းတို့] ရွေးချယ်​တယ်။ . . . ငါ့​ကျွန်​တွေ ဝမ်းမြောက်​ရ​လိမ့်မယ်။ မင်း​တို့​က​တော့ အရှက်ကွဲ​မယ်။ ငါ့​ကျွန်​တွေဟာ စိတ်ကြည်နူး​နေတဲ့​အတွက်  ရွှင်လန်းစွာ ကြွေးကြော်​လိမ့်မယ်။” (ဟေရှာ. ၆၅:၁၂-၁၄) ကျွန်တော်တို့ ဘဝ​မှာ မှန်မှန်ကန်ကန် ရွေးချယ်​တဲ့အခါ ယေဟောဝါကို ဂုဏ်တင်ရာ​ရောက်​တယ်။—ပညာ. ၂၇:၁၁။

၃။ သင့်ကို ယေဟောဝါ ဘာ​လုပ်​စေချင်​သလဲ။

^၃ သင့်ကို ယေဟောဝါ ဘာတွေ စီစဉ်​ထား​စေချင်​သလဲ။ ဘုရားကို သိကျွမ်းခြင်း၊ သစ္စာရှိရှိ အမှုဆောင်ခြင်း​တို့​က​နေ ပျော်ရွှင်မှု ရှာတွေ့​ဖို့ လူတွေကို ဘုရား ဖန်ဆင်း​ထားတယ်။ (ဆာ. ၁၂၈:၁။ မ. ၅:၃) ဒါက စားသောက်၊ သားပေါက်​နေ​ရုံ​နဲ့ ကျေနပ်​နေတဲ့ တိရစ္ဆာန်တွေနဲ့ ထူးခြား​ကွဲပြား​စေတဲ့ အချက်ပါ​ပဲ။ တိရစ္ဆာန်တွေ​ကို ကျေနပ်​စေတဲ့​အရာတွေ​သာမက တခြား​အစီအစဉ်​တွေ ဆွဲ​ခြင်းအားဖြင့် သင့်ကို ဘုရား ပျော်ရွှင်​စေချင်တယ်။ ဖန်ဆင်းရှင်ဟာ လူသားတွေ​ကို “မိမိ​ပုံသဏ္ဌာန်​အတိုင်း” ဖန်ဆင်း​တဲ့ “မေတ္တာ . . . ရှင် ဘုရားသခင်၊” “ပျော်ရွှင်​တဲ့ ဘုရားသခင်” ဖြစ်တယ်။ (၂ ကော. ၁၃:၁၁။ ၁ တိ. ၁:၁၁။ က. ၁:၂၇) မေတ္တာရှင် ဘုရားသခင်ကို တုပ​ရင် ပျော်ရွှင်ပါလိမ့်မယ်။ “ရယူခြင်း​ထက် ပေးကမ်းခြင်း​က ပို​ပျော်ရွှင်​စေတယ်” ဆိုတဲ့ ကျမ်းစကား မှန်ကန်မှု​ကို ခံစား​ဖူး​ပါသလား။ (တ. ၂၀:၃၅) ဒါက လူ့ဘဝ​ရဲ့ အခြေခံ အမှန်တရား​ပဲ။ ဒါကြောင့် တခြားသူတွေနဲ့ ဘုရားကို ချစ်ကြောင်း ဖော်ပြ​တဲ့ အစီအစဉ်​တွေ ဆွဲ​ဖို့ ယေဟောဝါ အလိုရှိ​တယ်။—မဿဲ ၂၂:၃၆-၃၉ ကိုဖတ်ပါ။

၄၊ ၅။ ဘာက ယေရှုကို ပျော်ရွှင်​စေ​သလဲ။

^၄ လူငယ်တွေ​အတွက် ယေရှု အကောင်းဆုံး​စံနမူနာ ချမှတ်​ခဲ့တယ်။ ကလေးဘဝ​တုန်းက ပျော်ပျော်​ပါး​ပါး ဆော့ကစား​ခဲ့မှာ သေချာ​တယ်။ “ရယ်​ရတဲ့​အချိန် ရှိတယ်။ . . . ကခုန်​တဲ့​အချိန် ရှိတယ်” လို့ ကျမ်းစာမှာ ဖော်ပြထားတယ်။ (ဒေ. ၃:၄) ကျမ်းစာ လေ့လာခြင်း​အားဖြင့် ယေဟောဝါနဲ့ ရင်းနှီး​အောင်​လည်း လုပ်ဆောင်​ခဲ့မှာပဲ။ ယေရှု အသက် ၁၂ နှစ်အရွယ်​မှာ ဗိမာန်တော် ဆရာ​တွေ​က “သူ​အဖြေပေး​ပုံ၊ ဉာဏ်​ထက်မြက်​ပုံကို တ​အံ့​တ​ဩ ဖြစ်” ခဲ့ကြတယ်။—လု. ၂:၄၂၊ ၄၆၊ ၄၇။

^၅ ယေရှု အရွယ်ရောက်​တော့​လည်း ပျော်ရွှင်​တယ်။ ဘာက သူ့ကို ပျော်ရွှင်​စေ​သလဲ။ တခြား​အရာတွေ​ထက် “နွမ်းပါးသူ​တွေကို သတင်းကောင်း ကြေညာ​ဖို့၊ . . . မျက်မမြင်​တွေကို ပြန်မြင်​တော့​မယ့်​အကြောင်း . . . ကြေညာ​ဖို့” ဘုရားသခင် ပို​အလိုရှိ​မှန်း သိထား​တယ်။ (လု. ၄:၁၈) ဘုရားသခင် တောင်းဆို​တဲ့အတိုင်း လုပ်ဆောင်ခြင်း​က ယေရှုကို ပျော်ရွှင်​စေတယ်။ ဆာလံ ၄၀:၈ မှာ “အို ဘုရားသခင်၊ အလိုတော်​ဆောင်​တာဟာ ကျွန်တော့်​အတွက် ကြည်နူးစရာ​ပါ” ဆိုပြီး သူ့​ခံစားချက်ကို ဖော်ပြ​ခဲ့တယ်။ ကောင်းကင်ဘုံ​စံ ဖခင်​အကြောင်း လူတွေကို သင်ပေး​ရတာ နှစ်သက်​တယ်။ (လုကာ ၁၀:၂၁ ကိုဖတ်ပါ။) တစ်ခါ​က အမျိုးသမီး​တစ်ယောက်​ကို စစ်မှန်တဲ့ ဝတ်ပြုရေး​အကြောင်း သင်ပေး​ပြီးနောက် တပည့်​တွေကို ဒီလို​ပြောခဲ့တယ်– “ကျွန်တော့်ကို စေလွှတ်​တဲ့​အရှင်​ရဲ့ အလိုတော်​ကို ဆောင်​တာ၊ သူ​ခိုင်း​ထားတဲ့ အလုပ်ကို ပြီးစီး​အောင် လုပ်တာ​ဟာ ကျွန်တော့်​အတွက် စားစရာ​ပဲ။” (ယော. ၄:၃၁-၃၄) ဘုရားသခင်​နဲ့ တခြားသူတွေကို ချစ်ကြောင်း ဖော်ပြခြင်း​က ယေရှုကို ပျော်ရွှင်​စေခဲ့တယ်။ အဲဒါက သင့်ကို​လည်း ပျော်ရွှင်​စေနိုင်​တယ်။

၆။ အတွေ့အကြုံ​များတဲ့ ခရစ်ယာန်တွေ​နဲ့ အနာဂတ်​အစီအစဉ်​တွေအကြောင်း ဘာကြောင့် ဆွေးနွေး​သင့်သလဲ။

^၆ လူငယ်ဘဝ​မှာ ရှေ့ဆောင်​လုပ်ခြင်း​က ပျော်ရွှင်​စေ​ကြောင်း ခရစ်ယာန်များ​စွာ တွေ့ကြုံခံစား​ကြ​တယ်။ သူတို့​ထဲက တချို့​နဲ့ သင့်​အစီအစဉ်​တွေအကြောင်း ဆွေးနွေး​ကြည့်ပါ။ “တိုင်ပင်​ဆွေးနွေး​တာ မရှိရင် အစီအစဉ်​တွေ ပျက်​တတ်တယ်။ အကြံပေး​သူ များ​ရင်​တော့ အောင်မြင်​တတ်တယ်။” (ပညာ. ၁၅:၂၂) အချိန်ပြည့်လုပ်ငန်း​က သင့်​ဘဝတစ်လျှောက်လုံး​ကို အကျိုးပြု​မယ့် ပညာရေး​ဖြစ်ကြောင်း အဲဒီ​ရင့်ကျက်သူ​တွေ ပြောပြ​ကြပါ​လိမ့်မယ်။ ယေရှုဟာ ကောင်းကင်မှာ ဖခင်​ရဲ့ သွန်သင်မှု ခံယူ​ပြီးနောက် မြေကြီး​အမှုဆောင်လုပ်ငန်း​က​နေ ဆက်သင်​ယူ​ခဲ့တယ်။ ဥပမာ​အနေနဲ့ လူတွေရဲ့ နှလုံးသား​ထဲ သတင်းကောင်း ရောက်ရှိ​စေခြင်း၊ စမ်းသပ်မှု​အောက်မှာ သမာဓိ စောင့်သိ​နေခြင်းက ပျော်ရွှင်​စေ​ကြောင်း သင်ယူ​ခဲ့တယ်။ (ဟေရှာယ ၅၀:၄ ကိုဖတ်ပါ။ ဟီ. ၅:၈။ ၁၂:၂) ပျော်ရွှင်​ကျေနပ်​စေတဲ့ အချိန်ပြည့်လုပ်ငန်း ကဏ္ဍ​တချို့ကို ဆွေးနွေးသုံးသပ်​ကြည့်ကြစို့။

၇။ လူငယ်များ​စွာ တပည့်ဖြစ်စေ​ခြင်း​လုပ်ငန်းမှာ ဘာကြောင့် ပျော်ရွှင်​ကြ​သလဲ။

^၇ “လူတွေကို ကျွန်တော့်​တပည့် ဖြစ်လာ​အောင် သွန်သင်ပေး​ကြ” လို့ ယေရှု ပြောတယ်။ (မ. ၂၈:၁၉၊ ၂၀)  တပည့်ဖြစ်စေ​ခြင်း​လုပ်ငန်းမှာ ပါဝင်ချင်​တယ်ဆိုရင် ဘုရားကို ဂုဏ်တင်တဲ့ ကျေနပ်မှု​အ​ပေး​ဆုံး အလုပ်ကို ရွေးချယ်​မှာ ဖြစ်တယ်။ ဘယ်​အလုပ်​မဆို ကျွမ်းကျင်​ဖို့ အချိန်​လိုတယ်။ ဆယ်ကျော်သက်​အရွယ်မှာ ရှေ့ဆောင် စ​လုပ်ခဲ့တဲ့ ညီအစ်ကို တီမိုသီ ဒီလိုပြောတယ်– “ယေဟောဝါကို ချစ်ကြောင်း ဖော်ပြ​နိုင်​လို့ အချိန်ပြည့်​အမှုဆောင်လုပ်ငန်း​ကို ကျွန်တော် ကြိုက်​တယ်။ အစပိုင်းမှာ​တော့ ကျမ်းစာသင်အံမှု တစ်ခု​မှ မရှိဘူး။ နောက်ပိုင်း တခြား​ဒေသ​တစ်ခုကို ပြောင်းရွှေ့​သွားတဲ့​အခါမှာ​တော့ တစ်လ​တည်းမှာ​ပဲ ကျမ်းစာသင်အံမှု အတော်များများ စ​နိုင်ခဲ့တယ်။ သင်သား​တစ်ယောက်​ဆိုရင် နိုင်ငံတော်ခန်းမ​ကို လာ​နေ​ပြီ။ တစ်ကိုယ်ရေ ညီအစ်ကို​များ​အတွက် နှစ်​လ​ကြာ ကျမ်းစာသင်တန်း * တက်ပြီး​တဲ့​နောက် နေရာသစ်​မှာ တာဝန်ကျ​ပြီး ကျမ်းစာသင်အံမှု​လေးခု စ​နိုင်ခဲ့တယ်။ သန့်ရှင်းသော စွမ်းအားတော်​က သူတို့ကို ပြောင်းလဲ​ပေး​နေတာ မြင်တွေ့ရ​လို့ လူတွေကို သင်ပေး​ရတာ ကျွန်တော် သဘောကျ​နှစ်သက်​တယ်။”—၁ သက်. ၂:၁၉။

၈။ ခရစ်ယာန်​တချို့ တပည့်ဖြစ်စေ​ခြင်း​လုပ်ငန်းမှာ ပို​အပြည့်အဝ ပါဝင်ဖို့ ဘာ​လုပ်ကြ​သလဲ။

^၈ ခရစ်ယာန် လူငယ်​တချို့က​တော့ ဘာသာခြား​စကား သင်ယူ​ကြ​တယ်။ မြောက်​အမေရိက,က ဂျေ​ကပ် ဒီလို​ရေး​တယ်– “ကျွန်တော်​အသက် ၇ နှစ်​တုန်းက အတန်းဖော်​အများစုက ဗီယက်နမ်​တွေ။ သူတို့ကို ယေဟောဝါ​အကြောင်း ပြောပြ​ချင်​လို့ ဗီယက်နမ်​စကား သင်ယူ​ဖို့ စီစဉ်​တယ်။ အင်္ဂလိပ်​နဲ့ ဗီယက်နမ် ကင်းမျှော်စင်​ကို ယှဉ်​ကြည့်ပြီး အများဆုံး သင်ယူ​ခဲ့ရတယ်။ အနီး​နား​မှာရှိတဲ့ ဗီယက်နမ်​စကားပြော အသင်းတော်​မှာ မိတ်ဆွေတွေ ဖွဲ့​တယ်။ အသက် ၁၈ နှစ်မှာ ရှေ့ဆောင် စ​လုပ်တယ်။ နောက်တော့ တစ်ကိုယ်ရေ ညီအစ်ကို​များ​အတွက် ကျမ်းစာသင်တန်း တက်တယ်။ အဲဒါက အကြီးအကဲ​ဆိုလို့ ကျွန်တော်​တစ်ယောက်​ပဲ​ရှိတဲ့ ဗီယက်နမ်​စကားပြော​အုပ်စု​မှာ ရှေ့ဆောင်​အဖြစ် အမှုဆောင်ဖို့ အထောက်အကူ ပြု​ခဲ့တယ်။ ဗီယက်နမ်​လူများစွာ​က ကျွန်တော် သူတို့​စကား သင်ယူ​တာ​ကို အံ့ဩ​ကြ​တယ်။ ကျွန်တော့်ကို ဖိတ်ခေါ်​ကြ​တယ်။ သူတို့နဲ့ ကျမ်းစာလေ့လာ​နိုင်တယ်။ တချို့​ဆိုရင် နှစ်ခြင်းခံ​တဲ့အထိ တိုးတက်​လာကြတယ်။—တမန်တော် ၂:၇၊ ၈ နဲ့​နှိုင်းယှဉ်​ပါ။

၉။ တပည့်ဖြစ်စေ​ခြင်း​လုပ်ငန်း​က ကောင်းမွန်​တဲ့ ပညာရေး ဘယ်လို ဖြစ်သလဲ။

^၉ တပည့်ဖြစ်စေ​ခြင်း​လုပ်ငန်း​ဆိုတာ အလုပ်​နဲ့ပတ်သက်တဲ့ အလေ့အထ​ကောင်း၊ ပြောဆိုဆက်သွယ်​မှု​ပညာ၊ ကိုယ့်ကိုယ်ကိုယ် ယုံကြည်စိတ်ချမှု၊ လိမ္မာပါးနပ်မှု ရရှိ​စေတဲ့ ပညာရေး​ပါပဲ။ (ပညာ. ၂၁:၅။ ၂ တိ. ၂:၂၄၊ အောက်ခြေမှတ်ချက်) ဒါပေမဲ့ တပည့်ဖြစ်စေ​ခြင်း​လုပ်ငန်း​က ယုံကြည်ချက်​ရဲ့ အခြေခံ သမ္မာကျမ်းစာ​နဲ့ ပို​အကျွမ်းဝင်​စေ​လို့ အထူးသဖြင့် ပျော်စရာ​ကောင်းတယ်။ ယေဟောဝါနဲ့ ရင်းနှီး​စွာ လုပ်ဆောင်နိုင်ပုံ​ကိုလည်း သိရှိ​လာတယ်။—၁ ကော. ၃:၉။

၁၀။ ခက်ခဲတဲ့​ရပ်ကွက်​မှာတောင် တပည့်​စေခြင်း​လုပ်ငန်းမှာ ဘယ်လို ပျော်ရွှင်​နိုင်သလဲ။

^၁၀ သင့်​ရပ်ကွက်​မှာ သတင်းကောင်း လက်ခံ​တုံ့ပြန်​သူ နည်းနည်း​ပဲ ရှိ​ရင်တောင် တပည့်ဖြစ်စေ​ခြင်း​လုပ်ငန်းမှာ ပျော်ရွှင်​နိုင်ပါတယ်။ ဒီ​လုပ်ငန်း​က အဖွဲ့​လိုက် လုပ်​ရတဲ့​အလုပ်​မျိုး​ပါ။ အသင်းတော်တစ်ခုလုံး​က စိတ်ရင်းမှန်​တဲ့​သူတွေကို ရှာ​တယ်။ ညီအစ်ကို/မ​တစ်ယောက်ယောက် ရှာတွေ့​ထားတဲ့ သူ​တစ်ယောက်​ပဲ တပည့်ဖြစ်​လာ​ရင်တောင် ရှာဖွေမှု​မှာ ပါဝင်တဲ့ အသင်းသား​အားလုံး ပျော်ရွှင်​ကြ​တယ်။ ဥပမာ၊ တုံ့ပြန်မှု​မရှိတဲ့ ရပ်ကွက်​မှာ ကိုးနှစ်​ကြာ ရှေ့ဆောင်​လုပ်ခဲ့တဲ့ ဘရင်ဒန်​အကြောင်း သုံးသပ်ကြည့်ပါ။ “သတင်းကောင်း ဟောပြောခြင်း​က ယေဟောဝါ ခိုင်း​တဲ့​အလုပ်​ဖြစ်လို့ ကျွန်တော် ကြိုက်​တယ်။ အထက်တန်းကျောင်း ပြီး​တာနဲ့ ကျွန်တော် ရှေ့ဆောင် စ​လုပ်တယ်။ အသင်းတော်မှာရှိတဲ့ လူငယ်​ညီအစ်ကိုတွေ​ကို အားပေး​ရတာ၊ သူတို့​တိုးတက်​လာ​တာ​ကို တွေ့ရ​တာ ကျွန်တော် ပျော်​တယ်။ တစ်ကိုယ်ရေ ညီအစ်ကို​များ​အတွက် ကျမ်းစာသင်တန်း တက်ပြီး​နောက် ရှေ့ဆောင်​တာဝန်သစ် ရခဲ့တယ်။ နှစ်ခြင်းခံ​တဲ့အထိ တိုးတက်​လာ​သူ တစ်ယောက်​မှ ရှာ​မ​တွေ့​တာ မှန်ပါတယ်။ ဒါပေမဲ့ တခြားသူတွေ ရှာတွေ့​တယ်။ တပည့်ဖြစ်စေ​ခြင်း​လုပ်ငန်းမှာ အပြည့်အဝ ပါဝင်ဖို့​ စီစဉ်​ခဲ့လို့ ပျော်​ပါတယ်။”—ဒေ. ၁၁:၆။

၁၁။ မြင့်မြတ်​တဲ့​လုပ်ငန်း​ရဲ့ ဘယ်ကဏ္ဍမှာ လူငယ်များ​စွာ ပါဝင်​နေကြ​သလဲ။

^၁၁ ယေဟောဝါကို အမှုဆောင်ဖို့ အခွင့်အရေး​များစွာ ရှိပါ​ တယ်။ ဥပမာ၊ လူငယ်များ​စွာ​ဟာ ဆောက်လုပ်ရေးလုပ်ငန်း​မှာ စေတနာ့ဝန်ထမ်း လုပ်ကြတယ်။ နိုင်ငံတော်ခန်းမ​သစ်​တွေ ရာနဲ့ချီ လိုအပ်​နေတယ်။ ခန်းမ​ဆောက်လုပ်ရေး​က ဘုရားကို ဂုဏ်တင်တဲ့၊ သင့်ကို ပျော်ရွှင်​စေတဲ့ မြင့်မြတ်​တဲ့​လုပ်ငန်း​ပါ။ ယုံကြည်သူချင်းတွေ​နဲ့ ပေါင်းသင်း​ရတာက​လည်း ပျော်ရွှင်​စရာ​ပါပဲ။ ဆောက်လုပ်ရေးလုပ်ငန်း​က​နေ​လည်း ပညာ​ရတယ်။ ဘေးကင်းရေး​တွေ သိလာ​တယ်။ ဝီရိယရှိ​တဲ့​လုပ်သား ဖြစ်လာတယ်။ ကြီးကြပ်သူ​တွေနဲ့ ပူးပေါင်းလုပ်ဆောင်​တတ်လာ​စေတယ်။

၁၂။ ရှေ့ဆောင်လုပ်ငန်း​က ဘယ်လိုနည်းနဲ့ တခြား​အခွင့်အရေး​တွေ ရရှိ​စေ​သလဲ။

^၁၂ ညီအစ်ကို ကေ​ဗ​င် ဒီလိုပြောတယ်– “ကျွန်တော် ငယ်ငယ်​လေး​ကတည်းက ယေဟောဝါကို အချိန်ပြည့် အမှုဆောင်​ချင်​ခဲ့တယ်။ အသက် ၁၉ နှစ်မှာ ရှေ့ဆောင် စ​လုပ်တယ်။ ညီအစ်ကို​တစ်ယောက်​ရဲ့ ဆောက်လုပ်ရေးလုပ်ငန်း​မှာ အချိန်ပိုင်း​အလုပ် လုပ်တယ်။ ခေါင်မိုး၊ ပြတင်းပေါက်၊ တံခါး​တွေ တပ်ဆင်​တတ်လာ​တယ်။ နောက်ပိုင်း ဟာရီကိန်း​ဘေး ကယ်ဆယ်ရေး​အဖွဲ့နဲ့ နိုင်ငံတော်ခန်းမ​တွေ၊ ညီအစ်ကိုတွေ​ရဲ့ အိမ်​တွေ ဆောက်လုပ်​ရာမှာ နှစ်နှစ် အလုပ်လုပ်​ခဲ့တယ်။ တောင်အာဖရိက ဆောက်လုပ်ရေး​မှာ လူ​လိုမှန်း သိ​လို့ လျှောက်လွှာတင်​လိုက်တာ ဖိတ်ခေါ်​ခံရ​တယ်။ ဒီ​အာဖရိက​မှာ အပတ်​အနည်းငယ်​ကြာ​တိုင်း ခန်းမ​ဆောက်လုပ်ရေး လုပ်ငန်းခွင်​တစ်ခုက​နေ နောက်​တစ်ခုကို ပြောင်း​ရတယ်။ ဆောက်လုပ်ရေး​အုပ်စု​က မိသားစု​လိုပဲ။ အတူ နေတယ်။ အတူ ကျမ်းစာလေ့လာ​တယ်။ အတူ အလုပ်လုပ်​တယ်။ အပတ်​တိုင်း ဒေသခံ​ညီအစ်ကိုတွေ​နဲ့အတူ ဟောပြော​ကြ​တယ်။ ငယ်ငယ်​တုန်းက ဆွဲ​ခဲ့တဲ့ အစီအစဉ်​တွေ​က ကြိုတင်​မသိ​မြင်ခဲ့​တဲ့ နည်းများ​စွာ​နဲ့ ပျော်ရွှင်​စေတယ်။”

၁၃။ ဗေသလလုပ်ငန်း​က လူငယ်တွေ​ကို ဘယ်လို ပျော်ရွှင်​စေ​သလဲ။

^၁၃ ယေဟောဝါကို အချိန်ပြည့်​အမှုဆောင်ဖို့ အစီအစဉ်​ဆွဲ​ခဲ့​သူ​တချို့ အခု ဗေသလ​မှာ အမှုဆောင်​နေကြ​ပြီ။ ဗေသလ​မှာ လုပ်ဆောင်​သမျှ​ဟာ ယေဟောဝါ​အတွက်​မို့ ဗေသလလုပ်ငန်း​က ပျော်ရွှင်​ကျေနပ်မှု​ပေးတဲ့ ဘဝ​လမ်းစဉ်​ပါပဲ။ ဗေသလမိသားစု​က ကျမ်းစာစာပေ​တွေ ထုတ်ဝေ​ဖို့ ကူညီပေးတယ်။  ဗေသလအိမ်သား ဒတ်စတင် ဒီလိုပြောတယ်– “အသက်​ကိုးနှစ်​မှာ အချိန်ပြည့်​အမှုဆောင်ဖို့ ပန်းတိုင်​ထားခဲ့​တယ်။ အထက်တန်းကျောင်း ပြီး​တာနဲ့ ရှေ့ဆောင် စ​လုပ်တယ်။ တစ်နှစ်​ခွဲ​အကြာ​မှာ ဗေသလ​ကို ဖိတ်ခေါ်​ခံရ​တယ်။ ပုံနှိပ်စက်​မှာ လုပ်​တတ်လာ​တယ်။ နောက်တော့ ကွန်ပျူတာ ပရိုပရမ် ရေးဆွဲ​တတ်လာ​တယ်။ ကမ္ဘာချီ တပည့်ဖြစ်စေ​ခြင်း​လုပ်ငန်း တိုးတက်မှု​ကို ဗေသလ​မှာ အရင်ဆုံး ကြား​ရ​တတ်တယ်။ ဒီ​နေရာမှာ ကျွန်တော်တို့ လုပ်​သမျှ​ဟာ လူတွေကို ယေဟောဝါနဲ့ ရင်းနှီး​အောင် ကူညီပေး​တာ​ဖြစ်လို့ ပျော်စရာ​ကောင်းတယ်။”

၁၄။ အချိန်ပြည့် အမှုဆောင်လုပ်ငန်းမှာ ပါဝင်ဖို့ ဘယ်လို စီစဉ်​နိုင်သလဲ။

^၁၄ အချိန်ပြည့် ခရစ်ယာန် အမှုဆောင်​တစ်ယောက်​ဖြစ်ဖို့ ဘယ်လို စီစဉ်​နိုင်သလဲ။ ယေဟောဝါကို အပြည့်အဝ အမှုဆောင်​ရာမှာ အောင်မြင်​ဖို့ တခြား​အရာအားလုံး​ထက် ခရစ်ယာန် အရည်အသွေး​တွေ​က ကူညီပေး​ပါလိမ့်မယ်။ ဒါကြောင့် ကျမ်းစာကို လုံ့လစိုက်ထုတ် လေ့လာ​ပါ။ ဆိုလိုရင်း​ကို နက်နက်နဲနဲ တွေးတောဆင်ခြင်​ပါ။ အသင်းတော် အစည်းအဝေးတွေမှာ ယုံကြည်ခြင်း ဖော်ပြ​ဖို့ နည်းလမ်းတွေ ရှာ​ပါ။ ကျောင်းတက်​နေတုန်း သတင်းကောင်း ဟောပြောသူ​မှာ ရှိ​ထား​ရမယ့် အတွေ့အကြုံ၊ ကျွမ်းကျင်မှု​ကို သင်ယူ​ဆည်းပူး​ပါ။ လူတွေရဲ့ သဘောထားကို လိမ္မာပါးနပ်​စွာ မေး​ခြင်း၊ သူတို့ရဲ့​အဖြေကို နားထောင်ပေး​ခြင်းအားဖြင့် လူတွေ​အပေါ် စိတ်ဝင်စား​တတ်အောင် သင်ယူ​ပါ။ နိုင်ငံတော်ခန်းမ သန့်ရှင်းရေး၊ ပြုပြင်ထိန်းသိမ်း​ရေး​စတဲ့ အသင်းတော်​တာဝန်တွေ​မှာ ပါဝင်​ပါ။ နှိမ့်ချ​တဲ့၊ တလိုတလား​စိတ်​ရှိတဲ့​သူတွေကို ယေဟောဝါ အသုံးပြု​ချင်​တယ်။ (ဆာလံ ၁၁၀:၃ ကိုဖတ်ပါ။ တ. ၆:၁-၃) “ညီအစ်ကိုတွေ​ရှေ့မှာ နာမည်ကောင်း ရထား​သူ” တိမောသေကို သာသနာပြု​လုပ်ငန်း​အတွက် ပေါလု ဖိတ်ခေါ်​ခဲ့တယ်။—တ. ၁၆:၁-၅။

၁၅။ အလုပ်​ရဖို့ ဘယ်လို ပြင်ဆင်​နိုင်သလဲ။

^၁၅ အချိန်ပြည့် အမှုဆောင်​တွေ အလုပ်​ရှိ​ဖို့ လိုတယ်။ (တ. ၁၈:၂၊ ၃) ကာလ​တို​သင်တန်း​တစ်ခု တက်​မယ်ဆိုရင် ကိုယ့်​ဒေသ​မှာ အချိန်ပိုင်း​အလုပ်​တစ်ခု ရနိုင်​ပါတယ်။ အစီအစဉ်​ရှိတယ်​ဆိုရင် တိုက်နယ်ကြီးကြပ်မှူး၊ ကိုယ့်​တိုက်နယ်​ထဲက ရှေ့ဆောင်​တွေနဲ့ တိုင်ပင်​ကြည့်ပါ။ ရှေ့ဆောင်​တွေအတွက် ဘာ​အလုပ်​က လက်တွေ့ကျ​သလဲ​ဆိုတာ မေးမြန်း​ကြည့်ပါ။ ကျမ်းစာမှာ ဖော်ပြထားတဲ့​အတိုင်း “လုပ်ဆောင်​လေ​သမျှ ယေဟောဝါ​ဆီ ပုံအပ်ထား​ပါ။ ဒါဆို​ရင် အစီအစဉ်​တွေ အောင်မြင်​လိမ့်မယ်။”—ပညာ. ၁၆:၃။ ၂၀:၁၈။

၁၆။ ငယ်ရွယ်ချိန်​မှာ ယေဟောဝါကို အပြည့်အဝ အမှုဆောင်ခြင်း​က အနာဂတ်မှာ တခြား​ဘာ​တာဝန်တွေ​အတွက် ပြင်ဆင်ပေး​သလဲ။

^၁၆ သင့်ရဲ့ ပျော်ရွှင်​တဲ့ အနာဂတ် “အမြဲ​ရှင်သန်​နေ” ဖို့ ယေဟောဝါ အလိုရှိ​ကြောင်း ယုံကြည်စိတ်ချ​နိုင်ပါတယ်။ (၁ တိမောသေ ၆:၁၈၊ ၁၉ ကိုဖတ်ပါ။) အချိန်ပြည့်​အမှုဆောင်လုပ်ငန်း​က သင့်ကို တခြား​အချိန်ပြည့်​အမှုဆောင်​တွေနဲ့ ထိတွေ့​ခွင့် ရစေ​ပြီး ရင့်ကျက်​တဲ့ ခရစ်ယာန်​တစ်ယောက် ဖြစ်စေတယ်။ ငယ်ရွယ်ချိန်​မှာ ယေဟောဝါကို အပြည့်အဝ အမှုဆောင်​ရင် အိမ်ထောင်ရေး​မှာ အောင်မြင်​ဖို့ အကူအညီ ဖြစ်စေ​မှန်း လူများစွာ သိရှိ​ခဲ့ကြ​ပြီ။ အိမ်ထောင်​မပြု​ခင် အချိန်ပြည့်လုပ်ငန်း​မှာ ပါဝင်​သူတွေဟာ အိမ်ထောင်ပြု​ပြီးနောက်​မှာလည်း ဆက်​ပြီး အချိန်ပြည့် အမှုဆောင်​နိုင်​လေ့ရှိတယ်။—ရော. ၁၆:၃၊ ၄။

၁၇၊ ၁၈။ အစီအစဉ်​ဆွဲ​ခြင်း​မှာ စိတ်နှလုံး ဘယ်လို ပါဝင်ပတ်သက်​သလဲ။

^၁၇ အစီအစဉ်​ဆွဲ​ခြင်း​မှာ စိတ်နှလုံး ပါဝင်ပတ်သက်​တယ်။ ‘သင့်ရဲ့ လိုအင်ဆန္ဒ​တွေကို [ဘုရားသခင်] ဖြည့်ဆည်း​ပေးပါ​စေ။ အစီအစဉ်​အားလုံးကို အောင်မြင်​ခွင့်​ပေးပါ​စေ’ လို့ ဆာလံ ၂၀:၄ မှာ ပြောထားတယ်။ ဒါကြောင့် ဘဝ​မှာ ဘာလုပ်ချင်သလဲ​ဆိုတာ စဉ်းစားပါ။ ကျွန်တော်တို့​အချိန်​မှာ ယေဟောဝါ ဘာ​လုပ်​နေတယ်၊ အမှုဆောင်လုပ်ငန်းမှာ ဘယ်လို ပါဝင်​နိုင်တယ်​ဆိုတာ သုံးသပ်​ပါ။ အဲဒီနောက် ဘုရား​နှစ်သက်​တာ​ကို လုပ်ဖို့ စီစဉ်​ပါ။

^၁၈ ယေဟောဝါကို အပြည့်အဝ အမှုဆောင်ခြင်း​က ဘုရားကို ဂုဏ်တင်တဲ့ ဘဝ​လမ်းစဉ်​ဖြစ်လို့ ပျော်ရွှင်​ကျေနပ်မှု တကယ် ခံစားရ​စေ​ပါတယ်။ “ယေဟောဝါ​ဆီမှာ ပျော်ရွှင်​ကြည်နူးမှု​ကို ရှာ​ပါ။ အလိုဆန္ဒတွေ​ကို ဘုရား ဖြည့်ဆည်း​ပေး​လိမ့်မယ်။”—ဆာ. ၃၇:၄။