၁။ ဘယ်​ဖိအား​တွေနဲ့ ရင်ဆိုင်​နေကြ​သလဲ။ ဒါပေမဲ့ မိမိ​ကျေးကျွန်​တွေကို ယေဟော​ဝါ ကျေနပ်​နှစ်သက်​တယ်လို့ ပြော​ဖို့ ဘာ​အကြောင်းရင်း​ရှိ​သလဲ။ (ဆောင်းပါး​အစမှာ​ပါတဲ့ ပုံကို ကြည့်ပါ။)

ဒီ​လောက​စနစ်​မှာ အသက်ရှင်​နေ​ရလို့ ဒုက္ခ​နဲ့ မလွတ်ကင်း​ကြဘူး။ ညီအစ်ကို/မ​များစွာ​ဟာ အသည်းအသန် ဖျားနာ​ကြ​တယ်။ တချို့ကျတော့ ကိုယ်တိုင်​အသက်ကြီး​နေ​ပေ​မဲ့ သက်ကြီးရွယ်အို ဆွေမျိုး​တွေကို စောင့်ရှောက်​နေကြ​ရတယ်။ တချို့ကျတော့ ဇိမ်ခံပစ္စည်း​တွေအတွက် မဟုတ်ဘဲ မိသားစု​စားဝတ်နေရေး​အတွက် ပင်ပင်ပန်းပန်း ရုန်းကန်​နေကြတယ်။ တချို့​တွေမှာ​တော့ တစ်ချိန်​တည်း​မှာပဲ ပြဿနာ​မျိုးစုံ ရင်ဆိုင်​နေကြ​ရတယ်။ ဒီ​အတွက် အချိန်၊ စိတ်​ခွန်အား၊ ငွေကြေး​များစွာ စိုက်ထုတ်​ရတယ်။ ဒါပေမဲ့ ဘုရားသခင့် ကတိတော်​တွေကို အကြွင်းမဲ့ ယုံကြည်​ကြ​တယ်။ ပိုကောင်းတဲ့ အနာဂတ်​ရရှိမယ်​ဆိုတာ မ​ယိမ်း​မ​ယိုင် ယုံကြည်​ကြ​တယ်။ ယေဟော​ဝါ ဘယ်လောက် ကျေနပ်နှစ်သက်​လိုက်​လေ​မ​လဲ။

၂။ ဟေရှာယ ၄၀:၂၉ မှာ ဘယ်လို အားပေး​ထား​သလဲ။ ဒါပေမဲ့ ဘယ်​အမှား​ကြီး လုပ်မိ​နိုင်သလဲ။

^၂ ဒါပေမဲ့ ဖိစီးမှုတွေ​ဟာ ခံနိုင်​တာ​ထက် ကျော်လွန်​နေ​ပြီ​လို့ ခံစားရ​သလား။ သင်​တစ်ယောက်တည်း အဲဒီလို ခံစားရ​တာ မဟုတ်ပါဘူး။ ရှေးခေတ်​က သစ္စာရှိကျေးကျွန်​တွေလည်း ဆက်​မခံရပ်​နိုင်​တော့​ဘူးလို့ ခံစား​ခဲ့ကြ​ကြောင်း ကျမ်းစာမှာ ဖော်ပြထားတယ်။ (၁ ဘု. ၁၉:၄။ ယောဘ ၇:၇) ဒါပေမဲ့ လက်လျှော့​လိုက်​မယ့်အစား ခွန်အား​ရဖို့ ယေဟော​ဝါ​ကို ယုံကြည်​ကြ​တယ်။ ယေဟော​ဝါ​က ‘မောပန်း​သူ​ကို ခွန်အား​ပေး’ လို့ သူတို့ စိတ်မပျက်​ခဲ့​ကြဘူး။ (ဟေရှာ. ၄၀:၂၉) ဒီနေ့ ဘဝဖိစီးမှု​တွေကို ဖြေရှင်းဖို့  အကောင်းဆုံးနည်း​က ခဏလောက် ယေဟော​ဝါရဲ့ အမှု မဆောင်​ဘဲ​နေခြင်း​လို့ ဘုရား​လူမျိုး​တချို့ ယူဆကြ​တာ ဝမ်းနည်းစရာ​ပါပဲ။ အဲဒါက ခရစ်ယာန်လုပ်ငန်း​ဆောင်​တာ​တွေဟာ ကောင်းချီး​မဟုတ်ဘဲ ဝန်ထုပ်​ဆိုတဲ့​သဘော သက်ရောက်​တယ်။ ဒါကြောင့် ကျမ်းစာ မဖတ်​တော့ဘူး။ အသင်းတော် အစည်းအဝေး​တွေ မ​တက်​တော့ဘူး။ အမှုဆောင်လုပ်ငန်းမှာ မ​ပါဝင်​တော့ဘူး။ အဲဒီလိုပဲ စာတန် ဖြစ်စေ​ချင်​တယ်။

၃။ (က) ကျွန်တော်တို့ကို အားနည်း​စေဖို့​ဆိုတဲ့ စာတန့်​ရည်ရွယ်​ချက်ကို​ ဘယ်လို ပျက်ပြား​စေနိုင်​မ​လဲ။ (ခ) ဒီဆောင်းပါးမှာ ဘာ​အကြောင်း​ ဆွေးနွေးကြမလဲ။

^၃ ခရစ်ယာန်လုပ်ငန်း​ဆောင်​တာ​တွေမှာ အပြည့်အဝ ပါဝင်​တာ​က ခွန်အား​ရှိစေ​မှန်း စာတန် ကောင်းကောင်း သိထား​တယ်။ ကျွန်တော်တို့ ခွန်အား​ရှိ​မှာ​ကို စာတန် မလိုလား​ဘူး။ စိတ်ပန်းလူပန်း​ဖြစ်နေ​တယ်လို့ ခံစားရ​ချိန်မှာ ယေဟော​ဝါနဲ့ အဆက်​မ​ဖြတ်လိုက်​ပါနဲ့။ ခါတိုင်းထက် ဘုရား​သခင်​နဲ့ ရင်းနှီး​အောင်​လုပ်ပါ။ “ဘုရား​သခင်​က ခင်ဗျား​တို့​ကို မြဲမြံ​စေပြီး ခွန်အား​ရှိစေ​မယ်၊ ကြံ့ကြံ့ခံ ရပ်တည်​စေမယ်။” (၁ ပေ. ၅:၁၀။ ယာ. ၄:၈) ဘုရား​အမှုဆောင်​ရာမှာ အရှိန်​လျော့​သွား​စေနိုင်​တဲ့ အခြေအနေ​နှစ်ခု​နဲ့ ဖြေရှင်းဖို့ ကျမ်းစာ​အခြေခံ​မူတွေ​က ဘယ်လို ကူညီ​ပေးနိုင်​ကြောင်း ဒီဆောင်းပါးမှာ ဆွေးနွေးသုံးသပ်​ကြပါ​မယ်။ ဒါပေမဲ့ ဟေရှာယ ၄၀:၂၆-၃၁ မှာ​တွေ့ရတဲ့​အတိုင်း ယေဟော​ဝါရဲ့ ခွန်အား​ပေးနိုင်စွမ်း​ကို အရင် အာရုံစိုက်​ကြစို့။

၄။ ဟေရှာယ ၄၀:၂၆ က​နေ ဘာသင်ယူနိုင်သလဲ။

^၄ ဟေရှာယ ၄၀:၂၆ ကို ဖတ်ပါ။ စကြဝဠာ​မှာရှိတဲ့ ကြယ်​အားလုံးကို ဘယ်သူမှ မရေတွက်​နိုင်​ဘူး။ နဂါးငွေ့တန်း ဂလက်ဆီ​တစ်ခု​တည်း​မှာပဲ ကြယ်​ဘီလီယံ ၄၀​၀ ရှိ​နိုင်တယ်​လို့ သိပ္ပံပညာရှင်တွေ ယူဆကြတယ်။ ဒါပေမဲ့ ကြယ်​တစ်လုံး​စီ​ကို ယေဟော​ဝါ နာမည်​ပေးထားတယ်။ သင်ခန်းစာ​က ဘာလဲ။ သက်​မဲ့​ဖန်ဆင်းရာ​တွေကို​တောင် ယေဟော​ဝါ စိတ်ဝင်စား​တယ်ဆိုရင် တာဝန်​ရှိလို့ မဟုတ်ဘဲ ဘုရား​ကို ချစ်​လို့ အမှုဆောင်​နေကြ​တဲ့ သင်တို့​နဲ့ပတ်သက်ပြီး ဘယ်လို ခံစားရမယ်​ဆိုတာ စဉ်းစားကြည့်ပါ။ (ဆာ. ၁၉:၁၊ ၃၊ ၁၄) မေတ္တာရှင်​ဖခင်​က သင့်​အကြောင်း အသေးစိတ် သိတယ်။ “ခင်ဗျား​တို့ရဲ့ ဆံပင်​တွေကို​တောင် အကုန် ရေတွက်​ထားတယ်။” (မ. ၁၀:၃၀) “အပြစ်​ပြော​စရာ​မရှိ​သူတွေ ဘာတွေ ကြုံတွေ့​နေရမှန်း ယေဟော​ဝါ သိတယ်” လို့ ဆာလံဆရာ စိတ်ချ​စေတယ်။ (ဆာ. ၃၇:၁၈) သင်​ရင်ဆိုင်​နေရတဲ့ စမ်းသပ်မှု​တွေကို ဘုရား​သခင် သိတယ်။ စမ်းသပ်မှု​တစ်မျိုးစီ​ကို ခံရပ်နိုင်​ဖို့​လည်း ခွန်အား​ပေး​နိုင်ပါတယ်။

၅။ ကျွန်တော်တို့ကို ယေဟော​ဝါ ခွန်အား​ပေးနိုင်​မှန်း ဘယ်လို သိနိုင်​သလဲ။

^၅ ဟေရှာယ ၄၀:၂၈ ကိုဖတ်ပါ။ ယေဟော​ဝါဟာ ကြီးမား​လှတဲ့​စွမ်းအင်​ရဲ့ ပင်ရင်း ဖြစ်တယ်။ ဥပမာ၊ နေ​တစ်ခု​တည်း​မှာပဲ​ရှိတဲ့ စွမ်းအင်​ကို သုံးသပ်ကြည့်ပါ။ သိပ္ပံ​စာရေးဆရာ ဒေးဗစ် ဘို​ဒါ​နစ် ဒီလို​ရေး​တယ်– “တစ်စက္ကန့်​မှာ နေ​ပေါက်ကွဲအား​ဟာ [သန်း​ထောင်နဲ့​ချီတဲ့​အ​ဏုမြူ]​ ဗုံး​ရဲ့ ပေါက်ကွဲအား​နဲ့ ညီမျှ​တယ်။” “တစ်စက္ကန့်​အတွင်း ထုတ်လွှတ်​တဲ့ နေ​စွမ်းအင်​ဟာ လူသားတွေ​အတွက် နှစ်ပေါင်း ၂၀၀,၀၀၀ လုံလောက်​တယ်” လို့ သုတေသီ နောက်​တစ်ယောက်က တွက်ချက်​ထားတယ်။ နေကို “လောင်စာ” ဖြည့်ပေး​တဲ့​အရှင်​က ကျွန်တော်တို့ ရင်ဆိုင်​နေရတဲ့ ဘယ်​ပြဿနာ​ကို​မဆို ဖြေရှင်းဖို့ ခွန်အား​ပေး​နိုင်တယ် မဟုတ်လား။

၆။ ယေရှုရဲ့ ထမ်းပိုး​ဟာ ဘယ်လိုနည်းနဲ့ ထမ်း​ရလွယ်​သလဲ။ ဒီ​အချက်​က ကျွန်တော်တို့​အပေါ် ဘယ်လို အကျိုးသက်ရောက်​သလဲ။

^၆ ဟေရှာယ ၄၀:၂၉ ကိုဖတ်ပါ။ ယေဟော​ဝါ​အတွက် အမှုဆောင်​တာ​က ပျော်ရွှင်မှု များစွာ ခံစားရ​စေ​ပါတယ်။ တပည့်​တွေကို ယေရှု ဒီလို​ပြောခဲ့တယ်– “ကျွန်တော့်​ထမ်းပိုး​ကို ထမ်း” ပါ။ “ခင်ဗျား​တို့ လန်းဆန်း​ရ​လိမ့်မယ်။ ကျွန်တော့်​ထမ်းပိုး​ဟာ ထမ်း​လွယ်​တယ်။ ဝန်​လည်း ပေါ့​ပါတယ်။” (မ. ၁၁:၂၈-၃၀) အဲဒီ​စကား တကယ်​မှန်ပါတယ်။ တစ်ခါတလေ အသင်းတော်​အစည်းအဝေး တက်ဖို့၊ အမှုဆောင်​မှာ ပါဝင်ဖို့ အိမ်​က​နေ ထွက်လာ​တဲ့အခါ ပင်ပန်း​တယ်လို့ ခံစားရ​နိုင်တယ်။ ဒါပေမဲ့ အပြန်​မှာ ဘယ်လို ခံစားရ​သလဲ။ လန်းဆန်း​သွားတယ်။ ဘဝအခက်အခဲ​တွေကို ရင်ဆိုင်ဖြေရှင်း​ဖို့ ပို​အသင့်​ဖြစ်နေ​တယ်။ ယေရှုရဲ့ ထမ်းပိုး​ဟာ တကယ် ထမ်း​လွယ်​ပါတယ်။

၇။ မဿဲ ၁၁:၂၈-၃၀ မှန်ကန်ကြောင်း ဥပမာတစ်ခု ပြောပြ​ပါ။

 ^၇ ကေ​လာ​ဆိုတဲ့ ညီအစ်မ​ဟာ နာတာရှည် ပင်ပန်းနွမ်းနယ်​မှု၊ စိတ်ကျဝေဒနာ၊ ဆိုးရွား​တဲ့ ခေါင်းကိုက်​ဝေဒနာ​တွေ ခံစား​နေရတယ်။ ဒါကြောင့် တစ်ခါတလေ အသင်းတော် အစည်းအဝေး​တွေ တက်ဖို့ ခက်တယ်။ ဒါပေမဲ့ လူထု​အစည်းအဝေး​တစ်ခု ကြိုးစား​တက်​ပြီးတဲ့နောက် ဒီလိုပြောတယ်– “ဟောပြောချက်​က စိတ်ဓာတ်ကျ​မှုအကြောင်း​ပေါ့။ အကြောင်းအရာကို ထောက်ထားစာနာမှု​ရှိရှိ ဟောပြော​လို့ မျက်ရည်ကျ​ခဲ့တယ်။ အစည်းအဝေးတွေမှာ ရှိ​နေဖို့ လိုတယ်​ဆိုတဲ့ သတိပေးချက်​ပါပဲ။” အစည်းအဝေး တက်ဖို့ ကြိုးစား​အားထုတ်​ခဲ့လို့ ကေ​လာ တကယ်​ပျော်ရွှင်​ခဲ့ရတယ်။

၈၊ ၉။ “ကျွန်တော် အားနည်း​တဲ့အခါ အစွမ်း​ခွန်အား ပြည့်နေ” တယ်လို့ ရေးတဲ့​အခါ ပေါလု ဘာကို ဆိုလို​သလဲ။

^၈ ဟေရှာယ ၄၀:၃၀ ကိုဖတ်ပါ။ ဘယ်လောက်​ပဲ အရည်​အချင်း ရှိနေ​ပါစေ ကိုယ့်​အစွမ်း​ခွန်အား​နဲ့ မတတ်နိုင်​တာ​တွေ ရှိတယ်။ ဒါကို ကျွန်တော်တို့​အားလုံး သိထား​ရမယ်။ တမန်တော်​ပေါလုဟာ လူ​တော်​တစ်ယောက် ဖြစ်ပေမဲ့ ကန့်သတ်ချက်​တွေ ရှိနေ​လို့ လုပ်ချင်​တာ​အားလုံး မ​လုပ်နိုင်​ခဲ့ဘူး။ သူ့​စိုးရိမ်ပူပန်မှု​အကြောင်း ဘုရား​သခင်​ဆီ ပြောပြ​တော့ “မင်း အားနည်း​တဲ့အခါ ငါ့​တန်ခိုး အပြည့်အဝ ထင်ရှား” တယ်လို့ ဘုရား ပြန်ပြောတယ်။ ဒီအချက်ကို ပေါလု နားလည်​ခဲ့လို့ “ကျွန်တော် အားနည်း​တဲ့အခါ အစွမ်း​ခွန်အားပြ​ည့်​နေ” တယ်လို့ နိဂုံးချုပ်​ခဲ့တယ်။ (၂ ကော. ၁၂:၇-၁၀) ဘာကို ဆိုလို​သလဲ။

^၉ ဘုရားသခင့် အကူအညီ မပါ​ရင် အများကြီး မ​လုပ်နိုင်​ကြောင်း ပေါလု သဘောပေါက်​ခဲ့တယ်။ ပေါလု လို​နေတဲ့​အစွမ်း​ခွန်အားကို ဘုရားသခင့် သန့်ရှင်းသော စွမ်းအားတော်​က ဖြည့်ပေး​နိုင်ခဲ့တယ်။ ဒီ့​အပြင် ပေါလု​ရဲ့ အစွမ်း​ခွန်အား​နဲ့ မပြီးမြောက်​နိုင်တဲ့​တာဝန်တွေကို ပြီးမြောက်​အောင် ဘုရားသခင့် စွမ်းအားတော်​က ကူညီပေးတယ်။ ကျွန်တော်တို့​လည်း အလားတူ​ပါပဲ။ ယေဟော​ဝါ​ဆီက ခွန်အားရ​မယ်ဆိုရင် တကယ်​အားရှိ​ကြပါ​လိမ့်မယ်။

၁၀။ အခက်အခဲတွေကို ရင်ဆိုင်ဖြေရှင်း​ဖို့ ဒါဝိဒ်​ကို ယေဟော​ဝါ ဘယ်လို ကူညီ​ခဲ့​သလဲ။

^၁၀ ဆာလံဆရာ​ဒါဝိဒ်​လည်း ဘုရားသခင့် သန့်ရှင်း​သော​စွမ်းအားတော် တန်ခိုး​ကို မကြာခဏ တွေ့ကြုံ​ခံစား​ခဲ့ရတယ်။ “ကိုယ်တော့် အကူအညီ​ကြောင့် ဓားပြ​အုပ်စု​ကို ဖြို​ခွင်း​နိုင်ပြီ။ ဘုရား​သခင်​ပေးတဲ့ ခွန်အား​ကြောင့် မြို့ရိုး​ကို တက်​နိုင်ပြီ” လို့ သီဆိုခဲ့တယ်။ (ဆာ. ၁၈:၂၉) မြို့ရိုး​နဲ့​တူ​တဲ့ ပြဿနာ​တချို့ကို ကိုယ့်​အစွမ်း​ခွန်အား​နဲ့ မ​ကျော်​တက်​နိုင်​ဘူး။ ယေဟော​ဝါ ထောက်ပင့်​ပေးဖို့ လိုတယ်။

၁၁။ ပြဿနာ​တွေကို ဖြေရှင်း​ရာမှာ သန့်ရှင်းသော စွမ်းအားတော်​ရဲ့ ကဏ္ဍ​ကို ဖော်​ပြပါ။

^၁၁ ဟေရှာယ ၄၀:၃၁ ကိုဖတ်ပါ။ လင်းယုန်​ဟာ ကိုယ့်​အစွမ်းအစ​နဲ့ လေ​ပေါ်မှာ ပျံဝဲ​နေနိုင်​တာ မဟုတ်ဘူး။ လေ​နွေး​စီး​ကြောင်း​က ပင့်​တင်​ပေးတယ်။ စွမ်းအင် ချွေတာ​ဖို့ ကူညီပေးတယ်။ ဒါကြောင့် ခက်ခဲတဲ့​အလုပ်တာဝန် ရတဲ့​အခါ လင်းယုန်​ကို သတိရပါ။ “ကူညီ​သူ​ဖြစ်တဲ့ သန့်ရှင်းသော စွမ်းအားတော်” နဲ့ “ပင့်​တင်” ပေးဖို့ ယေဟော​ဝါ​ဆီ ဆုတောင်း​ပါ။ (ယော. ၁၄:၂၆) ဝမ်းသာစရာ​က​တော့ တစ်နေ့​ကို ၂၄ နာရီ လိုအပ်ချိန်​တိုင်း ဆက်သွယ်​နိုင်တယ်။ အသင်းတော်​မှာ တစ်ယောက်ယောက်နဲ့ သဘောထား​ကွဲလွဲ​တဲ့အခါ ဘုရား​အကူအညီ လိုအပ်တယ်​လို့ ခံစား​မိ​နိုင်တယ်။ ဒါပေမဲ့ ဘာကြောင့် အဲဒီလို သဘာထား​ကွဲလွဲ​ရတာလဲ။

၁၂၊ ၁၃။ (က) ခရစ်ယာန်​တွေ​ကြားမှာ စိတ်ဝမ်းကွဲမှု​တွေ ဘာကြောင့် ပေါ်လာ​နိုင်သလဲ။ (ခ) ယောသပ်​မှတ်တမ်း​က ယေဟော​ဝါ​အကြောင်း ဘာသင်ပေးသလဲ။

^၁၂ ကျွန်တော်တို့​အားလုံး မစုံလင်​ကြ​လို့ စိတ်ဝမ်းကွဲ​ပြားနိုင်တယ်။​ ယုံကြည်သူချင်း​တစ်ယောက်​ရဲ့ အပြုအမူ၊ အပြောအဆို​ကြောင့် စိတ်ဆိုး​မိ​နိုင်သလို ကိုယ့်​ကြောင့်​လည်း တခြား​သူတွေ စိတ်ဆိုး​နိုင်တယ်။ ဒါဟာ စမ်းသပ်မှုကြီး​ ဖြစ်နိုင်တယ်။ ဒါပေမဲ့ ဆက်ကပ်​အပ်နှံ​ထားတဲ့ ညီအစ်​ကို/မ​တွေနဲ့ စည်းစည်းလုံးလုံး လုပ်ဆောင်​ဖို့ သင်ယူခြင်း​အားဖြင့် ကျွန်တော်တို့ရဲ့ သမာဓိ​ကို သက်သေထူ​ခွင့် ယေဟော​ဝါ ပေးထားတယ်။ မစုံလင်​တဲ့ ညီအစ်ကို/မတွေကို ယေဟော​ဝါ ချစ်​သလို ကျွန်တော်တို့​လည်း ချစ်ရမယ်။

^၁၃ ယေဟော​ဝါ​က မိမိ​ကျေးကျွန်​တွေ စမ်းသပ်​မခံ​ရဖို့ မကာကွယ်​ပေး​မှန်း ယောသပ်​မှတ်တမ်းကနေ သိနိုင်တယ်။  လူငယ်​ယောသပ်​ဟာ မနာလို​ဖြစ်နေ​တဲ့ ဖ​တူ​မိ​ကွဲ ညီအစ်ကို​တွေရဲ့ ရောင်းစား​ခြင်း ခံရပြီး အီဂျစ်ပြည် ရောက်​သွားတယ်။ (က. ၃၇:၂၈) အဖြစ်အပျက်​ကို ယေဟော​ဝါ မြင်​တယ်။ ဖြောင့်မတ်​တဲ့​မိတ်ဆွေ ယောသပ် အဲဒီလို ဆက်ဆံခံရ​လို့ ယေဟော​ဝါ ဝမ်းနည်း​မှာ သေချာ​တယ်။ ဒါပေ​မဲ့ ကြား​မဝင်​ခဲ့ဘူး။ နောက်ပိုင်း ပေါတိဖာ​ရဲ့ မယား​ကို မတရား​ပြုကျင့်​ဖို့ ကြံစည်​တယ်လို့ စွပ်စွဲ​ခံရပြီး ထောင်ချ​ခံရ​ချိန်​မှာလည်း ကြား​မဝင်​ခဲ့ဘူး။ ယောသပ်​ကို ဘုရား​သခင် စွန့်​လိုက်​ပြီ​လား။ မစွန့်​ပါဘူး။ “[ယောသပ်] လုပ်​သမျှကို ယေဟော​ဝါ အောင်မြင်​ခွင့် ပေး” ခဲ့တယ်။—က. ၃၉:၂၁-၂၃။

၁၄။ အမျက် ‘မ​ထွက်​ခြင်း’ ကြောင့် ဘုရားရေးရာ​ပိုင်း၊ ကာယပိုင်း​မှာ ဘယ်လို​အကျိုး​တွေ ရရှိ​နိုင်သလဲ။

^၁၄ နောက်ထပ်​ဥပမာတစ်ခု ရှိသေးတယ်။ ဒါဝိဒ်လို ဆိုးဆိုး​ရွားရွား ဆက်ဆံခံရသူ ရှား​ပါတယ်။ ဒါပေမဲ့ ဘုရားရဲ့ မိတ်ဆွေ ဒါဝိဒ်ဟာ နာကြည်းစိတ်​ကြောင့် ဘုရား​နဲ့ ဝေးကွာ​မသွား​ခဲ့ဘူး။ “အမျက်မထွက်​နဲ့။ ဒေါသူပုန်​မ​ထ​နဲ့။ စိတ်မပျက်​ပါနဲ့။ မ​ကောင်းမှု​တွေ မ​လုပ်​နဲ့” လို့ ရေးခဲ့တယ်။ (ဆာ. ၃၇:၈) အမျက် “မ​ထွက်” ဖို့ အဓိက​အကြောင်းရင်း​က​တော့ “ငါ​တို့​ကို အပြစ်​ရှိတဲ့​အလျောက် ဒဏ်​မပေး” တဲ့ ယေဟော​ဝါ​ကို တုပ​ဖို့​ပဲ။ (ဆာ. ၁၀၃:၁၀) အမျက် ‘မထွက်​ခြင်း’ က ကောင်းကျိုးတွေ​လည်း ခံစားရ​စေတယ်။ အမျက်ဒေါသ​က သွေး​တိုး​ဝေဒနာ၊ အသက်ရှူ​လမ်းကြောင်း​ပြဿနာတွေ ဖြစ်စေ​နိုင်တယ်။ အသည်း၊ ပန်ကရိယ၊ အစာ​ခြေ​စနစ်​ကို ထိခိုက်​နိုင်တယ်။ ဒေါသထွက်​လာတဲ့အခါ ရှင်းရှင်းလင်းလင်း မစဉ်းစားနိုင်​တော့ဘူး။ တစ်ခါ​တလေ ဒေါသထွက်​ပြီးရင် အကြာကြီး စိတ်ဓာတ်ကျ​တာမျိုး ဖြစ်နိုင်တယ်။ ဒါပေမဲ့ “တည်ငြိမ်​တဲ့​စိတ်​ဟာ ကိုယ်ခန္ဓာ​ကို ကျန်းမာ​စေတယ်” လို့ ကျမ်းစာမှာ ဆိုထား​တယ်။ (ပညာ. ၁၄:၃၀) ဒါဆိုရင် စိတ်ထိခိုက်​စရာ​တွေကို ဘယ်လို ဖြေရှင်း​နိုင်မလဲ။ ညီအစ်ကို​နဲ့ ဘယ်လို ပြန်သင့်မြတ်​နိုင်မလဲ။ ကျမ်းစာပါ ပညာရှိ​အကြံဉာဏ်​ကို လိုက်နာခြင်း​အားဖြင့် အောင်မြင်​နိုင်ပါတယ်။

၁၅၊ ၁၆။ ကိုယ့်ကို စိတ်ဆိုး​အောင်​လုပ်​တဲ့​သူ​ဆီ ဘယ်လို ချဉ်းကပ်​သင့်သလဲ။

^၁၅ ဧဖက် ၄:၂၆ ကိုဖတ်ပါ။ လောကရဲ့ ကြမ်းကြမ်းတမ်းတမ်း ဆက်ဆံမှု ခံရ​လို့ ကျွန်တော်တို့ မအံ့ဩ​ကြဘူး။ ဒါပေမဲ့ ယုံကြည်သူချင်း​တစ်ယောက်၊ မိသားစုဝင်​တစ်ယောက် ကျွန်တော်တို့ကို ထိခိုက်အောင် ပြောဆို​ပြုမူ​တဲ့အခါ စိတ်ပျက်​သွား​နိုင်တယ်။ အဖြစ်အပျက်​ကို လွယ်လွယ်​နဲ့ မမေ့နိုင်​ဘူး ဆိုပါစို့။ နှစ်​နဲ့​ချီ နာကြည်း​နေ​မလား။ ကျမ်းစာပါ ပညာရှိ​အကြံဉာဏ်​ကို လိုက်လျှောက်ပြီး ချက်ချင်း ဖြေရှင်း​ကြ​မလား။ အခြေအနေကို မဖြေရှင်း​ဘဲ​ထား​လေ ညီအစ်ကို​နဲ့ သင့်မြတ်​ဖို့ ပို​ခက်​လေ​ပဲ။

^၁၆ ညီအစ်ကို​တစ်ယောက်​ကြောင့် စိတ်ဆိုး​ပြီး မမေ့နိုင်​ဘူး ဆိုပါစို့။ သင့်မြတ်​ဖို့ ဘာတွေ လုပ်​နိုင်သလဲ။ ပထမ၊ ယေဟော​ဝါ​ဆီ ထက်ထက်သန်သန် ဆုတောင်း​ပါ။​ ညီအစ်ကို​နဲ့ တည်ဆောက်မှု​ဖြစ်စေ​မယ့်​စကား ပြောနိုင်​ဖို့ အကူအညီ တောင်း​ပါ။ ညီအစ်ကို​လည်း ယေဟော​ဝါရဲ့ မိတ်ဆွေ​ဖြစ်ကြောင်း သတိရပါ။ (ဆာ. ၂၅:၁၄) သူ့ကို  ဘုရား​သခင် ချစ်​တယ်။ ယေဟော​ဝါ​က မိတ်ဆွေတွေ​ကို ကြင်ကြင်နာနာ ဆက်ဆံ​တယ်။ ကျွန်တော်တို့​လည်း အဲဒီလို ဆက်ဆံ​ဖို့ ယေဟော​ဝါ မျှော်လင့်​တယ်။ (ပညာ. ၁၅:၂၃။ မ. ၇:၁၂။ ကော. ၄:၆) ဒုတိယ၊ ဘာ​ပြော​မ​လဲ​ဆိုတာ​ကို သေသေချာချာ စဉ်းစားထားပါ။ ညီအစ်ကို​က သင့်ကို တမင်​ထိခိုက်အောင် လုပ်တယ်​လို့ မယူဆ​ပါနဲ့။ အထင်လွဲ​တာ ဖြစ်နိုင်တယ်။ ပြဿနာ​ဖြစ်​ရတာ ကိုယ့်​ကြောင့်​လည်း ဖြစ်နိုင်တယ်​ဆိုတာ​ကို ဝန်ခံ​ပါ။ ဒီလို​စပြော​နိုင်တယ်– “ကျွန်တော် အကဲဆတ်​လွန်း​တာ​လည်း ဖြစ်နိုင်တယ်။ ဒါပေမဲ့ မ​နေ့​က ခင်ဗျား ပြောလိုက်တဲ့​စကား​ကြောင့် ကျွန်တော် . . . ခံစားရ​တယ်။” ဆွေးနွေးမှု​ဟာ ထင်ထားသလို ဖြစ်မလာ​ရင် သင့်မြတ်​ဖို့ ဆက်ကြိုးစား​ပါ။ အဲဒီ​အချိန်​အတောအတွင်း ညီအစ်ကို​အတွက် ဆုတောင်း​ပေးပါ။ သူ့ကို ကောင်းချီး​ပေးဖို့ ယေဟော​ဝါ​ဆီ ဆုတောင်း​ပါ။ ညီအစ်ကို​ရဲ့ အရည်အသွေးကောင်း​တွေကို အာရုံစိုက်​နိုင်အောင် ကူညီပေးဖို့ ဆုတောင်း​ပါ။ ဘာ​ရလဒ်​ပဲ ထွက်လာ​ပါစေ ဘုရားသခင့် မိတ်ဆွေ၊ ကိုယ့်​ညီအစ်ကို​ကို ပြန်​ရဖို့ စိတ်ရင်းမှန်နဲ့ ကြိုးစား​တာကို ယေဟော​ဝါ ကောင်းချီး​ပေးမယ်​ဆိုတာ စိတ်ချ​ပါ။

၁၇။ အပြစ်ကျူးလွန်​တဲ့အခါ ခွင့်လွှတ်ခံရ​ဖို့ ယေဟော​ဝါ ဘယ်​နည်းနဲ့ ကူညီ​ပေးနိုင်သလဲ။ အဲဒီ​အကူအညီ​ကို ဘာကြောင့် လက်ခံသင့်​သလဲ။

^၁၇ ကြီးလေး​တဲ့​အပြစ် ကျူးလွန်​ခဲ့လို့ ယေဟော​ဝါရဲ့​အမှု မ​ဆောင်​ထိုက်​ဘူးလို့ တချို့ ခံစား​ကြ​တယ်။ အပြစ်ရှိ​တယ်​ဆိုတဲ့​ခံစားချက်​ကြောင့် မပျော်​မ​ရွှင်​နဲ့ ခွန်အားဆုတ်ယုတ်​နိုင်​တယ်။ အပြစ်​ကြောင့် စိတ်ဆင်းရဲ​နေတဲ့ ဘုရင်​ဒါဝိဒ်​က “အပြစ်​ကို ဝန်မခံ​ဘဲ နှုတ်ပိတ်​နေတဲ့​အခါ တစ်နေ့​လုံး ညည်းတွား​နေရတဲ့အတွက် အရိုး​တွေ ဆွေး​မြ​ည့်​ကုန်​တယ်။ နေ့ရောညပါ လက်တော်​နဲ့ ပိနေ​လို့ ကျွန်တော့်​မှာ လေး​လိုက်တာ” လို့ရေးခဲ့တယ်။ ဝမ်းသာစရာ​က​တော့ ယေဟော​ဝါ လုပ်​စေချင်​တဲ့​အတိုင်း ဒါဝိဒ် လုပ်​ခဲ့တယ်။ “နောက်ဆုံး​တော့ အပြစ်​ကို ဝန်ချ တောင်းပန်​ရ​ပါတယ်၊” “အမှားတွေ၊ အပြစ်​တွေကို ကိုယ်တော် ခွင့်လွှတ်​ပေးတယ်” လို့ ရေးခဲ့တယ်။ (ဆာ. ၃၂:၃-၅) သင် ကြီးလေး​တဲ့​အပြစ် ကျူးလွန်​ထားတယ်​ဆိုရင် ယေဟော​ဝါ ခွင့်လွှတ်​ဖို့ အသင့်​ရှိတယ်။ ဘုရား​နဲ့ ဆက်ဆံရေး ပြန်ကောင်း​အောင် ကူညီပေး​ချင်​တယ်။ ဒါပေမဲ့ အသင်းတော်​ကတစ်ဆင့် ပြင်ဆင်​ပေးတဲ့ အကူအညီ​ကိုတော့ လက်ခံ​ရမယ်။ (ပညာ. ၂၄:၁၆။ ယာ. ၅:၁၃-၁၅) သင့်​ထာဝရ​အနာဂတ် အရေး​ဖြစ်လို့ မနှောင့်နှေးပါနဲ့။ ဒါပေမဲ့ အပြစ်​ခွင့်လွှတ်ခံရ​တာ အတော်ကြာ​ပြီး​တာတောင် အတိတ်​က အပြစ်​ကြောင့် စိတ်ဆင်းရဲ​နေတုန်းပဲ​ဆိုရင်ကော။

၁၈။ မ​ထိုက်တန်​ဘူးလို့ ခံစား​နေရတဲ့​သူတွေကို ပေါလု​ရဲ့ ပုံသက်သေ​က ဘယ်လို ကူညီ​ပေးနိုင်သလဲ။

^၁၈ အတိတ်​က လုပ်ရပ်မှား​တွေကြောင့် တမန်တော်​ပေါလု​လည်း စိတ်ဆင်းရဲ​တဲ့​အချိန်တွေ ရှိခဲ့တယ်။ “ကျွန်တော်ဟာ တမန်တော်​တွေ​ထဲမှာ အရေးမပါ​ဆုံး​သူ​ပါ၊ ဘုရားသခင်ရဲ့ အသင်းတော်​ကို ညှဉ်းဆဲ​ခဲ့လို့ တမန်တော်​လို့တောင် အခေါ်​မခံထိုက်​ဘူး” လို့ အသိအမှတ်ပြု​ခဲ့တယ်။ ဒါပေမဲ့ “ဘုရားသခင်ရဲ့ မဟာ​ကရုဏာ​ကြောင့် ဒီတာဝန်​ကို အခုလို ကျွန်တော် ထမ်းဆောင်​နိုင်တာ​ပါ” လို့ ဆက်ပြော​ခဲ့တယ်။ (၁ ကော. ၁၅:၉၊ ၁၀) မှား​ခဲ့​ပေ​မဲ့ ပေါလု​ကို ယေဟော​ဝါ လက်ခံ​ခဲ့တယ်။ အဲဒါကို ဘုရားက သိစေချင်​တယ်။ အတိတ်​က အမှား​အတွက် တကယ်​နောင်တ​ရ​ပြီး လိုအပ်​သလို ဝန်ခံ​ပြီးပြီ​ဆိုရင် ယေဟော​ဝါ ကရုဏာ​ပြ​မယ်​ဆိုတာ စိတ်ချ​နိုင်ပါတယ်။ ဒါကြောင့် ယေဟော​ဝါ​စကားကို ယုံကြည်​ပါ။ ခွင့်လွှတ်​တာကို လက်ခံ​ပါ။—ဟေရှာ. ၅၅:၆၊ ၇။

၁၉။ ၂၀၁၈ ခုနှစ်​အတွက် နှစ်ချုပ်ကျမ်းချက်​က ဘာလဲ။ ဘာကြောင့် သင့်တော်​သလဲ။

^၁၉ ဒီ​စနစ် ကုန်ဆုံး​ခါနီး​လာ​တာနဲ့​အမျှ ဘဝဖိစီးမှု​တွေ တိုးများလာ​နိုင်တယ်။ ဒါပေမဲ့ ‘မောပန်း​သူ​ကို ခွန်အား’ ပေးတဲ့​အရှင်၊ ‘အားအင်မရှိ​သူ​ကို အားပြည့်​စေ’ တဲ့​အရှင်​က သင် ဆက်​အမှုဆောင်​နိုင်အောင် ဘာ​မဆို ကူညီ​ပေးနိုင်​ကြောင်း စိတ်ချ​ပါ။ (ဟေရှာ. ၄၀:၂၉။ ဆာ. ၅၅:၂၂။ ၆၈:၁၉) ၂၀၁၈ ခုနှစ်​အတွင်း နိုင်ငံ​တော်​ခန်းမ​မှာ အစည်းအဝေး တက်​တိုင်း ဒီ​အရေးကြီးတဲ့​အမှန်တရားကို သတိရ​နေကြ​ပါလိမ့်မယ်။ နှစ်ချုပ်ကျမ်းချက်​က ‘ယေဟော​ဝါ​ကို မျှော်လင့်​တဲ့​သူတွေက​ ခွန်အား ပြန်​ပြည့်​လာ​လိမ့်မယ်’ ဖြစ်ပါတယ်။—ဟေရှာ. ၄၀:၃၁။