၁။ ယောသပ် ဘာစမ်းသပ်မှု ကြုံရသလဲ။ ဘယ်လို တုံ့ပြန်သလဲ။

 ယာကုပ်​ရဲ့ သား ယောသပ်ဟာ ခက်ခဲတဲ့ စမ်းသပ်မှု ကြုံခဲ့ရ​တယ်။ “ဒို့နဲ့အတူ အိပ်ပါ” လို့ အမျိုးသမီး​တစ်ယောက် ပြောတယ်။ အဲဒီ​အမျိုးသမီးက သခင် ပေါတိဖာ​ရဲ့ ဇနီး။ သွေးဆောင်မှု​ကို ယောသပ် ငြင်းတယ်။ ‘ယောသပ် ဘာကြောင့် ငြင်းတာပါလိမ့်’ လို့ ဒီနေ့ခေတ် လူ​တချို့ တွေးမိ​မယ်။ အိမ်မှာ ပေါတိဖာ မရှိဘူး။ ပြီးတော့ ယောသပ်​က ကျွန်​တစ်ယောက်။ သခင်မ အလိုကိုသာ မလိုက်ရင် ဒုက္ခရောက်အောင် သခင်မ လုပ်ပစ်နိုင်တယ်။ ဒါနဲ့တောင် အကျင့်ပျက်ဖို့ သွေးဆောင်တာကို ယောသပ် တောက်လျှောက် ငြင်းတယ်။ ဘာကြောင့်လဲ။ “ဒီလို​ကြီးလေးတဲ့​အပြစ် ကျူးလွန်ပြီး ဘုရားသခင်ကို ပြစ်မှားတဲ့​အဖြစ်မျိုး ကျွန်တော် အရောက်မခံနိုင်ဘူး” လို့ ပြောတယ်။—က. ၃၉:၇-၁၂။

၂။ အိမ်ထောင်ရေး ဖောက်ပြန်တာ ဘုရားကို ပြစ်မှားရာရောက်မှန်း ယောသပ် ဘယ်လို သိသလဲ။

^၂ အိမ်ထောင်ရေး ဖောက်ပြန်မှု​ကို “ကြီးလေးတဲ့​အပြစ်” လို့ ဘုရား ယူမှတ်မှန်း ယောသပ် ဘယ်လို သိသလဲ။ “အိမ်ထောင်ရေး မဖောက်ပြန်နဲ့” ဆိုတဲ့ ရှင်းလင်းတဲ့ ညွှန်ကြားချက် ပါဝင်တဲ့ မောရှေ​ပညတ်​ကို နောက်နှစ်ပေါင်း နှစ်ရာလောက်မှ အစ္စရေးတွေ ရတာ။ (ထွ. ၂၀:၁၄) ဒါပေမဲ့ အိမ်ထောင်ရေး ဖောက်ပြန်မှု​ကို ယေဟောဝါ​ဘုရား မကြိုက်လောက်ဘူးဆိုတာ သိနေတဲ့​အထိ ဘုရားအကြောင်း ယောသပ် ကောင်းကောင်း သိထားတယ်။ ဥပမာ၊ အိမ်ထောင်ရေး​ဟာ အမျိုးသား​တစ်ယောက်နဲ့ အမျိုးသမီး​တစ်ယောက်​အတွက်ပဲ ယေဟောဝါ ရည်ရွယ်မှန်း ယောသပ် သိမှာ သေချာတယ်။ ဘေးမ စာရာ​ရဲ့ အရှက်​သိက္ခာ​ကို နှစ်ကြိမ်​တိုင်တိုင် ယေဟောဝါ ကာကွယ်ပေးခဲ့ကြောင်း၊ အိဇက်ရဲ့ ဇနီး ရေဗက္ကာကိုလည်း ကာကွယ်ပေးခဲ့ကြောင်း ယောသပ် ကြားဖူး​မှာ​ပဲ။ (က. ၂:၂၄။ ၁၂:၁၄-၂၀။ ၂၀:၂-၇။ ၂၆:၆-၁၁) ဒီအကြောင်းတွေ စဉ်းစားလိုက်တဲ့အခါ ဘုရား​အမြင်မှာ ဘယ်ဟာ မှန်တယ်၊  မှားတယ်ဆိုတာ ယောသပ် သဘောပေါက်​လာတယ်။ ယေဟောဝါ​ဘုရားနဲ့ ဘုရားရဲ့ ဖြောင့်မတ်တဲ့ စံနှုန်းတွေကို ချစ်မြတ်နိုးတဲ့အတွက် ဖြောင့်မှန်တာကို လုပ်ဖို့ ဆုံးဖြတ်​ထားတယ်။

၃။ ဒီဆောင်းပါးမှာ ဘာအကြောင်း ဆွေးနွေးကြမလဲ။

^၃ ဖြောင့်မတ်မှုကို သင် မြတ်နိုးသလား။ မြတ်နိုး​မှာ သေချာတယ်။ ဒါပေမဲ့ ကျွန်တော်တို့​အားလုံး မစုံလင်ကြလို့ သတိမထားရင် ဖြောင့်မတ်ခြင်းနဲ့​ပတ်သက်တဲ့ လောက​အမြင် အလွယ်တကူ လွှမ်းမိုး​လာနိုင်တယ်။ (ဟေရှာ. ၅:၂၀။ ရော. ၁၂:၂) ဒါကြောင့် ဖြောင့်မတ်မှုဆိုတာ ဘာလဲ၊ ဖြောင့်မတ်မှုကို မြတ်နိုး​ရင် ဘာအကျိုးရမလဲ​ဆိုတာ သုံးသပ်ကြ​မယ်။ ယေဟောဝါရဲ့ စံနှုန်းတွေကို ပိုမြတ်နိုးတတ်လာအောင် ကူညီပေးမယ့် အဆင့် သုံးဆင့်ကိုလည်း ဆွေးနွေးပါမယ်။

၄။ ဖြောင့်မတ်မှုနဲ့ပတ်သက်ပြီး ဘယ်လို မှားယွင်းစွာ ရှုမြင်​နေ​ကြသလဲ။

^၄ လူဖြောင့်လူမှန်ဆိုတာ ကိုယ့်ကိုယ်ကိုယ် ဖြောင့်မတ်တယ်လို့ သတ်မှတ်ပြီး ဘဝင်ခိုက်​နေ​သူ၊ တခြားသူတွေကို ဝေဖန်တတ်သူလို့ လူ​များစွာ ထင်တတ်ကြတယ်။ ဒါပေမဲ့ အဲဒီ​အရည်အသွေးတွေကို ဘုရား လုံးဝ မကြိုက်ဘူး။ ဖြောင့်မတ်တယ်လို့ အထင်ခံရအောင် လုပ်ပြတတ်တဲ့ ဘာသာရေး ခေါင်းဆောင်တွေကို ယေရှု မြေကြီးပေါ် ရှိစဉ် ပြင်းပြင်းထန်ထန် အပြစ်တင်​တယ်။ (ဒေ. ၇:၁၆။ လု. ၁၆:၁၅) ကိုယ့်ကိုယ်ကိုယ် ဖြောင့်မတ်တယ်လို့ သတ်မှတ်တာ စစ်မှန်တဲ့ ဖြောင့်မတ်မှု မဟုတ်ဘူး။

၅။ ကျမ်းစာအရ ဖြောင့်မတ်မှုဆိုတာ ဘာလဲ။ ဥပမာ​ပေးပါ။

^၅ ဖြောင့်မတ်မှုဟာ အရည်အသွေးကောင်း​တစ်ခု​ပါ။ ယေဟောဝါ​ဘုရားရဲ့ အမြင်မှာ မှန်ရာ လုပ်ဆောင်ခြင်း​ကို ဆိုလိုတယ်။ ကျမ်းစာမှာ “ဖြောင့်မတ်ခြင်း” ဆိုတဲ့ စကားလုံးဟာ ယေဟောဝါရဲ့ အမြင့်မားဆုံး စံနှုန်းတွေနဲ့​အညီ နေထိုင်ခြင်း​ကို ဆိုလိုတယ်။ ဥပမာ၊ “မှန်ကန်​တဲ့ အလေး” သုံးဖို့ ကုန်သည်တွေကို ယေဟောဝါ မိန့်မှာတယ်။ (တရား. ၂၅:၁၅) “မှန်ကန်” လို့ ပြန်ဆို​ထားတဲ့ မူရင်း ဟီဘရူး စကားလုံးကို “ဖြောင့်မှန်” လို့လည်း ပြန်ဆို​နိုင်တယ်။ ဘုရား​အမြင်မှာ ဖြောင့်မှန်တာကို လုပ်ချင်တဲ့ ခရစ်ယာန်တွေဟာ စီးပွားရေး ကိစ္စ​အားလုံးမှာ အကြွင်းမဲ့ ရိုးသား​ဖြောင့်မှန်တယ်။ တရားမျှတမှုကို မြတ်နိုးတယ်။ တစ်ယောက်ယောက် မမျှမတ ဆက်ဆံခံရ​တာကို ကြည့်မနေနိုင်ဘူး။ “ယေဟောဝါရဲ့ နှစ်​သက်​လက်ခံမှုကို အပြည့်အဝ ရရှိ” ချင်လို့ ကိုယ့်​ဆုံးဖြတ်ချက်တွေကို ဘုရား ဘယ်လို သဘောထားမလဲဆိုတာ ထည့်တွက်တယ်။—ကော. ၁:၁၀။

၆။ ယေဟောဝါရဲ့ အမှားအမှန်​စံနှုန်းတွေကို ဘာကြောင့် စိတ်ချနိုင်သလဲ။ (ဟေရှာယ ၅၅:၈၊ ၉)

^၆ ကျမ်းစာမှာ ယေဟောဝါကို ဖြောင့်မတ်မှုရဲ့ ရင်းမြစ်၊ “ဖြောင့်မတ်ခြင်း တည်ရာ” လို့ ခေါ်ထား​တယ်။ (ယေ. ၅၀:၇) ဖန်ဆင်း​ရှင် ဖြစ်လို့ ယေဟောဝါသာ အမှားအမှန်​စံနှုန်းတွေ ချပိုင်ခွင့် ရှိတယ်။ ကျွန်တော်တို့ဟာ မစုံလင်တဲ့ အပြစ်သားတွေ ဖြစ်လို့ ပြည့်ဝစုံလင်တဲ့ ယေဟောဝါရဲ့ အမှားအမှန်​စံနှုန်းတွေကို အပြည့်အဝ နားမလည်​တဲ့​အချိန်တွေ ရှိနိုင်တယ်။ (ပညာ. ၁၄:၁၂။ ဟေရှာယ ၅၅:၈၊ ၉ ကို ဖတ်ပါ။) ဒါပေမဲ့ ဘုရားရဲ့ ပုံသဏ္ဌာန်​အတိုင်း ဖန်ဆင်းခံထားရလို့ ဘုရားရဲ့ ဖြောင့်မတ်တဲ့ စံနှုန်းတွေအတိုင်း နေထိုင်​နိုင်တယ်။ (က. ၁:၂၇) နေလည်း နေထိုင်ချင်ကြတယ်။ ဘုရားကို ချစ်လို့ အတတ်နိုင်ဆုံး အတုယူ​ကြတယ်။—ဧ. ၅:၁။

၇။ ယုံကြည်​စိတ်ချထိုက်တဲ့ စံနှုန်းတွေ ဘာကြောင့် လိုအပ်သလဲ။ ဥပမာ ပေးပါ။

^၇ ယေဟောဝါရဲ့ အမှားအမှန်​စံနှုန်းတွေအတိုင်း နေထိုင်​လို့ ကျွန်တော်တို့ အကျိုးရကြတယ်။ ဘာကြောင့်လဲ။ စဉ်းစားကြည့်ပါ– ဘဏ်တိုင်းကသာ ငွေကြေး​တန်ဖိုးကို ကိုယ့်​စံနှုန်းနဲ့​ကိုယ် သတ်မှတ်နေကြရင်၊ ဆောက်လုပ်ရေး ကုမ္ပဏီတိုင်းကသာ အတိုင်းအတာတွေ​ကို ကိုယ့်​စံနှုန်းနဲ့​ကိုယ် သတ်မှတ်နေကြရင် ဘာတွေ ဖြစ်ကုန်မလဲ။ ပရမ်းပတာ ဖြစ်ကုန်မှာပေါ့။ သတ်မှတ်​ထားတဲ့ ဆေးကုသမှု စံနှုန်းကို ဆရာဝန်တွေ၊ သူနာပြုတွေ မလိုက်နာရင် လူနာတွေ အသက်ဆုံးရှုံး​နိုင်တယ်။ ယုံကြည်​စိတ်ချထိုက်တဲ့ စံနှုန်းတွေဟာ အကာအကွယ် ဖြစ်မှန်း ရှင်းနေပါတယ်။ အလားတူပဲ၊ ဘုရားရဲ့ အမှားအမှန်​စံနှုန်းတွေ​က ကျွန်တော်တို့ကို ကာကွယ်ပေးတယ်။

၈။ ဖြောင့်မှန်တာကို လုပ်​ချင်သူတွေအတွက် ဘာကောင်းချီးတွေ စောင့်ကြိုနေသလဲ။

 ^၈ ယေဟောဝါ​က မိမိ​စံနှုန်းတွေအတိုင်း နေထိုင်ဖို့ ကြိုးစား​သူ​တွေ​ကို ကောင်းချီးပေးတယ်။ “ဖြောင့်မတ်သူတွေဟာ ကမ္ဘာမြေကို ပိုင်ဆိုင်ပြီး ထာဝစဉ် နေထိုင်​ရလိမ့်မယ်” လို့ ကတိပေးတယ်။ (ဆာ. ၃၇:၂၉) ယေဟောဝါရဲ့ စံနှုန်းတွေကို လူတိုင်း လိုက်နာ​တဲ့​အချိန်​ရောက်ရင် ဘယ်လောက် စည်းလုံး၊ ငြိမ်သက်၊ ပျော်ရွှင်​မယ်​ဆိုတာ မြင်ယောင်​ကြည့်ပါ။ အဲဒီလိုအသက်တာမျိုး ကျွန်တော်တို့ကို ယေဟောဝါ ရစေချင်တယ်။ ဖြောင့်မတ်မှုကို မြတ်နိုး​ဖို့ အကြောင်းကောင်းတွေ တကယ် ရှိပါတယ်။ ဘယ်လိုနည်းနဲ့ ဖြောင့်မတ်မှုကို ပိုမြတ်နိုးတတ်လာမလဲ။ အဆင့် သုံးဆင့်ကို သုံးသပ်ကြရအောင်။

၉။ ဖြောင့်မတ်မှုကို ချစ်မြတ်နိုး​ဖို့ ဘာက ကူညီပေးမလဲ။

^၉ အဆင့် ၁။ စံနှုန်း ချမှတ်ပေးရှင်ကို ချစ်ပါ။ ဖြောင့်မတ်မှုကို ချစ်မြတ်နိုး​ဖို့​ဆိုရင် အမှားအမှန်​စံနှုန်း ချမှတ်​ပေးတဲ့​အရှင်ကို ချစ်မြတ်နိုးစိတ် တိုးများ​နေ​ရမယ်။ ယေဟောဝါကို ချစ်လေ ဘုရားရဲ့ ဖြောင့်မတ်တဲ့ စံနှုန်းတွေအတိုင်း နေထိုင်ချင်လာလေပဲ။ စဉ်းစားကြည့်ပါ– အာဒံနဲ့ ဧဝသာ ယေဟောဝါကို ချစ်ရင် ဘုရား​ပညတ်​ကို ချိုးဖောက်ခဲ့မှာ မဟုတ်ဘူး။—က. ၃:၁-၆၊ ၁၆-၁၉။

၁၀။ ယေဟောဝါအကြောင်း ပိုသိအောင် အာဗြဟံ ဘာလုပ်သလဲ။

^၁၀ အာဒံနဲ့ ဧဝ လုပ်ခဲ့တဲ့ အမှားမျိုး ကျွန်တော်တို့ မလုပ်ချင်ကြဘူး။ ယေဟောဝါအကြောင်း ဆက်လေ့လာနေမယ်၊ ဘုရား​အရည်အသွေးတွေကို ဆက်လေးမြတ်နေမယ်၊ ဘုရားရဲ့ စဉ်းစားပုံကို နားလည်ဖို့ ဆက်ကြိုးစားနေမယ်ဆိုရင် အဲဒီလိုအမှားမျိုး ရှောင်နိုင်မယ်။ ဘုရားကိုလည်း ပိုချစ်လာမယ်။ အာဗြဟံ​အကြောင်း စဉ်းစားကြည့်ပါ။ ယေဟောဝါကို တကယ် ချစ်တယ်။ ဘုရားရဲ့ ဆုံးဖြတ်ချက်ကို နားလည်ဖို့ ခက်တဲ့အချိန်မှာတောင် ကလန်ကဆန် မလုပ်ဘူး။ ဘုရားအကြောင်း ပိုသိအောင် ကြိုးစားတယ်။ ဥပမာ၊ သောဒုံနဲ့ ဂေါမောရမြို့​ကို ဖျက်ဆီးမယ်ဆိုတာ ကြားတော့ လူကောင်းတွေကို လူဆိုးတွေနဲ့ ရောပြီး “မြေတစ်ပြင်လုံးရဲ့​တရားသူကြီး” ဖျက်ဆီးလိုက်မှာကို အာဗြဟံ စိတ်ပူ​သွားတယ်။ စဉ်းစားရ ခက်သွားတယ်။ ဒါနဲ့ ယေဟောဝါကို မေးခွန်းတွေ ဆက်တိုက် မေးတော့​တယ်။ ယေဟောဝါ စိတ်ရှည်ရှည် ဖြေပေး​တယ်။ နောက်ဆုံးတော့၊ လူတိုင်း​ရဲ့ စိတ်နှလုံးကို ဘုရား စစ်ဆေး​မှန်း၊ လူကောင်းတွေကို လူဆိုးတွေနဲ့ ရောပြီး ဘယ်တော့မှ အပြစ်မပေးမှန်း အာဗြဟံ သဘောပေါက်သွားတယ်။—က. ၁၈:၂၀-၃၂။

၁၁။ ယေဟောဝါကို ချစ်တယ်၊ ယုံတယ်​ဆိုတာ အာဗြဟံ ဘယ်လို ပြသလဲ။

^၁၁ သောဒုံနဲ့ ဂေါမောရမြို့​အကြောင်း ယေဟောဝါနဲ့ စကားပြော​ပြီးနောက် အာဗြဟံ စိတ်ထိမိ​သွားတယ်။ ဘုရားကို အရင်ကထက် ပိုချစ်ကြောက်​ရိုသေ​လာတယ်။ နှစ်များစွာ ကြာပြီးနောက် ယေဟောဝါကို ယုံကြည်​ကြောင်း ပြဖို့ ခက်တဲ့ အခြေအနေ​တစ်ခု ကြုံရတယ်။ ချစ်သား အိဇက်​ကို ပူဇော်​ဖို့ ဘုရား တောင်းဆို​တယ်။ ဘုရားအကြောင်း အာဗြဟံ ကောင်းကောင်း သိနေပြီမို့ ဒီတစ်ကြိမ် မေးခွန်းတွေ ထုတ်မနေတော့ဘူး။ ဘုရား တောင်းဆိုတဲ့​အတိုင်း ထလုပ်တယ်။ ဒီ​တာဝန်အတွက် ပြင်ဆင်​နေချိန်မှာ အာဗြဟံ ဘယ်လောက် စိတ်ထိခိုက်မလဲ မြင်ယောင်​ကြည့်ပါ။ ယေဟောဝါအကြောင်း သိလာတာတွေကို လေးလေးနက်နက် စဉ်းစားခဲ့ရမှာပဲ။ မဖြောင့်မတ်တဲ့၊ မေတ္တာမဲ့​တဲ့ လုပ်ရပ် ယေဟောဝါ ဘယ်တော့မှ မလုပ်ဘူးဆိုတာ သိတယ်။ တမန်တော် ပေါလု​ရဲ့ စကားအရ ချစ်သား​အိဇက်​ကို ယေဟောဝါ ပြန်ထ​မြောက်​ပေးနိုင်တယ်ဆိုတာ အာဗြဟံ ယုံတယ်။ (ဟီ. ၁၁:၁၇-၁၉) ဒါ့အပြင် အိဇက်​ဟာ လူမျိုးကြီးရဲ့ ဖခင် ဖြစ်လာမယ်​လို့ ယေဟောဝါ ကတိပေးထားတယ်။ အဲဒီအချိန်မှာ အိဇက် သားသမီး မရသေးဘူး။ ဘာပဲဖြစ်ဖြစ် ဖြောင့်မှန်တာကို ဘုရား အမြဲ လုပ်မယ်​ဆိုတာ အာဗြဟံ ယုံတယ်။ ဘုရားကို ချစ်တယ်။ ခက်ပေမဲ့ ယုံကြည်ခြင်းကြောင့် နာခံ​ခဲ့တယ်။—က. ၂၂:၁-၁၂။

၁၂။ အာဗြဟံ​ကို ဘယ်လို အတုယူနိုင်သလဲ။ (ဆာလံ ၇၃:၂၈)

 ^၁၂ အာဗြဟံ​ကို ကျွန်တော်တို့ ဘယ်လို အတုယူနိုင်သလဲ။ အာဗြဟံလိုပဲ ယေဟောဝါအကြောင်း ဆက်လေ့လာနေရမယ်။ ဒါဆိုရင် ဘုရားနဲ့ ပိုရင်းနှီး​ချစ်ခင်​လာမယ်။ (ဆာလံ ၇၃:၂၈ ကို ဖတ်ပါ။) အမှားအမှန် သိစိတ်ဟာ ဘုရားရဲ့ စဉ်းစားပုံနဲ့ ကိုက်ညီ​လာမယ်။ (ဟီ. ၅:၁၄) အမှား​လုပ်ဖို့ သွေးဆောင်​ခံရတဲ့အခါ ငြင်းပယ်နိုင်မယ်။ ဘုရား စိတ်ထိခိုက်မယ့်၊ ဘုရားနဲ့ ဆက်ဆံရေး ထိခိုက်မယ့်အရာ တစ်ခုခု လုပ်ဖို့ စဉ်းတောင် စဉ်းစား​မှာ မဟုတ်ဘူး။ ဖြောင့်မတ်မှုကို မြတ်နိုး​ကြောင်း ဘယ်လို ပြနိုင်သေးသလဲ။

၁၃။ ဖြောင့်မတ်ခြင်းကို ဘယ်လို လိုက်စားနိုင်သလဲ။ (ပညာအလိမ္မာ ၁၅:၉)

^၁၃ အဆင့် ၂။ တစ်ရက်ပြီး တစ်ရက် ဖြောင့်မတ်မှုကို ပိုမြတ်နိုးလာဖို့ ကြိုးစားပါ။ ကြွက်သား သန်မာ​ဖို့ နေ့တိုင်း ကြိုးကြိုးစားစား လေ့ကျင့်ခန်း လုပ်ရတယ်။ ယေဟောဝါရဲ့ ဖြောင့်မတ်တဲ့ စံနှုန်းတွေကို ချစ်တတ်​လာဖို့လည်း ကြိုးစား​အားထုတ်မှု လိုအပ်တယ်။ နေ့တိုင်း ကြိုးစားရမယ်။ ယေဟောဝါဟာ အကျိုးသင့်အကြောင်းသင့် ရှိတယ်။ ကျွန်တော်တို့ တတ်နိုင်တာထက် ဘယ်တော့မှ ပိုမတောင်းဆိုဘူး။ (ဆာ. ၁၀၃:၁၄) ‘ဖြောင့်မတ်ခြင်း လိုက်စား​သူ​တွေ​ကို ချစ်မြတ်နိုးတယ်။’ (ပညာအလိမ္မာ ၁၅:၉ ကို ဖတ်ပါ။) ယေဟောဝါရဲ့ အမှုတော်မှာ ပန်းတိုင်​တစ်ခုခုကို လိုက်စားတဲ့အခါ ကျွန်တော်တို့ ကြိုးစား​အားထုတ်​ကြတယ်။ ဖြောင့်မတ်ခြင်းကို လိုက်စားတဲ့အခါ​မှာ​လည်း အလားတူပဲ။ အချိန်နဲ့အမျှ ကျွန်တော်တို့ တိုးတက်လာဖို့ ယေဟောဝါ စိတ်ရှည်ရှည် ကူညီပေးပါလိမ့်မယ်။—ဆာ. ၈၄:၅၊ ၇။

၁၄။ “ဖြောင့်မတ်ခြင်း ရင်အုပ်တန်ဆာ” ဆိုတာ ဘာလဲ။ ဘာကြောင့် လိုအပ်သလဲ။

^၁၄ ဖြောင့်မတ်ခြင်းဟာ လိုက်စားဖို့ ခက်ခဲလွန်းတဲ့အရာ မဟုတ်ဘူးလို့ ယေဟောဝါ မေတ္တာပါစွာ သတိပေးတယ်။ (၁ ယော. ၅:၃) တကယ်တော့ အကာအကွယ်​တောင် ဖြစ်သေးတယ်။ အဲဒီ​အကာအကွယ်​ကို ကျွန်တော်တို့ နေ့တိုင်း လိုအပ်တယ်။ တမန်တော် ပေါလု ဖော်ပြတဲ့ ပုံဆောင် ချပ်ဝတ်တန်ဆာ​အကြောင်း သတိရပါ။ (ဧ. ၆:၁၄-၁၈) စစ်သားရဲ့ နှလုံးကို ဘာက ကာကွယ်​ပေးသလဲ။ “ဖြောင့်မတ်ခြင်း ရင်အုပ်တန်ဆာ” ပါ။ အဲဒါ ယေဟောဝါရဲ့ ဖြောင့်မတ်တဲ့ စံနှုန်းတွေကို ပုံဆောင်တယ်။ ရင်အုပ်တန်ဆာ​က ပကတိ နှလုံးကို ကာကွယ်ပေးသလို ယေဟောဝါရဲ့ ဖြောင့်မတ်တဲ့ စံနှုန်းတွေ​ က ပုံဆောင် စိတ်နှလုံးကို ကာကွယ်ပေးနိုင်တယ်။ ဒါကြောင့် ကိုယ့်ရဲ့ ချပ်ဝတ်တန်ဆာ​မှာ ဖြောင့်မတ်ခြင်း ရင်အုပ်တန်ဆာ မဖြစ်​မနေ ပါ​နေပါစေ။—ပညာ. ၄:၂၃။

၁၅။ ဖြောင့်မတ်ခြင်း ရင်အုပ်တန်ဆာကို ဘယ်လို ဝတ်ဆင်နိုင်သလဲ။

^၁၅ ဖြောင့်မတ်ခြင်း ရင်အုပ်တန်ဆာကို ဘယ်လို ဝတ်ဆင်နိုင်သလဲ။ နေ့စဉ် ရွေးချယ်​ဆုံးဖြတ်တဲ့အခါ ဘုရား​စံနှုန်းတွေကို ထည့်စဉ်းစားခြင်းအားဖြင့်ပါ။ ဘာပြောမလဲ၊ ဘာသီချင်း နားထောင်မလဲ၊ ဘာဖျော်ဖြေရေး ကြည့်မလဲ၊ ဘာစာအုပ် ဖတ်မလဲ ဆုံးဖြတ်တဲ့အခါ ကိုယ့်ကိုယ်ကိုယ် ဒီလို မေးပါ– ‘ငါ့​စိတ်​ကို ဘာအစာတွေ ကျွေးနေသလဲ။ ဒါကို ယေဟောဝါ နှစ်သက်မလား။ အဲဒါတွေ​က မဖြောင့်မတ်ဘူးလို့ ယေဟောဝါ ရှုမြင်​တဲ့ အကျင့်ပျက်မှု၊ အကြမ်းဖက်မှု၊ လောဘ၊ တစ်ကိုယ်ကောင်းဆန်မှုကို အားပေးအားမြှောက်​ပြုနေသလား။” (ဖိ. ၄:၈) ယေဟောဝါရဲ့ အလိုတော်နဲ့ ညီတဲ့ ဆုံးဖြတ်ချက်တွေ ချတဲ့အခါ ဖြောင့်မတ်တဲ့ စံနှုန်းတွေ​က စိတ်နှလုံးကို ကာကွယ်​ပေးပါလိမ့်မယ်။

၁၆-၁၇။ ယေဟောဝါရဲ့ စံနှုန်းတွေအတိုင်း ထာဝစဉ် နေထိုင်​နိုင်တယ်​ဆိုတာ ဟေရှာယ ၄၈:၁၈ က ဘယ်လို အာမခံသလဲ။

^၁၆ ယေဟောဝါရဲ့ ဖြောင့်မတ်တဲ့ စံနှုန်းတွေအတိုင်း တစ်နေ့ပြီး တစ်နေ့၊ တစ်နှစ်ပြီး တစ်နှစ် နေထိုင်နိုင်ပါ့မလားလို့ စိုးရိမ်ဖူးသလား။ ဟေရှာယ ၄၈:၁၈ မှာ ယေဟောဝါ သုံးထားတဲ့ ဥပမာ​ကို စဉ်းစားကြည့်ပါ။ (ဖတ်ပါ။) ကျွန်တော်တို့ရဲ့ “ဖြောင့်မတ်ခြင်းဟာ ပင်လယ်​လှိုင်းတွေလို ဖြစ်လာမယ်” လို့ ယေဟောဝါ ကတိပေးတယ်။ ပင်လယ်ကမ်းစပ်မှာ ရပ်ရင်း လှိုင်းတွေ အဆက်​အပြတ် ရိုက်ခတ်​တာကို ကြည့်နေတယ် ဆိုပါစို့။ တစ်နေ့၊ လှိုင်းတွေ မရိုက်ခတ်တော့မှာကို စိုးရိမ်မလား။ စိုးရိမ်​မှာ မဟုတ်ဘူး။ ဟိုးနှစ်ပေါင်း ထောင်ချီ​ကတည်းက ကမ်းစပ်ကို လှိုင်းတွေ ရိုက်ခတ်​နေ​တယ်၊ ဆက်ရိုက်ခတ်နေဦးမယ်ဆိုတာ သိနေလို့​ပဲ။

^၁၇ သင့်​ဖြောင့်မတ်ခြင်းဟာ ပင်လယ်​လှိုင်းတွေလို ဖြစ်နိုင်ပါတယ်။ ဘယ်လိုနည်းနဲ့လဲ။ ဆုံးဖြတ်ချက် ချတော့မယ်ဆိုရင် ယေဟောဝါရဲ့ အလိုတော်ကို အရင်ဆုံး စဉ်းစားပါ။ ပြီးရင် အဲဒီအတိုင်း လုပ်ပါ။ ဘယ်လောက် ခက်ခဲတဲ့ ဆုံးဖြတ်ချက် ဖြစ်ပါစေ သင့်ကို မေတ္တာရှင်​အဖ အမြဲ ခွန်အားပေးမယ်။ ဖြောင့်မှန်တာကို နေ့တိုင်း လုပ်နိုင်အောင် ကူညီပေးပါလိမ့်မယ်။—ဟေရှာ. ၄၀:၂၉-၃၁။

၁၈။ တခြားသူတွေကို ကိုယ့်​စံနှုန်းနဲ့ အကဲဖြတ်တာမျိုး ဘာကြောင့် ရှောင်ရမလဲ။

^၁၈ အဆင့် ၃။ အကဲဖြတ်စီရင်မယ့်ကိစ္စ ယေဟောဝါ​လက်ထဲ အပ်ထားပါ။ ယေဟောဝါရဲ့ ဖြောင့်မတ်တဲ့ စံနှုန်းတွေအတိုင်း ကျွန်တော်တို့ ကြိုးစား​နေထိုင်ကြတယ်။ ဒါပေမဲ့ တခြားသူတွေကို အကဲဖြတ်တာ၊ ကိုယ့်ကိုယ်ကိုယ် ဖြောင့်မတ်တယ်လို့ သတ်မှတ်တာမျိုး ရှောင်ရမယ်။ တခြားသူတွေကို ကိုယ့်​စံနှုန်းနဲ့ အကဲဖြတ်ပိုင်ခွင့် ကျွန်တော်တို့ကို ယေဟောဝါ ပေးမထားဘူး။ ယေဟောဝါသာ “မြေတစ်ပြင်လုံးရဲ့​တရားသူကြီး” ဖြစ်တယ်။ (က. ၁၈:၂၅) “ကိုယ်တိုင် ဝေဖန်​အကဲဖြတ် မခံရ​ဖို့ သူတစ်ပါးကို ဝေဖန်​အကဲဖြတ်တာမျိုး မလုပ်ပါနဲ့တော့” လို့ ယေရှု ပြောတယ်။—မ. ၇:၁။ *

၁၉။ ယေဟောဝါရဲ့ တရားစီရင်ချက်​ကို ယုံကြောင်း ယောသပ် ဘယ်လို ပြသလဲ။

^၁၉ ဖြောင့်မတ်သူ ယောသပ်​အကြောင်း ပြန်သုံးသပ်ကြည့်ပါ။ ကိုယ့်ကို ဆိုးဆိုးရွားရွား ဆက်ဆံခဲ့သူတွေကိုတောင် တရားမစီရင်ဘူး။ အစ်ကိုတွေက ယောသပ်​ကို အနိုင်ကျင့်​တယ်။ ကျွန်​အဖြစ် ရောင်းစား​တယ်။ ယောသပ် သေပြီဆိုပြီး အဖေ​ကို လှည့်စားတယ်။ နှစ်ပေါင်းများစွာ ကြာပြီးနောက် မိသားစု ပြန်ဆုံဆည်းတယ်။ ယောသပ် အာဏာ​ရှိနေပြီ။ အစ်ကိုတွေကို ပြင်းပြင်းထန်ထန် တရားစီရင်​လို့၊ လက်စားချေ​လို့ ရတယ်။ အစ်ကိုတွေ စိတ်ရင်းမှန်နဲ့ နောင်တရနေပြီ ဖြစ်ပေမဲ့ ယောသပ် လက်စားချေ​မှာ စိုးရိမ်​နေ​ကြတယ်။ ဒါပေမဲ့  ယောသပ်​က “မစိုးရိမ်ပါနဲ့၊ အစ်ကို​တို့​ရာ။ ဘုရားသခင်က​ပဲ အပြစ်ပေး​နိုင်တာပါ။ ကျွန်တော် ပေးလို့ မရပါဘူး” လို့ ပြောတယ်။ (က. ၃၇:၁၈-၂၀၊ ၂၇၊ ၂၈၊ ၃၁-၃၅။ ၅၀:၁၅-၂၁) တရား​စီရင်ခြင်း​ကိစ္စကို ယေဟောဝါ​လက်ထဲ ယောသပ် နှိမ့်ချစွာ အပ်တယ်။

၂၀-၂၁။ ကိုယ့်ကိုယ်ကိုယ် ဖြောင့်မတ်တယ်လို့ သတ်မှတ်တာကို ဘယ်လို ရှောင်နိုင်သလဲ။

^၂၀ ယောသပ်လိုပဲ ကျွန်တော်တို့လည်း အကဲဖြတ်စီရင်မယ့်ကိစ္စ​ကို ယေဟောဝါ​လက်ထဲ အပ်ထားကြတယ်။ ဥပမာ၊ ညီအစ်ကို/မတွေရဲ့ စိတ်ရင်းကို ဝေဖန်အကဲမဖြတ်ကြဘူး။ လူတွေရဲ့ အတွင်းစိတ်​ကို ကျွန်တော်တို့ မမြင်နိုင်ဘူး။ ယေဟောဝါသာ “စိတ်ရင်းကို စစ်ဆေး​တယ်။” (ပညာ. ၁၆:၂) နောက်ခံ၊ ယဉ်ကျေးမှု အသီးသီး​က လူအမျိုးမျိုးကို ချစ်တယ်။ “နှလုံးသားကို ကျယ်ကျယ် ဖွင့်ထား” ဖို့ ကျွန်တော်တို့ကို အားပေးတယ်။ (၂ ကော. ၆:၁၃၊ အောက်ခြေမှတ်ချက်) ဒါကြောင့် ညီအစ်ကို/မ​အားလုံးကို ချစ်ဖို့ ကျွန်တော်တို့ ကြိုးစားတယ်။ ဝေဖန်အကဲမဖြတ်ကြဘူး။

^၂၁ အသင်းတော်​ပြင်ပက လူတွေကိုလည်း အကဲမဖြတ်ရဘူး။ (၁ တိ. ၂:၃၊ ၄) “ဒီ​တစ်ယောက်ကတော့ အမှန်တရားထဲ ဘယ်တော့မှ ရောက်လာ​မှာ မဟုတ်ဘူး” ဆိုပြီး ကိုယ့်​ယုံကြည်ချက်ကို လက်မခံ​တဲ့ ဆွေမျိုး​တစ်ယောက်ကို အကဲဖြတ်ဖူးသလား။ ဒါဆိုရင် ရောင့်တက်ရာ၊ ကိုယ့်ကိုယ်ကိုယ် ဖြောင့်မတ်တယ်လို့ သတ်မှတ်​ရာ ရောက်သွား​မယ်။ “နေရာတိုင်းမှာ​ရှိတဲ့ လူတွေကို” နောင်တ​ယူဖို့ ယေဟောဝါ အခွင့်အရေး ပေးနေတုန်းပဲ။ (တ. ၁၇:၃၀) ကိုယ့်ကိုယ်ကိုယ် ဖြောင့်မတ်တယ်လို့ သတ်မှတ်တာဟာ မဖြောင့်မတ်တာပဲဆိုတာ အမြဲ သတိရပါ။

၂၂။ ဖြောင့်မတ်မှုကို ချစ်မြတ်နိုး​ဖို့ သင် ဘာကြောင့် စိတ်ပိုင်းဖြတ်ထားသလဲ။

^၂၂ ယေဟောဝါရဲ့ ဖြောင့်မတ်တဲ့ စံနှုန်းတွေကို ချစ်မြတ်နိုးတာက ကျွန်တော်တို့ကို ပျော်ရွှင်စေတယ်။ ကျွန်တော်တို့​ကို​ကော ဘုရားကို​ပါ ချစ်လာဖို့ တခြားသူတွေကို လှုံ့ဆော်ပေးရာ ကျတယ်။ ဒါကြောင့် “ဖြောင့်မှန်တာကို လုပ်ချင်​စိတ်” အမြဲ “ပြင်းပြ” နေ​ကြပါစို့။ (မ. ၅:၆) သင့်​ကြိုးစား​အားထုတ်မှုကို ယေဟောဝါ အမြဲ သတိပြုမိကြောင်း၊ သင့်​တိုးတက်မှု​အတွက် အမြဲ ဂုဏ်ယူ​နေကြောင်း စိတ်ချပါ။ လောက​မှာ မဖြောင့်မတ်မှု တိုးများလာနေပေမဲ့ စိတ်ဓာတ်​မကျပါနဲ့။ “ဖြောင့်မတ်သူတွေကို ယေဟောဝါ ချစ်မြတ်နိုးတယ်” ဆိုတာ အမြဲ သတိရနေပါ။—ဆာ. ၁၄၆:၈။