၁။ ကျမ်းစာ​အတွက် ဘာကြောင့် ကျေးဇူးတင်​သလဲ။

 ကျမ်းစာ ပေးထားလို့ ယေဟောဝါဘုရားကို ကျေးဇူးတင်စရာပါပဲ။ ဒီနေ့ခေတ် ပြဿနာတွေကို အောင်အောင်မြင်မြင် ဖြေရှင်းဖို့ ကူညီပေးနိုင်တဲ့ ပညာရှိ အကြံဉာဏ်တွေ ကျမ်းစာကတစ်ဆင့် ဘုရား ပေးထားတယ်။ သိပ်ကောင်းတဲ့ အနာဂတ် မျှော်လင့်ချက်​လည်း ပေးထားတယ်။ အရေးကြီးဆုံးကတော့ မိမိရဲ့ အရည်အသွေးများစွာကို ဖော်ပြထားတယ်။ ဘုရားရဲ့ အရည်အသွေးတွေကို ကျွန်တော်တို့ စဉ်းစားတဲ့အခါ စိတ်ထိမိ​ပြီး ဘုရားနဲ့ ပိုရင်းနှီးချင်လာကြတယ်။—ဆာ. ၂၅:၁၄။

၂။ လူတွေကို မိမိ​အကြောင်း ဘယ်နည်းတွေနဲ့ ယေဟောဝါ ဖော်ပြသလဲ။

^၂ ယေဟောဝါက မိမိ​အကြောင်း လူတွေကို သိစေချင်တယ်။ အရင်တုန်းက အိပ်မက်၊ စိတ်​အာရုံ၊ ကောင်းကင်တမန်တွေကတစ်ဆင့် လူတွေနဲ့ ဆက်သွယ်​တယ်။ (တော. ၁၂:၆။ တ. ၁၀:၃၊ ၄) ဒါပေမဲ့ အဲဒါတွေကိုသာ မှတ်တမ်း တင်မထားရင် ကျွန်တော်တို့ ဘယ်​သိနိုင်မလဲ။ ဒါကြောင့် ဘုရားက ကျွန်တော်တို့ကို သိစေချင်တာတွေ “စာစောင်​ထဲ​မှာ ရေးမှတ်” စေခဲ့တာ။ (ယေ. ၃၀:၂) “စစ်မှန်တဲ့ ဘုရားသခင်ရဲ့ လမ်းစဉ်ဟာ ပြည့်ဝ​စုံလင်” တဲ့အတွက် ကျွန်တော်တို့ကို ဆက်သွယ်ဖို့ သုံးတဲ့ ဒီ​နည်းလမ်း​ဟာ အကောင်းဆုံး၊ အကျိုးရှိဆုံးနည်း ဖြစ်မယ်​ဆိုတာ စိတ်ချနိုင်ပါတယ်။—ဆာ. ၁၈:၃၀။

၃။ ဒီနေ့ခေတ်​အထိ ကျမ်းစာ ရှိနေ​အောင် ယေဟောဝါ ဘယ်လို စီစဉ်ခဲ့သလဲ။ (ဟေရှာယ ၄၀:၈)

^၃ ဟေရှာယ ၄၀:၈ ကို ဖတ်ပါ။ ကျမ်းစာဟာ သစ္စာရှိ အမျိုးသား/သမီးတွေကို ပညာရှိ လမ်းညွှန်ချက်တွေ ပေး​လာတာ နှစ်ပေါင်း ထောင်​ချီပြီ။ ဘယ်လို​လုပ်ပြီး အဲဒီလို ဖြစ်နိုင်သလဲ။ တကယ်တော့ ကျမ်းစာကို ပျက်စီး​လွယ်တဲ့ စာလိပ်​တွေ​ပေါ် လွန်ခဲ့တဲ့ နှစ်ပေါင်းများစွာ​က ရေးခဲ့တာ။ ဒီနေ့ခေတ်မှာ မူရင်း​ကျမ်း တစ်စောင်​မှ မရှိတော့ဘူး။ ဒါပေမဲ့ ကျမ်းစာကို ကူးရေး​ထားဖို့ ယေဟောဝါ စီစဉ်​ခဲ့တယ်။ ကျမ်းကူးသူတွေဟာ မစုံလင်သူတွေ ဖြစ်ပေမဲ့ သိပ်စေ့စပ်​ သေချာ​ကြတယ်။ ဥပမာ၊ ဟီဘရူး ကျမ်းစောင်တွေနဲ့ပတ်သက်ပြီး ကျမ်းပညာရှင်​တစ်ယောက်က “ရှေးခေတ် စာပေတွေ​ထဲ​မှာ ကျမ်းစာ​လောက် တိကျမှန်ကန်စွာ ကူးရေး​ထားတဲ့ စာပေ မရှိဘူး​ဆိုတာ ကျွန်တော်တို့ စိတ်ချတယ်” လို့ ပြောတယ်။ ဒါကြောင့် အချိန်တွေ ကြာသွားပေမဲ့၊ ပျက်စီး​လွယ်တဲ့ စာလိပ်​ပေါ် ရေးခဲ့ပေမဲ့၊ ကျမ်းကူးသူ​တွေ မစုံလင်ပေမဲ့ ဒီနေ့ခေတ် ကျမ်းစာမှာ ကျွန်တော်တို့ ဖတ်​ရတာတွေ​ဟာ အာဘော်ရှင် ယေဟောဝါရဲ့ အတွေး​တွေ ဖြစ်တယ်ဆိုတာ စိတ်ချနိုင်တယ်။

၄။ ဒီဆောင်းပါးမှာ ဘာဆွေးနွေးကြမလဲ။

^၄ “ကောင်းမြတ်တဲ့ ဆု​ကျေးဇူး၊ ပြည့်ဝစုံလင်တဲ့ လက်ဆောင် မှန်သမျှဟာ” ယေဟောဝါဆီက ဖြစ်တယ်။ (ယာ. ၁:၁၇) ယေဟောဝါ ပေးထားတဲ့ အကောင်းဆုံး လက်ဆောင် တစ်ခုကတော့ ကျမ်းစာပါ။ ကိုယ့်​အကြောင်း၊ ကိုယ့်​လိုအပ်ရာ​အကြောင်း လက်ဆောင်ပေးသူ ဘယ်လောက် သိတယ်ဆိုတာ လက်ဆောင်​က ဖော်ပြတယ်။ ကျမ်းစာ​လက်ဆောင်​လည်း အဲဒီလိုပဲ။ ဒီ​လက်ဆောင်ကို ဆန်းစစ်​တဲ့အခါ ယေဟောဝါအကြောင်း အများကြီး သိလာရတယ်။ ကျွန်တော်တို့​အကြောင်း၊ ကျွန်တော်တို့ရဲ့ လိုအပ်ရာတွေ​အကြောင်း ဘုရား ကောင်းကောင်း သိ​မှန်း နားလည်​လာ​ရတယ်။ ဘုရားရဲ့ ဉာဏ်ပညာ၊ တရားမျှတမှု၊ မေတ္တာကို ကျမ်းစာက ဘယ်လို ပေါ်လွင်​စေ​ကြောင်း ဒီဆောင်းပါးမှာ ဆွေးနွေးကြပါမယ်။ အရင်ဆုံး၊ ကျမ်းစာက ဘုရားရဲ့ ဉာဏ်ပညာကို ဘယ်လို ပေါ်လွင်​စေ​ကြောင်း လေ့လာကြစို့။

၅။ ဘုရားရဲ့ ဉာဏ်ပညာကို ကျမ်းစာ ပေါ်လွင်စေတဲ့ နည်းတစ်နည်းက ဘာလဲ။

^၅ မိမိရဲ့ ပညာရှိ အကြံဉာဏ်ကို ကျွန်တော်တို့ လိုအပ်မှန်း ယေဟောဝါ သိတယ်။ ကျမ်းစာမှာ ဘုရားရဲ့ ဉာဏ်ပညာ အပြည့် ပါတယ်။ ကျမ်းစာ အကြံဉာဏ်က လူတွေ​အပေါ် ကောင်းကျိုး​သက်ရောက်တယ်။ လူတွေရဲ့ အသက်တာကို ပြောင်းလဲပေးတယ်။ ပထမဆုံး ကျမ်း​ငါး​စောင်​ကို မောရှေ ရေးသားချိန်မှာ “ဒီစကားတွေ​ဟာ အဓိပ္ပာယ် မရှိတဲ့ စကားတွေ မဟုတ်ဘူး။ အသက်ရှင်စေ​တဲ့ စကားတွေ​ပဲ” လို့ အစ္စရေးတွေ​ကို ပြောတယ်။ (တရား. ၃၂:၄၇) ကျမ်းစာ အကြံဉာဏ်ကို လိုက်နာသူ​တွေ​ဟာ အောင်မြင်​ပျော်ရွှင်တဲ့ ဘဝ ရရှိနိုင်တယ်။ (ဆာ. ၁:၂၊ ၃) ကျမ်းစာကို လွန်ခဲ့တဲ့ နှစ်ပေါင်းများစွာ​က ရေးသားခဲ့ပေမဲ့ လူတွေရဲ့ အသက်တာကို ပြုပြင်​ပြောင်းလဲပေးနိုင်စွမ်း ရှိနေတုန်းပဲ။ ဥပမာ၊ jw.org ပေါ်​က “ကျမ်းစာက ဘဝပုံစံတွေကို ပြောင်းလဲပေး” ဆောင်းပါးတွဲ​မှာ ‘ယုံကြည်သူတွေ​ရဲ့ ရင်ထဲ​အထိ ကျမ်းစာ ဘယ်လို အကျိုး​သက်​ရောက်’ ကြောင်း ဖော်ပြတဲ့ ဖြစ်ရပ်မှန် ဘဝအတ္ထုပ္ပတ္တိ​များစွာ တွေ့နိုင်တယ်။—၁ သက်. ၂:၁၃။

၆။ ကျမ်းစာဟာ တခြား​စာအုပ်​တွေ​နဲ့ မတူဘူးလို့ ဘာကြောင့် ပြော​နိုင်သလဲ။

^၆ ဘယ်​စာအုပ်​မှ ကျမ်းစာနဲ့ ယှဉ်လို့ မရဘူး။ ဘာကြောင့်လဲ။ ကျမ်းစာ​အာဘော်ရှင် ယေဟောဝါဘုရားဟာ အနန္တ​တန်ခိုးရှင်၊ ထာဝရ​ဘုရား ဖြစ်တယ်။ အနှိုင်းမဲ့ ဉာဏ်ပညာ ရှိတယ်။ တခြား​စာအုပ်​တွေ​က စာရေးသူ သေဆုံးပြီးနောက်​ထိ ဆက်​ရှိပေမဲ့ စာအုပ်မှာ ပါတဲ့ အကြံဉာဏ်တွေ​ကတော့ အသုံးမဝင်တော့တာမျိုး ဖြစ်လေ့​ရှိတယ်။ ဒါပေမဲ့ ကျမ်းစာမှာ ပါတဲ့ ပညာရှိ အကြံဉာဏ်တွေ​ဟာ အမြဲ အကျိုး​ဖြစ်တယ်။ ခေတ်​အဆက်ဆက် လူတွေကို အကျိုးပြုတယ်။ ကျမ်းစာ ဖတ်ပြီး တွေးတော​ဆင်ခြင်​တဲ့အခါ ကျမ်းစာ အကြံဉာဏ်တွေ​ကို ဘဝမှာ ဘယ်လို ကျင့်သုံးရမယ်ဆိုတာ သိဖို့ သန့်ရှင်းသော စွမ်းအားတော် သုံးပြီး ဘုရား ကူညီပေးတယ်။ (ဆာ. ၁၁၉:၂၇။ မာ​လ. ၃:၁၆။ ဟီ. ၄:၁၂) မှန်ပါတယ်၊ အသက်ရှင်နေတဲ့ ကျမ်းစာ​အာဘော်ရှင်​က ကျွန်တော်တို့ကို သိပ်​ကူညီပေးချင်တယ်။ ဒါက ကျမ်းစာ မှန်မှန် ဖတ်​ဖို့ သိပ်ကောင်းတဲ့ တွန်းအား​ပါပဲ။

၇။ ရှေးခေတ် ဘုရား​လူမျိုးကို ကျမ်းစာ ဘယ်လို စည်းလုံးစေ​သလဲ။

^၇ ဘုရားရဲ့ ဉာဏ်ပညာကို ကျမ်းစာ ပေါ်လွင်စေတဲ့ နောက်တစ်နည်းကတော့ ဘုရား​လူမျိုးကို စည်းလုံးစေ​တာ​ပဲ။ ကတိထားရာပြည်​ထဲ အစ္စရေးလူမျိုး ဝင်တဲ့အခါ နေရာ​ဒေသ အသီးသီးမှာ အခြေချ​ကြတယ်။ တချို့က တံငါ​ လုပ်ငန်း လုပ်ကြတယ်။ တချို့က သိုး၊ နွား၊ တိရစ္ဆာန်​တွေ မွေးမြူ​ကြတယ်။ တချို့က လယ်စိုက်ကြတယ်။ ဒါကြောင့် တခြားဒေသမှာ နေတဲ့ အစ္စရေး​အချင်းချင်းရဲ့ အကျိုးကို ထည့်မစဉ်းစားမိတော့တာမျိုး အလွယ်တကူ ဖြစ်သွားနိုင်တယ်။ ဒါပေမဲ့ ကျမ်းစာ ဖတ်တာ၊ ရှင်းပြ​တာကို အတူ စုဝေး​ပြီး နားထောင်ဖို့ အထူးအချိန်အခါတွေ ယေဟောဝါ စီစဉ်ပေးထားတယ်။ (တရား. ၃၁:၁၀-၁၃။ နေ. ၈:၂၊ ၈၊ ၁၈) သစ္စာရှိ အစ္စရေး​တစ်ယောက် ဂျေရုဆလင်​ကို ရောက်လာပြီး ဒေသ​အသီးသီး​က သန်းနဲ့ချီတဲ့ သစ္စာရှိ ဝတ်ပြုသူချင်း​တွေ​ကို မြင်လိုက်ရတဲ့အခါ ဘယ်လို ခံစားရမယ်ဆိုတာ စဉ်းစားကြည့်ပါ။ ဒီနည်းအားဖြင့် မိမိလူမျိုး စည်းလုံး​နေဖို့ ယေဟောဝါ ကူညီပေးတယ်။ နောက်ပိုင်း၊ ခရစ်ယာန် အသင်းတော် ဖွဲ့စည်း​တဲ့အခါ ဘာသာစကား၊ လူမှုရေး၊ စီးပွားရေး နောက်ခံ​အမျိုးမျိုး​က အမျိုးသား/သမီးတွေ ပါဝင်​လာကြတယ်။ ဒါပေမဲ့ ကျမ်းစာကို ချစ်မြတ်နိုးတဲ့အတွက် စစ်မှန်တဲ့ ဘုရားကို စည်းစည်းလုံးလုံး ဝတ်ပြုကြတယ်။ ယုံကြည်သူ ဖြစ်လာသူတွေ​ဟာ အချင်းချင်းရဲ့ အကူအညီကြောင့်၊ အတူတကွ စည်းဝေးခြင်းကြောင့်သာ ကျမ်းစာကို နားလည်နိုင်ခဲ့ကြတာ။—တ. ၂:၄၂။ ၈:၃၀၊ ၃၁။

၈။ ဒီနေ့ခေတ် ယေဟောဝါရဲ့ လူမျိုးကို ကျမ်းစာ ဘယ်လို စည်းလုံးစေ​သလဲ။

^၈ ဉာဏ်ပညာရှိတဲ့ ဘုရားသခင်က ကျမ်းစာ သုံးပြီး မိမိလူမျိုးကို ဆက်​စည်းလုံးစေတယ်။ ဆက်​သွန်သင်ပေးတယ်။ ယေဟောဝါနဲ့ပတ်သက်ပြီး ကျွန်တော်တို့ သိဖို့ လိုတဲ့ အမှန်တရား​အားလုံး ကျမ်းစာမှာ ပါတယ်။ အစည်းအဝေး၊  စည်းဝေးပွဲ၊ အစည်းအဝေးကြီး​တွေ​မှာ ကျွန်တော်တို့ မှန်မှန် စုဝေး​ပြီး ကျမ်းစာ ဖတ်​ကြတယ်။ ကျမ်းစာ ရှင်းပြချက်​တွေ၊ ဆွေးနွေးချက်​တွေ နားထောင်​ကြတယ်။ ဒါကြောင့် မိမိကို “စည်းလုံးစွာ ဝတ်ပြု” နေဖို့ ဆိုတဲ့ ယေဟောဝါရဲ့ ရည်ရွယ်ချက်​မှာ ကျမ်းစာဟာ အဓိက အခန်းကဏ္ဍ​ကနေ ပါဝင်နေတယ်။—ဇေ. ၃:၉။

၉။ ကျမ်းစာ သတင်းစကားကို နားလည်ဖို့ ဘယ်​အရည်အသွေး မရှိမဖြစ် လိုအပ်သလဲ။ (လုကာ ၁၀:၂၁)

^၉ ယေဟောဝါရဲ့ ဉာဏ်ပညာကို ဖော်ပြတဲ့ အထောက်အထား နောက်တစ်ခုကို စဉ်းစားကြည့်ပါ။ နှိမ့်ချ​တဲ့ စာဖတ်သူ​တွေ​ပဲ နားလည်နိုင်မယ့်​နည်းနဲ့ ကျမ်းစောင်တွေကို ဘုရား ရေးသား​စေတယ်။ (လုကာ ၁၀:၂၁ ကို ဖတ်ပါ။) နေရာတိုင်းမှာ ရှိတဲ့ လူတွေ ကျမ်းစာဖတ်ကြတယ်။ ကျမ်းစာဟာ “လူ​ဖတ်​အများဆုံး၊ စေ့စေ့စပ်စပ် အဖတ်ဆုံး စာအုပ် ဖြစ်တယ်” လို့ ကျမ်းပညာရှင်​တစ်ယောက် ပြောတယ်။ ဒါပေမဲ့ နှိမ့်ချ​သူ​တွေ​ပဲ ကျမ်းစာကို နားလည်ပြီး လက်တွေ့​ကျင့်​ကြတယ်။—၂ ကော. ၃:၁၅၊ ၁၆။

၁၀။ ယေဟောဝါရဲ့ ဉာဏ်ပညာကို ကျမ်းစာ ပေါ်လွင်စေတဲ့ နောက်တစ်နည်းက ဘာလဲ။

^၁၀ ကျမ်းစာမှာ ပါတဲ့ ယေဟောဝါရဲ့ ဉာဏ်ပညာကို နောက်တစ်နည်းနဲ့လည်း တွေ့နိုင်တယ်။ အုပ်စုလိုက်​ကို​သာမက တစ်ဦး​ချင်း​စီ​ကို လမ်းညွှန်၊ နှစ်သိမ့်ပေးဖို့ ကျမ်းစာကို ယေဟောဝါ အသုံးပြုတယ်။ ကျမ်းစာ ဖတ်တဲ့အခါ ကိုယ့်ကို ယေဟောဝါ သတ်သတ်မှတ်မှတ် ဂရုစိုက်​နေတယ်လို့ ကျွန်တော်တို့​အားလုံး ခံစားကြရတယ်။ (ဟေရှာ. ၃၀:၂၁) ပြဿနာ​တစ်ခုခု ကြုံတဲ့အခါ ကျမ်းစာ ဖွင့်​ဖတ်​လိုက်တာနဲ့ ဒီ​အခန်းငယ်​က ကိုယ့်အတွက် ရေးထားသ​လား​လို့ မကြာမကြာ ခံစားရတယ် မဟုတ်လား။ တကယ်တော့ သန်းနဲ့ချီတဲ့ လူတွေ စိတ်ထိမိ​စေ​မယ့်​နည်းနဲ့ ကျမ်းစာကို ရေးထားတာ။ ဒါပေမဲ့ သင့်​လိုအပ်ချက်နဲ့ ကွက်တိကျမယ့် အချက်အလက်တွေ ကျမ်းစာမှာ ဘယ်လို​လုပ် ပါ​နေသလဲ။ ကျမ်းစာ​အာဘော်ရှင်​ဟာ စကြဝဠာမှာ ဉာဏ်ပညာ အရှိဆုံး ပုဂ္ဂိုလ် ဖြစ်လို့​ပါ။—၂ တိ. ၃:၁၆၊ ၁၇။

၁၁။ ကျမ်းစာ ရေးသား​စေ​ချိန်​မှာ မျက်နှာမလိုက်​ကြောင်း ယေဟောဝါ ဘယ်လို ပြသလဲ။

^၁၁ တရားမျှတမှုဟာ ယေဟောဝါရဲ့ နောက်​အရည်အသွေး​တစ်ခု​ပါ။ (တရား. ၃၂:၄) တရားမျှတခြင်း​ဟာ မျက်နှာမလိုက်​ခြင်း​နဲ့ အနီးကပ် ဆက်စပ်နေ​တယ်။ ယေဟောဝါဟာ မျက်နှာ မလိုက်ဘူး။ (တ. ၁၀:၃၄၊ ၃၅။ ရော. ၂:၁၁) ကျမ်းစာ ရေးသား​ဖို့ အသုံးပြုတဲ့ ဘာသာ​စကားတွေကို ကြည့်ရင် ယေဟောဝါ မျက်နှာမလိုက်​တာ ပေါ်လွင်​တယ်။ ပထမ ကျမ်း ၃၉ စောင်​ကို အဲဒီ​ခေတ်က ဘုရား​လူမျိုး အလွယ်တကူ နားလည်​တဲ့ ဟီဘရူး​စကားနဲ့ အဓိက ရေးတယ်။ ဒါပေမဲ့ အေဒီ ပထမရာစု ရောက်လာ​တဲ့​အခါ ဂရိ​စကား အပြော​များလာတယ်။ ဒါကြောင့် ကျန်တဲ့ ကျမ်း ၂၇ စောင်​ကို ဂရိ​စကားနဲ့ ရေးတယ်။ ဘာသာစကား တစ်မျိုးနဲ့​ပဲ ကျမ်းစာ ရေးရမယ်လို့ ယေဟောဝါ မ​ကန့်သတ်​ဘူး။ ဒီနေ့ခေတ်မှာ ကမ္ဘာပေါ်​က လူ​သန်း​ရှစ်​ထောင်​နီးပါး​ဟာ ဘာသာစကား အမျိုးမျိုး ပြောကြတယ်။ ယေဟောဝါအကြောင်း သူတို့ ဘယ်လို သိလာ​နိုင်မလဲ။

၁၂။ နောက်ဆုံး​ကာလမှာ ဒံယေလ ၁၂:၄ ပြည့်စုံ​နေတဲ့ နည်းတစ်နည်းက ဘာလဲ။

^၁၂ အဆုံးပိုင်းကာလမှာ “စစ်မှန်တဲ့ အသိပညာ တိုးများလာ” မယ်၊ လူများစွာ နားလည်​ကြလိမ့်မယ်​လို့ ပရောဖက် ဒံယေလ​ကတစ်ဆင့် ယေဟောဝါ ကတိပေးတယ်။ (ဒံယေလ ၁၂:၄ ကို ဖတ်ပါ။) အဲဒီအသိပညာ တိုးများလာတဲ့ တစ်နည်းကတော့ ကျမ်းစာနဲ့ ကျမ်းစာ စာပေတွေကို ဘာသာပြန်၊ ထုတ်ဝေခြင်းအားဖြင့်ပါ။ ကျမ်းစာဟာ ကမ္ဘာပေါ်မှာ ဘာသာအပြန်ရဆုံး၊ ထုတ်ဝေရဆုံး စာအုပ် ဖြစ်တယ်။ စီးပွားရေးသမား​တွေ ထုတ်​တဲ့ ဘာသာပြန်​ကျမ်းတွေဟာ တစ်ခါတလေ သိပ်ဈေးကြီးတယ်။ ယေဟောဝါရဲ့ လူမျိုးကတော့ ကျမ်းစာကို တစ်အုပ်လုံး​ဖြစ်စေ၊ တစ်စိတ်​တစ်ပိုင်း​ဖြစ်စေ ဘာသာစကား ၂၄၀ ကျော်​နဲ့ ဘာသာပြန်ဆိုထားကြတယ်။ အခကြေးငွေ ပေး​စ​ရာ မလိုဘဲ  ဘယ်သူမဆို ရယူနိုင်တယ်။ ရလဒ်အနေနဲ့ အဆုံး​မရောက်ခင် “နိုင်ငံတော် သတင်းကောင်း” ကို လူမျိုးများစွာ သင်ယူနိုင်ကြပြီ။ (မ. ၂၄:၁၄) တရား​မျှတ​ရှင် ဘုရားက လူအားလုံးကို သိပ်ချစ်လို့ ကျမ်းစာကတစ်ဆင့် မိမိ​အကြောင်း သင်ယူ​ခွင့် ပေးချင်တယ်။

၁၃။ ယေဟောဝါရဲ့ မေတ္တာကို ကျမ်းစာ ပေါ်လွင်စေတယ်လို့ ဘာကြောင့် ပြော​နိုင်သလဲ။ (ယောဟန် ၂၁:၂၅)

^၁၃ ကျမ်းစာ​အာဘော်ရှင်​ရဲ့ အကြီးမားဆုံး အရည်အသွေးဟာ မေတ္တာ ဖြစ်တယ်လို့ ကျမ်းစာမှာ ဖော်ပြတယ်။ (၁ ယော. ၄:၈) ကျမ်းစာမှာ ယေဟောဝါ ဘာတွေ ထည့်​ရေးသား​စေ​ပြီး ဘာတွေ ချန်ခဲ့တယ်ဆိုတာ စဉ်းစားကြည့်ပါ။ ဘုရားနဲ့ ရင်းနှီးတဲ့ ဆက်ဆံရေး ရှိနိုင်ဖို့၊ ပျော်ရွှင်တဲ့ ဘဝ ရနိုင်ဖို့၊ အနာဂတ်မှာ ထာဝရ​အသက် ရနိုင်ဖို့ လိုအပ်တာ ကွက်တိ ဘုရား ထည့်​ရေးသား​စေတယ်။ မလိုအပ်တဲ့ အသေးစိတ် အချက်အလက်များစွာနဲ့ ကျွန်တော်တို့ကို စိတ်မရှုပ်စေဘူး။ အဲဒါ ကျွန်တော်တို့ကို ချစ်လို့​ပဲ။—ယောဟန် ၂၁:၂၅ ကို ဖတ်ပါ။

၁၄။ ကျမ်းစာမှာ ပါတဲ့ အချက်တွေ​က ကျွန်တော်တို့ကို ဘုရား ချစ်ကြောင်း ဘယ်လို ဖော်ပြသေးသလဲ။

^၁၄ ကျမ်းစာမှာ ကျွန်တော်တို့ရဲ့ ဘဝ​ကဏ္ဍ​တိုင်း​ကို အသေးစိတ် ဝင်စွက်​တဲ့၊ မရေတွက်နိုင်တဲ့ စည်းမျဉ်း​စည်းကမ်း​တွေ ပေးမထားခြင်းအားဖြင့်လည်း ယေဟောဝါ မေတ္တာပြတယ်။ ကျွန်တော်တို့ ဆုံးဖြတ်ချက်ကောင်းတွေ ချနိုင်အောင် ဖြစ်ရပ်မှန် ဇာတ်လမ်းတွေ၊ စိတ်​လှုပ်ရှား​စ​ရာ ပရောဖက်ပြုချက်တွေ၊ လက်တွေ့ကျ အကြံဉာဏ်တွေ သုံးပြီး ကူညီပေးတယ်။ ဒါက ဘုရားကို ချစ်ဖို့၊ နာခံဖို့ လှုံ့ဆော်ပေးတယ်။

၁၅။ (က) ကျွန်တော်တို့ကို ယေဟောဝါ စိတ်ဝင်စားကြောင်း ကျမ်းစာက ဘယ်လို ဖော်ပြသလဲ။ (ခ) ရုပ်ပုံ​မှာ မိန်းကလေး၊ ညီအစ်ကိုငယ်​နဲ့ သက်ကြီး ညီအစ်မ ဘယ်ကျမ်းစာ​ဇာတ်ကောင်တွေ​အကြောင်း တွေးတော​နေသလဲ။ (က. ၃၉:၁၊ ၁၀-၁၂။ ၂ ဘု. ၅:၁-၃။ လု. ၂:၂၅-၃၈)

 ^၁၅ ကျွန်တော်တို့ကို ယေဟောဝါ သိပ်​စိတ်ဝင်စားကြောင်း ကျမ်းစာက ဖော်ပြတယ်။ ဘယ်လိုနည်းနဲ့လဲ။ လူ့​ခံစားချက်ကို ဖော်ပြတဲ့ မှတ်တမ်း အများကြီး ကျမ်းစာမှာ ပါတယ်။ “ကျွန်တော်တို့လိုပဲ ခံစားချက် ရှိတဲ့” လူတွေ​အကြောင်း ရေးထားတာ ဖြစ်လို့ နားလည်ဖို့ လွယ်တယ်။ (ယာ. ၅:၁၇) ပိုအရေးကြီးတာက သူတို့နဲ့ ဘုရား ဆက်ဆံပုံ​ကို စဉ်းစားခြင်းအားဖြင့် “ယေဟောဝါဟာ အလွန် ချစ်ခင်စာနာပြီး ကရုဏာကြီး” ကြောင်း ပိုနားလည်​လာ​ရတယ်။—ယာ. ၅:၁၁။

၁၆။ အမှား​လုပ်မိ​သူ​တွေ​အကြောင်း ကျမ်းစာမှာ ဖတ်ရတာကနေ ယေဟောဝါအကြောင်း ဘာသိရသလဲ။ (ဟေရှာယ ၅၅:၇)

^၁၆ ကျမ်းစာက ယေဟောဝါရဲ့ မေတ္တာကို နောက်တစ်နည်းနဲ့လည်း ဖော်ပြတယ်။ ကျွန်တော်တို့ အမှား​လုပ်မိတဲ့အခါ ဘုရား မစွန့်ပစ်​ဘူး​ဆိုတာ ကျမ်းစာကနေ သိရတယ်။ အစ္စရေးတွေ အကြိမ်ကြိမ် ပြစ်မှားပေမဲ့ စိတ်ရင်းမှန်နဲ့ နောင်တရတဲ့အခါ ယေဟောဝါ ခွင့်လွှတ်ပေးတယ်။ (ဟေရှာယ ၅၅:၇ ကို ဖတ်ပါ။) ပထမရာစု ခရစ်ယာန်တွေ​လည်း ဘုရား​မေတ္တာကို ခံစားကြရတယ်။ ကြီးလေးတဲ့ အပြစ်​လမ်းစဉ် လိုက်မိပေမဲ့ နောင်တရသူကို “ခွင့်လွှတ်ပြီး နှစ်သိမ့်​ပေး” ဖို့ ယုံကြည်သူချင်းတွေ​ကို တမန်တော် ပေါလု တိုက်တွန်းတယ်။ (၂ ကော. ၂:၆၊ ၇။ ၁ ကော. ၅:၁-၅) အမှား​လုပ်မိရုံနဲ့ ဝတ်ပြု​သူတွေကို ယေဟောဝါ မစွန့်ပစ်​လိုက်​ဘူး​ဆိုတဲ့ အချက်က စိတ်ထိမိ​စ​ရာ​ပါပဲ။ အဲဒီအစား သူတို့ကို မေတ္တာပါပါ ကူညီပေးတယ်။ ပဲ့ပြင်​ပေးတယ်။ မိမိဆီ ပြန်လာဖို့ ဖိတ်ခေါ်တယ်။ ဒီနေ့ခေတ် နောင်တယူတဲ့ အပြစ်သား အားလုံးကိုလည်း ဘုရား အဲဒီလိုပဲ ကတိပေးတယ်။—ယာ. ၄:၈-၁၀။

၁၇။ ကျမ်းစာဟာ ဘာကြောင့် ဒီလောက် ထူးခြားတဲ့ လက်ဆောင် ဖြစ်​ရသလဲ။

^၁၇ ကျွန်တော်တို့ကို သိပ်ကောင်းတဲ့ လက်ဆောင် ယေဟောဝါ ပေးထားတယ်။ ကျမ်းစာဟာ ဘာကြောင့် ဒီလောက် ထူးခြား​ရသလဲ။ လေ့လာခဲ့​တဲ့​အတိုင်း ဘုရားရဲ့ ဉာဏ်ပညာ၊ တရားမျှတမှု၊ မေတ္တာကို ပေါ်လွင်​စေတယ်။ လူတွေကို မိမိ​အကြောင်း ယေဟောဝါ သိစေချင်တယ်၊ မိတ်ဆွေ ဖြစ်စေချင်တယ်ဆိုတာ ဖော်ပြတယ်။

၁၈။ ကျမ်းစာ “လက်ဆောင်” အတွက် ယေဟောဝါကို ကျေးဇူးတင်ကြောင်း ဘယ်လို ပြနိုင်သလဲ။

^၁၈ ကျမ်းစာ “လက်ဆောင်” ကို ပေါ့ပေါ့တန်တန် သဘော​မထားပါနဲ့။ (ယာ. ၁:၁၇) ဆုတောင်းပြီး ကျမ်းစာ ဖတ်ရှုခြင်း၊ တွေးတောဆင်ခြင်ခြင်းအားဖြင့် ကျေးဇူးတင်ကြောင်း ဆက်​ပြပါ။ ဒါဆိုရင် ကျွန်တော်တို့ရဲ့ ကြိုးစား​အားထုတ်မှုကို ကျမ်းစာ​အာဘော်ရှင် ကောင်းချီးပေးမယ်၊ “ဘုရားနဲ့​ပတ်သက်တဲ့ အသိပညာကို ရလာမယ်” ဆိုတာ ယုံကြည်​စိတ်ချနိုင်ပါတယ်။—ပညာ. ၂:၅။