၁၊ ၂။ ယုဒဘုရင် လေးပါး​ရဲ့ ပုံနမူနာ​တွေကို ဘာကြောင့် သုံးသပ်​ကြ​မလဲ။

လမ်း​ပေါ်မှာ လူတစ်ယောက် ချော်လဲ​သွားတာကို မြင်​ရင် အဲ​ဒီ​လမ်း​ကို သင် သတိထား​မယ် မဟုတ်လား။ တခြားသူတွေရဲ့ အမှား​ကို သုံးသပ်ခြင်း​က ထပ်တူ​အမှား​မျိုး မပြု​မိအောင် ကူညီပေး​နိုင်တယ်။ ကျွန်တော်တို့ရဲ့ ခရစ်ယာန်​လမ်းစဉ်​မှာလည်း အလားတူ​ပါပဲ။ ကျမ်းစာမှာ မှတ်တမ်းတင်​ထား​သူတွေ အပါအဝင် တခြားသူတွေရဲ့ အမှား​က​နေ အဖိုးတန် သင်ခန်းစာ​တွေ သင်ယူနိုင်​ပါတယ်။

^၂ ရှေ့​ဆောင်းပါးမှာ လေ့လာ​ခဲ့တဲ့ ဘုရင်​လေးပါး​ဟာ ယေဟောဝါကို စုံလင်​တဲ့ စိတ်နှလုံး​နဲ့ ဝတ်ပြု​ခဲ့ကြတယ်။ ဒါပေမဲ့ ကြီးလေး​တဲ့ အမှားတွေ လုပ်​ခဲ့ကြတယ်။ သူတို့ရဲ့ အတွေ့အကြုံ​တွေကနေ ဘာသင်ယူနိုင်သလဲ။ သူတို့ရဲ့ အမှား​မျိုး​ကို ဘယ်လို ရှောင်နိုင်​သလဲ။ ဒီ​ပုံနမူနာ​တွေကို တွေးတောဆင်ခြင်​မယ်ဆိုရင် ကျွန်တော်​တို့ကို ဆုံးမသွန်သင်​ဖို့ ရေးထားတဲ့​အရာတွေ​က​နေ အကျိုးရ​ရှိ​နိုင်တယ်။—ရောမ ၁၅:၄ ကိုဖတ်ပါ။

၃-၅။ (က) အာသ​မှာ စုံလင်​တဲ့ စိတ်နှလုံး ရှိပေမဲ့ ဘာပြဿနာ ကြုံခဲ့​ရသလဲ။ (ခ) ယုဒပြည်​ကို ဗာရှာ လာ​တိုက်​တဲ့အခါ လူတွေကို အာသ ဘာကြောင့် အားကိုး​ခဲ့တာ ဖြစ်နိုင်သလဲ။

^၃ အာသ​အကြောင်း၊ ကျွန်တော်တို့ရဲ့ ဘဝကို ဘုရား​စကားတော် ကျမ်းစာ ဩဇာ​ လွှမ်းမိုး​နိုင်​ပုံ​အကြောင်း သုံးသပ်ကြည့်​ကြစို့။ ယုဒပြည်​ကို အီသီယိုးပီးယား​စစ်သည် တစ်သန်း လာ​တိုက်​တုန်းက ယေဟောဝါကို အာသ အားကိုး​ခဲ့တယ်။ ဒါပေမဲ့ အာသ​ပိုင်နက်​ရဲ့ နယ်စပ် ရာ​မ​မြို့​ကို အစ္စရေး​ဘုရင် ဗာရှာ အခိုင်အမာ တည်​ချိန်​မှာတော့ ယေဟောဝါကို အာသ အားမ​ကိုး​တော့ဘူး။ (၆ ရာ. ၁၆:၁-၃) ဒီ​အ​ချိန်မှာ ကိုယ့်ဉာဏ်​ပညာ​ကို အားကိုး​ပြီး ဗာရှာ​ကို တိုက်​ပေးဖို့ ဆီး​ရီး​ယား​ဘုရင် ဗင်ဟာဒဒ်​ကို ငွေပေး​ခဲ့တယ်။ အာသ​ရဲ့ ဗျူဟာ အောင်မြင်​ခဲ့သလား။ “ထို​သတင်း​ကို ဗာရှာ​သည် ကြား​သောအခါ ရာ​မ​မြို့​ကို လက်​စ​မ​သတ်​ဘဲ အလုပ်ကို ဖြတ်​၍​နေ​၏” လို့ ကျမ်းစာမှာ ဖော်ပြထားတယ်။ (၆ ရာ. ၁၆:၅) အပေါ်ယံ ကြည့်​လိုက်​ရင်​တော့ အာသ​ရဲ့ ဗျူဟာ အောင်မြင်​ခဲ့​သလို​ပါပဲ။

^၄ အာသ​ရဲ့ လုပ်ရပ်​ကို ယေ​ဟာ​ဝါ ဘယ်လို ရှုမြင်​သလဲ။ မိမိ​ကို အားမကိုး​တဲ့အတွက် အာသ​ကို ဆုံးမ​ဖို့ ပရောဖက်​ဟာနန်ကို ယေဟောဝါ စေလွှတ်​ခဲ့တယ်။ (၂ ရာဇဝင်ချုပ် ၁၆:၇-၉ ကိုဖတ်ပါ။) “ယခု​မှစ၍ စစ်မှု ရှိ​လိမ့်မည်” လို့ ဟာနန် ပြောတယ်။ ဗာရှာ ဆုတ်ခွာ​သွားပေ​မဲ့ အာသ​ရဲ့ နောက်ပိုင်း​နန်းစံချိန်​တစ်လျှောက်လုံး စစ်​ဘေး​နဲ့ ကြုံခဲ့​ရတယ်။

^၅ ရှေ့​ဆောင်းပါးမှာ တွေ့ခဲ့​ရတဲ့​အတိုင်း အာသ​ရဲ့ စိတ်​နှလုံးကို ဘုရားသခင် စစ်ဆေး​တဲ့အခါ စုံလင်​တဲ့ စိတ်နှလုံး ရှိတယ်လို့ စီရင်​ခဲ့တယ်။ (၃ ရာ. ၁၅:၁၄) အာသ​ရဲ့ ဆည်းကပ်​မှုကို ဘုရားသခင် တွေ့​မြင်ပြီး ကျေနပ်အားရ​ခဲ့တယ်။ ဒါပေမဲ့ ပညာမဲ့ လမ်းစဉ်​ရဲ့ ဆိုးကျိုး​တွေကို အာသ ခံစား​ခဲ့ရတယ်။ ဗာရှာ​နဲ့ ရင်ဆိုင်​ချိန်မှာ ယေဟောဝါ​အစား မိမိ​ကိုယ်တိုင်​နဲ့ ဗင်ဟာဒဒ်​ကို အာသ ဘာကြောင့် အားကိုး​ခဲ့တာ​လဲ။ နိုင်ငံရေး၊ စစ်ရေး​အရ ဖြေရှင်း​တာဟာ ဘုရား​သခင်​ဆီ အကူအညီ တောင်း​တာ​ထက် ပို​ကောင်း​မယ်​ဆိုပြီး ထင်​လို့​လား။ တခြားသူတွေရဲ့ မကောင်းတဲ့ အကြံဉာဏ်​ကို နား​ယောင်​မိ​လို့​လား။

၆။ အာသ​ရဲ့ အမှား​က​နေ ဘာသင်ယူနိုင်သလဲ။ ရှင်းပြပါ။

^၆ အာသ​မှတ်တမ်း​က ကိုယ့်လုပ်ရပ်​ကို ဆန်းစစ်​ဖို့ လှုံ့ဆော်ပေး​သလား။ ကြီးမားလွန်း​တယ်လို့ ထင်​ရတဲ့ ပြဿနာတွေ ကြုံရ​တဲ့အခါ ယေဟောဝါကို အားကိုး​ဖို့ လိုအပ်​ကြောင်း သိမှတ်​ဖို့ လွယ်​နိုင်ပါတယ်။ ဒါပေမဲ့ နေ့စဉ် အသေးအမွှား​ကိစ္စတွေ ဖြေရှင်း​တဲ့အခါ ဘာ​လုပ်ကြ​သလဲ။ ကိုယ့်နည်းကိုယ့်ဟန်​နဲ့ ဖြေရှင်း​လိုက်ခြင်း​အားဖြင့် လူ့​ဉာဏ်​ပညာ​ကို အားထား​သလား။ ကျမ်းစာမူ​တွေကို ရှာဖွေ​ကျင့်သုံးခြင်း​အားဖြင့် ယေဟောဝါရဲ့ နည်းလမ်း​ကို အားကိုး​ကြောင်း ပြသ​လား။ ဥပမာ၊ အစည်းအဝေး​တွေ၊ အစည်းအဝေး​ကြီး​တွေ တက်ဖို့ မိသားစု​ရဲ့ ဆန့်ကျင်မှု ကြုံရ​နိုင်တယ်။ အဲဒီအခါ အကောင်းဆုံး ဖြေရှင်းနည်း​ကို ညွှန်ပြ​ပေးဖို့ ယေဟောဝါ​ဆီ ဆုတောင်း​တ​ယ်။ အလုပ်ပြုတ်​သွား​လို့ အလုပ်သစ် ရှာတွေ့​ဖို့ ခက်​နေရင်​ကော။ အလုပ်​လျှောက်​တဲ့အခါ ကြားရက်​အစည်းအဝေး​တွေ ပုံမှန်​တက်​မယ့်​အကြောင်း အသိပေး​ဦး​မလား။ ဘာပြဿနာ​ပဲ ကြုံရ​ပါစေ “ကိုယ်​အမှုအရာ​ကို ထာဝရဘုရား​၌ အပ်​လော့။ ကိုယ်​တော်ကို ကိုးစား​လော့။ သို့ပြုလျှင် စီရင်တော်မူ​မည်” ဆိုတဲ့ ဆာလံဆရာ​ရဲ့ စကားကို လိုက်နာ​သင့်ပါတယ်။—ဆာ. ၃၇:၅။

၇၊ ၈။ ယောရှဖတ် ဘာ​အမှားတွေ လုပ်ခဲ့​သလဲ။ ဘာ​ရလဒ် ရရှိ​ခဲ့​သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)

^၇ အာသ​ရဲ့ သား ယောရှဖတ်​ကော ဘယ်လို​လဲ။ သူ့မှာ အရည်အသွေးကောင်း​များစွာ ရှိပါ​ရဲ့။ ယေဟောဝါကို အားကိုး​တဲ့အတွက် ကောင်းမှုများ​စွာ ပြုလုပ်​နိုင်ခဲ့​ပါ​ရဲ့။ ဒါပေမဲ့ ပညာမဲ့​တဲ့ ဆုံးဖြတ်ချက်​တွေလည်း ချခဲ့တယ်။ ဥပမာ၊ မိမိရဲ့ သား​ကို မြောက်ပိုင်းနိုင်ငံ​က မင်းဆိုး အာဟပ်​ရဲ့ သမီး​နဲ့ ပေး​စား​ခဲ့တယ်။ ပရောဖက် မိက္ခာ သတိပေး​နေတဲ့​ကြား ဆီး​ရီး​ယား​တွေကို တိုက်​ဖို့ အာဟပ်​နဲ့ မဟာမိတ်ဖွဲ့​ခဲ့တယ်။ တိုက်ပွဲ​မှာ သေ​ဘေး​က​နေ သီသီ​လေး လွတ်မြောက်​ခဲ့တယ်။ အဲဒီနောက် ဂျေရုဆလင်​ကို ပြန်​လာတယ်။ (၆ ရာ. ၁၈:၁-၃၂) အဲဒီအခါ ပရောဖက် ယေဟု​က “မင်းကြီး​သည် မတရား​သောသူ​ကို မစ​သင့်​သလော။ ထာဝရ​ဘုရားကို မုန်း​သောသူ​တို့ကို ချစ်​သင့်​ သလော” လို့​မေးခဲ့တယ်။—၂ ရာဇဝင်ချုပ် ၁၉:၁-၃ ကိုဖတ်ပါ။

^၈ ဒီ​အမှား​က​နေ ယောရှဖတ် သင်ယူ​ခဲ့သလား။ ယေဟောဝါရဲ့ မျက်နှာသာ​ရဖို့ ထက်သန်​စွာ ဆက်လုပ်​ဆောင်ခဲ့​ပေ​မဲ့ အာဟပ်​နဲ့ ပေါင်းသင်း​တဲ့​အမှား၊ ယေဟု​ရဲ့ သတိပေး​စကားက​နေ မသင်ယူ​ခဲ့ဘူး။ ဘုရားသခင့် ရန်သူ၊ အာဟပ်​ရဲ့ သား မင်းဆိုး အာခဇိ​နဲ့ ပညာမဲ့​စွာ မိတ်ဖွဲ့​ခဲ့​ပြန်​တ​ယ်။ ယောရှဖတ်​နဲ့ အာခဇိ သင်္ဘော​တွေ ဆောက်လုပ်​ခဲ့ကြတယ်။ ဒါပေမဲ့ သင်္ဘော​တွေ ပျက်​သွားတဲ့​အတွက် ဆောက်လုပ်​ရတဲ့ ရည်ရွယ်ချက် မအောင်မြင်​ခဲ့ဘူး။—၆ ရာ. ၂၀:၃၅-၃၇။

၉။ မကောင်းတဲ့ အပေါင်းအသင်း​က ဘယ်လို ထိခိုက်​စေနိုင်​သလဲ။

^၉ ယောရှဖတ်​ရဲ့ မှတ်တမ်း​ကို ဖတ်ရှုခြင်းက ကိုယ့်​ဘဝကို ဆန်းစစ်​ဖို့ လှုံ့ဆော်​ပေးတယ်။ ဘယ်နည်း​အားဖြင့်​လဲ။ ယောရှဖတ်​ဟာ မင်းကောင်း​တစ်ပါး​ပါ။ မှန်​ရာကို ပြုလုပ်​ပြီး ‘ယေဟောဝါကို စိတ်နှလုံး အကြွင်းမဲ့ ရှာ’ ခဲ့တယ်။ (၆ ရာ. ၂၂:၉) ဒါပေမဲ့ မကောင်းတဲ့ အပေါင်းအသင်း​တွေရဲ့ ဩဇာ ခံခဲ့တယ်။ “ပညာရှိ​တို့နှင့် ပေါင်းဖော်​သောသူ​သည် ပညာရှိ​တတ်၏။ လူ​မိုက်​တို့နှင့် ပေါင်းဖော်​သောသူ​မူ​ကား ပျက်စီး​တတ်၏” ဆိုတဲ့ ကျမ်း​စကားကို အမှတ်ရပါ။ (သု. ၁၃:၂၀) အမှန်တရား​မှာ စိတ်ဝင်စားသူ​တွေကို ကျွန်တော်တို့ ကူညီပေး​နေတာ ဖြစ်နိုင်တယ်။ အာဟပ်​နဲ့ မလို​အပ်ဘဲ ပေါင်းသင်း​ခဲ့တဲ့​အတွက် ယောရှဖတ် သေလုနီးပါး ဖြစ်ခဲ့​ရ​သလို ကျွန်တော်တို့လည်း ယေဟောဝါကို ဝတ်​မပြု​သူတွေနဲ့ မလို​အပ်ဘဲ ပေါင်းသင်း​မယ်ဆိုရင် အန္တရာယ် ရှိတယ်။

၁၀။ (က) အိမ်ထောင်ပြုခြင်း​နဲ့ပတ်သက်ပြီး ယောရှဖတ်​ဆီကနေ ဘာသင်ယူနိုင်သလဲ။ (ခ) မကောင်းတဲ့ အပေါင်းအသင်း​ကိစ္စ ကြုံရ​တဲ့အခါ ဘယ်​အချက်ကို သတိရ​သင့်သလဲ။

^၁၀ ယောရှဖတ်​ရဲ့ ဖြစ်ရပ်​က​နေ ဘာ​သင်ခန်းစာ သင်ယူနိုင်​သလဲ။ ခရစ်ယာန်​တစ်ယောက်​ဟာ အသင်းတော်​ထဲမှာ သင့်တော်​တဲ့ အိမ်ထောင်ဖက် ရှာ​မ​တွေ့​နိုင်​ဘူးလို့ တွေး​ပြီး ယေဟောဝါကို မချစ်​သူ​တစ်ယောက်​ယောက်ကို စိတ်ဝင်စား​လာနိုင်တယ်။ ‘အရွယ်​မ​လွန်​ခင်’ အိမ်ထောင်ပြု​ဖို့ မယုံကြည်သူ ဆွေမျိုး​တွေရဲ့ ဖိအားပေးမှု ခံရ​နိုင်တယ်။ တချို့​ကလည်း “မေတ္တာနဲ့ လက်တွဲဖော် လိုချင်​တ​ယ်” လို့ပြော​ခဲ့တဲ့ ညီအစ်မ​တစ်ယောက်​လို ခံစားရ​နိုင်တယ်။ ခရစ်ယာန်​တစ်ယောက် ဘာ​လုပ်​မလဲ။ ယောရှဖတ်​ရဲ့ အတွေ့အကြုံ​ကို တွေးတောခြင်း​က​နေ အကူအညီ ရ​နိုင်တယ်။ သူဟာ လမ်းညွှန်မှု​ရဖို့ ဘုရားကို မျှော်ကိုး​နေကျပဲ။ (၆ ရာ. ၁၈:၄-၆) ဒါပေမဲ့ ယေဟောဝါကို မချစ်​ တဲ့ အာဟပ်​နဲ့ ပေါင်းသင်း​တဲ့အခါ ဘာဖြစ်​သွား​သလဲ။ စိတ်နှလုံး အကြွင်းမဲ့ ဝတ်ပြုသူတွေ​ကို ယေဟောဝါ ကြည့်​နေ​ကြောင်း ယောရှဖတ် သတိရ​သင့်တယ်။ ဒီခေတ်​မှာလည်း ကျွန်တော်တို့​အကျိုး​အတွက် ‘အစွမ်းတန်ခိုး ပြဖို့’ ယေဟော​ဝါ ‘မြေတစ်ပြင်​လုံးကို ဂရုတစိုက် ကြည့်​နေတယ်။’ (၆ ရာ. ၁၆:၉၊ ကဘ) ကျွန်တော်တို့ရဲ့ အခြေ​အနေကို နားလည်​ပေးတယ်။ ကျွန်တော်​တို့ကို ချစ်​တ​ယ်။ မေတ္တာနဲ့ လက်တွဲဖော် လိုအပ်​မှုကို ဘုရားသခင် ဖြည့်ဆည်း​ပေးမယ်​ဆိုတာ သင်​ယုံကြည်​သလား။ တစ်ချိန်​ချိန်မှာ ဖြည့်ဆည်း​ပေးမယ်​ဆိုတာ စိတ်ချ​ပါ။

၁၁၊ ၁၂။ (က) မိမိ​စိတ်ထဲ ရှိတာ​ကို ဟေဇကိ ဘယ်လို ဖော်ပြ​ခဲ့​သလဲ။ (ခ) ဘုရားသခင့် အမျက်တော်​က​နေ ဟေဇကိ ဘာကြောင့် လွတ်မြောက်​ခဲ့​သလဲ။

^၁၁ ဟေဇကိ​ဆီကနေ သင်ယူ​ရတဲ့ သင်ခန်းစာ​မှာ စိတ်နှလုံး ပါဝင်ပတ်သက်​တ​ယ်။ စိတ်​နှလုံးကို စစ်ဆေး​တဲ့​အရှင်​က ဟေဇကိရဲ့ စိတ်နှလုံးထဲမှာ ရှိတဲ့​အ​ရာကို ဖော်ထုတ်​ခဲ့တယ်။ (၂ ရာဇဝင်ချုပ် ၃၂:၃၁ ကိုဖတ်ပါ။) ဟေဇ​ကိ အသည်းအသန် ဖျားနာ​ချိန်မှာ ပြန်ကောင်း​လာမယ်​ဆိုတဲ့ လက္ခဏာ​သက်သေ​ကို ဘုရားသခင် ပေးခဲ့တယ်။ အရိပ် နောက်​ပြန်​ဆု​တ်တဲ့ သက်သေ​အကြောင်း စုံစမ်း​ဖို့ သံတမန်​တွေကို ဗာဗုလုန်ဘုရင် စေလွှတ်​ခဲ့​ပုံ ရတယ်။ (၄ ရာ. ၂၀:၈-၁၃။ ၆ ရာ. ၃၂:၂၄) ဒီကိစ္စ​မှာ ဘုရားသခင် ဝင်​မပါဘဲ ဟေဇကိ​ကို ‘လွှတ်ထား’ တဲ့အခါ စိတ်ထဲ ရှိတာ​တွေ ပေါ်​လာပြီး “ဘဏ္ဍာတော် အလုံးစုံ​တို့ကို ပြ” လိုက်တယ်။ အဲ​ဒီ​လုပ်ရပ်​အမှား​က “ဟေဇကိ​မင်း​၏ သဘော​ကို အကုန်​အ​စင်” ဖော်ပြ​လိုက်တာ​ပဲ။

^၁၂ ဟေဇကိ ဘာကြောင့် မာနစိတ် ဝင်​လာတယ်​ဆိုတာ ကျမ်းစာမှာ မဖော်ပြ​ထားဘူး။ အဆီးရီးယား​တွေကို အောင်နိုင်​လို့၊ ဘုရားသခင် အံ့ဖွယ်နည်း​နဲ့ ရောဂါ​ပျောက်စေ​ခဲ့လို့ ဖြစ်နိုင်တယ်။ “များစွာ​သော စည်းစိမ်ဥစ္စာ၊ ဂုဏ်အသရေ ရှိ” လို့လည်း ဖြစ်နိုင်တယ်။ ဘာ​ပဲ​ဖြစ်ဖြစ် “မိမိ​ခံရ​သော ကျေးဇူး​တော်နှင့် အထိုက်အလျောက် မ​ကျင့်” ဘဲ မာနထောင်လွှား​ခဲ့တယ်။ ဝမ်းနည်းစရာ​ပါပဲ။ ယေဟောဝါကို စုံလင်​တဲ့ စိတ်နှလုံး​နဲ့ ဝတ်ပြု​ခဲ့​ပေ​မဲ့ ယေဟောဝါ မနှစ်သက်​တာကို တစ်ခဏ​တော့​ လုပ်မိ​ခဲ့တယ်။ နောက်ပိုင်း “ကိုယ်ကို နှိမ့်ချ” ခဲ့တဲ့​အတွက် သူနဲ့ ပြည်သူ/သားတွေ ဘုရားသခင့် အမျက်တော်​က​နေ လွတ်မြောက်​ခဲ့ကြတယ်။—၆ ရာ. ၃၂:၂၅-၂၇။ ဆာ. ၁၃၈:၆။

၁၃၊ ၁၄။ (က) ကျွန်တော်တို့ရဲ့ သဘော​ကို စမ်းသပ်ဖို့ ဘယ်​အ​ချိန်မှာ ယေဟောဝါ ‘လွှတ်ထား’ နိုင်သလဲ။ (ခ) ပြီးမြောက်​ခဲ့ရာ​အတွက်​ ချီးမွမ်းခံ​ရ​တဲ့အခါ ဘာ​လုပ်နိုင်​သလဲ။

^၁၃ ဟေဇကိရဲ့ မှတ်တမ်း​ကို ဖတ်ရှု​တွေးတောခြင်း​က​နေ ဘာ​အကျိုး ရရှိနိုင်​သလဲ။ သနာခရိပ်​ကို ယေဟောဝါ ၡုံးနိမ့်​စေပြီး​နောက်၊ ဟေဇကိရဲ့ သေ​လု​မြော​ပါး​ဝေဒနာ​ကို ပျောက်ကင်း​စေပြီး​နောက် မကြာခင်​မှာပဲ ဟေဇကိ မာန​ထောင်လွှား​လာ​ကြောင်း သတိရပါ။ ကျွန်တော်တို့လည်း တစ်ခုခု အောင်မြင်​တဲ့အခါ စိတ်ထဲ ရှိတာ​တွေ ပေါ်​လာဖို့၊ ကျွန်တော်တို့ရဲ့ သဘော​ကို စမ်းသပ်ဖို့ ယေဟောဝါ ‘လွှတ်ထား’ တာ ဖြစ်နိုင်​သလား။ ဥပမာ၊ ညီအစ်ကို​တစ်ယောက် ဟောပြောချက် ပြင်ဆင်​ပြီး ပရိသတ်​ကြီး​ရှေ့မှာ ဟော​ပြောတယ်။ ဟောပြောချက် ကောင်း​လို့ လူတွေ ချီးမွမ်း​ကြ​တ​ယ်။ ဘယ်လို တုံ့ပြန်​မလဲ။

^၁၄ ချီးမွမ်းခံ​ရ​တဲ့အခါ ယေရှုရဲ့ ဒီ​စကား​တွေကို လိုက်နာ​သင့်တယ်- “သင်တို့​သည် စေခိုင်း​သမျှကို ဆောင်ရွက်​ပြီး​သောအခါ ‘ငါတို့သည် အသုံးမကျ​သော​ကျွန်များ ဖြစ်ကြ၏။ ဆောင်ရွက်​သင့်​ရာ​များ​ကိုသာ ငါ​တို့ ဆောင်ရွက်​ခဲ့ကြ​၏’ ဟု​ဆို​ကြလော့။” (လု. ၁၇:၁၀) ဒီကိစ္စ​မှာလည်း ဟေဇကိရဲ့ အတွေ့အကြုံ​က​နေ သင်ယူနိုင်​ပါတယ်။ ဟေဇ​ကိ​ဟာ မာနထောင်လွှား​လာပြီး “မိမိ​ခံရ​သော ကျေးဇူး​တော်နှင့် အထိုက်အလျောက် မ​ကျင့်” ခဲ့ဘူး။ ကျွန်တော်တို့​အတွက် ယေဟောဝါ လုပ်ဆောင်​ပေးခဲ့​တာတွေကို တွေးတောဆင်ခြင်ခြင်း​က ဘုရားသခင် မုန်း​တဲ့​သဘောထားကို ရှောင်​ဖို့ ကူညီပေး​ပါလိမ့်မယ်။ ယေဟောဝါကို ကျွန်တော်တို့ ကျေးဇူးတင်ချီးမွမ်း​နိုင်တယ်။ မိမိလူ​မျိုး​ကို  ကူညီပေးဖို့ ကျမ်းစာနဲ့ သန့်ရှင်းသော စွမ်းအား​တော်ကို ဘုရားသခင် ပြင်ဆင်ပေး​ထားတယ်။

၁၅၊ ၁၆။ ဘုရားသခင့် ကာကွယ်မှု​နဲ့ အသက်​ကို ယောရှိ ဘာကြောင့် ဆုံးၡုံး​ခဲ့ရ​သလဲ။

^၁၅ မင်းကောင်း ယောရှိ​ရဲ့ အတွေ့အကြုံ​က​နေ ဘာသင်ယူနိုင်သလဲ။ သူ့ကို ဘာက ၡုံးနိမ့်၊ သေဆုံး​စေ​သလဲ​ဆိုတာ သုံးသပ်ကြည့်ပါ။ (၂ ရာဇဝင်ချုပ် ၃၅:၂၀-၂၂ ကိုဖတ်ပါ။) အီဂျစ်​ဘုရင် နေခေါ​နဲ့ ယောရှိ ဘာပြဿနာ​မှ မရှိပေမဲ့ နေခေါ​ကို တိုက်​ဖို့ ယောရှိ “စစ်ချီ” ခဲ့တယ်။ နေခေါ​ရဲ့ စကားဟာ “ဘုရားသခင်၏ အမိန့်တော်” ဖြစ်တယ်လို့ ကျမ်းစာမှာ ဖော်ပြထားတယ်။ ဒါဆို​ရင် ယောရှိ ဘာကြောင့် စစ်ချီ​ခဲ့​သလဲ။ ကျမ်းစာမှာ မဖော်ပြ​ထားဘူး။

^၁၆ နေခေါ​ရဲ့ စကားဟာ ယေဟောဝါ​ဆီက ဖြစ်မှန်း ယောရှိ ဘယ်လို သိနိုင်​သလဲ။ သစ္စာရှိ​ပရောဖက် ယေရမိ​ကို မေးမြန်း​နိုင်တယ်။ (၆ ရာ. ၃၅:၂၃၊ ၂၅) ဒါပေမဲ့ မေးမြန်း​ခဲ့တဲ့ မှတ်တမ်း မရှိဘူး။ နေခေါ​ဟာ ဂျေရုဆလင်​ကို မဟုတ်ဘဲ တခြား​လူမျိုး​ကို တိုက်ခိုက်​ဖို့ ခါခေမိတ်​မြို့​ကို စစ်ချီ​တာ ဖြစ်တယ်။ ယေဟောဝါကို​ရော ဘုရား​လူမျိုး​ကိုပါ နေခေါ မ​စော်ကား​ဘူး။ ဒါကြောင့် နေခေါ​ကို စစ်တိုက်​တာ ယောရှိ မှားတယ်။ ဒီ​က​နေ ဘာသင်ယူနိုင်သလဲ။ ပြဿနာ ကြုံ​တဲ့အခါ ယေဟောဝါရဲ့ အလိုတော် ဘာလဲ​ဆိုတာ သုံးသပ်​သင့်တယ်။

၁၇။ ပြဿနာ ကြုံရ​တဲ့အခါ ယောရှိ​ရဲ့ အမှား​မျိုး မပြု​မိအောင် ဘယ်လို ရှောင်နိုင်​သလဲ။

^၁၇ ပြဿနာ ကြုံရ​တဲ့အခါ ဘယ်​ကျမ်းစာ​မူတွေ ပါဝင်ပတ်သက်​ကြောင်း၊ ဘယ်လို မျှမျှတတ ကျင့်သုံး​နိုင်​ကြောင်း စဉ်းစား​သင့်တယ်။ ကိစ္စ​တချို့ကို အကြီးအကဲတွေ​နဲ့ တိုင်ပင်​နိုင်တယ်။ ဒီကိစ္စ​နဲ့ပတ်သက်ပြီး သိ​ပြီးသား​အချက်တွေကို သုံးသပ်​နိုင်တယ်။ စာပေ​တွေမှာ ရှာဖွေလေ့လာ​နိုင်တယ်။ ဒါပေမဲ့ ထည့်​စဉ်းစား​သင့်တဲ့ တခြား​ကျမ်းစာမူ​တွေလည်း ရှိ​နိုင်တယ်။ အဲဒါတွေကို ဆန်းစစ်​ဖို့ အကြီးအကဲ​တစ်ယောက် ကူညီပေး​နိုင်တယ်။ ဥပမာ၊​ သတင်းကောင်း ဟောပြော​ဖို့ တာဝန်ရှိ​မှန်း ညီအစ်မ​တစ်ယောက် သိတယ်။ (တ. ၄:၂၀) အမှုဆောင်​မှာ​ ပါဝင်ဖို့ နေ့​တစ်နေ့​ကို စီစဉ်​ထား​ပေ​မဲ့ မယုံကြည်သူ​ခင်ပွန်းက မသွား​စေချင်​ဘူး။ အခု​တလော အချိန်​သိပ်​မရ​ကြ​လို့ အဲ​ဒီနေ့​မှာတော့ နှစ်ယောက်​အတူ တစ်နေရာ​သွား​ချ​င်​တ​ယ်။ အဲဒီအခါ ဘုရားကို နာခံ​ပါ၊ တပည့်ဖြစ်စေ​ပါ​ဆိုတဲ့ ကျမ်းချက်​တွေကို ညီအစ်မ စဉ်းစား​မိ​နိုင်တယ်။ (မ. ၂၈:၁၉၊ ၂၀။ တ. ၅:၂၉) လက်အောက်​ခံဖို့၊ အကျိုးသင့်အကြောင်းသင့်​ရှိ​ဖို့​လည်း စဉ်းစား​မိတယ်။ (ဧ. ၅:၂၂-၂၄။ ဖိ. ၄:၅) သူ့​ခင်ပွန်းက အမှုဆောင်​လုပ်ငန်းကို လုံးဝ ဆန့်ကျင်​နေတာ​လား။ ဒါမှမဟုတ် ဒီ​တစ်ရက်​ပဲ အတူ​ရှိနေ​ပေးဖို့ တောင်းဆို​တာလား။ ဘုရားသခင့် အလို​တော်ကို ပိုင်းခြားသိမြင်​ပြီး ကြည်လင်​တဲ့ သိစိတ်​ရှိ​ဖို့ ကြိုးစားရာမှာ မျှတ​ဖို့ လိုတယ်။

၁၈။ ဒီဆောင်းပါးမှာ ဖော်ပြထားတဲ့ ဘုရင်​လေးပါး​အကြောင်း သုံးသပ်ခြင်း​က​နေ ဘာ​အကျိုး ရရှိနိုင်​သလဲ။

^၁၈ ကျွန်တော်တို့ မစုံလင်​တဲ့အတွက် အထက်​မှာ ဆွေးနွေး​ခဲ့တဲ့ ဘုရင်​လေးပါး​ရဲ့ အမှား​မျိုး တစ်ခါတလေ ကျူးလွန်မိ​နိုင်တယ်။ (၁) လူ့​ဉာဏ်​ပညာ​ကို အမှတ်မထင် အားကိုး​မိ​နိုင်တယ်။ (၂) မကောင်းတဲ့ အပေါင်းအသင်း​တွေနဲ့ ပေါင်းသင်း​မိ​နိုင်တယ်။ (၃) မာနကြီး​လာနိုင်တယ်။ (၄) ဘုရားအလိုတော်​ကို ထည့်မတွက်​ဘဲ ဆုံးဖြတ်​မိ​နိုင်တယ်။ ဘုရင်​လေးပါး​ရဲ့ ကောင်းကွက်​တွေကို ယေဟောဝါ မြင်ခဲ့​သလို ကျွန်တော်တို့ရဲ့ ကောင်းကွက်​ကိုလည်း မြင်​ပေး​လို့ ကျေးဇူးတင်စရာ​ပါပဲ။ မိမိ​ကို ဘယ်လောက် ချစ်​မှန်း၊ ဘယ်လောက် အပြည့်အဝ အမှုဆောင်​ချ​င်​မှန်း​လည်း ယေဟောဝါ သိတယ်။ ကြီးလေး​တဲ့ အမှားတွေ မပြု​မိအောင် ကူညီ​ပေးတဲ့ သတိပေး​နမူနာ​တွေကိုလည်း ဖော်ပြ​ပေးထားတယ်။ ဒီ​ကျမ်းစာမှတ်တမ်း​တွေကို တွေးတောဆင်ခြင်​ပြီး ယေဟောဝါ ပြင်ဆင်ပေး​ရာတွေ​အတွက် ကျေးဇူးတင်​ကြပါစို့။