“ငတ်မွတ်မှု အဆုံးသတ်ရေး။” ဒီစကားတွေက ကမ္ဘာ့ခေါင်းဆောင်တွေ ဖြေရှင်းဖို့ ကြိုးစားနေတဲ့ အကြီးမားဆုံးပြဿနာတစ်ခုကို ဖော်ပြနေပါတယ်။ လူတိုင်း စားနပ်ရိက္ခာရရှိရေးဆိုတဲ့ ပန်းတိုင်ပါပဲ။ a ဘယ်လူသားမှ ဆာလောင်မွတ်သိပ်မှု မကြုံရတော့မယ့်အချိန် ရောက်နိုင်ပါ့မလား။ ကျမ်းစာအဆိုက ဘာလဲ။

အခုခေတ်မှာ အစာခေါင်းပါးမယ့်အကြောင်း ကျမ်းစာ ကြိုပြောထား

 “နောက်ဆုံးကာလ” လို့ခေါ်တဲ့ ကျွန်တော်တို့ခေတ်မှာ အစာရှားပါးမှုတွေ ဖြစ်မယ်လို့ ကျမ်းစာ ကြိုဟောထားတယ်။ (၂ တိမောသေ ၃:၁) အစာခေါင်းပါးမှုအတွက် ဘုရားမှာ တာဝန်မရှိပါဘူး။ ဒါပေမဲ့ ဒီလိုဖြစ်လာမယ့်အကြောင်း ကြိုသတိပေးထားတယ်။ (ယာကုပ် ၁:၁၃) ကျမ်းစာ ကြိုဟောချက်နှစ်ခုကို သတိပြုကြည့်ပါ။

 “အစာခေါင်းပါးတာ . . . တွေ တစ်နေရာပြီး တစ်နေရာ ဖြစ်လိမ့်မယ်။” (မဿဲ ၂၄:၇) ဒေသများစွာမှာ အငတ်ဘေးဆိုက်မယ့်အကြောင်း ကျမ်းစာ ကြိုဟောထားတာပါ။ အစာထုတ်လုပ်ဖြန့်ဖြူးရေးဆိုင်ရာ လေ့လာစောင့်ကြည့်သူတွေက မကြာသေးခင်က အခုလို အစီရင်ခံခဲ့တယ်– “မွတ်သိပ်မှု ပပျောက်ရေး၊ အာဟာရပြည့်ဝတဲ့ အစားအစာ အလုံအလောက် ရရှိရေးအတွက် ကြိုးပမ်းအားထုတ်မှုတွေက လှုပ်လေမြုပ်လေပါပဲ။” b ဒါဇင်နဲ့ချီတဲ့ နိုင်ငံတွေက သန်းရာချီတဲ့ လူတွေ အစားအစာ ချို့တဲ့နေတယ်။ စိတ်မကောင်းစရာက အစာရှားပါးမှုကြောင့် အများစု သေဆုံးသွားကြတယ်။

 “ကြည့်လိုက်တော့ မြင်းနက်တစ်စီးကို မြင်တယ်။ မြင်းစီးသူရဲက ချိန်ခွင်တစ်လက် ကိုင်ထားတယ်။” (ဗျာဒိတ် ၆:၅) ဒီကြိုဟောချက်မှာ ဖော်ပြထားတဲ့ မြင်းနဲ့ မြင်းစီးသူရဲဟာ နောက်ဆုံးကာလမှာဖြစ်ပျက်မယ့် အစာခေါင်းပါးမှုကို တင်စားနေတယ်။ c မြင်းစီးသူရဲရဲ့လက်ထဲမှာ ချိန်ခွင်ရှိတယ်။ အစားအစာသိပ်မရှိတော့ နည်းနည်းချင်းစီပဲ ချိန်တွယ်ပေးနိုင်တယ်ဆိုတဲ့ သဘောပါ။ မြင်းစီးသူရဲ ထွက်လာတဲ့အခါ အသံတစ်သံကိုလည်း ကြားရတယ်။ အစားအစာတွေ တအားစျေးကြီးလာတော့မှာမို့ အခြေခံစားသောက်ကုန်တွေကို မဖြုန်းတီးပါနဲ့ဆိုပြီး သတိပေးတဲ့စကားပါ။ (ဗျာဒိတ် ၆:၆) ဒီစကားတွေက ဒီနေ့ခေတ် ကမ္ဘာချီ စားနပ်ရိက္ခာပြဿနာကို တိတိကျကျ ကွက်ကွက်ကွင်းကွင်း လှစ်ဟဖော်ပြနေတယ်မဟုတ်လား။ အခုအချိန်မှာ လူသန်းထောင်ချီဟာ အာဟာရရှိတဲ့အစားအစာတွေ မရကြဘူး၊ မဝယ်နိုင်ကြဘူး။

အစာခေါင်းပါးမှု ဘယ်လိုပပျောက်သွားမလဲ

 ကျွန်တော်တို့ရဲ့ ကမ္ဘာမြေဟာ မှီတင်းနေထိုင်နေသူယောက်တိုင်းအတွက် အစားအစာ လောက်ငရုံထက်မက ပိုလျှံအောင် ထုတ်လုပ်ပေးနေတယ်လို့ ပညာရှင်တွေ ဆိုကြတယ်။ ဒါဆို ဘာကြောင့် အစာရှားပါးမှု ပြဿနာဖြစ်နေတာလဲ။ ဒီပြဿနာတွေကို ကျွန်တော်တို့ရဲ့ဖန်ဆင်းရှင် ယေဟောဝါ d ဖြေရှင်းပေးမယ့်အကြောင်း ကျမ်းစာမှာ ဘယ်လိုဆိုထားသလဲ။

 ဘုရားနိုင်ငံတော်က ငတ်မွတ်မှုကို ဖြစ်ပေါ်စေတဲ့ အကြောင်းရင်းတွေကို ဖယ်ရှားပစ်တော့မှာဖြစ်လို့ လူသားအားလုံး အာဟာရရှိတဲ့အစားအစာတွေ အလျှံပယ် ရရှိပါတော့မယ်။ (ဟေရှာယ ၂၅:၆) ဒါတွေကို ဘုရားနိုင်ငံတော် ဘယ်တော့လုပ်ဆောင်ပေးမလဲ။ ထပ်သိချင်ရင် “ဘုရားသခင့်နိုင်ငံတော်က ကမ္ဘာမြေကို ဘယ်အချိန်မှာ အုပ်ချုပ်မလဲ” ဆောင်းပါးကို ဖတ်ကြည့်ပါ။