မိမိအချစ်မြတ်နိုးဆုံးသားတော်သည် တစ်နေ့နေ့တွင် ဆင်းရဲဝေဒနာခံစားပြီး သေဆုံးရမည်ကို ယေဟောဝါသိတော်မူသည်။ ကမ္ဘာဦး ၃:၁၅ တွင်မှတ်တမ်းတင်ထားသော ပရောဖက်ပြုချက်၌ ထိုအမှန်တရားကို အရိပ်အမြွက်ဖော်ပြသည်။ သားတော်ကိုပေးဆပ်ရခြင်းသည် မိမိအတွက် မည်မျှတိုင်နစ်နာဆုံးရှုံးရကြောင်း လူသားတို့နားလည်စေရန် ကိုယ်တော် ဖော်ပြနိုင်ပါမည်လော။ ယင်းနှင့်ပတ်သက်သော ဖြစ်ရပ်မှန်ဇာတ်လမ်းတစ်ပုဒ် ကျမ်းစာတွင် ပါရှိသည်။ ဘုရားသခင်သည် အာဗြဟံချစ်မြတ်နိုးသောသား ဣဇာက်ကို ပူဇော်ရန် တောင်းဆိုခဲ့သည်။

အာဗြဟံ၏ယုံကြည်ခြင်းသည် အလွန်ထူးခြားလှ၏။ ကြိုဟောထားသည့်ကယ်နုတ်ရှင် သို့မဟုတ် အမျိုးအနွယ်သည် ဣဇာက်ထံမှ ဆင်းသက်လာမည်ဟု အာဗြဟံကို ဘုရားသခင်ကတိပေးထားကြောင်း သတိရပါ။ ဘုရားသခင်သည် လိုအပ်လျှင် ဣဇာက်ကို သေခြင်းမှ ရှင်ပြန်ထမြောက်ပေးနိုင်ကြောင်း အာဗြဟံယုံကြည်စိတ်ချလျက် သူ့သားကို ပူဇော်ရန် နာခံမှုရှိစွာ ဆုံးဖြတ်လိုက်သည်။ သို့သော် ဘုရားသခင်၏ ကောင်းကင်တမန်တစ်ပါးက အချိန်မီ တားဆီးခဲ့သည်။ အာဗြဟံသည် တန်ဖိုးအထားရဆုံးသားကို ပူဇော်ရန် လိုလိုလားလားရှိသောကြောင့် ဘုရားသခင်ချီးမွမ်းခဲ့ပြီး ထိုသစ္စာရှိဘိုးဘေးကို ပေးထားသည့် မိမိကတိတော်များကို ထပ်မံအတည်ပြုပေးခဲ့သည်။

နောက်ပိုင်းတွင် ဣဇာက်၌ ဧသောနှင့်ယာကုပ်ဟူသော သားနှစ်ဦးရှိလာသည်။ ယာကုပ်သည် ဧသောနှင့်မတူဘဲ မြင့်မြတ်သောအရာများကို တန်ဖိုးထားလေးမြတ်သောကြောင့် ကောင်းချီးခံစားခဲ့ရသည်။ ဘုရားသခင်သည် ယာကုပ်ကို အစ္စရေးဟု အမည်ပြောင်းပေးလိုက်ရာ သူ၏သား ၁၂ ယောက်သည် အစ္စရေးမျိုးနွယ်စုများ၏ ဘိုးဘေးများဖြစ်လာကြသည်။ သို့သော် ထိုမိသားစုသည် လူမျိုးကြီးတစ်မျိုး မည်သို့ဖြစ်လာခဲ့သနည်း။

သား ၁၂ ယောက်အနက် အများစုသည် ညီဖြစ်သူယောသပ်ကို မနာလိုစိတ်ဝင်လာချိန်မှစ၍ အဖြစ်အပျက်များစတင်လာသည်။ သူတို့သည် ညီကို ကျွန်အဖြစ်ရောင်းစားလိုက်သည်။ သို့နှင့် ယောသပ်သည် အီဂျစ်ပြည်သို့ရောက်သွားသည်။ သို့သော် ဘုရားသခင်သည် သစ္စာရှိပြီး ရဲရင့်သော ထိုလူငယ်လေးကို ကောင်းချီးပေးခဲ့သည်။ ယောသပ်သည် ဆိုးရွားသောအခက်အခဲများ ကြုံခဲ့ရပြီး နောက်ဆုံးတွင် အီဂျစ်ဘုရင် ဖာရော၏ရွေးချယ်မှုခံရကာ အခွင့်အာဏာများစွာ လွှဲအပ်ခံခဲ့ရသည်။ ယင်းသည် အမှန်ပင် အချိန်ကိုက်ဖြစ်ပျက်ခဲ့၏၊ အကြောင်းမှာ အငတ်ဘေးကြောင့် ယာကုပ်သည် သူ့သားအချို့ကို အီဂျစ်ပြည်တွင် အစားအစာဝယ်ရန် စေလွှတ်လိုက်ချိန်တွင် ယောသပ်သည် အစားအစာများကို ကြီးကြပ်ကွပ်ကဲနေရသောကြောင့်ဖြစ်သည်။ ယောသပ်သည် နောင်တရနေသော သူ၏အစ်ကိုများနှင့် မမျှော်လင့်ဘဲပြန်လည်ဆုံဆည်းပြီးနောက် သူတို့ကို ခွင့်လွှတ်လိုက်ပြီး အီဂျစ်ပြည်သို့ မိသားစုလိုက်ပြောင်းရွှေ့လာရန် စီစဉ်ခဲ့သည်။ သူတို့သည် အီဂျစ်ပြည်တွင် အကောင်းဆုံးမြေနေရာရခဲ့ပြီး ထိုတွင် ဆက်လက်ကြီးပွားတိုးများလာခဲ့သည်။ ဘုရားသခင်သည် ကိုယ်တော်၏ကတိတော်များပြည့်စုံလာစေရန် ကိစ္စရပ်များကို ဤသို့ဖြစ်လာအောင် စီစဉ်ခဲ့ကြောင်း ယောသပ်နားလည်ခဲ့သည်။

အိုမင်းနေပြီဖြစ်သော ယာကုပ်သည် တိုးပွားလာသည့် သူ့မိသားစုနှင့်အတူ ကျန်အသက်တာတစ်လျှောက်တွင် အီဂျစ်ပြည်၌ နေထိုင်ခဲ့သည်။ ကတိထားရာ အမျိုးအနွယ်ဖြစ်သည့် ကယ်နုတ်ရှင်သည် တန်ခိုးကြီးသောဘုရင်ဖြစ်မည်၊ သားဖြစ်သူ ယုဒ၏မျိုးရိုးမှ မွေးဖွားလာမည်ဟု မသေဆုံးမီတွင် ယာကုပ်ကြိုဟောခဲ့သည်။ နှစ်များစွာကုန်လွန်ပြီးနောက် ယောသပ်က တစ်နေ့တွင် ယာကုပ်၏မိသားစုကို အီဂျစ်ပြည်မှ ဘုရားသခင်ခေါ်ဆောင်သွားမည်ဖြစ်ကြောင်း မသေဆုံးမီတွင် ကြိုဟောခဲ့သည်။

—ကမ္ဘာဦးအခန်းကြီး ၂၀ မှ ၅၀; ဟေဗြဲ ၁၁:၁၇-၂၂ ကိုအခြေခံသည်။