စည်းစိမ်ဥစ္စာ အသုံးပြုပုံ​နဲ့ ပတ်သက်ပြီး တပည့်​တွေကို ယေရှု ကောင်းကောင်း သွန်သင်​ပေးတယ်။ ဒါပေမဲ့ သူ​ပြောတာကို တပည့်​တွေ​ပဲ နားထောင်​နေကြတာ မဟုတ်ဘူး။ အဲဒီမှာ ဖာရိရှဲတွေ​လည်း ရှိနေတယ်။ သူတို့လည်း ယေရှုရဲ့ ဆုံးမ​စကားကို နှလုံးသွင်းသင့်တယ်။ ဘာကြောင့်လဲ။ သူတို့က “ငွေ​မက်” သူတွေ​ဖြစ်လို့ပဲ။ ဒါပေမဲ့ ယေရှု​ပြောတာတွေကို သူတို့​ကြားတဲ့​အခါ “နှာခေါင်း​ရှုံ့​ကြတယ်။”—လုကာ ၁၅:၂။ ၁၆:၁၃၊ ၁၄။

ယေရှု​ကတော့ မကြောက်​ဘူး။ သူတို့ကို ဒီလို​ပြောတယ်– “ခင်ဗျားတို့​က ဖြောင့်မတ်တယ်​လို့ အထင်​ခံရ​အောင် လူရှေ့​သူ​ရှေ့ လုပ်ပြ​တတ်​ပေမဲ့ ဘုရားသခင်က​တော့ ခင်ဗျားတို့ရဲ့​စိတ်​ကို သိတယ်။ လူ့​အမြင်မှာ အထင်ကြီး​စ​ရာ​ဟာ ဘုရားသခင်ရဲ့​အမြင်မှာ​တော့ စက်ဆုပ်​စ​ရာ​ပဲ။”—လုကာ ၁၆:၁၅။

ဖာရိရှဲတွေ​ဟာ “လူ့​အမြင်မှာ အထင်ကြီး” ခံခဲ့ရ​တာ ကြာ​နေပြီ။ အခုတော့ အခြေအနေ​တွေ ပြောင်းလဲ​တော့​မယ့်​အချိန် ရောက်လာပြီ။ ချမ်းသာ​ကြွယ်ဝ​လို့၊ ဘာသာရေး​နဲ့ နိုင်ငံရေးမှာ သြဇာ​အာဏာ​ရှိလို့ အကြီးအကျယ် အထင်ကြီး လေးစား​ခံရသူတွေ​ဟာ အမြင့်​ကနေ အနိမ့်​ကို ဆင်း​ရတော့မယ်။ ဘုရားကို မှီခို​ဖို့​လို​ကြောင်း အသိအမှတ်ပြု​တဲ့ သာမန် လူတန်းစားတွေ​ကတော့ အမြင့်​ကို​ရောက်တော့​မယ်။ အဲဒီလို​ကြီးမားတဲ့ အပြောင်းအလဲ ဖြစ်နေပြီ​ဆိုတာ ယေရှု ဒီလို​ရှင်းပြတယ်–

“ပညတ်​ကျမ်းနဲ့ ပရောဖက်​ကျမ်း​ကို ယောဟန်​လက်ထက်​အထိ ဟောပြောခဲ့​တယ်။ ဒါပေမဲ့ အခု​အချိန်​က​စပြီး ဘုရားသခင့်​နိုင်ငံတော် သတင်းကောင်းကို ဟောပြော​နေပြီ။ လူအမျိုးမျိုး​က နိုင်ငံတော်​ဝင်ခွင့်​ရဖို့ မဆုတ်မနစ် ကြိုးစား​ကြတယ်။ ကောင်းကင်နဲ့ မြေကြီး ကွယ်ပျောက်​ဖို့​ဆိုတာ လွယ်​ကောင်း​လွယ်​လိမ့်မယ်။ ပညတ်​ကျမ်းက​တော့ အက္ခရာ​တစ်လုံး၊ ဝစ္စ​ပေါက်​တစ်လုံး​တောင် မပြည့်စုံ​ဘဲ မနေဘူး။” (လုကာ ၃:၁၈။ ၁၆:၁၆၊ ၁၇) အပြောင်းအလဲ ဖြစ်နေပြီ​ဆိုတာ ယေရှုရဲ့​စကားတွေက ဘယ်လို ဖော်ပြ​နေသလဲ။

ဂျူး​ဘာသာရေး ခေါင်းဆောင်​တွေ​က မောရှေ​ပညတ်ကို လိုက်နာတယ်​လို့ ဂုဏ်ယူ​စွာ ပြောတတ်​ကြတယ်။ မျက်မမြင်​တစ်​ယောက်ကို ပြန်မြင်​အောင် ယေရှု ကုသ​ပေးတဲ့​အခါ ဖာရိရှဲတွေက “ငါ​တို့​က မောရှေရဲ့​တပည့်။ မောရှေ​ကို ဘုရားသခင် ဗျာဒိတ်ပေး​ခဲ့​မှန်း ငါ​တို့​သိတယ်” ဆိုပြီး ဂုဏ်ယူ​ဝင့်ကြွား​စွာ ပြောခဲ့တာကို သတိရပါ။ (ယောဟန် ၉:၁၃၊ ၂၈၊ ၂၉) တကယ်တော့ မောရှေ​က​တစ်ဆင့်​ပေးတဲ့ ပညတ်တရားရဲ့ ရည်ရွယ်ချက်​တစ်ခုက နှိမ့်ချ​သူတွေကို မေရှိယ၊ ယေရှု​ဆီ ပို့ဆောင်ပေး​ဖို့​ပဲ။ နှစ်ခြင်း​ပေးသူ ယောဟန်​က​လည်း ယေရှုကို “ဘုရားသခင်ရဲ့​သိုးသငယ်” အဖြစ် ဖော်ပြခဲ့တယ်။ (ယောဟန် ၁:၂၉-၃၄) ယောဟန်​အမှုဆောင်ချိန်​က စပြီး နှိမ့်ချတဲ့ ဂျူးတွေ၊ အထူးသဖြင့် ဆင်းရဲသားတွေ​ဟာ “ဘုရားသခင့်​နိုင်ငံတော်” အကြောင်းကို ကြားနာ​ခဲ့​ရတယ်။ မှန်ပါတယ်၊ ဘုရား​နိုင်ငံတော် လက်အောက်ခံ​ဖြစ်ချင်​သူတွေ၊ နိုင်ငံတော်​အုပ်ချုပ်မှု​ကနေ အကျိုး​ခံစားချင်​သူတွေ အားလုံး​အတွက် “သတင်းကောင်း” ရှိပါတယ်။

မောရှေ​ပညတ်​က မပြည့်စုံ​ဘဲ မနေဘူး။ အဲဒါက မေရှိယ​ဆီ ပို့ဆောင်​ပေးခဲ့ပြီ။ ဒါ့အပြင် မောရှေ​ပညတ်ကို လိုက်နာ​ဖို့ တာဝန်​မရှိတော့ဘူး။ ဥပမာ၊ ပညတ်တရား​က အကြောင်း​အမျိုးမျိုး​ကြောင့် ကွာရှင်း​ခွင့်ပြု​တယ်။ ယေရှု​ကတော့ “ကိုယ့်​ဇနီးကို ကွာရှင်း​ပြီး တခြား​မိန်းမ​နဲ့ လက်ထပ်​တဲ့​သူဟာ အိမ်ထောင်ရေး​ဖောက်ပြန်သူ​ပဲ။ ကွာရှင်း​ထားတဲ့​မိန်းမကို လက်ထပ်​တဲ့​သူကလည်း အိမ်ထောင်ရေး​ဖောက်ပြန်သူ​ပဲ” လို့​ရှင်းပြတယ်။ (လုကာ ၁၆:၁၈) ကိစ္စရပ်​တိုင်းမှာ စည်းမျဉ်းတွေ​ထုတ်​ချင်တဲ့ ဖာရိရှဲတွေ ဘယ်လောက်တောင် ဒေါသ​ထွက်​လိုက်မလဲ။

 အခု အပြောင်းအလဲ​ကြီး ဖြစ်နေပြီ​ဆိုတာ ပေါ်လွင်​စေဖို့ ယေရှု ပုံဥပမာ​တစ်ခု ပြောပြတယ်။ လူ​နှစ်ယောက်​အကြောင်း​ဖြစ်ပြီး သူတို့ရဲ့ အဆင့်အတန်း၊ အခြေအနေ​တွေ မယုံ​နိုင်လောက်အောင် ပြောင်းလဲ​သွားတယ်။ ဒီ​ပုံဥပမာ​ကို လေ့လာ​တဲ့​အခါ နားထောင်သူ​တွေ​ထဲမှာ လူတွေ အထင်ကြီး​လေးစားတဲ့၊ ငွေ​မက်​တဲ့ ဖာရိရှဲတွေ​လည်း ပါတယ်​ဆိုတာ သတိရပါ။

ယေရှု ဒီလို​ပြောပြတယ်– “သူဌေး​တစ်ယောက်က ခရမ်းရောင်​ပိတ်ချော​ကို ဝတ်ဆင်​ပြီး နေ့တိုင်း စည်းစိမ်​ယစ်​နေတယ်။ တစ်ကိုယ်လုံး အနာ​ပေါက်​နေတဲ့ သူတောင်းစား​လာဇရု​ကို သူ့​အိမ်​တံခါးဝ​မှာ လူတွေ လာ​ထား​လေ့​ရှိတယ်။ လာဇရု​က သူဌေး​ရဲ့ စားပွဲ​ကနေ​ကျတဲ့ စား​ကြွင်း​စား​ကျန်​ကို စား​ရဖို့ မျှော်နေ​တတ်​တယ်။ ခွေး​တွေ​က သူ့​ကိုယ်​ပေါ်​က အနာတွေကို လာ​လျက်​ကြတယ်။”—လုကာ ၁၆:၁၉-၂၁။

ဖာရိရှဲတွေ​ဟာ ငွေ​မက်​သူတွေ​ဖြစ်လို့ ယေရှု​က သူတို့ကို “သူဌေး” နဲ့​ပုံခိုင်း​ပြ​မှန်း ထင်ရှား​ပါတယ်။ ဒီ ဂျူး​ဘာသာရေး ခေါင်းဆောင်​တွေဟာ တန်ဖိုးကြီး​ပြီး ဆန်းပြား​တဲ့​ဝတ်စုံ​တွေ ဝတ်​ကြတယ်။ ချမ်းသာ​ကြွယ်ဝတဲ့​အပြင် အခွင့်အရေးတွေ၊ အခွင့်ထူး​တွေ​လည်း ရထား​ကြတယ်။ တော်ဝင်​အ​၀တ်​ဖြစ်တဲ့ ခရမ်းရောင်​ဝတ်ရုံ​က သူတို့ရဲ့ အခွင့်ထူး​ခံ အနေအထား​ကို ပုံဖော်​ပြီး အဖြူရောင်​ပိတ်ချော​က ကိုယ့်ကိုယ်ကိုယ် ဖြောင့်မတ်တယ်​လို့ ယူဆတာ​ကို ပုံဖော်​တယ်။—ဒံယေလ ၅:၇။

ချမ်းသာ​ပြီး မာန်​တက်နေတဲ့ အဲဒီ​ခေါင်းဆောင်​တွေ​က ဆင်းရဲသား သာမန်​လူတန်းစား​ကို ဘယ်လို သဘောထားသလဲ။ ပညတ်တရားကို မသိ​သူတွေ၊ ပညတ်တရားကို မသင်ယူ​ထိုက်​သူတွေ၊ မြေကြီးသား အမ်ဟာအရက်စ် ဆိုပြီး အထင်သေး ရွံရှာ​ကြတယ်။ (ယောဟန် ၇:၄၉) အဲဒါက “သူဌေး​ရဲ့ စားပွဲ​ကနေ​ကျတဲ့ စား​ကြွင်း​စား​ကျန်” ကိုတောင် မျှော်နေ​ရှာ​ တဲ့ “သူတောင်းစား လာဇရု” ရဲ့​အခြေအနေကို ဖော်ပြတယ်။ တစ်ကိုယ်လုံး အနာ​ပေါက်​နေတဲ့ လာဇရု​လို​ပဲ သာမန်​လူတန်းစားတွေ​ကို ဘုရား​ရှေ့မှာ နှစ်သက်စရာ​မကောင်း​သူတွေ​ဆိုပြီး အထင်သေး ရွံရှာ​ကြတယ်။

အဲဒီလို သနားစရာ အခြေအနေ​မျိုး အချိန်​အတိုင်းအတာ​တစ်ခု​အထိ ရှိခဲ့ပေမဲ့ သူဌေး​လို​လူတွေ အတွက်ရော၊ လာဇရု​လို​လူတွေ အတွက်ပါ ကြီးမားတဲ့ အပြောင်းအလဲ​ဖြစ်မယ့်​အချိန် ရောက်ပြီ​ဆိုတာ ယေရှု​သိတယ်။

အခြေအနေ​တွေ ပြောင်းလဲသွား​တာ​ကို ယေရှု အခုလို ဆက်ပြောတယ်– “တစ်နေ့​တော့၊ လာဇရု သေဆုံးသွားတဲ့​အတွက် ကောင်းကင်တမန်တွေ​က သူ့ကို အာဗြဟံ​အနား ပို့ပေး​ကြတယ်။ သူဌေး​လည်း ကွယ်လွန်​သွားတော့ သင်္ဂြိုဟ်​လိုက်ကြတယ်။ သူက သင်္ချိုင်း​မှာ အလူးအလိမ့် ဝေဒနာ​ခံ​နေရ​တုန်း မျှော်ကြည့်​လိုက်တဲ့အခါ အဝေး​မှာ အာဗြဟံ​ကို မြင်တယ်။ အာဗြဟံရဲ့​ဘေးမှာ လာဇရု​ကိုလည်း မြင်တယ်။”—လုကာ ၁၆:၂၂၊ ၂၃။

အာဗြဟံ​သေ​တာ ကြာပြီ၊ သင်္ချိုင်း​မှာ ရှိနေတယ်​ဆိုတာ နားထောင်​နေ​သူတွေ သိတယ်။ အာဗြဟံ​အပါအဝင် သင်္ချိုင်း​ကို ရောက်​သွား​သူတွေဟာ မမြင်နိုင်၊ စကား​မပြောနိုင်ဘူး​ဆိုပြီး ကျမ်းစာက ရှင်းရှင်း​လေး ပြောတယ်။ (ဒေသနာ ၉:၅၊ ၁၀) ဒါဆိုရင် ယေရှု​ပြောတဲ့ ပုံဥပမာ​ရဲ့ ဆိုလိုရင်း​နဲ့ ပတ်သက်ပြီး ဘာသာရေး​ခေါင်းဆောင်​တွေ ဘယ်လို ယူဆသလဲ။ သာမန်​လူတန်းစားတွေ၊ ငွေ​မက်​တဲ့ ဘာသာရေး​ခေါင်းဆောင်​တွေ​နဲ့ ပတ်သက်ပြီး ယေရှု ဘာ​ပြော​နေတာ ဖြစ်မလဲ။

ယေရှု​က “ပညတ်​ကျမ်းနဲ့ ပရောဖက်​ကျမ်း​ကို ယောဟန်​လက်ထက်​အထိ ဟောပြောခဲ့​တယ်။ ဒါပေမဲ့ အခု​အချိန်​က​စပြီး ဘုရားသခင့်​နိုင်ငံတော် သတင်းကောင်းကို ဟောပြော​နေပြီ” လို့​ပြောခြင်း​အားဖြင့် အပြောင်းအလဲ ဖြစ်နေပြီ​ဆိုတာ ထောက်ပြ​ခဲ့​တယ်။ ယောဟန်နဲ့ ယေရှုခရစ်ရဲ့ ဟောပြောခြင်း လုပ်ငန်း​ကြောင့် လာဇရု​နဲ့ သူဌေး​နှစ်ယောက်စလုံးဟာ အရင်​အခြေအနေ​မှာ သေ​ဆုံး​သွားပြီ၊ အခု ဘုရား​ရှေ့မှာ အနေအထား​အသစ် ရှိနေကြ​ပြီ။

အထူးသဖြင့် နှိမ့်ချ​သူတွေ၊ ဆင်းရဲသားတွေ​ဟာ ပုံဆောင်သဘော​အရ ငတ်ပြတ်​နေတာ ကြာပြီ။ ဒါပေမဲ့ သူတို့က ပထမ​ပိုင်းမှာ နှစ်ခြင်း​ပေးသူ​ယောဟန်​ဟောပြောတဲ့၊ နောက်ပိုင်း ယေရှု​ဟောပြောတဲ့ နိုင်ငံတော်သတင်းကို လက်ခံ​တုံ့ပြန်​ခြင်း​အားဖြင့် အကူအညီ​ရရှိ​ကြတယ်။ အစ​တုန်း​ကတော့ သူတို့ဟာ  ဘာသာရေး​ခေါင်းဆောင်​တွေရဲ့ ‘ပုံဆောင်​စားပွဲ​ကနေ ကျတဲ့ စား​ကြွင်း​စား​ကျန်’ ကိုပဲ စား​ရတယ်။ အခုတော့ အရေး​ကြီးတဲ့  ကျမ်းစာ​အမှန်တရား​တွေ၊ အထူးသဖြင့် ယေရှု​ သွန်သင်​ပေးတဲ့  ကောင်းမွန်​လှတဲ့  အရာတွေကို စားသုံး​နေ​ရပြီ။ ဒါကြောင့် ယေဟောဝါ​ဘုရား​ရှေ့မှာ မျက်နှာသာ​ရ အနေ​အထား​ ရရှိ​လာကြတယ်။

ဒါပေမဲ့ ချမ်းသာ​ကြွယ်ဝ​ပြီး သြဇာ​အာဏာ​ကြီးတဲ့ ဘာသာရေး​ခေါင်းဆောင်​တွေ​ကတော့ ယောဟန် ဟောပြောတဲ့၊ နောက်ပိုင်း အစ္စရေး​ပြည်​တစ်ခွင်မှာ ယေရှု ဟောပြောတဲ့ နိုင်ငံတော်သတင်းကို လက်မခံကြဘူး။ (မဿဲ ၃:၁၊ ၂။ ၄:၁၇) အဲဒီ​သတင်း​ကြောင့် သူတို့​ဒေါသ​ထွက်တယ် ဒါမှမဟုတ် ဝေဒနာ အလူးအလိမ့် ခံ​နေရ​တယ်။ အဲဒီသတင်းက ဘုရားဆီက​လာမယ့် မီးနဲ့ တရား​စီရင်​ခြင်းသတင်း ဖြစ်လို့ပဲ။ (မဿဲ ၃:၇-၁၂) တကယ်လို့ ယေရှုနဲ့ တပည့်​တွေသာ ဘုရားရဲ့သတင်းကို ဆက်​မဟောပြော​ တော့​ဘူးဆိုရင်​ ငွေမက်တဲ့​ ဘာသာရေး​ခေါင်းဆောင်​တွေ တော်​တော်သက်သာရာရ​မှာ​ပဲ။ အဲဒီ​ခေါင်းဆောင်​တွေဟာ ပုံဥပမာ​ထဲ​က သူဌေး​နဲ့​တူတယ်။ သူဌေး​က အခုလို တောင်းပန်တယ်– “အဖ​အာဗြဟံ၊ ကျွန်တော့်​ကို သနားပါဦး။ လာဇရု​ကို ကျွန်တော့်​ဆီ လွှတ်​ပေးပါလား။ သူ့​လက်ညှိုး​ကို ရေ​မှာ​နှစ်ပြီး ကျွန်တော့်​လျှာ​ပေါ် တစ်ပေါက်​လောက်​ချ​ပေးရင် အေးမြ​သွားမှာပါ။ ဒီ​မီးလျှံ​ထဲမှာ ကျွန်တော် အလူး​အလဲ ခံ​နေရလို့​ပါ။”—လုကာ ၁၆:၂၄။

ဒါပေမဲ့​ အဲဒီ​လို​ဖြစ်လာမှာ မဟုတ်ဘူး။ ဘာသာရေး​ခေါင်း​ဆောင် အများစုက မပြောင်းလဲ​ကြဘူး။ ဘုရား​ခန့်အပ်တဲ့ မေရှိယ​ဘုရင်အဖြစ် ယေရှုကို လက်ခံဖို့ ကူညီ​ပေးတဲ့ “မောရှေ​နဲ့ ပရောဖက်​တွေ​ရေးခဲ့တဲ့ ကျမ်းစကား​ကိုတောင်” သူတို့ မ​နာယူ​ကြဘူး။ (လုကာ ၁၆:၂၉၊ ၃၁။ ဂလာတိ ၃:၂၄) သူတို့ကိုယ်သူတို့ မ​နှိမ့်ချ​ဘူး။ ယေရှုကို လက်ခံ​ပြီး အခု ဘုရား​မျက်နှာသာ​ရ​နေတဲ့ ဆင်းရဲသားတွေ လုပ်သလို မလုပ်ကြဘူး။ ယေရှုရဲ့ တပည့်​တွေ​က​လည်း ဘာသာရေး​ခေါင်းဆောင်​တွေ ကျေနပ်​အောင်၊ သက်သာရာရ​အောင် အမှန်တရားကို လျှော့ပေါ့​လိုက်တာမျိုး လုပ်မှာ​မဟုတ်ဘူး။ ဒီ​အချက်ကို ပုံဥပမာ​ထဲမှာ သူဌေး​ကို “အဖ​အာဗြဟံ” ပြောတဲ့​စကားတွေက ပေါ်လွင်​စေတယ်–

“ငါ့သား၊ မင်း အသက်ရှင်​တုန်း​က စည်းစိမ်​အပြည့် ခံစားခဲ့​ရပေမဲ့ လာဇရု​ကတော့ ဆင်း​ဆင်းရဲ​ရဲ နေခဲ့ရ​တာ သတိရပါ​ဦး။ အခု သူက ဒီမှာ သက်သက်သာသာ​ဖြစ်နေပြီ။ မင်း​ကတော့ ဝေဒနာ အလူးအလိမ့် ခံ​နေ​ရပြီ။ ပြီးတော့ မင်းနဲ့ ငါ​တို့​ကြားမှာ ချောက်​နက်​ကြီး ခြား​ထားတယ်။ ဒီ​နေရာ​ကနေ မင်း​ဆီ​ကို လာ​ချင်​တိုင်း လာလို့​မရဘူး။ မင်း​ဆီကနေ​လည်း ဒီ​နေရာကို လာ​ချင်​တိုင်း လာလို့​မရဘူး။”—လုကာ ၁၆:၂၅၊ ၂၆။

ဒါက ဖြစ်သင့်​ဖြစ်ထိုက်​တဲ့၊ မျှတတဲ့ အပြောင်းအလဲ​ကြီး​ပါပဲ။ ယေရှုရဲ့​ထမ်းပိုး​ကို လက်ခံ​ပြီး ပုံဆောင်သဘော​အရ ဝဝ​လင်​လင် စား​နေရတဲ့၊ အားပြည့် လန်းဆန်း​နေတဲ့ နှိမ့်ချ​သူတွေနဲ့ မာနကြီးတဲ့ ဘာသာရေး​ခေါင်းဆောင်​တွေရဲ့ အခြေအနေ ပြောင်း​ပြန်ဖြစ်​သွားပြီ။ (မဿဲ ၁၁:၂၈-၃၀) ဒီ​အပြောင်းအလဲ​ဟာ နောက်​လ​အနည်းငယ်​အတွင်း ပညတ်​ပဋိညာဉ်ကို ပဋိညာဉ်သစ်​နဲ့ အစားထိုး​လိုက်​ချိန်မှာ ပို​ထင်ရှား​လာပါလိမ့်မယ်။ (ယေရမိ ၃၁:၃၁-၃၃။ ကောလောသဲ ၂:၁၄။ ဟီဘရူး ၈:၇-၁၃) ဘုရားသခင်က အေဒီ ၃၃၊ ပင်တေကုတ္တေပွဲ​နေ့မှာ သန့်ရှင်းသော စွမ်းအားတော် သွန်းလောင်း​တဲ့အခါ ဖာရိရှဲတွေ​နဲ့ သူတို့ရဲ့ ဘာသာရေး​မဟာမိတ်​တွေ မဟုတ်ဘဲ ယေရှုရဲ့ တပည့်​တွေသာ ဘုရားသခင့်​မျက်နှာသာ ရတယ်ဆိုတာ ပေါ်လွင်​လာပါလိမ့်မယ်။