ယေရှု​က တစ်ညလုံး​ဆုတောင်းပြီး နောက်​နေ့​မနက်​မှာ တမန်တော် ၁၂ ယောက်​ကို ရွေးချယ်​တယ်။ သူ မောပန်း​နေမှာ​ဖြစ်ပေမဲ့ လူတွေကို ကူညီ​ပေးဖို့ အားရှိ​နေတုန်းပဲ။ ဒါကြောင့် အမှုဆောင်​လုပ်ငန်း​လုပ်​ချိန်​အတွင်း သူ​တည်းခို​တဲ့​နေရာ ဂါလိလဲ​ပြည်၊ ကပေရနောင်​မြို့​နားက တောင်စောင်း​တစ်​နေရာမှာ သူ့​ဆီ​လာသ​မျှ လူအားလုံးကို ကူညီ​ပေးတယ်။

လူတွေက ဝေးလံတဲ့​ဒေသ​တွေ​ကနေ လာကြတာ။ တချို့က တောင်ဘက် ဂျေရုဆလင်​မြို့​နဲ့ ယုဒပြည်​တစ်ဝန်း၊ တချို့က​တော့ အနောက်​မြောက်ဘက် ပင်လယ်​ဆိပ်ကမ်း​မြို့​ဖြစ်တဲ့ တိုင်ရာ​နဲ့ ဆိုင်ဒုန်​ကနေ လာကြတယ်။ ယေရှု​ဆီ ဘာလို့ လာကြတာ​လဲ။ “တရား​နာ​ချင်​လို့၊ ရောဂါ​ပျောက်​ချင်​လို့” ပဲ။ ယေရှု​က ရောဂါတွေကို “ပျောက်ကင်းစေ” တယ်။ စဉ်းစားကြည့်ပါ။ ဖျားနာသူ​အားလုံး ရောဂါ​ပျောက်ကင်း​သွားတယ်။ စာတန့်​နောက်လိုက် ကောင်းကင်တမန်ဆိုးတွေ​ကြောင့် ဒုက္ခရောက်​နေ​သူတွေ ဖြစ်တဲ့ “နတ်ဆိုး​နှောင့်ယှက်​ခံရသူတွေ” ကိုလည်း ကုသ​ပေးတယ်။—လုကာ ၆:၁၇-၁၉။

အဲဒီနောက် တောင်စောင်း​မှာ​ရှိတဲ့ မြေပြန့်​တစ်နေရာကို ဆင်းလာ​တဲ့အခါ လူအုပ်​လည်း စုရုံးလာ​တယ်။ တပည့်​တွေ၊ အထူးသဖြင့် တမန်တော် ၁၂ ယောက်​က သူနဲ့​အနီးဆုံး​မှာ ရှိနေမှာ​ပဲ။ လူအားလုံး​က အံ့ဖွယ်​အမှုတွေ ပြုလုပ်​နိုင်တဲ့ ဆရာ့​စကားကို ကြားချင်စိတ် ပြင်းပြ​နေကြ​တယ်။ ဒါနဲ့ ယေရှု​က နားထောင်သူ​အားလုံး​အတွက် အကျိုးရှိ​စေတဲ့ တရား​ဒေသနာ​ကို ဟောတယ်။ အဲဒါက အခု​ချိန်​ထိ လူပေါင်း​များစွာကို အကျိုးပြု​နေဆဲပဲ။ ကျွန်တော်တို့လည်း အကျိုး​ရနိုင်ပါတယ်။ အကြောင်းကတော့ နက်နဲ​တဲ့ အမှန်တရားတွေကို ရိုးရိုး​ရှင်းရှင်း ဟောပြောခဲ့​လို့​ပဲ။ နေ့စဉ်​အဖြစ်အပျက်​တွေ၊ လူတွေနဲ့ အကျွမ်းတဝင်​ရှိတဲ့​အရာတွေကို သူ​အသုံးပြုတယ်။ ဒါကြောင့် ဘုရား​နည်းလမ်း​နဲ့​အညီ ပို​ကောင်းတဲ့ အသက်တာကို လိုချင်​သူ​အားလုံးဟာ ယေရှု​ပြောတာတွေကို နားလည်​နိုင်ကြတယ်။ ဘယ်အချက်တွေ​ကြောင့် ယေရှုရဲ့​တရား​ဒေသနာ​က ဒီလောက်တောင် ကျော်ကြား​ရတာလဲ။

လူတိုင်း ပျော်​ချင်ကြတယ်။ ဒါကို ယေရှု​သိလို့ စစ်မှန်တဲ့​ပျော်ရွှင်မှု ခံစား​ရသူတွေ​အကြောင်း စပြော​တယ်။ နားထောင်​နေ​သူတွေ ဘယ်လောက်တောင် စိတ်ဝင်စား​သွားမယ်​ဆိုတာ စဉ်းစားကြည့်ပါ။ ဒါပေမဲ့ တချို့​အကြောင်း​တွေကို သူတို့ နားမလည်​နိုင်ဘူး။

ယေရှု အခုလို ပြောတယ်– “ဘုရားကို မှီခို​ဖို့ လိုအပ်​မှန်း သိမြင်​သူတွေ ပျော်ရွှင်​ချမ်းမြေ့တယ်။ ကောင်းကင်​နိုင်ငံဟာ သူတို့​အတွက် ဖြစ်လိမ့်မယ်။ ဝမ်းနည်းပူဆွေး​သူတွေ ပျော်ရွှင်​ချမ်းမြေ့တယ်။ သူတို့ နှစ်သိမ့်မှု​ရလိမ့်မယ်။ . . . ဖြောင့်မှန်​တာ​ကို လုပ်ချင်စိတ် ပြင်းပြ​သူတွေ ပျော်ရွှင်​ချမ်းမြေ့တယ်။ သူတို့ ဆန္ဒ​ပြည့်ဝ​လိမ့်မယ်။ . . . ဖြောင့်မှန်ရာကို လုပ်တဲ့​အတွက် နှိပ်စက်​ခံရသူတွေ ပျော်ရွှင်​ချမ်းမြေ့တယ်။ ကောင်းကင်​နိုင်ငံဟာ သူတို့​အတွက် ဖြစ်လိမ့်မယ်။ ခင်ဗျားတို့ဟာ ကျွန်တော့်​ကြောင့် ကဲ့ရဲ့​ညှဉ်းဆဲ​ခံရတဲ့​အခါ . . . ပျော်ရွှင်​ချမ်းမြေ့တယ်။ . . . ဝမ်းမြောက်​ရွှင်လန်း​ကြပါ။”—မဿဲ ၅:၃-၁၂။

ယေရှု​ပြောတဲ့ ‘ပျော်ရွှင်မှု’ ဆိုတာ ဘာ​အဓိပ္ပာယ်​လဲ။ ပျော်စရာ​ရှိလို့ ပျော်ရွှင်​ရယ်မော​နေတာကို မဆိုလို​ဘူး။ စစ်မှန်တဲ့​ပျော်ရွှင်မှု​မှာ အဲဒါ​ထက် ပို​လေးနက်တဲ့ အဓိပ္ပာယ်​ရှိတယ်။ စစ်မှန်တဲ့ ကျေနပ်​ရောင့်ရဲမှု၊ စိတ်​ကျေနပ်မှု၊ စိတ်ချမ်းသာမှု​တို့ ပါဝင်တယ်။

ဘုရားကို မှီခို​ဖို့ လိုအပ်​မှန်း သိမြင်​သူတွေ၊ အပြစ်​ရှိတဲ့ အခြေအနေ​ကြောင့် ဝမ်းနည်း​သူတွေ၊ ဘုရား​အကြောင်း​သိလာပြီး ဝတ်ပြု​ကိုးကွယ်​သူတွေဟာ တကယ်​ပျော်ရွှင်တယ်​လို့ ယေရှု​ပြောတယ်။ ဘုရားအလိုတော်​ဆောင်​လို့ အမုန်း​ခံရ၊ ညှဉ်းဆဲ​ခံရ​ရင်တောင် သူတို့ကို ဘုရား​နှစ်သက်​ပြီး ထာဝရ​အသက်ဆု​ချမယ်​ဆိုတာ သိထားလို့ ပျော်ရွှင်​ကြတယ်။

ချမ်းသာ​ကြွယ်ဝ​မယ်၊ အပျော်အပါး လိုက်စား​မယ်​ဆိုရင် ပျော်​မယ်​လို့ လူတွေ​ထင်ကြတယ်။ ယေရှု​ကတော့ အဲဒါနဲ့ ဆန့်ကျင်ဘက် ပြောလိုက်တဲ့​အခါ နားထောင်​နေ​သူတွေ​အတွက် စဉ်းစားစရာ ဖြစ်သွားမှာ​ပဲ။ သူ အခုလို​ပြောတယ်– “ချမ်းသာ​ကြွယ်ဝသူ​တို့၊  အဖြစ်ဆိုး​လိုက်​ကြ​တာ။ ခင်ဗျားတို့ဟာ စည်းစိမ်​ကို အပြည့်အဝ ခံစား​ပြီးပြီ​ဖြစ်လို့ပဲ။ အခု ဝဝ​လင်​လင် ဖြစ်နေ​သူတို့၊ အဖြစ်ဆိုး​လိုက်​ကြ​တာ။ ခင်ဗျားတို့ ဆာငတ်​ရမှာ မို့​လို့​ပဲ။ အခု ရယ်မော​နေသူတို့၊ အဖြစ်ဆိုး​လိုက်​ကြ​တာ။ ခင်ဗျားတို့ ဝမ်းနည်းပူဆွေး​ပြီး ငိုကြွေး​ရမှာ မို့​လို့​ပဲ။ လူတွေ ချီးမွမ်း​နေပြီ​ဆိုရင်တော့ ခင်ဗျားတို့ အဖြစ်ဆိုး​ကြုံ​ရလိမ့်မယ်။ သူတို့ရဲ့​ဘိုးဘေး​တွေဟာ ပရောဖက်​အတုအယောင်​တွေကို အဲဒီလိုပဲ ချီးမွမ်းခဲ့​ကြတယ်။”—လုကာ ၆:၂၄-၂၆။

ချမ်းသာ​ကြွယ်ဝ​တာ၊ ရယ်မော​ပျော်ရွှင်တာ၊ ချီးမွမ်းခံ​ရတာကို​ အဖြစ်ဆိုး​လို့ ဘာကြောင့် ပြောတာလဲ။ တစ်စုံတစ်ယောက်​က အဲဒါတွေ ပိုင်ဆိုင်​ထားပြီး ဒါတွေ​နဲ့​ပဲ ပျော်မွေ့​နေမယ်​ဆိုရင် ဘုရား​အမှုတော်​ဆောင်ခြင်း​ကို လျစ်လျူရှု​မိ​သွားနိုင်တယ်။ ဒါဆိုရင် စစ်မှန်တဲ့​ပျော်ရွှင်မှု ဆုံးရှုံး​သွားနိုင်တယ်။ ဆင်းရဲနွမ်းပါး​တာ၊ ဆာငတ်​တာ​က လူတစ်ယောက်ကို ပျော်ရွှင်​စေတယ်လို့ ယေရှု​ပြော​နေတာ မဟုတ်ဘူး။ ဒါပေမဲ့ အများအားဖြင့် အဲဒီလို ဘဝ​အခြေအနေ မလှ​တဲ့​သူတွေက​ပဲ ယေရှုရဲ့​သွန်သင်ချက်တွေကို လက်ခံ​ပြီး စစ်မှန်တဲ့​ပျော်ရွှင်မှု ခံစား​ရတယ်။

ယေရှု​က တပည့်​တွေကို ရည်ရွယ်ပြီး “ခင်ဗျားတို့ဟာ လောက​ရဲ့​ဆား​ပဲ” လို့​ပြောတယ်။ (မဿဲ ၅:၁၃) တကယ့်​ဆား​တော့ မဟုတ်ပါဘူး။ ဆား​မှာ မ​ပုပ်​မ​သိုး​အောင်၊ တာရှည်ခံ​အောင် လုပ်ပေး​နိုင်စွမ်း​ရှိတယ်။ ဗိမာန်တော်​က ယဇ်​ပလ္လင်​နား​မှာ ဆား​ပုံ​ကြီး​ရှိပြီး ယဇ်​ပူဇော်​တဲ့အခါ အသုံးပြုတယ်။ ဆား​က ပျက်စီး​ယိုယွင်းခြင်း၊ ပုပ်ပျက်ခြင်း မရှိတာကို​လည်း ရည်ညွှန်းတယ်။ (ဝတ်ပြုရာ ၂:၁၃။ ယေဇကျေလ ၄၃:၂၃၊ ၂၄) ယေရှု​တပည့်တွေဟာ လူတွေ ယေဟောဝါနဲ့​ဆက်ဆံရေး မပျက်စီး​အောင်၊ ကိုယ်ကျင့်တရား​စံနှုန်းတွေ မကျ​ဆင်း​အောင် ကူညီပေးခြင်း​အားဖြင့် “လောကရဲ့​ဆား” ဖြစ်ကြတယ်။ မှန်ပါတယ်၊ သူတို့​ဟောတဲ့ သတင်းစကားကို လက်ခံ​တုံ့ပြန်​သူ​အားလုံး အသက်​ရနိုင်တယ်။

“ခင်ဗျားတို့ဟာ  လောကရဲ့​အလင်း​ပဲ” လို့ ယေရှု ဆက်ပြောတယ်။ မီးခွက်​ကို  ထွန်း​ပြီး တောင်း​နဲ့ အုပ်​ထား​လေ့​  မရှိပါဘူး။ အလင်းရောင်​ ရဖို့ မီး​ခုံ​ပေါ်မှာပဲ တင်ထား​တတ်တယ်။  ဒါကြောင့်  “ခင်ဗျားတို့ရဲ့​ အလင်း​ကို လူတွေ​ရှေ့မှာ လင်း​စေ​ကြ​ပါ။ ဒါမှ တခြား​သူတွေက ခင်ဗျား​တို့ရဲ့ အကျင့်ကောင်း​ကို မြင်ပြီး ကောင်းကင်မှာ စံမြန်းတဲ့ အဖရဲ့ ဘုန်းအသရေ​ကို ချီးမွမ်းကြ​လိမ့်မယ်” လို့​တိုက်တွန်း​တယ်။—မဿဲ ၅:၁၄-၁၆။

ဂျူး​ဘာသာရေး ခေါင်းဆောင်​တွေဟာ ယေရှုကို ဘုရား​ပညတ်​တွေ ချိုးဖောက်သူ​လို့ ယူမှတ်​တဲ့​အတွက် မကြာသေးခင်က သူ့ကို သတ်ဖို့ ကြံစည်ခဲ့​ကြတယ်။ ဒါကြောင့် “ကျွန်တော်ဟာ ပညတ်​ကျမ်း၊ ပရောဖက်​ကျမ်းတွေ​ကို ပယ်ဖျက်​ဖို့ လာတာ မဟုတ်ဘူး။  ပြည့်စုံ​စေဖို့ လာတာ” လို့ ယေရှု ပွင့်ပွင့်လင်းလင်း ပြောလိုက်​တယ်။—မဿဲ ၅:၁၇။

မှန်ပါတယ်၊ ယေရှု​က ဘုရား​ပညတ်ကို အလွန်​လေးစား​ပြီး တခြား​သူတွေကိုလည်း အဲဒီလို သဘောထား​ရှိဖို့ တိုက်တွန်း​တယ်။ သူ ဒီလို​တောင် ပြောတယ်– “ဒါကြောင့် အရေးကြီးပုံ​မရတဲ့ ပညတ်ချက်​ကို ချိုးဖောက်​ပြီး သူများ​ကိုလည်း အဲဒီအတိုင်း​လုပ်ဖို့ သွန်သင်​ပေးတဲ့​သူဟာ ကောင်းကင်​နိုင်ငံ​ကို မဝင်​ထိုက်​ဘူး။” အဲဒီလိုလူ​ဟာ နိုင်ငံတော်ကို လုံးဝ​ ဝင်ခွင့်​ရမှာ မဟုတ်ဘူး။ “ဒါပေမဲ့ အဲဒီ​ပညတ်​တွေ​အတိုင်း ကျင့်ကြံ​ပြီး သွန်သင်ပေး​သူကတော့ ကောင်းကင်​နိုင်ငံ ဝင်ထိုက်​တယ်” လို့​ ဆက်ပြောတယ်။—မဿဲ ၅:၁၉။

ဘုရား​ပညတ်ကို ချိုးဖောက်​စေတဲ့ သဘောထားတွေကို​တောင် ယေရှု ပြစ်တင်​ရှုတ်ချ​တယ်။ “လူ့​အသက် မသတ်​နဲ့” လို့​ပညတ်တရားမှာ ပြောထားတာ​ကို ထောက်ပြပြီး​နောက် “ကိုယ့်ညီအစ်ကို​ကို အမျက်​မပြေ​နိုင်​သူဟာ တရားရုံးမှာ အမှု​ရင်ဆိုင်​ရမယ်” လို့​ထပ်ပြော​တယ်။ (မဿဲ ၅:၂၁၊ ၂၂) လူတစ်ယောက်ကို အမျက်​မပြေ​နိုင်တာ​က တကယ်​အန္တရာယ်​ရှိတယ်။ လူသတ်​တဲ့​အထိ​တောင် ဖြစ်သွား​နိုင်တယ်။ ဒါကြောင့် သင့်မြတ်​ပြေလည်​ဖို့ ဘယ်လောက်ထိ လုပ်သင့်​ကြောင်း ယေရှု အခုလို ရှင်းပြတယ်– “ပူဇော်ရာ​ပလ္လင်​ဆီ အလှူ ယူလာ​နေတုန်းမှာ ကိုယ့်ကို​မကျေမနပ်​ဖြစ်နေတဲ့ ညီအစ်ကို​ကို သတိရ​သွား​ရင်၊ အလှူ​ကို ပလ္လင်​ရှေ့မှာ ထားခဲ့ပါ။ ညီအစ်ကို​ဆီ သွားပြီး သူနဲ့ ပြေလည်​အောင် အရင်​လုပ်ပါ။ ပြီးမှ ပြန်လာပြီး ကိုယ့်ရဲ့​အလှူ​ကို ဆက်သ​ပါ။”—မဿဲ ၅:၂၃၊ ၂၄။

ပညတ်တရားမှာ အိမ်ထောင်ရေး မဖောက်ပြန်​ရ​ဆိုတဲ့ ပညတ်​လည်း​ပါတယ်။ ဒါနဲ့​ပတ်သက်ပြီး “‘အိမ်ထောင်ရေး မဖောက်ပြန်​နဲ့’ ဆိုတဲ့​စကားကို ခင်ဗျားတို့ ကြားဖူး​ပါတယ်။ ဒါပေမဲ့ ကျွန်တော်​ပြောမယ်။ မိန်းမ​တစ်ယောက်ကို ရာဂစိတ်နဲ့ ကြည့်နေတာဟာ အဲဒီ​မိန်းမကို စိတ်နဲ့​ပြစ်မှားတာ​ပဲ” လို့​ပြောတယ်။ (မဿဲ ၅:၂၇၊ ၂၈) မကောင်းတဲ့​အတွေး ဖျတ်ခနဲ​ပေါ်လာ​တာ​ကိုပဲ ယေရှု​ပြော​နေတာ​မဟုတ်ဘူး။ “ကြည့်နေ” မယ်​ဆိုရင် ဘယ်လောက်ထိ အခြေအနေ ဆိုးရွား​သွား​နိုင်မှန်း အလေးပေး​နေတာ။ ဆက်​ကြည့်နေ​တဲ့အခါ ရမ္မက်​ဆန္ဒတွေ နိုး​ကြွလာပြီး အဲဒီ​က​တစ်ဆင့် အခြေအနေ​ပေးရင် အိမ်ထောင်ရေး ဖောက်ပြန်​မိ​နိုင်တယ်။ ဒီလို​မဖြစ်အောင် ဘယ်လို ကာကွယ်​မလဲ။ ပြင်းပြင်းထန်ထန် အရေးယူ​လုပ်ဆောင်ဖို့ လိုအပ်​နိုင်တယ်။ “ကိုယ့်ရဲ့​ညာဘက်​မျက်စိ​က အပြစ်​ကျူးလွန်​စေတယ်​ဆိုရင် အဲဒီ​မျက်စိ​ကို ထုတ်ပြီး လွှင့်ပစ်လိုက်​ပါ။ . . . ကိုယ့်ရဲ့​ညာလက်​က အပြစ်​ကျူးလွန်​စေတယ်​ဆိုရင် အဲဒီ​လက်ကို ဖြတ်​ပြီး လွှင့်ပစ်လိုက်​ပါ” လို့​ယေရှု​ပြောတယ်။—မဿဲ ၅:၂၉၊ ၃၀။

လူ​တချို့က အသက်ဆက်ရှင်​နိုင်ဖို့ ပုပ်ပျက်​နေတဲ့ ကိုယ်လက်​အင်္ဂါ​ကို လိုလိုလားလား ဖြတ်တောက်​ပစ်​ကြတယ်။ ယေရှု​ပြောတဲ့​အရ​ဆိုရင် မကောင်းတဲ့​အတွေး​နဲ့ နောက်ဆက်တွဲ​လုပ်ရပ်တွေကို ရှောင်နိုင်ဖို့ ဘယ်အရာကို​မဆို၊ လက် ဒါမှမဟုတ် မျက်စိ​လို​မျိုး တန်ဖိုးရှိတဲ့​အရာကို​တောင် “လွှင့်ပစ်” ဖို့ ပို​အရေးကြီးတယ်။ “ဂေဟင်နာ​အရပ်​ဆီ တစ်ကိုယ်လုံး​ရောက်​တာ​ထက် လက်တစ်ဖက် အဆုံးရှုံး​ခံ​လိုက်တာ ပို​ကောင်းတယ်” လို့ ယေရှု​ရှင်းပြတယ်။ ဂေဟင်နာ​အရပ်​ဆိုတာ (ဂျေရုဆလင်​မြို့ရိုး အပြင်ဘက်က မီးလောင်​နေတဲ့ အမှိုက်ပုံ​ဖြစ်ပြီး) ထာဝရ​ပျက်စီးခြင်းကို တင်စား​တယ်။

ကိုယ့်ကို ထိခိုက်​နစ်နာ​အောင် လုပ်​သူတွေ၊ စော်ကားသူ​တွေကို ဘယ်လို ဆက်ဆံသင့်တယ်​ဆိုတာလည်း သင်ပေးတယ်။ “လူဆိုး​ကို အတိုက်အခံ မလုပ်ပါနဲ့။ တစ်ယောက်ယောက်​က ခင်ဗျားရဲ့ ညာဘက်​ပါး​ကို ရိုက်​ရင် ဘယ်ဘက်ပါး​ကိုလည်း လှည့်​ပေးလိုက်ပါ။” (မဿဲ ၅:၃၉) ကိုယ်တိုင်နဲ့ မိသားစု တိုက်ခိုက်​ခံရတဲ့​အခါ မကာကွယ်​ရ​ဘူးလို့ ပြော​နေတာ မဟုတ်ပါဘူး။ ယေရှု​ပြောတဲ့ ပါး​ ရိုက်တယ်​ဆိုတာ ပြင်းပြင်းထန်ထန် နာကျင်အောင်​လုပ်တာ ဒါမှ​မဟုတ် အသေသတ်​တာ မဟုတ်ဘဲ စော်ကား​တာ​ကို ပြော​နေတာ။ ဒါကြောင့် ပါးရိုက်​ပြီး ဒါမှမဟုတ် စော်ကား​တဲ့​စကားတွေ ပြောပြီး ရန်စ​တဲ့အခါ၊ အငြင်းအခုံ​လုပ်တဲ့​အခါ လက်တုံ့မပြန်​ပါနဲ့လို့ ယေရှု​ပြော​နေတာပါ။

အဲဒီ​ဆုံးမ​စကားက လူလူချင်းကို ချစ်​ရမယ်ဆိုတဲ့ ပညတ်​နဲ့ ကိုက်ညီတယ်။ ဒါကြောင့် ယေရှု​က “ရန်သူကို ချစ်မြဲချစ်​ပါ။ ကိုယ့်ကို နှိပ်စက်​သူတွေ​အတွက် အမြဲ​ဆုတောင်း​ပေးပါ” လို့ နားထောင်​နေ​သူတွေကို ဆုံးမတယ်။ အဲဒီလို​လုပ်ဖို့ ခိုင်လုံတဲ့ အကြောင်းရင်းကို သူ ဒီလို​ဆက်ပြောတယ်– “ဒါမှ ခင်ဗျားတို့ဟာ ကောင်းကင်မှာ စံမြန်းတဲ့ အဖ​ဘုရားရဲ့ သားတွေ​ဖြစ်မှန်း သက်သေပြ​ရာ ရောက်မှာပေါ့။ ကိုယ်တော်​က လူဆိုး​လူကောင်း​အပေါ် နေ​ထွက်​စေတယ်။ ဖြောင့်မတ်သူ၊ မဖြောင့်မတ်​သူတွေ​အပေါ် မိုးရွာ​စေတယ်။”—မဿဲ ၅:၄၄၊ ၄၅။

ယေရှု​က “ကောင်းကင်​အဖ ပြည့်ဝ​စုံလင်သလို ခင်ဗျားတို့လည်း ပြည့်ဝ​စုံလင်​ရမယ်” လို့​ပြောပြီး ဒီ​အပိုင်းကို နိဂုံးချုပ်​လိုက်တယ်။ (မဿဲ ၅:၄၈) လူတွေဟာ ခြောက်ပြစ်ကင်း​သဲ​လဲ​စင် ပြည့်​၀စုံလင်​ရမယ်လို့ ဆိုလို​နေတာ မဟုတ်ပါဘူး။ ဒါပေမဲ့ ဘုရားကို အတုယူ​ခြင်းအားဖြင့် မေတ္တာကို တိုးချဲ့​နိုင်ပြီး ရန်သူတွေကို​တောင် ချစ်​လာနိုင်တယ်။ “အဖဘုရား​ဟာ သနား​ကြင်နာ​တတ်သလို ခင်ဗျားတို့လည်း အမြဲ သနား​ကြင်နာ​ကြပါ” လို့​ယေရှု​ပြောတယ်။—လုကာ ၆:၃၆။

နားထောင်​နေ​သူတွေကို ယေရှု ဒီလို ဆက်ပြောတယ်– “ခင်ဗျားတို့ရဲ့ ဖြောင့်မတ်တဲ့ လုပ်ရပ်တွေကို လူ​မြင်​ကောင်း​အောင် လူရှေ့​သူ​ရှေ့မှာ မ​လုပ်ပြ​မိဖို့ သတိထား​ကြပါ။” ဘုရား​တရား ကိုင်းရှိုင်း​ချင်​ယောင်ဆောင်​တာ​ကို ပြစ်တင်​ရှုတ်ချ​တဲ့ အနေနဲ့ “ပေးကမ်း​စွန့်ကြဲ​တဲ့အခါ သူတော်ကောင်း ယောင်ဆောင်​သူတွေလို မလုပ်ကြနဲ့” ဆိုပြီး ထပ်ပြော​တယ်။ (မဿဲ ၆:၁၊ ၂) ဒါကြောင့် သိုသိုသိပ်သိပ် ပေးကမ်း​တာက ပို​ကောင်းပါတယ်။

အဲဒီနောက် ယေရှု​က “ဆုတောင်းတဲ့အခါ သူတော်ကောင်း​ယောင်ဆောင်​သူတွေလို မလုပ်ပါနဲ့။ သူတို့က လူတကာ​မြင်​အောင် တရားဇရပ်​တွေ၊ လမ်းဆုံ​လမ်းခွ​တွေ​မှာ ရပ်​ပြီး ဆုတောင်း​တတ်ကြတယ်။ . . . ခင်ဗျားတို့​ကတော့ ဆုတောင်းတဲ့အခါ အခန်း​ထဲ​ဝင်၊ တံခါးပိတ်​ပြီး မမြင်နိုင်တဲ့ အရပ်မှာ စံမြန်းတဲ့ အဖ​ဘုရားဆီ ဆုတောင်းကြပါ” လို့​ပြောတယ်။ (မဿဲ ၆:၅၊ ၆) လူထုရှေ့ ဆုမတောင်း​ရ​ဘူးလို့ ယေရှု​ပြော​နေတာ မဟုတ်ပါဘူး။ သူကိုယ်တိုင် အဲဒီလို​ဆုတောင်း​ခဲ့​တာ​ပဲ။ အထင်ကြီး​ခံ​ချင်​လို့၊ ချီးမွမ်းခံ​ချင်​လို့ ဆုတောင်းတာ​မျိုးကို သူ​ပြစ်တင်​ရှုတ်ချ​နေတာ။

“ဆုတောင်းတဲ့အခါ လူမျိုးခြားတွေ​လို အကြောင်းအရာ တစ်မျိုးတည်းကို အထပ်ထပ် မ​ရွတ်​ပါ​နဲ့” ဆိုပြီး လူအုပ်​ကို သင်ပေးတယ်။ (မဿဲ ၆:၇) အကြောင်းအရာ​ တစ်ခုကို အထပ်ထပ် ဆုတောင်းတာ မှားတယ်လို့ ပြောတာ​မဟုတ်ဘူး။ စကားလုံးတွေကို အလွတ်ကျက်​ပြီး “အထပ်ထပ်” ရွတ်​တာ မကောင်း​ဘူးလို့ ပြော​နေတာ။ ဒီ​နောက် အသနားခံချက် ခုနစ်ခု​ပါတဲ့ စံပြ​ဆုတောင်းချက်ကို သင်ပေးတယ်။ ပထမ​သုံးချက်​က ဘုရားရဲ့ အုပ်ချုပ်ပိုင်ခွင့်​နဲ့ ရည်ရွယ်ချက်ကို အသိအမှတ်ပြု​ကြောင်း ဖော်ပြတယ်။ အဲဒါတွေကတော့ နာမတော် သန့်ရှင်း​မြင့်မြတ်​စေခြင်း၊ နိုင်ငံတော်​လာ​ခြင်း၊ ဘုရားအလိုတော် ပြည့်စုံစေခြင်း​တို့ ဖြစ်တယ်။ ဒါတွေကို​ဆုတောင်းပြီး​မှ ကိုယ်ရေးကိုယ်တာ​ကိစ္စ​တွေ​ဖြစ်တဲ့ နေ့စဉ်​အစာ​ပေးဖို့၊ အပြစ်တွေကို ခွင့်လွှတ်​ပေးဖို့၊ ခံနိုင်​တာ​ထက် ပိုပြီး​သွေးဆောင်​မခံရ​ဖို့၊ ဆိုးညစ်​သူရဲ့​လက်ကနေ ကယ်တင်​ပေးဖို့ စ​တာတွေကို တောင်းလျှောက်​နိုင်တယ်။

 ပစ္စည်းဥစ္စာ​တွေ​က ကျွန်တော်တို့​အတွက် ဘယ်လောက်​အရေးကြီးတဲ့​အရာ ဖြစ်သင့်သလဲ။ “သံချေး​နဲ့ ပိုးမွှား​ကြောင့် ပျက်စီး​နိုင်တဲ့၊ သူခိုး​ဝင်​ခိုး​နိုင်တဲ့ မြေကြီး​ဘဏ္ဍာ​ကို မစုဆောင်း​ကြနဲ့​တော့” လို့ လူအုပ်​ကို ယေရှု​တိုက်တွန်း​တယ်။ တကယ့်ကို လက်တွေ့ကျတဲ့ စကားတွေ​ပါပဲ။ ပစ္စည်းဥစ္စာ​တွေဟာ ပျက်စီး​သွားနိုင်တယ်၊ ပျက်​လည်း​ပျက်စီး​တယ်။ အဲဒါတွေက ဘုရား​ရှေ့မှာ ဘာမှ တန်ဖိုး​မရှိဘူး။ ဒါကြောင့် ယေရှု​က “သံချေး​နဲ့ ပိုးမွှား​ကြောင့် မပျက်စီး​နိုင်တဲ့၊ သူခိုး​ဝင်​မခိုး​နိုင်တဲ့ ကောင်းကင်​ဘဏ္ဍာ​ကိုပဲ စုဆောင်း​ကြပါ” လို့​ပြောတာ။ ဘဝမှာ ဘုရား​အမှုဆောင်ခြင်းကို ဦးစား​ထားခြင်း​အားဖြင့် ကောင်းကင်​ဘဏ္ဍာ စုဆောင်း​နိုင်ပါတယ်။ ဘုရားနဲ့ ကျွန်တော်တို့ရဲ့ ဆက်ဆံရေး​ကောင်း ဒါမှမဟုတ်  အဲဒါကြောင့်​  ရရှိမယ့် ထာဝရ​အသက်ဆု​ကျေးဇူး​ကို ဘယ်သူမှ မလုယူ​နိုင်ဘူး။ “ကိုယ့်​ဘဏ္ဍာ​ရှိတဲ့ နေရာမှာ ကိုယ့်​စိတ် ရောက်နေ​တတ်တယ်” ဆိုတဲ့ ယေရှုရဲ့​စကားတွေ ဘယ်လောက်​မှန်​လိုက်သလဲ။—မဿဲ ၆:၁၉-၂၁။

အဲဒီ​အချက်ကို အလေးပေး​တဲ့​အနေနဲ့ ယေရှု ဥပမာတစ်ခု​ပေးတယ်– “မျက်လုံးဟာ ခန္ဓာကိုယ်ရဲ့ မီးခွက်​ပဲ။ တစ်ခုတည်းကိုပဲ အာရုံစိုက်​ကြည့်ရင် တစ်ကိုယ်လုံး လင်း​နေလိမ့်မယ်။ ဒါပေမဲ့ မနာလို​တဲ့​စိတ်နဲ့ ကြည့်နေ​ရင် တစ်ကိုယ်လုံး မှောင်​နေလိမ့်မယ်။” (မဿဲ ၆:၂၂၊ ၂၃) ကျွန်တော်တို့ရဲ့ ပုံဆောင်​မျက်လုံး ကောင်းကောင်း အလုပ်လုပ်တဲ့​အခါ ခန္ဓာကိုယ်​အတွက် အလင်း​ပေးတဲ့ မီးအိမ်​နဲ့​တူတယ်။ အဲဒီလို​ဖြစ်ဖို့ဆိုရင် မျက်လုံး​က တစ်ခုတည်းကိုပဲ အာရုံစိုက်​ရမယ်။ ဒီလို​မှ​မဟုတ်​ရင် ဘဝနဲ့​ပတ်သက်ပြီး မှားယွင်းတဲ့​အမြင် ရှိလာ​နိုင်တယ်။ ဘုရား​အမှုဆောင်ခြင်းကို အာရုံမစိုက်​ဘဲ ပစ္စည်းဥစ္စာတွေကို အာရုံစိုက်​မယ်​ဆိုရင် “တစ်ကိုယ်လုံး မှောင်​နေ” ပြီဆို​တဲ့​ သဘော​ပဲ။ မရိုးသားတဲ့ အရာတွေကို​တောင် လုပ်​လာနိုင်တယ်။

ဒီ​နောက် ထိရောက်တဲ့ ဥပမာတစ်ခု​ပြောတယ်– “ဘယ်သူမှ​ သခင်​နှစ်ဦး​ဆီမှာ အစေခံလို့ မရဘူး။ သခင်​တစ်ဦးကို မုန်း​ပြီး နောက်​တစ်ဦးကို ချစ်မှာပဲ။ တစ်ဦးကို သစ္စာ​ရှိပြီး တစ်ဦးကို မထီလေးစား လုပ်မှာ​ပဲ။ ခင်ဗျားတို့လည်း ဘုရားသခင်​အတွက်ရော စည်းစိမ်​အတွက်ပါ တစ်ပြိုင်တည်း အစေခံလို့ မရဘူး။”—မဿဲ ၆:၂၄။

နားထောင်​နေ​သူတချို့​က ပစ္စည်းဥစ္စာ​အပေါ် ဘယ်လို သဘောထား​ရှိသင့်သလဲ​ဆိုပြီး တွေး​နေကြမှာ​ပဲ။ ဒါကြောင့် ယေရှု​က ဘုရား​အမှုတော်ကို ဦးစား​ထားမယ်​ဆိုရင် စိုးရိမ်​စ​ရာ​မလိုဘူးလို့ အာမခံတယ်။ “ငှက်တွေ​ကို အာရုံစိုက်ကြည့်​လိုက်ပါ။ သူတို့က  မျိုးစေ့ကြဲ​တာ၊ ရိတ်သိမ်း​တာ၊ ကျီ​ထဲ​စုသိမ်း​တာ​တွေ မလုပ်ကြဘူး။ ဒါပေမဲ့ ကောင်းကင်​အဖ​က သူတို့ကို ကျွေးမွေး​ထားတာပဲ။”—မဿဲ ၆:၂၆။

တောင်ပေါ်​က နှင်းပန်း​လေး​တွေ​ကော။ “ခံ့ခံ့ညားညား ဝတ်ဆင်​ထားတဲ့ ရှောလမုန်​မင်း​တောင် အဲဒီ​နှင်းပန်း​တစ်ပင်လို လှလှပပ​ဖြစ်အောင် မဆင်မြန်း​နိုင်ဘူး” လို့ ယေရှု​ပြောတယ်။ ဒီ​အချက်​ကနေ ဘာ​သိရသလဲ။ “ဒီနေ့ ရှင်သန်​ပြီး မနက်ဖြန် မီး​ထဲ​ရောက်​သွားမယ့် တောပင်​တွေကို​တောင် ဘုရားသခင်က အဲဒီလို ဆင်မြန်း​ပေးတယ်​ဆိုရင် ခင်ဗျားတို့ကို ဒီထက်မက ဆင်မြန်း​ပေးမယ် မဟုတ်လား။” (မဿဲ ၆:၂၉၊ ၃၀) ယေရှု အခုလို ဆက်ပြောတယ်– “ဒါကြောင့် ‘ဘာ​စား​ရမလဲ။’ ‘ဘာ​သောက်​ရမလဲ။’ ‘ဘာ​ဝတ်​ရမလဲ’ ဆိုပြီး ဘယ်တော့မှ မစိုးရိမ်​ကြပါ​နဲ့။ . . . ဒါတွေ​အားလုံး ခင်ဗျားတို့ လိုအပ်​မှန်း ကောင်းကင်​အဖ သိ​ပြီးသား​ပဲ။ ဒါကြောင့် ဘုရားသခင်ရဲ့ နိုင်ငံတော်​နဲ့ ဘုရားသခင်ရဲ့ ဖြောင့်မတ်ခြင်းကို အမြဲ ဦးစား​ထားကြပါ။ နောက်​မှ အဲဒါတွေကို ဖြည့်ဆည်း​ပေးလိမ့်မယ်။”—မဿဲ ၆:၃၁-၃၃။

တမန်တော်တွေ​နဲ့ တခြား​စိတ်ရင်းမှန်​သူတွေဟာ ဘုရား​နှစ်သက်တဲ့​နည်းလမ်း​အတိုင်း အသက်ရှင်​နေထိုင်​ချင်​ပေမဲ့ သူတို့​အတွက် မလွယ်​လှ​ဘူး။ ဥပမာ၊ ဖာရိရှဲတွေက တခြား​သူတွေကို အပြစ်ရှာ​တယ်၊ မညှာမတာ ဝေဖန်​အကဲဖြတ်​တယ်။ ဒါကြောင့် ယေရှု​က “ကိုယ်တိုင် ဝေဖန်​အကဲဖြတ် မခံရ​ဖို့ သူတစ်ပါး​ကို ဝေဖန်​အကဲဖြတ်တာ​မျိုး မလုပ်ပါနဲ့​တော့။ သူတစ်ပါး​ကို ဝေဖန်​အကဲဖြတ်​တဲ့​အတိုင်း ကိုယ်တိုင် ပြန်​ခံရလိမ့်မယ်” လို့ နားထောင်​နေ​သူတွေကို သတိပေး​ခဲ့​တယ်။—မဿဲ ၇:၁၊ ၂။

အပြစ်ရှာ​လွန်း​တဲ့ ဖာရိရှဲတွေ​ရဲ့ လမ်းစဉ်​ကို လိုက်မယ်​ဆိုရင် အန္တရာယ်​ရှိ​မှန်း အခုလို ဥပမာ​ပေးတယ်– “မျက်မမြင်​အချင်းချင်း လမ်းပြ​နိုင်သလား။ လမ်းပြ​ရင် နှစ်ယောက်စလုံး တွင်း​ထဲ ကျမှာ​ပေါ့။” ဒါဆိုရင် နားထောင်​နေ​သူတွေဟာ တခြားသူတွေ​အပေါ် ဘယ်လို​အမြင်​မျိုး ရှိသင့်သလဲ။ အပြစ်ရှာ​တဲ့​မျက်လုံး​နဲ့ မကြည့်​ရ​ဘူး။ အဲဒါက ကြီးလေး​တဲ့​အပြစ် ဖြစ်လို့ပဲ။ ယေရှု အခုလို မေးလိုက်တယ်– “ကိုယ့်​မျက်စိ​ထဲ​က သစ်သား​ချောင်း​ကို မမြင်​ဘဲ ညီအစ်ကို​ကို ‘မင်းရဲ့​မျက်စိ​ထဲ​က သစ်​စ​လေး ထုတ်ပေး​ပါ​ရစေ’ လို့ ဘယ်လိုလုပ် ပြောနိုင်​မှာ​လဲ။ သူတော်ကောင်း​ယောင်ဆောင်​သူတို့၊ ကိုယ့်​မျက်စိ​ထဲ​က သစ်သား​ချောင်း​ကို အရင် ထုတ်​လိုက်ပါ​ဦး။ ဒါမှ ရှင်းရှင်း​လင်းလင်း မြင်ရပြီး ညီအစ်ကို​ရဲ့ မျက်စိ​ထဲ သစ်​စ​လေး​ကို ထုတ်ပေး​နိုင်မှာပေါ့။”—လုကာ ၆:၃၉-၄၂။

တပည့်​တွေ​အနေနဲ့ ဘာကိုမှ အကဲမဖြတ်​ရတော့ဘူး​လို့ မဆိုလို​ပါဘူး။ ယေရှု​က “ခွေး​ကို မြင့်မြတ်တဲ့​အရာတွေ မပေး​ပါ​နဲ့။ ဝက်​ရှေ့မှာ​လည်း ပုလဲ​တွေ မချ​ထားပါ​နဲ့” လို့​ပြောတယ်။ (မဿဲ ၇:၆) ဘုရားသခင့် တရား​စကားတော်​မှာပါတဲ့ အမှန်တရားတွေဟာ ပုလဲ​တွေ​လို​ပဲ တန်ဖိုး​ရှိတယ်။ လူ​တချို့က တိရစ္ဆာန်တွေ​လို​ပြုမူ​ပြီး အဲဒီ အဖိုးတန် အမှန်တရားတွေကို တန်ဖိုး​မထား​ကြဘူး။ တပည့်​တွေ​အနေနဲ့ အဲဒီလို လူတွေကို ထားခဲ့ပြီး လက်ခံ​နားထောင်​သူတွေကို ရှာ​ရမယ်။

ယေရှု​က ဆုတောင်းခြင်း​အကြောင်း ပြန်​ပြောတယ်။ “တောင်း​မြဲ​တောင်းပါ၊ ရလိမ့်မယ်” ဆိုပြီး စွဲစွဲမြဲမြဲ ဆုတောင်းဖို့​လို​ကြောင်း အလေး​ပေးတယ်။ ဘုရားက ဆုတောင်းချက်တွေကို ဖြေကြား​ဖို့​အသင့်ရှိ​မှန်း အခုလို အလေးပေး ပြောဆိုတယ်– “ကိုယ့်ရဲ့သားက မုန့်​ကို​တောင်း​ရင် ကျောက်ခဲ​ပေး​မလား။ . . . ခင်ဗျားတို့ အပြစ်သားတွေ​တောင် ကိုယ့်သားသမီးကို ကောင်းတာတွေ ပေး​တတ်​ရင် ခင်ဗျားတို့ရဲ့ ကောင်းကင်ဘုံစံ အဖ​ဘုရားက တောင်းတဲ့​သူတွေကို ကောင်းတဲ့​အရာတွေ ပိုလို့တောင် ပေးမှာ မဟုတ်လား။”—မဿဲ ၇:၇-၁၁။

အဲဒီနောက် အပြုအမူနဲ့ ပတ်သက်ပြီး ကျော်ကြားတဲ့​ပညတ်ကို ယေရှု​ပြောတယ်– “ဒါကြောင့် ကိုယ့်ကို ပြုမူ​ဆက်ဆံ​စေချင်တဲ့​အတိုင်း သူတစ်ပါး​ကို ပြုမူ​ဆက်ဆံပါ။” လက်တွေ့ကျတဲ့ ဒီ​တိုက်တွန်းချက်​ကို ကျွန်တော်တို့​အားလုံး နှလုံးသွင်း​ပြီး တခြား​သူတွေနဲ့ ဆက်ဆံ​တဲ့အခါ ကျင့်သုံးသင့်တယ် မဟုတ်လား။ အဲဒီလို​လုပ်ဖို့  လွယ်ကူ​မှာ​တော့ မဟုတ်ဘူး။ ယေရှု အခုလို ပြောတယ်– “ကျဉ်းတဲ့​တံခါးကနေ ဝင်ကြပါ။ ပျက်စီးခြင်းကို ပို့ဆောင်တဲ့ တံခါး​ဟာ ကျယ်ဝန်း​ပြီး လမ်းကလည်း ပြန့်ပြူးတဲ့​အတွက် ဝင်​တဲ့​သူတွေ များတယ်။ အသက်ရှင်ခြင်းကို ပို့ဆောင်တဲ့ တံခါးကတော့ ကျဉ်း​မြောင်း​ပြီး လမ်းကလည်း ကြမ်းတဲ့​အတွက် ရှာတွေ့​သူတွေ နည်းတယ်။”—မဿဲ ၇:၁၂-၁၄။

တပည့်​တွေကို အသက်​လမ်း​ကနေ သွေဖည်​သွား​အောင် လုပ်မယ့်​သူတွေ ရှိတာ​ကြောင့် ယေရှု​က “သိုး​ရေ​ခြုံ​ပြီး ဝင်​လာတဲ့ ပရောဖက် အတုအယောင်​တွေကို  သတိထား​ကြ။ တကယ်တော့ သူတို့ဟာ ငမ်းငမ်း​တက်​ဖြစ်နေတဲ့ ဝံပုလွေ​တွေ​ပဲ” လို့ သတိပေး​တယ်။ (မဿဲ ၇:၁၅) အသီးကို​ကြည့်ပြီး ကောင်းတဲ့​အပင်၊ မကောင်းတဲ့​အပင်ကို ခွဲခြားသိနိုင်​တယ်လို့ ယေရှု​ပြောတယ်။ လူတွေလည်း အဲဒီလိုပဲ။ ဒါကြောင့် ပရောဖက် အတုအယောင်​တွေရဲ့ သွန်သင်ချက်တွေ​နဲ့ လုပ်ရပ်တွေကို​ကြည့်ပြီး သူတို့ကို ခွဲခြား​သိနိုင်တယ်။ မှန်ပါတယ်၊ လူတစ်ယောက် တပည့်ဖြစ်​ဖို့​ဆိုရင် အပြောသက်သက်​နဲ့ မလုံလောက်​ဘဲ လုပ်ရပ်​နဲ့​ပါ သက်သေပြ​ရမယ်လို့ ယေရှု ရှင်းပြတယ်။ တချို့လူတွေက ယေရှုကို သခင်​လို့ ခေါ်​ပေမဲ့ ဘုရား​အလိုတော်ကို မ​ဆောင်​ဘူးဆိုရင်ကော။ ယေရှု အခုလို​ပြောတယ်– “‘တရားမဲ့​သူတို့၊ မင်းတို့ကို ငါ လုံးဝ​မသိ​ဘူး။ ငါ့​ရှေ့​က ထွက်သွား​ကြ’ ဆိုပြီး သူတို့ကို​ပြောမယ်။”—မဿဲ ၇:၂၃။

ယေရှု​က တရား​ဒေသနာ​ကို အခုလို နိဂုံးချုပ်​လိုက်တယ်– “ဒါကြောင့် ကျွန်တော်​ပြောနေတဲ့ ဒီ​စကားတွေကို ကြား​ပြီး လိုက်နာ​တဲ့​သူဟာ ကျောက်သား​ပေါ်မှာ အိမ်ဆောက်​တဲ့ သတိပညာ​ရှိသူ​နဲ့ တူတယ်။ မိုး​သဲ​သဲ​မဲ​မဲ ရွာလို့ ရေ​တွေ​တက်လာပြီး လေပြင်း တိုက်ခတ်​တဲ့အခါ အဲဒီ​အိမ်ဟာ ကျောက်ဆောင်​ပေါ်မှာ ဆောက်​ထားတဲ့​အတွက် မ​ပြိုလဲ​ဘူး။” (မဿဲ ၇:၂၄၊ ၂၅) အိမ်က ဘာကြောင့် မပြို​လဲ​တာလဲ။ “အိမ်ဆောက်​တဲ့အခါ နက်​နက်​တူးပြီး ကျောက်သား​ပေါ်မှာ အုတ်မြစ်ချ” ထားလို့​ပဲ။ (လုကာ ၆:၄၈) ဒါကြောင့် ယေရှုရဲ့​စကားတွေကို ကြား​ရုံ​နဲ့ မလုံလောက်​ဘူး။ အဲဒီအတိုင်း “လိုက်နာ” ဖို့ ကြိုးစား​အားထုတ်​ရမယ်။

“ဒီ​စကားတွေကို ကြားပေမဲ့ မလိုက်နာ​သူ” ကော ဘယ်လို​လဲ။ သူဟာ “သဲ​ပေါ်မှာ အိမ်ဆောက်​တဲ့ ဉာဏ်​မရှိသူ​နဲ့ တူတယ်။” (မဿဲ ၇:၂၆) မိုး​ကြီး​ရေ​ကြီး​တာ၊ လေပြင်း​တိုက်​တာ​တွေ​ကြောင့် အဲဒီ​အိမ် ပြိုလဲ​သွားမှာပဲ။

လူအုပ်​က ယေရှုရဲ့​သွန်သင်ပုံကို ကြားတဲ့​အခါ အံ့သြ​ကြတယ်။ သူက ဘာသာရေး​ခေါင်းဆောင်​တွေ​လို မဟုတ်ဘဲ အခွင့်အာဏာ​ရှိသူ တစ်ယောက်လို သွန်သင်ပေး​လို့​ပဲ။ ဒါကြောင့် ယေရှုရဲ့​စကားကို နားထောင်သူ​အများစုဟာ တပည့်ဖြစ်​လာမယ်​ဆိုတာ သေချာ​ပါတယ်။