၁–၃။ ဟောပြောခြင်းလုပ်ငန်းကို ယေရှု ဘယ်လိုတိုးချဲ့ခဲ့သလဲ။ ဘယ်မေးခွန်းတွေ ပေါ်လာသလဲ။

ယေရှုဟာ ဂါလိလဲနယ်တစ်လျှောက်မှာ နှစ်နှစ်ကြာ ဟောပြောခဲ့တယ်။ (မဿဲ ၉:၃၅–၃၈ ကိုဖတ်ပါ။) မြို့ရွာတွေကို လှည့်လည်ပြီး တရားဇရပ်တွေမှာ သွန်သင်ပေးတယ်၊ နိုင်ငံတော်သတင်းကောင်း ဟောပြောတယ်။ သူဘယ်မှာပဲဟောဟော လူအုပ်ကြီးက သူ့ဆီ စုရုံးလာတဲ့အတွက် “စပါးရိတ်စရာများစွာရှိ” မှန်း ယေရှုသိမြင်ခဲ့တယ်။ ဒါပေမဲ့ လုပ်သားတွေ နည်းနေတယ်။

^၂ ဒါကြောင့် ယေရှုက ဟောပြောခြင်းလုပ်ငန်းကို တိုးချဲ့ဖို့ စီစဉ်တယ်။ ဘယ်လိုနည်းနဲ့လဲ။ “ဘုရားသခင်၏နိုင်ငံတော်အကြောင်းကို ဟောပြော” ဖို့ တမန်တော် ၁၂ ယောက်ကို စေလွှတ်ခြင်းအားဖြင့်ဖြစ်တယ်။ (လု. ၉:၁၊ ၂) ဒီလုပ်ငန်းကို ဘယ်လိုလုပ်ရမယ်ဆိုတာနဲ့ပတ်သက်ပြီး တမန်တော်တွေမှာ မေးစရာမေးခွန်းတွေ ရှိမှာပဲ။ ဒါကြောင့် ယေရှုက သူတို့ကို မစေလွှတ်ခင်မှာ ကောင်းကင်ခမည်းတော်ဆီက သူရရှိခဲ့ရာတစ်ခုကို မေတ္တာပါပါပေးခဲ့တယ်။ အဲဒါကတော့ လေ့ကျင့်မှုပါပဲ။

^၃ ဒီတော့ စဉ်းစားစရာမေးခွန်းတွေ ပေါ်လာတယ်။ ယေရှုကို ခမည်းတော် ဘယ်လိုလေ့ကျင့်ပေးခဲ့သလဲ။ တမန်တော်တွေကို ယေရှု ဘယ်လိုလေ့ကျင့်ပေးခဲ့သလဲ။ ဒီနေ့အချိန်မှာကော မေရှိယဘုရင်က သူ့နောက်လိုက်တွေကို လေ့ကျင့်ပေးနေသလား။ လေ့ကျင့်ပေးတယ်ဆိုရင် ဘယ်လိုနည်းနဲ့လဲ။

၄။ ခမည်းတော်က ယေရှုကို ဘယ်အချိန်နဲ့ ဘယ်နေရာမှာ သွန်သင်ပေးခဲ့သလဲ။

^၄ ခမည်းတော်ရဲ့ သွန်သင်မှုခံခဲ့ရတယ်ဆိုတာကို ယေရှု ပွင့်ပွင့်လင်းလင်းဝန်ခံတယ်။ အမှုဆောင်ချိန်အတွင်းမှာ ယေရှုက ‘ခမည်းတော် သွန်သင်သည့်အတိုင်း ငါဟောပြော’ တယ်လို့ပြောခဲ့တယ်။ (ယော. ၈:၂၈) ဘယ်အချိန်နဲ့ ဘယ်နေရာမှာ ယေရှု သွန်သင်ခံခဲ့ရတာလဲ။ ဘုရားသခင့်သားဦးအဖြစ် ဖန်ဆင်းခံရပြီးနောက် မကြာခင်မှာပဲ စပြီးလေ့ကျင့်သွန်သင်ခံခဲ့ရတာ ဖြစ်မယ်။ (ကော. ၁:၁၅) မရေတွက်နိုင်တဲ့နှစ်ပေါင်းများစွာတစ်လျှောက် ကောင်းကင်မှာ ခမည်းတော်နဲ့အတူနေပြီး ‘မဟာသွန်သင်ရှင်’ ပြောသမျှလုပ်သမျှကို ကြားခဲ့မြင်ခဲ့တယ်။ (ဟေရှာ. ၃၀:၂၀၊ ကဘ) အဲဒါကြောင့်လည်း သားတော်ဟာ ခမည်းတော်ရဲ့အရည်အသွေးတွေ၊ လုပ်ရပ်တွေ၊ ရည်ရွယ်ချက်တွေနဲ့ပတ်သက်ပြီး အကောင်းဆုံးပညာကို သင်ယူနိုင်ခဲ့တယ်။

၅။ မြေကြီးပေါ်မှာလုပ်ဆောင်ရမယ့် လုပ်ငန်းနဲ့ပတ်သက်ပြီး သားတော်ကို ခမည်းတော် ဘာတွေသင်ပေးခဲ့သလဲ။

^၅ အချိန်တန်တဲ့အခါ ယေဟောဝါက သားတော်ကို မြေကြီးပေါ်မှာလုပ်ဆောင်ရမယ့် လုပ်ငန်းနဲ့ပတ်သက်ပြီး သင်ပေးခဲ့တယ်။ မဟာသွန်သင်ရှင်နဲ့ သားဦးစပ်ကြားမှာရှိတဲ့ ဆက်ဆံရေးကို ပရောဖက်ပြုချက်မှာ ဘယ်လိုဖော်ပြတယ်ဆိုတာ သုံးသပ် ကြည့်ပါ။ (ဟေရှာယ ၅၀:၄၊ ၅ ကိုဖတ်ပါ။) * ယေဟောဝါက သားတော်ကို ‘မနက်တိုင်း’ နှိုးတယ်လို့ ပရောဖက်ပြုချက်မှာ ဖော်ပြထားတယ်။ ဒီဥပမာက တပည့်ကို စာသင်ပေးဖို့ မနက်စောစောနှိုးတဲ့ ဆရာတစ်ယောက်ကို မြင်ယောင်မိစေတယ်။ ကျမ်းစာအကိုးအကားစာအုပ်တစ်အုပ်မှာ အခုလိုပြောတယ်– “တပည့်တစ်ယောက်ကို ကျောင်းထဲခေါ်သွားသလိုမျိုး ယေဟောဝါက . . . သားတော်ကို ခေါ်သွားပြီး ဘာအကြောင်းဟောပြောရမယ်၊ ဘယ်လိုဟောပြောရမယ်ဆိုတာ သင်ပေးတယ်။” ကောင်းကင် “ကျောင်းတော်” မှာ ယေဟောဝါက သားတော်ကို ဘာတွေပြောရမယ်ဆိုတာ သင်ကြားပေးတယ်။ (ယော. ၁၂:၄၉) ဘယ်လိုသွန်သင်ရမယ်ဆိုတာကိုလည်း သားတော်ကို သင်ပေးတယ်။ * မြေကြီးပေါ်ရှိချိန်မှာ ယေရှုက အမှုဆောင်လုပ်ငန်း လုပ်ဆောင်ခြင်းအားဖြင့်သာမက နောက်လိုက်တွေကို လေ့ကျင့်ပေးခြင်းအားဖြင့်လည်း သူရရှိတဲ့လေ့ကျင့်မှုကို ကောင်းကောင်းအသုံးချခဲ့တယ်။

၆၊ ၇။ (က) တမန်တော်တွေကို ယေရှု ဘယ်လိုလေ့ကျင့်ပေးသလဲ။ အဲဒီလိုလေ့ကျင့်ပေးတဲ့အတွက် သူတို့ဘာလုပ်နိုင်ခဲ့သလဲ။ (ခ) အခုအချိန်မှာ ယေရှုက နောက်လိုက်တွေကို ဘာအတွက် လေ့ကျင့်ပေးနေသလဲ။

^၆ အစပိုင်းမှာပြောခဲ့တဲ့အတိုင်း တမန်တော်တွေကို ယေရှု ဘယ်လိုလေ့ကျင့်ပေးသလဲ။ မဿဲ အခန်းကြီး ၁၀ အရ အမှုဆောင်လုပ်ငန်းအတွက် သတ်သတ်မှတ်မှတ် ညွှန်ကြားချက်တွေပေးခဲ့တယ်။ ဘယ်နေရာမှာ ဟောရမယ် (အခန်းငယ် ၅၊ ၆)၊ ဘာသတင်း ဟောရမယ် (အခန်းငယ် ၇)၊ ယေဟောဝါကို အားကိုးဖို့လိုတယ် (အခန်းငယ် ၉၊ ၁၀)၊ အိမ်ရှင်တွေကို ဘယ်လိုစပြီး စကားပြောရမယ် (အခန်းငယ် ၁၁-၁၃)၊ လက်မခံတဲ့အခါ ဘယ်လိုလုပ်ရမယ် (အခန်းငယ် ၁၄၊ ၁၅)၊ နှိပ်စက်ညှဉ်းပန်းခံရတဲ့အခါ ဘယ်လိုတုံ့ပြန်ရမယ် (အခန်းငယ် ၁၆-၂၃) စတဲ့အချက်တွေ ပါဝင်တယ်။ * တမန်တော်တွေကို ယေရှုကောင်းကောင်း လေ့ကျင့်ပေးတဲ့အတွက် အေဒီပထမရာစုမှာ သတင်းကောင်းဟောပြောခြင်းလုပ်ငန်းကို သူတို့ဦးဆောင်နိုင်ခဲ့တယ်။

^၇ ကျွန်တော်တို့အချိန်မှာကော။ ဘုရားသခင့်နိုင်ငံတော်ရဲ့ဘုရင် ယေရှုက “လူမျိုးအပေါင်းတို့အတွက် သက်သေဖြစ်စေရန် နိုင်ငံတော်နှင့်ဆိုင်သော ဤသတင်းကောင်းကို လူနေရာမြေတစ်ပြင်လုံး” မှာဟောပြောရမယ်ဆိုတဲ့ အရေးကြီးဆုံးတာဝန်ကို နောက်လိုက်တွေကိုပေးအပ်ခဲ့တယ်။ (မ. ၂၄:၁၄) အဲဒီအရေးကြီးဆုံးလုပ်ငန်းကို လုပ်ဆောင်ဖို့ ကျွန်တော်တို့ကို ဘုရင်လေ့ကျင့်ပေးနေသလား။ လေ့ကျင့်ပေးနေပါတယ်။ အသင်းတော်ပြင်ပမှာ ဘယ်လိုဟောပြောရမယ်၊ အသင်းတော်တွင်းမှာ အထူးတာ၀န်တွေကို ဘယ်လိုထမ်းဆောင်ရမယ်ဆိုတာနဲ့ပတ်သက်ပြီး ဘုရင်က နောက်လိုက်တွေကို သေချာလေ့ကျင့်ပေးနေတယ်။

၈၊ ၉။ (က) ဟောပြောသွန်သင်ခြင်းသင်တန်းရဲ့ အဓိကရည်ရွယ်ချက်က ဘာလဲ။ (ခ) အမှုဆောင်လုပ်ငန်းမှာ ပိုထိရောက်နိုင်ဖို့ ကြားရက်အစည်းအဝေးက သင့်ကို ဘယ်လိုကူညီပေးသလဲ။

^၈ ယေဟောဝါရဲ့အဖွဲ့အစည်းက စည်းဝေးပွဲတွေ၊ စည်ဝေးကြီးတွေ၊ လုပ်ငန်းတော်စည်းဝေးလိုမျိုး အသင်းတော်စည်းဝေးတွေကို အသုံးပြုပြီး ဘုရားသခင့်လူမျိုးကို လေ့ကျင့်ပေးခဲ့တာကြာပြီ။ ဒါပေမဲ့ ဌာနချုပ်မှာ ဦးဆောင်တဲ့ညီအစ်ကိုတွေက သင်တန်းကျောင်းအမျိုးမျိုးကိုသုံးပြီး လေ့ကျင့်ပေးဖို့ ၁၉၄၀ ပြည့်လွန်နှစ်တွေကတည်းက စတင်စီစဉ်ခဲ့တယ်။

^၉ ဟောပြောသွန်သင်ခြင်းသင်တန်း။ ဒီသင်တန်းကို ၁၉၄၃ ခုနှစ်မှာ စတင်ခဲ့ကြောင်း ရှေ့အခန်းမှာ သိခဲ့ရတယ်။ သင်တန်းရဲ့ရည်ရွယ်ချက်က အသင်းတော်စည်းဝေးတွေမှာ ထိထိရောက်ရောက်ဟောပြောနိုင်ဖို့ လေ့ကျင့်ပေးရုံပဲလား။ မဟုတ်ပါဘူး။ သင်တန်းရဲ့အဓိကရည်ရွယ်ချက်က စကားပြောဆိုနိုင်စွမ်းဆုကျေးဇူးကိုသုံးပြီး အမှုဆောင်လုပ်ငန်းမှာ ယေဟောဝါကိုချီးမွမ်းနိုင်အောင် ကိုယ်တော့်လူမျိုးကို  လေ့ကျင့်ပေးဖို့ပါပဲ။ (ဆာ. ၁၅၀:၆) ဒီသင်တန်းမှာ နာမည်စာရင်းသွင်းထားတဲ့ ညီအစ်ကိုညီအစ်မအားလုံးဟာ ပိုအရည်အချင်းရှိတဲ့ နိုင်ငံတော်အမှုဆောင်တွေဖြစ်လာအောင် ပြင်ဆင်ပေးခံရတယ်။ အခုကြားရက်အစည်းအဝေးက သင်တန်းပေးနေတယ်။

၁၀၊ ၁၁။ ဂိလဒ်ကျောင်းကို အခု ဘယ်သူတွေ တက်ရောက်နိုင်ပြီလဲ။ သင်ရိုးညွှန်းတမ်းရဲ့ရည်ရွယ်ချက်က ဘာလဲ။

^၁၀ ဂိလဒ်ကင်းမျှော်စင်သမ္မာကျမ်းစာကျောင်း။ ဂိလဒ်ကင်းမျှော်စင်သမ္မာကျမ်းစာကျောင်းကို ၁၉၄၃၊ ဖေဖေါ်ဝါရီလ ၁ ရက်၊ တနင်္လာနေ့မှာ စတင်ဖွင့်လှစ်ခဲ့တယ်။ ဒီကျောင်းရဲ့မူလရည်ရွယ်ချက်က ရှေ့ဆောင်တွေနဲ့ အချိန်ပြည့်လုပ်ငန်းမှာပါဝင်တဲ့တခြားသူတွေကို ကမ္ဘာ့ဒေသတစ်နေရာရာမှာ သာသနာပြုတွေအဖြစ် အမှုဆောင်နိုင်အောင် လေ့ကျင့်ပေးဖို့ဖြစ်တယ်။ ဒါပေမဲ့ ၂၀၁၁၊ အောက်တိုဘာလကစပြီး အထူးအချိန်ပြည့်လုပ်ငန်းတစ်ခုခုမှာ ပါဝင်နေတဲ့ အထူးရှေ့ဆောင်တွေ၊ နယ်လှည့်ကြီးကြပ်မှူးနဲ့ဇနီးတွေ၊ ဗေသလအိမ်သားတွေ၊ ဂိလဒ်ကျောင်းမတက်ရသေးတဲ့သာသနာပြုတွေပဲ တက်ရောက်ဖို့ သတ်မှတ်လိုက်တယ်။

^၁၁ ဂိလဒ်ကျောင်း သင်ရိုးညွှန်းတမ်းရဲ့ရည်ရွယ်ချက်က ဘာလဲ။ ဝါရင့်သင်တန်းပို့ချသူ ညီအစ်ကိုတစ်ယောက် အခုလိုပြောတယ်– “ကျမ်းစာကို နှံ့နှံ့စပ်စပ်လေ့လာခြင်းအားဖြင့် ကျောင်းသားတွေရဲ့ယုံကြည်ခြင်း ခိုင်ခံ့လာစေဖို့ဖြစ်တယ်။ နောက်တစ်ချက်က ဘုရားနှစ်သက်တဲ့အရည်အသွေးတွေ တိုးတက်လာစေဖို့ဖြစ်တယ်။ ဒါမှ တာ၀န်တွေထမ်းဆောင်တဲ့အခါ ကြုံတွေ့လာတဲ့အခက်အခဲတွေကို အောင်မြင်စွာဖြေရှင်းနိုင်မယ်။ ဒါ့အပြင် သင်ရိုးညွှန်းတမ်းရဲ့အဓိကရည်ရွယ်ချက်တစ်ခုက ဟောပြောခြင်းလုပ်ငန်းမှာ ပါဝင်ချင်တဲ့ဆန္ဒပြင်းပြလာစေဖို့ ဖြစ်တယ်။”—ဧ. ၄:၁၁။

၁၂၊ ၁၃။ ဂိလဒ်ကျောင်းက ကမ္ဘာချီဟောပြောခြင်းလုပ်ငန်းအပေါ် ဘယ်လိုအကျိုးသက်ရောက်မှုရှိသလဲ။ ဥပမာ တစ်ခုပြောပြပါ။

^၁၂ ဂိလဒ်ကျောင်းက ကမ္ဘာချီဟောပြောခြင်းလုပ်ငန်းအပေါ် ဘယ်လိုအကျိုးသက်ရောက်သလဲ။ ၁၉၄၃ ခုနှစ်ကတည်းကစပြီး သင်တန်းသား ၈,၅၀၀ ကျော်ကို ဒီကျောင်းက လေ့ကျင့်ပေးခဲ့တယ်။ * ဂိလဒ်ကျောင်းဆင်းသာသနာပြုတွေဟာ ကမ္ဘာတစ်၀န်း နိုင်ငံပေါင်း ၁၇၀ ကျော်မှာ အမှုဆောင်ခဲ့ကြတယ်။ သူတို့ရရှိတဲ့ လေ့ကျင့်မှုတွေကို ကောင်းကောင်းအသုံးချပြီး အမှုဆောင်လုပ်ငန်းမှာ ထက်ထက်သန်သန်ပါ၀င်ခြင်းအားဖြင့် ပုံသက်သေကောင်းပြကြတယ်။ တခြားသူတွေကိုလည်း အဲဒီလိုလုပ်နိုင်အောင် လေ့ကျင့်ပေးကြတယ်။ အခြေအနေတော်တော်များများမှာ သာသနာပြုတွေက နိုင်ငံတော်ကြေညာသူအနည်းငယ်ပဲရှိတဲ့ ဒေသတွေမှာ ဟောပြောခြင်းလုပ်ငန်းကို ဦးဆောင်ကြတယ်။

^၁၃ ဂျပန်နိုင်ငံအကြောင်း သုံးသပ်ကြည့်ပါ။ ဖွဲ့စည်းထားတဲ့ဟောပြောခြင်းလုပ်ငန်း ဒုတိယကမ္ဘာစစ်အတွင်းမှာ လုံး၀ရပ်တန့်သွားတယ်။ ၁၉၄၉၊ ဩဂုတ်လရောက်တော့ ဂျပန်မှာ ဒေသခံကြေညာသူဆယ်ယောက်တောင် မပြည့်တော့ဘူး။ ဒါပေမဲ့ အဲဒီနှစ်ကုန်ပိုင်းမှာ ဂိလဒ်ကျောင်းဆင်းသာသနာပြု ၁၃ ယောက်ရောက်လာပြီး ဟောပြောခြင်းလုပ်ငန်းကို အားတက်သရော လုပ်ဆောင်ခဲ့တယ်။ တခြားသာသနာပြုတွေလည်း ထပ်ရောက်လာတယ်။ အစပိုင်းမှာ မြို့ကြီးတွေကိုပဲ အာရုံစိုက်ပေမဲ့ နောက်ပိုင်းမှာ မြို့ငယ်တွေကိုလည်း အာရုံစိုက်လာတယ်။ သာသနာပြုတွေက ကျမ်းစာသင်သားတွေနဲ့ တခြားသူတွေကို ရှေ့ဆောင်လုပ်ငန်းမှာပါ၀င်ဖို့ အားပေးကြတယ်။ သာသနာပြုတွေရဲ့ ဇွဲရှိရှိလုပ်ဆောင်မှုကြောင့် အကြီးအကျယ်တိုးတက်လာတယ်။ အခုဆိုရင် ဂျပန်နိုင်ငံမှာ နိုင်ငံတော်သတင်းကြွေးကြော်သူ ၂၁၆,၀၀၀ ကျော်ရှိနေပြီး သူတို့ထဲက ၄၀ ရာခိုင်နှုန်းနီးပါးဟာ ရှေ့ဆောင်တွေဖြစ်ကြတယ်။ *

၁၄။ သင်တန်းကျောင်းတွေက ဘာကိုအခိုင်အမာသက်သေထူသလဲ။ (“ နိုင်ငံတော်အမှုဆောင်တွေကိုလေ့ကျင့်ပေးတဲ့ သင်တန်းကျောင်းများ” လေးထောင့်ကွက်ကိုလည်းကြည့်ပါ။)

^၁၄ အခြားသင်တန်းကျောင်းများ။ ရှေ့ဆောင်လုပ်ငန်းကျောင်း၊ ခရစ်ယာန်မောင်နှံများအတွက် ကျမ်းစာသင်တန်းနဲ့ တစ်ကိုယ်ရေညီအစ်ကိုများအတွက် ကျမ်းစာသင်တန်းက * သင်တန်းသားတွေကို ဘုရားသခင်နဲ့ဆက်ဆံရေး ပိုခိုင်မြဲလာစေဖို့၊  ဟောပြောခြင်းလုပ်ငန်းကို ထက်ထက်သန်သန် ဦးဆောင်နိုင်ဖို့ ကူညီပေးတယ်။ အမှုတော်ကို အကုန်အစင်ပြီးမြောက်စေဖို့ နောက်လိုက်တွေကို ဘုရင် ကောင်းကောင်းပြင်ဆင်ပေးနေတယ်ဆိုတာ အဲဒီသင်တန်းကျောင်းအားလုံးက အခိုင်အမာသက်သေထူပါတယ်။—၂ တိ. ၄:၅။

၁၅။ တာဝန်ရှိညီအစ်ကိုတွေက ယေရှုကို ဘယ်လိုနည်းနဲ့တုပချင်ကြသလဲ။

^၁၅ ယေရှုကို ဘုရားသခင်သွန်သင်ပေးကြောင်း ဖော်ပြတဲ့ ဟေရှာယပရောဖက်ပြုချက်ကို ပြန်သတိရပါ။ ကောင်းကင် “ကျောင်းတော်” မှာ သားတော်က ‘ပင်ပန်းနေသူကို သင့်တော်တဲ့စကားနဲ့ ဘယ်လိုပြန်ဖြေရမယ်ဆိုတာ’ သင်ယူခဲ့တယ်။ (ဟေရှာ. ၅၀:၄၊ ကဘ) ယေရှုက သင်ယူတဲ့အတိုင်း ကျင့်သုံးခဲ့တယ်။ မြေကြီးပေါ်ရှိတုန်းက “ဝန်လေး၍ ပင်ပန်းသောသူ” တွေကို လန်းဆန်းစေခဲ့တယ်။ (မ. ၁၁:၂၈-၃၀) ယေရှုကိုတုပတဲ့အနေနဲ့ တာဝန်ရှိညီအစ်ကိုတွေကလည်း ညီအစ်ကိုညီအစ်မတွေကို လန်းဆန်းစေတဲ့သူတွေ ဖြစ်ချင်ကြတယ်။ အဲဒီလိုဖြစ်နိုင်ဖို့ သင်တန်းကျောင်းအမျိုးမျိုးကို ဖွင့်လှစ်ပေးခဲ့တယ်။ ဒီသင်တန်းကျောင်းတွေက ယုံကြည်သူချင်းတွေအတွက် ပိုထိထိရောက်ရောက် အမှုဆောင်နိုင်အောင် အရည်အချင်းရှိညီအစ်ကိုတွေကို ကူညီပေးတယ်။

၁၆၊ ၁၇။ အကြီးအကဲနဲ့အမှုထမ်းများအတွက်သင်တန်းရဲ့ ရည်ရွယ်ချက်က ဘာလဲ။ (အောက်ခြေမှတ်ချက်ကိုလည်းကြည့်ပါ။)

^၁၆ အကြီးအကဲနဲ့အမှုထမ်းများအတွက်သင်တန်း။ ဒီသင်တန်းကို ၁၉၅၉၊ မတ်လ ၉ ရက်၊ နယူးယောက်၊ ဆောက်သ်လဲန်စင်းမှာ ဦးဆုံးအကြိမ် စတင်ကျင်းပ ခဲ့တယ်။ တစ်လကြာကျင်းပတဲ့ ဒီသင်တန်းကိုတက်ရောက်ဖို့ နယ်လှည့်ကြီးကြပ်မှူးတွေ၊ အသင်းတော်ဦးစီးကြီးကြပ်မှူး (အခုအခေါ် အကြီးအကဲအဖွဲ့ညှိနှိုင်းရေးမှူး) တွေကို ဖိတ်ခေါ်ခဲ့တယ်။ နောက်ပိုင်းမှာ သင်ရိုးညွှန်းတမ်းကို အင်္ဂလိပ်ကနေ တခြားဘာသာစကားတွေကို ပြန်ဆိုခဲ့ပြီး ကမ္ဘာတစ်ဝန်းကညီအစ်ကိုတွေကို စတင်လေ့ကျင့်ပေးခဲ့တယ်။ *

^၁၇ အကြီးအကဲနဲ့အမှုထမ်းများအတွက်သင်တန်းရဲ့ ရည်ရွယ်ချက်နဲ့ပတ်သက်ပြီး ၁၉၆၂ ခုနှစ်၊ ယေဟောဝါသက်သေများရဲ့နှစ်ချုပ်စာအုပ် မှာအခုလိုပြောတယ်– “အရမ်းအလုပ်များတဲ့ ဒီခေတ်ကြီးမှာ ယေဟောဝါသက်သေအသင်းတော်ရဲ့ ကြီးကြပ်မှူးတစ်ယောက်ဟာ သူ့အသက်တာကို ကောင်းကောင်းစီစဉ်နိုင်သူဖြစ်ရမယ်။ ဒါမှ သူက အသင်းတော်မှာရှိသူအားလုံးကို လိုအပ်သလို ဂရုစိုက်ပေးနိုင်မယ်။ အသင်းတော်အတွက် ကောင်းချီးတစ်ခုလည်း ဖြစ်လိမ့်မယ်။ တစ်ချိန်တည်းမှာ ကိုယ့်မိသားစုကို လျစ်လျူရှုတဲ့အထိ အသင်းတော်တာဝန်တွေနဲ့ အလုပ်များနေသူ မဖြစ်ရဘူး။ စဉ်းစားချင့်ချိန်နိုင်စွမ်းရှိသူ ဖြစ်ရမယ်။ အကြီးအကဲနဲ့အမှုထမ်းများအတွက်သင်တန်းကို တက်ရတာဟာ ကမ္ဘာတစ်ဝန်းက ဦးစီးကြီးကြပ်မှူးတွေအတွက် တကယ့်အခွင့်ထူးပါပဲ။ ကြီးကြပ်မှူးတစ်ယောက်ဆီကနေ ကျမ်းစာတောင်းဆိုထားတဲ့အရည်အချင်းတွေကို ပြည့်မီအောင် ဒီသင်တန်းက သူတို့ကိုကူညီပေးပါလိမ့်မယ်။”—၁ တိ. ၃:၁-၇; တိ. ၁:၅-၉။

၁၈။ အကြီးအကဲနဲ့အမှုထမ်းများအတွက်သင်တန်းကနေ ဘုရားသခင့်လူမျိုးအားလုံး ဘယ်လိုအကျိုးခံစားရသလဲ။

 ^၁၈ အကြီးအကဲနဲ့အမှုထမ်းများအတွက်သင်တန်းကနေ ဘုရားသခင့်လူမျိုးအားလုံး အကျိုးခံစားရတယ်။ ဘယ်လိုနည်းနဲ့လဲ။ အကြီးအကဲနဲ့အမှုထမ်းတွေက သင်တန်းမှာ သင်ယူခဲ့ရာတွေကို လက်တွေ့ကျင့်သုံးတဲ့အခါ ယေရှုလိုပဲ သူတို့လည်း ယုံကြည်သူချင်းတွေကို လန်းဆန်းစေကြတယ်။ ဂရုစိုက်တတ်တဲ့ အကြီးအကဲ၊ အမှုထမ်းတစ်ယောက်က ကြင်ကြင်နာနာစကားပြောတဲ့အခါ၊ ကောင်းကောင်းနားထောင်ပေးတဲ့အခါ၊ လာလည်ပတ်ပြီး အားပေးတဲ့အခါ သင် တကယ်ပဲ ကျေးဇူးတင်လေးမြတ်တယ်မဟုတ်လား။ (၁ သက်. ၅:၁၁) အရည်အချင်းရှိတဲ့ ဒီညီအစ်ကိုတွေဟာ အသင်းတော်အတွက် ကောင်းချီးတစ်ခုပါပဲ။

၁၉။ သွန်သင်ခြင်းကော်မတီက ဘယ်သင်တန်းကျောင်းတွေကိုလည်း ကြီးကြပ်ပေးသလဲ။ အဲဒီသင်တန်းကျောင်းတွေက ညီအစ်ကိုတွေကို ဘယ်လိုကူညီပေးသလဲ။

^၁၉ အခြားသင်တန်းကျောင်းများ။ အုပ်ချုပ်ရေးအဖွဲ့ရဲ့ သွန်သင်ခြင်းကော်မတီက အဖွဲ့အစည်းအတွင်း တာဝန်ရှိညီအစ်ကိုတွေကို လေ့ကျင့်ပေးတဲ့ တခြားသင်တန်းကျောင်းတွေကိုလည်း ကြီးကြပ်ပေးတယ်။ ဒီသင်တန်းကျောင်းတွေက အသင်းတော်အကြီးအကဲတွေ၊ နယ်လှည့်ကြီးကြပ်မှူးတွေ၊ ဌာနခွဲကော်မတီဝင်တွေကို သူတို့ရဲ့များပြားလှတဲ့တာဝန်တွေကို ပိုထိထိရောက်ရောက် လုပ်ဆောင်နိုင်အောင် ကူညီပေးတယ်။ ကျမ်းစာအခြေပြုသင်ရိုးညွှန်းတမ်းတွေက ဘုရားသခင်နဲ့ဆက်ဆံရေးကောင်းကို ထိန်းသိမ်းနိုင်အောင်၊ ကြည့်ရှုစောင့်ရှောက်ဖို့ ယေဟောဝါအပ်နှင်းထားတဲ့ အဖိုးတန်သိုးတော်စုနဲ့ဆက်ဆံတဲ့အခါ ကျမ်းစာမူတွေကိုကျင့်သုံးနိုင်အောင် ညီအစ်ကိုတွေကို ကူညီပေးတယ်။—၁ ပေ. ၅:၁-၃။

၂၀။ ကျွန်တော်တို့အားလုံး ‘ယေဟောဝါရဲ့သွန်သင်မှုခံရ’ တယ်လို့ ယေရှု ဘာကြောင့်ပြောနိုင်ခဲ့တာလဲ။ သင်ဘာလုပ်ဖို့ စိတ်ပိုင်းဖြတ်ထားသလဲ။

^၂၀ မေရှိယဘုရင်က နောက်လိုက်တွေကို ကောင်းကောင်းလေ့ကျင့်ပေးနေတယ်ဆိုတာ ထင်ရှားပါတယ်။ ဒီလေ့ကျင့်မှုအားလုံးက အထက်ကနေအောက်ကို အဆင့်ဆင့်လေ့ကျင့်ပေးတာဖြစ်တယ်။ ယေဟောဝါက သားတော်ကို လေ့ကျင့်ပေးတယ်၊ သားတော်က နောက်လိုက်တွေကို လေ့ကျင့်ပေးတယ်။ ဒါကြောင့်လည်း ယေရှုက ကျွန်တော်တို့အားလုံးဟာ ‘ယေဟောဝါရဲ့သွန်သင်မှုခံရ’ တယ်လို့ ပြောနိုင်ခဲ့တာပေါ့။ (ယော. ၆:၄၅; ဟေရှာ. ၅၄:၁၃၊ ကဘ) ဘုရင်က ကျွန်တော်တို့ကို နည်းအမျိုးမျိုးနဲ့ လေ့ကျင့်ပေးနေတယ်။ ဒီလေ့ကျင့်ပေးမှုကနေ အကျိုးအပြည့်အဝရယူဖို့ စိတ်ပိုင်းဖြတ်ထားကြပါစို့။ လေ့ကျင့်မှုအားလုံးရဲ့ အဓိကရည်ရွယ်ချက်က ဘုရားသခင်နဲ့ဆက်ဆံရေးခိုင်မြဲအောင် ကူညီပေးဖို့ဖြစ်တယ်။ ဒါမှ ကျွန်တော်တို့ဟာ အမှုတော်ကို အကုန်အစင်ပြီးမြောက်အောင် လုပ်ဆောင်နိုင်ကြပါလိမ့်မယ်။