၁၊ ၂။ (က) သူစိမ်း​တစ်ယောက်က မာရိ​ကို ဘယ်လို လာ​နှုတ်ဆက်​သလဲ။ (ခ) မာ​ရိ ဘယ်​ဆုံး​ဖြတ်​ချက်​ကို ချ​ရ​မလဲ။ ဒါက သူ့​ဘဝ​ကို ဘယ်​လို ပြောင်း​လဲ​စေ​မလဲ။

မာရိဟာ သူ့​အိမ် ရောက်လာတဲ့ ဧည့်သည်​ကို ကြောင်​ပြီး ကြည့်​နေတယ်။ အဖေ၊ အမေ​ရှိသလား​လို့ မ​မေး​ဘဲ သူ့ကို လာ​တွေ့​တာ​လို့ ပြောတယ်။ ဒီ​လူဟာ နာဇရက်​မြို့သား​တော့ မဖြစ်နိုင်ဘူး။ မာရိ​နေတဲ့ မြို့ငယ်​လေးမှာ သူစိမ်း​ဆိုရင် ချက်ချင်း​သိတယ်။ ဒီ​ဧည့်သည်​ကျတော့ ထူးခြားတယ်။ သူက “မင်္ဂလာပါ၊ ဘုရား မျက်နှာသာ​ရတဲ့​သူ။ ယေဟောဝါ​ဘုရားဟာ ခင်ဗျား​နဲ့​အတူ ရှိတယ်” လို့ နှုတ်ဆက်​တာ​က မာရိ​အတွက် တကယ့်ကို အထူးအဆန်း ဖြစ်နေတယ်။—လုကာ ၁:၂၆-၂၈ ကိုဖတ်ပါ။

^၂ ဂါ​လိ​လဲ​နယ်၊ နာဇရက်​မြို့​က ဟေလိ​ရဲ့​သမီး မာ​ရိ​လို့ ကျမ်း​စာ​က မိတ်​ဆ​က်​ပေး​ထား​တယ်။​ မာရိ​ဘဝရဲ့ အလှည့်အပြောင်း​ကာလမှာ သူ့ကို စ​သိလာ​ရတယ်။ အဲဒီအချိန်မှာ သူဟာ မချမ်းသာပေမဲ့လည်း ဘုရားသခင်ကို ယုံကြည်တဲ့ လက်သမား ယောသပ်နဲ့ စေ့စပ်​ထားတယ်။ အဲဒါကြောင့် မာရိဟာ ဇနီး​တစ်ယောက်​အနေနဲ့ ယောသပ်​ကို ထောက်မ​ကူညီမယ်၊ ယောသပ်နဲ့​အတူ မိသားစု​တစ်ခု ထူထောင်​မ​ယ်​ဆိုတဲ့ ရိုးရှင်းတဲ့​ဘဝကို စတင်ဖို့ စီစဉ်​ထား​ပုံ​ရတယ်။ အဲဒီလို​အချိန်မှာ သူ့​ဆီ ဒီ​ဧည့်သည် ရုတ်တရက်​ရောက်လာပြီး ဘုရားသခင်​ဆီက တာဝန်​တစ်ခု ပေး​အပ်တယ်။ အဲဒီ​တာဝန်​ကြောင့် သူ့​ဘဝ အကြီးအကျယ် ပြောင်းလဲ​တော့​မ​ယ်။

၃၊ ၄။ မာရိ​အကြောင်း သိနိုင်ဖို့ ဘယ်​အချက်တွေကို ဘေးဖယ်​ထားဖို့​လိုသလဲ။ ဘာကိုပဲ အာရုံစိုက်​ဖို့ လိုသလဲ။

^၃ မာရိ​အကြောင်း ကျမ်းစာက အများကြီး မဖော်​ပြ​ထားတာကို လူတွေ အံ့သြ​ကြတယ်။ သူ့ရဲ့ ဘဝနောက်ခံ​နဲ့ ပင်ကိုစရိုက်​အကြောင်း မသိ​ရ​သ​လောက်​ပါပဲ။ ရုပ်ရည်နဲ့​ပတ်သက်ပြီး လုံးဝ မဖော်ပြထားဘူး။ ဒါတောင်မှ သူနဲ့​ပတ်သက်ပြီး ကျမ်းစာ​ဖော်ပြ​ထား​သ​လောက်​နဲ့ သူ့​အကြောင်း အတော်လေး သိရ​ပါတယ်။

^၄ မာရိ​အကြောင်း​သိနိုင်ဖို့ သူနဲ့​ပတ်သက်ပြီး ဘာသာ​ဂိုဏ်းဂဏ အသီးသီးရဲ့ သွန်သင်ချက်တွေကို ဘေးဖယ်​ထားဖို့​လိုတယ်။ ပန်းချီကား​တွေ၊ စ​ကျင်​ကျောက်​တွေ၊ အင်္ဂတေ​တွေ​နဲ့ သူ့​ပုံပန်းသဏ္ဌာန်​ကို ဖော်ပြ​ထားတဲ့ “ရုပ်တုတွေ” အကြောင်း မဆွေးနွေး​ဘဲ ချန်​ထား​ကြစို့။ နှိမ့်ချမှု​ရှိတဲ့ ဒီ​အမျိုးသမီးကို “ဘုရားသခင့်​မယ်တော်၊” “ကောင်းကင်​မိဖုရား” စတဲ့ မြင့်မြတ်တဲ့ ဘွဲ့​နာမည်​တွေ ပေးထားတဲ့ ဘာသာရေး​အယူဝါဒတွေကို​လည်း ဖယ်ထား​ကြစို့။ အဲဒီအစား မာရိ​နဲ့​ပတ်သက်ပြီး ကျမ်းစာ အမှန်တကယ် ဖော်ပြတာ​ကိုပဲ အာရုံစိုက်​ကြရအောင်။ ကျမ်းစာက မာရိရဲ့ ယုံကြည်ခြင်းကို ထိုးထွင်း​သိမြင်​စေပြီး သူ့​ယုံကြည်ခြင်းကို ဘယ်လို အတုယူ​နိုင်တယ်ဆိုတာ သိ​စေတယ်။

၅။ (က) ဂါဗြေလရဲ့ နှုတ်ဆက်​စကားကို မာရိ​တုံ့ပြန်ပုံ​ကနေ သူ့​အကြောင်း ဘာ​ဖော်ပြသလဲ။ (ခ) မာရိ​ဆီကနေ ဘာသင်ယူနိုင်သလဲ။

^၅ မာရိ​ဆီ ရောက်လာတဲ့ ဧည့်သည်​က သာမန်​လူ​မဟုတ်ဘဲ ကောင်းကင်တမန် ဂါဗြေလ ဖြစ်နေတယ်။ ဒီ​ကောင်းကင်တမန်​က မာရိ​ကို “ဘုရား မျက်နှာသာ​ရတဲ့​သူ” လို့​ခေါ်​လိုက်တဲ့အခါ မာရိ​ခမျာ “စိတ်​ယောက်ယက်ခတ်ပြီး” ဒီလို​နှုတ်ဆက်​တာ​ကို နားမလည်​နိုင်​ဘဲ ဖြစ်သွားတယ်။ (လု. ၁:၂၉) ဘယ်သူက သူ့ကို အထူး​မျက်နှာသာ ပေးတာလဲ။ လူတွေက သူ့ကို မျက်နှာသာ​ပေးမယ်လို့ သူ​မထင်​ဘူး။ ယေဟောဝါ​ဘုရားက သူ့ကို အထူး​မျက်နှာသာ​ပေးတာ​လို့ ကောင်းကင်တမန် ပြောတယ်။ ဒါကို မာရိ တန်ဖိုး​ထားတယ်။ ဒါပေမဲ့ ဘုရားသခင်ရဲ့ မျက်နှာသာ​ရသူ​ဖြစ်လို့ သူ မာန​မကြီး​သွားပါ​ဘူး။ ကျွန်တော်တို့လည်း ဘုရား​မျက်နှာသာ​ရဖို့ ကြိုးစား​ရမယ်၊ ဘုရား​မျက်နှာသာ​ရလို့ မာန​မကြီး​ရ​ဘူးဆို​တာ​ကို မာရိ​ဆီကနေ သင်ယူနိုင်တယ်။ ဘုရားသခင်က မောက်မာ​သူတွေကို ဆန့်ကျင်တယ်။ စိတ်​နှိမ့်ချတဲ့ နိမ့်ကျ​သူတွေကို​တော့ ချစ်မြတ်နိုးပြီး ထောက်မ​ပေးတယ်။—ယာ. ၄:၆။

၆။ ဘယ်​အခွင့်ထူး​ကို ကောင်းကင်တမန်​က မာရိ​ကို ကမ်းလှမ်း​သလဲ။

^၆ စိတ်ကူးလို့ မရ​နိုင်လောက်အောင် ထူးမြတ်​တဲ့ အခွင့်အရေး​ကို မာရိ​ရမယ်လို့ ကောင်းကင်တမန်​ပြောလို့ သူ အထူး​နှိမ့်ချဖို့ လိုပါလိမ့်မယ်။ လူသားတွေ​ထဲမှာ အရေးတကာ့ အရေးကြီးဆုံး​ပုဂ္ဂိုလ် ဖြစ်​လာမယ့် ကလေးကို သူ​မွေးဖွား​ရလိမ့်မယ်လို့ ကောင်းကင်တမန် ရှင်းပြတယ်။ “ယေဟောဝါ​ဘုရားက သူ့ကို ဖခင်​ဒါ​ဝိဒ်ရဲ့ ရာဇ​ပလ္လင် အပ်နှင်း​လိမ့်မယ်။ သူက ယာကုပ်​အမျိုး​ကို ထာဝစဉ် အုပ်စိုး​လိမ့်မယ်။ သူ့ရဲ့​အုပ်ချုပ်မှုဟာ အဆုံးတိုင်​မှာ မဟုတ်ဘူး” လို့ ဂါဗြေလ ပြောတယ်။ (လု. ၁:၃၂၊ ၃၃) ဒါဝိဒ်​မင်းရဲ့ မျိုးနွယ်​တစ်ယောက်ဟာ ထာဝစဉ်​အုပ်စိုး​ရမယ်ဆိုတဲ့ အနှစ်​တစ်ထောင်​ကျော်​က ဘုရား​ပေးခဲ့တဲ့ ကတိ​ကို မာရိ ကောင်းကောင်း​သိထား​မှာ သေချာတယ်။ (၂ ရှ. ၇:၁၂၊ ၁၃) အခုတော့ ဘုရားသခင့်​လူမျိုး နှစ်​အတော်ကြာ စောင့်မျှော်ခဲ့​တဲ့ မေရှိယကို သူ ဖွားမြင်​ရမှာ​ပါလား။

၇။ (က) မာရိ​မေးလိုက်​တဲ့ မေးခွန်း​က သူ့​အကြောင်း ဘာ​ဖော်ပြသလဲ။ (ခ) ဒီနေ့​ခေတ် လူငယ်တွေဟာ မာရိ​ဆီကနေ ဘာသင်ယူနိုင်သလဲ။

^၇ ဒါ​ထက် မ​က​သေး​ဘူး။ သူ့​သားဟာ “အမြင့်ဆုံး​အရှင်ရဲ့ သားလို့ အခေါ်​ခံရလိမ့်မယ်” ဆိုပြီး ကောင်းကင်တမန် ပြော​သေးတယ်။ သာမန်​အမျိုးသမီး​တစ်ယောက်ဟာ ဘုရားသခင်ရဲ့​သားကို ဘယ်လိုလုပ် ဖွားမြင်​နိုင်မှာလဲ။ မာရိ​အနေနဲ့ ယောသပ်နဲ့ စေ့စပ်​ထား​ရုံ​ပဲ ရှိသေး​တဲ့​အတွက် ဘယ်လိုလုပ် သား​မွေး​မလဲ။ ဒါကြောင့် သူက “ဒါ ဘယ်လိုလုပ် ဖြစ်နိုင်မှာလဲ။ ကျွန်မဟာ အပျိုစင်ပါ” လို့ ပွင့်ပွင့်လင်းလင်း ပြော​လိုက်တယ်။ (လု. ၁:၃၄) အပျိုစင်​ဖြစ်တဲ့အကြောင်း မာရိ ထုတ်​ပြောတာကို သတိပြုပါ။ သူဟာ ကိုယ်ကျင့်တရား​စင်ကြယ်သူ ဖြစ်ကြောင်း ဂုဏ်ယူ​ပြီး ပြော​နေတာ။ ဒီနေ့​ခေတ် လူငယ်တွေ​ကျတော့ အပျိုစင်​ဘဝကို စွန့်လွှတ်ဖို့ ဝန်မလေး​ကြဘူး။ အဲဒီလို မလုပ်​တဲ့​သူတွေကို​တောင် ကဲ့ရဲ့​လှောင်ပြောင်​ကြတယ်။ ဒီ​လောကဟာ လုံးဝ ပြောင်းလဲ​သွားပြီ။  ယေဟောဝါ​ဘုရားက​တော့ မပြောင်းလဲ​ဘူး။ (မလ. ၃:၆) မာရိ​ခေတ်​က လူတွေ​လို ကိုယ်ကျင့်တရား​စံနှုန်းတွေကို စွဲစွဲမြဲမြဲ လိုက်နာ​သူတွေကို ဘုရား တန်ဖိုး​ထားတယ်။—ဟီဘရူး ၁၃:၄ ကိုဖတ်ပါ။

၈။ မာရိဟာ မစုံလင်သူ​ဖြစ်ပေမဲ့ စုံလင်တဲ့ ကလေးကို ဘယ်လို မွေးဖွား​နိုင်မလဲ။

^၈ မာရိဟာ ဘုရားသခင်ရဲ့ သစ္စာရှိ​ကျေးကျွန်​ဖြစ်ပေမဲ့ မစုံလင်သူ​ပါပဲ။ ဒီတော့ ဘုရားသခင်ရဲ့​သား​ဖြစ်တဲ့ စုံလင်သူ​တစ်ယောက်ကို ဘယ်လို မွေးဖွား​ပေးနိုင်​မလဲ။ ဂါဗြေလ​က ဒီလို​ရှင်းပြတယ်– “ခင်ဗျား​အပေါ် သန့်ရှင်းသော စွမ်းအားတော် သက်ရောက်​ပြီး အမြင့်ဆုံး​အရှင်ရဲ့ တန်ခိုးတော် လွှမ်းမိုး​လိမ့်မယ်။ ဒါကြောင့် မွေး​လာမယ့် ကလေးဟာ သန့်ရှင်းတဲ့​သူ၊ ဘုရားသခင်ရဲ့​သားလို့ အခေါ်​ခံရလိမ့်မယ်။” (လု. ၁:၃၅) သန့်ရှင်းခြင်း​ဆိုတာက “သန့်စင်ခြင်း၊” “စင်ကြယ်ခြင်း၊” “မြင့်မြတ်ခြင်း” ဆိုတဲ့​အဓိပ္ပာယ်​ရှိတယ်။ သာမန်​ဆိုရင် သားသမီးတွေဟာ မစင်ကြယ်​ဘူး။ မိဘတွေဆီကနေ အပြစ်ကို အမွေ​ရ​ကြတယ်။ ဒါပေမဲ့ ယေဟောဝါ​ဘုရားဟာ ထူးခြားတဲ့ အံ့ဖွယ်အမှု​တစ်ခုကို ဒီ​တစ်ခေါက် ပြုလုပ်​တော့​မှာ​ဖြစ်တယ်။ ဘုရားဟာ သူ့​သားရဲ့​အသက်ကို ကောင်းကင်​ကနေ မာရိရဲ့ သား​အိမ်ထဲ ထည့်သွင်း​ပေးတော့မယ်။ အဲဒီနောက် သန့်ရှင်းသော စွမ်းအားတော်ကို မာရိ​အပေါ် “သက်ရောက်” စေပြီး သားကို အပြစ်ရဲ့ စွန်းထင်းမှု မရှိအောင် ဘုရားသခင် ကာကွယ်ပေး​မှာ​ဖြစ်တယ်။ ကောင်းကင်တမန်ရဲ့ စကားကို မာရိ​ယုံသလား။ သူ ဘယ်လို တုံ့ပြန်​ခဲ့သလဲ။

၉။ (က) မာရိ​နဲ့ ပတ်သက်ပြီး ဝေ​ဖန်​ရေး​သ​မား​တွေ သံသယဝင်​တာ ဘာကြောင့် မှား​သလဲ။ (ခ) မာရိရဲ့ ယုံကြည်ခြင်း ပို​ခိုင်ခံ့​လာ​အောင် ဂါဗြေလ ဘယ်လို ကူညီ​ပေးခဲ့သလဲ။

^၉ ဝေ​ဖန်​ရေး​သ​မား​တွေ​အပြင် ခရစ်​ယာ​န်​ဘောင်​က ကျမ်း​ပညာ​ရှင်​တ​ချို့​တောင် အပျို​စင်​တစ်​ယောက် သား​ဖွား​နိုင်​တာ​ကို ယုံ​ရ​ခက်​နေ​ကြ​တ​ယ်။ သူတို့ဟာ ပညာတတ်​တွေ​ဖြစ်ပေမဲ့ ရိုးရှင်းတဲ့ အမှန်တရားကို နားမလည်​နိုင်ကြဘူး။ ဂါဗြေလ ပြောခဲ့တဲ့​အတိုင်းပဲ “ဘုရားသခင်ရဲ့ စကားတွေ မပြည့်စုံ​ဘဲ မနေဘူး။” (လု. ၁:၃၇) မာရိ​ကတော့ ယုံကြည်ခြင်း​ခိုင်ခံ့​သူ ဖြစ်လို့ ဂါဗြေလရဲ့​စကားကို အမှန်တရား​အဖြစ် လက်ခံတယ်။ အဲဒီ​ယုံကြည်ခြင်းက ပြောသမျှ​ယုံတာ မဟုတ်ပါဘူး။ စဉ်းစား​ဆင်ခြင်​တတ်​သူ ဖြစ်တဲ့ မာရိဟာ သူ့​ယုံကြည်ခြင်း ပို​ခိုင်ခံ့​လာစေဖို့ အထောက်အထား ရ​ချင်​ခဲ့​တ​ယ်။ ဒါနဲ့ ဘုရားသခင်ဟာ မာရိ​နဲ့ အမျိုး​တော်စပ်​တဲ့၊ သားမဖွား​နိုင်တော့တဲ့ သက်ကြီးရွယ်အို ဧလိရှဗက်​ကို အံ့သြစရာ​ကောင်းတဲ့​နည်းနဲ့ ကိုယ်ဝန်ရ​စေခဲ့​ပြီလို့ ဂါဗြေလ အထောက်အထား​ပြခဲ့တယ်။

၁၀။ မာရိ​ရတဲ့ အခွင့်ထူးဟာ သူ့​အတွက် စိုးရိမ်​စ​ရာ​မရှိ၊ အခက်အခဲ​မရှိဘူးလို့ ဘာကြောင့် မထင်သင့်​သလဲ။

^၁၀ အခု၊ မာရိ ဘာဆက်​လုပ်မလဲ။ သူ့မှာ​တာဝန်​တစ်ခု ရထား​ပြီး ဂါဗြေလ ပြောသမျှ​ကို ဘုရားသခင် လုပ်ပေးမယ်​ဆိုတဲ့ အထောက်အထားလည်း ရပြီ။ ဒါကြောင့် သူ့မှာ ဘာ​စိုးရိမ်​စရာ​မှ မရှိဘူး၊ ဘာ​အခက်အခဲ​မှ မရှိဘူးလို့​တော့ မထင်ပါနဲ့။ တစ်ချက်​က မာရိဟာ ယောသပ်နဲ့ စေ့စပ်​ထားပြီး​သား​ဖြစ်တယ်။ သူ့မှာ ကိုယ်ဝန်​ရှိ​နေတယ်လို့ ယောသပ် သိသွား​ရင် သူ့ကို လက်ထပ်​ချင်​ပါ့မလား။ နောက်​တစ်ချက်​က အဲဒီ​တာဝန်​ကိုယ်နှိုက်​က သူ့​အတွက် သိပ်​ကြီးလေး​တဲ့​တာဝန် ဖြစ်နေတယ်။ ဘုရားသခင် ဖန်ဆင်း​ထား​သမျှမှာ အဖိုး​အထိုက်ဆုံး၊ ဘုရား​အချစ်​ရ​ဆုံး သားရဲ့​အသက်ကို  ကိုယ်ဝန်ဆောင်​ရမှာ ဖြစ်တယ်။ မွေးကင်းစ​ကလေးကို ဆိုးညစ်​တဲ့ လောက​ထဲမှာ ကျွေးမွေး​ပြုစု၊ ကာကွယ်ပေး​ရမှာ ဖြစ်တယ်။ တကယ်​ကြီးလေး​တဲ့ တာဝန်​ပါပဲ။

၁၁၊ ၁၂။ (က) ခွန်အား​ရှိပြီး ယုံကြည်ခြင်း​ခိုင်ခံ့တဲ့ အမျိုးသားတွေ​တောင်မှ ဘုရား​ပေးတဲ့ ခက်ခဲတဲ့​တာဝန်တွေ​နဲ့ ပတ်သက်ပြီး ဘယ်လို တုံ့ပြန်​ခဲ့ကြသလဲ။ (ခ) ဂါဗြေလကို မာရိ ပြန်​ပြောတဲ့​စကား​ကနေ သူ့​အကြောင်း ဘာ​သိရသလဲ။

^၁၁ ခွန်အား​ရှိပြီး ယုံကြည်ခြင်း​ခိုင်ခံ့တဲ့ အမျိုးသားတွေ​တောင်မှ ခက်ခဲတဲ့ ဘုရားပေး​တာဝန်တွေကို လက်ခံဖို့ တွန့်ဆုတ်​ခဲ့​တဲ့​အကြောင်း ကျမ်းစာမှာ ဖော်ပြ​ထားတယ်။ မောရှေ​က သူဟာ စကားပြော သွက်လက်​သူ မဟုတ်လို့ ဘုရားရဲ့ ပြောရေးဆိုခွင့်​ရှိသူ မဖြစ်နိုင်ဘူး​ဆိုပြီး ဘုရားပေး​တာဝန်ကို ငြင်းခဲ့တယ်။ (ထွ. ၄:၁၀) ယေရမိကလည်း သူဟာ “လူငယ်လေး” ဖြစ်တဲ့အတွက် ဘုရားပေး​တာဝန်ကို လက်မခံ​နိုင်ဘူး​လို့ ပြောခဲ့တယ်။ (ယေ. ၁:၆) ယောနဟာ သူ့ကို​ပေးအပ်​တဲ့​တာဝန်​ကနေ ထွက်ပြေးခဲ့​တ​ယ်။ (ယောန ၁:၃) မာရိ​ကျတော့​ကော။

^၁၂ နှိမ့်ချမှုနဲ့ နာခံမှု အပြည့်​ရှိတဲ့ မာရိရဲ့​စကားတွေကို ဒီနေ့​ခေတ် လူအများ မှတ်မိ​ကြ​တုန်း​ပဲ။ သူက “ကျွန်မဟာ ယေဟောဝါ​ဘုရားရဲ့ အစေခံပါ။ သခင်​ပြောတဲ့​အတိုင်း ဖြစ်​လာပါစေ” လို့​ဂါဗြေလကို ပြောတယ်။ (လု. ၁:၃၈) အစေခံ​ဆိုတာက အနိမ့်ကျဆုံး အိမ်စေ။ သခင်​ခိုင်း​ချင်​သလို ခိုင်း​လို့​ရတဲ့​သူ ဖြစ်တယ်။ မာရိလည်း အဲဒီလိုပဲ သူ့​သခင် ယေဟောဝါ​ဘုရား အလိုရှိတဲ့​အတိုင်း လုပ်ပါ့မယ်​လို့ ပြောတယ်။ ဘုရားသခင်ဟာ သူ့​လူတွေကို ကာကွယ်​ပေးတယ်၊ သူ့ကို သစ္စာစောင့်သိ​သူတွေ​အပေါ် သစ္စာ​ရှိတယ်ဆိုတာ မာရိ သိထားတယ်။ ဒီ​ခက်ခဲတဲ့​တာဝန်ကို အတတ်နိုင်ဆုံး ကြိုးစား​ထမ်းဆောင်​ရင် ကောင်းချီး​ရမယ်ဆိုတာ​ကိုလည်း သိတယ်။—ဆာ. ၁၈:၂၅။

၁၃။ ခက်​ခဲ​ပုံ​ရ​တဲ့၊ မဖြစ်​နိုင်​ပုံ​ပေါက်​တဲ့ အရာ​ကို လုပ်​ဆောင်​ဖို့ ဘုရားသခင် တောင်း​ဆို​တဲ့​အခါ မာ​ရိရဲ့ စံနမူ​နာကို ဘယ်​လို အတုယူ​နိုင်​သလဲ။

^၁၃ တစ်ခါတလေ ကျွန်တော်တို့​အမြင်မှာ ခက်ခဲပုံ​ရတဲ့၊ မဖြစ်နိုင်ပုံ​ပေါက်​တဲ့ အလုပ်ကို ဘုရားသခင် လုပ်​ခိုင်းတဲ့​အခါ​တွေ ရှိတယ်။ အဲဒီအခါ မာရိ​လို ယေဟောဝါ​ဘုရားကို ယုံကြည်​ကိုးစားပြီး ကိုယ့်ကိုယ်ကိုယ် ဘုရားသခင့်​လက်ထဲ အပ်​ထား​သင့်တယ်။ ဘုရားကို အဲဒီလို ယုံကြည်​ကိုးစား​ဖို့ ကျမ်းစာမှာ ပြောတယ်။ (ပညာ. ၃:၅၊ ၆) ဘုရား​သခင်​ကို ယုံ​ကြည်​ကိုး​စား​မလား။ ယုံကြည်​ကိုး​စား​မ​ယ်​ဆို​ရင် ဘုရား​သခင်​က ကျွန်တော်တို့​ကို ကောင်း​ချီး​ပေး​မ​ယ့်​အပြင် ကျွန်တော်​တို့​ရဲ့ ယုံကြည်​ခြင်း​ကို​လည်း ပို​ခိုင်​ခံ့​လာ​အောင် ကူညီ​ပေး​မှာ သေချာ​ပါတယ်။

၁၄၊ ၁၅။ (က) ဧလိရှဗက်​နဲ့ ဇာခရိ​တို့​ဆီ မာရိ​သွားလည်​တဲ့အခါ ယေဟောဝါ​ဘုရားက သူ့ကို ဘယ်လို​ကောင်းချီး​ပေး​သလဲ။ (ခ) လုကာ ၁:၄၆-၅၅ မှာ မှတ်တမ်း​တင်ထားတဲ့ မာရိရဲ့ စကားတွေ​ကနေ သူ့​အကြောင်း ဘာ​သိရသလဲ။

^၁၄ ဧလိရှဗက်​အကြောင်း ဂါဗြေလ​ပြောပြတာ​က မာရိ​အတွက် တကယ်​အားရှိစရာ​ပဲ။ သူ့​အခြေအနေကို တခြား​အမျိုးသမီးတွေ အားလုံး​ထက် ဧလိရှဗက်​က ပို​နားလည်​ပေးနိုင်​မှာပါ။  ဒါနဲ့ မာရိဟာ ယုဒ​နယ်​က တောင်တန်း​ဒေသ​ကို ချက်ချင်း​ထွက်​သွားတယ်။ အဲဒီ​ခရီး​က သုံး​လေး​ရက်​လောက် ကြာနိုင်တယ်။ ပုရောဟိတ်​ဇာခရိ​နဲ့ ဧလိရှဗက်​တို့ရဲ့ အိမ်ထဲ မာရိ​ဝင်​တာ​နဲ့ ယေဟောဝါ​ဘုရားက သူ့ရဲ့ ယုံကြည်ခြင်းကို ပို​ခိုင်ခံ့​စေခဲ့တယ်။ မာရိရဲ့ နှုတ်ဆက်သံ​ကို ဧလိရှဗက် ကြား​တာ​နဲ့ သူ့​ဗိုက်​ထဲ​က ကလေးဟာ လှုပ်လှုပ်ရွရွ ဖြစ်လာတာကို ခံစား​လိုက်ရတယ်။ အဲဒီနောက် ဧလိရှဗက်ဟာ သန့်ရှင်းသော စွမ်းအားတော်​နဲ့ ပြည့်​ပြီး မာရိ​ကို “ငါ့သခင်ရဲ့​မိခင်” လို့​ခေါ်​လိုက်တယ်။ မာရိ​ဖွားမြင်မယ့် သားဟာ သူ့ရဲ့​သခင် မေရှိယ​ဖြစ်လာမယ်​ဆိုတာ ဧလိရှဗက်​ကို ဘုရားသခင် အသိ​ပေးတယ်။ အဲဒီအပြင် သစ္စာရှိ​ရှိ နာခံ​ခဲ့​တဲ့ မာရိ​ကို ချီးကျူး​ဖို့ လှုံ့ဆော်​ခံရပြီး “ဒါကို​ယုံတဲ့ ညီမ​ဟာ မင်္ဂလာ​ရှိတယ်” လို့ ပြော​လိုက်တယ်။ (လု. ၁:၃၉-၄၅) မှန်ပါတယ်၊ မာရိ​ကို ယေဟောဝါ​ဘုရား​ပေးတဲ့ ကတိ​မှန်သမျှ ပြည့်စုံ​လာပါလိမ့်မယ်။

 ^၁၅ အဲဒီအချိန်မှာ မာရိ ပြန်​ပြောတဲ့ စကားတွေကို ကျမ်းစာထဲမှာ သေသေချာချာ မှတ်တမ်း​တင်ထားတယ်။ (လုကာ ၁:၄၆-၅၅ ကိုဖတ်ပါ။) ဒါ​ဟာ ကျမ်း​စာ​မှာ​တွေ့ရ​တဲ့ မာ​ရိ​ရဲ့ အရှည်​ဆုံး​စကား​ဖြစ်​ပြီး အဲဒီ​က​နေ သူ့​အကြောင်း အများ​ကြီး​သိ​ရ​တ​ယ်။ မာရိဟာ မေရှိယရဲ့​မိခင် ဖြစ်ရတဲ့ အခွင့်ထူး​ရလို့ ယေဟောဝါ​ဘုရားကို ဂုဏ်တင်​ချီးမွမ်းခဲ့တယ်။ သူ့မှာ ကျေးဇူးတင် လေးမြတ်​တတ်တဲ့​စိတ် ရှိတယ်ဆိုတာ ဖော်ပြတယ်။ ဘုရားသခင်ဟာ မောက်မာ​သူ၊ အာဏာ​ရှိသူတွေကို ရှုတ်ချ​ပြီး ဘုရားကို​ဝတ်ပြုတဲ့ နိမ့်ကျ​သူ၊ ဆင်းရဲသူတွေကို ကူညီပေး​တယ်လို့ သူ​ပြောတဲ့​အတွက် သူ့မှာ နက်ရှိုင်း​တဲ့ ယုံကြည်ခြင်း​ရှိ​မှန်း ထင်ရှားတယ်။ အဲဒီအပြင် သူ့မှာ ကျမ်းစာ​အသိပညာ အများကြီး ရှိတယ်​ဆိုတာကိုပါ သိရတယ်။ ခန့်မှန်းချက်​တစ်ခု​အရ မာရိဟာ ဟီဘရူး​ကျမ်းစောင်​တွေ​ထဲ​ကနေ ကျမ်းစကား ၂၀ ကျော်​ကို ကိုးကား​ဖော်ပြခဲ့တယ်။ *

၁၆၊ ၁၇။ (က) မာရိ​နဲ့ သူ့ရဲ့​သားဟာ ကျွန်တော်တို့ အတုယူ​ရမယ့် ဘယ်​စိတ်သဘောထား​ကို တင်ပြခဲ့​သလဲ။ (ခ) ဧလိရှဗက်​ဆီ မာရိ အလည်သွား​ခဲ့တာက ဘာကို သတိ​ရစေ​သလဲ။

^၁၆ မာ​ရိ​ဟာ ကျမ်း​စာ​ကို လေး​လေး​နက်​နက် တွေး​တော​ဆင်​ခြင်​ခဲ့​တဲ့​အတွက် ပြော​စ​ရာ ကိုယ်ပိုင်​အတွေး​အခေါ်​တွေ အများ​ကြီး ရှိ​မှာ​ပဲ။ ဒါ​ပေမဲ့ သူ​ဟာ နှိမ့်​ချ​မှု​ရှိ​ရှိ​နဲ့ ကျမ်း​စကား​တွေ​ကိုပဲ ပြော​ခဲ့​တ​ယ်။ သူ့ရဲ့​ဗိုက်​ထဲမှာ ကြီးထွား​နေတဲ့ သားဟာလည်း နောက်ပိုင်းမှာ သူ့လို​ပဲ နှိမ့်ချမှု​ရှိ​ရှိ​နဲ့ “ကျွန်တော် သင်ပေး​နေတာ​တွေဟာ ကျွန်တော့်ရဲ့​တရား မဟုတ်ဘူး။ ကျွန်တော့်ကို စေလွှတ်​လိုက်တဲ့​အရှင်ရဲ့ တရား​တွေ​ပဲ” လို့​ပြောပါ​လိမ့်မယ်။ (ယော. ၇:၁၆) ဒါကြောင့် ကျွန်တော်တို့လည်း ကိုယ့်ကိုယ်ကိုယ် ဒီလို​မေးသင့်တယ်– ‘ငါလည်း မာရိ​လို ကျမ်းစာကို ရိုသေ​လေးမြတ်​သလား။ ကိုယ့်​အယူအဆ၊ ကိုယ့်​သွန်သင်ချက်တွေကို ပို​နှစ်သက်​သလား။’ မာရိရဲ့ သဘောထား​က မှန်တယ်။

^၁၇ မာရိဟာ ဧလိရှဗက်​ဆီမှာ သုံးလလောက် နေတဲ့​အချိန်အတွင်း အပြန်အလှန် အားပေး​တည်ဆောက်မှု ရခဲ့​မှာ သေချာတယ်။ (လု. ၁:၅၆) ခင်မင်​ရင်းနှီးတဲ့ မိတ်ဆွေ​တွေ​ရှိတာ ဘယ်လောက် ကောင်း​သလဲ​ဆိုတာ ဒီ​ကျမ်း​မှတ်တမ်းက ဖော်ပြတယ်။ ယေဟောဝါ​ဘုရားကို တကယ် ချစ်တဲ့​သူတွေနဲ့ မိတ်ဖွဲ့​ရင် ဘုရားသခင်နဲ့ ပို​ရင်းနှီး​လာ​မှာ သေချာတယ်။ (ပညာ. ၁၃:၂၀) မာရိ အိမ်ပြန်ချိန် ရောက်​ပြီ။ သူ​ကိုယ်ဝန်​ရှိနေမှန်း ယောသပ် သိ​ရင် ဘာ​ပြောမလဲ။

၁၈။ ယောသပ်​ကို မာရိ ဘာ​ပြောပြသလဲ။ အဲဒီနောက် သူ ဘယ်လို တုံ့ပြန်​သလဲ။

^၁၈ မာရိဟာ ကိုယ်ဝန်​ရင့်တဲ့​အထိ မ​စောင့်​ဘဲ ယောသပ်​ကို ပြောပြ​ခဲ့​ပုံ​ရတယ်။ ဘုရားသခင်ကို ကြောက်ရွံ့တဲ့ ဖြောင့်မတ်သူ ယောသပ် ဒီ​သတင်း​ကြား​ရင် ဘယ်လိုများ တုံ့ပြန်မလဲလို့ သူ တွေးမိမှာပဲ။ ဘယ်လိုပဲ​ဖြစ်ဖြစ် မာရိဟာ ဖြစ်ကြောင်းကုန်စင် ပြောပြ​လိုက်တယ်။ အဲဒီအခါ ယောသပ် တော်တော်လေး စိတ်​အနှောင့်အယှက် ဖြစ်သွားတယ်။ မာရိ​ကို သူ​ယုံချင်ပေမဲ့ မာရိ​သစ္စာမဲ့​ပုံ ပေါက်​နေတယ်။ သူ့​စိတ်ထဲ ဘယ်လို​အတွေး​တွေ ဝင်​လာတယ်၊ ဘယ်လို စဉ်းစားခဲ့တယ်​ဆိုတာ ကျမ်းစာမှာ မဖော်ပြထားဘူး။ ဒါပေမဲ့ မာရိ​ကို ကွာရှင်းဖို့ ဆုံးဖြတ်လိုက်​တယ်လို့ ကျမ်းစာက ဆိုတယ်။ အကြောင်း​က စေ့စပ်​ထားသူ​နှစ်ယောက်ကို လက်ထပ်​ထားသူတွေ​အဖြစ် အဲဒီ​အချိန်​က ရှုမြင်ကြလို့​ပါ။ ဒါပေမဲ့ မာရိ လူရှေ့​သူ​ရှေ့ အရှက်တကွဲ အပြစ်ပေး​ခံရ​တာ​မျိုး မဖြစ်စေ​ ချင်​လို့ တိတ်တဆိတ် ကွာရှင်းဖို့ သူ​စဉ်းစား​တ​ယ်။ (မ. ၁:၁၈၊ ၁၉) အခု​လို အခြေ​အ​နေ​ကြောင့် ကြင်နာ​တတ်​တဲ့ ယော​သပ် စိတ်​အနှောင့်​အယှက် ဖြစ်​နေ​တာ​ကို မြင်​ရ​တဲ့​အခါ မာရိ​လည်း စိတ်​ထိ​ခိုက်​ခဲ့​မှာ​ပဲ။ ဒါ​ပေမဲ့ ယော​သပ်​ကို သူ အပြစ်​မတင်​ခဲ့​ဘူး။

၁၉။ အကောင်းဆုံး​ဖြစ်ဖို့ ယောသပ်​ကို ယေဟောဝါ​ဘုရား ဘယ်လို ကူညီပေး​သလဲ။

^၁၉ အကောင်းဆုံး​ဖြစ်ဖို့ ယောသပ်​ကို ယေဟောဝါ​ဘုရား ကူညီ​ပေးခဲ့တယ်။ အံ့ဖွယ်​နည်းနဲ့ မာရိ ကိုယ်ဝန်​ရခဲ့တာဟာ အမှန်​ပဲ​လို့ ကောင်းကင်တမန်​က ယောသပ်​ကို အိပ်မက်​ထဲမှာ လာ​ပြောတယ်။ အဲဒီအခါ သူ စိတ်​ပေါ့​သွားမှာပဲ။ ဒီ​အခါ မာရိ​လို​ပဲ ယောသပ်လည်း ယေဟောဝါ​ဘုရား ညွှန်ကြား​တဲ့​အတိုင်း လုပ်ဆောင်တော့​တ​ယ်။ သူ​ဟာ မာ​ရိ​ကို ဇနီး​အဖြစ် လက်​ထပ်​ပြီး​နောက် ယေဟောဝါ​ဘုရား​ရဲ့ သား​တော်​ကို စောင့်​ရှောက်​ရ​မ​ယ့် တာဝန်​ကို လက်ခံ​ဖို့ အသင့်​ဖြစ်နေ​ပြီ။—မ. ၁:၂၀-၂၄။

၂၀၊ ၂၁။ အိမ်ထောင်သည်တွေ​နဲ့ အိမ်ထောင်ပြု​ဖို့ စဉ်းစား​နေ​သူတွေဟာ မာရိ​နဲ့ ယောသပ်တို့​ဆီကနေ ဘာသင်ယူနိုင်သလဲ။

^၂၀ လွန်ခဲ့တဲ့​အနှစ် ၂,၀​၀​၀ ကျော်​က ဒီ​မောင်နှံစုံ​ဆီကနေ အခုခေတ် အိမ်ထောင်သည်တွေ​အပြင် အိမ်ထောင်ပြု​ဖို့ စဉ်းစား​နေ​သူတွေပါ သင်ခန်းစာယူ​သင့်တယ်။ ယောသပ်ဟာ မိခင်​တာဝန်တွေကို ကျေပွန်​စွာ လုပ်ဆောင်​နေတဲ့ ဇနီးသည်ကို ရထားတဲ့​အတွက် ကောင်းကင်တမန်ရဲ့ လမ်းညွှန်မှုကို သိပ်​ကျေးဇူးတင်​ခဲ့​မှာ​ပဲ။ ဒါကြောင့် အရေးကြီးတဲ့ ဆုံးဖြတ်ချက်တွေ ချ​ရတဲ့အခါ ယေဟောဝါ​ဘုရားကို မှီခို​အားထား​ဖို့ အရေးကြီးကြောင်း ယောသပ်​သိလာတယ်။ (ဆာ. ၃၇:၅။ ပညာ. ၁၈:၁၃) နောက်ပိုင်းမှာ ယောသပ်ဟာ အိမ်ထောင်ဦးစီး​အနေနဲ့ ဂရုတစိုက်​ချင့်ချိန်​ပြီး ဆုံးဖြတ်ချက်တွေ ချ​သွားမှာ သေချာတယ်။

^၂၁ ယော​သပ်​ကို လက်​ထပ်​ဖို့ လို​လို​လား​လား​ရှိ​တဲ့ မာ​ရိ​ဆီ​က​နေ​ကော ဘာ​သင်​ယူ​နိုင်​သလဲ။ မာ​ရိ ပြော​ပြတာ​ကို အစ​ပိုင်း​မှာ ယော​သပ် လက်မခံ​ခဲ့​ဘူး။ ဒါ​ပေမဲ့ မာ​ရိ​ဟာ အိမ်ထောင်​ဦး​စီး ​ဖြစ်​လာ​မ​ယ့်​သူရဲ့ ဆုံး​ဖြတ်​ချက်​ကို စိတ်​ရှည်​ရှည် စောင့်​ခဲ့​တ​ယ်။ ဒါဟာ မာရိ​နဲ့ ဒီနေ့​ခေတ် ခရစ်ယာန်​အမျိုးသမီးတွေ​အတွက် တကယ်​ကောင်းတဲ့ သင်ခန်းစာ​တစ်ခုပါပဲ။ ရိုး​ရိုး​သား​သား ပွင့်​ပွင့်​လင်း​လင်း ပြော​ဆို​ဆ​က်​သွယ်​တာ​ဟာ ဘယ်​လောက်​အရေးကြီး​မှန်း ဒီ​အဖြစ်​အပျက်​တွေ​က​နေ မာ​ရိ​နဲ့​ယော​သပ်​တို့ သိ​ခဲ့​ပုံ​ရ​တ​ယ်။—ပညာအလိမ္မာ ၁၅:၂၂ ကိုဖတ်ပါ။

၂၂။ ယောသပ်နဲ့ မာရိ​တို့ဟာ သူတို့​အိမ်ထောင်​ကို ဘယ်​အုတ်မြစ်​ပေါ် တည်ဆောက်ခဲ့​သလဲ။ ရှေ့မှာ သူတို့ ဘာတွေ ကြုံ​ရဖို့ ရှိသေး​သလဲ။

^၂၂ အဲဒီ​မောင်နှံစုံဟာ သူတို့ရဲ့ အိမ်ထောင်ရေး​ကို အကောင်းဆုံး အုတ်မြစ်​ပေါ်မှာ တည်​ဆောက်ခဲ့တယ်။ သူတို့​နှစ်ယောက်စလုံးဟာ အရာရာ​ထက် ယေဟောဝါ​ဘုရားကို ပို​ချစ်မြတ်နိုးပြီး တာဝန်​ကျေပွန်​တဲ့ မိဘတွေ​အနေနဲ့ ဘုရားသခင့်​မျက်နှာသာ ရ​ချင်​သူတွေ ဖြစ်ကြတယ်။ ဒါပေမဲ့ ရှေ့မှာ ကောင်းချီးတွေ​ရော၊ ပို​ခက်ခဲတဲ့ အခြေအနေတွေပါ ကြုံ​ကြ​ရဦးမယ်။ အသက်ရှင်ခဲ့သမျှ လူတွေ​ထဲမှာ အကြီးမြတ်ဆုံး လူသား​ဖြစ်​လာမယ့် ယေရှုကို သူတို့ ပြုစု​စောင့်ရှောက် ရတော့မယ်။