တစ်ယောက်ယောက်က​ ကလေးတို့ကို သိပ်​ကောင်းတဲ့ လက်ဆောင်​တစ်ခု ပေးတယ် ဆိုပါတော့။ ဘယ်လို​ခံစား​ရမလဲ။— ကျေးဇူးတင်ပါတယ်လို့ ပြောပြီး လက်ဆောင်​ပေးတဲ့ လူကို မေ့​ပစ်လိုက်​မလား။ ဒါမှမဟုတ် သတိရ​နေ​မလား။—

ယေဟောဝါ​ဘုရားဟာ တို့တစ်တွေကို ထူးမြတ်​တဲ့​လက်ဆောင် ပေးခဲ့တယ်။ တို့အတွက် အသေခံဖို့ သားတော်ကို ကမ္ဘာပေါ် စေလွှတ်ခဲ့တယ်။ တို့အတွက် ယေရှု ဘာကြောင့် အသေခံ​ရသလဲ သိသလား။— ဒီ​အကြောင်းကို ကောင်းကောင်း နားလည်ဖို့ သိပ်​အရေးကြီးတယ်။

အခန်း ၂၃ မှာ သိခဲ့ရတဲ့​အတိုင်း ဘုရားသခင်ရဲ့ စုံလင်တဲ့​ပညတ်ကို အာဒံ ချိုးဖောက်​တဲ့အခါ အပြစ် ရှိသွား​တယ်။ တို့တစ်တွေဟာ ဖခင် အာဒံ​ဆီကနေ အပြစ်​တရားကို အမွေ​ရခဲ့ကြတယ်။ ဒီတော့ တို့တစ်တွေ ဘာ​လို​နေတယ်လို့ ထင်သလဲ။— ကမ္ဘာပေါ် စုံလင်တဲ့​အသက်နဲ့ အသက်ရှင်​တဲ့ ဖခင်​အသစ်​တစ်ယောက် လိုတယ်လို့ ပြော​ရမှာပဲ။ အဲဒီလို ဖခင်​မျိုး ဘယ်သူ ဖြစ်နိုင်တယ်လို့ ထင်သလဲ။— ယေရှု​ပဲ​ပေါ့။

ယေဟောဝါဟာ အာဒံ​အစား ဖခင်​နေရာ ဝင်​ယူ​ပေးမယ့် ယေရှုကို ကမ္ဘာပေါ် စေလွှတ်ခဲ့တယ်။ ကျမ်းစာက ‘“ပထမ​လူ အာဒံဟာ အသက်ရှင်​သူ ဖြစ်လာတယ်။” နောက်ဆုံး အာဒံဟာ အသက်ရှင်​စေတဲ့ ဝိညာဉ်​ပုဂ္ဂိုလ် ဖြစ်လာတယ်’ လို့ ဆိုထားတယ်။ ပထမ အာဒံ​က ဘယ်သူ​လဲ။— ဟုတ်တယ်၊ မြေမှုန့်​ကနေ ဘုရားသခင် ဖန်ဆင်းတဲ့​သူ ဖြစ်တယ်။ ဒုတိယ အာဒံ​ကော ဘယ်သူ​လဲ။— ယေရှု​ပဲ​ပေါ့။ ကျမ်းစာက “ပထမ​လူ [အာဒံ] ဟာ မြေကြီး​ထဲ​က လာပြီး မြေမှုန့်​နဲ့ ဖန်ဆင်းခံရ​တာ။ ဒုတိယ​လူ [ယေရှု] ကတော့ ကောင်းကင်​ကနေ လာတာ” လို့ ဆိုထားတယ်။—၁ ကောရိန္သု ၁၅:၄၅၊ ၄၇။ ကမ္ဘာဦး ၂:၇။

ဘုရားသခင်က ယေရှုရဲ့ အသက်ကို ကောင်းကင်​ကနေ မာရိ​လို့​ခေါ်တဲ့ အမျိုးသမီးရဲ့ ဝမ်း​ထဲ ပြောင်းရွှေ့​ပေးလိုက်တဲ့​အတွက် ယေရှုဟာ အာဒံ​ဆီက ဘာ​အပြစ်​မှ အမွေ​မရခဲ့​ဘူး။ အဲဒါကြောင့်  စုံလင်တဲ့​လူတစ်ယောက် ဖြစ်တာ​ပေါ့။ (လုကာ ၁:၃၀-၃၅) ဒါကြောင့်လည်း ယေရှု မွေးဖွား​တဲ့အခါ ကောင်းကင်တမန်​တစ်ပါး​က ‘ဒီနေ့ ခင်ဗျားတို့ကို ကယ်တင်မယ့်သူ မွေးဖွားပြီ’ လို့ သိုးထိန်းတွေကို ပြောခဲ့တာ​ပေါ့။ (လုကာ ၂:၁၁) ဒါပေမဲ့ တို့တစ်တွေရဲ့ ကယ်တင်ရှင်​ဖြစ်ဖို့ ကလေးလေး ယေရှုဟာ ပထမဆုံး ဘာဖြစ်​ဖို့ လိုသလဲ။— အာဒံ​လို လူကြီး​တစ်ယောက်​အဖြစ် ကြီးပြင်း​လာဖို့ လိုတယ်။ ဒါမှလည်း ယေရှုဟာ ‘ဒုတိယ​အာဒံ’ ဖြစ်နိုင်​မှာ​ပေါ့။

ကယ်တင်ရှင် ယေရှုဟာ တို့တစ်တွေရဲ့ “ထာဝရ​ဖခင်” လည်း ဖြစ်လာမယ်။ ကျမ်းစာမှာ သူ့ကို ဒီလိုပဲ ခေါ်ထားတယ်။ (ဟေရှာယ ၉:၆၊ ၇) ဟုတ်​ပါတယ်၊ စုံလင်တဲ့ ယေရှုဟာ အပြစ်​လုပ်လို့ မစုံမလင်​ဖြစ်သွားတဲ့ အာဒံ​အစား တို့တစ်တွေရဲ့​ဖခင် ဖြစ်လာနိုင်တယ်။ ဒီ​နည်းနဲ့ တို့တစ်တွေဟာ ‘ဒုတိယ​အာဒံ’ ကို ဖခင်​အဖြစ် ရွေးချယ်​နိုင်တယ်။ တကယ်တော့ ယေရှု​ကိုယ်တိုင် ယေဟောဝါရဲ့ သားတော်​တစ်ပါး ဖြစ်တယ်။

ယေရှု​အကြောင်း ကောင်းကောင်း သိကျွမ်း​အောင် သင်ယူမယ်​ဆိုရင် ကယ်တင်ရှင်​အဖြစ် လက်ခံ​လာနိုင်တယ်။ ဘယ်​ကနေ ကယ်တင်ဖို့ လိုတယ်​ဆိုတာ မှတ်မိ​သေးသလား။— ဟုတ်တယ်၊ အာဒံ​ဆီက အမွေ​ရခဲ့တဲ့ အပြစ်နဲ့ သေခြင်းကနေ​ပဲ​ပေါ့။ လူကြီး​တစ်ယောက်​အဖြစ် ယေရှု ပူဇော်​ဆက်သ​လိုက်တဲ့ စုံလင်တဲ့​အသက်ကို ရွေးဖိုး လို့​ခေါ်တယ်။ တို့တစ်တွေ အပြစ်သား​ဘဝကနေ လွတ်မြောက်​စေဖို့ ယေဟောဝါ​က အခုလို ရွေးဖိုး ပေးခဲ့တာ​ဖြစ်တယ်။—မဿဲ ၂၀:၂၈။ ရောမ ၅:၈။ ၆:၂၃။

တို့တစ်တွေ​အတွက် ဘုရားသခင်နဲ့ သားတော် လုပ်​ပေးခဲ့​တာတွေကို အမြဲ သတိရ​နေချင်​တယ် မဟုတ်​လား။— ယေရှု​က သူ​လုပ်ခဲ့တာတွေကို သတိ​ရ​စေနိုင်တဲ့ အကောင်းဆုံးနည်း​တစ်နည်း တပည့်​တွေကို ပြခဲ့တယ်။ အဲဒီ​အကြောင်းကို ကြည့်ကြရအောင်။

 ဂျေရုဆလင်​မြို့က အိမ်​တစ်အိမ်​ရဲ့ အပေါ်ထပ် အခန်း​ထဲမှာ ကလေးတို့ ရောက်​နေတယ်လို့ စိတ်ကူး​ကြည့်ပါ။ ည​အချိန်မှာ​ပေါ့။ ယေရှုနဲ့ တမန်တော်တွေ စားပွဲ​တစ်ခု​နား​မှာ ထိုင်​နေကြ​တယ်။ စားပွဲပေါ်မှာ​တော့ သိုးသား​ကင်​ရယ်၊ မုန့်ပြား​တချို့​ရယ်၊ စပျစ်ဝိုင်​အ​နီ​ရယ် တင်ထားတယ်။ သူတို့တွေ အထူး ညစာ​စားပွဲ ကျင်းပ​နေကြတာ။ ဘာကြောင့်လဲ သိသလား။—

အဲဒီ​စားသောက်ပွဲ​က ဟိုး​အရင် ရာစု​နှစ်ပေါင်းများစွာ​က အီဂျစ်​ပြည်မှာ ကျွန်ဘဝ​ရောက်နေတဲ့ အစ္စရေး​လူမျိုး​အတွက် ယေဟောဝါ လုပ်​ပေးခဲ့​တာတွေကို သတိ​ရစေတယ်။ အဲဒီအချိန်မှာ ယေဟောဝါ​က ‘တစ်အိမ်​ထောင်​ကို သိုး​တစ်ကောင် သတ်​ရမယ်။ သွေး​ကို ယူပြီး အိမ်​ရဲ့ တံခါး​တိုင်တွေ​မှာ  သုတ်ရမယ်’ ဆိုပြီး မိန့်မှာတယ်။ အဲဒီနောက် ‘အိမ်ထဲ ဝင်ပြီး သိုးသားကို စား​ရမယ်’ လို့​ပြောတယ်။

အစ္စရေး​တွေ အဲဒီအတိုင်း လုပ်ခဲ့ကြတယ်။ အဲဒီ​ညမှာ​ပဲ ဘုရားသခင်ရဲ့ ကောင်းကင်တမန်​က အီဂျစ်​ပြည်​ကို ဖြတ်သွား​တယ်။ အိမ်တိုင်း​လို​လို​က သားဦး​တွေကို ကွပ်မျက်​လိုက်တယ်။ ဒါပေမဲ့ တံခါး​တိုင်တွေ​မှာ သွေး​ကို​မြင်ရင် အဲဒီ​အိမ်ကို ကျော်သွား​တယ်။ အဲဒီ​အိမ်တွေမှာ​တော့ ဘယ်က​လေး​မှ မသေ​ဘူး။ ယေဟောဝါရဲ့ ကောင်းကင်တမန် လုပ်ရပ်​ကြောင့် အီဂျစ် ဖာရောဘုရင် သိပ်​ကြောက်​သွားတယ်။ ဒါကြောင့် ‘မင်းတို့ကို လွှတ်​လိုက်ပြီ။ အီဂျစ်​ပြည်​ကနေ ထွက်သွား​ကြ’ လို့ အစ္စရေးတွေကို ပြောတယ်။ ဒီလိုနဲ့ အစ္စရေး​တွေဟာ ကုလားအုတ်​တွေ၊ မြည်း​တွေ​ပေါ် ပစ္စည်းပစ္စယ​တွေ တင်ပြီး ထွက်​ခဲ့​ကြတယ်။

သူတို့ ဘယ်လို လွတ်မြောက်​ခဲ့​တယ်​ဆိုတာကို ယေဟောဝါ​က သူ့​လူမျိုးကို မမေ့​စေချင်ဘူး။ ဒါကြောင့် ‘ဒီ​ည​လို စားသောက်ပွဲ​မျိုးကို တစ်နှစ်​တစ်ခါ စားသောက်​ကြရမယ်’ ဆိုပြီး မိန့်မှာတယ်။ ဒီ​အထူး စားသောက်​ပွဲကို ပသခါပွဲ​လို့ ခေါ်​ကြတယ်။ အဲဒီ​ညမှာ ဘုရားရဲ့ ကောင်းကင်တမန်ဟာ သွေး​သုတ်​ထားတဲ့ အိမ်တွေကို ‘ကျော်သွား’ လို့​ပဲ။—ထွက်မြောက်ရာ ၁၂:၁-၁၃၊ ၂၄-၂၇၊ ၃၁။

ယေရှုနဲ့ တမန်တော်တွေဟာ ပသခါပွဲ စား​နေရင်း အဲဒီ​အကြောင်းကို စဉ်းစား​ကြတယ်။ အဲဒီ​နောက် အင်မတန် အရေးကြီးတဲ့​အရာတစ်ခု ယေရှု ဆက်​လုပ်တယ်။ မ​လုပ်​ခင် သစ္စာဖောက် တမန်တော် ယုဒ​ကို ထွက်သွား​ခိုင်း​လိုက်တယ်။ ပြီးတော့​မှ ယေရှု​က မုန့်​တစ်ချပ်​ကို ယူပြီး ဆုတောင်းတယ်၊ မုန့်ကို ဖဲ့ပြီးနောက် “ယူ​စား​ကြပါ” ဆိုပြီး တပည့်​တွေကို ကမ်းပေး​တယ်။ ပြီးတော့ ‘ဒီ​မုန့်ဟာ ခင်ဗျားတို့​အတွက် စွန့်လွှတ်​တဲ့ ကျွန်တော့်​ကိုယ်ခန္ဓာ​ကို ကိုယ်စား​ပြုတယ်’ လို့​ပြောတယ်။

အဲဒီနောက် ယေရှု​က ဝိုင်​အ​နီ​တစ်ခွက်​ကို ယူပြီး နောက်​တစ်ကြိမ် ကျေးဇူးတင် ချီးမွမ်းတယ်။ ပြီးတော့ တပည့်​တွေကို ကမ်းပေး​ရင်း “သောက်​ကြပါ” လို့​ပြောတယ်။ ‘ဒီ​ဝိုင်​ဟာ ကျွန်တော့်ရဲ့​သွေး​ကို ကိုယ်စား​ပြုတယ်။ အပြစ်တွေ ခွင့်လွှတ်​ခံရဖို့ မကြာခင် သွန်းလောင်း​မယ့် သွေး​ပဲ။ ကျွန်တော့်ကို အောက်မေ့​တဲ့​အနေနဲ့ ဒီလို အမြဲ​လုပ်ပါ’ လို့​မှာတယ်။—မဿဲ ၂၆:၂၆-၂၈။ ၁ ကောရိန္သု ၁၁:၂၃-၂၆။

 သူ့ကို အောက်မေ့​တဲ့​အနေနဲ့ ဒီလို အမြဲ​ဆက်လုပ်ပါ​လို့ ယေရှု​ပြောခဲ့တာကို ကလေးတို့ သတိထား​မိသလား။— အဲဒီ​အချိန်​က​စပြီး တပည့်တွေဟာ ပသခါ​ပွဲကို ကျင်းပ​စ​ရာ မလို​တော့​ဘူး။ အဲဒီအစား ယေရှုနဲ့ ယေရှုရဲ့​သေခြင်းကို အောက်မေ့​ဖို့ အခုလို အထူး​ညစာ​စားပွဲကို တစ်နှစ်​ တစ်ခါ ကျင်းပ​ရမယ်။ အဲဒီ​စားသောက်​ပွဲကို သခင့်​ညစာ​စားပွဲ လို့​ခေါ်တယ်။ ခုခေတ်​မှာ​တော့ သတိရအောက်မေ့ပွဲ​လို့ ခေါ်လေ့​ရှိကြတယ်။ ဘာကြောင့်လဲ။— တို့တစ်တွေ​အတွက် ယေရှုနဲ့ ဖခင်​ ယေဟောဝါ လုပ်​ပေးခဲ့​တာတွေကို ပြန်​ပြီး သတိရ​စေ​လို့​ပါပဲ။

မုန့်​က ယေရှုရဲ့ ကိုယ်ခန္ဓာ​ကို သတိ​ရစေတယ်။ တို့တစ်တွေ ထာဝရ​အသက်​ရဖို့ သူ့​ကိုယ်ခန္ဓာ​ကို စိတ်လိုကိုယ်လျောက် စွန့်လွှတ်ခဲ့​တယ်။ စပျစ်ဝိုင်​အ​နီ​ကျတော့​ကော။— ယေရှုရဲ့​သွေး ဘယ်လောက် အဖိုးတန်​မှန်း သတိ​ရစေတယ်။ အီဂျစ်​ပြည်​က ပသခါ သိုးသငယ်ရဲ့ သွေး​ထက် ပိုပြီး အဖိုးတန်တယ်။ ဘာကြောင့်လဲ သိသလား။— ယေရှုရဲ့​သွေးကြောင့် တို့တစ်တွေရဲ့ အပြစ်တွေ ခွင့်လွှတ်​ခံရနိုင်​တယ်လို့ ကျမ်းစာက​ဆိုတယ်။ အပြစ်​အားလုံး ဖယ်ရှားခံရ​ပြီဆို​ရင် တို့တစ်တွေ အိုစရာ၊ နာ​စ​ရာ၊ သေ​စ​ရာ​အကြောင်း မရှိတော့ဘူး။ သတိရအောက်မေ့ပွဲကို တက်တဲ့အခါ ဒါတွေကို စဉ်းစားသင့်တယ်။

သတိရအောက်မေ့ပွဲ​မှာ မုန့်​နဲ့ စပျစ်​ဝိုင်ကို လူတိုင်း စားသောက်သင့်သလား။— စားသောက်​တဲ့​သူတွေဟာ ‘နိုင်ငံတော်မှာ ပါဝင်ခွင့်​ရမယ်။ ကောင်းကင်မှာ ကျွန်တော်​နဲ့​အတူ ပလ္လင်​ပေါ် ထိုင်​ရလိမ့်မယ်’ ဆိုပြီး ပြောခဲ့တယ်။ (လုကာ ၂၂:၁၉၊ ၂၀၊ ၃၀) ဆိုလိုတာ​က အဲဒီ​လူတွေဟာ ကောင်းကင်ကို သွားပြီး ယေရှုနဲ့အတူ ဘုရင်တွေ​အဖြစ် အုပ်စိုးကြ​မှာ။ ဒါကြောင့် ကောင်းကင်မှာ ယေရှုနဲ့အတူ အုပ်စိုး​ဖို့ မျှော်လင့်ချက် ရှိသူတွေသာ မုန့်​နဲ့ စပျစ်​ဝိုင်ကို သုံးဆောင်သင့်တယ်။

ဒါပေမဲ့ မုန့်​နဲ့ စပျစ်​ဝိုင်ကို မသုံးဆောင်​တဲ့​သူတွေလည်း သတိရအောက်မေ့ပွဲကို တက်သင့်တယ်။ ဘာကြောင့်လဲ သိသလား။— ယေရှု​က တို့တစ်တွေ​အတွက်ပါ အသက်စွန့်​ခဲ့လို့​ပါပဲ။ သတိရအောက်မေ့ပွဲကို တက်တာ​က အဲဒီ​ကျေးဇူး​ကို တို့တစ်တွေ မမေ့ဘူး​ဆိုတာ ပြရာ​ရောက်တာပေါ့။ ဘုရား​ပေးတဲ့ ထူးမြတ်​တဲ့​လက်ဆောင်​ကို တို့တစ်တွေ အမြဲ​ပဲ သတိရ​နေမယ်။