Ersaq Qrib Lejn Alla

Kont xi darba taqdi lil Ġeħova? Ħsibt dwar li terġaʼ taqdih imma ma kontx ċert jekk kienx se jilqgħek lura? Jekk jogħġbok aqra b’attenzjoni dan l-​artiklu u taʼ warajh. Inkitbu speċjalment għalik.

“TLABT lil Ġeħova biex jekk jogħġbu jħallini niġi lura d-​dar u jaħfirli talli weġġajtu.” Hekk qalet mara li kienet tbiegħdet mit-​trobbija Kristjana tagħha. Tħoss qalbek tingħafas għaliha? Ġieli tistaqsi: ‘Alla kif iħossu dwar dawk li darba kienu jaqduh? Jiftakar fihom? Iridhom “jiġu lura d-​dar”?’ Biex inwieġbu dawn il-​mistoqsijiet, ejja neżaminaw xi versi li Ġeremija niżżel bil-​miktub. It-​tweġibiet bla dubju se jmissulek qalbek.—Aqra Ġeremija 31:18-​20.

Ikkunsidra kif kienet is-​sitwazzjoni meta Ġeremija kiteb dan. Fis-​sena 740 Q.E.K., għaxriet taʼ snin qabel żmien Ġeremija, Ġeħova ppermetta li s-​saltna taʼ Iżrael b’għaxar tribujiet tittieħed fil-​jasar mill-​Assirjani. a Alla ħalla dan il-​gwaj iseħħ bħala dixxiplina għax niesu kienu bdew jagħmlu dnubiet serji, u kienu injoraw it-​twissijiet ripetuti tal-​profeti tiegħu. (2 Slaten 17:5-​18) Biddlu n-​nies l-​attitudni tagħhom minħabba t-​tbatijiet li ġarrbu fl-​eżilju, meta kienu mifrudin minn Alla tagħhom u ’l bogħod minn art twelidhom? Nesiehom Ġeħova? Kien xi darba se jerġaʼ jilqagħhom lura d-​dar?

“Iddispjaċieni”

Meta kienu fil-​jasar, in-​nies ġew f’sensihom u tqanqlu biex jindmu. Ġeħova nnota l-​indiema sinċiera tagħhom. Ismaʼ hekk kif Ġeħova jiddeskrivi l-​attitudni u s-​sentimenti tal-​Iżraelin eżiljati, li jirreferi għalihom kollettivament bħala Efrajm.

Ġeħova jgħid: “Jien bla dubju smajt lil Efrajm jitħassar lilu nnifsu.” (Vers 18) Hu semaʼ l-​Iżraelin hekk kif urew li ddispjaċiehom mill-​effetti tal-​ħajja midinba tagħhom. Il-​frażi “jitħassar lilu nnifsu” tistaʼ tfisser “moviment taʼ xengil jew theżżiż,” tgħid waħda studjuża. Kien bħal iben midneb li qed ixengel rasu għax iħoss diqa kbira hekk kif jirrifletti fuq it-​tbatijiet li ġab fuqu nnifsu. Hu jixxennaq għall-​ħajja li kellu meta kien id-​dar. (Luqa 15:11-​17) X’kienu qed jgħidu n-​nies?

“Int ikkoreġejtni . . . bħal għoġol li ma ġiex imħarreġ.” (Vers 18) In-​nies għarfu li kien ħaqqhom id-​dixxiplina. Wara kollox, kienu aġixxew bħal għoġol li ma ġiex imħarreġ. Dan ix-​xebh għandu mnejn ifisser li kienu bħal għoġol li qatt ma kien “iħoss in-​niggieża kieku ma kienx l-​ewwel irribella kontra l-​madmad,” jgħid xogħol taʼ referenza.

“Reġġagħni lura lejk, u jien indur lura mill-​ewwel, għax int Ġeħova Alla tiegħi.” (Vers 18) Bi qlub umli, in-​nies sejħu lil Alla. Kienu mitlufin f’ħajja midinba, imma issa talbu bil-​ħrara biex jerġgħu jkollhom l-​approvazzjoni tiegħu. Traduzzjoni waħda tgħid: “Int Alla tagħna —jekk jogħġbok ħallina niġu lura d-​dar.”—Contemporary English Version.

“Iddispjaċieni. . . . Stħajt, u ħassejtni umiljat.” (Vers 19) In-​nies ħassewhom dispjaċuti għax kienu dinbu. Aċċettaw li kien tort tagħhom u ammettew il-​ħtija. Ukoll, tant ħassew għajb u dwejjaq li kien bħallikieku qed jagħtu fuq sidirhom.—Luqa 15:18, 19, 21.

L-​Iżraelin kienu nedmin. Kienu mimlijin niket, stqarrew dnubiethom m’Alla, u daru mill-​għemejjel ħżiena tagħhom. Kienet l-​indiema tagħhom se tmisslu qalbu lil Alla? Kien se jħallihom imorru lura d-​dar?

“Żgur Tiġini Ħasra Minnu”

Ġeħova kellu rabta speċjali mal-​Iżraelin. Hu qal: “Jien sirt Missier għal Israel; u Efrajm huwa l-​ewwel imwieled tiegħi.” (Ġeremija 31:9) Kif jistaʼ missier li jħobb jirrifjuta li jilqaʼ lura lil ibnu li qalbu tkun mimlija ndiema ġenwina? Innota kif Ġeħova jesprimi s-​sentimenti tiegħu bħal taʼ Missier għal niesu.

“M’huwiex Efrajm iben prezzjuż għalija, tifel li nittrattah b’għożża? Għax daqskemm tkellimt kontrih daqshekk ieħor niftakar fih fit-​tajjeb.” (Vers 20) Kemm hu teneru dan il-​kliem! Bħal ġenitur sod imma kollu mħabba, Alla kien obbligat li jitkellem ‘kontra’ wliedu, billi darba wara l-​oħra wissiehom dwar il-​modi midinba tagħhom. Meta b’ras iebsa rrifjutaw li jagħtu widen, ħalliehom jittieħdu fl-​eżilju—bħallikieku ġegħelhom jitilqu mid-​dar. Imma avolja kellu jikkastigahom, hu ma nsihomx. Qatt ma setaʼ jagħmel hekk. Missier li jħobb ma jinsiex lil uliedu. Iżda Ġeħova kif ħassu meta ra ndiema vera f’uliedu?

“Il-​ġewwieni tiegħi tqanqal għalih. b Żgur tiġini ħasra minnu.” (Vers 20) Ġeħova ħass ħniena kbira għal uliedu. L-​indiema sinċiera tagħhom messitlu qalbu, u kellu xenqa qawwija biex ireġġagħhom lura lejh. Bħall-​missier fil-​parabbola taʼ Ġesù dwar l-​iben il-​ħali, Ġeħova ‘ġietu ħasra’ u kellu ħerqa biex jilqaʼ lil uliedu lura d-​dar.—Luqa 15:20.

“Ġeħova Ħallieni Niġi Lura d-​Dar!”

Il-​kliem f’​Ġeremija 31:18-​20 jgħallimna dwar il-​mogħdrija tenera u l-​ħniena taʼ Ġeħova. Alla ma jinsiex lil dawk li darba kienu jaqduh. Xi ngħidu jekk uħud bħal dawn iridu jerġgħu lura għandu? Alla hu ‘lest li jaħfer.’ (Salm 86:5) Qatt mhu se jkeċċi lil dawk li jersqu lejh bi qlub niedma. (Salm 51:17) Għall-​kuntrarju, hu ferħan li jilqagħhom lura d-​dar.—Luqa 15:22-​24.

Il-​mara msemmija fil-​bidu ħadet l-​inizjattiva biex terġaʼ lura għand Ġeħova u żaret kongregazzjoni lokali tax-​Xhieda taʼ Ġeħova. Għall-​ewwel, kellha tegħleb is-​sentimenti negattivi tagħha stess. Hi tiftakar: “Ma ħassejtnix denja.” Imma l-​anzjani tal-​kongregazzjoni inkuraġġewha u għenuha biex terġaʼ tissaħħaħ spiritwalment. B’qalb mimlija apprezzament, hi tgħid, “Hija ħaġa tal-​għaġeb li Ġeħova ħallieni niġi lura d-​dar!”

Jekk int darba kont taqdi lil Ġeħova u ħsibt dwar li terġaʼ taqdih, nistidnuk iżżur il-​kongregazzjonali lokali tax-​Xhieda taʼ Ġeħova. Ftakar li Ġeħova jwieġeb bil-​mogħdrija u bil-​ħniena meta wħud nedmin jgħidulu, “Jekk jogħġbok ħallina niġu lura d-​dar.”

[Noti ta’ taħt]