FIT-​2 taʼ Mejju, 2008, iċ-​Ċiklun Nargis laqat il-​Mjanmar b’qawwa qerrieda u malajr ġie rapportat fl-​aħbarijiet internazzjonali. a Kważi 140,000 persuna ġew rapportati mejtin jew neqsin wara li ċ-​ċiklun resaq lejn ix-​xatt u l-​ilma tal-​baħar telaʼ l-​art fir-​reġjun tad-​Delta Irrawaddy.

Hija ħaġa taʼ l-​iskantament li ħadd ma weġġaʼ mill-​ħafna Xhieda taʼ Ġeħova li joqogħdu fl-​inħawi. Fil-​maġġorparti, huma baqgħu ħajjin minħabba li waqt il-​maltempata stkennew fis-​Swali tas-​Saltna tagħhom li huma mibnijin sew. F’post wieħed, 20 Xhud u 80 ruħ oħra mill-​villaġġ poġġew fuq is-​saqaf tas-​Sala tas-​Saltna għal disaʼ sigħat hekk kif l-​ilma telaʼ iktar minn 4 metri u nofs. Ilkoll kemm huma salvaw. B’dispjaċir, 300 ruħ oħra f’dak il-​villaġġ ma jafux x’sar minnhom. F’ħafna villaġġi, is-​Sala tas-​Saltna kienet l-​uniku bini li ma ġġarrafx.

Jumejn wara ċ-​ċiklun, l-​uffiċċju tal-​fergħa tax-​Xhieda taʼ Ġeħova f’Yangon bagħat tim li joffri l-​għajnuna lill-​kongregazzjoni f’Bothingone, lejn id-​daħla tad-​delta. It-​tim wasal f’Bothingone bi kwantitajiet kbar taʼ ross, għaġin, ilma, u xemgħat wara li għadda minn inħawi li kellhom ħsarat kbar, ipprova jevita li jiġi misruq, u għadda minn ħdejn iġsma mejtin li kienu qed jitmermru. Huma kienu l-​ewwel tim li joffri l-​għajnuna li wasal fil-​post. Wara li ta l-​provvisti għall-​għajnuna lix-​Xhieda lokali, it-​tim ta taħditiet mill-​Bibbja biex jinkuraġġihom u ħallielhom Bibbji u letteratura bbażata fuq il-​Bibbja, ladarba dak kollu li kellhom inġarr miċ-​ċiklun.

 L-​attitudni tax-​Xhieda li ġew effettwati miċ-​ċiklun kienet tassew tispikka. Xhud wieħed, minn kongregazzjoni fir-​reġjun li ġie meqrud taʼ Irrawaddy, qal: “Ma baqgħalna xejn. Id-​djar kollha tagħna huma meqrudin. Ir-​rabaʼ tagħna m’għadux jeżisti. L-​ilma kollu li kien tajjeb għax-​xorb tħammeġ minħabba d-​dilluvju. Madankollu, l-​aħwa m’humiex inkwetati daqs l-​oħrajn. Huma jafdaw f’Ġeħova u fl-​organizzazzjoni tiegħu. Aħna se nsegwu kwalunkwe direzzjoni li nirċievu kemm jekk nibqgħu fil-​villaġġ u kemm jekk immorru xi mkien ieħor.”

Grupp taʼ 30 Xhud, li wkoll tilfu kollox, b’ferħ kantaw għanjiet tas-​Saltna fil-​vjaġġ tagħhom t’għaxar sigħat lejn il-​post fejn it-​timijiet li joffru l-​għajnuna kellhom ikel, ħwejjeġ, u kenn għalihom. Qabel laħqu d-​destinazzjoni tagħhom, huma semgħu li assemblea tas-​circuit tax-​Xhieda taʼ Ġeħova kienet qed tinżamm f’belt viċin. Huma ddeċidew li l-​ewwel jattendu l-​assemblea biex jirċievu ikel spiritwali u jgawdu sħubija Kristjana.

Fl-inħawi kollha li ntlaqtu miċ-​ċiklun, 35 dar tax-​Xhieda ġew meqrudin, 125 mid-​djar tagħhom ġarrbu xi ħsarat, u 8 Swali tas-​Saltna ġarrbu ħsarat żgħar. Fortunatament, il-​bini tal-​fergħa ma ġarrabx ħsara kbira.

Għall-ewwel, minħabba ċ-​ċiklun, ħadd ma setaʼ jilħaq l-​uffiċċju tal-​fergħa jew jitlaq minnu għax waqgħu siġar kbar u dawn imblokkaw it-​toroq taʼ l-​inħawi. Ftit sigħat biss wara li l-​maltempata taffiet, iktar minn 30 membru tal-​fergħa ngħaqdu flimkien biex ineħħu s-​siġar b’idejhom stess. Hekk kif kienu qed jaħdmu, in-​nies sempliċement baqgħu mgħaġġbin. Grupp taʼ Xhieda nisa ma damux wisq ma waslu b’xorb kiesaħ u frott frisk għall-​ħaddiema kif ukoll għall-​ġirien, li ma setgħux jemmnu dak li kienu qed jaraw. Meta wieħed ġurnalist osserva dak li kien qed jiġri, hu staqsa: “Min huma dawn in-​nies li qed jaħdmu daqshekk tajjeb?” Wara li wiġbuh, hu qal: “Nixtieq li iktar nies juru dan l-​ispirtu veru taʼ komunità bħalma juru x-​Xhieda taʼ Ġeħova!”

Ix-Xhieda malajr ħatru żewġ kumitati għall-​għajnuna fid-​diżastri f’postijiet differenti tal-​pajjiż biex iwasslu l-​provvisti lill-​aħwa kollha fl-​inħawi milqutin. Mijiet taʼ volontieri ħadmu mat-​timijiet li joffru l-​għajnuna. Fi ftit jiem, inbnew djar ġodda għax-​Xhieda li kienu tilfu djarhom. Meta wieħed mill-​gruppi li joffri l-​għajnuna wasal biex jibni dar ġdida għal waħda Xhud, il-​ġirien tagħha sempliċement baqgħu ċċassati għax ma setgħux jemmnu. Waħda mill-​ġirien qalet: “Il-​knisja taʼ din ix-​Xhud qed terġaʼ tibnilha darha. Ħadd mill-​ħbieb Buddisti tiegħi ma ġie jgħinni. Imissni sirt Xhud meta ġiet tippridkali!”

Meta ħaddiema tal-​kostruzzjoni u l-​kumitat għall-​għajnuna spezzjonaw dar f’Thanlyn, li kienet kważi meqruda għalkollox, laqathom profondament il-​kliem tal-​familja taʼ Xhieda li qaltilhom: “Ma ġara xejn. Id-​dar tagħna ma ġralha xejn gravi. Nistgħu ngħixu hawn—mhix problema! Xi Xhieda lanqas biss għandhom dar. Morru għinu lilhom l-​ewwel!”

F’naħa waħda taʼ Yangon, xi nies ipprovaw jistkennu f’waħda mill-​knejjes lokali. Madankollu, il-​bieb tal-​knisja ġie msakkar u ħadd ma setaʼ jidħol. In-​nies ħaduha bi kbira wisq u riedu jkissru l-​bieb tal-​knisja. B’kuntrast, ix-​Xhieda taʼ Ġeħova għenu lil ħafna nies jistkennu fis-​Swali tas-​Saltna matul iċ-​ċiklun. Per eżempju, koppja Xhieda daħħlu fis-​Sala tas-​Saltna f’Dala 20 ġar iddisprati li kienu ħarbu hemmhekk għas-​sigurtà. Fil-​għodu, dawn il-​familji ma kellhomx djar fejn jirritornaw u kienu bil-​ġuħ. Ix-​Xhud sab lil xi ħadd li kien qed ibigħ ir-​ross u xtara biżżejjed biex jitmaʼ lil kulħadd.

Xi membri minn familja waħda f’Yangon huma Xhieda taʼ Ġeħova, waqt li oħrajn jattendu knejjes differenti. Wara ċ-​ċiklun, il-​familja kollha marret il-​laqgħa fis-​Sala tas-​Saltna. Għala? Membru tal-​familja spjegat: “Dawk  tal-​knisja tagħna qalu li se jiġu jżurna wara l-​maltempata, imma qatt ma ġew. Ix-​Xhieda biss ġew. Intom tajtuna r-​ross u l-​ilma. Intom differenti mill-​knejjes l-​oħrajn!” Il-​membri tal-​familja li ma kinux Xhieda għoġobhom dak li semgħu waqt id-​diskussjoni t’artiklu mit-​Torri taʼ l-​Għassa bit-​titlu “Ġeħova Jismaʼ l-​Għajat Tagħna għall-​Għajnuna” u saħansitra kkummentaw matul il-​laqgħa.

Waħda mara li kienet qed tistudja l-​Bibbja max-​Xhieda marret il-​laqgħa tal-​kongregazzjoni fil-​ġimgħa taʼ wara li seħħ iċ-​ċiklun. Matul il-​laqgħa, inqrat ittra mill-​uffiċċju tal-​fergħa li spjegat x’sar biex tingħata l-​għajnuna wara ċ-​ċiklun kif ukoll inqraw minnha xi esperjenzi taʼ dawk li baqgħu ħajjin. Hekk kif l-​ittra kienet qed tinqara, il-​mara bdiet tibki. Hi kienet tassew impressjonata u ferħana meta semgħet li x-​Xhieda kollha nstabu u kienu fis-​sigurtà. Wara, ngħatat xi provvisti neċessarji u tpoġġitilha tinda ħdejn id-​dar tagħha. Hi qalet li ħasset li x-​Xhieda ħadu ħsiebha tassew tajjeb.

Ġesù qal: “B’dan ikun jaf kulħadd li intom dixxipli tiegħi, jekk ikollkom l-​imħabba bejnietkom.” (Ġwanni 13:35) U d-​dixxiplu Ġakbu enfasizza li l-​fidi vera trid tintwera b’għemejjel tajbin. (Ġakbu 2:14-17) Ix-​Xhieda taʼ Ġeħova jieħdu dan il-​kliem tassew bis-​serjetà u jistinkaw biex juru mħabba bħal din billi jgħinu u jappoġġaw lil dawk li jkunu fil-​bżonn.

[Nota taʼ taħt]

[Kumment f’paġna 27]

Il-​Bibbja tgħid li l-​fidi vera trid tintwera b’għemejjel tajbin