“Fommi stess se jitkellem dwar is-​sewwa tiegħek, il-​jum kollu nitkellem dwar is-​salvazzjoni tiegħek.”​—SALM 71:15.

INT KIF TWIEĠEB?

Noè, Mosè, Ġeremija, u Pawlu għala poġġew lil Ġeħova l-​ewwel f’ħajjithom?

X’se jgħinek tiddeċiedi x’tagħmel b’ħajtek?

Għaliex int determinat li tpoġġi s-​servizz taʼ Ġeħova l-​ewwel f’ħajtek?

1, 2. (a) Wieħed li jiddedika lilu nnifsu lil Ġeħova xi jkun qed juri? (b) Kif jistgħu jgħinuna l-​eżempji taʼ Noè, Mosè, Ġeremija, u Pawlu?

 META tiddedika lilek innifsek lil Alla u ssir segwaċi mgħammed taʼ Ġesù, int tkun qed tagħmel pass serju ħafna. Id-​dedikazzjoni tiegħek lil Alla hija l-​iktar deċiżjoni serja li int bħala individwu tistaʼ tieħu. Ikun bħallikieku qed tgħid: ‘Ġeħova, irridek tkun Sidi f’kull aspett taʼ ħajti. Jien il-​qaddej tiegħek. Irridek tgħidli kif għandi nuża l-​ħin tiegħi, x’għandhom ikunu l-​prijoritajiet tiegħi, u kif għandi nuża l-​abbiltajiet tiegħi u kulma għandi.’

² Jekk int Kristjan dedikat, dan hu bażikament dak li wegħedt lil Ġeħova. Taʼ min ifaħħrek għal din id-​deċiżjoni; għamilt ħaġa tajba u għaqlija. Iżda l-​fatt li aċċettajt lil Ġeħova bħala Sidek kif se jeffettwa l-​mod taʼ kif tuża l-​ħin tiegħek? L-​eżempji taʼ Noè, Mosè, Ġeremija, u l-​appostlu Pawlu jistgħu jgħinuna neżaminaw din il-​mistoqsija. Kull wieħed minnhom qeda lil Ġeħova b’qalb sħiħa. Is-​sitwazzjoni tagħna tixbah lil tagħhom. Id-​deċiżjonijiet li ħadu rigward il-​prijoritajiet tagħhom jistgħu jinkuraġġuna neżaminaw kif qed nużaw il-​ħin tagħna.​—Mt. 28:19, 20; 2 Tim. 3:1.

QABEL ID-​DILLUVJU

3. Żmienna kif inhu bħal żmien Noè?

³ Ġesù għamel xebh bejn żmien Noè u żmienna. Hu qal: “Bħalma kienu jiem Noè, hekk tkun il-​preżenza taʼ Bin il-​bniedem.” In-​nies “kienu jieklu u jixorbu, irġiel jiżżewġu u nisa jingħataw fiż-​żwieġ, sal-​jum li Noè daħal fl-​arka; u ma tawx kas sakemm ġie d-​dilluvju u kinishom ilkoll.” (Mt. 24:37-​39) Il-​biċċa l-​kbira tan-​nies illum jgħixu mingħajr ma jagħtu  kas l-​urġenza taʼ żminijietna. Ma jħabblux rashom mit-​twissijiet li qegħdin jagħtu l-​qaddejja t’Alla. Ħafna saħansitra jwaqqgħu għaċ-​ċajt l-​idea li Alla se jeqred in-​nies mill-​agħar—l-​istess bħalma għamlu n-​nies fi żmien Noè. (2 Pt. 3:3-​7) Madankollu, f’ambjent daqshekk ostili, Noè kif użah il-​ħin tiegħu?

4. Noè kif uża ħinu wara li ngħata l-​inkarigu tiegħu mingħand Ġeħova, u għala?

⁴ Wara li ġie informat b’dak li kien biħsiebu jagħmel Alla u wara li ngħata l-​inkarigu tiegħu mingħandu, Noè bena arka biex jiġu salvati n-​nies u l-​annimali. (Ġen. 6:13, 14, 22) Ukoll, Noè wissa dwar il-​ġudizzju li kien riesaq taʼ Ġeħova. L-​appostlu Pietru jsejjaħlu “predikatur tal-​ġustizzja.” B’hekk, hu wera li Noè stinka biex jgħin lin-​nies taʼ madwaru jifhmu s-​serjetà tas-​sitwazzjoni tagħhom. (Aqra t-​2 Pietru 2:5.) Taħseb li kien ikun raġunevoli għal Noè u familtu li jikkonċentraw l-​iżjed fuq li jibdew xi negozju, li jkunu l-​aħjar fost in-​nies taʼ żmienhom, jew li jkollhom ħajja komda? Dażgur li le! Minħabba li kienu jafu x’kien ġej, huma evitaw tfixkil bħal dan.

L-​GĦAŻLIET TAʼ PRINĊEP EĠIZZJAN

5, 6. (a) Għal xiex x’aktarx kellha tippreparah l-​edukazzjoni li ħa Mosè? (b) Mosè għala warrab il-​possibbiltajiet li ġew offruti lilu fl-​Eġittu?

⁵ Issa, ejja naraw l-​eżempju taʼ Mosè. Hu trabba f’palazz Eġizzjan bħala t-​tifel adottiv taʼ bint il-​Fargħun. Bħala prinċep żagħżugħ, kien edukat “fl-​għerf kollu taʼ l-​Eġizzjani.” (Atti 7:22; Eżo. 2:9, 10) Din l-​edukazzjoni x’aktarx kienet maħsuba biex tippreparah għal karriera fil-​palazz tal-​Fargħun. Mosè setaʼ sar prominenti fl-​iktar gvern setgħan taʼ dak iż-​żmien u setaʼ għex fil-​lussu u gawda l-​privileġġi u l-​pjaċiri li pożizzjoni bħal din setgħet toffrilu. Imma kienu dawn l-​affarijiet importanti għal Mosè?

⁶ Minħabba t-​taħriġ li ngħata mingħand il-​ġenituri veri tiegħu fit-​tfulija, Mosè x’aktarx li kien jaf dak li Ġeħova kien wiegħed lill-​antenati tiegħu Abraham, Iżakk, u Ġakobb. Mosè kellu l-​fidi f’dawn il-​wegħdi. Żgur li kien ħaseb fil-​fond dwar il-​futur tiegħu u l-​lealtà tiegħu lejn Ġeħova. Allura meta wasal iż-​żmien biex jagħżel bejn li jkun prinċep Eġizzjan jew inkella lsir Iżraeli, xi ddeċieda hu? Mosè “għażel li jkun trattat ħażin mal-​poplu t’Alla minflok ma jkollu t-​tgawdija temporanja tad-​dnub.” (Aqra Ebrej 11:24-​26.) Iktar tard, hu segwa l-​gwida taʼ Ġeħova dwar kif kellu juża ħajtu. (Eżo. 3:2, 6-​10) Mosè għala għamel dan? Għax emmen fil-​wegħdi t’Alla. Hu fehem li ma kienx hemm futur għalih fl-​Eġittu. Tabilħaqq, dan in-​nazzjon ma damx ma ġie kkastigat b’għaxar kastigi minn Alla. Taraha t-​tagħlima li hemm f’dan għal dawk dedikati lil Ġeħova llum? Minflok ma jkun ħsiebna f’xi karriera jew kwalunkwe tgawdija taʼ din is-​sistema, il-​prijoritajiet tagħna għandhom ikunu Ġeħova u s-​servizz tiegħu.

 ĠEREMIJA KIEN JAF X’KIEN SE JIĠRI

7. Is-​sitwazzjoni taʼ Ġeremija kif kienet bħal tagħna?

⁷ Xi ħadd ieħor li poġġa s-​servizz taʼ Ġeħova l-​ewwel kien il-​profeta Ġeremija. Ġeħova inkariga lil Ġeremija bħala l-​profeta tiegħu biex jipprietka messaġġ taʼ ġudizzju fuq Ġerusalemm u Ġuda, li kienu apostati. Biex ngħidu hekk, Ġeremija għex “fl-​aħħar parti tal-​jiem.” (Ġer. 23:19, 20) Kien jaf tajjeb li s-​sistema li kien jgħix fiha ma kinitx se tkompli sejra kif kienet.

8, 9. (a) Il-​ħsib taʼ Baruk għala kellu bżonn jiġi aġġustat? (b) X’għandu jkollna f’moħħna meta nippjanaw xi ħaġa?

⁸ X’ma għamilx Ġeremija minħabba dak li kien jemmen fih? Ma pprovax jibni futur f’dik is-​sistema kundannata. X’sens kien ikun hemm f’li jagħmel dan? Madankollu, għal xi żmien, is-​segretarju taʼ Ġeremija, Baruk, ma kienx qed jara l-​affarijiet ċar. Allura, Alla nebbaħ lil Ġeremija biex jgħid lis-​segretarju tiegħu: “Ara! Dak li bnejt se nġarrfu, u dak li ħawwilt se naqilgħu, iva, il-​pajjiż kollu. Imma int, int qed tfittex ħwejjeġ kbar għalik innifsek. Tibqax tfittixhom. Għax, ara, se nġib gwaj kbir fuq kull ħliqa tal-​laħam, . . . u lilek nagħtik ruħek bħala priża kulfejn tmur.”​—Ġer. 45:4, 5.

⁹ Ma nistgħux inkunu ċerti liema “ħwejjeġ kbar” kien qed ifittex Baruk għalih innifsu. a Iżda nafu li kienu affarijiet li ma kellhomx futur, affarijiet li kellhom jispiċċaw meta l-​Babiloniżi rebħu lil Ġerusalemm fis-​sena 607 Q.E.K. Tara li hemm xi tagħlima f’dan għalina? Sabiex niksbu l-​bżonnijiet tal-​ħajja jkun hemm bżonn li nagħmlu xi pjanijiet għall-​futur. (Prov. 6:6-​11) Imma kemm ikun għaqli li ninvestu ħafna ħin u enerġija biex niġru wara affarijiet li m’għandhomx valur dejjiemi? Ngħiduha kif inhi, l-​organizzazzjoni taʼ Ġeħova tkompli tippjana għal Swali tas-​Saltna, uffiċċji tal-​fergħa, u proġetti teokratiċi ġodda oħrajn. Madankollu, dawn il-​pjanijiet għandhom futur għaliex l-​iskop tagħhom hu li jappoġġaw is-​Saltna. Ikun xieraq jekk il-​poplu dedikat kollu taʼ Ġeħova jkollu l-​istess prijoritajiet meta jippjana. Tħossok int konvint li qed ‘tfittex l-​ewwel is-​saltna u s-​sewwa taʼ Ġeħova’?​—Mt. 6:33.

“INQISHOM BĦALA QABDA SKART”

10, 11. (a  X’kien importanti għal Pawlu qabel ma sar Kristjan? (b) Il-​prijoritajiet taʼ Pawlu għala nbidlu kompletament?

¹⁰ Fl-​aħħar, ejja nikkunsidraw l-​eżempju taʼ Pawlu. Qabel ma kkonverta għall-​Kristjanità, hu kellu dak li deher li hu futur promettenti. Kien studja l-​liġi Lhudija maʼ wieħed mill-​iktar għalliema magħrufin taʼ żmienu. Kien irċieva l-​awtorità mill-​qassis il-​kbir Lhudi. U kien qed jagħmel iżjed progress fil-​Ġudaiżmu milli kienu qed jagħmlu ħafna nies tal-​età tiegħu. (Atti 9:1, 2; 22:3; 26:10; Gal. 1:13, 14) Madankollu, dan kollu nbidel meta Pawlu rrealizza li Ġeħova ma kienx għadu qed ibierek lil-​Lhud bħala nazzjon.

¹¹ Pawlu fehem li karriera fis-​sistema Lhudija ma kellhiex valur mill-​ħarsa taʼ Ġeħova; ma kellhiex futur. (Mt. 24:2) Dan li darba kien Fariżew wasal sal-​punt li jgħid li dak li darba qiesu importanti issa jikkunsidrah bħala “qabda skart” meta mqabbel mal-​fehma iktar eżatta u ġdida tal-​iskopijiet t’Alla u l-​privileġġ tal-​ministeru Kristjan. Pawlu telaq ir-​reliġjon Lhudija u ddedika l-​bqija taʼ ħajtu fuq l-​art għall-​ippritkar tal-​aħbar tajba.​—Aqra Filippin 3:4-​8, 15; Atti 9:15.

 EŻAMINA L-​PRIJORITAJIET TIEGĦEK

12. X’kienet il-​prijorità taʼ Ġesù wara li ġie mgħammed?

¹² Noè, Mosè, Ġeremija, Pawlu, u ħafna oħrajn bħalhom użaw il-​biċċa l-​kbira tal-​ħin u l-​enerġija tagħhom fis-​servizz taʼ Ġeħova. Huma eżempji tajbin għalina. M’għandniex xi ngħidu, l-​aqwa eżempju mill-​qaddejja dedikati kollha taʼ Ġeħova huwa Ġesù. (1 Pt. 2:21) Wara li ġie mgħammed, Ġesù ddedika l-​bqija taʼ ħajtu fuq l-​art għall-​ippritkar tal-​aħbar tajba u biex jonora lil Ġeħova. Allura, li naqdu lil Ġeħova għandu jkun prijorità għal kull Kristjan li jsegwi l-​eżempju taʼ Ġesù u jaċċetta lil Ġeħova bħala s-​Sid tiegħu. Xi ngħidu għalik? Kif nistgħu nagħmlu iktar għal Ġeħova u fl-​istess ħin nieħdu ħsieb responsabbiltajiet oħrajn?​—Aqra Salm 71:15; 145:2.

13, 14. (a) Il-​Kristjani dedikati kollha x’inhuma inkuraġġiti li jikkunsidraw? (b) Liema sodisfazzjon jistaʼ jgawdi l-​poplu t’Alla?

¹³ Matul is-​snin, l-​organizzazzjoni taʼ Ġeħova inkuraġġiet b’mod ripetut lill-​Kristjani biex jikkunsidraw bit-​talb jekk jistgħux jaqdu bħala pijunieri. Għal raġunijiet differenti, iċ-​ċirkustanzi taʼ wħud mill-​qaddejja leali taʼ Ġeħova ma jippermettulhomx jiddedikaw medja taʼ 70 siegħa kull xahar għax-​xogħol tal-​ippritkar. M’għandhomx iħossuhom imnikktin dwar dan. (1 Tim. 5:8) Imma xi ngħidu għalik? Tassew li ma tistax tagħmel ix-​xogħol taʼ pijunier?

¹⁴ Aħseb ftit dwar il-​ferħ li ħafna mill-​poplu t’Alla esperjenza matul iż-​żmien tat-​Tifkira din is-​sena. Matul Marzu, provvediment speċjali ppermetta lill-​pijunieri awżiljarji biex jagħżlu jekk għandhomx jiddedikaw 30 jew 50 siegħa għas-​servizz tal-​għalqa. (Salm 110:3) Miljuni t’aħwa taw sehemhom fis-​servizz taʼ pijunier awżiljarju, u l-​kongregazzjonijiet kienu mimlijin eċċitament u ferħ. Tistaʼ int tirranġa l-​affarijiet tiegħek biex tesperjenza ferħ bħal dan iżjed spiss? Fit-​tmiem taʼ kull ġurnata, se jkun taʼ sodisfazzjon kbir għal Kristjan dedikat li jkun jistaʼ jgħid, “Ġeħova, għamilt kulma stajt fis-​servizz tiegħek.”

15. X’għandha tkun il-​mira taʼ Kristjan żagħżugħ waqt li għadu l-​iskola?

¹⁵ Jekk int wieħed li dalwaqt tispiċċa l-​iskola, probabbilment qed tgawdi saħħa tajba u ftit għandek responsabbiltajiet. Ikkunsidrajt int bis-​serjetà li taqdi bħala pijunier regulari? M’hemmx dubju li dawk li jagħtu l-​pariri fl-​iskola sinċerament jemmnu li jkun għall-​ġid tiegħek jekk tistinka għal edukazzjoni ogħla u tippjana għal karriera sekulari. Madankollu, il-​fiduċja tagħhom qiegħda f’sistema soċjali u finanzjarja li m’għandhiex futur dejjiemi. Min-​naħa l-​oħra, jekk tistinka għal karriera teokratika tkun qed tistinka għal mira dejjiema u taʼ min jaħdem għaliha. Ukoll, tkun qed issegwi l-​eżempju perfett taʼ Ġesù. Deċiżjoni għaqlija bħal din se tagħmlek ferħan. Se tipproteġik. U se turi li int determinat li tgħix skont id-​dedikazzjoni tiegħek lil Ġeħova.​—Mt. 6:19-​21; 1 Tim. 6:9-​12.

16, 17. Liema mistoqsijiet iqumu dwar ix-​xogħol sekulari u s-​servizz taʼ Ġeħova?

¹⁶ Ħafna mill-​qaddejja t’Alla llum jaħdmu sigħat twal biex jieħdu ħsieb il-​bżonnijiet bażiċi tal-​familji tagħhom. Madankollu, xi wħud għandhom mnejn qed jaħdmu iżjed sigħat milli hu neċessarju. (1 Tim. 6:8) Id-​dinja kummerċjali qed tagħmel l-​almu tagħha biex tikkonvinċina li ma nistgħux ngħixu mingħajr il-​ħafna prodotti tagħha u kull mudell ġdid li joħroġ fis-​suq. Imma l-​Kristjani veri ma jridux lid-​dinja taʼ Satana tiddettalhom il-​prijoritajiet tagħhom. (1 Ġw. 2:15-​17) Xi ngħidu fil-​każ taʼ dawk  li rtiraw mix-​xogħol sekulari tagħhom? L-​aħjar ħaġa li jistgħu jagħmlu hi li jużaw ħinhom fix-​xogħol taʼ pijunier u li jpoġġu s-​servizz taʼ Ġeħova l-​ewwel.

¹⁷ Il-​qaddejja dedikati kollha taʼ Ġeħova jistgħu jistaqsu lilhom infushom: X’inhi l-​mira prinċipali tiegħi f’ħajti? Qiegħed inpoġġi l-​interessi tas-​Saltna l-​ewwel? Nimita jien l-​attitudni taʼ sagrifiċċju persunali li kellu Ġesù? Qiegħed nieħu l-​parir taʼ Ġesù biex insegwih kontinwament? Nistaʼ jien naġġusta l-​iskeda tiegħi sabiex niddedika iktar ħin għax-​xogħol tal-​ippritkar tas-​Saltna jew għal attivitajiet oħrajn fis-​servizz taʼ Ġeħova? Anke jekk iċ-​ċirkustanzi tiegħi fil-​preżent ma jippermettulix inkabbar is-​servizz tiegħi, qiegħed jien inkompli nrawwem spirtu taʼ sagrifiċċju persunali?

‘BIEX IKOLLOK IR-​RIEDA U BIEX TAĠIXXI’

18, 19. Dwar xiex tistaʼ titlob, u għala talba bħal din tkun togħġob lil Ġeħova?

¹⁸ Hija ħaġa sabiħa li tara ż-​żelu tal-​poplu t’Alla. Madankollu, xi wħud jistgħu ma jħossuhomx miġbudin b’mod partikulari biex jaqdu bħala pijunieri jew iħossu li mhumiex kwalifikati biżżejjed biex jagħmlu dan—anke jekk iċ-​ċirkustanzi tagħhom jippermettulhom. (Eżo. 4:10; Ġer. 1:6) Xi ngħidu jekk tħossok hekk? Jistaʼ dan ikun suġġett tajjeb biex titlob dwaru? Ċertament! Pawlu qal lil sħabu fit-​twemmin li Ġeħova, “għax hekk għoġbu, qed jaħdem fikom kemm biex ikollkom ir-​rieda u kemm biex taġixxu.” (Flp. 2:13) Jekk ma tħossokx imħeġġeġ biex tkabbar il-​ministeru tiegħek, itlob lil Ġeħova biex jagħtik kemm ix-​xewqa kif ukoll l-​abbiltà biex tagħmel dan.​—2 Pt. 3:9, 11.

¹⁹ Noè, Mosè, Ġeremija, Pawlu, u Ġesù kollha kienu nies devoti. Huma użaw il-​ħin u l-​enerġija tagħhom biex ixandru l-​messaġġ taʼ twissija taʼ Ġeħova. Ma ħallewx lilhom infushom jiġu aljenati. It-​tmiem tas-​sistema preżenti hu imminenti; b’hekk, kull wieħed u waħda minna li ddedika lilu nnifsu lil Alla jeħtieġ li jkun ċert li qed ikompli jagħmel l-​aħjar tiegħu f’li jsegwi dawn l-​eżempji Skritturali eċċellenti. (Mt. 24:42; 2 Tim. 2:15) Billi nagħmlu dan, aħna nistgħu nogħġbu lil Ġeħova u naħsdu l-​barkiet għonja tiegħu.​—Aqra  Malakija 3:10.

[Nota ta’ taħt]

[Mistoqsijiet ta’ Studju]

[Stampa f’paġna 21]

In-​nies ma tawx kas it-​twissija taʼ Noè

[Stampa f’paġna 24]

Ikkunsidrajt int bis-​serjetà li taqdi bħala pijunier regulari?