“Dan nordnalkom, li tħobbu lil xulxin.”—ĠW. 15:17.

1. Il-​Kristjani tal-​ewwel seklu għala kellhom bżonn jibqgħu ħbieb tal-​qalb?

 MATUL l-​aħħar lejl tiegħu fuq l-​art, Ġesù inkuraġġixxa lid-​dixxipli leali tiegħu biex jibqgħu ħbieb maʼ xulxin. Iktar kmieni dik il-​lejla, hu qal li l-​imħabba li huma juru lejn xulxin se tidentifikahom bħala s-​segwaċi tiegħu. (Ġw. 13:35) L-​appostli kellhom bżonn jibqgħu ħbieb tal-​qalb biex jissaportu l-​provi li kellhom quddiemhom u biex iwettqu x-​xogħol li Ġesù dalwaqt kien se jagħtihom. Tabilħaqq, il-​Kristjani tal-​ewwel seklu saru magħrufin għall-​imħabba kbira tagħhom għal Alla u għal xulxin.

2. (a) X’aħna determinati li nagħmlu, u għala? (b) Liema mistoqsijiet se nikkunsidraw?

² Illum, kemm hu pjaċevoli li nissieħbu m’organizzazzjoni mad-​dinja kollha li l-​membri tagħha jsegwu l-​eżempju li ħallew dawk il-​Kristjani tal-​ewwel seklu! Aħna determinati li nobdu l-​kmand taʼ Ġesù biex nuru mħabba ġenwina lejn xulxin. Madankollu, matul dawn l-​aħħar jiem, in-​nies inġenerali huma żleali u jonqsu milli juru mħabba naturali. (2 Tim. 3:1-3) Il-​ħbiberiji li dawn jifformaw spiss huma superfiċjali u għall-​interessi persunali. Biex inżommu l-​identità tagħna bħala Kristjani veri m’għandniex nimitaw  dawn l-​attitudnijiet. Mela, ejja nikkunsidraw dan li ġej: X’inhi l-​bażi taʼ ħbiberiji tajbin? Kif nistgħu nagħmlu ħbieb tajbin? Meta jkun hemm bżonn intemmu ħbiberija? U kif nistgħu nżommu ħbiberiji li jibnu?

X’Inhi l-​Bażi taʼ Ħbiberiji Tajbin?

3, 4. X’inhi l-​bażi tal-​ħbiberiji l-​iktar b’saħħithom, u għala?

³ L-​iktar ħbiberiji b’saħħithom huma dawk li huma bbażati fuq l-​imħabba għal Ġeħova. Is-​Sultan Salamun kiteb: “Wieħed li jkun waħdu jistaʼ jingħeleb minn xi ħadd, imma jekk ikunu tnejn flimkien jistgħu jiqfulu. Ħabel bi tlieta ma jinqatax malajr fi tnejn.” (Ekk. 4:12) Meta Ġeħova jkun it-​tielet parti tal-​ħabel fi ħbiberija, dik il-​ħbiberija se ddum.

⁴ Veru, dawk li ma jħobbux lil Ġeħova wkoll jistgħu jifformaw ħbiberiji sodisfaċenti. Imma meta individwi jinġibdu lejn xulxin sforz l-​imħabba li t-​tnejn ikollhom għal Alla, il-​ħbiberija tagħhom tkun soda. Jekk ikun hemm nuqqas taʼ qbil, ħbieb veri se jittrattaw lil xulxin b’mod li jogħġob lil Ġeħova. Jekk l-​opponenti t’Alla jipprovaw joħolqu firdiet, dawn l-​għedewwa se jsibu li l-​ħbiberiji fost il-​Kristjani veri huma sodi. Matul l-​istorja, qaddejja taʼ Ġeħova wrew li huma lesti li jmutu minflok ma jittradixxu lil xulxin.—Aqra l-​1 Ġwanni 3:16.

5. Il-​ħbiberija bejn Rut u Nagħomi għala kienet daqstant b’saħħitha u dejjiema?

⁵ Mingħajr dubju, il-​ħbiberiji li jġibu l-​iktar sodisfazzjon huma dawk li għandna maʼ wħud li jħobbu lil Ġeħova. Ikkunsidra l-​eżempju taʼ Rut u Nagħomi. Dawn in-​nisa fformaw ħbiberija li hi fost l-​iktar taʼ min jammiraha li nsibu fil-​Bibbja. Il-​ħbiberija tagħhom għala kienet daqstant b’saħħitha u dejjiema? Rut irrivelat ir-​raġuni meta qalet lil Nagħomi: “Il-​poplu tiegħek ikun il-​poplu tiegħi, u Alla tiegħek, Alla tiegħi. . . . Jalla Ġeħova jagħmilli hekk u iktar minn hekk jekk ma tkunx il-​mewt li tifridni minnek.” (Rut 1:16, 17) Ovvjament, kemm Rut kif ukoll Nagħomi kellhom imħabba profonda għal Alla, u huma ħallew din l-​imħabba tinfluwenza l-​mod kif ittrattaw lil xulxin. B’riżultat taʼ dan, iż-​żewġ nisa ġew imberkin minn Ġeħova.

Kif Tagħmel Ħbieb Tajbin

6-8. (a) Ħbiberiji dejjiema huma riżultat taʼ xiex? (b) Kif tistaʼ tieħu l-​inizjattiva biex tagħmel ħbieb?

⁶ L-​eżempju taʼ Rut u Nagħomi juri li ħbiberiji tajbin ma jiġux b’kumbinazzjoni. Il-​bażi hi mħabba għal Ġeħova min-​naħa tat-​tnejn. Imma ħbiberiji dejjiema huma riżultat taʼ xogħol iebes u sagrifiċċju persunali. Saħansitra aħwa tal-​istess familja li jqimu lil Ġeħova bħala Kristjani għandhom bżonn jaħdmu biex jifformaw ħbiberija mill-​qrib. Mela allura, kif tistaʼ tagħmel ħbieb tajbin?

⁷ Ħu l-​inizjattiva. L-​appostlu Pawlu inkuraġġixxa lil ħbiebu fil-​kongregazzjoni taʼ Ruma biex ‘juru dejjem l-​ospitalità.’ (Rum. 12:13) Li turi dejjem l-​ospitalità jinvolvi serje t’azzjonijiet żgħar u regulari. Dan hu bħal  meta timxi f’mogħdija, li jinvolvi serje taʼ passi wieħed wara l-​ieħor. Ħadd ma jistaʼ jimxi l-​mogħdija tal-​ospitalità għalik. (Aqra Proverbji 3:27.) Mod wieħed kif tkun ospitabbli hu billi tistieden uħud differenti mill-​kongregazzjoni biex jieklu miegħek ikla sempliċi. Tistaʼ tiħodha drawwa li turi ospitalità lejn membri tal-​kongregazzjoni tiegħek?

⁸ Mod ieħor kif tistaʼ tieħu l-​inizjattiva biex tagħmel ħbieb hu billi tistieden uħud differenti biex jieħdu sehem miegħek fix-​xogħol tax-​xandir. Meta tkun fil-​ministeru u tismaʼ lil min ikun miegħek jitkellem mill-​qalb dwar l-​imħabba li għandu għal Ġeħova maʼ persuna li ma jafhiex, mingħajr ma trid se tinġibed iktar lejn dak li qed taħdem miegħu.

9, 10. Pawlu liema eżempju ħalla, u kif nistgħu nimitawh?

⁹ Wessgħu qalbkom fl-​affezzjoni tagħkom. (Aqra t-​2 Korintin 6:12, 13.) Ġieli ħassejt li m’hemm ħadd fil-​kongregazzjoni tiegħek li tistaʼ tkun ħabib miegħu? Jekk inhu hekk, jistaʼ jkun li qed tillimita min taħseb li jistaʼ jkun ħabib? L-​appostlu Pawlu ħalla eżempju tajjeb f’li jwessaʼ qalbu fl-​affezzjoni tiegħu. Kien hemm żmien meta lanqas biss kien jgħaddilu minn moħħu li jagħmel ħbieb tal-​qalb maʼ dawk li mhumiex Lhud. Madankollu, hu sar “appostlu tal-​ġnus.”—Rum. 11:13.

¹⁰ Iktar minn hekk, Pawlu m’għamilx ħbieb biss maʼ dawk li kienu tamparu. Pereżempju, hu u Timotju saru ħbieb tal-​qalb minkejja differenza fl-​età u l-​ambjent li kienu ġejjin minnu. Illum, ħafna żgħażagħ jgħożżu l-​ħbiberiji li għamlu maʼ membri akbar tal-​kongregazzjoni. “Jien għandi ħabiba għażiża ħafna li għandha ’l fuq minn 50 sena,” tgħid Vanessa li għandha ftit iktar minn 20 sena. “Nistaʼ ngħidilha kulma ngħid il-​ħbieb tal-​età tiegħi. U hi jimpurtaha ħafna minni.” Kif jifformaw ħbiberiji bħal dawn? Vanessa tgħid: “Biex ikolli din il-​ħbiberija kelli nagħmel sforz.” Lest int li tagħmel ħbieb maʼ dawk li mhumiex tamparek? Ċertament li Ġeħova se jbierkek għall-​isforzi tiegħek.

11. X’nistgħu nitgħallmu mill-​eżempju taʼ Ġonatan u David?

¹¹ Kun leali. “Ħabib veru jħobb il-​ħin kollu; huwa ħu mwieled għal meta jkun hemm in-​niket,” kiteb Salamun. (Prov. 17:17) Meta kien qed jikteb dan il-​kliem, Salamun forsi kellu f’moħħu l-​ħbiberija li missieru, David, kellu maʼ Ġonatan. (1 Sam. 18:1) Is-​Sultan Sawl ried li ibnu Ġonatan jiret it-​tron t’Israel. Imma Ġonatan aċċetta l-​fatt li Ġeħova kien għażel lil David għal dan il-​privileġġ. Għall-​kuntrarju taʼ Sawl, Ġonatan ma kienx għajjur għal David. Hu ma ħassux offiż minħabba li David ġie mfaħħar, u lanqas  m’emmen il-​kalunnji li Sawl xerred dwar David. (1 Sam. 20:24-34) Aħna bħal Ġonatan? Meta l-​ħbieb tagħna jirċievu privileġġi, inkunu ferħanin għalihom? Meta jsofru minn tbatija, infarrġuhom u nappoġġawhom? Jekk nisimgħu xi qlajja’ dwar ħabib, ħa nemmnuha malajr? Jew, bħal Ġonatan, se niddefendu lealment il-​ħabib tagħna?

Meta Jkun Hemm Bżonn Intemmu Ħbiberija

12-14. Xi studenti tal-​Bibbja liema sfidi jiffaċċjaw, u kif nistgħu ngħinuhom?

¹² Meta student tal-​Bibbja jibda jagħmel bidliet fil-​ħajja tiegħu, hu għandu mnejn jiffaċċja sfida kbira rigward il-​ħbieb. Hu forsi għandu ħbieb li jieħu pjaċir magħhom imma li ma jgħixux skont il-​livelli morali tal-​Bibbja. Fil-​passat, hu forsi regolarment qattaʼ ħin magħhom. Imma, issa, qed jara li l-​attivitajiet tagħhom setgħu kienu t’influwenza ħażina għalih, u jħoss li għandu jillimita l-​kuntatt tiegħu maʼ wħud bħal dawn. (1 Kor. 15:33) Xorta waħda, hu forsi jħoss li jekk ma jibqax jissieħeb magħhom ikun qed juri nuqqas taʼ lealtà.

¹³ Jekk int student tal-​Bibbja li qed tiffaċċja din l-​isfida, ftakar li ħabib taʼ veru se jkun ferħan li int qed tipprova ttejjeb ħajtek. Hu jew hi forsi saħansitra tkun trid tissieħeb miegħek f’li titgħallem dwar Ġeħova. Mill-​banda l-​oħra, dawk li mhumiex ħbieb veri se ‘jibdew jgħajruk’ peress li ma tkomplix tiġri magħhom fl-​“istess livell baxx taʼ ħajja sfrattata.” (1 Pt. 4:3, 4) Fil-​verità, huma dawn il-​ħbieb li mhumiex leali lejk u mhux int lejhom.

¹⁴ Meta studenti tal-​Bibbja jiġu abbandunati mill-​ħbieb li kellhom qabel li m’għandhomx imħabba għal Alla, membri tal-​kongregazzjoni għandhom jimlew dak il-​vojt. (Gal. 6:10) Tafhom int personalment lil dawk li qed jattendu l-​laqgħat tiegħek u li qed jistudjaw il-​Bibbja? Tistaʼ int kultant tipprovdilhom sħubija li tibni?

15, 16. (a) Kif għandna nirreaġixxu jekk ħabib jieqaf jaqdi lil Ġeħova? (b) Kif nistgħu nuru mħabbitna lejn Alla?

¹⁵ Imma, xi ngħidu, jekk ħabib minn ġewwa l-​kongregazzjoni jiddeċiedi li jiċħad lil Ġeħova, forsi billi jkun hemm bżonn li jiġi maqtugħ mis-​sħubija? Ċirkustanza bħal din tistaʼ tkun taʼ niket kbir. Waħda oħt iddeskriviet ir-​reazzjoni tagħha meta ħabiba tal-​qalb waqfet taqdi lil Ġeħova b’dan il-​kliem: “Ħassejtni mnikkta għall-​aħħar. Kont naħseb li l-​ħabiba tiegħi kienet b’saħħitha fil-​verità, imma ma kinitx. Bdejt naħseb jekk kinitx qdiet lil Ġeħova sempliċement biex togħġob lill-​familja tagħha. Imbagħad bdejt nikkunsidra mill-​ġdid il-​motivi tiegħi stess. Kont qed naqdi lil Ġeħova b’motivi tajbin?” Kif kampat din l-​oħt? “Jien tfajt it-​toqol tiegħi fuq Ġeħova,” tgħid hi. “Jien determinata li nuri lil Ġeħova li jien inħobbu għal dak li hu, u mhux biss għax jipprovdili ħbieb fl-​organizzazzjoni tiegħu.”

¹⁶ Ma nistgħux nistennew li nibqgħu ħbieb t’Alla jekk nappoġġaw lil dawk li jagħżlu li jkunu ħbieb mad-​dinja. Id-​dixxiplu Ġakbu kiteb: “Ma tafux li l-​ħbiberija mad-​dinja hi għadwa m’Alla? Għalhekk, kulmin irid ikun ħabib tad-​dinja qed jagħmel lilu nnifsu għadu t’Alla.” (Ġak. 4:4) Aħna nistgħu nuru mħabbitna lejn Alla billi jkollna fiduċja li jekk aħna nibqgħu leali lejh, Hu se jgħinna nkampaw meta nitilfu ħabib. (Aqra Salm 18:25.) L-​oħt li semmejna qabel tiġbor il-​kwistjoni b’dan il-​mod: “Jien tgħallimt li ma  nistgħux inġiegħlu lil xi ħadd iħobb lil Ġeħova jew lilna. Fl-​aħħar mill-​aħħar hi għażla persunali.” Iżda, x’nistgħu nagħmlu biex inżommu ħbiberiji li jibnu maʼ dawk li jibqgħu ġewwa l-​kongregazzjoni?

Inżommu Ħbiberiji Tajbin

17. Ħbieb tajbin kif jitkellmu maʼ xulxin?

¹⁷ Komunikazzjoni tajba żżomm ħbiberija ħajja. Hekk kif taqra rakkonti tal-​Bibbja li jinvolvu lil Rut u Nagħomi, lil David u Ġonatan, u lil Pawlu u Timotju, se tinnota li ħbieb tajbin jitkellmu sinċerament imma b’rispett maʼ xulxin. Rigward il-​mod li għandna nikkomunikaw m’oħrajn, Pawlu kiteb: “Ħa jkun kliemkom dejjem kollu ħlewwa, imħawwar bil-​melħ.” Pawlu kien qed jirreferi speċifikament għall-​mod li għandna nkellmu lil dawk taʼ “barra,” jiġifieri, lil dawk li mhumiex ħutna Kristjani. (Kol. 4:5, 6) Ċertament, jekk dawk li ma jemmnux bħalna jixirqilhom ir-​rispett meta nitkellmu magħhom, kemm iktar l-​għeżież ħbieb tagħna ġewwa l-​kongregazzjoni!

18, 19. Kif għandna nqisu kwalunkwe parir li nirċievu mingħand ħabib Kristjan, u liema eżempju ħallew għalina l-​anzjani f’Efesu?

¹⁸ Ħbieb tajbin jistmaw l-​opinjoni taʼ xulxin, u għalhekk il-​komunikazzjoni bejniethom għandha bżonn tkun kemm bil-​ħlewwa kif ukoll bis-​sinċerità. Is-​sultan għaref Salamun kiteb: “Iż-​żejt u l-​inċens iferrħu l-​qalb; hekk ukoll il-​ħlewwa li juri sieħeb minħabba l-​pariri li jagħti b’ruħu kollha.” (Prov. 27:9) Int hekk tqisu kwalunkwe parir li tirċievi mingħand ħabib? (Aqra Salm 141:5.) Jekk ħabib jesprimi tħassib dwar xi azzjoni li int qed tieħu, kif tirreaġixxi? Se tqis il-​kummenti bħala att taʼ qalb tajba bl-​imħabba, jew se tieħu għalik?

¹⁹ L-​appostlu Pawlu kien igawdi relazzjoni mill-​qrib mal-​anzjani tal-​kongregazzjoni f’Efesu. Hu x’aktarx li kien jaf lil xi wħud minn dawn l-​irġiel minn mindu saru jemmnu. Imma matul l-​aħħar laqgħa tiegħu magħhom tahom xi pariri diretti. Kif irreaġixxew? Il-​ħbieb taʼ Pawlu ma ħadux għalihom. Minflok, huma apprezzaw l-​interess tiegħu fihom, u saħansitra bkew minħabba l-​ħsieb li mhux se jerġgħu jarawh.—Atti 20:17, 29, 30, 36-38.

20. X’se jagħmel ħabib li jħobb?

²⁰ Ħbieb tajbin mhux biss jaċċettaw pariri għaqlin imma wkoll jagħtuhom. M’għandniex xi ngħidu, għandna bżonn nagħrfu meta m’għandniex ‘nindaħlu fl-​affarijiet taʼ ħaddieħor.’ (1 Tess. 4:11) U għandna nirrikonoxxu wkoll li kull wieħed minna “se jagħti kont tiegħu nnifsu lil Alla.” (Rum. 14:12) Imma meta jkun neċessarju, ħabib li jħobb se jfakkar b’qalb tajba lil sieħbu dwar il-​livelli taʼ Ġeħova. (1 Kor. 7:39) Pereżempju, x’se tagħmel jekk tinnota li ħabib mhux miżżewweġ qed jiżviluppa relazzjoni emozzjonali maʼ xi ħadd li mhuwiex tal-​istess twemmin? Se żżomm lura milli tgħidlu dwar it-​tħassib tiegħek għax tibżaʼ li tagħmel ħsara lill-​ħbiberija tagħkom? Jew jekk ħabibek jinjora l-​parir tiegħek, x’se tagħmel? Ħabib tajjeb se jfittex l-​għajnuna taʼ rgħajja kollhom imħabba biex jgħinu lil ħabib li jkun għamel xi pass falz. Azzjoni bħal din teħtieġ il-​kuraġġ. Madankollu, mhux se jkun hemm ħsara permanenti fuq ħbiberija li hi bbażata fuq l-​imħabba għal Ġeħova.

21. X’se nagħmlu lkoll kemm aħna kultant, imma għala hu vitali li nżommu ħbiberiji b’saħħithom fil-​kongregazzjoni?

²¹ Aqra Kolossin 3:13, 14. Kultant, ħbiebna se jkollhom ‘għalxiex jilmentaw’ kontrina, u huma wkoll se jagħmlu jew jgħidu affarijiet li jdejquna. “Ilkoll nitfixklu ħafna drabi,” kiteb Ġakbu. (Ġak. 3:2) Madankollu, dak li jiddetermina ħbiberija mhuwiex kemm spiss nidinbu kontra xulxin imma kemm naħfru għalkollox dawn in-​nuqqasijiet. Kemm hu vitali li nibnu ħbiberiji b’saħħithom billi nikkomunikaw bil-​miftuħ u naħfru lil xulxin mill-​qalb! Jekk nuruha din l-​imħabba se ssir “rabta perfetta li tgħaqqad.”

Int Kif Twieġeb?

• Kif nistgħu nagħmlu ħbieb tajbin?

• Meta jkun hemm bżonn li tintemm ħbiberija?

• X’għandna nagħmlu biex inżommu ħbiberiji b’saħħithom?

[Mistoqsijiet taʼ Studju]

[Stampa f’paġna 18]

X’kienet il-​bażi tal-​ħbiberija dejjiema bejn Rut u Nagħomi?

[Stampa f’paġna 19]

Turi int ospitalità regolarment?