SA FL-​AĦĦAR! Għaddiet mill-​eżamijiet. L-​istudenta, li kellha ġimagħtejn ibsin ferm minħabba l-​eżamijiet, irċiviet riżultat sabiħ. Issa setgħet issib l-​impjieg li dejjem xtaqet.

Ħafna nies hekk iħarsu lejn il-​ħajja fuq l-​art. Jaħsbu li hi xi test li kulħadd irid jgħaddi minnu bħala tħejjija. Dawk li “jgħaddu” jimxu ’l quddiem lejn xi ħaġa aħjar f’xi forma taʼ ħajja wara l-​mewt. Kienet tkun tabilħaqq ħasra kieku l-​ħajja preżenti, li mhix ħlief sempliċi eżistenza għal ħafna nies, kienet l-​aqwa ħaġa li l-​bniedem jistaʼ jistenna. Għalkemm kien sinjur u f’saħħtu għall-​biċċa l-​kbira taʼ ħajtu, ir-​raġel Ġob li jissemma fil-​Bibbja osserva: “Il-​bniedem imwieled minn mara għandu ħajja qasira, imma tbatija għandu biżżejjed.”—Ġob 14:1.

Waqt li tagħti l-​ħarsa taʼ kif jaħsbuha ħafna nies, in-​New Catholic Encyclopedia tistqarr: “Il-​glorja tas-​sema hija d-​destin li Alla jrid għall-​bniedem. . . . Il-​ferħ tal-​bniedem jidher li jinsab f’li jikseb l-​hena fis-​sema.” Stħarriġ li sar dan l-​aħħar miċ-​Church of Christ fl-​Istati Uniti jgħid li 87 fil-​mija taʼ dawk li wieġbu qalu li jemmnu li x’aktarx imorru s-​sema wara li jmutu.

Mhux l-​Insara biss jittamaw li jħallu din l-​art biex imorru f’post aħjar wara l-​mewt. Per eżempju, il-​Musulmani jittamaw li jmorru l-​ġenna fis-​sema. Segwaċi tas-​setet taʼ l-​Art Pura fil-​Buddiżmu ġewwa ċ-​Ċina u l-​Ġappun jemmnu li, jekk jgħidu bla waqfien il-​kelma “Amitabha,” li hi l-​isem tal-​Budda taʼ Dawl Bla Limitu, huma se jitwieldu mill-​ġdid fl-​Art Pura, jew fil-​Ġenna tal-​Punent, fejn se jgħixu ferħanin għalkollox.

Huwa interessanti li l-​Bibbja, il-​ktieb sagru li hu l-​iktar tradott u mqassam fid-​dinja, ma tippreżentax l-​art bħala xi post li rridu naħarbu minnu, bħal speċi taʼ passaġġ li jiħodna xi mkien ieħor. Per eżempju, il-​Bibbja tistqarr: “Il-​ġusti jirtu l-​art, u jgħammru fiha għal dejjem.” (Salm 37:29) Fil-​Bibbja nsibu wkoll l-​istqarrija famuża taʼ Ġesù: “Imberkin il-​ġwejdin: għax għad jirtu l-​art.”​—Mattew 5:5, Karm Żammit.

Il-fatt li l-​biċċa l-​kbira tan-​nies jaħsbu li l-​art hi mikrija lilna għal ftit taż-​żmien jagħti ’l wieħed x’jifhem li l-​mewt tiftaħ il-​bieb għal ħajja taʼ ferħ li ma bħalu. Jekk dan hu minnu, allura l-​mewt hija verament barka. Imma n-​nies, fil-​biċċa l-​kbira tagħhom, hekk iħarsu lejn il-​mewt, jew jipprovaw itawlu ħajjithom? Nafu mill-​esperjenza li meta n-​nies ikunu f’saħħithom biżżejjed u jgawdu ċerta sigurtà, ma jkunux iridu jmutu.

Madankollu, peress li l-​art mimlija ħażen u tbatija, hemm ħafna li għadhom iħarsu lejn is-​sema bħala l-​uniku post fejn jistgħu jsibu paċi vera u ferħ veru. Huwa s-​sema sempliċi post taʼ paċi u hena li ma bħalu, fejn qatt ma jistaʼ jkun hemm ħażen jew nuqqas taʼ qbil? U se jkun hemm ħajja wara l-​mewt biss f’xi post fis-​sema? Għandek mnejn tibqaʼ sorpriż bit-​tweġibiet li tagħti l-​Bibbja. Jekk jogħġbok kompli aqra.