Aħna Minn Dawk li Għandhom Fidi

IL-​ĦUT ilu jkun ikel prinċipali sa minn żmien il-​qedem. In-​nies ilhom eluf taʼ snin jistadu fl-​ibħra, fl-​għadajjar, u fix-​xmajjar li hawn fuq l-​art. Xi wħud mill-​appostli taʼ Ġesù Kristu kienu sajjieda fil-​Baħar tal-​Galilija. Madankollu, Ġesù għarrafhom b’tip ieħor taʼ sajd. Dan kien sajd spiritwali li kellu jkun taʼ benefiċċju mhux biss għas-​sajjieda imma wkoll għall-​ħut.

F’dan ir-​rigward, Ġesù qal lil Pietru s-​sajjied: “Minn issa ’l quddiem tkun taqbad in-​nies.” (Luqa 5:10) Dan it-​tip taʼ sajd għadu sejjer sal-​lum f’iktar minn 230 art, inkluż is-​Senegal. (Mattew 24:14) Hawnhekk, is-​“sajjieda tal-​bnedmin” taʼ żmienna qegħdin b’kuraġġ kbir jaqsmu t-​tama Kristjana tagħhom m’oħrajn.—Mattew 4:19.

Is-Senegal jinsab fin-​naħa taʼ l-​iktar parti tal-​punent taʼ l-​Afrika. Dan jinfirex mill-​inħawi tad-​deżert kollu ramel li jmissu mas-​Saħara fit-​tramuntana u fin-​nofsinhar jaslu sal-​foresti umdin tar-​reġjun taʼ Casamance. Is-​Senegal huwa art maħkuma mill-​irjiħat sħan tad-​deżert kif ukoll miż-​żiffa kiesħa u rifreskanti taʼ l-​Atlantiku. Hawnhekk jgħixu iktar minn disaʼ miljun ruħ. L-​abitanti tas-​Senegal huma magħrufin għall-​ospitalità tagħhom. Il-​biċċa l-​kbira minnhom ma jistqarrux li huma Kristjani. Ħafna huma rgħajja, waqt li oħrajn għandhom merħliet taʼ baqar, iġmla, u mogħoż. Hemm ukoll bdiewa li jikkultivaw il-​karawett, it-​tajjar, u r-​ross. Iva, u hemm sajjieda li jġibu x-​xbieki mimlijin ħut mill-​Oċean Atlantiku u minn diversi xmajjar kbar li għaddejjin imserrpin mal-​pajjiż kollu. L-​industrija tas-​sajd għandha rwol vitali fl-​ekonomija tas-​Senegal. Fil-​fatt, il-​platt tradizzjonali famuż hu ceebu jën, ikla bnina taʼ ross, ħut, u ħaxix.

“Sajjieda tal-​Bnedmin”

Hemm 863 predikatur żeluż tas-​Saltna t’Alla fis-​Senegal. Is-​sajd spiritwali hawnhekk beda fil-​bidu tas-​snin ħamsin. Fl-​1965, infetaħ uffiċċju tal-​fergħa tal-​Watch Tower Society fil-​belt kapitali Dakar. Is-​“sajjieda” missjunarji bdew ġejjin minn ħafna pajjiżi ’l bogħod. Ix-​xogħol tas-​“sajd” inbeda u x-​xandir tat-​tama Kristjana fis-​Senegal beda mixi ’l quddiem mhux ħażin. Eventwalment, inbnew faċilitajiet ġodda tal-​fergħa f’Almadies, barra l-​belt taʼ Dakar, u ġew dedikati lil Jehovah f’Ġunju taʼ l-​1999. Xi żmien taʼ ferħ!

L-​Isfida taʼ li Jaċċettaw il-​Verità

Nies li ġejjin minn ambjenti differenti qed jiġu kuntattjati regolarment, u xi wħud wieġbu b’mod favorevoli għall-​messaġġ taʼ tama misjub fil-​Kelma t’Alla. Għalkemm ħafna nies m’għandhom ebda għarfien tal-​Bibbja, huma jieħdu pjaċir isiru jafu li l-​wegħdi li Alla Jehovah għamel lill-​profeti leali tal-​qedem dalwaqt se jseħħu.

Taʼ spiss jirrikjedi l-​kuraġġ biex wieħed jieħu waqfa soda għall-​prinċipji Kristjani, speċjalment meta dan jinvolvi t-​tradizzjonijiet u d-​drawwiet familjari. Per eżempju, il-​poligamija hija prattikata ferm fis-​Senegal. Ikkunsidra l-​każ taʼ wieħed raġel li kellu żewġ nisa meta beda jistudja l-​Bibbja. Kien se jkollu l-​kuraġġ li jaċċetta l-​verità Kristjana u jiġi fi qbil mal-​ħtiġijiet Skritturali biex ikun raġel taʼ mara waħda biss? (1 Timotju 3:2) U kien se jżomm il-​mara taʼ żgħożitu, l-​ewwel mara li żżewweġ? Hekk għamel fil-​fatt, u issa qed jaqdi bħala anzjan żeluż f’waħda mill-​akbar kongregazzjonijiet fl-​inħawi taʼ Dakar. L-​ewwel mara tiegħu wkoll aċċettatha l-​verità flimkien mat-​12-il tifel u tifla kollha tiegħu, 10 mill-​ewwel mara tiegħu u 2 mit-​tieni mara li kellu qabel.

Ostaklu ieħor li wieħed jistaʼ jiltaqaʼ miegħu f’li jaċċetta t-​tama Kristjana jistaʼ jkun minħabba li jkun illetterat. Ifisser dan li persuna illetterata ma tistax taċċetta u tipprattika l-​verità? Dażgur li le. Ikkunsidra l-​eżempju taʼ Marie, omm taʼ tmint itfal żgħar li tant taħdem iebes. Hi mill-​ewwel rat l-​importanza li tiddiskuti skrittura maż-​żgħar tagħha kuljum qabel ma jmorru l-​iskola u hi  tmur ix-​xogħol. Imma kif setgħet tagħmel dan, ladarba ma kinitx taf taqra? Kmieni kull fil-​għodu, hi kienet taqbad il-​ktejjeb Neżaminaw l-​Iskrittura Kuljum u toqgħod fit-​triq kollha ramel quddiem id-​dar tagħha. Hekk kif jgħaddu n-​nies, hi kienet tistaqsihom jekk kinux jafu jaqraw. Meta kienet issib lil xi ħadd li jaf jaqra, kienet tagħtih il-​ktejjeb u b’ton serju tistaqsih: “Peress li ma nafx naqra, tistaʼ jekk jogħġbok taqrali din il-​parti żgħira llum?” Hi kienet tagħti widen sew għal dak li jaqrawlha. Imbagħad kienet tirringrazzja lil dak li jkun qralha u tidħol malajr f’darha sabiex tiddiskuti l-​kumment b’mod vivaċi maʼ wliedha qabel ma jmorru l-​iskola!

Iwieġbu Nies taʼ kull Xorta

Fis-​Senegal, in-​nies tistaʼ ssibhom bil-​qegħda fit-​toroq ibigħu l-​ħut, il-​ħaxix, jew il-​frott fis-​suq, inkella mixħutin taħt xi siġra enormi tal-​baobab jixorbu l-​ataya, speċi taʼ tè aħdar morr. Determinati li jaqsmu l-​aħbar tajba maʼ kulmin jiltaqgħu, żewġt aħwa rġiel kellmu lil wieħed raġel inkapaċitat li kien qed jittallab fit-​triq. Wara li sellmulu, qalulu: “Ħafna nies jagħtuk il-​flus imma ma jiqfux ikellmuk. Aħna ġejna ħdejk biex inkellmuk dwar xi ħaġa tassew importanti dwar il-​futur tiegħek.” It-​tallab baqaʼ mistagħġeb. “Nixtiequ nistaqsuk mistoqsija,” komplew l-​aħwa. “Għala taħseb li hawn tant sofferenza fid-​dinja?” “Hija r-​rieda t’Alla,” weġibhom it-​tallab.

Imbagħad, l-​aħwa rraġunaw miegħu mill-​Iskrittura u spjegawlu Apokalissi 21:4. It-​tallab tqanqal ferm b’dan il-​messaġġ taʼ tama u bil-​fatt li xi ħadd kien interessat fih biżżejjed li jieqaf u jiddiskuti l-​Bibbja miegħu. Għajnejh imtlew bid-​dmugħ. Minflok ma talabhom il-​flus, hu talab lil dawn l-​aħwa biex jieħdu l-​flus kollha li kellu fil-​bott tiegħu! Tant beda jinsisti li ġibed l-​attenzjoni taʼ kulmin kien għaddej. Kellhom diffikultà kbira biex jikkonvinċuh biex il-​flus iżommhom għalih. Hu fl-​aħħar qabel magħhom imma insista biex jerġgħu jżuruh.

L-università l-​kbira taʼ Dakar ukoll qed tgħin biex tiżdied il-​qabda fix-​xibka tas-​sajd spiritwali. Hemmhekk beda jistudja l-​Bibbja wieħed student fil-​mediċina jismu Jean-Louis. Dan malajr aċċetta l-​verità, iddedika ħajtu lil Jehovah, u tgħammed. Ix-​xewqa tiegħu kienet li jaqdi lil Alla fis-​servizz full-time bħala pijunier, imma l-​istudju tiegħu tal-​mediċina wkoll kien jogħġbu. Minħabba li kien marbut b’kuntratt maʼ pajjiżu, hu kien obbligat li jispiċċa l-​istudji tiegħu. Madankollu, fl-​istess ħin beda jaqdi bħala pijunier awżiljarju. Ftit wara li rċieva d-​diploma tiegħu bħala tabib kwalifikat, hu ġie mistieden biex jaqdi f’Dar Betel kbira ġewwa l-​Afrika bħala t-​tabib tal-​familja. Żagħżugħ ieħor li ġie kuntattjat fl-​Università taʼ Dakar issa qed jaqdi wkoll mal-​familja taʼ Betel f’pajjiżu.

Is-sajd spiritwali fis-​Senegal huwa ċertament sodisfaċenti. Il-​letteratura Biblika tax-​Xhieda taʼ Jehovah hija apprezzata ferm u issa qed issir fil-​lingwa lokali taʼ Wolof. Il-​fatt li l-​aħbar tajba semgħuha bil-​lingwa tagħhom stess kien taʼ inkuraġġiment biex ħafna nies taʼ qalb onesta jwieġbu bi gratitudni. Bil-​barka taʼ Jehovah, mingħajr ebda dubju se jinqabad ħafna iktar ħut simboliku, hekk kif is-​“sajjieda tal-​bnedmin” żelużi fis-​Senegal jibqgħu jxandru t-​tama Kristjana fedelment u b’kuraġġ.

[Mappa/Stampa f’paġna 31]

(Għall-formazzjoni sħihħa tat-​test, ara l-​pubblikazzjoni)

IS-​SENEGAL

[Stampa]

Jaqsmu t-​tama Kristjana fis-​Senegal

[Sors taʼ l-​istampa]

Mountain High Maps® Copyright © 1997 Digital Wisdom, Inc.