“U nqanqal il-​ġnus kollha, u l-​ġid kollu tal-​popli jiġi kollu hawn, u nimla dan it-​tempju bil-​glorja.”—ĦAGGAJ 2:7.

1. F’mument t’emerġenza, għala naħsbu l-​ewwel fil-​maħbubin tagħna?

 X’ĠID għandek id-​dar? Għandek għamara lussuża, xi kompjuter taʼ mudell l-​iktar avanzat, xi karozza ġdida fil-​garaxx tiegħek? Saħansitra jekk għandek dawn l-​affarijiet kollha, ma taqbilx li l-​iktar affarijiet prezzjużi f’darek huma n-​nies—il-​membri tal-​familja tiegħek? Immaġina kieku kellek tqum xi darba bil-​lejl u xxomm riħa taʼ ħruq. Id-​dar tiegħek qed taqbad, u għandek biss ftit minuti biex taħrab! X’jiġi l-​ewwel f’moħħok? L-​għamara? Il-​kompjuter? Il-​karozza? Mhux fil-​maħbubin tiegħek taħseb l-​ewwel? Mingħajr ebda dubju, għax in-​nies huma ferm iktar prezzjużi mill-​affarijiet.

2. Kemm hu mifrux il-​ħolqien taʼ Jehovah, u Ġesù f’liema aspett minnu sab l-​għaxqa tiegħu?

² Issa aħseb dwar Alla Jehovah u Ibnu, Ġesù Kristu. Jehovah hu Dak li għamel “is-​sema, l-​art, il-​baħar, u kull ma fihom.” (Atti 4:24) Ibnu, ‘l-​imgħallem,’ kien l-​aġent li permezz tiegħu Jehovah għamel l-​affarijiet l-​oħrajn kollha. (Proverbji 8:​30, 31, Saydon; Ġwann 1:3; Kolossin 1:​15-17) Ċertament li kemm Jehovah u kemm Ġesù jgħożżu dak kollu li nħoloq. (Qabbel Ġenesi 1:31.) Imma liema aspett tal-​ħolqien taħseb li hu l-​iktar għażiż għalihom—l-​affarijiet jew in-​nies? Fl-​irwol taʼ l-​għerf personifikat, Ġesù jgħid: “L-​għaxqa tiegħi f’ulied il-​bniedem.”

3. Jehovah liema profezija lissen permezz taʼ Ħaggaj?

³ Bla dubju, in-​nies huma taʼ valur kbir f’għajnejn Jehovah. Indikazzjoni waħda taʼ dan tinsab fil-​kliem profetiku li lissen fis-​sena 520 Q.E.K. permezz tal-​profeta tiegħu Ħaggaj. Jehovah ddikjara: “U nqanqal il-​ġnus kollha, u l-​ġid kollu tal-​popli jiġi kollu hawn, u nimla dan it-​tempju bil-​glorja. . . . Il-​glorja taʼ l-​aħħar taʼ dan it-​tempju tkun akbar minn taʼ qabel.”—Ħaggaj 2:​7, 9.

4, 5. (a) Għala ma jkunx raġunevoli li tikkonkludi li l-​kelma “ġid” tirreferi għal tlellix materjali? (b) Int kif tiddefinixxi l-​kelma “ġid,” u għala?

⁴ Liema “ġid” kien se jimla dar Jehovah u jġibilha glorja li qatt ma kellha bħalha? Għamara lussuża u tiżjin elaborat? Deheb, fidda,  u ħaġar prezzjuż? Dan ma tantx jidher raġunevoli. Ftakar, it-​tempju taʼ qabel, li kien ġie inawgurat xi ħames sekli qabel, kien bini li sewa miljuni kbar taʼ liri! a Żgur li Jehovah ma kienx se jistenna li t-​tempju mibni minn din il-​kotra relattivament żgħira taʼ Lhud li kienu reġgħu rritornaw f’pajjiżhom kien se jisboq lit-​tempju taʼ Salamun fil-​ġmiel materjali!

⁵ X’inhu, mela, il-​“ġid” li kellu jimla dar Jehovah? Jidher ċar li bilfors li huma n-​nies. Wara kollox, dak li jferraħ qalb Jehovah m’huwiex il-​fidda jew id-​deheb imma n-​nies li jaqduh b’imħabba. (Proverbji 27:11; 1 Korintin 10:26) Iva, Jehovah jgħożż l-​irġiel, in-​nisa, u t-​tfal kollha li jqimuh b’mod aċċettabbli. (Ġwann 4:​23, 24) Dawn huma “ġid” tassew, u għal Jehovah huma ferm iktar prezzjużi mir-​raffinatezza kollha li kienet iżżejjen it-​tempju taʼ Salamun.

6. Xi skop serva t-​tempju t’Alla fil-​qedem?

⁶ Minkejja l-​oppożizzjoni bla waqfien, it-​tempju tlesta fis-​sena 515 Q.E.K. Sa żmien is-​sagrifiċċju taʼ Ġesù, it-​tempju f’Ġerusalemm baqaʼ ċ-​ċentru tal-​qima safja għal ħafna mill-​“ġid,” li kien jikkonsisti minn Lhud naturali u proseliti Ġentili. Imma t-​tempju kien jirrappreżenta xi ħaġa ferm iżjed grandjuża, bħalma se naraw.

Twettiq fl-​Ewwel Seklu

7. (a) X’kien jiffigura bil-​quddiem it-​tempju t’Alla f’Ġerusalemm tal-​qedem? (b) Iddeskrivi l-​azzjonijiet tal-​qassis il-​kbir f’Jum l-​Espjazzjoni.

⁷ It-tempju f’Ġerusalemm iffigura bil-​quddiem arranġament akbar għall-​qima. Dan huwa t-​tempju spiritwali t’Alla, li waqqfu Jehovah fis-​sena 29 E.K. b’Ġesù bħala l-​Qassis il-​Kbir. (Lhud 5:​4-10; 9:​11, 12) Ikkunsidra xebh bejn id-​dmirijiet tal-​qassis il-​kbir f’Iżrael u l-​azzjonijiet taʼ Ġesù. Kull sena f’Jum l-​Espjazzjoni, il-​qassis il-​kbir kien javviċina l-​artal fil-​bitħa tat-​tempju u kien joffri barri biex ipatti għad-​dnubiet tal-​qassisin. Iktar tard, kien jidħol fit-​tempju bid-​demm tal-​barri, kien jgħaddi mill-​bibien li kienu jisseparaw il-​bitħa mill-​post Qaddis u mbagħad wara l-​purtiera li kienet tissepara l-​post Qaddis mill-​post l-​Iktar Qaddis. Meta kien ikun ġo l-​Iktar Qaddis, il-​qassis il-​kbir kien iroxx id-​demm quddiem l-​arka tal-​patt. Imbagħad, waqt li jsegwi l-​istess proċedura, hu kien joffri bodbod biex ipatti għat-​12-il tribù mhux saċerdotali taʼ Iżrael. (Levitiku 16:​5-15) Din l-​osservanza kif inhi marbuta mat-​tempju spiritwali t’Alla?

8. (a) Ġesù f’liema sens kien offrut b’seħħ mis-​sena 29 E.K.? (b) Ġesù liema relazzjoni speċjali gawda maʼ Jehovah matul il-​korsa tal-​ministeru tiegħu fuq l-​art?

⁸ Fil-fatt, Ġesù kien offrut fuq l-​artal tar-​rieda t’Alla meta ġie mgħammed u midluk bl-​ispirtu qaddis t’Alla fis-​sena 29 E.K. (Luqa 3:​21, 22) Tabilħaqq, din il-​ġrajja mmarkat il-​bidu taʼ korsa taʼ ħajja sagrifikanti għal Ġesù li damet tliet snin u nofs. (Lhud 10:​5-10) Matul dan il-​perijodu, Ġesù gawda relazzjoni m’Alla bħala wieħed imnissel bl-​ispirtu. Bnedmin oħrajn ma setgħux jifhmu għalkollox din il-​pożizzjoni unika li Ġesù kellu maʼ Missieru tas-​sema. Qisu kien hemm bħal paraventu quddiem għajnejhom tal-​fehma, sewwa sew bħalma paraventu kien jaħbi l-​post Qaddis mill-​vista taʼ dawk fil-​bitħa tat-​tabernaklu.—Eżodu 40:28.

9. Ġesù għala ma setax jidħol fis-​sema bħala bniedem, u din is-​sitwazzjoni kif ġiet solvuta?

⁹ Minkejja li kien Bin Alla midluk bl-​ispirtu, il-​bniedem Ġesù ma setax jikseb ħajja fis-​sema. Għala le? Għax id-​demm u l-​laħam ma jistgħux jirtu s-​Saltna t’Alla fis-​sema. (1 Korintin 15:​44, 50) Ladarba l-​ġisem uman taʼ Ġesù kien qed ifixkel, dan kien simbolizzat tajjeb permezz tal-​purtiera li kienet tissepara l-​post  Qaddis mill-​post l-​Iktar Qaddis fit-​tempju t’Alla fil-​qedem. (Lhud 10:20) Imma tlett ijiem wara mewtu, Ġesù ġie rxoxtat minn Alla bħala spirtu. (1 Pietru 3:18) Imbagħad setaʼ jidħol fil-​post l-​Iktar Qaddis tat-​tempju spiritwali t’Alla—is-​sema stess. U dan hu preċiż dak li ġara. Pawlu jikteb: “Kristu ma daħalx f’santwarju [b’mod evidenti qed jirreferi għall-​post l-​Iktar Qaddis] magħmul b’idejn il-​bnedmin li hu biss xbieha tas-​santwarju veru, imma daħal fis-​sema stess, biex issa jidher għalina quddiem Alla.”—Lhud 9:24.

10. X’għamel Ġesù meta rritorna fis-​sema?

¹⁰ Fis-sema, Ġesù ‘raxx id-​demm’ tas-​sagrifiċċju tiegħu billi ppreżenta lil Jehovah l-​valur tad-​demm taʼ ħajtu li tħallas bħala prezz tal-​fidwa. Madankollu, Ġesù għamel iżjed minn hekk. Ftit qabel ma miet, hu kien qal lis-​segwaċi tiegħu: “Sejjer inħejjilkom fejn toqogħdu. U meta mmur u nħejjilkom post, nerġaʼ niġi biex neħodkom miegħi biex, fejn inkun jien, tkunu intom ukoll.” (Ġwann 14:​2, 3) Għalhekk, billi kiseb aċċess għall-​post l-​Iktar Qaddis, jew is-​sema, Ġesù fetaħ it-​triq għal oħrajn biex isegwuh. (Lhud 6:​19, 20) Dawn l-​individwi, li se jkunu jgħoddu 144,000, se jaqdu bħala sotto-qassisin fl-​arranġament tat-​tempju spiritwali t’Alla. (Apokalissi 7:4; 14:1; 20:6) Sewwa sew bħalma l-​qassis il-​kbir taʼ Iżrael ħa l-​ewwel id-​demm tal-​barri fil-​post l-​Iktar Qaddis biex ipatti għad-​dnubiet tal-​qassisin, il-​valur tad-​demm li xerred Ġesù kien applikat l-​ewwel għal dawn il-​144,000 sotto-qassisin. b

“Ġid” fi Żmienna

11. Il-​qassis il-​kbir taʼ Iżrael għan-​nom taʼ min offra bodbod, u dan x’iffigura bil-​quddiem?

¹¹ Donnu li sas-​sena 1935 il-​ġbir ġenerali tal-​midlukin kien tlesta. c Imma Jehovah kien għadu ma spiċċax jigglorifika lil daru. Le, kien għad baqaʼ “ġid” x’jidħol fiha. Ftakar li l-​qassis il-​kbir f’Iżrael kien joffri żewġ annimali—barri għad-​dnubiet tal-​qassisin u bodbod għad-​dnubiet tat-​tribujiet mhux saċerdotali. Ladarba l-​qassisin taw stampa tal-​midlukin li se jkunu maʼ Ġesù fis-​Saltna tas-​sema, lil min kienu jirrappreżentaw it-​tribujiet mhux saċerdotali? It-​tweġiba qegħda fil-​kliem taʼ Ġesù li nsibu fi Ġwann 10:16: “Għandi wkoll nagħaġ oħra, li m’humiex minn dan il-​maqjel; lilhom ukoll jeħtieġ niġbor, u huma jisimgħu leħni,  u jkun hemm merħla waħda, ragħaj wieħed.” Għaldaqstant, id-​demm li xerred Ġesù jibbenefikaw minnu żewġ gruppi taʼ nies—l-​ewwel, dawk il-​Kristjani li għandhom it-​tama li jaħkmu maʼ Ġesù fis-​sema u t-​tieni, dawk li jittamaw li jgħixu għal dejjem fuq l-​art magħmula ġenna. Milli jidher, huwa dan il-​grupp li tingħata stampa tiegħu permezz tal-​“ġid” imsemmi fil-​profezija taʼ Ħaggaj.—Mikea 4:​1, 2; 1 Ġwann 2:​1, 2.

12. Ħafna mill-​“ġid” kif qed jinġibed lejn dar Alla llum?

¹² Dan il-​“ġid” għadu jimla dar Jehovah. Fi snin reċenti, tneħħew ir-​restrizzjonijiet fl-​Ewropa tal-​Lvant, f’partijiet mill-​Afrika, u f’pajjiżi oħrajn. Dan ippermetta li l-​aħbar tajba tas-​Saltna stabbilita t’Alla tiffjorixxi f’territorji li sa dan iż-​żmien kienu għadhom mhux mimsusin. Hekk kif uħud minn dan il-​“ġid” jidħlu fl-​arranġament tat-​tempju t’Alla, huma mill-​banda l-​oħra jistinkaw biex jagħmlu dixxipli oħrajn, b’ubbidjenza għall-​kmand taʼ Ġesù. (Mattew 28:​19, 20) Waqt li jagħmlu dan, jiltaqgħu maʼ ħafna individwi, żgħar u kbar, li għandhom il-​potenzjal li jsiru parti mill-​“ġid” li se jigglorifika dar Jehovah. Ikkunsidra biss xi ftit eżempji li juru kif dan qed iseħħ.

13. Tifla ċkejkna fil-​Bolivja kif uriet iż-​żelu tagħha biex ixxerred il-​messaġġ tas-​Saltna?

¹³ Fil-Bolivja, tifla taʼ ħames snin, li għandha l-​ġenituri tagħha li huma Xhieda taʼ Jehovah, talbet permess mingħand l-​għalliema tagħha biex ma tattendix l-​iskola matul il-​ġimgħa taż-​żjara mill-​indokratur tas-​circuit. Għala? Riedet tieħu sehem fil-​ministeru matul din il-​ġimgħa kollha t’attività speċjali. Dan issorprenda lill-​ġenituri tagħha, imma kienu henjin li kellha din l-​attitudni mill-​aħjar. Iċ-​ċkejkna issa tikkonduċi ħames studji tal-​Bibbja fid-​djar, u ftit minn dawn l-​istudenti jattendu l-​laqgħat  Kristjani. Saħansitra ġabet lill-​għalliema tagħha fis-​Sala tas-​Saltna. Forsi, maż-​żmien, xi wħud mill-​istudenti tagħha tal-​Bibbja juru li huma fost il-​“ġid” li se jigglorifikaw dar Jehovah.

14. Fil-​Korea, kif ġiet premjata l-​perseveranza taʼ oħt maʼ individwu li ma tantx deher interessat?

¹⁴ Waqt li kienet qed tistenna fi stazzjon tal-​ferrovija, mara Kristjana fil-​Korea avviċinat student li kien bil-​headphones jismaʼ l-​mużika. “Għandek reliġjon?” staqsietu. “Ma tinteressani l-​ebda reliġjon,” wieġeb l-​istudent. L-​oħt ma waqfitx hemm. “Maż-​żmien,” hi ssoktat, “wieħed forsi jkun irid jagħżel reliġjon. Imma jekk ma jkollux għarfien dwar ir-​reliġjon, jistaʼ jagħmel għażla ħażina.” L-​espressjoni taʼ l-​istudent inbidlet, u beda jismaʼ b’interess lil oħtna. Offrietlu l-​ktieb Is There a Creator Who Cares About You? u qaltlu li din il-​pubblikazzjoni se tkun t’għajnuna kbira għalih meta jasal iż-​żmien li jkun irid jagħżel reliġjon. Aċċetta l-​ktieb bil-​qalb. Il-​ġimgħa taʼ wara, beda jistudja l-​Bibbja max-​Xhieda taʼ Jehovah, u issa qed jattendi għal-​laqgħat kollha tal-​kongregazzjoni.

15. Tfajla żagħżugħa fil-​Ġappun kif tibda studji tal-​Bibbja, u l-​isforzi tagħha kif ġew premjati?

¹⁵ Fil-Ġappun, Megumi, li għandha 12-il sena, tqis l-​iskola tagħha bħala għalqa fertili fejn tippriedka u tgħallem. Saħansitra rnexxielha tibda ħafna studji tal-​Bibbja. X’tagħmel Megumi? Peress li taqra l-​Bibbja jew tħejji għal-​laqgħat matul il-​waqfa għall-​kolazzjon, sħabha tal-​klassi spiss jistaqsuha x’qed tagħmel. Xi wħud jistaqsu lil Megumi għala ma tipparteċipax f’ċerti attivitajiet taʼ l-​iskola. Megumi twieġeb il-​mistoqsijiet tagħhom u tgħidilhom li Alla għandu isem. Dan spiss iqajjem l-​interess fis-​semmiegħa tagħha. Hi mbagħad toffrilhom studju tal-​Bibbja. Megumi issa tikkonduċi 20 studju—18 minnhom maʼ sħabha tal-​klassi.

16. Ħu fil-​Kamerun kif setaʼ jibda studji tal-​Bibbja maʼ wħud minn fost grupp taʼ nies li riedu jwaqqgħuh għaċ-​ċajt?

¹⁶ Fil-Kamerun, grupp taʼ tmint irġiel li kienu qegħdin jaħdmu fuq post tax-​xogħol sejħu lil wieħed ħu li kien qed joffri l-​letteratura lil min jgħaddi minn ħdejh. Billi riedu jwaqqgħuh għaċ-​ċajt, staqsewh għala ma kienx jemmen fit-​Trinità, fin-​nar taʼ l-​infern, jew fl-​immortalità tar-​ruħ. Waqt li uża l-​Bibbja, ħuna wieġeb il-​mistoqsijiet tagħhom. Bħala riżultat taʼ dan, tlieta mill-​irġiel aċċettaw studju tal-​Bibbja. Wieħed minnhom, Danjel, beda jattendi l-​laqgħat u saħansitra qered kulma kellu fil-​pussess tiegħu li kellu x’jaqsam maʼ l-​ispiritiżmu. (Apokalissi 21:8) F’inqas minn sena tgħammed.

17. Xi aħwa f’El Salvador kif użaw moħħhom biex jippridkaw lil raġel li għall-​ewwel ma riedx jismaʼ l-​messaġġ tas-​Saltna?

¹⁷ F’El Salvador, wieħed raġel kien jorbot il-​kelb feroċi tiegħu quddiem il-​bieb kulmeta kien jilmaħ lix-​Xhieda taʼ Jehovah fil-​viċin. Ir-​raġel kien jistenna sakemm jitilqu x-​Xhieda, u mbagħad kien idaħħal il-​kelb lura d-​dar. L-​aħwa qatt ma setgħu jkellmuh lil dan ir-​raġel. Għalhekk, jum wieħed iddeċidew li jipprovaw xi ħaġa differenti. Billi kienu jafu li r-​raġel setaʼ jismagħhom, iddeċidew li jippridkaw lill-​kelb. Resqu ħdejn id-​dar, sellmu lill-​kelb, u qalulu kemm kienu henjin li kellhom  l-​opportunità li jitkellmu miegħu. Tkellmu dwar iż-​żmien meta se jkun hawn ġenna fuq l-​art, meta ħadd ma jkun irrabjat—iva, meta saħansitra l-​annimali se jkunu paċifiċi. Imbagħad sellmu lill-​kelb bl-​edukazzjoni kollha u bdew ħerġin mill-​passaġġ. Tgħidx kif baqgħu mbellhin meta l-​inkwilin ħareġ mid-​dar u skuża ruħu talli qatt ma kien ta lix-​Xhieda l-​opportunità li jkellmuh. Aċċetta r-​rivisti, u nbeda studju tal-​Bibbja. Illum dan ir-​raġel hu ħuna—parti mill-​“ġid”!

“La Tibżgħux!”

18. Ħafna Kristjani xi sfidi jiffaċċjaw, imma Jehovah kif iħares lejn l-​adoraturi tiegħu?

¹⁸ Qed tieħu sehem fix-​xogħol vitali taʼ ppridkar tas-​Saltna u li tagħmel dixxipli? Jekk iva, int verament privileġġat. Tabilħaqq, hu permezz taʼ dan ix-​xogħol li Jehovah qed jiġbed il-​“ġid” lejn daru. (Ġwann 6:44) Veru, forsi kultant tħossok xi ftit għajjien jew skuraġġit. Kultant, xi wħud—saħansitra fost il-​qaddejja leali taʼ Jehovah—jissieltu għax iħossuhom insinjifikanti. Imma agħmel il-​qalb! Jehovah jqis lil kull wieħed mill-​adoraturi tiegħu bħala ġid, u għandu interess kbir fis-​salvazzjoni tiegħek.—2 Pietru 3:9.

19. X’inkuraġġiment ipprovda Jehovah permezz taʼ Ħaggaj, u dan il-​kliem kif jistaʼ jkun sors taʼ qawwa għalina?

¹⁹ Meta nħossuna skuraġġiti, minħabba l-​oppożizzjoni jew minħabba xi ċirkustanzi mhux pjaċevoli oħra, kliem Jehovah lil-​Lhud li rritornaw f’pajjiżhom jistaʼ jkun sors taʼ qawwa. F’Ħaggaj 2:​4-6 naqraw: “‘Imma issa qawwi qalbek, Żerubbabel, oraklu tal-​Mulej, qawwi qalbek, Ġożwè bin Ġeħosadak, il-​qassis il-​kbir; qawwi qalbek, poplu tal-​pajjiż, oraklu tal-​Mulej. Aqbdu aħdmu, għax jiena magħkom, oraklu tal-​Mulej taʼ l-​eżerċti. Il-​kelma li biha ntrabatt magħkom fi ħruġkom mill-​Eġittu, u l-​ispirtu tiegħi, jibqgħu f’nofskom: la tibżgħux!’ Għax hekk jgħid il-​Mulej taʼ l-​eżerċti: ‘Dalwaqt, ftit ieħor biss, u jiena nheżheż is-​smewwiet u l-​baħar u l-​blat.’” Osserva li Jehovah mhux biss iħeġġiġna biex inqawwu qalbna imma jipprovdi wkoll il-​mezz biex niksbu l-​qawwa. Kif? Innota l-​kliem rassiguranti: “Jiena magħkom.” Kemm isaħħilna l-​fidi li nirrealizzaw li minkejja l-​ostakli li niffaċċjaw, Jehovah jkun magħna!—Rumani 8:31.

20. Glorja li qatt ma kien hawn bħalha b’liema mod qegħda issa timla dar Jehovah?

²⁰ Jehovah ċertament li wera li hu mal-​poplu tiegħu. Tabilħaqq, sewwa sew bħalma qal permezz tal-​profeta tiegħu Ħaggaj: “Il-​glorja taʼ l-​aħħar taʼ dan it-​tempju tkun akbar minn taʼ qabel . . . u f’dan il-​post jiena nagħti s-​sliem.” (Ħaggaj 2:9) Verament, l-​akbar glorja llum tinsab fit-​tempju spiritwali taʼ Jehovah. Iva, mijiet t’eluf ġejjin bi ħġarhom lejn il-​qima safja kull sena. Dawn qed jiġu mitmugħin tajjeb spiritwalment, u saħansitra f’din id-​dinja mqallba, igawdu paċi li se tisboqha biss dik li se tiġi esperjenzata fid-​dinja l-​ġdida t’Alla.—Isaija 9:​6, 7; Luqa 12:42.

21. X’għandha tkun id-​determinazzjoni tagħna?

²¹ Jehovah wasal biex jheżżeż lill-​ġnus f’Armageddon. (Apokalissi 16:​14, 16) Ejja, mela, nużaw il-​bqija taż-​żmien li baqaʼ biex ngħinu nsalvaw iktar ħajjiet. Jalla nqawwu qalbna u nafdaw kompletament f’Jehovah. Ħa tkun id-​determinazzjoni tagħna li nibqgħu nqimu fit-​tempju spiritwali kbir tiegħu, waqt li nimlewh b’iktar “ġid” sakemm Jehovah jgħid li xogħolna lest.

[Noti taʼ taħt]

Tiftakar?

• X’inhu iżjed prezzjuż għal Jehovah mill-​affarijiet materjali?

• Liema żewġ gruppi taʼ nies jibbenefikaw mid-​demm li xerred Ġesù?

• X’inhu l-​“ġid” li kellu jimla dar Jehovah bil-​glorja?

• X’evidenza għandna li l-​profezija taʼ Ħaggaj qed titwettaq illum?

[Mistoqsijiet taʼ Studju]

[Dijagramma f’paġna 16]

(Għall-formazzjoni sħiħa tat-​test, ara pubblikazzjoni)

Taf x’inhu s-​sinjifikat simboliku tat-​tempju li Jehovah kellu fil-​qedem?

Il-​Post l-​Iktar Qaddis

Il-​Purtiera

Il-​Post Qaddis

Il-​Portiku

L-​Artal

Il-​Bitħa

[Stampa f’paġna 17]

Il-​qassis il-​kbir kien joffri barri għad-​dnubiet tal-​qassisin u bodbod għad-​dnubiet tat-​tribujiet mhux saċerdotali taʼ Iżrael

[Stampa f’paġna 18]

Ix-​xogħol dinji taʼ ppridkar tas-​Saltna qed jiġbed kotriet kbar lejn dar Jehovah