L-EŻEMPJU TAL-ĠENITURI TIEGĦI

Fl-1957, il-ġenituri tiegħi emigraw mill-Italja għall-Kanada, f’post jismu Kindersley, ġo Saskatchewan. Ftit wara, il-ġenituri tiegħi tgħallmu l-verità u din saret l-iktar ħaġa importanti f’ħajjitna. Bħala tifel, niftakar lili, lil ommi u lil missieri, u lit-tliet ħuti nqattgħu ġranet sħaħ fuq is-service. Allura, biex niċċajta ġieli ngħid li bdejt naqdi bħala “pijunier awżiljarju” taʼ tmien snin!

Il-ġenituri tiegħi ma kellhomx ħafna flus. Minkejja dan, xorta tawna eżempju tajjeb taʼ kif tagħmel sagrifiċċji għax tħobb lil Ġeħova. Pereżempju, fl-1963 huma biegħu ħafna mill-affarijiet li kellhom biex inkunu nistgħu nattendu l-konvenzjoni internazzjonali f’Pasadena, Kalifornja, l-Istati Uniti. Fl-1972 morna ngħixu fi Trail, British Columbia, il-Kanada, belt li kienet madwar 1,000 kilometru ’l bogħod, biex inkunu nistgħu nippritkaw lin-nies li jitkellmu bit-Taljan. Missieri kien jaħdem f’supermarket, fil-manutenzjoni u t-tindif. Għalkemm ġieli offrewlu opportunitajiet biex jaqlaʼ iktar flus, hu ma kienx jaċċetta biex b’hekk ikun jistaʼ jagħmel iktar għal Ġeħova.

Jien vera napprezza l-eżempju li ommi u missieri taw lili u lil ħuti. It-trejning li tawni bħala tifel biex naqdi lil Ġeħova għallimni xi ħaġa li għadha tgħinni sal-ġurnata tal-lum: Jekk inpoġġi s-Saltna l-ewwel, Ġeħova dejjem se jieħu ħsiebi.—Mat. 6:33.

NIBDEW FIS-SERVIZZ FULL-TIME

Fl-1980 iżżewwiġt lil Debbie, oħt ħelwa b’miri spiritwali ċari f’moħħha. Aħna ridna nibdew naqdu fis-servizz full-time. Allura, tliet xhur wara li żżewwiġna, Debbie bdiet taqdi bħala pijuniera. Sena wara, morna naqdu f’kongregazzjoni żgħira li kellha bżonn iktar pubblikaturi, u jien bdejt naqdi bħala pijunier magħha.

 Wara xi żmien, tant konna skuraġġiti li xtaqna nitilqu f’kongregazzjoni oħra. Imma l-ewwel tkellimna mal-indokratur li jżur il-kongregazzjonijiet. Hu kien onest magħna u bi mħabba qalilna: “Intom parti mill-problema. Qed tiffokaw fuq in-negattiv biss tas-sitwazzjoni tagħkom. Jekk tfittxu, żgur se taraw li hemm affarijiet pożittivi.” Dan kien il-parir li kellna bżonn. (Slm. 141:5) Jien u Debbie mill-ewwel ħdimna fuq li qalilna u ma domniex ma bdejna naraw li vera kien hemm affarijiet pożittivi. Ħafna fil-kongregazzjoni riedu jagħmlu iktar għal Ġeħova, inkluż tfal u aħwa nisa li ma kellhomx ir-raġel fil-verità. Din kienet lezzjoni importanti għalina. Tgħallimna li rridu nfittxu l-pożittiv u nafdaw li Ġeħova maż-żmien se jirranġa s-sitwazzjoni. (Mik. 7:7) U hekk ġara. Erġajna konna ferħanin u maż-żmien is-sitwazzjoni marret għall-aħjar.

Fl-ewwel skola tal-pijunieri li attendejna, l-għalliema tagħna kellhom inkarigi f’pajjiżi oħrajn. Meta wrewna r-ritratti u tkellmu dwar l-isfidi u l-barkiet li gawdew, bdejna nixtiequ naqdu bħala missjunarji. Allura, għamilnieha l-mira tagħna.

Biex nilħqu din il-mira, fl-1984 morna noqogħdu fi Quebec, li hi iktar minn 4,000 kilometru ’l bogħod minn British Columbia. Hemmhekk in-nies jitkellmu bil-Franċiż. Allura, kellna nitgħallmu lingwa u kultura ġodda. Sfida oħra kienet li spiss bilkemm kien ikollna biżżejjed flus biex ngħaddu. Kien hemm perijodu li kulma kellna x’nieklu kien patata li bidwi kien iħallina nieħdu mill-għalqa tiegħu. Debbie kienet saret tinqalaʼ tivvinta riċetti tajbin biha! Minkejja l-isfidi, għamilna l-aħjar tagħna biex nibqgħu għaddejjin bil-ferħ u konna ċerti li Ġeħova kien qed jieħu ħsiebna.—Slm. 64:10.

Darba waħda, irċivejna telefonata li ma konniex qed nistennew. Qalulna li ġejna mistidnin naqdu fil-Betel tal-Kanada. Peress li konna applikajna biex immorru l-Iskola taʼ Gilegħad, bejn konna ferħanin u bejn konna mdejqin. Imma aċċettajna li mmorru. Meta wasalna Betel, staqsejna lil Ħuna Kenneth Little, membru tal-Kumitat tal-Fergħa, “X’se nagħmlu jekk jaċċettawna biex immorru Gilegħad?” Hu weġibna, “La naslu għaliha, naraw.”

 Ġimgħa wara, jien u Debbie ġejna mistidnin nattendu Gilegħad. Issa kellna deċiżjoni x’nieħdu. Ħuna Little qalilna: “Tagħżlu x’tagħżlu, se jkun hemm ġranet li se tkunu tixtiequ li għażiltu mod ieħor. M’hemmx għażla aħjar minn oħra, għax Ġeħova jistaʼ jberikhom it-tnejn.” Aħna aċċettajna li mmorru Gilegħad, u matul is-snin rajna li dak li qal Ħuna Little kien veru. Spiss użajna dak li qalilna biex ngħinu lil aħwa oħrajn li kellhom jagħżlu liema inkarigu se jaċċettaw.

IL-ĦAJJA BĦALA MISSJUNARJI

F’April tal-1987 konna vera ferħanin li konna parti mit-83 klassi taʼ Gilegħad, li kien fiha 24 student. Din kienet fi Brooklyn, New York. Ħutna Ulysses Glass u Jack Redford kienu l-għalliema tagħna. F’kemm ili ngħidlek, ħames xhur taru u ggradwajna fis-6 taʼ Settembru 1987. L-inkarigu tagħna kien fil-Haiti ma’ John u Marie Goode.

Kienu ilhom ma jintbagħtu missjunarji minn Gilegħad fil-Haiti mill-1962, meta tkeċċew l-aħħar missjunarji. Tliet ġimgħat wara l-gradwazzjoni konna qegħdin fil-Haiti, f’kongregazzjoni taʼ 35 pubblikatur fil-muntanji. Konna żgħar u bla esperjenza u konna qed ngħixu waħedna f’dar għall-missjunarji. Ħafna min-nies ma kinux jafu jaqraw u kienu foqra ħafna. Meta konna ngħixu hemmhekk, kien hemm ħafna uragani, protesti, vjolenza minħabba l-politika, u nies li pprovaw iwaqqgħu l-gvern.

Mill-aħwa fil-Haiti aħna tgħallimna li għalkemm ma kellhomx ħajja faċli, xorta kienu ferħanin u kienu jħobbu lil Ġeħova u s-service. Oħt kbira fl-età  li ma kinitx taf taqra, tgħallmet bl-amment 150 skrittura. Minħabba l-problemi li kien hemm fil-pajjiż, konna rridu nagħmlu dak kollu li nistgħu biex ngħidulhom li s-Saltna t’Alla biss tistaʼ ssolvi l-problemi tagħna. Aħna vera nifirħu meta naraw li wħud li studjajna l-Bibbja magħhom qed jaqdu bħala pijunieri regulari, pijunieri speċjali, jew anzjani.

Meta kont il-Haiti, iltqajt ma’ Trevor, żagħżugħ li kien missjunarju tal-Mormons u li miegħu kont nitkellem dwar il-Bibbja diversi drabi. Snin wara rċivejt ittra mingħandu. Fiha qalli: “Jien se nitgħammed fl-assemblea li jmiss. Irrid nerġaʼ niġi l-Haiti u naqdi bħala pijunier speċjali fejn kont qdejt bħala Mormon.” Għal snin sħaħ, flimkien ma’ martu, hekk għamel.

L-EWROPA MBAGĦAD L-AFRIKA

Ġejna inkarigati mmorru f’pajjiż fl-Ewropa fejn ix-xogħol tal-ippritkar kien qed isir iktar faċli. Fl-1992 wasalna Ljubljana, is-Slovenja, viċin fejn kienu joqogħdu l-ġenituri tiegħi qabel marru l-Italja. Dak iż-żmien, il-gwerra f’dik li kienet tissejjaħ Jugoslavja kienet għadha għaddejja. Il-fergħa fi Vjenna, l-Awstrija, kif ukoll l-uffiċċji f’Żagreb, il-Kroazja, u f’Belgrad, is-Serbja, kienu qed jieħdu ħsieb ix-xogħol tal-ippritkar f’dawk l-inħawi. Imma issa kull pajjiż kien se jkollu l-Betel tiegħu.

Dan kien ifisser li kellna nadattaw għal kultura oħra u nitgħallmu lingwa differenti. Taʼ interess, in-nies tas-Slovenja kienu jgħidu li l-lingwa kienet diffiċli, u vera! Konna nammiraw kemm l-aħwa kienu leali. Dejjem kienu lesti li jaċċettaw kull bidla li għamlet l-organizzazzjoni u stajna naraw kif Ġeħova berikhom. Għal darb’oħra stajna naraw kif Ġeħova dejjem jirranġa l-affarijiet fil-ħin u fil-waqt. Kemm domna s-Slovenja tgħallimna ħafna lezzjonijiet, u ħafna minn dak li konna tgħallimna qabel għenna nissaportu l-isfidi li ffaċċjajna.

Imma kien hemm bidliet oħra ġejjin għalina. Fis-sena 2000 ġejna inkarigati biex immorru l-Kosta tal-Avorju, fl-Afrika. Imbagħad, f’Novembru tal-2002, minħabba gwerra fil-pajjiż, kellna mmorru fi Sierra Leone. Hawn kienet għadha kemm spiċċat gwerra li kienet ilha għaddejja 11-il sena. Ma kienx  faċli biex nitilqu mill-Kosta tal-Avorju f’daqqa waħda. Però, dak li konna tgħallimna matul is-snin għenna nibqgħu ferħanin.

Fit-territorju kien hemm ħafna nies li xtaqu jitgħallmu l-verità. Allura, jien u Debbie ffokajna fuqhom u fuq l-aħwa li kienu ssaportew il-gwerra għal diversi snin. Huma kienu foqra, imma xorta xtaqu jaqsmu dak li kellhom. Darba waħda, oħt offriet lil Debbie xi ħwejjeġ. Debbie għall-ewwel bdiet tiddejjaq tiħodhom. Imma l-oħt qaltilha: “Matul il-gwerra, aħwa minn pajjiżi oħra għenuna. Issa jmiss lilna ngħinu.” Vera xtaqna nimitaw l-eżempju tagħhom!

Maż-żmien reġaʼ kellna ċ-ċans li mmorru l-Kosta tal-Avorju. Imma għal darb’oħra, minħabba problemi politiċi fil-pajjiż, kien hemm ħafna vjolenza u allura kellna nitilqu. F’Novembru 2004 kellna nitilqu b’ħelikopter u kulma stajna nieħdu kien basket wieħed taʼ 10 kilogrammi. Dakinhar, kellna norqdu mal-art f’bażi militari Franċiża, u l-għada bagħtuna l-Isvizzera. Meta wasalna l-fergħa, madwar nofsillejl, il-Kumitat tal-Fergħa u l-għalliema tal-Iskola tat-Taħriġ Ministerjali flimkien man-nisa tagħhom laqgħuna bi mħabba kbira. Huma għannquna, tawna ikla sħuna, u tawna ħafna ċikkulata. Vera ħassejna li jħobbuna!

Għal ftit żmien, ġejna mitlubin biex immorru l-Ghana. Imbagħad, meta l-gwerra fil-Kosta tal-Avorju kkalmat, reġgħu bagħtuna hemm. Il-qalb tajba tal-aħwa għenitna nissaportu sitwazzjonijiet stressanti, bħal meta kellna naħarbu u anki meta rċivejna inkarigi temporanji. Jien u Debbie konna għedna li għalkemm fl-organizzazzjoni taʼ Ġeħova l-aħwa dejjem iħobbu lil xulxin, xorta waħda għandna napprezzawha din l-imħabba. Maż-żmien irrealizzajna li anki dawk iż-żminijiet diffiċli għallmuna lezzjonijiet importanti.

FIL-LVANT NOFSANI

Fl-2006, ittra mill-kwartieri ġenerali qaltilna li għandna inkarigu ġdid fil-Lvant Nofsani. Għal darb’oħra, dan kien ifisser li kien se jkollna avventuri u sfidi ġodda, kif ukoll kellna nitgħallmu lingwi u kulturi ġodda. F’dan it-territorju mimli problemi kbar minħabba l-politika u r-reliġjon, tgħallimna ħafna. Il-varjetà taʼ lingwi li kien hemm fil-kongregazzjonijiet kienet togħġobna ħafna. Ukoll, rajna li dejjem nistgħu nkunu magħqudin jekk insegwu d-direzzjoni mill-organizzazzjoni taʼ Ġeħova. Ħafna mill-aħwa kienu wrew kuraġġ u ssaportew persekuzzjoni kbira minn membri tal-familja, tal-iskola, nies li jaħdmu magħhom, u anki ġirien, allura konna nammirawhom ħafna.

Fl-2012 attendejna konvenzjoni speċjali f’Tel Aviv, Iżrael. Minn Pentekoste tas-sena 33, din kienet l-ewwel darba li n-nies taʼ Ġeħova kellhom laqgħa kbira hemmhekk. Kienet okkażjoni li qatt ma se ninsewha!

F’dawk is-snin bagħtuna nżuru pajjiż fejn ix-xogħol tagħna kien ristrett. Konna ħadna xi letteratura, ħadna sehem fl-ippritkar, u anki morna assembleat żgħar. Kien ikollna ngħaddu minn ħdejn suldati armati biex jiċċekkjawna, imma qatt ma ħassejna li konna fil-periklu għax dejjem konna noqogħdu attenti u konna nkunu mal-aħwa.

 LURA FL-AFRIKA

Fl-2013 irċivejna inkarigu differenti ħafna. Dan kien biex naqdu fil-fergħa taʼ Kinshasa, il-Kongo. Dan hu pajjiż kbir u sabiħ, imma għandu ħafna faqar u għadda minn ħafna gwerer. Għall-ewwel għedna, “Aħna diġà nafu x’jiġifieri tgħix l-Afrika, allura se nidraw il-Kongo.” Imma xħin konna hemm indunajna li kien fadlilna ħafna x’nitgħallmu. Xi ħaġa li sibna diffiċli ħafna kienet li nivvjaġġaw lejn postijiet li ma kellhomx toroq. Imma sibna ħafna affarijiet pożittivi u pprovajna niffokaw fuqhom. Pereżempju, rajna kif l-aħwa ssaportew u baqgħu ferħanin avolja kellhom problemi taʼ flus. Rajna kemm kienu jħobbu s-service u l-isforz li kienu jagħmlu biex imorru l-laqgħat u l-assembleat. Aħna rajna kif iktar nies bdew jitgħallmu l-verità grazzi għall-għajnuna u l-barka taʼ Ġeħova. Matul is-snin li għamilna hemm tgħallimna ħafna u għamilna ħbieb li llum inqisuhom qishom tal-familja.

Fl-aħħar tal-2017 kellna inkarigu ieħor, din id-darba fl-Afrika t’Isfel. Din hi l-akbar fergħa li qatt qdejna fiha, u f’Betel irċivejna xogħol li qatt ma konna għamilnieh qabel. Għal darb’oħra kellna ħafna x’nitgħallmu, imma dak li konna tgħallimna fil-passat għenna ħafna. Aħna sirna nħobbuhom ħafna lill-aħwa li għal snin sħaħ qdew lil Ġeħova b’lealtà. U kemm hi xi ħaġa tal-għaġeb li tara l-familja taʼ Betel magħquda minkejja li l-aħwa jiġu minn backgrounds u kulturi differenti! Nistgħu naraw ċar kif Ġeħova qed ibierek lin-nies tiegħu bil-paċi, għax huma libsu l-personalità l-ġdida u japplikaw il-prinċipji tal-Bibbja f’ħajjithom.

Matul is-snin, jien u Debbie kellna ħafna inkarigi eċċitanti. Tgħallimna lingwi ġodda u kellna nadattaw għal kulturi differenti. Mhux dejjem kien faċli, imma dejjem ħassejna l-imħabba u l-lealtà taʼ Ġeħova permezz tal-aħwa u l-organizzazzjoni tiegħu. (Slm. 144:2) Aħna konvinti li t-trejning li ħadna għax qdejna fis-servizz full-time għamilna qaddejja aħjar taʼ Ġeħova.

Jien vera ngħożż il-mod kif rabbewni l-ġenituri tiegħi, is-sapport li tatni l-għażiża marti, Debbie, u l-eżempju tal-għaġeb li tgħallimt mill-aħwa madwar id-dinja. Aħna determinati li nibqgħu nitgħallmu mil-lezzjonijiet li se jgħallimna l-Istruttur Grandjuż fil-futur.