1. X’hemm bżonn nagħmlu biex inkunu vera ferħanin, u għala? (Isaija 48:​17, 18)

 MISSIERNA tas-sema jħobbna ħafna u jixtieq li kemm issa u anki fil-futur, ikollna ħajja sabiħa. (Ekk. 3:​12, 13) Hu ta lil kulħadd kapaċitajiet differenti biex nagħmlu affarijiet sbieħ, imma ma ħalaqniex bl-abbiltà li niddeċiedu aħna x’inhu tajjeb u ħażin jew biex immexxu lilna nfusna. (Ekk. 8:9; Ġer. 10:23) Hu jaf li biex inkunu vera ferħanin irridu naqduh u nobduh.—Aqra Isaija 48:​17, 18.

2. Satana x’jixtieqna nemmnu, u Ġeħova x’għamel?

² Satana jridna nemmnu li aħna m’għandniex bżonn lil Ġeħova biex inkunu ferħanin jew li aħna kapaċi mmexxu lilna nfusna. (Ġen. 3:​4, 5) Biex juri li Satana hu giddieb, Ġeħova qed iħalli lin-nies imexxu għal xi żmien. Imma llum, nistgħu naraw ċar li n-nies mhux kapaċi jmexxu. Però, il-Bibbja ssemmi ħafna nies li kienu ferħanin għax qdew lil Ġeħova. L-aqwa eżempju hu Ġesù Kristu. F’dan l-artiklu l-ewwel se nitgħallmu għala Ġesù għażel li jaqdi lil Ġeħova, it-tieni, għala Ġeħova jixraqlu li naqduh, u t-tielet, se naraw xi raġunijiet għala aħna għażilna li naqdu lil Ġeħova.

GĦALA ĠESÙ GĦAŻEL LI JAQDI LIL ĠEĦOVA

3. Satana x’offrielu lil Ġesù, u Ġesù x’għażel li jagħmel?

³ Meta kien fid-dinja, Ġesù kellu jagħżel lil min se jaqdi. Ftit wara li tgħammed, Satana qallu li jekk jagħtih qima darba waħda biss, kien se jagħtih is-saltniet kollha fid-dinja. Imma Ġesù qallu: “Itlaq ’l hemm Satana! Għax  fl-Iskrittura hemm miktub: ‘Lil Ġeħova l-Alla tiegħek għandek tqim, u lilu biss għandek taqdi.’” (Mat. 4:​8-10) Ġesù għala għamel dik l-għażla? Ejja naraw xi raġunijiet.

4-5. X’inhuma xi raġunijiet għala Ġesù għażel li jaqdi lil Ġeħova?

⁴ L-iktar raġuni importanti għala Ġesù għażel li jaqdi lil Ġeħova hi għax għandu mħabba kbira għal Missieru. (Ġw. 14:31) Barra minn hekk, hu għażel li jaqdih għax kien jaf li dik hi l-ħaġa t-tajba li għandu jagħmel. (Ġw. 8:​28, 29; Riv. 4:11) Hu kien jaf li Ġeħova tana l-ħajja, li nistgħu nafdawh, u li jagħtina ħafna affarijiet biex inkunu ferħanin. (Slm. 33:4; 36:9; Ġak. 1:17) Ġeħova dejjem kien jgħidlu l-verità lil Ġesù u tah dak kollu li għandu. (Ġw. 1:14) Imma Satana hu kompletament differenti minn Ġeħova. Pereżempju, hu kien il-wieħed li ġiegħel lin-nies jidinbu, u b’hekk, imutu. Hu giddieb u egoist. (Ġw. 8:44) Peress li Ġesù kien jaf lil Ġeħova u lil Satana sew, qatt m’għaddielu minn moħħu li jimita lil Satana u jiħodha kontra Ġeħova.—Flp. 2:​5-8.

⁵ Raġuni oħra għala Ġesù għażel li jaqdi lil Ġeħova hi għax hu kien jaf li b’dik l-għażla kienu se jiġru ħafna affarijiet tajbin. (Lhud 12:2) Pereżempju, kien jaf li jekk jibqaʼ leali kien se jqaddes l-isem taʼ Missieru, jiġifieri juri li dak li qal Satana dwaru kien gidba, u kien jaf li se jagħmilha possibbli li d-dnub u l-mewt jispiċċaw għal dejjem.

GĦALA ĠEĦOVA JIXRAQLU LI NAQDUH

6-7. Illum, għala hemm ħafna nies li ma jqimux lil Ġeħova, imma għala kulħadd għandu jqim lilu?

⁶ Illum, ħafna ma jaqdux lil Ġeħova għax għadhom ma tgħallmux dwar il-kwalitajiet sbieħ tiegħu u ma jafux kemm għamel għalihom. Dan hu simili għal dawk li Pawlu ppritkalhom f’Ateni. Huma wkoll ma kinux jafuh lil Alla.—Atti 17:​19, 20, 30, 34.

⁷ L-appostlu Pawlu spjega lin-nies f’Ateni li l-Alla l-veru “jagħti lil kulħadd il-ħajja, in-nifs, u kull ħaġa oħra.” Hu qal ukoll: “Bis-saħħa tiegħu, aħna ngħixu, niċċaqalqu, u neżistu.” Bħala l-Ħallieq, “minn raġel wieħed Alla għamel il-popli kollha.” Allura, hu l-uniku Wieħed li aħna għandna nqimu.—Atti 17:​25, 26, 28.

8. Ġeħova x’qatt mhu se jġegħelna nagħmlu? Spjega.

⁸ Peress li Ġeħova hu l-Ħallieq u s-Sid tal-univers, jistaʼ jagħmel dak kollu li jrid. Allura, kieku jrid, jistaʼ jġiegħel lin-nies iqimuh bilfors. Imma hu qatt mhu se jagħmel hekk. Minflok, hu tana ħafna provi li vera jeżisti u li jħobb ħafna lil kull wieħed u waħda minna. Hu jixtieq lil kemm jistaʼ jkun nies ikunu ħbieb tiegħu għal dejjem. (1 Tim. 2:​3, 4) B’hekk, Ġeħova jittrennjana biex ngħallmu lil oħrajn dwar l-affarijiet sbieħ li se jagħmel fil-futur għan-nies u kif se jagħmel dan. (Mat. 10:​11-13; 28:​19, 20) U hu organizzana f’kongregazzjonijiet biex inkunu nistgħu nqimuh, u tana l-anzjani biex jgħinuna.—Atti 20:28.

9. Ġeħova kif juri li jħobb lin-nies kollha?

⁹ Ġeħova juri kemm iħobb lin-nies billi jagħti affarijiet tajbin anki lil dawk li ma jemmnux li jeżisti. Aħseb dwar dan: Għal eluf taʼ snin, ħafna nies għażlu huma x’inhu tajjeb u x’inhu ħażin, minflok m’obdew lil Ġeħova. Imma Ġeħova  b’qalb tajba xorta tahom dak li kellhom bżonn biex jgħixu u biex jieħdu pjaċir bil-ħajja. (Mat. 5:​44, 45; Atti 14:​16, 17) Pereżempju, hu tahom il-kapaċità li jkollhom il-ħbieb, jibnu familja, ikollhom it-tfal, jaħdmu, u jgawdu affarijiet sbieħ fil-ħajja. (Slm. 127:3; Ekk. 2:24) Dan juri li Missierna tas-sema jħobb ħafna lin-nies kollha. (Eżo. 34:6) Issa, ejja naraw xi raġunijiet li ħa jgħinuna niftakru għala għażilna li naqdu lil Ġeħova u kif hu jberikna talli nagħmlu hekk.

GĦALA NAGĦŻLU LI NAQDU LIL ĠEĦOVA

10. (a) X’inhi l-iktar raġuni importanti għala naqdu lil Ġeħova? (Mattew 22:37) (b) Int kif ibbenefikajt peress li Ġeħova ħafirlek u wera paċenzja miegħek? (Salm 103:​13, 14)

¹⁰ Bħal Ġesù, l-iktar raġuni importanti għala naqdu lil Ġeħova hi għax inħobbuh ħafna. (Aqra Mattew 22:37.) Meta nitgħallmu iktar dwar il-kwalitajiet tiegħu, aħna nkunu rridu nersqu eqreb lejh. Pereżempju, aħseb dwar kemm hu lest li jaħfrilna. Meta l-Iżraelin irribellaw kontrih, hu talabhom: “Duru lura, jekk jogħġobkom, kull wieħed minnkom minn triqtu l-ħażina.” (Ġer. 18:11) Ġeħova jaf li aħna imperfetti u jiftakar li aħna trab. (Aqra Salm 103:​13, 14.) Meta timmedita dwar kemm-il darba Ġeħova ħafirlek jew wera paċenzja miegħek, ma tħossokx li trid taqdih għal dejjem?

11. X’inhuma xi raġunijiet oħra għala nagħżlu li naqdu lil Missierna tas-sema?

¹¹ Raġuni oħra għala naqdu lil Ġeħova hi għax nafu li hi l-ħaġa t-tajba. (Mat. 4:10) Barra minn hekk, nafu li jekk nibqgħu leali lejn Ġeħova se jiġru ħafna affarijiet tajbin. Pereżempju, jekk nibqgħu leali lejh, aħna se nnaddfu lil ismu, nuru li Satana hu giddieb, u nagħmlu lil Ġeħova ferħan ħafna. U jekk nagħżlu li nibdew naqdu lil Ġeħova, għandna ċ-ċans li naqduh għal dejjem!—Ġw. 17:3.

12-13. X’titgħallem mill-esperjenza taʼ Jane u Pam?

¹² Aħna nistgħu nibdew inkabbru l-imħabba tagħna għal Ġeħova minn meta nkunu għadna żgħar ħafna u nkomplu nsaħħuha hekk kif nikbru. Dan ġara lil żewġ aħwa jisimhom Jane u Pam. a Meta bdew jistudjaw il-Bibbja, Jane kellha 11-il sena u Pam 10 snin. Ommhom u missierhom ma kinux interessati fil-verità, imma ħallew lit-tfal tagħhom jistudjaw max-Xhieda taʼ Ġeħova bil-kundizzjoni li fil-weekend imorru l-knisja magħhom. Jane tgħid: “Dak li x-Xhieda għallmuni mill-Bibbja għenni biex ma nċedix għat-tentazzjonijiet mingħand sħabi tal-iskola, bħal li nieħu d-drogi jew nagħmel l-immoralità sesswali.”

¹³ Meta t-tfajliet kibru, bdew jaqdu bħala pubblikaturi. Imbagħad maż-żmien saru pijunieri regulari, u fl-istess ħin, kienu jieħdu ħsieb lill-ġenituri tagħhom li kienu qegħdin jikbru. Meta taħseb dwar il-ħajja tagħha, Jane tgħid: “Jien tgħallimt li Ġeħova dejjem jieħu ħsieb lill-ħbieb tiegħu, u bħalma jgħid it-​2 Timotju 2:​19, ‘Ġeħova jaf lil dawk li huma tiegħu.’” Bla dubju, Ġeħova dejjem jieħu ħsieb lil dawk li jagħżlu li jaqduh u jħobbuh!

14. Kif nistgħu niddefendu lil Ġeħova b’dak li ngħidu u nagħmlu? (Ara wkoll l-istampi.)

¹⁴ Aħna nixtiequ nagħmlu kulma nistgħu  biex innaddfu l-isem t’Alla mill-gideb kollu li qalu dwaru. Aħseb dwar dan l-eżempju: Immaġina li għandek ħabib tal-qalb li hu qalbu tajba, ġeneruż, u jaħfer ħafna. Imma darba tismaʼ lil xi ħadd jgħid li sieħbek mhux vera qalbu tajba u mhuwiex onest. X’tagħmel? Żgur li tiddefendih. Bl-istess mod, meta Satana u oħrajn jgħidu l-gideb dwar Ġeħova, aħna nagħmlu kulma nistgħu biex niddefenduh billi ngħidu l-verità dwaru. (Slm. 34:1; Isa. 43:10) B’dak li ngħidu u anki b’dak li nagħmlu, aħna nuru li nagħżlu li nħobbu u li rridu naqdu lil Ġeħova.

15. L-appostlu Pawlu x’affarijiet gawda wara li għamel bidliet kbar f’ħajtu? (Filippin 3:​7, 8)

¹⁵ Biex naqdu lil Ġeħova kif jixtieq hu jew nagħmlu iktar għalih, aħna lesti li nagħmlu l-bidliet f’ħajjitna. Pereżempju, l-appostlu Pawlu kellu pożizzjoni importanti fir-reliġjon Lhudija imma hu ddeċieda li ma jibqax f’dik ir-reliġjon biex isir dixxiplu taʼ Kristu u jaqdi lil Ġeħova. (Gal. 1:14) B’hekk, hu kellu ħajja sodisfaċenti u mimlija ferħ, u rċieva r-rigal li jmexxi maʼ Kristu fis-sema. Hu qatt ma ddispjaċieh li għażel li jaqdi lil Ġeħova u jekk aħna nagħmlu l-istess għażla, żgur li mhux se jiddispjaċina.—Aqra Filippin 3:​7, 8.

16. X’nistgħu nitgħallmu mill-esperjenza taʼ Julia? (Ara wkoll l-istampi.)

¹⁶ Jekk li naqdu lil Ġeħova jkun l-iktar ħaġa importanti f’ħajjitna, żgur se jkollna ħajja sodisfaċenti u ferħana, kemm issa u fil-futur. Aħseb dwar l-esperjenza taʼ Julia. Minn meta kienet tifla, qabel tgħallmet il-verità, hi kienet tkanta  fil-knisja. Tant kienet tkanta sabiħ li bdew jittrennjawha biex issir kantanta professjonali tal-opri. Julia ma damitx ma saret popolari u bdiet tkanta l-opri f’postijiet famużi ħafna. Meta kienet qed tieħu kors tal-mużika fi skola famuża, xi ħadd fil-klassi tagħha qalilha li Alla jismu Ġeħova. Ftit żmien wara dan, Julia bdiet tistudja l-Bibbja darbtejn fil-ġimgħa. Maż-żmien, hi ddeċidiet li tuża l-ħin u l-enerġija tagħha biex taqdi lil Ġeħova minflok ma jkollha karriera fil-mużika. Imma din ma kinitx deċiżjoni faċli. Hi tgħid: “Ħafna nies qaluli li kont qed naħli ħajti għax ma kontx qed nuża t-talent tiegħi. Imma jien ridt nuża ħajti biex naqdi lil Ġeħova bl-aħjar mod.” Hi kif tħossha dwar dik id-deċiżjoni li ħadet iktar minn 30 sena ilu? Julia tkompli tgħid: “Jien ferħana ħafna li għażilt li naqdi lil Ġeħova, u naf li fil-futur hu ħa jaqtaʼ x-xewqat kollha tiegħi.”—Slm. 145:16.

KOMPLI AQDI LIL ĠEĦOVA

17. Li nafu li qegħdin vera viċin it-tmiem, kif għandu jeffettwa lil dawk li ma jaqdux lil Alla u lil dawk li jaqduh?

¹⁷ Aħna qed ngħixu vera viċin tat-tmiem ta’ din is-sistema. Fil-fatt, l-appostlu Pawlu qal: “‘Ftit ieħor’ u ‘jasal il-wieħed li ġej u mhux se jkun tard.’” (Lhud 10:37) Imma dan x’għandu x’jaqsam  miegħek? L-ewwel, m’għadx baqaʼ ħafna żmien biex in-nies jiddeċiedu jekk iridux jaqdu lil Ġeħova jew le. (1 Kor. 7:29) U t-tieni, jekk inti diġà għażilt li taqdi lil Alla, tistaʼ tkun ċert li avolja se jkollok tissaporti l-provi, se jkun għal “ftit ieħor” biss.

18. Ġesù u Ġeħova x’jinkuraġġuna nagħmlu?

¹⁸ Ġesù inkuraġġixxa lin-nies biex isiru d-dixxipli tiegħu u mbagħad ikomplu mexjin warajh. (Mat. 16:24) Allura, jekk ilek taqdi lil Ġeħova għal ħafna snin, kun determinat li tibqaʼ taqdih. Hemm bżonn naħdmu iebes biex inżommu mad-deċiżjoni li ħadna u jistaʼ ma jkunx daqshekk faċli. Imma aħseb ftit kemm diġà bierkek Ġeħova u immaġina kemm ħa jbierkek iktar fil-futur!—Slm. 35:27.

19. X’nitgħallmu mill-esperjenza taʼ John?

¹⁹ Xi wħud iħossu li biex taqdi lil Ġeħova trid tagħmel wisq sagrifiċċji. Jekk għadek żgħir, ġieli tħoss li jekk taqdi lil Ġeħova jaf ikollok ħajja mhux sabiħa? Ħu jismu John jgħid: “Jien ħassejt li minħabba li jien Xhud taʼ Ġeħova, kien hemm ħafna affarijiet li ma stajtx nagħmilhom. Meta kont nara lil dawk tampari jieħdu gost imorru l-parties, joħorġu man-nisa, u jilagħbu logħob vjolenti, waqt li jien kont inqattaʼ ħafna mill-ħin il-laqgħat u s-service, kont naħseb li għandhom ħajja ħafna isbaħ minn tiegħi.” Dawn il-ħsibijiet kif effettwawh lil John? Hu jgħid: “Jien bdejt ngħix ħajja doppja għax bdejt nagħmel xi affarijiet ħżiena li sħabi kienu jagħmlu, u għal xi żmien kont qed nieħu pjaċir. Imma, fil-verità, ma kontx ferħan. Imbagħad, bdejt naħseb dwar kemm tkun aħjar il-ħajja meta tobdi dak li jgħid Ġeħova u ddeċidejt li naqdih b’qalbi kollha. Minn dakinhar ’il hawn, inħoss li Ġeħova wieġeb it-talb kollu tiegħi.”

20. X’għandna nkunu determinati li nagħmlu?

²⁰ Wieħed mis-salmisti kanta lil Ġeħova: “Ferħan ikun dak li int tagħżlu u tistiednu jersaq lejk biex joqgħod fil-btieħi tat-tempju tiegħek.” (Slm. 65:4) Jalla nkunu determinati li nkomplu naqdu lil Ġeħova bħal Ġożwè meta qal: “Ngħid għalija u għan-nies taʼ dari, aħna se naqdu lil Ġeħova.”—Ġoż. 24:15.