1. Kif tħossok meta taħseb dwar l-​imħabba t’Alla?

L-​APPOSTLU Ġwanni kiteb, “Alla hu mħabba.” (1 Ġw. 4:8) Aħna nafu li Alla tana l-​ħajja imma dan il-​kliem jgħinna niftakru wkoll li l-​imħabba ġejja mingħandu. Ġeħova jħobbna! L-​imħabba tiegħu tgħinna nħossuna protetti, ferħanin, u sodisfatti.

2. Skont Mattew 22:37-​40, liema huma l-​ikbar żewġ kmandamenti, u għala xi kultant ikun diffiċli biex nobdu t-​tieni wieħed?

² Il-​Kristjani ma jistgħux jagħżlu jekk jurux l-​imħabba jew le, għax dan hu kmand. (Aqra Mattew 22:37-​40.) Meta nkunu nafu sew lil Ġeħova, se jkun faċli biex nobdu l-​ewwel kmandament għax hu perfett. Hu jieħu ħsiebna u ħanin magħna. Imma jaf ma jkunx faċli biex nobdu t-​tieni kmandament. Għala? Għax ħutna fil-​kongregazzjoni, li wkoll jagħmlu parti mill-​proxxmu li ssemmi l-​Bibbja, huma imperfetti. Għalhekk, xi kultant jistgħu jweġġgħuna. Ġeħova kien jaf li jistaʼ jkun diffiċli li nobdu dan il-​kmand. Allura hu uża xi nies li kitbu l-​Bibbja biex jgħallmuna għala għandna nuru l-​imħabba lejn xulxin u kif nagħmlu dan. Wieħed minn dawn il-​kittieba kien Ġwanni.—1 Ġw. 3:11, 12.

3. Ġwanni x’enfasizza?

³ Fil-​kotba li kiteb Ġwanni, hu enfasizza li l-​Kristjani għandhom juru l-​imħabba. Fil-​ktieb taʼ Ġwanni, li fih ir-​rakkont tal-​ħajja taʼ Ġesù, hu uża l-​kliem “imħabba” u “maħbubin” iktar minn Mattew, Marku, u Luqa. Meta  kiteb il-​ktieb u t-​tliet ittri tiegħu, Ġwanni kellu madwar mitt sena. Dawn il-​kotba tal-​Bibbja jgħallmuna li dak kollu li nagħmlu jrid ikun immotivat mill-​imħabba. (1 Ġw. 4:10, 11) Però, Ġwanni ħa ż-​żmien biex jitgħallem dan.

4. Ġwanni dejjem wera l-​imħabba?

⁴ Meta Ġwanni kien għadu żagħżugħ mhux dejjem wera l-​imħabba. Pereżempju, darba waħda, Ġesù u d-​dixxipli tiegħu għaddew mis-​Samarija biex imorru Ġerusalemm. In-​nies taʼ raħal żgħir fis-​Samarija ma wrewx ospitalità magħhom. Ġwanni x’għamel? Hu u ħuh, Ġakbu, staqsew lil Ġesù jekk setgħux jitolbu biex jinżel nar mis-​sema u jeqred lil dawk kollha li kienu jgħixu f’dak ir-​raħal! (Lq. 9:52-​56) Darba oħra, Ġwanni ma weriex imħabba mal-​appostli l-​oħrajn. Milli jidher, hu u ħuh talbu lil ommhom biex tgħid lil Ġesù ħalli jagħtihom post importanti fis-​Saltna. Meta l-​appostli l-​oħra saru jafu x’għamlu Ġwanni u Ġakbu, irrabjaw ħafna! (Mt. 20:20, 21, 24) Imma minkejja li Ġwanni għamel dawn l-​iżbalji kollha, Ġesù kien iħobbu.—Ġw. 21:7.

5. X’se neżaminaw f’dan l-​artiklu?

⁵ F’dan l-​artiklu se neżaminaw l-​eżempju taʼ Ġwanni u xi affarijiet li hu kiteb dwar l-​imħabba. Hekk kif nagħmlu dan, se nitgħallmu kif nuru l-​imħabba maʼ ħutna. Se nitgħallmu wkoll kif kap tal-​familja jistaʼ juri li jħobb lill-​familja tiegħu.

6. Ġeħova x’għamel biex jurina li jħobbna?

⁶ Forsi naħsbu li meta nħobbu lil xi ħadd, hu biżżejjed li ngħidulu. Imma jekk veru nħobbuh, irridu nuruh dan bl-​azzjonijiet tagħna. (Qabbel Ġakbu 2:17, 26.) Pereżempju, Ġeħova jħobbna. (1 Ġw. 4:19) U hu jgħidilna li jħobbna permezz tal-​kliem sabiħ li nsibu fil-​Bibbja. (Salm 25:10; Rum. 8:38, 39) Imma aħna nafu li Alla jħobbna mhux biss b’dak li jgħidilna, imma wkoll b’dak li jagħmel għalina. Ġwanni kiteb: “B’dan intweriet l-​imħabba t’Alla għalina, għax Alla bagħat lill-​Iben uniġenitu tiegħu fid-​dinja biex niksbu l-​ħajja permezz tiegħu.” (1 Ġw. 4:9) Ġeħova ppermetta lil Ibnu l-​maħbub ibati u jmut għalina. (Ġw. 3:16) Għalhekk, aħna ċerti li Ġeħova jħobbna.

7. Ġesù x’għamel biex juri li jħobbna?

⁷ Ġesù qal lid-​dixxipli tiegħu li  jħobbhom. (Ġw. 13:1; 15:15) Hu wera kemm iħobb lilhom u lilna mhux biss b’dak li qal, imma wkoll b’dak li għamel. Ġesù qal: “Ħadd m’għandu mħabba akbar minn din, li xi ħadd jagħti ruħu għal ħbiebu.” (Ġw. 15:13) Meta naħsbu dwar dak li Ġeħova u Ġesù għamlu għalina, x’se nkunu rridu nagħmlu?

8. Skont l-​1 Ġwanni 3:18, x’għandna nagħmlu?

⁸ Aħna nuru li nħobbu lil Ġeħova u lil Ġesù billi nobduhom. (Ġw. 14:15; 1 Ġw. 5:3) U Ġesù kmandana biex inħobbu lil xulxin. (Ġw. 13:34, 35) Aħna għandna ngħidu lil ħutna li nħobbuhom, imma rridu wkoll nagħtu prova taʼ dan b’dak li nagħmlu. (Aqra l-​1 Ġwanni 3:18.) X’inhuma xi affarijiet li nistgħu nagħmlu biex nuru li nħobbuhom?

9. L-​imħabba x’ġegħlitu jagħmel lil Ġwanni?

⁹ Kieku ried, Ġwanni setaʼ baqaʼ fin-​negozju tas-​sajd maʼ missieru u b’hekk kien jaqlaʼ l-​flus. Imma minflok, hu uża ħajtu biex jgħin lil oħrajn jitgħallmu dwar Ġeħova u Ġesù. Il-​ħajja li għażel Ġwanni ma kinitx faċli. Hu ġie ppersegwitat, u madwar is-​sena 96 wara Kristu (WK) meta kien xjaħ ġie mitfugħ il-​ħabs. (Atti 3:1; 4:1-​3; 5:18; Riv. 1:9) Però, waqt li hu kien qiegħed fil-​ħabs minħabba li pprietka dwar Ġesù, hu xorta wera li kien jaħseb f’oħrajn. Pereżempju, meta kien fuq il-​gżira taʼ Patmos, hu kiteb il-​ktieb taʼ Rivelazzjoni u bagħtu lill-​kongregazzjonijiet biex ikunu jafu “dak li jrid iseħħ dalwaqt.” (Riv. 1:1) Imbagħad, wara li kien meħlus minn Patmos, Ġwanni kiteb ir-​rakkont tal-​ħajja u l-​ministeru taʼ Ġesù. Hu kiteb ukoll tliet ittri biex jinkuraġġixxi u jsaħħaħ lill-​aħwa. Kif tistaʼ timita s-​sagrifiċċji li għamel Ġwanni fil-​ħajja tiegħu?

10. Kif tistaʼ turi li tħobb lin-​nies?

¹⁰ B’dak li tagħmel fil-​ħajja tiegħek tistaʼ turi li tħobb lin-​nies. Id-​dinja taʼ Satana tridek taħseb fik innifsek, tagħmel il-​flus, jew issir famuż. Imma, Kristjani minn madwar id-​dinja kollha jqattgħu kemm jistaʼ jkun ħin jippritkaw l-​aħbar tajba u jgħinu lin-​nies biex jersqu qrib Ġeħova. Xi wħud jagħmlu dan ix-​xogħol full-​time.

11. Ħafna aħwa kif juru li jħobbu lil Ġeħova u lil ħuthom?

¹¹ Ħafna Kristjani jkollhom jaħdmu full-​time biex imantnu lilhom infushom u l-​familja tagħhom. Imma dawn il-​pubblikaturi leali xorta jappoġġjaw l-​organizzazzjoni t’Alla kif jistgħu. Pereżempju, xi wħud jgħinu meta jkun hemm diżastru, oħrajn jaħdmu fuq proġetti tal-​kostruzzjoni, u kulħadd għandu l-​opportunità li jagħti donazzjoni għax-​xogħol taʼ madwar id-​dinja. Huma jagħmlu dawn l-​affarijiet għax iħobbu lil Alla u lil oħrajn. Nuru li nħobbu lil ħutna wkoll billi kull ġimgħa nattendu l-​laqgħat u nipparteċipaw fihom. Minkejja li forsi nkunu għajjenin, xorta mmorru. Minkejja li nkunu eċċitati, xorta nikkummentaw. U minkejja li lkoll kemm aħna għandna l-​problemi, xorta ninkuraġġixxu lil xulxin qabel u wara l-​laqgħa. (Ebr. 10:24, 25) Kemm aħna grati għax-​xogħol li jagħmlu ħutna!

12. Ġwanni kif wera b’mod ieħor li jħobb lil ħutu?

¹² Ġwanni wera li jħobb lil ħutu mhux  biss billi faħħarhom, imma wkoll billi tahom parir. Pereżempju, fl-​ittri tiegħu, Ġwanni faħħar lill-​aħwa għall-​fidi u x-​xogħol tajjeb tagħhom, imma tahom ukoll parir dwar id-​dnub. (1 Ġw. 1:8-​10; 2:1, 13, 14) Bl-​istess mod, aħna rridu nfaħħru lill-​aħwa għall-​affarijiet tajbin li jagħmlu. Imma jekk xi ħadd jibda juri attitudni ħażina jew jagħmel xi ħaġa li tistaʼ tfixkel il-​ħbiberija tiegħu maʼ Ġeħova, nistgħu nuru l-​imħabba billi ngħidulu b’qalb tajba. Jeħtieġ kuraġġ biex tagħti parir lil ħu jew oħt, imma l-​Bibbja tgħid li ħbieb veri jsinnu, jew jikkoreġu, lil xulxin.—Prov. 27:17.

13. X’m’għandniex nagħmlu?

¹³ Kultant, aħna nuru li nħobbu lil ħutna billi ma nagħmlux ċertu affarijiet. Pereżempju, aħna ma niħdux għalina malajr b’dak li jgħidu. Aħseb dwar x’ġara meta Ġesù kien fuq l-​art. Hu qal lid-​dixxipli tiegħu li biex jiksbu l-​ħajja għandhom jieklu laħmu u jixorbu demmu. (Ġw. 6:53-​57) Ħafna mid-​dixxipli taʼ Ġesù ma ħadux pjaċir b’dan il-​kliem, u ma baqgħux jimxu warajh. Imma l-​ħbieb leali tiegħu, bħal Ġwanni, baqgħu miegħu. Huma ma kinux fehmu dak li qal Ġesù u x’aktarx dan issorprendiehom. Imma ma ħasbux li dak li qal Ġesù kien ħażin u tkażaw bih. Minflok, huma fdaw fih għax kienu jafu li kien jgħid il-​verità. (Ġw. 6:60, 66-​69) Kemm hu importanti li ma niħdux għalina malajr meta jgħidu xi ħaġa ħutna! Minflok, nagħtuhom ċans jispjegaw dak li riedu jgħidu.—Prov. 18:13; Ekk. 7:9.

14. Għala qatt m’għandna nobogħdu lil ħutna?

¹⁴ Ġwanni ħeġġiġna wkoll biex ma nobogħdux lil ħutna. Jekk ma nobdux dan il-​parir, Satana jistaʼ jinfluwenzana. (1 Ġw. 2:11; 3:15) Dan ġara lil xi wħud mill-​Kristjani tal-​bidu. Dak iż-​żmien, Satana ħadem iebes biex iġiegħel il-​qaddejja t’Alla jobogħdu lil xulxin u jifridhom. Sa ma Ġwanni kiteb l-​ittri tiegħu, uħud fil-​kongregazzjoni kellhom din l-​attitudni. Pereżempju, Dijotrefe kien qed jikkaġuna l-​firda fil-​kongregazzjoni. (3 Ġw. 9, 10) Hu ma kienx jirrispetta lill-​anzjani li ġew mibgħutin mill-​ġemgħa li tiggverna. Ukoll, prova  jkeċċi mill-​kongregazzjoni lill-​aħwa li kienu ospitabbli maʼ wħud li hu ma kellux grazzja magħhom. Kemm kien arroganti! Illum, Satana għadu qed jipprova jifred lin-​nies t’Alla. Jalla qatt ma nħallu l-​mibegħda tifridna.

15. X’għandu jiftakar kap taʼ familja?

¹⁵ Mod importanti kif kap taʼ familja juri li jħobb lill-​familja tiegħu hu billi jipprovdi għall-​bżonnijiet tagħhom. (1 Tim. 5:8) Imma hu jrid jiftakar li l-​iktar ħaġa importanti hi li jgħin lill-​familja tiegħu jkollha ħbiberija maʼ Ġeħova. (Mt. 5:3) Aħseb dwar l-​eżempju tajjeb li tana Ġesù. Il-​ktieb taʼ Ġwanni jgħidilna li meta Ġesù kien qed imut fuq iz-​zokk tat-​tortura, hu kien għadu qed jaħseb fil-​familja tiegħu. Ġwanni kien qiegħed m’omm Ġesù, Marija, fil-​post fejn Ġesù kien qed jiġi maqtul. Minkejja li kien għaddej minn uġigħ kbir, Ġesù talab lil Ġwanni biex jieħu ħsieb lil ommu. (Ġw. 19:26, 27) Ħut Ġesù żgur li kienu se jieħdu ħsieb dak li kellha bżonn Marija, imma milli jidher ħadd minnhom ma kien dixxiplu taʼ Ġesù sa dak iż-​żmien. Ġesù ried ikun ċert li kien se jkun hemm xi ħadd li jieħu ħsieb lil Marija u jinkuraġġiha biex tkompli taqdi lil Ġeħova.

16. Ġwanni liema responsabbiltajiet kellu?

¹⁶ Ġwanni kellu ħafna responsabbiltajiet. Hu kien appostlu, u għalhekk kellu jkun żeluż fix-​xogħol tal-​ippritkar. Hu jaf kien miżżewweġ ukoll, għalhekk kellu jipprovdi għall-​familja tiegħu u jgħinhom ikollhom ħbiberija maʼ Ġeħova. (1 Kor. 9:5) Illum, il-​kapijiet tal-​familja x’jistgħu jitgħallmu minn Ġwanni?

17. Kap taʼ familja x’responsabbiltajiet importanti għandu, u l-​familja tiegħu kif tibbenefika?

¹⁷ Ħu li hu kap taʼ familja jaf ikollu ħafna responsabbiltajiet importanti. Pereżempju, hu għandu jkun ħaddiem bieżel biex b’hekk iġib tifħir lil Ġeħova. (Efes. 6:5, 6; Titu 2:9, 10) Hu jaf ikollu responsabbiltajiet fil-​kongregazzjoni bħal li jinkuraġġixxi u jieħu ħsieb lill-​aħwa, u li jkun minn taʼ quddiem fl-​ippritkar.  Fl-​istess ħin, hu importanti li jistudja l-​Bibbja regolarment mal-​mara u t-​tfal tiegħu. Huma żgur se jkunu grati għal dak kollu li jagħmel biex huma jkunu kuntenti u biex jgħinhom jibqgħu jaqdu li Ġeħova.—Efes. 5:28, 29; 6:4.

18. Ġwanni minn xiex kien ċert?

¹⁸ Ġwanni għex ħajja twila u hu kellu esperjenzi mill-​isbaħ. Hu esperjenza wkoll ħafna diffikultajiet li setgħu jdgħajfu l-​fidi tiegħu. Imma hu dejjem għamel l-​almu tiegħu biex jobdi l-​kmandamenti taʼ Ġesù, bħal li jħobb lil ħutu. B’hekk, Ġwanni kien ċert li Ġeħova u Ġesù jħobbuh u li kienu se jagħtuh is-​saħħa biex ikampa maʼ kull prova. (Ġw. 14:15-​17; 15:10; 1 Ġw. 4:16) Satana u d-​dinja tiegħu ma setgħux iwaqqfu lil Ġwanni milli juri l-​imħabba b’dak li qal u għamel.

19. L-​1 Ġwanni 4:7, x’jinkuraġġina nagħmlu, u għala?

¹⁹ Bħal Ġwanni, aħna qed ngħixu f’dinja maħkuma minn Satana, li hu mimli mibegħda. (1 Ġw. 3:1, 10) Hu jridna nieqfu nħobbu lil ħutna, però ma jistax jagħmel dan sakemm ma nħalluhx aħna. Jalla nkunu determinati li nibqgħu nħobbu lil ħutna, u nuruhom l-​imħabba bl-​affarijiet li ngħidu u nagħmlu. Meta nuru din l-​imħabba, se nkunu kuntenti li nagħmlu parti mill-​familja taʼ Ġeħova u se nkunu ferħanin ħafna.—Aqra l-​1 Ġwanni 4:7.