Ix-​Xkiel Tiegħi Kien l-​Ilbies u d-​Dehra

KIF RAKKONTAT MINN EILEEN BRUMBAUGH

JIEN trabbejt fir-​reliġjon taʼ l-​Ordni l-​Qadima tal-​Fratellanza Battista Ġermaniża, li hija simili għar-​reliġjonijiet taʼ l-​Amish u l-​Mennoniti. Il-​moviment tal-​Fratellanza beda fil-​Ġermanja fl-​1708 bħala parti mill-​qawmien spiritwali msejjaħ Pjetiżmu. The Encyclopedia of Religion tgħid li l-​Pjetiżmu kien jintgħaraf minn “konvinzjoni li l-​bnedmin għandhom bżonn l-​evanġelju taʼ Kristu.” Din il-​ħarsa wasslet lill-​moviment biex jagħmel kampanji missjunarji f’diversi pajjiżi u dawn irnexxew.

Fl-1719 grupp żgħir immexxi minn Alexander Mack ġie f’dik li hija issa Pennsylvania, fl-​Istati Uniti. Minn dakinhar ’l hawn, ġew ifformati gruppi oħrajn u dawn infirdu minn xulxin. Kull grupp żamm maʼ l-​interpretazzjoni tiegħu stess tat-​tagħlim taʼ Alexander Mack. Il-​knisja żgħira tagħna kellha madwar 50 membru. Kienu jiġu enfasizzati ħafna l-​qari tal-​Bibbja u l-​ubbidjenza stretta għad-​deċiżjonijiet uffiċjali tal-​membri tal-​knisja.

Il-familja tiegħi kienet ilha żżomm maʼ dan it-​twemmin u l-​istil taʼ ħajja għal minn taʼ l-​inqas tliet ġenerazzjonijiet. Jien ngħaqadt mal-​knisja u tgħammidt meta kelli 13-il sena. Trabbejt bi twemmin li kien jgħid li huwa ħażin li jkollok jew tuża karozza, trakter, telefon, jew anki radju jew kull invenzjoni oħra li taħdem bl-​elettriku. Il-​membri nisa kienu jilbsu sempliċi, u ma konniex naqtgħu xagħarna jew inħallu rasna mikxufa. L-​irġiel kienu jħallu d-​daqna. Aħna konna naħsbu illi biex ma nkunux parti mid-​dinja ma stajniex nilbsu ħwejjeġ moderni, nagħmlu l-​mejkapp, jew nilbsu ġojjellerija. Għalina dawn kienu espressjonijiet taʼ kburija midinba.

Aħna konna nqisu l-​Bibbja bħala l-​ikel spiritwali tagħna u ġejna mgħallmin li għandu jkollna rispett profond għaliha. Kull fil-​għodu qabel nieħdu xi ħaġa taʼ l-​ikel, konna ninġabru fis-​salott u nisimgħu lill-​Papà jaqra kapitlu mill-​Bibbja u jikkummenta fuq dak li jkun qara. Imbagħad konna ninżlu kollha għarkopptejna hekk kif il-​Papà kien jgħid it-​talba. Imbagħad, il-​Mamà kienet tgħid it-​Talba tal-​Missierna. Jien dejjem kont inħares ’il quddiem għall-​qima taʼ fil-​għodu, għax il-​familja kienet tkun kollha miġbura flimkien u medhija fuq affarijiet spiritwali.

Aħna konna ngħixu f’razzett ħdejn Delphi, Indiana, fejn konna nkabbru diversi wċuħ tar-​rabaʼ. Konna nġorru l-​prodotti lejn iċ-​ċentru tal-​belt biż-​żiemel u l-​karettun, u mbagħad inbigħuhom fit-​triq jew minn bieb għal bieb. Ħassejna li x-​xogħol iebes kien parti mis-​servizz tagħna lil Alla. Allura ffokajna fuqu, minbarra l-​Ħadd, meta ma kellna nagħmlu ebda “xogħol il-​ħaddiem.” Iżda xi drabi l-​familja tagħna tant kien ikollha x’tagħmel fir-​razzett li kien taʼ sfida li nżommu din il-​ħarsa spiritwali.

Iż-​Żwieġ u l-​Familja

Fl-​1963, meta kelli 17-il sena, iżżewwiġt lil James, membru ieħor tal-​Fratellanza l-​Qadima. Sal-​bużnanniet tiegħu kienu membri tar-​reliġjon tal-​Fratellanza l-​Qadima. It-​tnejn li aħna kellna xewqa qawwija li naqdu lil Alla u konna nemmnu li l-​knisja tagħna kienet l-​unika waħda vera.

Sa l-​1975 kellna sitt itfal, u fl-​1983 twieled is-​sebaʼ u l-​aħħar wieħed. Rebecca, it-​tieni waħda, kienet l-​unika tifla. Konna naħdmu ħafna, nonfqu ftit, u ngħixu ħajja sempliċi. Ipprovajna nnisslu f’uliedna l-​istess prinċipji Bibliċi li konna tgħallimna mill-​ġenituri tagħna u minn oħrajn fil-​Fratellanza l-​Qadima.

Id-dehra taʼ barra kienet importanti ħafna għall-​Fratellanza l-​Qadima. Konna nħossu li peress li ħadd ma setaʼ jaqra l-​qalb, il-​mod kif persuna kienet tilbes kien jikxef x’kienet minn ġewwa. B’hekk, jekk xi waħda mill-​membri kienet tgħolli xagħarha żżejjed kienet titqies bħala mara kburija. Jekk id-​disinn fuq id-​drapp tal-​libsa sempliċi tagħna kien jagħti wisq fl-​għajn, dan kien jindika wkoll li l-​persuna kienet kburija. Xi drabi, dawn il-​kwistjonijiet kienu jsiru iktar importanti mill-​Iskrittura nfisha.

Esperjenza fil-​Ħabs

Lejn l-​aħħar tas-​snin 60, ħu r-​raġel, Jesse, li wkoll kien trabba fit-​twemmin tal-​Fratellanza l-​Qadima, intbagħat il-​ħabs minħabba li ma riedx jaċċetta s-​servizz militari. Waqt li kien hemm, iltaqaʼ max-​Xhieda taʼ Jehovah, li wkoll iħossu li jekk jieħdu sehem fil-​gwerer ma jkunux qed jaqblu mal-​prinċipji Bibliċi. (Isaija 2:4; Mattew 26:52) Jesse kellu ħafna diskussjonijiet fuq il-​Bibbja max-​Xhieda u setaʼ jara l-​kwalitajiet tagħhom direttament. Wara ħafna studju tal-​Bibbja, hu tgħammed bħala wieħed mix-​Xhieda taʼ Jehovah—b’dispjaċir kbir għalina.

Jesse kellem lir-​raġel tiegħi dwar l-​affarijiet li kien tgħallem. Għamel arranġament ukoll biex James ikun jistaʼ jirċievi regolarment ir-​rivisti Torri taʼ l-​Għassa u Stenbaħ! Iktar ma James beda jaqrahom, iktar beda jinteressa ruħu fil-​Bibbja. Peress li James minn dejjem xtaq jaqdi lil Alla imma taʼ spiss kien iħossu mbiegħed minnu, kull ħaġa li setgħet tgħinu jersaq eqreb lejn Alla kienet tinteressah ħafna.

L-anzjani tagħna inkuraġġewna biex naqraw ir-​rivisti reliġjużi tar-​reliġjonijiet taʼ l-​Amish, il-​Mennoniti, u reliġjonijiet oħrajn tal-​Fratellanza l-​Qadima, avolja konna nikkunsidraw dawn ir-​reliġjonijiet bħala parti mid-​dinja. Iżda missieri kellu preġudizzju qawwi kontra x-​Xhieda. Ħass li qatt ma kellna naqraw It-​Torri taʼ l-​Għassa u Stenbaħ! Allura ħadt qatgħa meta rajt lil James jaqrahom. Bżajt li kien se jieħu xi tagħlim falz.

Madankollu, lil James kienu ilhom li ġewh dubji dwar xi twemmin tal-​Fratellanza l-​Qadima li skond hu kienu jikkontradixxu l-​Bibbja—speċjalment it-​tagħlim li kull “xogħol il-​ħaddiem” nhar taʼ Ħadd huwa dnub. Per eżempju, ir-​reliġjon tal-​Fratellanza l-​Qadima kienet tgħallem li nhar taʼ Ħadd tistaʼ tisqi l-​annimali tiegħek imma ma tistax taqlaʼ ħaxixa ħażina. L-​anzjani ma setgħux jagħtuh raġuni Skritturali għal din ir-​regola. Bil-​mod il-​mod, lili wkoll bdew jiġuni dubji dwar tagħlim bħal dan.

Peress li kien ilna ħafna żmien nemmnu li l-​knisja tagħna kienet il-​knisja t’Alla u konna nafu minn xiex konna se ngħaddu jekk nitilqu minnha, sibnieha iebsa biex ninqatgħu minn mal-​Fratellanza l-​Qadima. Madankollu, il-​kuxjenza tagħna ma setgħetx tkompli tħallina nibqgħu f’reliġjon li ħassejna li ma kinitx taqbel mal-​Bibbja f’kollox. Għalhekk, fl-​1983 ktibna ittra li fiha spjegajna r-​raġunijiet tagħna għala tlaqna u tlabna li l-​ittra tinqara lill-​kongregazzjoni. Ġejna mkeċċijin mis-​sħubija tal-​grupp.

Tfittxija għar-​Reliġjon Vera

Wara dan, bdejna nfittxu r-​reliġjon vera. Konna qed infittxu l-​konsistenza, reliġjon segwita minn uħud li kienu jagħmlu  l-​affarijiet li kienu jgħallmu lil oħrajn biex jagħmlu. L-​ewwelnett, qtajna barra kull reliġjon li kienet tieħu sehem fil-​gwerra. Xorta bqajna miġbudin lejn ir-​reliġjonijiet “sempliċi,” għax konna nħossu li stil taʼ ħajja u lbies sempliċi kienu juru li r-​reliġjon ma kinitx parti mid-​dinja. Mill-​1983 sa l-​1985, sibna l-​ħin biex induru mal-​pajjiż kollu, neżaminaw reliġjon wara l-​oħra—il-​Mennoniti, il-​Quakers, u gruppi “sempliċi” oħra.

Matul dak il-​perijodu x-​Xhieda taʼ Jehovah kienu jiġu jżuruna fir-​razzett tagħna, ħdejn Camden, Indiana. Konna nisimgħuhom, u nitolbuhom biex jużaw biss il-​verżjoni tal-​Bibbja tal-​King James. Kont nirrispettaha l-​opinjoni tax-​Xhieda dwar il-​gwerer. Imma kien diffiċli għalija biex nismagħhom għax billi ma setgħux jifhmu l-​bżonn li ma jkunux parti mid-​dinja billi jilbsu ħwejjeġ sempliċi, ħassejt li ma setax ikollhom ir-​reliġjon vera. Kont naħseb li l-​kburija kienet iġġiegħel lin-​nies jilbsu differenti minna. Kont nemmen li l-​affarijiet li wieħed ikollu kienu jagħmluh kburi.

James beda jmur fis-​Sala tas-​Saltna tax-​Xhieda taʼ Jehovah, u kien jieħu miegħu lil xi ftit mit-​tfal tagħna. Jien kont ħadtha bi kbira ħafna. Ir-​raġel ħeġġiġni biex immur miegħu, imma żammejt lura. Imbagħad darba minnhom qalli, “Avolja ma taqbilx mat-​tagħlim kollu tagħhom, almenu mur u ara int stess kif jittrattaw lil xulxin.” Din kienet xi ħaġa li lilu impressjonatu ħafna.

Fl-aħħar mill-​aħħar, iddeċidejt li mmur imma noqgħod b’sebaʼ għajnejn. Dħalt fis-​Sala tas-​Saltna bil-​libsa u l-​kappa sempliċi tiegħi. Xi wħud minn uliedna s-​subien kienu ħafjin, u l-​ħwejjeġ tagħhom kienu sempliċi wkoll. Madankollu, ix-​Xhieda ġew fuqna u ttrattawna bi mħabba. Ħsibt bejni u bejn ruħi, ‘Aħna differenti, imma xorta qed jaċċettawna kif aħna.’

Bqajt impressjonata bl-​attitudni tagħhom kollha mħabba, imma xorta bqajt determinata li mmur biex nara biss. Ma kontx inqum bil-​wieqfa jew inkanta l-​għanjiet tagħhom. Wara l-​laqgħa kont nibbombardjahom bil-​mistoqsijiet dwar affarijiet li kont naħseb li ma kinux qed jagħmluhom tajjeb jew dwar it-​tifsira taʼ ċerti skritturi. Avolja ma tantx kont nuża tattika, kull persuna li staqsejt ħadet interess veru fija. Bqajt impressjonata wkoll bil-​fatt li stajt nistaqsi l-​istess ħaġa lil uħud differenti u nieħu tweġibiet li kienu jaqblu flimkien. Xi drabi kienu jiktbuli t-​tweġiba, u dan kien t’għajnuna kbira għax imbagħad kont inkun nistaʼ nistudja l-​materjal waħdi iktar tard.

Fis-sajf taʼ l-​1985, morna bħala familja għall-​konvenzjoni tax-​Xhieda taʼ Jehovah f’Memphis, Tennessee​—biex naraw biss. James kien għad kellu d-​daqna, u konna għadna nilbsu lbies sempliċi. Bejn sessjoni u oħra rari kien hemm mument fejn ma kienx hemm xi ħadd ikellimna. L-​imħabba, l-​attenzjoni, u l-​fatt li ġejna aċċettati laqtuna ħafna. Bqajna impressjonati wkoll bl-​għaqda, għax morna fejn morna għal-​laqgħat, it-​tagħlim kien kollu l-​istess.

James tqanqal mill-​interess persunali li wrew ix-​Xhieda u aċċetta studju tal-​Bibbja. Kien jifli kollox biex ikun ċert minn dak li kien qed jitgħallem u jsib il-​prova tiegħu. (Atti 17:11; 1 Tessalonikin 5:21) Maż-​żmien, James ħass li kien sab il-​verità. Madankollu, jien ħassejtni bejn ħalltejn. Xtaqt nagħmel dak li hu sewwa, imma ma ridtx “insir moderna” u nitqies bħala “tad-​dinja.” Meta aċċettajt għall-​ewwel darba li noqgħod għal studju tal-​Bibbja, kelli l-​King James Version  fuq sieq waħda u l-​verżjoni iktar moderna tan-​New World Translation fuq l-​oħra. Iċċekkjajt kull vers fiż-​żewġ traduzzjonijiet sabiex inkun ċerta li ma kontx qed niġi mqarrqa.

Kif Ikkonvinċejt Ruħi

Hekk kif bdejna nistudjaw max-​Xhieda, tgħallimna li Missierna tas-​sema huwa Alla wieħed, mhux tlieta f’wieħed, u li aħna nfusna erwieħ u mhux għandna xi ruħ immortali. (Ġenesi 2:​7, Għaqda Biblika Maltija, L-​Ewwel Edizzjoni [1984]; 1 Korintin 15:45; Dewteronomju 6:4; Eżekjel 18:​4, Karm Żammit; 1 Korintin 8:​5, 6) Tgħallimna wkoll li l-​infern hu l-​qabar komuni tan-​nies kollha, mhux post taʼ turment bin-​nar. (Ġob 14:13; Salm 16:10; Koħèlet 9:​5, 10; Atti 2:​31) Meta tgħallimna l-​verità dwar l-​infern kienet xi ħaġa kbira, peress li r-​reliġjon tal-​Fratellanza l-​Qadima ma setgħetx taqbel dwar it-​tifsir tiegħu.

Madankollu, xorta ma stajtx nifhem kif ix-​Xhieda setaʼ kellhom ir-​reliġjon vera meta, f’moħħi, kienu għadhom parti mid-​dinja. Ma kinux jgħixu ħajja “sempliċi,” li kont naħseb li tant kienet neċessarja. Madankollu, fl-​istess ħin irrealizzajt li kienu qed iwettqu l-​kmand taʼ Ġesù biex jippridkaw l-​aħbar tajba tas-​Saltna lin-​nies kollha. Kemm ħassejtni mħawda!​—Mattew 24:14; 28:​19, 20.

Matul dan iż-​żmien kritiku, l-​imħabba tax-​Xhieda għenitni nkompli ninvestiga. Il-​kongregazzjoni kollha ħadet interess fil-​familja tagħna. Meta diversi membri tal-​kongregazzjoni kienu jgħaddu sa ħdejna​—xi drabi billi jivvintaw skuża li jridu jixtru l-​ħalib u l-​bajd mingħandna sabiex jiġu jarawna​—bdejna nqisuhom bħala nies verament twajbin. Id-​dar tagħna ma kinitx titħalla barra għax xi Xhud partikulari kien qed jistudja magħna. Minflok, kull meta kien ikun hemm xi ħadd mill-​kongregazzjoni ħdejn id-​dar tagħna, kien jiġi jarana. Aħna kellna bżonnha ħafna din l-​opportunità biex insiru nafu lix-​Xhieda, u sirna napprezzaw l-​interess u l-​imħabba ġenwina tagħhom.

Mhux ix-​Xhieda fil-​kongregazzjoni l-​iktar viċin tagħna biss urew dan l-​interess persunali. Meta kont qed nissielet mal-​kwistjoni taʼ lbies u dehra xierqa, ġiet tarani Kay Briggs, Xhud minn kongregazzjoni fil-​qrib u li kienet tippreferi tilbes ħwejjeġ sempliċi u ma tagħmilx mejkapp. Magħha ħassejtni komda u stajt niftaħ qalbi iktar. Imbagħad darba waħda ġie jarani Lewis Flora, li wkoll kien trabba f’reliġjon “sempliċi.” Hu setaʼ jara d-​dilemma li kelli mill-​ħarsa taʼ wiċċi u bagħatli ittra t’għaxar paġni biex jipprova jserraħli l-​moħħ tant imħawwad li kelli. Il-​qalb tajba li wera bikkietni, u qrajt l-​ittra tiegħu darba wara l-​oħra.

Jien tlabt lill-​indokratur li jivvjaġġa, Ħuna O’Dell, biex jispjegali Isaija 3:​18-23 u l-​1 Pietru 3:​3, 4. “Dawn il-​versi ma jurux li hemm bżonn taʼ lbies sempliċi biex nogħġbu lil Alla?” staqsejt jien. Hu rraġuna: “Fiha xi ħaġa ħażina li tilbes barnuża? Ħażin li tagħmel malji fix-​xagħar?” Fil-​Fratellanza l-​Qadima konna nimmaljaw xagħar il-​bniet, u n-​nisa kienu jilbsu l-​barnuża. Stajt nara li ma kienx hemm konsistenza, u bqajt impressjonata bil-​paċenzja u l-​qalb tajba li wera l-​indokratur li jivvjaġġa.

Bil-mod il-​mod, bdejt nikkonvinċi ruħi iktar u iktar, imma kien hemm kwistjoni waħda li xorta kienet għadha ddejjaqni ħafna​—li n-​nisa kienu jaqtgħu xagħarhom. L-​anzjani Kristjani rraġunaw miegħi li x-​xagħar taʼ xi nisa jitwal biss sa ċertu tul, filwaqt li t’oħrajn jistaʼ jitwal mhux ħażin. Kien ix-​xagħar taʼ mara waħda aħjar minn taʼ l-​oħra minħabba f’hekk? Għenuni nara wkoll li l-​kuxjenza hija importanti fejn jidħlu l-​ilbies u d-​dehra u tawni informazzjoni bil-​miktub biex niħodha miegħi d-​dar u naqraha.

Naġixxu fuq Dak li Tgħallimna

Konna qed infittxu frott tajjeb, u sibnieh. Ġesù qal: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.” (Ġwanni 13:35) Konna konvinti li x-​Xhieda taʼ Jehovah huma nies li juru mħabba vera. Madankollu, dan kien żmien taʼ konfużjoni għat-​tfal il-​kbar, Nathan u Rebecca, peress li kienu aċċettaw ir-​reliġjon tal-​Fratellanza l-​Qadima u tgħammdu fiha. Maż-​żmien, huma tqanqlu mill-​veritajiet Bibliċi li qsamna magħhom, kif ukoll mill-​imħabba li ntwerew mix-​Xhieda.

Per eżempju, Rebecca minn dejjem xtaqet li jkollha relazzjoni intima m’Alla. Sabitha iktar faċli titolbu meta tgħallmet li hu ma fassalx id-​destin taʼ kif wieħed se jaġixxi jew x’se jkun il-​futur  tiegħu. Hi saret ukoll iktar ħabiba t’Alla meta bdiet tapprezza li minflok ma kien parti minn Trinità misterjuża, huwa persuna vera, persuna li setgħet timita. (Efesin 5:1) U ħadet pjaċir li ma kellhiex għalfejn tuża l-​kliem antik li hemm fil-​King James Version biex tindirizzah meta titkellem miegħu. Meta bdiet titgħallem dak li Alla jirrikjedi dwar il-​mod kif nitolbuh, kif ukoll l-​iskop tiegħu taʼ l-​għaġeb għall-​bnedmin biex jgħixu għal dejjem f’ġenna taʼ l-​art, ħassitha ħafna eqreb lejn il-​Ħallieq tagħha.​—Salm 37:29; Apokalissi 21:​3, 4.

Privileġġi li Ngawdu Lkoll

Jien u James u l-​ħamest itfal il-​kbar​—Nathan, Rebecca, George, Daniel, u John—tgħammidna bħala Xhieda taʼ Jehovah fis-​sajf taʼ l-​1987. Harley tgħammed fl-​1989, u Simon fl-​1994. Il-​familja kollha tagħna għadha devota fix-​xogħol li Ġesù Kristu kkmanda lis-​segwaċi tiegħu biex jagħmlu, jiġifieri, li jxandru l-​aħbar tajba tas-​Saltna t’Alla.

Il-ħames subien il-​kbar​—Nathan, George, Daniel, John, u Harley​—kif ukoll bintna Rebecca—kollha qdew fl-​uffiċċju tal-​fergħa tax-​Xhieda taʼ Jehovah fl-​Istati Uniti. George għadu hemm wara 14-il sena, u Simon, li spiċċa l-​iskola fl-​2001, dan l-​aħħar ukoll sar membru tal-​ħaddiema tal-​fergħa. Uliedna s-​subien kollha huma anzjani jew qaddejja ministerjali fil-​kongregazzjonijiet tax-​Xhieda taʼ Jehovah. Ir-​raġel tiegħi jaqdi bħala anzjan fil-​Kongregazzjoni taʼ Thayer, f’Missouri, u jien għandi ħafna x’nagħmel fil-​ministeru.

Issa għandna tliet neputijiet​—Jessica, Latisha, u Caleb​—u ninsabu ferħanin li naraw lill-​ġenituri tagħhom inisslu fil-​qlub teneri tagħhom l-​imħabba għal Jehovah. Bħala familja, aħna ferħanin li Jehovah ġibidna lejh u għenna nagħrfu n-​nies li jġorru ismu mill-​imħabba divina li juru.

Aħna nħossu ħafna għal oħrajn li għandhom xewqa qawwija li jogħġbu lil Alla imma li l-​kuxjenzi tagħhom forsi ġew imħarrġin skond it-​trobbija li kellhom minflok skond il-​Bibbja stess. Nisperaw li jkunu jistgħu jsibu l-​ferħ li għandna aħna issa meta mmorru minn bieb għal bieb, mhux bil-​prodotti tar-​rabaʼ, imma bil-​messaġġ dwar is-​Saltna t’Alla u l-​affarijiet taʼ l-​għaġeb li se tagħmel. Għajnejja jimtlew bi dmugħ t’apprezzament meta naħseb dwar il-​paċenzja u l-​imħabba kollha li ntwerejna min-​nies li jġorru l-​isem taʼ Jehovah!

[Stampi f’paġna 19]

Meta kelli xi sebaʼ snin, u iktar tard meta kbirt

 [Stampa f’paġna 20]

James, George, Harley, u Simon, lebsin ħwejjeġ sempliċi

[Stampa f’paġna 21]

F’gazzetta lokali deher dan ir-​ritratt tiegħi jien u sejra s-​suq bil-​prodotti

[Sors]

Journal and Courier, Lafayette, Indiana

[Stampa f’paġna 23]

Mal-​familja tagħna llum