LEZZJONI 14
Ilsir li obda lil Alla
Ġużeppi kien wieħed mis-subien iż-żgħar taʼ Ġakobb. Ħutu s-subien li kienu akbar minnu raw li Ġużeppi kien il-favorit taʼ missierhom. Kif taħseb li ħassewhom dwar dan? Huma kienu jgħiru għal Ġużeppi u bdew jobogħduh. Meta Ġużeppi kien joħlom ħolm stramb, hu kien imur jgħid lil ħutu x’ħolom. Dan il-ħolm kien ifisser li huma xi darba kienu se jmilu quddiemu. Allura, issa bdew jobogħduh saħansitra iktar!
Darba waħda, ħutu s-subien kienu qed jieħdu ħsieb in-nagħaġ viċin il-belt taʼ Sikem. Ġakobb bagħat lil Ġużeppi biex jara kif inhuma sejrin. Mill-bogħod raw lil Ġużeppi ġej u qalu lil xulxin: ‘Ara, ġej dak li jħobb joħlom. Ejja noqtluh!’ Huma qabduh u tefgħuh f’bir vojt. Imma Ġuda, wieħed mill-aħwa, qal: ‘Toqtluhx! Ejja nbigħuh bħala lsir minflok.’ Għalhekk, biegħu lil Ġużeppi għal 20 biċċa tal-fidda lil negozjanti minn Midjan li kienu fi triqithom lejn l-Eġittu.
Imbagħad, ħut Ġużeppi ċappsu sew il-libsa tiegħu bid-demm taʼ bodbod, u bagħtuha lil missierhom, u qalulu: ‘Din mhux il-libsa taʼ ibnek?’ Minħabba f’hekk, Ġakobb ħaseb li Ġużeppi kien ġie maqtul minn annimal salvaġġ. Hu baqaʼ jibki lil Ġużeppi u ħadd ma setaʼ jtih faraġ.
Fl-Eġittu, Ġużeppi kien mibjugħ bħala lsir lil uffiċjal importanti jismu Potifar. Imma Ġeħova kien maʼ Ġużeppi. Potifar induna li Ġużeppi kien tajjeb f’xogħlu u li setaʼ jafdah. Fi żmien qasir, Potifar għamel lil Ġużeppi responsabbli fuq kull ħaġa li kellu.
Il-mara taʼ Potifar innotat li Ġużeppi kien gustuż u mibni. Jum wara jum, hi kienet tgħid lil Ġużeppi biex jimtedd magħha. X’kien se jagħmel Ġużeppi? Hu m’aċċettax u qalilha: ‘Le! Dak li qed tgħidli biex nagħmel hu ħażin. Int l-mara tiegħu, u sidi lili jafdani. Jekk nimtedd miegħek, jien inkun qed nagħmel dnub kontra Alla!’
Darba waħda, il-mara taʼ Potifar sforzat lil Ġużeppi biex jimtedd magħha. Hi qabditu minn ħwejġu, imma hu ħarab jiġri ’l barra. Meta Potifar ġie lura d-dar, hi qaltlu li Ġużeppi pprova jimtedd magħha. Imma hi ma kinitx qed tgħid il-verità. Potifar tant irrabja li tefaʼ lil Ġużeppi fil-ħabs. Imma Ġeħova qatt ma nesieh lil Ġużeppi.
“Għalhekk, umiljaw ruħkom taħt l-id setgħana t’Alla, sabiex jeżaltakom fiż-żmien xieraq.”—1 Pietru 5:6
Tistaʼ Tara Wkoll
STEJJER TAL-BIBBJA BL-ISTAMPI
Ġużeppi fl-Art tal-Eġittu
Kif tista’ tferraħ lil Alla anki meta ma jkun hemm ħadd jarak? Aqra din l-istorja tal-Bibbja u tgħallem mill-eżempju ta’ Ġużeppi.
ATTIVITAJIET GĦALL-ISTUDJU TAL-BIBBJA
Ġużeppi—Akkużat b’Mod Falz!
Ġużeppi jiġi mitfugħ il-ħabs inġustament. X’għenu jissaporti?
STEJJER TAL-BIBBJA BL-ISTAMPI
L-Istorja ta’ Wlied Ġakobb
Kif għandek tirreaġixxi meta ħuk, oħtok, jew il-ħabib tiegħek jirċievi xi ħaġa li ridt int?
ATTIVITAJIET BL-ISTAMPI
Ġużeppi Jinbiegħ fil-Jasar
Iddawnlowdja u pprintja din il-paġna u mbagħad pinġiha u fittex żewġ affarijiet li ma jaqblux mal-istorja tal-Bibbja.
KARDS TAL-KARATTRI TAL-BIBBJA
Kard tal-Bibbja Dwar Ġużeppi
Tgħallem għala l-Fargħun għamel lil Ġużeppi t-tieni ħakkiem fl-Eġittu.
KARDS TAL-KARATTRI TAL-BIBBJA
Kard tal-Bibbja Dwar Potifar
Iddawnlowdja din il-kard tal-Bibbja, u tgħallem iktar dwar Potifar, is-sid ta’ Ġużeppi fl-Eġittu.
