Minn mindu kont żgħir kont inħobb in-​natura. Fejn konna noqogħdu aħna, fil-​belt taʼ Jyväskylä, fiċ-​ċentru tal-​Finlandja, kien hemm ħafna foresti u għadajjar sbieħ. Jien u l-​familja tiegħi konna mmorru ħafna f’dawn il-​postijiet sbieħ. Ukoll, minn dejjem kont inħobb ħafna l-​annimali. Meta kont tifel, ridt ngħannaq kull kelb u qattus li kont nara! Jiena u nikber, kont imdejjaq ħafna kif in-​nies kienu jittrattaw b’mod ħażin l-​annimali. Maż-​żmien, dħalt f’organizzazzjoni li tipproteġi l-​annimali. Hemmhekk, iltqajt maʼ ħafna nies li bħali jħobbu l-​annimali u jridu jipproteġuhom.

Għamilna ħafna biex nipproteġu l-​annimali. Konna nipprovaw nuru lin-​nies dak li kien qed jiġri permezz taʼ vidjows, flyers, u affarijiet oħra. Ukoll, organizzajna protesti kontra ħwienet li jbigħu ħwejjeġ tal-​fer u kontra postijiet li jittestjaw prodotti fuq l-​annimali. Anki ftaħna organizzazzjoni ġdida li tipproteġi l-​annimali. Peress li konna nagħmlu minn kollox biex nipprovaw ngħinu l-​annimali, kemm-​il darba dħalna fl-​inkwiet mal-​pulizija. Ħafna drabi ġejt arrestat u mtellaʼ l-​qorti.

Ma kontx inkwetat biss dwar l-​annimali, imma anki dwar problemi oħra madwar id-​dinja. Aktar tard, dħalt f’organizzazzjonijiet oħra bħal Amnesty International u Greenpeace. Għamilt dak kollu li stajt biex ngħinhom fix-​xogħol li kienu jagħmlu. Kont niddefendi d-​drittijiet tal-​foqra, dawk li kienu bil-​ġuħ, u oħrajn li kellhom bżonn l-​għajnuna.

Maż-​żmien indunajt li ma stajtx nirranġa l-​problemi tad-​dinja. Għalkemm dawk l-​organizzazzjonijiet irnexxielhom isolvu xi problemi żgħar, il-​problemi l-​kbar baqgħu jiggravaw. Kien qisu l-​ħażin qed jikkontrolla d-​dinja kollha u ħadd ma kien jinteressah minn xejn. Ħassejt li ma stajt nagħmel xejn.

Jien ħassejtni mdejjaq għax ma stajt nagħmel xejn. Allura bdejt naħseb iżjed dwar Alla u l-​Bibbja. Qabel, kont nistudja l-​Bibbja max-​Xhieda taʼ Ġeħova. Jien kont naf li huma kienu nies tajbin u kien jinteressahom minni. Imma ma kontx lest li nbiddel ħajti. Imma did-​darba l-​affarijiet kienu differenti.

Iddeċidejt li nibda naqra l-​Bibbja. Vera kienet taʼ inkuraġġiment għalija. Rajt li l-​Bibbja tgħidilna kemm-​il darba biex nittrattaw l-​annimali b’mod tajjeb. Pereżempju, Proverbji 12:10 jgħid li ‘n-​nies tajbin jieħdu ħsieb l-​annimali tagħhom.’ Fhimt ukoll li l-​problemi kollha tad-​dinja mhumiex it-​tort t’Alla. Anzi, il-​problemi jibqgħu jikbru għax ħafna min-​nies ma jobduhx. Vera kont impressjonat meta tgħallimt dwar l-​imħabba u l-​paċenzja taʼ Ġeħova.—Salm 103:8-​14.

Matul dak iż-​żmien, imlejt karta biex jibagħtuli l-​ktieb Il-​Bibbja X’Tgħallem Verament? Ftit wara, ġew tnejn mix-​Xhieda taʼ Ġeħova u offrewli studju tal-​Bibbja, u jien aċċettajt. Bdejt anki nattendi l-​laqgħat tax-​Xhieda taʼ Ġeħova. Dak li bdejt nitgħallem minn fuq il-​Bibbja vera beda jogħġobni.

Grazzi għall-​Bibbja, bdejt nagħmel ħafna bidliet. Qtajt is-​sigaretti u ma bqajtx nixrob ħafna. Biddilt l-​istil tiegħi u waqaft nuża kliem ħażin. Tgħallimt ukoll li għandi nirrispetta lill-​gvern u l-​liġi tiegħu. (Rumani 13:1) Bdejt anki nobdi dak li tgħid il-​Bibbja dwar is-​sess, xi ħaġa li qabel ma kontx nagħti kas.

L-​iżjed ħaġa diffiċli kienet biex inbiddel kif inħares lejn l-​organizzazzjonijiet li kont fihom. Ma kinitx faċli għalija. Għall-​bidu ħassejt li nkun qed nittradihom lil dawn l-​organizzazzjonijiet jekk nitlaq. Imma fl-​istess ħin fhimt li s-​Saltna t’Alla biss tistaʼ ssolvi l-​problemi li hawn fuq l-​art. Allura, iddeċidejt li nagħmel dak kollu li nistaʼ biex naħdem għas-​Saltna t’Alla u ngħin lil oħrajn jitgħallmu dwarha.—Mattew 6:33.

Lin-​nies kont narahom b’żewġ modi, jew tajjeb jew ħażin. Kont lest li nagħmel kollox kontra dawk li kont inqis li huma ħżiena. Imma grazzi għall-​Bibbja, m’għadnix nobgħod lill-​oħrajn. Minflok, nipprova nuri mħabba Kristjana lejn kulħadd. (Mattew 5:44) Mod wieħed kif nuri din l-​imħabba huwa billi ngħid lin-​nies dwar l-​aħbar tajba tas-​Saltna t’Alla. Vera ferħan li nara kif l-​aħbar tajba qed tgħin lin-​nies ikollhom il-​paċi, tgħinhom ikunu ferħanin, u ttihom tama vera għall-​futur.

Illum, inħossni ħafna aħjar għax inħalli f’idejn Ġeħova biex isolvi l-​problemi kollha. Jien ċert li Ġeħova, bħala l-​Ħallieq, mhux se jħalli l-​annimali u n-​nies jiġu ttrattati ħażin għal dejjem. Ukoll, mhux se jħalli din id-​dinja sabiħa tinqered. Anzi, permezz tas-​Saltna tiegħu daqt se jirranġa l-​ħsara kollha li saret. (Isaija 11:1-​9) Li naf dawn il-​veritajiet mill-​Bibbja u ngħin lill-​oħrajn jemmnu fihom, jagħmilni ferħan ħafna. Issa, m’għadnix inħoss li rrid nirranġa l-​problemi tad-​dinja.