Salm 79:1-13
Għanja t’Asaf.
79 Alla tiegħi, il-popli daħlu fl-art li int tajt bħala wirt lill-qaddejja tiegħek;Huma niġġsu t-tempju qaddis tiegħek.
Lil Ġerusalemm ġabuha ħerba.
2 Huma qatlu lill-qaddejja tiegħek u tawhom bħala ikel lill-għasafar.
Huma qatlu lil-leali tiegħek u tawhom lill-annimali slavaġ.
3 Huma ferrgħu d-demm tagħhom madwar Ġerusalemm bħall-ilma,U m’għad hemm ħadd li jistaʼ jidfinhom.
4 Aħna ġejna mwaqqgħin għaċ-ċajt mill-ġirien tagħna;Dawk taʼ madwarna jgħajruna u jiddieħqu bina.
5 Kemm se ddum irrabjat ħafna, Ġeħova? Għal dejjem?
Se tibqaʼ r-rabja tiegħek tiżdied?
6 Irrabja mal-popli li ma jafukx,U mas-saltniet li ma jgħajtulekx b’ismek.
7 Għax huma qerdu lil Ġakobb,U l-art tiegħu għamluha ħerba.
8 Tħalliniex inbatu għall-iżbalji tal-antenati tagħna.
Ħenn għalina malajr,Għax aħna qed inbatu ħafna.
9 Alla tagħna li ssalvana, għinna.
Agħmel dan minħabba l-isem glorjuż tiegħek.
Eħlisna u aħfrilna* d-dnubiet tagħna.
Agħmel dan minħabba ismek.
10 Għala għandhom il-popli jgħidu: “Fejn hu l-Alla tagħhom?”
Uri lill-popli li int ikkastigajt lil dawk li qatlu lill-qaddejja tiegħek.
Agħmel dan quddiem għajnejna.
11 Jalla tismaʼ l-biki tal-priġunieri.
Uża s-saħħa* kbira tiegħek biex iżżomm ħajjin* lil dawk li għandhom is-sentenza tal-mewt.
12 Ġeħova, pattihielhom għal sebaʼ darbiet lill-ġirien tagħna,Għal kemm-il darba waqqgħuk għaċ-ċajt.
13 Imbagħad aħna, il-poplu tiegħek u l-merħla li int tirgħa,Se nirringrazzjawk għal dejjem;Se nkomplu nfaħħruk minn ġenerazzjoni għal oħra.
