•  A Zeova Kaset rãmbã maanda wãn n bãng b sã n tõe n maana tigri?

•  A Zeova Kaset rãmbã sẽn pa maand tig kẽerã, rat n yeelame tɩ b pa nong b zagsã rãmb bɩ?

•  A Zeova Kaset rãmbã modgda neb a taabã tɩ b ra maan kibs-rãmb kẽer bɩ?

 Nand t’a Zeova Kaset rãmbã yãk b sã n na n maana tigri, b geta Biiblã sẽn yetã. Yaa vẽeneg tɩ nebã sẽn maand kibs-rãmb kẽer to-to wã la b sẽn maand-b bũmb ning yĩngã kɩɩsda Biiblã saglsã. Sã n wa yaa woto, a Zeova Kaset rãmbã pa naagd n maan ye. Tig a taabã wɛɛngẽ, yaa a Zeova Kaset soab fãa n yãkd a toorẽ yam, la a modgd sẽn na yɩl “n kell n tall sũur-kaset sẽn yaa sõma Wẽnnaam taoore, la ninsaalbã taoore.”—Tʋʋma 24:16.

 D na n leoka sogsg a wãna. Yaa sogsg a Zeova Kaset rãmbã sẽn sokd b mense, nand tɩ b yãk b sã n na n maana tigr bɩ b pa na n maane. a

•   Kibsã tika zãmsg sẽn kɩɩsd Biiblã sẽn yetã bɩ?

   Biiblã saglga: “A Zeova yetame: ‘Woto yĩnga, bɩ y yi bãmb sʋk la y lak y mense, la y ra le sɩɩs bõn-dẽgdã ye.’”—2 Korẽnt rãmbã 6:15-17.

   A Zeova Kaset rãmbã sẽn dat n lak b mens zãng fasɩ ne zãmsg nins sẽn yaa rẽgd Wẽnnaam nifẽ wã, rat n yeel tɩ sẽn kɩɩsd Biiblã sẽn yetã yĩnga, bũmb kẽer n be tɩ b sã n naag tigr pʋgẽ bɩ b pa maand tig-kãng ye. Ad bõn-kãens kẽere:

   Tig nins nebã sẽn maande, b sẽn tẽed wẽnnaam-dãmb a taab wall b sẽn waoogd-b yĩngã. A Zeezi yeelame: “Yaa yãmb Wẽnnaam a Zeova la y segd n waooge, la yaa yẽ a ye bal la y segd n sak ne y sũur fãa.” (Matiye 4:10) A Zeova Kaset rãmbã sẽn tũud sagl-kãnga wã yĩnga, b pa maan Nowɛllã, Pakã wall 1^er Mai wã tigrã ye. Bala tig-kãensã maanegã waoogda wẽnnaam-dãmb a taab sẽn pa a Zeova. Sẽn paase, b pa maand tig wala b rãmb nins sẽn pʋgdã ye.

  •  Kwanzaa tigrã. Sebr a yembr (Encyclopedia of Black Studies) yeelame tɩ yʋʋr ning sẽn yaa Kwanzaa wã “yita Suwayili gom-biis sẽn yaa matunda ya kwanza sẽn dat n yeel tɩ ‘dẽenem biisã’ pʋgẽ, tɩ wilgdẽ tɩ tig-kãngã sɩnga ne dẽenem biisã tigr b sẽn da maand pĩnd wẽndẽ, Afirik soolmẽ wã.” Baa neb kẽer sẽn tagsd tɩ Kwanzaa wã pa tũudum tigrã, sebr a yembr (Encyclopedia of African Religion) pʋgẽ, b mak-a-la ne tigr Afirik nebã sẽn maande. Sebrã yeelame tɩ tig-kãng sasa, b yãkda koodã dẽenem biis “n kõt wẽnnaam-dãmbã la yaab-rãmbã sẽn na yɩl n pʋʋs-b barka.” A paasame: “Kwanzaa wã sẽn yaa Amerik nin-sablsã tigrã sasa me, b kõta yaab-rãmbã kũun sẽn na n yɩl n pʋʋs-b bark la b wilg tɩ b sũur yaa noog ne-ba, bõn-sõma nins fãa b sẽn kõ-bã yĩnga.”

  •  La fête de la mi-automne. Sebr a yembr (Holidays, Festivals, and Celebrations of the World Dictionary) yeelame tɩ yaa “tigr b sẽn maand n waoog kiuugã b sẽn tẽed tɩ yaa wẽn-poakã.” Tigrã sasa, “bũmb a ye zakã pagb sẽn maand yaa wõgemd n waoog wẽn-poakã.”—Religions of the World—A Comprehensive Encyclopedia of Beliefs and Practices.

  •  Norouz (Nowruz) tigrã. “Tig-kãngã sɩnga tũudum b sẽn boond tɩ Zoroastrisme pʋgẽ. Yʋʋmdã pʋgẽ, yaa daar sẽn yaa sõng wʋsg tũudum kãng nebã nifẽ. . . . Nowruzã daare, winto-sʋkã sã n ta, Zoroastrisme tũudmã nebã kɩdemda wĩnto-sʋkã sẽn lebg n wa wã yĩnga, b sẽn boond tɩ [Rapithwin]. B ra tẽedame tɩ kiis nins sẽn yaa waoodã sasa, waoodã tallda wĩnto-sʋkã n tɩ pag tẽngã tẽngre.”—United Nations Educational, Scientific and Cultural Organization.

  •  Shab-e-Yalda tigrã. Sebr a yembr (Sufism in the Secret History of Persia) yeelame tɩ yaa vẽeneg tɩ solstice d’hiver tigrã “tara loees ne vẽenemã wẽnnaam b sẽn boond t’a Mithra wã waoogrã. Neb kẽer tagsdame me tɩ tig-kãngã tara loees ne bũmb nins Rom nebã la Gɛrk-rãmbã sẽn da maand n waoogd wĩntoogã wẽnnaam-dãmbã. b

  •  Thanksgiving (Bark pʋʋsg) tigrã. Tig-kãng me sɩnga ne kẽebgã tig b sẽn da maand pĩnd wẽndẽ n waoogd wẽnnaam-dãmb toɛy-toɛya, wa sẽn yaa to-to ne Kwanzaa wã. Tarẽ-n-tarẽ, “kiris-nebã tũudum toor-toorã neb wa n maanda pĩnd wẽndẽ yel-maandɩ kãensã neb wʋsg sẽn da maandã.”—A Great and Godly Adventure—The Pilgrims and the Myth of the First Thanksgiving.

   Kibs-rãmb sẽn tik tẽeb-ziri zugu, wall tig b sẽn maand n tẽed tɩ wata ne zu-noogo. Biiblã yetame tɩ neb nins “sẽn dɩgend taabl Zu-noog wẽnnaamã yĩngã” naaga “neb nins sẽn basd a Zeova wã” sʋka. (Ezayi 65:11) Rẽ n so t’a Zeova Kaset rãmbã pa maand tig nins sẽn pʋgdã ye.

  •  Ivan Kupala tigrã. Sebr a yembr (The A to Z of Belarus) yeelame yaa: “Sã n yaa neb wʋsg sẽn tẽedã, [Ivan Kupala] wã sasa, dũni wã yiisda a sɩ-wẽnsã fãa, tɩ yaa neb nins sẽn tar daood wʋsg la sẽn yaa zu-nood rãmbã n tõe n modg-b tɩ b maan b sẽn datã.” Sɩngrẽ wã, ra yaa tigr bõn-naands pʋʋsdbã sẽn da maand yʋʋmdã daar ning wĩntoogã sẽn kaoosd n yɩɩdã. La sebr a yembr (Encyclopedia of Contemporary Russian Culture) yeelame tɩ “bõn-naands pʋʋsdbã sẽn wa n lebg kiris-nebã, b rɩk-a lame n tɩ fãoog ne wẽnd-doogã rãmb tigrã [‘Zã sõng tigrã’ sẽn yaa tigr b sẽn maand a Zãmbatiis yĩngã].”

  •  Kiuugã yʋʋm-paalgã (Sinoaambã wall Kooreyẽ-rãmbã yʋʋm-paalgã). Sebr a yembr (Mooncakes and Hungry Ghosts—Festivals of China) yeelame: “Sẽn yɩɩd fãa, yʋʋmdã wakat kãnga, bũmb ning sẽn pak zagsã nebã, zo-rãmbã la neb nins sẽn kĩ ne taabã yaa modg sẽn na yɩl n paam zu-noogo, n waoog wẽnnaam-dãmbã la sɩɩsã, la b pʋʋsd n kotẽ tɩ yʋʋmd ning sẽn watã yɩ bark yʋʋmde.” Woto me, Kooreyẽ-rãmbã yʋʋm-paalgã maaneg “naaga ne yaab-rãmbã waoogre, yel-maandɩ b sẽn maand n digd sɩ-wẽnsã la sẽn na yɩl n paam zu-noog yʋʋm-paalgã pʋgẽ, la b bʋgd bagr n dat n bãng yʋʋm-paalgã sẽn na n wa ne bũmb ninsi.”—Encyclopedia of New Year’s Holidays Worldwide.

   Tig b sẽn maande, b sẽn tẽed tɩ sɩɩg pa kiidã yĩnga. Biiblã wilga vẽeneg tɩ sɩɩgã tõe n kiime. (Ezekɩyɛll 18:4) Rẽ n so t’a Zeova Kaset rãmbã pa maand tig nins sẽn kɩtd tɩ nebã tẽed tɩ sɩɩgã pa kiidã ye. Wala makre:

  •  Sẽn ki-bã daare. Sebr a yembr (New Catholic Encyclopedia) yeelame tɩ “yaa daar b sẽn tẽegd wẽn-sakdb nins sẽn ki wã fãa yelle.” A paasame: “Moayẽnaazã tõre, neb wʋsg ra tagsdame tɩ daar-n-kãnga, sɩɩs nins sẽn be pirgatoaarẽ wã tõe n lebga kɩɩmse, sõoba, poanda la bũmb a taab n wa neb nins sẽn da maan-b wẽng b vɩɩmã wakatã nengẽ.”

  •  Qingming tigrã (Qingming Jie) la Kɩɩmsã tigrã. B maanda tig-kãensã b yiibã fãa sẽn na yɩl n waoog yaab-rãmbã. Sebr a yembr (Celebrating Life Customs Around the World—From Baby Showers to Funerals) yeelame tɩ Qingming Jie wã wakate, “b yõogda rɩɩbo, rãam la ligd-vãad sẽn na yɩl n kɩs sɩd tɩ kom la ko-yũud pa na n yõk sẽn ki-bã, la tɩ ligd me pa na n paoog-b ye.” Sebrã paasame tɩ “kɩɩmsã tigrã kiuugu, sẽn yɩɩd fãa yʋng ning kiuugã sẽn yaa gilgã, [sẽn maand-b tig-kãngã tẽedame] tɩ loees sẽn tar pãng n be sẽn ki-bã ne sẽn vɩ-bã sʋk yʋn-kãng n yɩɩd yʋnd a taabã, tɩ tar yõod tɩ b maan bũmb toor-toor n sigs sẽn ki-bã sũy la b waoog yaab-rãmbã.”

  •  Chuseok tigrã. Sebr a yembr (The Korean Tradition of Religion, Society, and Ethics) yeelame tɩ tig-kãng sasa, “b kõta sẽn ki-bã sɩɩs rɩɩb la divẽ.” B sẽn kõt kũun toor-toorã wilgdame tɩ “b tẽedame tɩ yĩngã kũum poore, sɩɩgã ket n vɩɩme.”

   Tig sẽn naag ne zĩn-dãmb yɛl maanego. Biiblã yetame: “Ned sẽn bʋgd bagre, ned sẽn maand tɩto, ned sẽn baood n na n bãng beoog yɛla, ned sẽn rabsd a taaba, ned sẽn gomd ne zĩn-dãmba, ned sẽn togsd beoog yɛla, la ned sẽn gomd ne kɩɩmse, . . . a Zeova kisa ned ning fãa sẽn maand bõn-kãensã.” (Tõodo 18:10-12) A Zeova Kaset rãmbã sẽn dat n zãag b mens ne zĩn-dãmb yɛlã yĩnga, hal baa ãds-bagrã (ges ãdsã n bãng sẽn wat beoogã) b pa maand Halloween tigrã wall tig nins sẽn pʋgdã ye.

  •  Sẽngalɛ-rãmbã la Tamull-dãmbã yʋʋm-paalgã. “Minimd nins b sẽn sɩng n maand tig-kãngã sasa wã sʋka, . . . bũmb kẽer la b segd n maan wakat takɩ ãds-bagbã sẽn wilgi, n yeel tɩ b sã n maan bõn-kãens wakat kãnga, wata ne zu-noogo.”—Encyclopedia of Sri Lanka.

  •  Songkran tigrã. Yaa tigr b sẽn maand Aazi soolmẽ wã. A yʋʋrã “yita Sãnskrit buud-gomdã gom-bil . . . sẽn dat n yeel tɩ ‘bũmb sẽn kẽnd’ wall ‘bũmb sẽn toeemd’ pʋgẽ. B maanda [tig-kãng] wĩntoogã sẽn wat n pasgd ãd-sull ning ãds-bagbã sẽn boond tɩ Bélier wã sasa.”—Food, Feasts, and Faith—An Encyclopedia of Food Culture in World Religions.

   Tig a Moyiiz Tõogã sẽn da wilg tɩ b segd n maaname, t’a Zeezi maoongã kɩt tɩ sa. Biiblã yetame yaa: “Kirist yaa Tõogã tɛka.” (Rom dãmbã 10:4) Kiris-nebã ket n dɩta a Moyiiz Tõogã b sẽn da kõ pĩnd wẽndẽ Israyɛll nebã yõodo. La b pa maand tig nins yell b sẽn gomd Tõogã pʋgẽ wã ye. Sẽn yɩɩd fãa, tig nins sẽn da sõngd nebã sẽn na yɩl tɩ b wa bãng Mesi wã n bakã, bala Mesi wã zoe n waame. Biiblã yetame: “Bõn-kãens yaa bũmb nins sẽn watã maasem, la bũmbã meng-mengã yaa Kiristã.” (Kolos rãmbã 2:17) Bõn-kãens yĩnga, la sẽn mik tɩ b paasa minimd kẽer sẽn pa zems ne Biiblã sẽn yetã yĩnga, a Zeova Kaset rãmbã pa maand tig nins sẽn pʋgdã ye.

  •  Hanoukka tigrã. Zʋɩf-rãmbã maanda tig-kãngã n tẽegd b sẽn lebs n dɩk Zerizalɛm wẽnd-doogã n kõ Wẽnnaamã. La Biiblã yeelame t’a Zeezi lebga maan-kʋʋdb kãsma, n tʋmd “fu-roog [bɩ, wẽnd-doog] ning sẽn yaa kãseng n yɩɩd la sẽn zems zãng n yɩɩdã pʋgẽ. Fu-ro-kãng pa ninsaalb nus n tilgi, rat n yeel t’a pa be tẽngã zug ka ye.” (Ebre-rãmbã 9:11) Sã n yaa ne kiris-nebã, wẽnd-do-kãng ninsaal nif sẽn pa tõe n yã wã ledga wẽnd-doog ning sẽn da be Zerizalɛmmã.

  •  Rosh ha-Shana tigrã. Yaa Zʋɩf-rãmbã yʋʋmdã pipi daare. Pĩnd wẽndẽ wã, b ra wilga maand toor-toor b sẽn segd n maan tig-kãngã daar n kõ Wẽnnaam. (Sõdbo 29:1-6) La a Zeezi Kirist sẽn yaa Mesi wã “kɩtame tɩ maoong la kũun sa,” tɩ b pa le tar yõod Wẽnnaam nifẽ ye.—Dãniyɛll 9:26, 27.

•   Yaa tigr sẽn kɩtd tɩ tũudum toɛy-toɛy lagemd taab bɩ?

   Biiblã saglga: “Bõe pʋɩɩr n be tẽed ne ned sẽn pa tẽed sʋka? La bõe zems-n-taar n be Wẽnnaam doogã ne bõn-naands sʋka?”—2 Korẽnt rãmbã 6:15-17.

   A Zeova Kaset rãmbã maanda b sẽn tõe fãa sẽn na yɩl tɩ laafɩ zĩnd bãmb ne neb taabã sʋka. B sak n deegame tɩ ned kam fãa tara sor n na n yãk a tũudum. Baa ne rẽ, b pa naagd n maand tig nins sẽn kɩtd tɩ tũudum toɛy-toɛy lagemd taabã ye. Wala makre:

   Tig b sẽn maand n tẽegd tũudum nin-kãsems yelle, wall sẽn dat tɩ tũudum toɛy-toɛy neb naag taab n waoog Wẽnnaam. Wẽnnaam sẽn wa n tall a pĩnd wẽndẽ nin-buiidã n tɩ kẽes tẽng a to pʋgẽ tɩ tẽn-kãng nebã ra tũud wẽnnaam-dãmb a taabã, a yeel a nin-buiidã yaa: “Yãmb pa segd n maan kaool ne bãmb wall ne b wẽnnaam-dãmbã ye. . . . Yãmb sã n tũ b wẽnnaam-dãmbã, hakɩɩka, rẽ na n lebga bẽdg yãmb yĩnga.” (Yikri 23:32, 33) Rẽ n so t’a Zeova Kaset rãmbã pa naagd n maand tig wala b rãmb nins sẽn pʋgdã ye.

  •  Loy Krathong tigrã. Yaa Tayilãnd nebã tigri. Tigrã sasa “nebã rɩkda vãad n maan tɩ yaa wa la-bõonego, n ning buuzi-rãmb wall wisdu, n dɩk n sagl koomẽ. B tagsdame tɩ la-bõonegã sẽn wõnd kom-kogendã na n talla zu-beedã n looge. Sɩd-sɩda, b maanda tig-kãngã n na n tẽeg a Buda yelle.”—Encyclopedia of Buddhism.

  •  La journée nationale de la repentance. Papuwazi Nuvɛll Gine zʋrnall a ye (The National) yeelame tɩ goosneema wã nin-kãseng a yembr n yeel tɩ neb nins sẽn maand tig-kãnga wã “sakda bõn-kãsems nins kiris-nebã sẽn tẽedã.” A paasame tɩ tig-kãng “sõngdame tɩ noy nins kiris-nebã sẽn tũudã paamd pãng tẽngã pʋgẽ.”

  •  Vesak tigrã. “Yaa Budist-rãmbã daar ning sẽn yaa sõng n yɩɩd b ra-sõamyã wã sʋkã. Daar-n-kãnga, b tẽegda a Buda rogmã yelle, a sẽn paam vẽnegrã, a kũumã, wall a sẽn paam Nirvana wã yelle.”—Holidays, Festivals, and Celebrations of the World Dictionary.

   Tig sẽn tik tũudum yel-maandɩ sẽn pa zems ne Biiblã sẽn yetã. A Zeezi yeela tũudum taoor dãmbã yaa: “Yãmb miningã yĩnga, y kɩtame tɩ Wẽnnaam sẽn yeelã lebg zaalem.” A yeelame me tɩ b sẽn waoogd Wẽnnaamã yaa zaalem, bala b zãmsda nebã “ninsaalb tõodo.” (Matiye 15:6, 9) A Zeova Kaset rãmbã sẽn pa reemd ne gom-kãensa wã yĩnga, tũudum tig wʋsg n be tɩ b pa naagd n maandẽ ye.

  •  L’Épiphanie (le Timkat ou la fête des Rois). Sẽn maand-b tig-kãnga wã yetame tɩ b tẽegda ãds-bagbã sẽn wa n kaag a Zeezi wã yelle, wall a Zeezi lisgã yelle. Sebr a yembr (The Christmas Encyclopedia) yeelame tɩ tig-kãngã yaa “tig kẽer bõn-naands pʋʋsdbã sẽn da maand prẽntã wã sasa la b kɩt tɩ lebg kiris-neb tigri. B ra maanda tig-kãens n waoogd ko-zoetmã, kʋɩlsã la kosoodã wẽnnaam-dãmba.” Tigr a to n wõnd-a tɩ b boond tɩ Timkat. Tig-kãng “naaga ne rogem-mikã yɛl wʋsgo.”—Encyclopedia of Society and Culture in the Ancient World.

  •  L’Assomption. Sẽn maand-b tig-kãnga wã tẽedame t’a Zeezi ma a Maari rʋʋ saasẽ ne a yĩn-nemsã. Sebr a yembr (Religion and Society—Encyclopedia of Fundamentalism) yeelame tɩ “egiliizã sɩngrẽ b ra pa mi zãms-kãngã, la b pa gomd a yell Gʋls-sõamyã pʋgẽ me ye.”

  •  L’Immaculée conception. “Gʋls-sõamyã pʋgẽ, b pa yeel vẽeneg t’a [Maari] rogame n pa tar yel-wẽnd ye . . . Yaa Egiliizã rãmb n tags n yeel woto.”—New Catholic Encyclopedia.

  •  No-loeere. Sebr a yembr (New Catholic Encyclopedia) yeelame tɩ yaa “yʋʋmd 300 soabã poore,” rat n yeel tɩ yʋʋm kobs-yi la zak b sẽn gʋls Biiblã n sa wã poor la b yãk wakat tɩ nebã na n weoogd b mens la b loet noore. Sebrã goma no-loeerã pipi daarã yelle, n yeel yaa: “Yɩɩ tũudmã taoor dãmb tigsg ning sẽn zĩnd Bénévent tẽngã, yʋʋmd 1091 wã tɛk la minung ning sẽn yaa yãk tompeglem n ning kiris-nebã rɩẽ Mercredi des cendres daarã lebg bũmb b sẽn segd n maand dũniyã gill zugu.”

  •  Mesqel tigrã. Sebr a yembr (Encyclopedia of Society and Culture in the Medieval World) yeelame tɩ tig-kãngã sẽn yaa Etiyopi nebã n maandã daare, b kɩdemda sũ-noog “b sẽn yã Pik sɩd-sɩdã (pik ning zug b sẽn ka Kiristã), n yõgend bug-rãmb n saood n gilgd-ba.” Sẽn be gũbsẽ wã yaa tõnd n paase. La a Zeova Kaset rãmbã pa tũnugd ne pikã n pʋʋsd Wẽnnaam ye.

•   Rẽ yĩnga, kibsã pa sẽn na n pẽg ninsaala, siglg wall tẽng sɩda?

   Biiblã saglga: “Ad a Zeova sẽn yeele: ‘Kãab-wẽng bee ne ned ning sẽn teegd ninsaalba. Yaa sẽn teegd-a ninsaal pãnga, sẽn basd-a a Zeova’” wã.—Zeremi 17:5.

   Baa ne a Zeova Kaset rãmbã sẽn wilgd tɩ b sũur nooma ne neb a taabã, hal n pʋʋsd b yĩngã, b pa naagd n maand tig wala b rãmb nins yell b sẽn gomd tẽngrã ye.

   Kibs sẽn waoogd naab bɩ nin-kãseng a to. B yeta Biiblã pʋgẽ yaa: “Yãmb mens sõngr yĩnga, bas-y ninsaal teegre, t’a yaa faoog wa pemsmã sẽn yit a yõ-bogdẽ wã bala. Bõe tɩ y na n teeg-a?” (Ezayi 2:22) Wala makre, a Zeova Kaset rãmbã pa maand rĩm wall rĩm-poak rogem daar tẽegr kibs ye.

   Tigr b sẽn maand tẽngã darpo yĩnga. A Zeova Kaset rãmbã pa maand tigr tẽngã darpo yĩng ye. Bõe yĩnga? Bala b yeta Biiblã pʋgẽ yaa: “Zãag-y y mens ne bõn-naands pʋʋsgo.” (1 Zã 5:21) Neb kẽer pa tagsd tɩ tẽng darpo yaa bõn-naandg b sẽn pʋʋsd ye. La kʋdemd yɛl-mit a Carlton Hayes yeelame yaa: “Tẽng-n-biilmã pʋgẽ, darpo wã lebga bũmb b sẽn waoogd wʋsgo.”

   Kibs-rãmb b sẽn maand nin-sõamyã wã yĩnga. Wẽn-zoɛt a ye sẽn wa n wõgemd tẽn-tʋmd a Pɩyɛɛr taoorã, a manesem yɩɩ wãna? Biiblã yeelame yaa: “A Pɩyɛɛr roog-a lame n yeele: ‘Yik tɩ ma-me yaa ninsaal bala.’” (Tʋʋma 10:25, 26) Sẽn mik t’a Pɩyɛɛr la tẽn-tʋmdb a taabã pa sak tɩ b sẽn waoogd-b to-to wã loog nugã, a Zeova Kaset rãmbã pa naagd n maand kibs-rãmb sẽn waoogd neb nins b sẽn boond tɩ nin-sõamyã wã ye. Ad kibs-rãmb kẽere:

  •  Tusẽ. “Yaa tigr b sẽn maand n waoogd nin-sõamyã wã fãa . . . D pa mi tig-kãngã sẽn sɩng to-to ye.”—New Catholic Encyclopedia.

  •  La fête de Notre-Dame de Guadalupe. Yaa kibs b sẽn maand n waoogd “la sainte patronne du Mexique.” Neb kẽer tẽedame tɩ yaa a Zeezi ma a Maari la b boond woto. Nebã yetame t’a vẽneg a meng ne yel-solemd yʋʋmd 1531 wã, tɩ ka-koaad yã-a.—The Greenwood Encyclopedia of Latino Literature.

  •  Yʋʋr sõng kibsã. Sebr a yembr (Celebrating Life Customs Around the World—From Baby Showers to Funeral) pʋgẽ, b yetame yaa: “Biig yʋʋr sõng kibs yaa daar ning b sẽn maan kibs n waoogd nin-sõng ning yʋʋr b sẽn dɩk n pʋd-a a soobã wall a kõnfirmasiyõ wã daarã.” B paasame yaa: “B maanda tũudum yel-maandɩ toor-toor daar-n-kãnga.”

   Kibs-rãmb b sẽn maand politikã sigls yĩnga, wall b sẽn dat tɩ yɛlã maneg yĩnga. Biiblã yetame yaa: “Fo sẽn baood soondg zĩig a Zeova nengẽ n são f sẽn teegd ninsaalba.” (Yɩɩn-sõamyã 118:8, 9) A Zeova Kaset rãmbã pa naagd n maand Journée de la femme bɩ Journée de la jeunesse kibs-rãmbã sẽn teend politik siglsi, wall sẽn dat tɩ yɛlã toeemã ye. Bala b pa rat n naag n maan bũmb sẽn wilgd tɩ b teega ninsaalbã, la tɩ b pa teeg Wẽnnaam t’a welg ãdem-biisã zu-loees ye. Yaa rẽ yĩng me la b sẽn pa maand jour de l’Émancipation kibsã bɩ kibs a taab sẽn wõnd rẽ wã. B gũuda Wẽnnaam Rĩungã sẽn na n wa kɩt tɩ bu-welsgã, zãmbã la wẽgbã sa wã.—Rom dãmbã 2:11; 8:21.

•   Tigrã yaa sẽn na yɩl n wilg tɩ tẽng wall buud ning yɩɩda a taabã bɩ?

   Biiblã saglga: ‘Wẽnnaam pa bakd neda, la buud fãa pʋgẽ, ned ning sẽn zoet-a la a maand sẽn yaa tɩrg tata a yam.’—Tʋʋma 10:34, 35.

   Baa a Zeova Kaset rãmb wʋsg sũur sẽn noom ne b ba-yirã, b pa naagd n maand kibs-rãmb sẽn wilgd tɩ tẽng wall buud ning yɩɩda a taabã ye.

   Kibs-rãmb b sẽn maand n pẽgd tẽngã sodaase. A Zeezi pa sagl a karen-biisã tɩ b teel zabr ye. A pʋd n yeel-b lame yaa: “Nong-y y bɛɛbã, la y pʋʋsd neb nins sẽn namsd yãmbã yĩnga.” (Matiye 5:44) Rẽ n so t’a Zeova Kaset rãmbã pa naagd n maand kibs-rãmb sẽn pẽgd sodaasã ye. Wala makre, kibs-rãmb nins sẽn pʋgdã.

  •  Anzac Daarã. “Anzac rat n yeelame tɩ Australian and New Zealand Army Corps (Ostrali ne Nuvɛll Zelãnd sodaasã sulli). Bilf-bilfu, Anzac Daarã wa n lebga daar b sẽn tẽegd neb nins b sẽn kʋ zabr sasa wã yelle.”—Historical Dictionary of Australia.

  •  L’Armistice (ou jour du Souvenir). B maanda tig-kãngã n na n waoog “sodaas nins sẽn dɩk b retrɛtã la neb nins sẽn ki b tẽngã yʋʋr yĩng zabr sasa wã.”—Encyclopædia Britannica.

   Tig b sẽn maand n tẽegd yel-kãsems sẽn maan tẽngã pʋgẽ, wall tẽngã soog-m-meng yĩnga. A Zeezi goma a karen-biisã yell n yeel yaa: “Bãmb pa dũniyã rẽnd wa ma-me sẽn pa dũniyã rẽndã.” (Zã 17:16) Baa a Zeova Kaset rãmbã sẽn zãmsd tẽnsã kʋdemd yɛl ne sũ-noogã, b pa naagd n maand tig kẽer ye. Wala makre:

  •  L’Australia Day (le “Jour de l’Australie”). Sebr a yembr (Worldmark Encyclopedia of Cultures and Daily Life) yeelame tɩ b maanda tig-kãngã n tẽegd “yʋʋmd 1788 wã daar ning Ãngletɛɛr sodaasã sẽn tilg b drapo wã, n yeel tɩ Ostrali lebga bãmb soolmã.”

  •  Guy Fawkes Day (le “jour de Guy Fawkes”). Tig-kãngã yaa “daar tẽngã tõr sẽn tẽegd a Guy Fawkes ne Katolik-rãmb a taab sẽn mak yʋʋmd 1605 n na n ning Ãngletɛɛr parlema wã roog bugum n kʋ rĩm a Jacques I^er ne neb a taab n pa tõogã.”—A Dictionary of English Folklore.

  •  Tẽngã soog-m-meng kibsa. Tẽns wʋsg pʋgẽ, yaa “daar b sẽn yãk tɩ nin-buiidã maand tigr n tẽegd tẽngã soog-m-mengã sɩngr yelle.”—Merriam-Webster’s Unabridged Dictionary.

•   Tigrã sasa, nebã pa tʋmd tʋʋm-dẽgd la b maand yaar sɩda?

   Biiblã saglga: “Wakat sẽn loogã yãmb maana dũniyã nebã raabo, la masã sekame. Yãmb da naaga b nin-yoolem tʋʋmã pʋgẽ, b tʋʋm-wẽnsã ratem, b rã-tɩgrã, b reem sẽn naag ne tʋʋm-yoodã, b sẽn yũud rãam n wagsd taabã, la b bõn-naands pʋʋsgã sẽn yaa bũmb sẽn kɩɩsd tõogã pʋgẽ.”—1 Pɩyɛɛr 4:3.

   A Zeova Kaset rãmbã sẽn tũud sagl-kãnga wã yĩnga, tigr sã n naag ne rã-tɩgr la reem sẽn naag ne tʋʋm-yoodo, b pa sakd n maan tig-kãng ye. A Zeova Kaset rãmbã nong n tigimda ne b zo-rãmb n kokd pemsem tɩ b sũy noomẽ. B sã n mi n tigimd taab n na n deeme, b tõe n yãka yam n yũ rãam, la b yũudame tɩ zemse. B maanda b sẽn tõe fãa n tũud Biiblã saglg ning sẽn yete: “Yãmb sã n dɩtẽ wall y sã n yũuda, wall y sẽn maand bũmb ning fãa, bɩ y maan fãa Wẽnnaam waoogr yĩnga.”—1 Korẽnt rãmbã 10:31.

   Rẽ n so t’a Zeova Kaset rãmbã pa naagd n maand karnavall-dãmba, wall kibs-rãmb a woto buud sẽn kɩtd tɩ nebã tʋmd tʋʋm-dẽgd Biiblã sẽn gɩdgã ye. Yaa woto me ne Purim sẽn yaa Zʋɩf-rãmbã kibsã. Yʋʋm wʋsg pʋgẽ, b ra maanda Purim kibsã n tẽegd Zʋɩf-rãmbã sẽn paam fãagr ning yʋʋm kobs-naas la zak sẽn deng a Zeezi rogmã. La sebr a yembr (Essential Judaism) pʋgẽ b yeelame tɩ masã, “Zʋɩf-rãmbã maaname t’a wõnd Mardi Gras wã bɩ karnavalle.” Sẽn maand-b tigrã nong n “yera fut sẽn na yɩl tɩ nebã ra bãng-ba (rapã wae n yelgda pagb futu), b maanda yaare, b yũuda rãam tɩ loogdẽ, la b maand bur wʋsgo.”

 Ayo. Biiblã yetame tɩ d segd n nonga d zakã rãmb la d waoogd-ba, baa b tũudmã sẽn yaa a soaba. (1 Pɩyɛɛr 3:1, 2, 7) A Zeova Kaset soab sã n wa pa le naagd n maand kibs ninga, a roagdb kẽer sũy tõe n yikame wall n sãame. B tõe n tagsdame meng t’a zãmb-b lame. Rẽ n so t’a Zeova Kaset rãmb wʋsg yãk yam n sõs ne b roagdbã n wilg-b tɩ b ket nong-b lame, n maag b yĩng n wilg-b bũmb ning sẽn kɩt tɩ b yãk yam n pa le maand tigrã, la b kẽnd n kaagd-b wakat a taaba.

 Ayo. B tagsdame tɩ yaa ned kam fãa n segd n yãk a toorẽ yam. (Zozuwe 24:15) A Zeova Kaset rãmbã ‘waoogda nebã buud fãa,’ baa b tũudmã sẽn yaa a soaba.—1 Pɩyɛɛr 2:17.