Goam sẽn pa sɩda: A Zeova Kaset rãmbã pa maand Nowɛlle, bala, b pa tẽed a Zeezi ye.

 Sɩdã: Tõnd yaa kiris-neba. Tõnd tẽedame tɩ yaa a Zeezi Kiris maasem yĩng bal la ned tõe n paam fãagre.—Tʋʋmã 4:12.

 Goam sẽn pa sɩda: Yãmb sẽn zãmsd y nebã tɩ b ra maan Nowɛllã, yãmb welgda zak neb ne taaba.

 Sɩdã: Tõnd nonga zagsã neb wʋsgo, n tũnugd ne Biiblã n sõngd-b tɩ b zagsã pʋsẽ vɩɩm tall yamleoogo.

 Goam sẽn pa sɩda: Yãmb sẽn pa maand Nowɛllã, y pa paamd n wilg tɩ y yaa kõatba, neb sẽn dat tɩ laafɩ zĩnd tẽngã zugu, la sẽn saagd y taabã neer ye.

 Sɩdã: Tõnd maoodame n wilgd wakat fãa tɩ d yaa kõatba, la neb sẽn baood laafɩ. (Yel-bũnã 11:25; Rom-dãmbã 12:18) Wala makre, tõnd sẽn maand d tigissã to-to, la d sẽn moond koɛɛgã to-to wã, zemsa ne a Zeezi saglga. A ra yeela woto: “Yãmb deega zaalem, bɩ y kõ zaalem.” (Matye 10:8) Sẽn paase, tõnd wilgda nebã tɩ yaa Wẽnnaam Rĩungã n sɩd tõe n kɩt tɩ laafɩ zĩnd tẽngã zugu.—Matye 10:7.

•   A Zeezi yeelame tɩ d tẽegd a kũumã yelle, la a pa yeel tɩ d tẽegd a rogmã daar ye.—Luk 22:19, 20.

•   A Zeezi tʋm-tʋmdbã ne pipi kiris-nebã pa maan Nowɛll ye. Sebr a ye (Le livre des superstitions. Mythes, croyances et légendes) yeela woto: “Yaa yʋʋmd 300 la zakã pʋgẽ la egiliizã-rãmb lugl Kiris rogmã tẽegr kibsa,” rat n yeel t’a Zeezi yaoolem tʋm-tʋmdbã kũum poore.

•   Bũmb pa be n wilgd t’a Zeezi roga yʋʋm-sar kiuug rasem 25 ye. Biiblã pa wilg a sẽn dog daar ning ye.

•   Tõnd kɩsa sɩd tɩ Nowɛllã pa ta Wẽnnaam daab ye. Bala, a tika rog-n-mik tũudum la a yel-maandɩ.—2 Korẽnt-rãmbã 6:17.

 Neb wʋsg miime tɩ Nowɛllã yaa rog-n-mik tũudum yel-maandɩ, la t’a pa tik Biiblã ye. Baasgo, b maanda Nowɛllã. Nin-kãens tõe n soka b mens woto: Bõe yĩng tɩ kiris-nebã maand tigr neb wʋsg sẽn pa nonge? Rẽ yĩnga yaa tɩlɛ tɩ d maan Nowɛll bɩ?

 Biiblã sagenda tõnd tɩ d yɩ gũusdba, la d modg n paam “yam-wek-paalle.” (Rom-dãmbã 12:1, 2) A wilgd-d lame tɩ d nong sɩdã. (Zã 4:23, 24) Woto wã, tõnd modgdame n tũud Biiblã saglsã, baa rẽ sã n na n kɩtame tɩ neb wʋsg kisg tõndo.

 Baa tõnd sẽn pa maand Nowɛllã, d miime tɩ bee ne ned fãa t’a maan a sẽn date. D pa kẽesd d toog Nowɛllã pʋgẽ ye.