A Zeezi sẽn kẽng wẽnd-doogẽ wã a sẽn wa n tar yʋʋm 12, n tɩ sõs ne karen-saam-dãmbã la a sok-b sogsgã taa yʋʋm 17 masã. Dẽnd d bee yʋʋmd 29 soabã pʋgẽ. Neb wʋsg ra gomda a Zã yelle. A ra saagda tẽns nins fãa sẽn pẽ Zʋrdẽ kʋɩlgã, n moond koɛɛga.

A Zã mengã sẽn da yaa to-to wã la a no-goamã kɩtame t’a ra yaa toor fasɩ. A futã wʋga ne yʋgemd kõbdo. A sẽbdgã yaa gãongo. A rɩɩb ra yaa sʋy ne weoogẽ sɩɩdo. A ra moond n yetame tɩ bõe? A ra yeta woto: “Tek-y yam n kos sugr tɩ arzãn [“saasẽ,” MN] soolem kolgame.”—Matye 3:2.

A Zã goamã kẽe neb nins sẽn wat n kelgd-a wã. Wʋsg bãngame tɩ yaa tɩlɛ tɩ b tek yam n kos sugri, rat n yeel tɩ n toeem b tagsa wã la b yel-manesmã, n bas tʋʋm-wẽnsã. Nebã yii Zeruzalɛm ne Zʋʋde la tẽns nins sẽn gũbg Zʋrdẽ kʋɩlgã n wa a Zã nengẽ. (Matye 3:5) Wʋsg sẽn kelg a Zã goamã, b teka yam n kos sugri. A lis-b-la Zʋrdẽ kʋɩlgẽ wã. Bõe yĩnga?

A Zã sã n lis neda, wilgdame t’a soab teka yam n kos sugri, a sẽn kɩɩs tõod nins Wẽnnaam sẽn da kõ Israyɛll nebã. (Tʋʋmã 19:4) La a zãgsame n pa lis neb sãnda ye. Wala makre, tũudmã taoor dãmb kẽer waa a Zã nengẽ. Yaa Fariziẽ-rãmb la Saduuseẽ-rãmba. La a Zã yeel-b lame tɩ b yaa “wag-toos buudu.” A paasa woto: “Bɩ y wom biis sẽn zems neb sẽn tek yam n kos sugri, la y ra tags t’a Abrahaam sẽn yaa yãmb ba wã sekame ye. Bala, mam yeta yãmb tɩ Wẽnnaam tõe n dɩka kug-kãensã n kɩt tɩ b lebg a Abrahaam kamba. Lar zoe n bee tɩɩs yẽgẽ moasã. B na n kɛɛga tɩɩg ning fãa sẽn ka womd bi-sõamyã n lob bugmẽ.”—Matye 3:7-10.

Nebã sẽn da kaoogd n wat a Zã nengẽ, t’a goamã me ra kẽed b sũyã sõma, tɩ wʋsg paamd koom lisgã, zʋɩf-rãmbã tʋma maan-kʋʋdbã ne Levi rãmbã tɩ b wa sok-a yaa: “Fo yaa ãnd soabã?”

A Zã yeel-b lame: “Mam ka Kirisã ye.”

La b leb n sok-a lame yaa: “Dẽ wã, fo yaa ãnda? Fo yaa a Eli bɩ?”

A leokame: “Mam ka a Eli ye.”

B sok-a lame yɛs tɩ: “Foom la Wẽnnaam no-rɛɛsã bɩ?” Yaa sẽn na yɩl n bãng sã n yaa yẽ la no-rɛɛs ning a Moyiiz sẽn yeel t’a watame wã.—Tõodo 18:15, 18.

A Zã leokame tɩ ayo.

La b le sok-a lame: “Foom la ãnda, tɩ tõnd tõe n tɩ leok neb nins sẽn tʋm-b tõndã! Fo mengã yetame tɩ fo yaa ãnda?” A Zã leoka woto: “Mam yaa soab ning sẽn kelemd we-rasempʋɩɩgẽ n yetẽ: ‘Rems-y Zu-soabã sor tɩ yɩ tɩrga, wa Wẽnnaam no-rɛɛs a Ezayi sẽn yeelã.’”—Zã 1:19-23.

Rẽ masã la b sok a Zã yaa: “Bõe yĩng tɩ fo lisd nebã, fo sã n ka Kiris bɩ a Eli bɩ Wẽnnaam no-rɛɛsã?” A Zã sẽn yeel-b bũmb ningã ra segd n sõng-b lame tɩ b tagse. A yeelame: “Maam, mam lisda yãmb koomẽ. La yãmb sʋkã, ned a yembr n be beenẽ yãmb sẽn ka mi ye. Soab-kãng pʋgenda maam.”—Zã 1:25-27.

A Zã gomdã wilgda vẽeneg tɩ yẽ segenda sore, n sõngd nebã tɩ b maneg b sũyã, tɩ Mesi wã sã n wa bɩ b sak n deeg tɩ yẽ la Mesi wã, Rĩm ning Wẽnnaam sẽn yãkã. A Zã goma Mesi wã yelle, n yeel woto: “Sẽn pʋgend-a maam n watẽ wã yɩɩda maam, tɩ mam pʋs n pa zems tɩ logs bãmb neooda sẽbds ye.” (Matye 3:11) A Zã yeelame meng yaa: “Ned ning sẽn pʋgend maam n watẽ wã yɩɩda maam, bala, b renga maam n beẽ.”—Zã 1:15.

Dẽnd a Zã sẽn da moond n yet nebã tɩ b “tek yam n kos sugr tɩ arzãn soolem kolgame” wã, a ra bee bʋʋm. (Matye 3:2) Yaa sẽn na yɩl tɩ nebã fãa bãng t’a Zeezi Kirisi, Wẽnnaam sẽn yãk a soab t’a na n yɩ Rĩmã na n sɩnga a tʋʋmdã ka la bilfu.