A Zãmbatiis sẽn sɩng a koɛɛgã mooneg zemsa kiis a yoob masã. A Zeezi kẽnga a nengẽ Zʋrdẽ kʋɩlgẽ wã. Rẽ t’a Zeezi tara yʋʋm 30. Bõe yĩng t’a kẽng a Zã nengẽ? Pa sẽn na n tɩ kaag-a ye. Leb n pa sẽn na n bãng a tʋʋmdã kibar me ye. A Zeezi kẽngame n na n tɩ kos a Zã t’a lis-a.

A Zã zãgsame, la a bee bʋʋm. Ad a sẽn yeele: “Yaa maam n tog n wa yãmb nengẽ tɩ yãmb lis maam, tɩ yãmb wat mam nengẽ?” (Matye 3:14) A Zã ra miime t’a Zeezi yaa Wẽnnaam Biig sẽn ka to. Tẽeg-y bũmb ning sẽn maane, a Maari sẽn wa n tar a Zeezi pʋga, n kẽng a Elizabɛt sẽn yaa a Zã ma nengẽ wã. A sẽn ta wã, biigã sẽn da be a Elizabɛt pʋgẽ wã virsa ne sũ-noogo. Sãmbg kae t’a Elizabɛt wa n dɩka yellã n togs a Zã. Tõe t’a Zã wʋmame me tɩ malɛk n deng n togs a Zeezi rogmã, la t’a rogmã yʋngo, malɛgs n puk n togs pe-kɩɩmb sẽn da be weoogẽ.

A Zã ra miime tɩ yẽ sã n lis neda, wilgdame t’a soab teka yam n kos sugr a yel-wẽnã yĩnga. A Zeezi yaool n pa tar yel-wẽnd ye. Baa a Zã sẽn zãgsã, a Zeezi kell n pẽdgame n yeel yaa: “Bas tɩ yɩ a woto, bala, a zemsame tɩ tõnd pids bũmb nins fãa sẽn yaa tɩrse.”—Matye 3:15.

Bõe yĩng t’a Zeezi ra segd n paam koom lisgu? A Zeezi lisgã pa wilgd t’a teka yam n kos sugr a yel-wẽn yĩng ye. Wilgdame t’a waame masã n na n maan a Ba wã raabo. (Ebre-rãmbã 10:5-7) A Zeezi ra yaa ra-wãada. La wakat ra taame t’a segd n sɩng tʋʋmd ning a Ba sẽn be saasẽ wã sẽn tʋm-a t’a wa maanã. Yãmb tagsdame t’a Zã ra gũudame tɩ yel-solemd maan a Zeezi lisgã sasa bɩ?

A Zã meng yeelame: “Sẽn tʋm-a maam tɩ m wa lis nebã koomẽ wã yeela maam yaa: ‘Fo sẽn na n yãnd ned ning tɩ Sɩɩg-sõng sig n pa a soab zugã, bɩ f bãng tɩ yaa yẽnda n lisd nebã Sɩɩg-sõng pʋgẽ.’” (Zã 1:33) Dẽnd a Zã ra miime tɩ yẽ sẽn lisd-b rãmbã sʋka, ned a ye zug la Wẽnnaam vʋʋsem sõngã na n sigi. Yɩɩ a Zeezi. Wõnda pa ling a Zã ye. A Zeezi sẽn paam lisg koomẽ wã n lebg n pukdẽ, a Zã sɩd yãa “Wẽnnaam Sɩɩg sẽn wẽnd wall t’a sigd [a Zeezi] zugu.”—Matye 3:16.

La pa yel-solem-kãngã bal n maan a Zeezi lisgẽ wã ye. B yeelame me tɩ “yĩngr pakame.” Wõnda yaa sẽn na n wilg tɩ yaa wakat kãng la a Zeezi pʋ-tẽerã yok-yã, t’a lebg n tẽeg bũmb nins fãa a sẽn da maand a sẽn wa n be saasẽ wã. Masã wã, a Zeezi tẽra a vɩɩmã sẽn da yaa to-to a sẽn da yaa malɛk n be saasẽ wã, la bũmb nins fãa Wẽnnaam sẽn zãms-a nand t’a wa tẽngã zugã.

Sẽn paase, koɛɛg n yi saasẽ n yeele: “Ada yaa mam Bi-ribl-nongr sẽn ta mam yam zãnga.” (Matye 3:17) Yɩɩ ãnd koɛɛga? Pa tõe n yɩ a Zeezi mengã koɛɛg ye. Bala a ra yasa be ne a Zã. Yaa Wẽnnaam koɛɛga. Vẽenega, a Zeezi yaa Wẽnnaam Biiga. A pa Wẽnnaam ye.

Wa d yaab a Ãdem, a Zeezi yaa Wẽnnaam bi-ribl sẽn yaa ninsaala. Karen-biig a Luk sẽn togs bũmb ning sẽn maan a Zeezi lisgẽ wã n sa, a yeela woto: “A Zeezi sẽn wa n na n sɩng b tʋʋmdã, rẽ tɩ b rag n tara yʋʋm pis-tã sẽnẽ. Bãmb da yaa a Zozɛf biig wa nebã sẽn dag n tagsdã. A Zozɛf rag n yaa a Heli biiga, . . . sẽn yaa a Davɩɩd biiga, . . . sẽn yaa a Abrahaam biiga, . . . sẽn yaa a Nowe biiga, . . . sẽn yaa a Ãdem biiga, sẽn yaa Wẽnnaam biigã.”—Luk 3:23-38.

Dẽnd, a Zeezi ra yaa wa a Ãdem, a ra yaa Wẽnnaam bi-ribl sẽn yaa ninsaala. A Zeezi sẽn deeg lisgã, a bãngame t’a yaa Wẽnnaam Biiga, la t’a na n wa tɩ vɩɩmda saasẽ. Dẽnd masã, yẽ bal n da tõe n sõng nebã tɩ b sɩd bãng Wẽnnaam sõma, la a wilg-b b sẽn segd n maan n wa paam vɩɩm. A na n sɩnga tʋʋmd sẽn na n tall n tãag b sẽn na n kʋ-a tɩ yɩ maoong n dol ninsaalbã yel-wẽnã.