A Zeezi keta zãn kibsẽ wã Zeruzalɛm. A sũurã noomame, bala ‘neb kʋʋngã sʋka, wʋsg tẽe-a lame.’ La ra pa noom tũudmã taoor dãmb ye. B tʋma gũudb tɩ b wa n na n yõk-a. (Zã 7:31, 32) La a pa zoe n solg ye.

A Zeezi kell n paa Zeruzalɛm n sõs ne nebã. A yeel-b lame yaa: “Mam ket n bee ne yãmb wakat bilf yĩng bala, la m na n leba sẽn tʋm-a maamã nengẽ. Yãmb na n baoo maam, la y ka na n yãnd maam ye, la mam sẽn na n zĩnd zĩig ningã, yãmb ka tõe n wa be ye.” (Zã 7:33, 34) Zʋɩf-rãmbã pa wʋm a gomdã võor ye. Rẽ n so tɩ b gom ne taab n yeele: “A na n kẽe yɛ tɩ tõnd da yãnd-a? A na n kẽnga Zʋɩf-rãmb nins sẽn sãeeg n be Gɛrk-rãmbã sʋka nengẽ n tɩ zãms Gɛrk-rãmbã bɩ? A sẽn yeel tɩ tõnd na n bao-a lame n ka yã, la tɩ tõnd ka tõe n wa zĩig ning a sẽn na n zĩndẽ wã, gom-kãng võor yaa bõe?” (Zã 7:35, 36) La a Zeezi ra gomda a kũumã yelle, n paas a sẽn na n vʋʋg n kẽng saasẽ wã. A bɛɛbã pa tõe n tũ-a n kẽng be ye.

Kibsã rasem a yopoe soabã wa n taame. Kibsã sasa, yibeoog fãa, maan-kʋʋd n yãkd koom Siloam bãkẽ wã, n daag tɩ sedg n sig wẽnd-doogã tẽn-kugrã tẽngre. Wõnda a Zeezi ra rat n tẽega nebã minung kãngã. Rẽ n so t’a zẽk a koɛɛg n yeele: “Bɩ ko-yũud sẽn tar ned ning wa mam nengẽ n yũ. Kʋɩlse, b koom sẽn kõt vɩɩm na n yii ned ning sẽn tẽed maamã pʋgẽ, wa Wẽnnaam gʋls-sõamyã sẽn yetã.”—Zã 7:37, 38.

A Zeezi ra gomda bũmb sẽn na n maane, Wẽnnaam sã n wa zae a karen-biisã ne a vʋʋsem sõngã tɩ b tõe n paam n kẽng saasẽ. Yaa yʋʋmd ning sẽn pʋglã la gom-kãngã pids-yã. A kũumã poore, Pãntekotã sasa, a karen-biisã sɩd paama zaeebo, n sɩng n zãmsd nebã sɩdã Wẽnnaam zugu. Rẽ tɛk la koom sẽn kõt vɩɩmã sɩng n bundẽ, tɩ neb wʋsg na n paam n yũ.

Nebã sẽn kelg a Zeezi goamã, kẽer yeela woto: “Dao-kãngã sɩd yaa Wẽnnaam no-rɛɛsa.” Yaa no-rɛɛs ning b sẽn da reng n togs t’a watame, la t’a na n yɩɩga a Moyiizã yell la b sẽn gomdã. Sãnda me ra yetame yaa: “Dao-kãngã yaa Kirisã.” La neb a taab yẽ ra sokda woto: “Dẽ yĩnga, sɩd yaa Galɩle la Kirisã tog n yi sɩda? Wẽnnaam gʋls-sõamyã ka yeel tɩ Kirisã na n yɩɩ a Davɩɩd yagenga, n dog Betlehɛm sẽn yaa a Davɩɩd tẽngã sɩda?”—Zã 7:40-42.

Ra lebga no-koɛɛm kʋʋngã sʋka. Baa kẽer sẽn da rat tɩ b yõk a Zeezi wã, ned pa sɩɩs-a ye. Gũudbã sẽn leb tũudmã taoor dãmb nengẽ n pa tall a Zeezi n wa wã, maan-kʋʋdbã kãsem-dãmbã ne Fariizẽ-dãmbã sok-b lame yaa: ‘Bõe tɩ y ka tall a Zeezi n wa?’ B leokame: “Ned nan ka gom wa rao-kãngã ye.” Tũudmã taoor dãmb sũy puugame tɩ b gom n paoog gũudbã. B yeel-b lame yaa: “A tõog n belga yãmb me n tõog la? Dẽ yĩnga, naab bɩ Fariizẽ baa a yembr tãa beeme n tẽ bãmb sɩda? Sã n yaa neb kʋʋngã sẽn ka mi tõoga, b yaa neb kãab-wẽng sẽn be b zutu.”—Zã 7:45-49.

Rẽ la a Nikodɛm sẽn yaa Fariizẽ, n leb n yaa zʋɩf-rãmbã bʋ-kaoodb sullã nedã tall raoodo, n gom n sõng a Zeezi. Na maan yʋʋm a yiib la pʋɩ-sʋk woto, a Nikodɛm ra kẽnga a Zeezi nengẽ ne yʋngo, n sõs ne-a n wilg t’a tẽed-a lame. A Nikodɛm yeela tũudmã taoor dãmb yaa: “Dẽ yĩnga, tõnd tõodã kaooda ned bʋʋd tɩ d ka reng n kelg a soaba, la d bãng bũmb ning a sẽn maanã sɩda?” La b leok-a lame yaa: “Fo me yaa Galɩle ned la? Vɛɛs sõama n gese, la f na yãnd tɩ Wẽnnaam no-rɛɛs ka yit Galɩle ye.”—Zã 7:51, 52.

Gʋls-sõamyã pʋgẽ, b pa togs vẽeneg tɩ no-rɛɛs n na n yi Galɩle ye. La b yaool n wilgame tɩ Kirisã na n yii be. No-rɛɛsdbã ra yeelame tɩ “Galɩle, bu-zẽms sẽn vɩ a pʋgẽ” wã na n yãa “vẽen-kãsenga.” (Ezayi 8:23–9:1; Matye 4:13-17) Sẽn paase, a Zeezi roga Betlehɛm, n le yaa a Davɩɩd yagenga, wa b sẽn da reng n togsã. Tõe tɩ Fariizẽ-rãmbã ra mii rẽ. Sẽn yaa a soab fãa, wõnda yaa bãmb n kɩt tɩ nebã ra tar tags-kɛg a Zeezi zugu.