A Zeezi sẽn sõs ne nebã tãngã zug n sɛ wã, a kẽnga Kapɛrnawom. Beenẽ zʋɩf-rãmbã kãsem-dãmb kẽer n wa a nengẽ. Rao a ye sẽn ka Israyɛll ned n tʋm-ba. Raoã yaa Rom sodaas koabg naaba.

Sodaas naabã tʋm-tʋmd a sẽn nong wʋsg n da bẽed hal tɩ rat n tũ ne a yõore. Baa naabã sẽn da yaa bu-zẽng nedã, a baoo sõngr a Zeezi nengẽ. Zʋɩf-rãmbã yeela a Zeezi tɩ sodaas naabã tʋm-tʋmd n “ki bogre n gãe yiri, la a namsda wʋsgo.” (Matye 8:6) Zʋɩf-rãmbã kãsem-dãmb yeela a Zeezi tɩ zemsame t’a sõng sodaas naabã. B yeela woto: “Bala, yẽnda nonga tõnd buudã, la yaa yẽnda n me tõnd karen-doogã.”—Luk 7:4, 5.

Tao-tao bala, a Zeezi ne kãsem-dãmbã rɩka sor n dabd sodaas naabã zakẽ. La b sẽn wa n kolgã, a tʋma a zo-rãmb tɩ b tɩ yeel a Zeezi yaa: “Zu-soaba, da nams-y y meng a woto ye. Bala, mam ka zems tɩ yãmb kẽ mam zakẽ ye. Yaa woto yĩng me n kɩt tɩ mam ka tags tɩ mam zemsame tɩ wa yãmb nengẽ m toorã.” (Luk 7:6, 7) Naab la sẽn gomd woto wã. Ad yaa sik-m-meng tɛkẽ! Leb n wilgdame t’a yaa toor ne Rom neb a taabã sẽn da namsd b yembsã wʋsgã.—Matye 8:9.

Sodaas naabã ra miime tɩ zʋɩf-rãmbã ra pa sakd n naag bu-zẽmsã bɩ n kẽ b zakẽ ye. (Tʋʋmã 10:28) Tõeeme tɩ yaa rẽ yĩng la a sẽn kɩt t’a zo-rãmbã yeel a Zeezi woto: “Yãmb ye n gom bala, la mam tʋmtʋmdã na n paama laafɩ.”—Luk 7:7.

A Zeezi sũur yɩɩ noog wʋsg ne sodaas naabã gomdã. Rẽ n so t’a yeel yaa: “Mam yeta yãmb tɩ hal baa Israyɛll pʋgẽ, mam nan ka yã tẽ-kãseng a woto ye.” (Luk 7:9) Sodaas naabã zo-rãmb sẽn ta zakẽ wã, b mikame tɩ tʋm-tʋmdã sẽn da bẽed hal tɩ pa nana wã yĩns sãoogame.

A Zeezi sẽn sãoog tʋm-tʋmdã, a kell n bẽda rẽ n wilg tɩ bu-zẽmsã sʋka, neb nins sẽn na n tall tẽebã na n paama barka. Ad a sẽn yeele: “Neb na n yi yaang la taoore, n zĩnd n dɩ ne a Abrahaam arzãn [“saasẽ,”MN] soolmẽ.” La zʋɩf-rãmb nins sẽn pa na n tall tẽebã yẽ? A Zeezi yeelame tɩ b na n lob-b-la yɩnga, lik bida pʋgẽ, la tɩ yãbr ne yẽn wãbr na n zĩnda beenẽ.—Matye 8:11, 12.

Sɩngrẽ wã, ra yaa Zʋɩf-rãmb bal n da na n paam n tɩ naag Kirisã n dɩ naam saasẽ soolmẽ wã. La kẽer sẽn zãgsã yĩnga, Wẽnnaam bas-b lame, n na n yãk bu-zẽms tɩ b ledg-ba, n dɩ naam saasẽ soolmẽ wã.